ฯ นโม ตสฺส ภควโต อรหโต สมฺมาสมฺพุทฺธสฺสฯ
ปชฺชมธุ
อานนฺท รญฺญ รตนาทิ มหา ยตินฺท,
นิจฺจปฺปพุทฺธ ปทุมปฺปิย เสวินงฺคี;
พุทฺธปฺปิเยน ฆน พุทฺธ คุณปฺปิเยน,
เถราลินา รจิต ปชฺชมธุํ ปิพนฺตุฯ
๑.
อุณฺณาปปุณฺณสสิมณฺทลโต คลิตฺวา,
ปาทมฺพุชงฺคุลิ ทลฏฺฐ สุธา ลวานํ;
ปนฺตีว สตฺถุ นขปนฺติ ปชาวิเสสํ,
ปีเณตุ สุทฺธ สุขิตมฺมณ ตุนฺฑปีตาฯ
๒.
ขิตฺตาย มารริปุนา ปริวตฺย สตฺถุ,
ปาทสฺสยา ชิต ทิสาย สิตตฺตลาย;
ยา เชติ กญฺจน สราวลิยา สิริํ สา,
เทตนฺคินํ รณชยงฺคุลิปนฺติกนฺตาฯ
๓.
โสวณฺณ วณฺณ สุขุมจฺฉวิ โสมฺม กุมฺม,
ปิฏฺฐีว ปิฏฺฐิ กมตุนฺนติ ภาติ เยสํ;
เตสุปฺปติฏฺฐิตสุโกมลทีฆปณฺหิ,
ปาทา ชินสฺส ปททนฺตุ ปทํ ชนสฺสฯ
๔.
อจฺเฉร ปงฺกชสิรํ สิริยา สกาย,
เย มทฺทิโน วิย จรนฺติ สโรช สีเส;
สญฺจุมฺพิตา วิย จ ตานิ ปราค ราคา,
เต นีรชา มุนิปทา ปททนฺตุ ลกฺขิํฯ
๕.
อคามิ กาล ชน มงฺคล ภตฺตุ ภาวํ,
วฺยากตฺตุมตฺร กุสเลนิว นิมฺมิตานิ;
ยาตฺราสุมฏฺฐสตมงฺคลกฺขณานิ,
สาเธตุ นํ ปทยุคํ ชยมงฺคลานิฯ
๖.
สสฺเสวิชนฺตุวรสนฺติปุรปฺปเวเส,
นิจฺจํ สุสชฺช ฐปิตานิว มงฺคลาย;
เย เต ทธนฺติ กลมงฺคลลกฺขณานิ,
วตฺตนฺตุ เต ชินปทา ชยมงฺคลายฯ
๗.
สพฺเพภิภูย สปเทสุ นิปาตนสฺส,
สญฺญาณกํ วิย ยทสฺสิตสพฺพโลโก;
ปาทาตฺยโธกตติโลกสิโรวรา ปิ,
โลกํ ปุณนฺตุ ชยมงฺคลการณานิฯ
๘.
โลกตฺตเยกสรณตฺตวิภาวนาย,
สชฺโช ว ติฏฺฐติ ยหิํ สุวิภตฺตโลโก;
ตํ สพฺพโลกปฏิพิมฺพิตทปฺปณาภํ,
ปาททฺวยํ ชนสุสชฺชนเหตุ โหตุฯ
๙.
โลกุตฺตราย สิริยาธิคมาย สุฏฺฐุ,
รชนฺติ ยตฺถ ทิคุณานิว ปาตุ ภูตา;
จกฺกาสนาภิสหเนมิสหสฺสรานิ,
ตฺยงฺฆี ทิสนฺตุ สกลิสฺสริยํ ชนสฺสฯ
๑๐.
ยตฺรุลฺลสนฺติ ทุวิธานิว ปาตู ภูตา,
ธมฺมสฺสสพฺพภุวนสฺส จ อิสฺสรตฺเต;
จกฺกานิ จกฺกสทิสานิ สุทสฺสนสฺส,
ตานชฺช ชนฺตุ สรณา จรณานิ โหนฺตุฯ
๑๑.
สตฺเตสุ วจฺฉตุ สิรี สิริวจฺฉเกน,
โสวตฺถิ โสตฺถิมนุติฏฺฐตุ ปุคฺคเลสุ;
นนฺทิํ ชนานมนุวตฺตตุ นนฺทิวตฺตี,
สีสานลํกุรุตุ ปาทวตํสโก ปิฯ
๑๒.
ภทฺทาย ปีฐมุปคจฺฉตุ ภทฺทปีฐํ,
วุทฺธิํ ชนานมนุวตฺตตุ วทฺธมานํ;
ปุณฺณตฺตมงฺคิมนุกุพฺพตุ ปุณฺณกุมฺโภ,
ปาติ จ ปาตุ สตตํ ชนตํ อปายาฯ
๑๓.
