౫. సమ్మప్పధానసంయుత్తం
౧. గఙ్గాపేయ్యాలవగ్గో
౧-౧౨. పాచీనాదిసుత్తద్వాదసకం
౬౫౧-౬౬౨. సావత్థినిదానం . తత్ర ఖో భగవా ఏతదవోచ – ‘‘చత్తారోమే, భిక్ఖవే, సమ్మప్పధానా. కతమే చత్తారో? ఇధ, భిక్ఖవే, భిక్ఖు అనుప్పన్నానం పాపకానం అకుసలానం ధమ్మానం అనుప్పాదాయ ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. ఉప్పన్నానం పాపకానం అకుసలానం ధమ్మానం పహానాయ ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. అనుప్పన్నానం కుసలానం ధమ్మానం ఉప్పాదాయ ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. ఉప్పన్నానం కుసలానం ధమ్మానం ఠితియా అసమ్మోసాయ భియ్యోభావాయ వేపుల్లాయ భావనాయ పారిపూరియా ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. ఇమే ఖో, భిక్ఖవే, చత్తారో సమ్మప్పధానాతి’’.
‘‘సేయ్యథాపి, భిక్ఖవే, గఙ్గా నదీ పాచీననిన్నా పాచీనపోణా పాచీనపబ్భారా; ఏవమేవ ఖో, భిక్ఖవే, భిక్ఖు చత్తారో సమ్మప్పధానే భావేన్తో చత్తారో సమ్మప్పధానే బహులీకరోన్తో నిబ్బాననిన్నో హోతి నిబ్బానపోణో నిబ్బానపబ్భారో. కథఞ్చ, భిక్ఖవే, భిక్ఖు చత్తారో సమ్మప్పధానే భావేన్తో చత్తారో సమ్మప్పధానే బహులీకరోన్తో నిబ్బాననిన్నో హోతి నిబ్బానపోణో నిబ్బానపబ్భారో? ఇధ , భిక్ఖవే, భిక్ఖు అనుప్పన్నానం పాపకానం అకుసలానం ధమ్మానం అనుప్పాదాయ ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. ఉప్పన్నానం పాపకానం అకుసలానం ధమ్మానం పహానాయ ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. అనుప్పన్నానం కుసలానం ధమ్మానం ఉప్పాదాయ ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. ఉప్పన్నానం కుసలానం ధమ్మానం ఠితియా అసమ్మోసాయ భియ్యోభావాయ వేపుల్లాయ భావనాయ పారిపూరియా ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. ఏవం ఖో, భిక్ఖవే, భిక్ఖు చత్తారో సమ్మప్పధానే భావేన్తో చత్తారో సమ్మప్పధానే బహులీకరోన్తో నిబ్బాననిన్నో హోతి నిబ్బానపోణో నిబ్బానపబ్భారో’’తి. ద్వాదసమం. (సమ్మప్పధానసంయుత్తస్స గఙ్గాపేయ్యాలీ సమ్మప్పధానవసేన విత్థారేతబ్బా).
గఙ్గాపేయ్యాలవగ్గో పఠమో.
తస్సుద్దానం –
ఛ పాచీనతో నిన్నా, ఛ నిన్నా చ సముద్దతో;
ద్వేతే ఛ ద్వాదస హోన్తి, వగ్గో తేన పవుచ్చతీతి.
౨. అప్పమాదవగ్గో
(అప్పమాదవగ్గో సమ్మప్పధానవసేన విత్థారేతబ్బో).
తస్సుద్దానం –
తథాగతం పదం కూటం, మూలం సారేన వస్సికం;
రాజా చన్దిమసూరియా, వత్థేన దసమం పదన్తి.
౩. బలకరణీయవగ్గో
౧-౧౨. బలకరణీయాదిసుత్తద్వాదసకం
౬౭౩-౬౮౪. ‘‘సేయ్యథాపి , భిక్ఖవే, యే కేచి బలకరణీయా కమ్మన్తా కయిరన్తి, సబ్బే తే పథవిం నిస్సాయ పథవియం పతిట్ఠాయ ఏవమేతే బలకరణీయా కమ్మన్తా కయిరన్తి; ఏవమేవ ఖో, భిక్ఖవే, భిక్ఖు సీలం నిస్సాయ సీలే పతిట్ఠాయ చత్తారో సమ్మప్పధానే భావేతి, చత్తారో సమ్మప్పధానే బహులీకరోతి. కథఞ్చ, భిక్ఖవే, భిక్ఖు సీలం నిస్సాయ సీలే పతిట్ఠాయ చత్తారో సమ్మప్పధానే భావేతి, చత్తారో సమ్మప్పధానే బహులీకరోతి? ఇధ, భిక్ఖవే, భిక్ఖు అనుప్పన్నానం పాపకానం అకుసలానం ధమ్మానం అనుప్పాదాయ ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి…పే॰… ఉప్పన్నానం కుసలానం ధమ్మానం ఠితియా అసమ్మోసాయ భియ్యోభావాయ వేపుల్లాయ భావనాయ పారిపూరియా ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. ఏవం ఖో, భిక్ఖవే, భిక్ఖు సీలం నిస్సాయ సీలే పతిట్ఠాయ చత్తారో సమ్మప్పధానే భావేతి, చత్తారో సమ్మప్పధానే బహులీకరోతీ’’తి. (ఏవం బలకరణీయవగ్గో సమ్మప్పధానవసేన విత్థారేతబ్బో). ద్వాదసమం.
