౧౩. ఏకపుగ్గలవగ్గో
౧౭౦. ‘‘ఏకపుగ్గలో , భిక్ఖవే, లోకే ఉప్పజ్జమానో ఉప్పజ్జతి బహుజనహితాయ బహుజనసుఖాయ లోకానుకమ్పాయ అత్థాయ హితాయ సుఖాయ దేవమనుస్సానం . కతమో ఏకపుగ్గలో? తథాగతో అరహం సమ్మాసమ్బుద్ధో. అయం ఖో, భిక్ఖవే, ఏకపుగ్గలో లోకే ఉప్పజ్జమానో ఉప్పజ్జతి బహుజనహితాయ బహుజనసుఖాయ లోకానుకమ్పాయ అత్థాయ హితాయ సుఖాయ దేవమనుస్సాన’’న్తి.
౧౭౧. ‘‘ఏకపుగ్గలస్స, భిక్ఖవే, పాతుభావో దుల్లభో లోకస్మిం. కతమస్స ఏకపుగ్గలస్స? తథాగతస్స అరహతో సమ్మాసమ్బుద్ధస్స. ఇమస్స ఖో, భిక్ఖవే, ఏకపుగ్గలస్స పాతుభావో దుల్లభో లోకస్మి’’న్తి.
౧౭౨. ‘‘ఏకపుగ్గలో, భిక్ఖవే, లోకే ఉప్పజ్జమానో ఉప్పజ్జతి అచ్ఛరియమనుస్సో. కతమో ఏకపుగ్గలో? తథాగతో అరహం సమ్మాసమ్బుద్ధో. అయం ఖో, భిక్ఖవే, ఏకపుగ్గలో లోకే ఉప్పజ్జమానో ఉప్పజ్జతి అచ్ఛరియమనుస్సో’’తి.
౧౭౩. ‘‘ఏకపుగ్గలస్స, భిక్ఖవే, కాలకిరియా బహునో జనస్స అనుతప్పా ఆనుతప్పా (సీ॰) హోతి. కతమస్స ఏకపుగ్గలస్స? తథాగతస్స అరహతో సమ్మాసమ్బుద్ధస్స. ఇమస్స ఖో, భిక్ఖవే, ఏకపుగ్గలస్స కాలకిరియా బహునో జనస్స అనుతప్పా హోతీ’’తి.
౧౭౪. ‘‘ఏకపుగ్గలో, భిక్ఖవే, లోకే ఉప్పజ్జమానో ఉప్పజ్జతి అదుతియో అసహాయో అప్పటిమో అప్పటిసమో అప్పటిభాగో అప్పటిపుగ్గలో అసమో అసమసమో ద్విపదానం అగ్గో. కతమో ఏకపుగ్గలో? తథాగతో అరహం సమ్మాసమ్బుద్ధో. అయం ఖో, భిక్ఖవే, ఏకపుగ్గలో లోకే ఉప్పజ్జమానో ఉప్పజ్జతి అదుతియో అసహాయో అప్పటిమో అప్పటిసమో అప్పటిభాగో అప్పటిపుగ్గలో అసమో అసమసమో ద్విపదానం అగ్గో’’తి.
౧౭౫-౧౮౬. ‘‘ఏకపుగ్గలస్స , భిక్ఖవే, పాతుభావా మహతో చక్ఖుస్స పాతుభావో హోతి, మహతో ఆలోకస్స పాతుభావో హోతి, మహతో ఓభాసస్స పాతుభావో హోతి, ఛన్నం అనుత్తరియానం పాతుభావో హోతి, చతున్నం పటిసమ్భిదానం సచ్ఛికిరియా హోతి, అనేకధాతుపటివేధో హోతి, నానాధాతుపటివేధో హోతి, విజ్జావిముత్తిఫలసచ్ఛికిరియా హోతి, సోతాపత్తిఫలసచ్ఛికిరియా హోతి, సకదాగామిఫలసచ్ఛికిరియా హోతి, అనాగామిఫలసచ్ఛికిరియా హోతి, అరహత్తఫలసచ్ఛికిరియా హోతి. కతమస్స ఏకపుగ్గలస్స? తథాగతస్స అరహతో సమ్మాసమ్బుద్ధస్స. ఇమస్స ఖో, భిక్ఖవే, ఏకపుగ్గలస్స పాతుభావా మహతో చక్ఖుస్స పాతుభావో హోతి, మహతో ఆలోకస్స పాతుభావో హోతి, మహతో ఓభాసస్స పాతుభావో హోతి, ఛన్నం అనుత్తరియానం పాతుభావో హోతి, చతున్నం పటిసమ్భిదానం సచ్ఛికిరియా హోతి, అనేకధాతుపటివేధో హోతి, నానాధాతుపటివేధో హోతి, విజ్జావిముత్తిఫలసచ్ఛికిరియా హోతి, సోతాపత్తిఫలసచ్ఛికిరియా హోతి, సకదాగామిఫలసచ్ఛికిరియా హోతి, అనాగామిఫలసచ్ఛికిరియా హోతి, అరహత్తఫలసచ్ఛికిరియా హోతీ’’తి.
౧౮౭. ‘‘నాహం భిక్ఖవే, అఞ్ఞం ఏకపుగ్గలమ్పి సమనుపస్సామి యో ఏవం తథాగతేన అనుత్తరం ధమ్మచక్కం పవత్తితం సమ్మదేవ అనుప్పవత్తేతి యథయిదం, భిక్ఖవే, సారిపుత్తో. సారిపుత్తో, భిక్ఖవే, తథాగతేన అనుత్తరం ధమ్మచక్కం పవత్తితం సమ్మదేవ అనుప్పవత్తేతీ’’తి.
ఏకపుగ్గలవగ్గో తేరసమో.