๑. สนฺธิกปฺป
ปฐมกณฺฑ
(ก)
เสฏฺฐํ
พุทฺธญฺจ ธมฺมมมลํ คณมุตฺตมญฺจ;
สตฺถุสฺส ตสฺส วจนตฺถวรํ สุพุทฺธุํ,
วกฺขามิ สุตฺตหิตเมตฺถ สุสนฺธิกปฺปํฯ
(ข)
เสยฺยํ ชิเนริตนเยน พุธา ลภนฺติ,
ตญฺจาปิ ตสฺส วจนตฺถสุโพธเนน;
อตฺถญฺจ อกฺขรปเทสุ อโมหภาวา,
เสยฺยตฺถิโก ปทมโต วิวิธํ สุเณยฺยํฯ
๑, ๑. อตฺโถ อกฺขรสญฺญาโตฯ
สพฺพวจนานมตฺโถ อกฺขเรเหว สญฺญายเตฯ อกฺขรวิปตฺติยํ หิ อตฺถสฺส ทุนฺนยถา โหติ, ตสฺมา อกฺขรโกสลฺลํ พหูปการํ สุตฺตนฺเตสุฯ
๒, ๒. อกฺขราปาทโย เอกจตฺตาลีสํฯ
เต จ โข อกฺขรา อปิ อการาทโย เอกจตฺตา ลีส สุตฺตนฺเตสุ โสปการาฯ
ตํ ยถา? อ อา อิ อี อุ อู เอ โอ, ก ข ค ฆ ง, จ ฉ ช ฌ ญ, ฏ ฐ ฑ ฒ ณ, ต ถ ท ธ น, ป ผ พ ภ ม, ย ร ล ว ส ห ฬ อํ, อิติ อกฺขรา นามฯ
เตน กฺวตฺโถ? อตฺโถ อกฺขรสญฺญาโตฯ
๓, ๓. ตตฺโถทนฺตา สรา อฏฺฐฯ
ตตฺถ อกฺขเรสุ อการาทีสุ โอทนฺตา อฏฺฐ อกฺขรา สรา นาม โหนฺติฯ
ตํ ยถา? อ อา อิ อี อุ อู เอ โอ, อิติ สรา นามฯ
เตน กฺวตฺโถ? สรา สเร โลปํฯ
๔, ๔. ลหุมตฺตา ตโย รสฺสาฯ
ตตฺถ อฏฺฐสุ สเรสุ ลหุมตฺตา ตโย สรา รสฺสา นาม โหนฺติฯ
ตํ ยถา? อ อิ อุ, อิติ รสฺสา นามฯ
เตน กฺวตฺโถ? รสฺสํฯ
๕, ๕. อญฺเญ ทีฆาฯ
ตตฺถ อฏฺฐสุ สเรสุ รสฺเสหิ อญฺเญ ปญฺจ สรา ทีฆา นาม โหนฺติฯ
ตํ ยถา? อา อี อู เอ โอ, อิติ ทีฆา นามฯ
เตน กฺวตฺโถ? ทีฆํฯ
๖, ๘. เสสา พฺยญฺชนาฯ
ฐเปตฺวา อฏฺฐ สเร เสสา อกฺขรา กการาทโย นิคฺคหิตนฺตา พฺยญฺชนา นาม โหนฺติฯ
ตํ ยถา? ก ข ค ฆ ง, จ ฉ ช ฌ ญ, ฏ ฐ ฑ ฒ ณ, ต ถ ท ธ น, ป ผ พ ภ ม, ย ร ล ว ส ห ฬ อํ, อิติ พฺยญฺชนา นามฯ
เตน กฺวตฺโถ? สรา ปกติ พฺยญฺชเนฯ
๗, ๙. วคฺคา ปญฺจปญฺจโส มนฺตาฯ
เตสํ โข พฺยญฺชนานํ กการาทโย มการนฺตา ปญฺจปญฺจโส อกฺขรวนฺโต วคฺคา นาม โหนฺติฯ
ตํ ยถา? ก ข ค ฆ ง, จ ฉ ช ฌ ญ, ฏ ฐ ฑ ฒ ณ, ต ถ ท ธ น, ป ผ พ ภ ม, อิติ วคฺคา นามฯ
เตน กฺวตฺโถ? วคฺคนฺตํ วา วคฺเคฯ
๘, ๑๐. อํ อิติ นิคฺคหิตํฯ
อํ อิติ นิคฺคหิตํ นาม โหติฯ
