ఉపోసథాదిపుచ్ఛావిస్సజ్జనా
ఆదిమజ్ఝన్తపుచ్ఛనం
౩౩౨. ఉపోసథకమ్మస్స కో ఆది, కిం మజ్ఝే, కిం పరియోసానం? పవారణాకమ్మస్స కో ఆది, కిం మజ్ఝే, కిం పరియోసానం? తజ్జనీయకమ్మస్స కో ఆది, కిం మజ్ఝే, కిం పరియోసానం? నియస్సకమ్మస్స…పే॰… పబ్బాజనీయకమ్మస్స…పే॰… పటిసారణీయకమ్మస్స…పే॰… ఉక్ఖేపనీయకమ్మస్స…పే॰… పరివాసదానస్స…పే॰… మూలాయపటికస్సనాయ…పే॰… మానత్తదానస్స…పే॰… అబ్భానస్స…పే॰… ఉపసమ్పదాకమ్మస్స కో ఆది, కిం మజ్ఝే, కిం పరియోసానం? తజ్జనీయకమ్మస్స పటిప్పస్సద్ధియా కో ఆది, కిం మజ్ఝే, కిం పరియోసానం? నియస్సకమ్మస్స పటిప్పస్సద్ధియా కో ఆది, కిం మజ్ఝే, కిం పరియోసానం? పబ్బాజనీయకమ్మస్స పటిప్పస్సద్ధియా కో ఆది, కిం మజ్ఝే, కిం పరియోసానం? పటిసారణీయకమ్మస్స పటిప్పస్సద్ధియా కో ఆది, కిం మజ్ఝే, కిం పరియోసానం? ఉక్ఖేపనీయకమ్మస్స పటిప్పస్సద్ధియా కో ఆది, కిం మజ్ఝే, కిం పరియోసానం? సతివినయస్స కో ఆది, కిం మజ్జే, కిం పరియోసానం? అమూళ్హవినయస్స కో ఆది, కిం మజ్ఝే, కిం పరియోసానం? తస్సపాపియసికాయ కో ఆది, కిం మజ్ఝే, కిం పరియోసానం? తిణవత్థారకస్స కో ఆది, కిం మజ్ఝే, కిం పరియోసానం? భిక్ఖునోవాదకసమ్ముతియా కో ఆది, కిం మజ్ఝే, కిం పరియోసానం? తిచీవరేన అవిప్పవాససమ్ముతియా కో ఆది, కిం మజ్ఝే, కిం పరియోసానం? సన్థతసమ్ముతియా కో ఆది, కిం మజ్ఝే, కిం పరియోసానం? రూపియఛడ్డకసమ్ముతియా కో ఆది, కిం మజ్ఝే, కిం పరియోసానం? సాటియగ్గాహాపకసమ్ముతియో కో ఆది, కిం మజ్ఝే, కిం పరియోసానం? పత్తగ్గాహాపకసమ్ముతియా కో ఆది, కిం మజ్ఝే, కిం పరియోసానం? దణ్డసమ్ముతియా కో ఆది, కిం మజ్ఝే, కిం పరియోసానం? సిక్కాసమ్ముతియా కో ఆది, కిం మజ్ఝే, కిం పరియోసానం? దణ్డసిక్కాసమ్ముతియా కో ఆది, కిం మజ్ఝే, కిం పరియోసానం?
ఆదిమజ్ఝన్తవిస్సజ్జనా
౩౩౩. ఉపోసథకమ్మస్స కో ఆది, కిం మజ్ఝే, కిం పరియోసానన్తి? ఉపోసథకమ్మస్స సామగ్గీ ఆది, కిరియా మజ్ఝే, నిట్ఠానం పరియోసానం.
పవారణాకమ్మస్స కో ఆది, కిం మజ్ఝే, కిం పరియోసానన్తి? పవారణాకమ్మస్స సామగ్గీ ఆది, కిరియా మజ్ఝే, నిట్ఠానం పరియోసానం.
తజ్జనీయకమ్మస్స కో ఆది, కిం మజ్ఝే, కిం పరియోసానన్తి? తజ్జనీయకమ్మస్స వత్థు చ పుగ్గలో చ ఆది, ఞత్తి మజ్ఝే, కమ్మవాచా పరియోసానం.
