9. சீவரவிப்பவாஸவினிச்ச²யகதா²
51. ஏவங் ‘‘சீவரேனவினாவாஸோ’’த்யாதி³மாஹ. தத்த² சீயதீதி சீவரங், சயங் ஸஞ்சயங் வினாதி வஜ்ஜனத்தே² நிபாதோ. வஸனங் வாஸோ, வினா வாஸோ வினாவாஸோ, சீவரேன வினாவாஸோ சீவரவினாவாஸோ, ‘‘சீவரவிப்பவாஸோ’’தி வத்தப்³பே³ வத்திச்சா²வஸேன, கா³தா²பாத³பூரணத்தா²ய வா அலுத்தஸமாஸங் கத்வா ஏவங் வுத்தந்தி த³ட்ட²ப்³ப³ங். ததா² ச வக்க²தி ‘‘திசீவராதி⁴ட்டா²னேன…பே॰… விப்பவாஸோ’’தி, ‘‘இமங் ஸங்கா⁴டிங் அதி⁴ட்டா²மி, இமங் உத்தராஸங்க³ங் அதி⁴ட்டா²மி, இமங் அந்தரவாஸகங் அதி⁴ட்டா²மீ’’தி ஏவங் நாமேன அதி⁴ட்டி²தானங் திண்ணங் சீவரானங் ஏகேகேன விப்பவாஸோதி அத்தோ², ஏகேனபி வினா வஸிதுங் ந வட்டதி, வஸந்தஸ்ஸ பி⁴க்கு²னோ ஸஹ அருணுக்³க³மனா சீவரங் நிஸ்ஸக்³கி³யங் ஹோதி, பாசித்தியஞ்ச ஆபஜ்ஜதீதி ஸம்ப³ந்தோ⁴. வஸிதப்³ப³ந்தி எத்த² வஸனகிரியா சதுஇரியாபத²ஸாதா⁴ரணா, தஸ்மா காயலக்³க³ங் வா ஹோது அலக்³க³ங் வா, அட்³ட⁴தெய்யரதனஸ்ஸ பதே³ஸஸ்ஸ அந்தோ கத்வா திட்ட²ந்தோபி சரந்தோபி நிஸின்னோபி நிபன்னோபி ஹத்த²பாஸே கத்வா வஸந்தோ நாம ஹோதி.
ஏவங் ஸாமஞ்ஞதோ அவிப்பவாஸலக்க²ணங் த³ஸ்ஸெத்வா இதா³னி கா³மாதி³பன்னரஸோகாஸவஸேன விஸேஸதோ த³ஸ்ஸேதுமாஹ ‘‘கா³மி’’ச்சாதி³. தத்த² கா³மனிவேஸனானி பாகடானேவ. உதோ³ஸிதோ நாம யானாதீ³னங் ப⁴ண்டா³னங் ஸாலா. அட்டோ நாம படிராஜாதி³படிபா³ஹனத்த²ங் இட்ட²காஹி கதோ ப³ஹலபி⁴த்திகோ சதுபஞ்சபூ⁴மிகோ பதிஸ்ஸயவிஸேஸோ. மாளோ நாம ஏககூடஸங்க³ஹிதோ சதுரஸ்ஸபாஸாதோ³. பாஸாதோ³ நாம தீ³க⁴பாஸாதோ³. ஹம்மியங் நாம முண்ட³ச்ச²த³னபாஸாதோ³, முண்ட³ச்ச²த³னபாஸாதோ³தி ஸத்தோ² நாம ஜங்க⁴ஸத்தோ² வா ஸகடஸத்தோ² வா. கெ²த்தங் நாம புப்³ப³ண்ணாபரண்ணானங் விருஹனட்டா²னங். த⁴ஞ்ஞகரணங் நாம க²லமண்ட³லங். ஆராமோ நாம புப்பா²ராமோ ப²லாராமோ. விஹாராத³யோ பாகடா ஏவ. தத்த² நிவேஸனாதீ³னி கா³மதோ ப³ஹி ஸன்னிவிட்டா²னி க³ஹிதானீதி வேதி³தப்³ப³ங். அந்தோகா³மே டி²தானஞ்ஹி கா³மக்³க³ஹணேன க³ஹிதத்தா கா³மபரிஹாரோயேவாதி. கா³மக்³க³ஹணேன ச நிக³மனக³ரானிபி க³ஹிதானேவ ஹொந்தி.