เตน กฺวตฺโถ? อํ พฺยญฺชเน นิคฺคหิตํฯ
๙, ๑๑. ปรสมญฺญา ปโยเคฯ
ยา จ ปน ปเรสุ สกฺกตคนฺเถสุ สมญฺญา โฆสาติ วา อโฆสาติ วา, ตา ปโยเค สติ เอตฺถาปิ ยุชฺชนฺเตฯ
ตตฺถ โฆสา นาม-ค ฆ ง, ช ฌ ญ, ฑ ฒ ณ, ท ธ น, พ ภ ม, ย ร ล ว ห ฬ, อิติ โฆสา นามฯ อโฆสา นาม-ก ข, จ ฉ, ฏ ฐ, ต ถ, ป ผ, ส, อิติ อโฆสา นามฯ
เตน กฺวตฺโถ? วคฺเค โฆสาโฆสานํ ตติยปฐมาฯ
๑๐, ๑๒. ปุพฺพมโธฐิต มสฺสรํ สเรน วิโยชเยฯ
ตตฺถ สนฺธิํ กตฺตุกาโม ปุพฺพพฺยญฺชนํ อโธฐิตํ อสฺสรํ กตฺวา สรญฺจ อุปริ กตฺวา สเรน วิโยชเยฯ
ตตฺรายมาทิฯ
๑๑, ๑๔. นเย ปรํ ยุตฺเตฯ
อสฺสรํ โข พฺยญฺชนํ อโธฐตํ ปรกฺขรํ นเย ยุตฺเตฯ ตตฺราภิรติมิจฺเฉยฺยฯ
ยุตฺเตติกสฺมา? อกฺโกจฺฉิ มํ อวธิ มํ, อชินิ มํ อหาสิ เมฯ เอตฺถ ปน ยุตฺตํ น โหติฯ
อิติ สนฺธิกปฺเป ปฐโม กณฺโฑฯ
ทุติยกณฺฑ
๑๒, ๑๓. สรา สเร โลปํฯ
สรา โข สเร ปเร โลปํ ปปฺโปนฺติฯ
ยสฺสินฺทฺริยานิ สมถงฺคตานิฯ โน เหตํ ภนฺเต สเมตายสฺมา สงฺเฆนฯ
๑๓, ๑๕. วา ปโร อสรูปาฯ
สรมฺหา อสรูปา ปโร สโร โลปํ ปปฺโปติ วาฯ
จตฺตาโร’เม ภิกฺขเว ธมฺมา, กินฺนุ’ มาวสมณิโยฯ วาติ กสฺมา? ปญฺจินฺทฺริยานิ, ตยสฺสุ ธมฺมา ชหิตา ภวนฺติฯ
๑๔, ๑๖. กฺวจาสจณฺณํ ลุตฺเตฯ
สโร โข ปโร ปุพฺพสเร ลุตฺเต กฺวจิ อสวณฺณํ ปปฺโปติฯ
สงฺขฺยํ โนเปติ เวทคู, พนฺธุสฺเสว สมาคโมฯ
กฺวจีติ กสฺมา? ยสฺสินฺทฺริยานิ, ตถูปมํ ธมฺมวรํ อเทสยิฯ
๑๕, ๑๗. ทีฆํฯ
สโร โข ปโร ปุพฺพสเร ลุตฺเต กฺวจิ ทีฆํ ปปฺโปติฯ สทฺธีธ วิตฺตํ ปุริสสฺส เสฏฺฐํ, อนาคาเรหิ จูภยํฯ
กฺวจีติ กสฺมา? ปญฺจหุปาลิ องฺเคหิ สมนฺนาคโตฯ นตฺถญฺญํ กิญฺจิฯ
๑๖, ๑๘. ปุพฺโพ จฯ
ปุพฺโพ จ สโร ปรสรโลเป กเต กฺวจิ ทีฆํ ปปฺโปติฯ
กิํสูธ วิตฺตํ ปุริสสฺส เสฏฺฐํ, สาธูติ ปฏิสฺสุณิตฺวา, กฺวจีติ กสฺมา? อิติสฺส มุหุตฺตมฺปิฯ
๑๗, ๑๙. ยเมทนฺตสฺสาเทโส
เอการสฺส อนฺตภูตสฺส สเร ปเร กฺวจิ ยการาเทโส โหติฯ
อธิคโต โข มฺยายํ ธมฺโม, ตฺยาหํ เอวํ วเทยฺยํ, ตฺยาสฺส ปหีนา โหนฺติฯ
กฺวจีติ กสฺมา? เน’นาคตา, อิติ เนตฺถฯ