నియస్సకమ్మస్స…పే॰… పబ్బాజనీయకమ్మస్స…పే॰… పటిసారణీయకమ్మస్స…పే॰… ఉక్ఖేపనీయకమ్మస్స…పే॰… పరివాసదానస్స…పే॰… మూలాయపటికస్సనాయ…పే॰… మానత్తదానస్స…పే॰… అబ్భానస్స కో ఆది, కిం మజ్ఝే, కిం పరియోసానన్తి? అబ్భానస్స వత్థు చ పుగ్గలో చ ఆది, ఞత్తి మజ్ఝే, కమ్మవాచా పరియోసానం.
ఉపసమ్పదాకమ్మస్స కో ఆది, కిం మజ్ఝే, కిం పరియోసానన్తి? ఉపసమ్పదాకమ్మస్స పుగ్గలో ఆది, ఞత్తి మజ్ఝే, కమ్మవాచా పరియోసానం.
తజ్జనీయకమ్మస్స పటిప్పస్సద్ధియా కో ఆది, కిం మజ్ఝే, కిం పరియోసానన్తి? తజ్జనీయకమ్మస్స పటిప్పస్సద్ధియా సమ్మావత్తనా ఆది, ఞత్తి మజ్ఝే, కమ్మవాచా పరియోసానం.
నియస్సకమ్మస్స…పే॰… పబ్బాజనీయకమ్మస్స…పే॰… పటిసారణీయకమ్మస్స…పే॰… ఉక్ఖేపనీయకమ్మస్స పటిప్పస్సద్ధియా కో ఆది, కిం మజ్ఝే, కిం పరియోసానన్తి? ఉక్ఖేపనీయకమ్మస్స పటిప్పస్సద్ధియా సమ్మావత్తనా ఆది, ఞత్తి మజ్ఝే, కమ్మవాచా పరియోసానం.
సతివినయస్స కో ఆది , కిం మజ్ఝే, కిం పరియోసానన్తి? సతివినయస్స వత్థు చ పుగ్గలో చ ఆది, ఞత్తి మజ్ఝే, కమ్మవాచా పరియోసానం.
అమూళ్హవినయస్స …పే॰… తస్సపాపియసికాయ…పే॰… తిణవత్థారకస్స…పే॰… భిక్ఖునోవాదకసమ్ముతియా…పే॰… తిచీవరేన అవిప్పవాససమ్ముతియా…పే॰… సన్థతసమ్ముతియా…పే॰… రూపియఛడ్డకసమ్ముతియా…పే॰… సాటియగ్గాహాపకసమ్ముతియా…పే॰… పత్తగ్గాహాపకసమ్ముతియా…పే॰… దణ్డసమ్ముతియా…పే॰… సిక్కాసమ్ముతియా…పే॰… దణ్డసిక్కాసమ్ముతియా కో ఆది, కిం మజ్ఝే, కిం పరియోసానన్తి? దణ్డసిక్కాసమ్ముతియా వత్థు చ పుగ్గలో చ ఆది, ఞత్తి మజ్ఝే, కమ్మవాచా పరియోసానం.
ఉపోసథాదిపుచ్ఛావిస్సజ్జనా నిట్ఠితా.
అత్థవసపకరణం
౩౩౪. అ॰ ని॰ ౧౦.౩౩౪; పరి॰ ౨౨ దస అత్థవసే పటిచ్చ తథాగతేన సావకానం సిక్ఖాపదం పఞ్ఞత్తం – సఙ్ఘసుట్ఠుతాయ, సఙ్ఘఫాసుతాయ, దుమ్మఙ్కూనం పుగ్గలానం నిగ్గహాయ, పేసలానం భిక్ఖూనం ఫాసువిహారాయ, దిట్ఠధమ్మికానం ఆసవానం సంవరాయ, సమ్పరాయికానం ఆసవానం పటిఘాతాయ, అప్పసన్నానం పసాదాయ, పసన్నానం భియ్యోభావాయ, సద్ధమ్మట్ఠితియా వినయానుగ్గహాయ.
యం సఙ్ఘసుట్ఠు తం సఙ్ఘఫాసు. యం సఙ్ఘఫాసు తం దుమ్మఙ్కూనం పుగ్గలానం నిగ్గహాయ. యం దుమ్మఙ్కూనం పుగ్గలానం నిగ్గహాయ తం పేసలానం భిక్ఖూనం ఫాసువిహారాయ. యం పేసలానం భిక్ఖూనం ఫాసువిహారాయ తం దిట్ఠధమ్మికానం ఆసవానం సంవరాయ. యం దిట్ఠధమ్మికానం ఆసవానం సంవరాయ తం సమ్పరాయికానం ఆసవానం పటిఘాతాయ. యం సమ్పరాయికానం ఆసవానం పటిఘాతాయ తం అప్పసన్నానం పసాదాయ. యం అప్పసన్నానం పసాదాయ తం పసన్నానం భియ్యోభావాయ. యం పసన్నానం భియ్యోభావాయ తం సద్ధమ్మట్ఠితియా. యం సద్ధమ్మట్ఠితియా తం వినయానుగ్గహాయ.