பரிகா²ய வா பரிக்கி²த்தோதி இமினா ஸமந்தா நதீ³தளாகாதி³உத³கேன பரிக்கி²த்தோபி பரிக்கி²த்தோயேவாதி த³ஸ்ஸேதி. தங் பமாணங் அதிக்கமித்வாதி க⁴ரஸ்ஸ உபரி ஆகாஸே அட்³ட⁴தெய்யரதனப்பமாணங் அதிக்கமித்வா. ஸபா⁴யே வா வத்த²ப்³ப³ந்தி இமினா ஸபா⁴ஸத்³த³ஸ்ஸ பரியாயோ ஸபா⁴யஸத்³தோ³ நபுங்ஸகலிங்கோ³ அத்தீ²தி த³ஸ்ஸேதி. ஸபா⁴ஸத்³தோ³ ஹி இத்தி²லிங்கோ³, ஸபா⁴யஸத்³தோ³ நபுங்ஸகலிங்கோ³தி. த்³வாரமூலே வாதி நக³ரஸ்ஸ த்³வாரமூலே வா. தேஸந்தி ஸபா⁴யனக³ரத்³வாரமூலானங். தஸ்ஸா வீதி²யா அதிஹரித்வா க⁴ரே நிக்கி²பதீதி வீதி²ங் முஞ்சித்வா டி²தே அஞ்ஞஸ்மிங் க⁴ரே நிக்கி²பதி. தேனாஹ ‘‘வீதி²ஹத்த²பாஸோ ந ரக்க²தீ’’தி. புரதோ வா பச்ச²தோ வா ஹத்த²பாஸேதி க⁴ரஸ்ஸ ஹத்த²பாஸங் ஸந்தா⁴ய வத³தி.
ஏவங் கா³மவஸேன விப்பவாஸாவிப்பவாஸங் த³ஸ்ஸெத்வா இதா³னி நிவேஸனவஸேன த³ஸ்ஸெந்தோ ‘‘ஸசே ஏககுலஸ்ஸ ஸந்தகங் நிவேஸனங் ஹோதீ’’திஆதி³மாஹ. தத்த² ஓவரகோ நாம க³ப்³ப⁴ஸ்ஸ ‘‘உதோ³ஸிதி’’ச்சாதி³மாஹ. தத்த² வுத்தனயேனேவாதி ‘‘ஏககுலஸ்ஸ ஸந்தகோ உதோ³ஸிதோ ஹோதி பரிக்கி²த்தோ சா’’திஆதி³னா நிவேஸனே வுத்தனயேன. ஏவ-ஸத்³தோ³ விஸேஸனிவத்தி அத்தோ². தேன விஸேஸோ நத்தீ²தி த³ஸ்ஸேதி.
இதா³னி யேஸு விஸேஸோ அத்தி², தே த³ஸ்ஸெந்தோ ‘‘ஸசே ஏககுலஸ்ஸ நாவா’’திஆதி³மாஹ. தத்த² பரியாதி³யித்வாதி வினிவிஜ்ஜி²த்வா, அஜ்ஜொ²த்த²ரித்வா வா. வுத்தமேவத்த²ங் விபா⁴வேதி ‘‘அந்தோபவிட்டே²னா’’திஆதி³னா. தத்த² அந்தோபவிட்டே²னாதி கா³மஸ்ஸ, நதி³யா வா அந்தோபவிட்டே²ன. ‘‘ஸத்தே²னா’’தி பாட²ஸேஸோ. நதீ³பரிஹாரோ லப்³ப⁴தீதி எத்த² ‘‘விஸுங் நதீ³பரிஹாரஸ்ஸ அவுத்தத்தா கா³மாதீ³ஹி அஞ்ஞத்த² விய சீவரஹத்த²பாஸோயேவ நதீ³பரிஹாரோ’’தி தீஸுபி க³ண்டி²பதே³ஸு வுத்தங். அஞ்ஞே பன ‘‘இமினா அட்ட²கதா²வசனேன நதீ³பரிஹாரோபி விஸுங் ஸித்³தோ⁴தி நதீ³ஹத்த²பாஸோ ந விஜஹிதப்³போ³’’தி வத³ந்தி. யதா² பன அஜ்ஜோ²காஸே ஸத்தப்³ப⁴ந்தரவஸேன அரஞ்ஞபரிஹாரோ லப்³ப⁴தி, ஏவங் நதி³யங் உத³குக்கே²பவஸேன நதீ³பரிஹாரோ லப்³ப⁴தீதி கத்வா அட்ட²கதா²யங் நதீ³பரிஹாரோ விஸுங் அவுத்தோ ஸியா ஸத்தப்³ப⁴ந்தரஉத³குக்கே²பஸீமானங் அரஞ்ஞனதீ³ஸு அப³த்³த⁴ஸீமாவஸேன லப்³ப⁴மானத்தா. ஏவஞ்ச ஸதி ஸமுத்³த³ஜாதஸ்ஸரேஸுபி பரிஹாரோ அவுத்தஸித்³தோ⁴ ஹோதி நதி³யா ஸமானலக்க²ணத்தா, நதீ³ஹத்த²பாஸோ ந விஜஹிதப்³போ³தி பன அத்தே² ஸதி நதி³யா அதிவித்தா²ரத்தா ப³ஹுஸாதா⁴ரணத்தா ச அந்தோனதி³யங் சீவரங் ட²பெத்வா நதீ³ஹத்த²பாஸே டி²தேன சீவரஸ்ஸ பவத்திங் ஜானிதுங் ந ஸக்கா ப⁴வெய்ய. ஏஸ நயோ ஸமுத்³த³ஜாதஸ்ஸரேஸுபி. அந்தோஉத³குக்கே²பே வா தஸ்ஸ ஹத்த²பாஸே வா டி²தேன பன ஸக்காதி அயங் அம்ஹாகங் அத்தனோமதி, விசாரெத்வா க³ஹேதப்³ப³ங். விஹாரஸீமந்தி அவிப்பவாஸஸீமங் ‘‘விஹாரங் க³ந்த்வா வஸிதப்³ப³’’ந்தி வுத்தங். ஸத்த²ஸமீபேதி இத³ங் யதா²வுத்தஅப்³ப⁴ந்தரபரிச்சே²த³வஸேன வுத்தங்.