๑๘, ๒๐. วโมทุทนฺตานํฯ
โอการุการานํ อนฺตภูตานํ สเร ปเร กฺวจิ วการาเทโส โหติฯ
อถ ขฺวสฺส, สฺวสฺส โหติ, พหฺวาพาโธ, วตฺถฺเวตฺถ วิหิตํ นิจฺจํ จกฺขาปาถมาคจฺฉติฯ
กฺวจีติกสฺมา? จตฺตาโร’เม ภิกฺขเว ธมฺมา, กินฺนุมาว สมณิโยฯ
๑๙, ๒๒. สพฺโพ จํติฯ
สพฺโพ อิจฺเจโส ติสทฺโท พฺยญฺชโน สเร ปเร กฺวจิ จการํ ปปฺโปติฯ
อิจฺเจตํ
กฺวจีติ กสฺมา? อิติสฺส มุหุตฺตมฺปิฯ
๒๐, ๒๗. โท ธสฺส จฯ
ธอิจฺเจตสฺส สเร ปเร กฺวจิ ทการาเทโส โหติฯ
เอกมิทาหํ ภิกฺขเว สมยํฯ
กฺวจีติ กสฺมา? อิเธว มรณํ ภวิสฺสติฯ
วคฺคหเณน ธการสฺส หการาเทโส โหติ สาหุ ทสฺสน มริยานํฯ
สุตฺตวิภาเคน พหุธา สิยา-
โต ทสฺส, ยถา? สุคโตฯ
โฏ ตสฺส, ยถา? ทุกฺกฏํฯ
โธ ตสฺส, ยถา? คนฺธพฺโพฯ
ตฺโร ตฺตสฺส, ยถา? อตฺรโชฯ
โก คสฺส, ยถา? กุลูปโกฯ
โล
โช ยสฺส, ยถา? ควโชฯ
พฺโพ วสฺส, ยถา? กุพฺพโตฯ
โก ยสฺส, ยถา? สเกฯ
โย ชสฺส, ยถา? นิยํปุตฺตํฯ
โก ตสฺส, ยถา? นิยโกฯ
จฺโจ ตฺตสฺส, ยถา ภจฺโจฯ
โผ ปสฺส, ยถา? นิปฺผตฺติฯ
โข กสฺส, ยถา? นิกฺขมติฯ อิจฺเจวมาที โยเชตพฺพาฯ
๒๑, ๒๑. อิวณฺโณ ยํ นวาฯ
ปุพฺโพ อิวณฺโณ สเร ปเร ยการํ ปปฺโปติ นวาฯ ปฏิสุนฺถารวุตฺยสฺส, สพฺพา วิตฺยานุภูยเตฯ
นวาติ กสฺมา? ปญฺจหงฺเคหิ สมนฺนาคโต, มุตฺตจาคี อนุทฺธโตฯ
๒๒, ๒๘. เอวาทิสฺส ริ ปุพฺโพ จ รสฺโสฯ
สรมฺหา ปรสฺส เอวสฺส เอการสฺส อาทิสฺส ริกาโร โหติ, ปุพฺโพ จ สโร รสฺโส โหติ นวาฯ
ยถริว
นวาติ กสฺมา? ยถา เอว, ตถา เอวฯ
อิติ สนฺธิกปฺเป ทุติโย กณฺโฑฯ
ตติยกณฺฑ
๒๓, ๒๖. สรา ปกติ พฺยญฺชเนฯ
สรา โข พฺยญฺชเน ปเร ปกติรูปานิ โหนฺติฯ
มโนปุพฺพงฺคมา ธมฺมา, ปมาโท มจฺจุโน ปทํ, ติณฺโณ ปารงฺคโต อหุฯ
๒๔, ๓๕. สเร กฺวจิฯ
สรา โข สเร ปเร กฺวจิ ปกติรูปานิ โหนฺติฯ
โก อิมํ ปถวิํ วิเจสฺสติฯ
กฺวจีติ กสฺมา? อปฺปสฺสุตายํ ปุริโสฯ
๒๕, ๓๗. ทีฆํฯ
สรา โข พฺยญฺชเน ปเร กฺวจิ ทีฆํ ปปฺโปนฺติฯ
สมฺมา
กฺวจีติ กสฺมา? อิธ โมทติ เปจฺจ โมทติ, ปติลียติ, ปฏิหญฺญติฯ