เสตาตปตฺตมปเนตมฆาตเป ตํ,
ขคฺโค วิฉินฺทตุ สทา ทุริตาริวคฺเค;
สํกฺเลสทาหมปเนตุ สตาลวณฺฏ,
สํวีชนี กุมติมกฺขิกโมรหตฺโถฯ
๑๔.
อากฑฺฒโน ชนวิโลจนมตฺตนินฺนํ,
วาเรตุ สพฺพคติวารนมงฺกุโส โส;
ปาทมฺพุชสฺสิริวิลาสนิเกตนํ ว,
ปาสาทลขณมุเปตุ มโนปสาทํฯ
๑๕.
ปาณีนมตฺตภชตํ วรปุณฺณปตฺตํ,
สมฺมา ททาตุ ปทนิสฺสิตปุณฺณปตฺโต;
ปาเทสุ ชนฺตุ มนพนฺธนทามภูตํ,
ทามํ ทเมตุ วิมลํ ชนตมฺมนานิฯ
๑๖.
อุณฺหีสกุปฺปลมณีปทุเมหิ ปาทา,
สสฺเสวิชนฺตุกรณานิ วิภูสยนฺตุ;
สนฺเนตฺตนาวุปคตานมนคฺฆกานิ,
โพชฺฌงฺคสตฺตรตนานิ ทเท สมุทฺโทฯ
๑๗.
อุตฺตุงฺค นิจฺจลคุงา ชิตตาย นิจฺจํ,
เสวีว ปาทสิริ นิจฺจ สมุพฺพหํ ว;
อตฺราปิ สกฺกภวนุพฺพหเณ นิยุตฺโต,
ปาทฏฺฐเมรุ ภวตํ ภวตํ วิภูตฺยาฯ
๑๘.
โส จกฺกวาฬสิขรี ปฺยวตํ สมนฺตา,
สพฺพูปสคฺควิสราชนตํ สมคฺคํ;
ทีปา ปุถูปิ จตุโร ทฺวิสหสฺส ขุทฺทา,
ธาเรนฺตฺวปายปตมานมทตฺว ชนฺตุํฯ
๑๙.
สูโร ปโพธยตุ ชนฺตุ สโรรุหานิ,
จนฺโท ปสาท กุมุทานิ มโนทเหสุ;
นกฺขตฺตชาตมขิลํ สุภตาย โหตุ,
จกฺกํ ธชํ ริปุชยาย ชยทฺธชายฯ
๒๐.
เชตุํ สสํสท-สุทสฺสน-จกฺกวตฺติ,
จกฺกานุคนฺตลลิตํ ยหิมาวเหยฺย;
จกฺกาณุวตฺติ ปริสาวต-จกฺกวตฺติ,
นํวตฺตตํ ปทยุคํ ชนตา หิตายฯ
๒๑.
ปุเชตุมาคต วตา วชิราสนฏฺฐ,
มินฺเทน ฉฑฺฑิต มหาวิชยุตฺตราขฺยํ;
สํขํ ปวิฏฺฐมิว มารภยา ปทาโธ,
ปาทฏฺฐสํขมิห วตฺตตุ สนฺติยา โวฯ
๒๒.
โสวณฺณมจฺฉยุคลํ สิวภตฺต โภเค,
อิจฺฉา พหูปกรณํ ภวตํ ชนานํ;
กุมฺภีลธิคฺคหิตโต ว ปทุตฺถจิตฺตา,
ปาทมฺพุชากร วิคาหิ ตุ โนปโหนฺตุฯ
๒๓.
สตฺตาปคา ชนมโนช มเล ชหนฺตุ,
สํกฺเลสทาหมปเนนฺตุ ทหา จ สตฺต;
เสลา จ สตฺต วิทธนฺตุ ชนสฺส ตานํ,
โลกปฺปสิทฺธิชนเน ภวตํ ปตากาฯ
๒๔.
ปาฏงฺกิ สนฺติ คมเน ภวตูปการา,
ทาเหตฺตเนสุ ชหตํ ปทจามรํ ตํ;
สลฺโลกโลจนมหุสฺสว-อุสฺสิตํ ว,
วตฺเตยฺย โตรณมนุตฺตรมงฺคลายฯ
๒๕.
ยสฺมิํ มิคินฺท คต ภีติ พลาว ทฑฺฒ,
ทานา นตา สิรวิทารณ ปีฬิตาว;
นาลาคิรี กริวโร คิริเมขโล จ,
ตํ สีหวิกฺกมปทํ หนตา ฆทนฺติํฯ
๒๖.
