(๑๑) ๑. วลาหกวคฺโค
๑-๒. วลาหกสุตฺตทฺวยวณฺณนา
๑๐๑-๒. ตติยปณฺณาสกสฺส วลาหกาติ เมฆาฯ ภาสิตา โหติ โน กตฺตาติ ‘‘อิทญฺจิทญฺจ กริสฺสามี’’ติ เกวลํ ภาสติเยว, น กโรติฯ กตฺตา โหติ โน ภาสิตาติ อกเถตฺวาว ‘‘อิทญฺจิทญฺจ มยา กาตุํ วฏฺฏตี’’ติ กตฺตา โหติฯ เอวํ สพฺพตฺถ อตฺโถ เวทิตพฺโพฯ ทุติยํ อุตฺตานตฺถเมวฯ
๓. กุมฺภสุตฺตวณฺณนา
๑๐๓. ตติเย กุมฺภาติ ฆฏาฯ ตุจฺโฉ ปิหิโตติ ริตฺตโก ปิหิตมุโขฯ ปูโร วิวโฏติ อุทกปุณฺโณ อปารุตมุโขฯ เสสทฺวเยปิ เอเสว นโยฯ
๔. อุทกรหทสุตฺตวณฺณนา
๑๐๔. จตุตฺเถ อุตฺตาโน คมฺภีโรภาโสติอาทีสุ ปุราณปณฺณรสสมฺภินฺนวณฺโณ กาฬอุทโก คมฺภีโรภาโส นาม, อจฺฉวิปฺปสนฺนมณิวณฺณอุทโก อุตฺตาโนภาโส นามฯ
๕-๖. อมฺพสุตฺตวณฺณนา
๑๐๕-๖. ปญฺจเม อามํ ปกฺกวณฺณีติ อามกํ หุตฺวา โอโลเกนฺตานํ ปกฺกสทิสํ ขายติฯ เอวํ สพฺพปทานิ ทฏฺฐพฺพานิฯ ฉฏฺฐํ อุตฺตานตฺถเมวฯ
๗. มูสิกสุตฺตวณฺณนา
๑๐๗. สตฺตเม คาธํ กตฺตา โน วสิตาติ วุจฺจติฯ ขนฺตาติปิ ปาโฐฯ อิมินา นเยน สพฺพปทานิ เวทิตพฺพานิฯ
๘. พลีพทฺทสุตฺตวณฺณนา
๑๐๘. อฏฺฐเม สควจณฺโฑ โน ปรควจณฺโฑติ เอวํ สพฺพปทานิ เวทิตพฺพานิฯ อุพฺเพเชตา โหตีติ ฆฏฺเฏตฺวา วิชฺฌิตฺวา อุพฺเพคปตฺตํ กโรติฯ
๙. รุกฺขสุตฺตวณฺณนา
๑๐๙. นวเม เผคฺคุ เผคฺคุปริวาโรติ นิสฺสาโร เผคฺคุรุกฺโข เผคฺคุรุกฺเขเหว ปริวุโตฯ สารปริวาโรติ
๑๐. อาสีวิสสุตฺตวณฺณนา
๑๑๐. ทสเม อาคตวิโส น โฆรวิโสติ ยสฺส วิสํ อาคจฺฉติ, โฆรํ ปน น โหติ, จิรกาลํ น ปีเฬติฯ เสสปเทสุปิ เอเสว นโยติฯ
วลาหกวคฺโค ปฐโมฯ