౨. బలవగ్గో
౧. అననుస్సుతసుత్తం
౧౧. ‘‘పుబ్బాహం , భిక్ఖవే, అననుస్సుతేసు ధమ్మేసు అభిఞ్ఞావోసానపారమిప్పత్తో పటిజానామి. పఞ్చిమాని, భిక్ఖవే, తథాగతస్స తథాగతబలాని, యేహి బలేహి సమన్నాగతో తథాగతో ఆసభం ఠానం పటిజానాతి, పరిసాసు సీహనాదం నదతి, బ్రహ్మచక్కం పవత్తేతి. కతమాని పఞ్చ? సద్ధాబలం, హిరీబలం, ఓత్తప్పబలం, వీరియబలం, పఞ్ఞాబలం – ఇమాని ఖో, భిక్ఖవే, పఞ్చ తథాగతస్స తథాగతబలాని యేహి బలేహి సమన్నాగతో తథాగతో ఆసభం ఠానం పటిజానాతి, పరిసాసు సీహనాదం నదతి, బ్రహ్మచక్కం పవత్తేతీ’’తి. పఠమం.
౨. కూటసుత్తం
౧౨. ‘‘పఞ్చిమాని , భిక్ఖవే, సేఖబలాని. కతమాని పఞ్చ? సద్ధాబలం, హిరీబలం, ఓత్తప్పబలం, వీరియబలం, పఞ్ఞాబలం – ఇమాని ఖో, భిక్ఖవే, పఞ్చ సేఖబలాని. ఇమేసం ఖో, భిక్ఖవే, పఞ్చన్నం సేఖబలానం ఏతం అగ్గం ఏతం సఙ్గాహికం ఏతం సఙ్ఘాతనియం, యదిదం పఞ్ఞాబలం.
‘‘సేయ్యథాపి , భిక్ఖవే , కూటాగారస్స ఏతం అగ్గం ఏతం సఙ్గాహికం ఏతం సఙ్ఘాతనియం, యదిదం కూటం. ఏవమేవం ఖో, భిక్ఖవే, ఇమేసం పఞ్చన్నం సేఖబలానం ఏతం అగ్గం ఏతం సఙ్గాహికం ఏతం సఙ్ఘాతనియం, యదిదం పఞ్ఞాబలం.
‘‘తస్మాతిహ, భిక్ఖవే, ఏవం సిక్ఖితబ్బం – ‘సద్ధాబలేన సమన్నాగతా భవిస్సామ సేఖబలేన, హిరీబలేన… ఓత్తప్పబలేన… వీరియబలేన… పఞ్ఞాబలేన సమన్నాగతా భవిస్సామ సేఖబలేనా’తి. ఏవఞ్హి వో, భిక్ఖవే, సిక్ఖితబ్బ’’న్తి. దుతియం.
౩. సంఖిత్తసుత్తం
౧౩. ‘‘పఞ్చిమాని , భిక్ఖవే, బలాని. కతమాని పఞ్చ? సద్ధాబలం, వీరియబలం, సతిబలం, సమాధిబలం, పఞ్ఞాబలం – ఇమాని ఖో, భిక్ఖవే, పఞ్చ బలానీ’’తి. తతియం.
౪. విత్థతసుత్తం
౧౪. ‘‘పఞ్చిమాని, భిక్ఖవే, బలాని. కతమాని పఞ్చ? సద్ధాబలం, వీరియబలం, సతిబలం, సమాధిబలం, పఞ్ఞాబలం.
‘‘కతమఞ్చ, భిక్ఖవే, సద్ధాబలం? ఇధ, భిక్ఖవే, అరియసావకో సద్ధో హోతి, సద్దహతి తథాగతస్స బోధిం – ‘ఇతిపి సో భగవా అరహం సమ్మాసమ్బుద్ధో విజ్జాచరణసమ్పన్నో సుగతో లోకవిదూ అనుత్తరో పురిసదమ్మసారథి సత్థా దేవమనుస్సానం బుద్ధో భగవా’తి . ఇదం వుచ్చతి, భిక్ఖవే, సద్ధాబలం.
‘‘కతమఞ్చ, భిక్ఖవే, వీరియబలం? ఇధ, భిక్ఖవే, అరియసావకో ఆరద్ధవీరియో విహరతి అకుసలానం ధమ్మానం పహానాయ, కుసలానం ధమ్మానం ఉపసమ్పదాయ థామవా దళ్హపరక్కమో అనిక్ఖిత్తధురో కుసలేసు ధమ్మేసు. ఇదం వుచ్చతి, భిక్ఖవే, వీరియబలం.
‘‘కతమఞ్చ, భిక్ఖవే , సతిబలం? ఇధ, భిక్ఖవే, అరియసావకో సతిమా హోతి పరమేన సతినేపక్కేన సమన్నాగతో, చిరకతమ్పి చిరభాసితమ్పి సరితా అనుస్సరితా. ఇదం వుచ్చతి, భిక్ఖవే, సతిబలం.