ปาปาหิโน หนตุ ปาทสุวณฺณราชา,
วฺยคฺฆาธิโป กลิชเน อทตํ อเสสํ;
วาลาห-อสฺสปติ สมฺปติตุํ อทตฺวา,
ปาเยสุ ปาปยตุ สนฺติปุรมฺปชาโยฯ
๒๗.
ฉทฺทนฺต ทนฺติ ลลิตํ คลิตํ รุสมฺหา,
ลุทฺเทตฺต ทุพฺภินิ ทิเส อจลํ ทธาโน;
ปาทฏฺฐหตฺถิปติ สมฺปติ ชนฺตุตาเส,
ตาเสตุ หาสมปรนฺทิสตํ สตานํฯ
๒๘.
สพฺพงฺคิโน จรณุโปสถ หตฺถิราชา,
ปาเปตุ สพฺพจตุทีปิกรชฺชลกฺขิํ;
กิตฺตีว ปาทปริจาริกตา นิยุตฺตา,
เกลสเสลปฏิมา หิตมาจเรยฺยฯ
๒๙.
สามิสฺส หํสสมเย ทหปาสพทฺธ,
มาสีน เวสคมโก วิย ปาทหํโส;
นิคฺโฆส คนฺติชิตโต วิย มูคปกฺโข,
ยาเรตุ สพฺพ ชนตา ภวคนฺตุกตฺตํฯ
๓๐.
โอหาย ทิพฺพสรสิํ ขิลโลก สพฺพ,
รมฺมงฺฆิวาปิมวคาหิตวาว ปาเท;
เอราวโณ กริวโร มนสาภิรุฬฺเห,
ชนฺตุํ ปุรินฺททปุรํ นยตํ ว สีฆํฯ
๓๑.
หิตฺวา สกมฺภวนมงฺฆินิเสวนตฺถ,
มาคมฺม รมฺม ตรตายิห นิสฺสิโต ว;
ปาเลตฺว มูนิ ปทวาปิตรงฺคภงฺคิ,
มนฺคี กโรนฺตตนุวาสุกิ นาคราชาฯ
๓๒.
นาถสฺส กญฺจนสิขาวลชาติลีล,
มาวิกรํ ว ปทนิสฺสิตโมรราชา;
ตํ ธมฺมเทสนรเวนิว ลุทฺทกสฺส,
โลกสฺส ปาปผณิโน หนตํ อเสสํฯ
๓๓.
สํสารสาครคเต สธเน ชเน เต,
เนตมฺปเท กลจตุมฺมุขเหมนาวา;
นิพฺพาณปฏฺฏนวรํ ภรุกจฺฉกนฺตํ,
สุปฺปารปณฺฑิต คตา วิย อาสุนาวาฯ
๓๔.
สมฺโพธิ ญาณ ปริปาจยโต มุนิสฺส,
ภตฺโต ยถา หิมวตทฺทิ สมาธิเหตุ;
เอวมฺมเนน ภชตํ หิมวทฺทิปาเท,
สมฺโพธิญาณ ปริปาจนเหตุ โหตุฯ
๓๕.
ทฬฺหํ ปราชิตตยา มุนินา สเรน,
สุญฺญสฺสโรปคต ปญฺชร พนฺธโนว;
โส ปาทปญฺชรคโต กรวีกปกฺขี,
สพฺเพสมปฺปียาวจญฺชหตา ภวนฺตํฯ
๓๖.
เต จกฺกวาก มกรา อปิ โกญฺจ ชีวํ,
ชีวาทิ ปกฺขิวิสรา สรสีว ภุตฺตํ;
เวสฺสนฺตเรน จรณมฺพุชิ นิพฺภชนฺตา,
ชนฺตุ ตหิํ วิย ปเท สุรเมนฺตุ นิจฺจํฯ
๓๗.
ตํ จนฺทกินฺนรคติํว คตสฺส โพธิ,
สตฺตสฺส ตสฺส สปชาปติกสฺส ภาวํ;
สํสูจยนฺต ปท กินฺนร กินฺนรี เว,
สามคฺคิมคฺค ปฏิ ปตฺติสุ ปาปยนฺตุฯ
๓๘.
สํราชธานิมุสโภ วหตคฺค ภารํ,
ปีติปฺปโย ปชนเยยฺย สวจฺฉเธนุ;
สสฺเสวิโน อภิรเมนฺตุ ฉกามสคฺคา,
ธาเรนฺตุ ฌายิมิห โสฬส ธาตุธามาฯ
๓๙.
สุตฺวา ชินสฺส กรวีก สรมฺมนุญฺญํ,
อญฺโญญฺญ ภีติรหิตา อปิ ปจฺจนีกา;
หิตฺวา คติํ วิย ฐิตา ปทสตฺตรูปา,
สพฺพํ ภวสฺสิต ชนานคติํ หนนฺตุฯ
๔๐.