யஸ்மா ‘‘நானாகுலஸ்ஸ பரிக்கி²த்தே கெ²த்தே சீவரங் நிக்கி²பித்வா கெ²த்தத்³வாரமூலே வா தஸ்ஸ ஹத்த²பாஸே வா வத்த²ப்³ப³’’ந்தி வுத்தங், தஸ்மா த்³வாரமூலதோ அஞ்ஞத்த² கெ²த்தேபி வஸந்தேன சீவரங் நிக்கி²பித்வா ஹத்த²பாஸே கத்வாயேவ வஸிதப்³ப³ங்.
விஹாரோ நாம ஸபரிக்கி²த்தோ வா அபரிக்கி²த்தோ வா ஸகலோ ஆவாஸோதி வத³ந்தி. யஸ்மிங் விஹாரேதி எத்த² பன ஏககே³ஹமேவ வுத்தங். விமதிவினோத³னியங் (வி॰ வி॰ டீ॰ 1.491-494) பன ‘‘விஹாரோ நாம உபசாரஸீமா. யஸ்மிங் விஹாரேதி தஸ்ஸ அந்தோபரிவேணாதி³ங் ஸந்தா⁴ய வுத்த’’ந்தி வுத்தங். ஏககுலாதி³ஸந்தகதா செத்த² காராபகானங் வஸேன வேதி³தப்³பா³.
யங் மஜ்ஜ²ன்ஹிகே காலே ஸமந்தா சா²யா ப²ரதீதி யதா³ மஹாவீதி²யங் உஜுகமேவ க³ச்ச²ந்தங் ஸூரியமண்ட³லங் மஜ்ஜ²ன்ஹிகங் பாபுணாதி, ததா³ யங் ஓகாஸங் சா²யா ப²ரதி, தங் ஸந்தா⁴ய வுத்தங். விமதிவினோத³னியங் பன ‘‘சா²யாய பு²ட்டோ²காஸஸ்ஸாதி உஜுகங் அவிக்கி²த்தலெட்³டு³பாதப்³ப⁴ந்தரங் ஸந்தா⁴ய வத³தீ’’தி வுத்தங். அக³மனபதே²தி தத³ஹேவ க³ந்த்வா நிவத்தேதுங் அஸக்குணெய்யகே ஸமுத்³த³மஜ்ஜே² யே தீ³பகா, தேஸூதி யோஜனா. இதரஸ்மிந்தி புரத்தி²மதி³ஸாய சீவரே.