‘‘కతమఞ్చ, భిక్ఖవే, సమాధిబలం? ఇధ, భిక్ఖవే, అరియసావకో వివిచ్చేవ కామేహి వివిచ్చ అకుసలేహి ధమ్మేహి సవితక్కం సవిచారం వివేకజం పీతిసుఖం పఠమం ఝానం ఉపసమ్పజ్జ విహరతి; వితక్కవిచారానం వూపసమా అజ్ఝత్తం సమ్పసాదనం చేతసో ఏకోదిభావం అవితక్కం అవిచారం సమాధిజం పీతిసుఖం దుతియం ఝానం ఉపసమ్పజ్జ విహరతి; పీతియా చ విరాగా ఉపేక్ఖకో చ విహరతి సతో చ సమ్పజానో సుఖఞ్చ కాయేన పటిసంవేదేతి యం తం అరియా ఆచిక్ఖన్తి – ‘ఉపేక్ఖకో సతిమా సుఖవిహారీ’తి తతియం ఝానం ఉపసమ్పజ్జ విహరతి; సుఖస్స చ పహానా దుక్ఖస్స చ పహానా పుబ్బేవ సోమనస్సదోమనస్సానం అత్థఙ్గమా అదుక్ఖమసుఖం ఉపేక్ఖాసతిపారిసుద్ధిం చతుత్థం ఝానం ఉపసమ్పజ్జ విహరతి. ఇదం వుచ్చతి, భిక్ఖవే, సమాధిబలం.
‘‘కతమఞ్చ, భిక్ఖవే, పఞ్ఞాబలం? ఇధ, భిక్ఖవే, అరియసావకో పఞ్ఞవా హోతి ఉదయత్థగామినియా పఞ్ఞాయ సమన్నాగతో అరియాయ నిబ్బేధికాయ సమ్మా దుక్ఖక్ఖయగామినియా. ఇదం వుచ్చతి, భిక్ఖవే, పఞ్ఞాబలం. ఇమాని ఖో, భిక్ఖవే, పఞ్చ బలానీ’’తి. చతుత్థం.
౫. దట్ఠబ్బసుత్తం
౧౫. ‘‘పఞ్చిమాని, భిక్ఖవే, బలాని. కతమాని పఞ్చ? సద్ధాబలం, వీరియబలం, సతిబలం, సమాధిబలం, పఞ్ఞాబలం . కత్థ చ, భిక్ఖవే, సద్ధాబలం దట్ఠబ్బం? చతూసు సోతాపత్తియఙ్గేసు. ఏత్థ సద్ధాబలం దట్ఠబ్బం. కత్థ చ, భిక్ఖవే, వీరియబలం దట్ఠబ్బం? చతూసు సమ్మప్పధానేసు. ఏత్థ వీరియబలం దట్ఠబ్బం. కత్థ చ, భిక్ఖవే, సతిబలం దట్ఠబ్బం? చతూసు సతిపట్ఠానేసు. ఏత్థ సతిబలం దట్ఠబ్బం. కత్థ చ, భిక్ఖవే, సమాధిబలం దట్ఠబ్బం? చతూసు ఝానేసు. ఏత్థ సమాధిబలం దట్ఠబ్బం. కత్థ చ, భిక్ఖవే, పఞ్ఞాబలం దట్ఠబ్బం? చతూసు అరియసచ్చేసు. ఏత్థ పఞ్ఞాబలం దట్ఠబ్బం. ఇమాని ఖో, భిక్ఖవే, పఞ్చ బలానీ’’తి. పఞ్చమం.
౬. పునకూటసుత్తం
౧౬. ‘‘పఞ్చిమాని, భిక్ఖవే, బలాని. కతమాని పఞ్చ? సద్ధాబలం, వీరియబలం, సతిబలం, సమాధిబలం, పఞ్ఞాబలం – ఇమాని ఖో, భిక్ఖవే, పఞ్చ బలాని. ఇమేసం ఖో, భిక్ఖవే, పఞ్చన్నం బలానం ఏతం అగ్గం ఏతం సఙ్గాహికం ఏతం సఙ్ఘాతనియం, యదిదం పఞ్ఞాబలం. సేయ్యథాపి, భిక్ఖవే, కూటాగారస్స ఏతం అగ్గం ఏతం సఙ్గాహికం ఏతం సఙ్ఘాతనియం, యదిదం కూటం. ఏవమేవం ఖో, భిక్ఖవే, ఇమేసం పఞ్చన్నం బలానం ఏతం అగ్గం ఏతం సఙ్గాహికం ఏతం సఙ్ఘాతనియం, యదిదం పఞ్ఞాబల’’న్తి. ఛట్ఠం.