โสวณฺณ กาหฬ ยุโค ปมมินฺทิราย,
สนฺนีรปุปฺผ มุกุโลปมมุสฺสวาย;
นิจฺจํ สุสชฺช ฐปิตํ มุนิ ติฏฺฐตนฺเต,
ชงฺฆาทฺวยํ ชนวิโลจน มงฺคลายฯ
๔๑.
ลขฺยา วิลาส มุกุรทฺวย สนฺนิกาสํ,
ตาฑงฺก มณฺฑน วิฑมฺพกมํสุ สณฺฑํ;
ชานุทฺวยํ ลฬิต สาคร พุพฺพลาภํ,
โหตํ ชคตฺตย นิชตฺต วิภูสิตุนฺเตฯ
๔๒.
ฉทฺทนฺติ ทินฺน วรทนฺต ยุโคปมานา,
ตํ หตฺถิ โสณฺฑ กม ปุณฺณ คุณา ตโวรู;
ลีล ปโยธิ สิริ เกฬิ สุวณฺณรมฺภา,
ขนฺธาว เทนฺตุ ปริปุณฺณ คุเน ชนานาํฯ
๔๓.
ชงฺฆกฺข กทฺวฺย สมปฺปิต จิตฺตปาท,
จกฺกทฺวยี มนมโนชหโย มุเน เต;
โสนี รโถ สิริวโห มนสา ภิรุฬฺหํ,
โลกตฺตยํ สิวปุรํ ลหุ ปาปยาตุฯ
๔๔.
รมฺโมร ปากฏ ตฏาก ตฏา สวนฺต,
โรมาวลี ชล ปนาลิก โกฏิกฏฺฐา;
นาภี คภีร สรสี สิริ เกฬิตา เต,
สสฺเสวินํ วฺยสน ฆมฺมมลํ สเมตุฯ
๔๕.
กนฺติจฺฉฏา ลุฬิต รูป ปโยธิ นาภิ,
อาวฏฺฏ วฏฺฏิต นิมุชฺชิต สพฺพโลโก;
โสภคฺค โตย นิวหํ วิสโส ปิวิตฺวา,
โลกุตฺตราทิ สุข มุจฺฉิตตํ ปยาตุฯ
๔๖.
คมฺภีร จิตฺตรหทํ ปริปูรยิตฺวา,
ตํ สนฺทมาน กรุณมฺพุ ปวาห ตุลฺยา;
โรมาลิวลฺลิหริ นาภิ สุภาลวาลา,
เทตํ ลหุํ สิวผลํ ภชตํ มุเน เตฯ
๔๗.
จารูร สาริผลโก กุฏิลคฺค โลม,
ปนฺตี วิภตฺติ สหิโต สิริ เกฬิ สชฺโช;
สคฺคาปวคฺค สุข ชูตก เกฬิ เหตุ,
โหตํ ติโลก สุข ชูตก โสณฺฑกานํฯ
๔๘.
คมฺภีร จิตฺต รหโท ทร คาหมาน,
เมตฺตาทยา กริ วธู กร สนฺนิ กาสา;
สพฺพงฺคินํ สิวผลํ ตนุ เทว รุกฺเข,
สาขา สขา ตว ภุชา ภชตํ ททนฺตุฯ
๔๙.
นิหาร พินฺทุ สหิตคฺคทโลป โสภิ,
พฺยาลมฺพ รตฺต ปทุมทฺวย ภงฺคิ ภาชา;
ปาปาริสีสลุนเตนิว รตฺต รตฺตา,
รตฺตา กรา ตว ภวุมฺภุวิ มงฺคลายฯ
๕๐.
รุปสฺสิรี จริต จงฺกม วิพฺภมา เต,
ปิฏฺฐี ยถา กลล มุทฺธนิ เสตุ ภูตา;
เอวํ ภวณฺณว สมุตฺตรณาย เสตุ,
โหตมฺมหากนก สํกม สนฺนิกาสาฯ
๕๑.
สทฺธมฺม เทสน มโนหร เภรินาท,
สํจารเณ สิวปุรํ วิสิตุํ ชนานํ;
คีวา สุวณฺณมย จารุ มุติงฺค เภริ,
ภาวมฺภชา ภวตุ ภูต วิภูติยา เตฯ
๕๒.
ลขี นิวาส วทนมฺพุช มตฺต นินฺน,
มากฑฺฒยํ ชน วิโลจน จญฺจรีเก;
โสรพฺภ ธมฺม มกรนฺท นิสนฺทมานํ,
ปิเณตุ เตน สรเสน สภา ชเน เตฯ
๕๓.