๒๖, ๓๘. รสฺสํฯ
สรา โข พฺยญฺชเน ปเร กฺวจิ รสฺสํ ปปฺโปนฺติฯ
โภวาทินาม โส โหติ, ยถาภาวิ คุเณน โสฯ
กฺวจีติ กสฺมา? สมฺมาสมาธิ, สาวิตฺตี ฉนฺทโส มุขํ, อุปนียติ ชีวิตมปฺปมายุฯ
๒๗, ๓๙. โลปญฺจ ตตฺรากาโรฯ
สรา โข พฺยญฺชเน ปเร กฺวจิ โลปํ ปปฺโปนฺติฯ ตตฺร จ โลเป กเต อการาคโม โหติฯ
ส สีลวาฯ ส ปญฺญวา เอส ธมฺโม สนนฺตโน, ส เว กสาวมรหติ, ส มานกาโมปิ ภเวยฺย, ส เว มุนิ ชาติภยํ อทสฺสิฯ
กฺวจีติ
๒๘, ๔๐. ปร ทฺเวภาโว ฐาเนฯ
สรมฺหา ปรสฺส พฺยญฺชนสฺส ทฺเวภาโว โหติ ฐาเนฯ
อิธปฺปมาโท, ปุริสสฺส ชนฺตุโน, ปพฺพชฺชํ กิตฺตยิสฺสามิ, จาตุทฺทสิ, ปญฺจทฺทสิ, อภิกฺกนฺตตโร จนฺโทฯ
ฐาเนติ กสฺมา? อิธ โมทติ เปจฺจ โมทติฯ
๒๙, ๔๒. วคฺเค โฆสาโฆสานํ ตติยปฐมาฯ
วคฺเค โข ปุพฺเพสํ พฺยญฺชนานํ โฆสาโฆสภูตานํ สรมฺหา ยถาสงฺขฺยํ ตติยปฐมกฺขรา ทฺเวภาวํ คจฺฉนฺติ ฐาเนฯ
เอเสว จชฺฌานปฺผโล, ยตฺรฏฺฐิตํ นปฺปสเหยฺย มจฺจุ, เสเล ยถา ปพฺพตมุทฺธนิฏฺฐิโต, จตฺตาริฏฺฐานานิ นโร ปมตฺโตฯ
ฐาเนติ กสฺมา? อิธ เจตโส ทฬฺหํ คณฺหาติ ถามสาฯ
อิติ สนฺธิกปฺเป ตติโย กณฺโฑฯ
จตุตฺถกณฺฑ
๓๐, ๕๘. อํ พฺยญฺชเน นิคฺคหิตํฯ
นิคฺคหิตํ โข พฺยญฺชเน ปเร อํ อิติ โหติฯ
เอวํ วุตฺเต, ตํ สาธูติ ปฏิสฺสุณิตฺวาฯ
๓๑, ๔๙. วคฺคนฺตํ วา วคฺเคฯ
วคฺคภูเต พฺยญฺชเน ปเร นิคฺคหิตํ โข วคฺคนฺตํ วา ปปฺโปติฯ
ตนฺนิจฺจุตํ, ธมฺมญฺจเร สุจริตํ, จิรปฺปวาสิํ ปุริสํฯ สนฺตนฺตสฺส มนํ โหติ, ตงฺการุณิกํ, เอวงฺโข ภิกฺขเว สิกฺขิตพฺพํฯ
วาคฺคหเณนนิคฺคหิตํ โข ลการาเทโส โหติฯ ปุคฺคลํฯ
วาติ กสฺมา? น ตํ กมฺมํ กตํ สาธุฯ
๓๒, ๕๐. เอเห อุํฯ
เอการหกาเร ปเร นิคฺคหิตํ โข ญการํ ปปฺโปติ วาฯ
ปจฺจตฺตญฺเญว ปรินิพฺพายิสฺสามิ, ตญฺเญเวตฺถ ปฏิปุจฺฉิสฺสามิ, เอวญฺหิ โว ภิกฺขเว สิกฺขิตพฺพํฯ ตญฺหิ ตสฺส มุสา โหติฯ
วาติ
๓๓, ๕๐. สเย จฯ
นิคฺคหิตํ โข ยกาเร ปเร สห ยกาเรน ญการํ ปปฺโปติ วาฯ
สญฺโญโค, สญฺญุตฺตํฯ
วาติ กสฺมา? สํโยโค, สํยุตฺตํฯ