52. நதி³ங் ஓதரதீதி ஹத்த²பாஸங் முஞ்சித்வா ஓதரதி. நாபஜ்ஜதீதி பரிபோ⁴க³பச்சயா து³க்கடங் நாபஜ்ஜதி. தேனாஹ ‘‘ஸோ ஹீ’’திஆதி³. அபரிபோ⁴கா³ரஹத்தாதி இமினா நிஸ்ஸக்³கி³யசீவரங் அனிஸ்ஸஜ்ஜித்வா பரிபு⁴ஞ்ஜந்தஸ்ஸ து³க்கடங் அசித்தகந்தி ஸித்³த⁴ங். ஏகங் பாருபித்வா ஏகங் அங்ஸகூடே ட²பெத்வா க³ந்தப்³ப³ந்தி இத³ங் ப³ஹூனங் ஸஞ்சரணட்டா²னே ஏவங் அகத்வா க³மனங் ந ஸாருப்பந்தி கத்வா வுத்தங், ந ஆபத்திஅங்க³த்தா. ப³ஹிகா³மே ட²பெத்வாபி அபாருபிதப்³ப³தாய வுத்தங் ‘‘வினயகம்மங் காதப்³ப³’’ந்தி. அத² வா விஹாரே ஸபா⁴க³ங் பி⁴க்கு²ங் ந பஸ்ஸதி, ஏவங் ஸதி ஆஸனஸாலங் க³ந்த்வா வினயகம்மங் காதப்³ப³ந்தி யோஜனா. ஆஸனஸாலங் க³ச்ச²ந்தேன கிங் தீஹி சீவரேஹி க³ந்தப்³ப³ந்தி ஆஹ ‘‘ஸந்தருத்தரேனா’’தி நட்ட²சீவரஸ்ஸ ஸந்தருத்தரஸாதி³யனதோ. ஸங்கா⁴டி பன கிங் காதப்³பா³தி ஆஹ ‘‘ஸங்கா⁴டிங் ப³ஹிகா³மே ட²பெத்வா’’தி. உத்தராஸங்கே³ ச ப³ஹிகா³மே ட²பிதஸங்கா⁴டியஞ்ச பட²மங் வினயகம்மங் கத்வா பச்சா² உத்தராஸங்க³ங் நிவாஸெத்வா அந்தரவாஸகே காதப்³ப³ங். எத்த² ச ப³ஹிகா³மே ட²பிதஸ்ஸபி வினயகம்மவசனதோ பரம்முகா²பி டி²தங் நிஸ்ஸஜ்ஜிதுங், நிஸ்ஸட்ட²ங் தா³துஞ்ச வட்டதீதி வேதி³தப்³ப³ங்.
த³ஹரானங் க³மனே ஸஉஸ்ஸாஹத்தா ‘‘நிஸ்ஸயோ பன ந படிப்பஸ்ஸம்ப⁴தீ’’தி வுத்தங். முஹுத்தங்…பே॰… படிப்பஸ்ஸம்ப⁴தீதி ஸஉஸ்ஸாஹத்தே க³மனஸ்ஸ உபச்சி²ன்னத்தா வுத்தங், தேஸங் பன புராருணா உட்ட²ஹித்வா ஸஉஸ்ஸாஹேன க³ச்ச²ந்தானங் அருணே அந்தரா உட்டி²தேபி ந படிப்பஸ்ஸம்ப⁴தி ‘‘யாவ அருணுக்³க³மனா ஸயந்தீ’’தி வுத்தத்தா. தேனேவ ‘‘கா³மங் பவிஸித்வா…பே॰… ந படிப்பஸ்ஸம்ப⁴தீ’’தி வுத்தங். அஞ்ஞமஞ்ஞஸ்ஸ வசனங் அக்³க³ஹெத்வாதிஆதி³ம்ஹி ஸஉஸ்ஸாஹத்தா க³மனக்க²ணே படிப்பஸ்ஸத்³தி⁴ ந வுத்தா. தே⁴னுப⁴யேனாதி தருணவச்ச²கா³வீனங் ஆதா⁴வித்வா ஸிங்கே³ன பஹரணப⁴யேன. நிஸ்ஸயோ ச படிப்பஸ்ஸம்ப⁴தீதி எத்த² தே⁴னுப⁴யாதீ³ஹி டி²தானங் யாவ ப⁴யவூபஸமா டா²தப்³ப³தோ ‘‘அந்தோஅருணேயேவ க³மிஸ்ஸாமீ’’தி நியமேதுங் அஸக்குணெய்யத்தா வுத்தங். யத்த² பன ஏவங் நியமேதுங் ஸக்கா, தத்த² அந்தரா அருணே உக்³க³தேபி நிஸ்ஸயோ ந படிப்பஸ்ஸம்ப⁴தி பே⁴ஸஜ்ஜத்தா²ய கா³மங் பவிட்ட²த³ஹரானங் விய.
அந்தோஸீமாயங் கா³மந்தி அவிப்பவாஸஸீமாஸம்முதிதோ பச்சா² பதிட்டா²பிதகா³மங் ஸந்தா⁴ய வத³தி கா³மஞ்ச கா³மூபசாரஞ்ச ட²பெத்வா ஸம்மன்னிதப்³ப³தோ. பவிட்டா²னந்தி ஆசரியந்தேவாஸிகானங் விஸுங் விஸுங் க³தானங் அவிப்பவாஸஸீமத்தா நேவ சீவரானி நிஸ்ஸக்³கி³யானி ஹொந்தி, ஸஉஸ்ஸாஹதாய ந நிஸ்ஸயோ படிப்பஸ்ஸம்ப⁴தி. அந்தராமக்³கே³தி த⁴ம்மங் ஸுத்வா ஆக³ச்ச²ந்தானங் அந்தராமக்³கே³.
இதி வினயஸங்க³ஹஸங்வண்ணனாபூ⁴தே வினயாலங்காரே
சீவரவிப்பவாஸவினிச்ச²யகதா²லங்காரோ நாம
நவமோ பரிச்சே²தோ³.