ลขี สมารุหิต วตฺตรเถ รถงฺค,
ทฺวนฺทานุ การิ มิค ราช กโปล ลีลํ;
ตาทงฺก มณฺฑลยุคํ วิย กณฺณภาชํ,
คณฺฑตฺถลทฺวฺยมลํกุรุตํ ชนตฺเตฯ
๕๔.
ลาวณฺณ มณฺณว ปวาฬ ลตา ทฺวยาภํ,
ตนฺเทห เทว ตรุ ปลฺลว กนฺเต มนฺตํ;
วตฺตารวินฺท มกรนฺท ปราชิโสภํ,
รตฺตาธรทฺวยมโธ กุรุตํ ชนาฆํฯ
๕๕.
อุณฺณา สกุนฺติคต มตฺถก นตฺถุ กูป,
สุพฺภู ลการ สหิโตฏฺฐ ปวาฬ นาวา;
คตฺตุตฺตรรณฺณว คตา ตว ชนฺตุกานํ,
โหตํ ภวณฺณว สมุตฺตรนย นาถฯ
๕๖.
อิสํ วิกาส ปทุโมทร เกสราลิ,
ลีลา วินทฺธ รุจิรา ตว ทนฺต ปนฺติ;
วานี วธู ธริต มาลติ มาลฺย ตุลฺยา,
ตสฺสํ ชานสฺส มนรญฺชน มาจเรยฺยฯ
๕๗.
สทฺธมฺม นิชฺฌร สุรตฺต สิลาตลาภา,
ชิวฺหา วจี นฏ วธู กล รงฺค ภูตา;
สทฺธมฺม เสฏฺฐ ตรณี นิหิตปฺปิยา เต,
สํสาร สาคร สมุตฺตรณาย โหตุฯ
๕๘.
ทนฺตํสุ กญฺจุกีต รตฺตธโร ปธาเน,
ชิวฺหา สุรตฺต สยเน มุข มนฺทิรฏฺเฐ;
อาโมกฺข มุตฺติ วธุยา สยิตาย ตุยฺหํ,
กุพฺพนฺตุ สํคม มลํ ชน โสตุ กามิฯ
๕๙.
อุณฺณา ตถาภินว ปตฺต วราภิ รามา,
ลีโลลฺลสนฺต ภมุกทฺวย นีล ปตฺตา;
ฆาโนรุ จารุ กทลี วทนา ลวาลา,
ตุยฺหํ ปวตฺตตุ จิรํ ชน มงฺคลายฯ
๖๐.
พาลตฺถลี หริ สิลาตล ปิฏฺฐิกฏฺฐ,
ภูวลฺลริทฺวย มยูร ยุคสฺส ตุยฺหํ;
ปญฺจปฺปภา รุจิร ปิจฺฉ ยุคสฺสิรีกํ,
เนตฺตทฺวยํ มนสิ ปุญฺฉตุ ปาปธูลิํฯ
๖๑.
อินฺทีวรานฺตคต ภิงฺคิก ปนฺติ ภงฺคิ,
ปญมฺพุชสฺสรตเต วิย คจฺฉปนฺตี;
เนตฺตมฺพุชสฺสิริ ติโรกรณีว ตุยฺหํ,
ปมฺหาวลี สิริคเตห ติโร กโรนฺตุฯ
๖๒.
วตฺตุลฺลสมฺพุช วิโลจน หํส ตุณฺฑ,
กญฺชํสุ ปิญฺชร มุลาล ลตา ทฺวฺยาภํ;
โทลาทฺวยํว สวณทฺวฺยมตฺต ลกฺขฺยา,
โหตํ ตวชฺช ชนตา มติจารเหตุฯ
๖๓.
วมฺมีก มตฺถก สยานก ภูริทตฺต,
โภคินฺท โภควลิ วิพฺภมมา วหนฺติ;
ฆาโนปริฏฺฐิตมุเน ตว ตุณฺณมุณฺณา,
ตคฺคาหิโน วิย ชนสฺส ททาตุ วิตฺตํฯ
๖๔.
รูปินฺทิราย วิชเย ขิล โลก รูปํ,
ฆาโณรุ จารุ ปริโฆปริ พทฺธ สิทฺธา;
นีลาภ วาต วิลุถนฺต วยทฺธชาภา,
ติฏฺฐนฺตุ สชฺช ทุริตาริ ชยาย เต ภูฯ
๖๕.
อุณฺณสฺสิโตปล นิเวสิต พุนฺท สนฺธิ,
ฆาโณรุ ปิณฺฑกมฆา ตป รุนฺธิตุนฺเต;
โหตมฺมุขมฺพุช สิรี สิรสุสฺสิตาภํ,
ภู นีล ปฏฺฏิก ลลาต สุวณฺณ ฉตฺตํฯ
๖๖.