๓๔, ๕๒. มทา สเรฯ
นิคฺคหิตสฺส โข สเร ปเร มการทการาเทสา โหนฺติ วาฯ
ตมหํ พฺรูมิ พฺราหฺมณํ, เอตทโวจ สตฺถาฯ
วาติ กสฺมา? อกฺโกจฺฉิ มํ อวธิ มํ, อชินิ มํ อหาสิ เมฯ
๓๕, ๓๔. ย ว ม ท น ต ร ลา จาคมาฯ
สเร ปเร ยกาโร วกาโร มกาโร ทกาโร นกาโร ตกาโร รกาโร ลกาโร อิเม อาคมา โหนฺติ วาฯ
นยิมสฺส วิชฺชา, ยถยิทํ จิตฺตํฯ มิคี ภนฺตา วุทิกฺขติ, สิตฺตา เต ลหุ เมสฺสติ, อสิตฺตา เต ครุ เมสฺสติฯ อสฺโส
วาติ กสฺมา? เอวํ มหิทฺธิยา เอสา, อกฺโกจฺฉิ มํ อวธิ มํ, อชินิ มํ อหาสิ เม, อเชยฺโย อนุคามิโกฯ
จคฺคหเณน อิเธว มการสฺส ปกาโร โหติฯ จิรปฺปวาสิํ ปุริสํฯ
กการสฺส จ ทกาโร โหติฯ สทตฺถปสุโต สิยาฯ
ทการสฺส จ ตกาโร โหติ, สุคโตฯ
๓๖, ๔๗. กฺวจิ โอ พฺยญฺชเนฯ
พฺยญฺชเน ปเร กฺวจิ โอการาคโม โหติฯ
อติปฺปโค โข ตาว สาวตฺถิยํ ปิณฺฑาย จริตุํฯ ปโรสหสฺสํฯ
กฺวจีกิ
๓๗, ๕๗. นิคฺคหิตญฺจฯ
นิคฺคหิตญฺจาคโม โหติ สเร วา พฺยญฺชเน วา ปเร กฺวจิฯ
จกฺขุํอุทปาทิ, อวํสิโร, ยาวญฺจิธ ภิกฺขเว ปุริมํ ชาติํ สรามิ, อณุํถูลานิ สพฺพโส, มโนปุพฺพงฺคมา ธมฺมาฯ
กฺวจีติ กสฺมา? อิเธว นํ ปสํสนฺติ, เปจฺจ สคฺเค ปโมทติ, น หิ เอเตหิ ยาเนหิ, คจฺเฉยฺย อคตํ ทิสํฯ
จคฺคหเณน วิสทฺทสฺส จ ปกาโร โหติฯ ปเจสฺสติ, วิเจสฺสติ วาฯ
๓๘, ๕๓. กฺวจิ โลปํฯ
นิคฺคหิตํ โข สเร ปเร กฺวจิ โลปํ ปปฺโปติฯ
ตาสาหํ สนฺติเก, วิทูนคฺคมิติฯ
กฺวจีติ กสฺมา? อหเมว นูน พาโล เอตมตฺถํ วิทิตฺวานฯ
๓๙, ๕๔. พฺยญฺชเน จฯ
นิคฺคหิตํ โข พฺยญฺชเน ปเร กฺวจิ โลปํ ปปฺโปติฯ
อริยสจฺจานทสฺสนํ, เอตํ พุทฺธานสาสนํฯ
กฺวจีติ กสฺมา? เอตํ มงฺคลมุตฺตมํ, ตํ โว วทามิ ภทฺทนฺเตฯ
๔๐, ๕๕. ปโร วาสโรฯ
นิคฺคหิตมฺหา ปโร สโร โลปํ ปปฺโปติ วาฯ
ภาสิตํ อภินนฺทุนฺติ, อุตฺตตฺตํว, ยถาพีชํว, ยถาธญฺญํวฯ
วาติ กสฺมา? อหเมว นูน พาโล, เอตทโหสิฯ
๔๑, ๕๖. พฺยญฺชโน จ วิสญฺโญโคฯ
นิคฺคหิตมฺหา ปรสฺมิํ สเร ลุตฺเต ยทิ พฺยญฺชโน สสญฺโญโค วิสญฺโญโค โหติฯ