బలకరణీయవగ్గో తతియో.
తస్సుద్దానం –
బలం బీజఞ్చ నాగో చ, రుక్ఖో కుమ్భేన సూకియా;
ఆకాసేన చ ద్వే మేఘా, నావా ఆగన్తుకా నదీతి.
౪. ఏసనావగ్గో
౧-౧౦. ఏసనాదిసుత్తదసకం
౬౮౫-౬౯౪. ‘‘తిస్సో ఇమా, భిక్ఖవే, ఏసనా. కతమా తిస్సో? కామేసనా, భవేసనా, బ్రహ్మచరియేసనా – ఇమా ఖో, భిక్ఖవే, తిస్సో ఏసనా. ఇమాసం ఖో, భిక్ఖవే, తిస్సన్నం ఏసనానం అభిఞ్ఞాయ పరిఞ్ఞాయ పరిక్ఖయాయ పహానాయ చత్తారో సమ్మప్పధానా భావేతబ్బా. కతమే చత్తారో? ఇధ, భిక్ఖవే, భిక్ఖు అనుప్పన్నానం…పే॰… ఉప్పన్నానం కుసలానం ధమ్మానం ఠితియా అసమ్మోసాయ భియ్యోభావాయ వేపుల్లాయ భావనాయ పారిపూరియా ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. ఇమాసం ఖో, భిక్ఖవే, తిస్సన్నం ఏసనానం అభిఞ్ఞాయ పరిఞ్ఞాయ పరిక్ఖయాయ పహానాయ ఇమే చత్తారో సమ్మప్పధానా భావేతబ్బా’’తి. (విత్థారేతబ్బం). దసమం.
ఏసనావగ్గో చతుత్థో.
తస్సుద్దానం –
ఏసనా విధా ఆసవో, భవో చ దుక్ఖతా తిస్సో;
ఖిలం మలఞ్చ నీఘో చ, వేదనా తణ్హా తసినా చాతి.
౫. ఓఘవగ్గో
౧-౧౦. ఓఘాదిసుత్తదసకం
౬౯౫-౭౦౪. ‘‘పఞ్చిమాని , భిక్ఖవే, ఉద్ధమ్భాగియాని సంయోజనాని. కతమాని పఞ్చ? రూపరాగో, అరూపరాగో, మానో, ఉద్ధచ్చం, అవిజ్జా – ఇమాని ఖో, భిక్ఖవే, పఞ్చుద్ధమ్భాగియాని సంయోజనాని. ఇమేసం ఖో, భిక్ఖవే, పఞ్చన్నం ఉద్ధమ్భాగియానం సంయోజనానం అభిఞ్ఞాయ పరిఞ్ఞాయ పరిక్ఖయాయ పహానాయ చత్తారో సమ్మప్పధానా భావేతబ్బా. కతమే చత్తారో? ఇధ, భిక్ఖవే, భిక్ఖు అనుప్పన్నానం…పే॰… ఉప్పన్నానం కుసలానం ధమ్మానం ఠితియా అసమ్మోసాయ భియ్యోభావాయ వేపుల్లాయ భావనాయ పారిపూరియా ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. ఇమేసం ఖో, భిక్ఖవే, పఞ్చన్నం ఉద్ధమ్భాగియానం సంయోజనానం అభిఞ్ఞాయ పరిఞ్ఞాయ పరిక్ఖయాయ పహానాయ ఇమే చత్తారో సమ్మప్పధానా భావేతబ్బా’’తి. (విత్థారేతబ్బా). దసమం.
ఓఘవగ్గో పఞ్చమో.
తస్సుద్దానం –
ఓఘో యోగో ఉపాదానం, గన్థా అనుసయేన చ;
కామగుణా నీవరణా, ఖన్ధా ఓరుద్ధమ్భాగియాతి.
సమ్మప్పధానసంయుత్తం పఞ్చమం.