౭. రాహులసంయుత్తం
౧. పఠమవగ్గో
౧-౮. చక్ఖుసుత్తాదివణ్ణనా
౧౮౮-౧౯౫. రాహులసంయుత్తస్స ఏకోతి చతూసు ఇరియాపథేసు ఏకవిహారీ. వూపకట్ఠోతి వివేకట్ఠో నిస్సద్దో. అప్పమత్తోతి సతియా అవిప్పవసన్తో. ఆతాపీతి వీరియసమ్పన్నో. పహితత్తో విహరేయ్యన్తి విసేసాధిగమత్థాయ పేసితత్తో హుత్వా విహరేయ్యం. అనిచ్చన్తి హుత్వా అభావాకారేన అనిచ్చం. అథ వా ఉప్పాదవయవన్తతాయ తావకాలికతాయ విపరిణామకోటియా నిచ్చపటిక్ఖేపతోతి ఇమేహిపి కారణేహి అనిచ్చం. దుక్ఖన్తి చతూహి కారణేహి దుక్ఖం దుక్ఖమనట్ఠేన దుక్ఖవత్థుకట్ఠేన సతతసమ్పీళనట్ఠేన సుఖపటిక్ఖేపేనాతి. కల్లన్తి యుత్తం. ఏతం మమాతి తణ్హాగాహో. ఏసోహమస్మీతి మానగాహో. ఏసో మే అత్తాతి దిట్ఠిగాహో. తణ్హాగాహో చేత్థ అట్ఠసతతణ్హావిచరితవసేన, మానగాహో నవవిధమానవసేన, దిట్ఠిగాహో ద్వాసట్ఠిదిట్ఠివసేన వేదితబ్బో. నిబ్బిన్దం విరజ్జతీతి ఏత్థ విరాగవసేన చత్తారో మగ్గా కథితా, విరాగా విముచ్చతీతి ఏత్థ విముత్తివసేన చత్తారి సామఞ్ఞఫలాని.
ఏత్థ చ పఞ్చసు ద్వారేసు పసాదావ గహితా, మనోతి ఇమినా తేభూమకం సమ్మసనచారచిత్తం. దుతియే తణ్హాతి తస్మిం తస్మిం ద్వారే జవనప్పత్తావ లబ్భతి. పఠమాదీని.
౯. ధాతుసుత్తవణ్ణనా
౧౯౬. నవమే
౧౦. ఖన్ధసుత్తవణ్ణనా
౧౯౭. దసమే
పఠమో వగ్గో.
౨. దుతియవగ్గో
౧-౧౦. చక్ఖుసుత్తాదివణ్ణనా
౧౯౮-౧౯౯. దుతియే దస ఉత్తానత్థానేవ. పఠమాదీని.
౧౧. అనుసయసుత్తవణ్ణనా
౨౦౦. ఏకాదసమే ఇమస్మిఞ్చ సవిఞ్ఞాణకే కాయేతి అత్తనో సవిఞ్ఞాణకకాయం దస్సేతి, బహిద్ధా చాతి పరస్స సవిఞ్ఞాణకం వా అవిఞ్ఞాణకం వా. పురిమేన వా అత్తనో చ పరస్స చ విఞ్ఞాణమేవ అహఙ్కారమమఙ్కారమానానుసయాతి అహంకారదిట్ఠి చ మమంకారతణ్హా చ మానానుసయా చ. న హోన్తీతి ఏతే కిలేసా కథం జానన్తస్స ఏతేసు వత్థూసు న హోన్తీతి పుచ్ఛతి. సమ్మప్పఞ్ఞాయ పస్సతీతి సహ విపస్సనాయ మగ్గపఞ్ఞాయ సుట్ఠు పస్సతి. ఏకాదసమం.
౧౨. అపగతసుత్తవణ్ణనా
౨౦౧. ద్వాదసమే అహఙ్కారమమఙ్కారమానాపగతన్తి అహంకారతో చ మమంకారతో చ మానతో చ అపగతం. విధా సమతిక్కన్తన్తి మానకోట్ఠాసే సుట్ఠు అతిక్కన్తం. సన్తం సువిముత్తన్తి కిలేసవూపసమేన సన్తం, కిలేసేహేవ సుట్ఠు విముత్తం. సేసం ఉత్తానమేవాతి. ద్వాదసమం.
దుతియో వగ్గో.
ద్వీసుపి
రాహులసంయుత్తవణ్ణనా నిట్ఠితా.