รุปงฺก เวทน วิโลจน พาน ทิฏฺฐี,
ธารา นิสาน มณิวฏฺฏ สิรี สิโร เต;
สิทฺธา มโตสธ กตญฺชน ปุญฺช ลกฺขี,
โหตํ ชนสฺส นยนามย นาสนายฯ
๖๗.
สกฺขนฺธ พาหุยุค โตรน มชฺฌ คีวา,
ธรปฺปิตสฺสิริฆโต ปริ มุสฺสวาย;
นีลุปฺปลาว ฐปิตา สวิภตฺติ กนฺเต,
เกสา ภวนฺตุ ภุวนตฺตย มงฺคลายฯ
๖๘.
เหมคฺฆิเย ฐปิต นีล สิลา กปาเล,
ปชฺโชต ชาล ลลิตํ มุนิ สารยนฺตี;
รูปสฺสิรี สิรสิ ภูสิต เหม มาลา,
การา กโรตุ สุภคํ ตว เกตุ มาลาฯ
๖๙.
ภฺยามปฺปภาลิ ตว กญฺจน โมร กาเล,
สุโรทเย วิตต จนฺทก จกฺกลกฺขี;
เมฆาวนทฺธ สิขรุนฺนต เหม เสลา,
ยนฺตินฺทจาป วิกตีว ททาตุ โสภํฯ
๗๐.
ปฏฺฐาย เต ปณิธิโต สุจิ ทาน สีล,
เนกฺขมฺม ปญฺญ วิริยกฺขม สจฺจธิฏฺฐา;
เมตฺตา อุเปกฺขิติ อิเม ทส ปูรโตว,
ปูเรนฺตุ ปารมิ คุณา ชนตานมตฺเตฯ
๗๑.
ปตฺตุตฺตรุตฺตรทสา ปณิธาน พีชา,
เจโตรธราย กรุณา ชล เสข วุทฺธา;
สพฺพญฺญุ ญาณ ผลทา สติ วาฏ คุตฺตา,
ตํ สมฺผลนฺทิสตุ ปารมิตา ลตา เตฯ
๗๒.
อาโพธิ ปุณฺณมิ ปทิฏฺฐ ทินาทิโต เต,
สมฺภาร กาล สิต ปกฺข กมาภิ วุทฺโธ;
สมฺปุณฺณ ปารมิ คุณามตรํสิ ตํว,
สพฺพงฺคิ กุนฺท กุมุทานิ ปโพธเยยฺยฯ
๗๓.
อาปจฺฉิมพฺภว สิวปฺผล ลาภ ทานา,
ทานปฺปพนฺธมปิทาน ผลปฺปภนฺทํ;
สํวฑฺฒยิ ตฺวํ อภิปตฺถนโต ยเถวํ,
ชนฺตุตฺตรุตฺตร ผลํ ขลุ สมฺภุนนฺตุฯ
๗๔.
อารมฺภโตปฺปภุติ ยาว ตวคฺคมคฺคา,
วิกฺขาลิต ฆกลุสํ สุจิ สีล โตยํ;
เมตฺตา ทยา มธุร สีตลตายุเปตํ,
โสเธตุ ตฺวํว ภว นิสฺสิต ชนฺตุ เมตํฯ
๗๕.
อาปจฺจิมตฺตมภินิกฺขมนาภิโยคา,
ปฏฺฐาย ตมฺปภวโต ปริปุณฺณ เคหา;
ตฺวํ สพฺพ ชาติ คหโต อปิ นิกฺขมิตฺโถ,
เอวํ ชนา ภว ทุขา ขลุ นิกฺขมนฺตุฯ
๗๖.
เอกคฺคโต ปล ตเล นิสิตา จิรนฺธิ,
ธารา สุจิตฺตุ สุตเล สติ ทณฺฑ พทฺเธ;
นิพฺพิชฺฌิ ลกฺขณ ธนุฏฺฐิติ สนฺติ ลกฺขํ,
ขิตฺตา ตโยนมนุ วิชฺฌตุ ชนฺตุ ขิตฺตาฯ
๗๗.
ตฺวํ ปารมี ชล นิธิํ จตุริห พาหุ,
สตฺตีหิ สุตฺตริ จิรํ ชนโกว สินฺธุํ;
สมฺปนฺน วิกฺกม ผโลสิ ยถา จโสว,
เอวํ ชนา วิริยตปฺผลเม ธยนฺตุฯ
๗๘.
สตฺต ปรธ ทหเนสุ จิรํ สุธนฺตํ,
ขนฺตี สุวณฺณ กต รูป สมนฺติมตฺตา;
สพฺพา ปราธมสหิ ตฺวํอสยฺหเมวํ,
สพฺเพ ชนาปิ ขมเนน ภชนฺตุ สนฺติํฯ
๗๙.