เอวํส เต อาสโว, ปุปฺผํสา อุปฺปชฺชิฯ
ลุตฺเตติ กสฺมา? เอวมสฺส วิทูนคฺคมิติฯ
จคฺคหเณน
อิติ สนฺธิกปฺเป จตุตฺโถ กณฺโฑฯ
ปญฺจมกณฺฑ
๔๒, ๓๒. โคสเร ปุถสฺสาคโม กฺวจิฯ
ปุถอิจฺเจตสฺส อนฺเต สเร ปเร กฺวจิ คการาคโม โหติฯ
ปุถเค วฯ
๔๓, ๓๓. ปาสฺส จนฺโต รสฺโสฯ
ปาอิจฺเจตสฺส อนฺเต สเร ปเร กฺวจิ คการาคโม โหติ, อนฺโต จ สโร รสฺโส โหติฯ
ปเคว วุตฺยสฺสฯ
กฺวจีติ กสฺมา? ปา เอว วุตฺยสฺสฯ
๔๔, ๒๔. อพฺโภ อภิฯ
อภิอิจฺเจตสฺส สเร ปเร อพฺภาเทโส โหติฯ อพฺภุทีริตํ, อพฺภุคฺคจฺฉติฯ
๔๕, ๒๕. อชฺโฌ อธิฯ
อธิอิจฺเจตสฺส สเร ปเร อชฺฌาเทโส โหติฯ
อชฺโฌกาเส, อชฺฌาคมาฯ
๔๖, ๒๖. เต น วา อิวณฺเณฯ
เต จ โข อภิอธิอิจฺเจเต อิวณฺเณ ปเร อพฺโภ อชฺโฌอิติวุตฺตรูปา นํ โหนฺติ วาฯ
อภิจฺฉิตํ, อธีริตํฯ
วาติ กสฺมา? อพฺภีริตํ, อชฺฌิณมุตฺโตฯ
๔๗, ๒๓. อติสฺส จนฺตสฺสฯ
อติอิจฺเจตสฺส อนฺตภูตสฺส ติสทฺทสฺส อิวณฺเณ ปเร ‘‘สพฺโพ จํ ตี’’ติ วุตฺตรูปํ น โหติฯ
อตีสิคโณ, อตีริตํฯ
อิวณฺเณติ กสฺมา? อจฺจนฺตํฯ
๔๘, ๔๓. กฺวจิ ปฏิ ปติสฺสฯ
ปติอิจฺเจตสฺส สเร วา พฺยญฺชเน วา ปเร กฺวจิ ปฏิอาเทโส โหติฯ
ปฏคฺคิ ทาตพฺโพ, ปฏิหญฺญติฯ
กฺวจีติ
๔๙, ๔๔. ปุถสฺสุ พฺยญฺชเนฯ
ปุถอิจฺเจตสฺส อนฺโต สโร พฺยญฺชเน ปเร อุกาโร โหติฯ
ปุถุชฺชโน, ปุถุภูตํฯ
อนฺตคฺคหเณน อปุถสฺสาปิ สเร ปเร อนฺตสฺส อุกาโร โหติ, มนุญฺญํฯ
๕๐, ๔๕. โอ อวสฺสฯ
อวอิจฺเจตสฺส พฺยญฺชเน ปเร กฺวจิ โอกาโร โหติฯ
อนฺธกาเรน โอนทฺธาฯ
กฺวจีติ กสฺมา? อวสุสฺสตุ เม สรีเร มํสโลหิตํฯ
๕๑, ๕๙. อนุปทิฏฺฐานํ วุตฺตโยคโตฯ
อนุปทิฏฺฐานํ อุปสคฺคนิปาตานํ สรสนฺธีหิ พฺยญฺชนสนฺธีหิ วุตฺตสนฺธีหิ จ ยถาโยคํ โยเชตพฺพํฯ
ปาปนํ
ปริคฺคโห, ปคฺคโห, ปกฺกโม, ปรกฺกโม, นิกฺกโม, นิกฺกสาโว, นิลฺลยนํ, ทุลฺลยนํ, ทุมฺภิกฺขํ, ทุพฺพุตฺตํ, สนฺทิฏฺฐํ, ทุคฺคโห, วิคฺคโห, นิคฺคโต, อภิกฺกโม, ปฏิกฺกโม, เอวํ พฺยญฺชเน จฯ เสสา สพฺเพ โยเชตพฺพาฯ
อิติ สนฺธิกปฺเป ปญฺจโม กณฺโฑฯ
สนฺธิกปฺโป นิฏฺฐิโตฯ