౭. పఠమహితసుత్తం
౧౭. ‘‘పఞ్చహి , భిక్ఖవే, ధమ్మేహి సమన్నాగతో భిక్ఖు అత్తహితాయ పటిపన్నో హోతి, నో పరహితాయ. కతమేహి పఞ్చహి? ఇధ, భిక్ఖవే, భిక్ఖు అత్తనా సీలసమ్పన్నో హోతి, నో పరం సీలసమ్పదాయ సమాదపేతి; అత్తనా సమాధిసమ్పన్నో హోతి, నో పరం సమాధిసమ్పదాయ సమాదపేతి; అత్తనా పఞ్ఞాసమ్పన్నో హోతి, నో పరం పఞ్ఞాసమ్పదాయ సమాదపేతి; అత్తనా విముత్తిసమ్పన్నో హోతి, నో పరం విముత్తిసమ్పదాయ సమాదపేతి; అత్తనా విముత్తిఞాణదస్సనసమ్పన్నో హోతి, నో పరం విముత్తిఞాణదస్సనసమ్పదాయ సమాదపేతి. ఇమేహి ఖో, భిక్ఖవే, పఞ్చహి అఙ్గేహి సమన్నాగతో భిక్ఖు అత్తహితాయ పటిపన్నో హోతి, నో పరహితాయా’’తి. సత్తమం.
౮. దుతియహితసుత్తం
౧౮. ‘‘పఞ్చహి, భిక్ఖవే, ధమ్మేహి సమన్నాగతో భిక్ఖు పరహితాయ పటిపన్నో హోతి, నో అత్తహితాయ. కతమేహి పఞ్చహి? ఇధ, భిక్ఖవే, భిక్ఖు అత్తనా న సీలసమ్పన్నో హోతి, పరం సీలసమ్పదాయ సమాదపేతి; అత్తనా న సమాధిసమ్పన్నో హోతి, పరం సమాధిసమ్పదాయ సమాదపేతి; అత్తనా న పఞ్ఞాసమ్పన్నో హోతి, పరం పఞ్ఞాసమ్పదాయ సమాదపేతి; అత్తనా న విముత్తిసమ్పన్నో హోతి, పరం విముత్తిసమ్పదాయ సమాదపేతి; అత్తనా న విముత్తిఞాణదస్సనసమ్పన్నో హోతి, పరం విముత్తిఞాణదస్సనసమ్పదాయ సమాదపేతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు పరహితాయ పటిపన్నో హోతి, నో అత్తహితాయా’’తి. అట్ఠమం.
౯. తతియహితసుత్తం
౧౯. ‘‘పఞ్చహి, భిక్ఖవే, ధమ్మేహి సమన్నాగతో భిక్ఖు నేవ అత్తహితాయ పటిపన్నో హోతి, నో పరహితాయ. కతమేహి పఞ్చహి? ఇధ, భిక్ఖవే, భిక్ఖు అత్తనా న సీలసమ్పన్నో హోతి, నో పరం సీలసమ్పదాయ సమాదపేతి; అత్తనా న సమాధిసమ్పన్నో హోతి, నో పరం సమాధిసమ్పదాయ సమాదపేతి; అత్తనా న పఞ్ఞాసమ్పన్నో హోతి, నో పరం పఞ్ఞాసమ్పదాయ సమాదపేతి; అత్తనా న విముత్తిసమ్పన్నో హోతి, నో పరం విముత్తిసమ్పదాయ సమాదపేతి; అత్తనా న విముత్తిఞాణదస్సనసమ్పన్నో హోతి, నో పరం విముత్తిఞాణదస్సనసమ్పదాయ సమాదపేతి. ఇమేహి ఖో , భిక్ఖవే, పఞ్చహి ధమ్మేహి సమన్నాగతో భిక్ఖు నేవ అత్తహితాయ పటిపన్నో హోతి, నో పరహితాయా’’తి. నవమం.
౧౦. చతుత్థహితసుత్తం
౨౦. ‘‘పఞ్చహి , భిక్ఖవే, ధమ్మేహి సమన్నాగతో భిక్ఖు అత్తహితాయ చ పటిపన్నో హోతి పరహితాయ చ. కతమేహి పఞ్చహి? ఇధ, భిక్ఖవే, భిక్ఖు అత్తనా చ సీలసమ్పన్నో హోతి, పరఞ్చ సీలసమ్పదాయ సమాదపేతి; అత్తనా చ సమాధిసమ్పన్నో హోతి, పరఞ్చ సమాధిసమ్పదాయ సమాదపేతి, అత్తనా చ పఞ్ఞాసమ్పన్నో హోతి, పరఞ్చ పఞ్ఞాసమ్పదాయ సమాదపేతి; అత్తనా చ విముత్తిసమ్పన్నో హోతి, పరఞ్చ విముత్తిసమ్పదాయ సమాదపేతి; అత్తనా చ విముత్తిఞాణదస్సనసమ్పన్నో హోతి, పరఞ్చ విముత్తిఞాణదస్సనసమ్పదాయ సమాదపేతి. ఇమేహి ఖో, భిక్ఖవే, పఞ్చహి ధమ్మేహి సమన్నాగతో భిక్ఖు అత్తహితాయ చ పటిపన్నో హోతి పరహితాయ చా’’తి. దసమం.
బలవగ్గో దుతియో.
తస్సుద్దానం –
అననుస్సుతకూటఞ్చ, సంఖిత్తం విత్థతేన చ;
దట్ఠబ్బఞ్చ పున కూటం, చత్తారోపి హితేన చాతి.