ลกฺขาธิกํ จตุร สํขิย กปฺป กาลํ,
สจฺเจน สุฏฺฐุ ปริภาวิต วาจิโน เต;
วาจาย สจฺจ ผุสิตาย สเมนฺติ ชนฺตุ,
เอวํ วิสุทฺธ วจนา ชนตา ภวนฺตุฯ
๘๐.
อาทินฺน ธมฺม มหิยตฺถิร สุปฺปติฏฺฐา,
ธิฏฺฐาน ปารมิ มหา วชิรทฺทิ ตุยฺหํ;
สตฺเตน เกน ปิ ยถาหิ อเภชฺช เนชฺโช,
เอวํ ชนาปิ กุสเลสุ อธิฏฺฐ หนฺตุฯ
๘๑.
ตฺวํ สพฺพ สตฺต จิรภาวิต เมตฺต จิตฺต,
โตเยหิ สํสมิต โกธ มหา หุตาโส;
โลกุตฺตรํ ตทิตรํ หิตมาวหิตฺโถ,
เอวํ ชเนสุ ชนตา หิตมาวหนฺตูฯ
๘๒.
มิตฺโตปการ ปฏิปกฺข ชนาปกาเร,
ตฺวํ นิพฺพิการ มนโส จิรภาวนาย;
ปตฺโตสิลาภ ปภุตฏฺฏุสุ นิพฺพิการํ,
เอวํ ชนานุนย โกป นุทา ภวนฺตุฯ
๘๓.
สมฺปนฺน เหตุ วิภโว ตุสิเต วิมานํ,
ยุตฺตํ คุเณหิ นวภิปฺปทวี วิมานํ;
ตฺวํ วาธิปรมิธิโรหินิยา ติโลโก,
อาโรหตุ ภย สุขํ ปทวี วิมานํฯ
๘๔.
ตฺวํเวรหํสิ สมพุชฺฌิ ยถาจ สมฺมา,
สมฺปนฺน วิชฺช จรโณ สุคโตสิ โหนฺตุ;
โลกํ วิโท ปุริสทมฺมสุสารถี สิ,
สตฺถาสิ พุชฺฌิ ภควา สิ ตเถว ชนฺตุฯ
๘๕.
สจฺจิตฺต ภู นิทหิตํ ชนตาย ตุยฺหํ,
กลฺยาณวณฺณรตนณฺณวชาติภินฺนํ;
ทุกฺขคฺคิ โจร ชลุปทฺทุตชาติ เคเห,
ตสฺสา สุขํ ภวตุ ชีวิตุมาปทายฯ
๘๖.
วาจา วิจิตฺต วร ตนฺตุ คตงฺคิ กณฺเฐ,
สฺวา มุตฺต สคฺคุณ มหา รตนา วลี เต;
เววณฺณิ ยตฺตนิ ภวํ สกลมฺปหาย,
โหตญฺชนสฺส สิริ สงฺคม มงฺคลายฯ
๘๗.
ตํ สคฺคุณตฺถว ทหฏฺฐ สุติปฺปนาลิ,
นิสฺสนฺทมาน คุณนีร นิปาน ตินฺเต;
เขตฺเตตฺต สญฺญินิ ชนา กต โลม หํส,
พีชนฺกุรี กุสล สสฺส ผลํ ลภนฺตุฯ
๘๘.
อาปายิกปฺปภุติ ทุกฺข นิทาฆ กาล,
สนฺตาปิตา นิขิล โลก มโน กทมฺพา;
ตํ วงฺณ เมฆ ผุสนา หสนงฺกุเรหิ,
อิทฺธา ภวนฺตุ มติ วลฺลริ เวลฺลีตา เตฯ
๘๙.
เหตุทฺทสา ผลทสา สมวฏฺฐิตํ ตํ,
สพฺพตฺถ สตฺต หิตมาวหเณน สิทฺธํ;
จินฺตาปถาติคนุภาว วิภาวนนฺเต,
ภูตานมตฺถุ จริตพฺภุตมตฺถ สิธฺยาฯ
๙๐.
องฺคารกาสุมภิลงฺฆิย ทาน กาเล,
ภตฺตตฺตโน ปท ปฏิจฺฉก ปงฺกชา จ;
ยาตกฺขเณ ตว ปเท ธฏมุฏฺฐหิตฺวา,
ปงฺเกรุหาํ สิว มธุํ สรตํ ททนฺตุฯ
๙๑.
สจฺเจน มจฺฉ ปติ วสฺสิต วสฺสธารา,
สตฺเต ทยาย ตว วสฺสิต วสฺสธารา;
คิมฺเห ชนสฺส สมยิํสุ ยถา ตถาตา,
ธมมฺพุวุฏฺฐิว สเมนฺตุ กิเลส ทาเหฯ
๙๒.