యం సఙ్ఘసుట్ఠు తం సఙ్ఘఫాసు. యం సఙ్ఘసుట్ఠు తం దుమ్మఙ్కూనం పుగ్గలానం నిగ్గహాయ. యం సఙ్ఘసుట్ఠు తం పేసలానం భిక్ఖూనం ఫాసువిహారాయ. యం సఙ్ఘసుట్ఠు తం దిట్ఠధమ్మికానం ఆసవానం సంవరాయ. యం సఙ్ఘసుట్ఠు తం సమ్పరాయికానం ఆసవానం పటిఘాతాయ. యం సఙ్ఘసుట్ఠు తం అప్పసన్నానం పసాదాయ. యం సఙ్ఘసుట్ఠు తం పసన్నానం భియ్యోభావాయ. యం సఙ్ఘసుట్ఠు తం సద్ధమ్మట్ఠితియా. యం సఙ్ఘసుట్ఠు తం వినయానుగ్గహాయ.
యం సఙ్ఘఫాసు తం దుమ్మఙ్కూనం పుగ్గలానం నిగ్గహాయ. యం సఙ్ఘఫాసు తం పేసలానం భిక్ఖూనం ఫాసువిహారాయ . యం సఙ్ఘఫాసు తం దిట్ఠధమ్మికానం ఆసవానం సంవరాయ. యం సఙ్ఘఫాసు తం సమ్పరాయికానం ఆసవానం పటిఘాతాయ. యం సఙ్ఘఫాసు తం అప్పసన్నానం పసాదాయ. యం సఙ్ఘఫాసు తం పసన్నానం భియ్యోభావాయ. యం సఙ్ఘఫాసు తం సద్ధమ్మట్ఠితియా. యం సఙ్ఘఫాసు తం వినయానుగ్గహాయ. యం సఙ్ఘఫాసు తం సఙ్ఘసుట్ఠు.
యం దుమ్మఙ్కూనం పుగ్గలానం నిగ్గహాయ…పే॰… యం పేసలానం భిక్ఖూనం ఫాసువిహారాయ… యం దిట్ఠధమ్మికానం ఆసవానం సంవరాయ… యం సమ్పరాయికానం ఆసవానం పటిఘాతాయ… యం అప్పసన్నానం పసాదాయ… యం పసన్నానం భియ్యోభావాయ… యం సద్ధమ్మట్ఠితియా… యం వినయానుగ్గహాయ తం సఙ్ఘసుట్ఠు. యం వినయానుగ్గహాయ తం సఙ్ఘఫాసు. యం వినయానుగ్గహాయ తం దుమ్మఙ్కూనం పుగ్గలానం నిగ్గహాయ. యం వినయానుగ్గహాయ తం పేసలానం భిక్ఖూనం ఫాసువిహారాయ. యం వినయానుగ్గహాయ తం దిట్ఠధమ్మికానం ఆసవానం సంవరాయ. యం వినయానుగ్గహాయ తం సమ్పరాయికానం ఆసవానం పటిఘాతాయ. యం వినయానుగ్గహాయ తం అప్పసన్నానం పసాదాయ. యం వినయానుగ్గహాయ తం పసన్నానం భియ్యోభావాయ. యం వినయానుగ్గహాయ తం సద్ధమ్మట్ఠితియాతి.
అత్థసతం ధమ్మసతం, ద్వే చ నిరుత్తిసతాని;
చత్తారి ఞాణసతాని, అత్థవసే పకరణేతి.
అత్థవసపకరణం నిట్ఠితం.
మహావగ్గో నిట్ఠితో.
తస్సుద్దానం –
పఠమం అట్ఠపుచ్ఛాయం, పచ్చయేసు పునట్ఠ చ;
భిక్ఖూనం సోళస ఏతే, భిక్ఖునీనఞ్చ సోళస.
పేయ్యాలఅన్తరా భేదా, ఏకుత్తరికమేవ చ;
పవారణత్థవసికా, మహావగ్గస్స సఙ్గహోతి.
అత్థవసపకరణం నిట్ఠితం.