ฉทฺทนฺต นาค ปตินา ขมตา ปราธํ,
เฉตฺวา กเร ฐปิต ทนฺตวราว ลุทฺทํ;
โลเก หิตาย ฐปิตา ตว ทนฺต ธาตุ,
เสฏฺฐา ชนํ สิว ปุรํ ลหุ ปาปยนฺตุฯ
๙๓.
ตํ เตมิยาขฺย ยติโนสฺสม มาลกมฺหิ,
โอกิณฺณ มุตฺต กนกา วุช วิปฺปกิณฺณา;
การุญฺญ วาริท จุโต ทก พินฺทุ พนฺธู,
ธาตุ สเมนฺตุ ตว ชนฺตุสุ ทุกฺขทาเหฯ
๙๔.
รฏฺฐสฺส อตฺถ จรณาย อสมฺมุขสฺส,
ราเมน ทินฺน ติณ สํขต ปาทุกาว;
ภุตฺตา ตยา จิรมสมฺมุข นาคตสฺส,
โลกสฺส อตฺถมนุ ติฏฺฐตุ ปตฺต ธาตุฯ
๙๕.
วุตฺโต ชนานมุปทิสฺส วราห รญฺญา,
สตฺถิํ สหสฺส สรทํ วิย ญาย ธมฺโม;
อาเทยฺย เหยฺยมุปทิสฺส ตยา ปวุตฺโต,
ธมฺโม ปวตฺตตุ จิรํ ชนตา หิตายฯ
๙๖.
มาราริ มทฺทน หิตาธิคมํ กโรตา,
ภตฺโต ตยา วร มหา ชย โพธิ ราชา;
สคฺคา ปววคฺค หิตเหตุ ชนสฺส หนฺตฺวา,
สพฺพนฺตรายมิห ติฏฺฐตุ สุฏฺฐุ สชฺโชฯ
๙๗.
สาโมท วณฺณ ภชนี คุณ มญฺชรียํ,
จริยา ลตา วิกสิตา ตว สปฺผลงฺคํ;
โอกิณฺณ จิตฺต มธุเป รส ปีณยนฺติ,
สมฺภาวิตา ภุวิ ปวตฺตตุ มตฺถเกหิฯ
๙๘.
สมฺพุทฺธ เสลวลยนฺตร ชานนวฺหา,
โนตฺตตฺตโต ติปถคา ยติ สาครฏฺฐา;
ธมฺมา ปคา สุติ วเส ตริเต ปุณนฺติ,
สมฺภาร สสฺสมิห วตฺตตุ ปจยนฺติฯ
๙๙.
ปญฺญาณ กูป สิต ปคฺคห วายุ คาหี,
สทฺธา ลการ สหิตา สติ โปต วาหา;
สมฺปาปยาตุ ภว สาคร ปาร ตีร,
สปฺปตฺตนํ วรธเน ปติ ปตฺติ นาวาฯ
๑๐๐.
โพชฺฌงฺค สตฺต รตนากร ธมฺม ขนฺธ,
คมฺภีร นีร จย สาสน สาคโร สํ;
โส สีลฺยนนฺต ตนุ เวฏิถ ญาณ มนฺถ,
เสเลน มนฺถิตวตํ ทิสตา มตํ เวฯ
๑๐๑.
วุตฺเตน เตน วิธินา วิธินา ตโต ตํ,
ลทฺธา นุภูตมมตํ ขิล โทส นาสํ;
อจฺจนฺต โรค ชรตา มรณา ภิ ภูตํ,
ภูตํ กโรตุ อมรํ อชรํ อโรคํฯ
๑๐๒.
สทฺธมฺม ราช รวินิคฺคต ธมฺมรํสิ,
ผุลฺโล ธุตงฺคทล สํวร เกสราลิ;
สงฺฆารวินฺท นิกโร สมธุํ สมาธิ,
สกฺกิณฺณิโก ทิสตุ สาสน วาปิ ชโตฯ
๑๐๓.
อานนฺท รญฺญ รตนาทิ มหา ยตินฺท,
นิจฺจปฺปพุทฺธ ปทุมปฺปิย เสวินงฺคี;
พุทฺธปฺปิเยน ฆน พุทฺธ คุณปฺปิเยน,
เถราลินา รจิต ปชฺชมธุํ ปิพนฺตุฯ
๑๐๔.
อิตฺถํ รูป คุณานุกิตฺตนวสา ตํ ตํ หิตา สิํ สโต,
วตฺถานุสฺสติ วตฺติต อิห ยถา สตฺเตสุ เมตฺตา จ เม;
เอวํ ตาภิ ภวนฺต รุตฺตร ตรา วตฺตนฺตุ ตา โพธิ เม,
สํโยโคจ ธเนหิ สนฺติหิ ภเว กลฺยาน มิตฺเตหิ จฯ