๔. เทวตาวคฺโค
๕. ปฐมมิตฺตสุตฺตวณฺณนา
๓๖. จตุตฺถสฺส ทุทฺททนฺติ ทุปฺปริจฺจชํ มหารหํ ภณฺฑกํฯ ทุกฺกรํ กโรตีติ กาตุํ อสุกรํ กมฺมํ กโรติฯ ทุกฺขมํ ขมตีติ สหายสฺส อตฺถาย ทุรธิวาสํ อธิวาเสติฯ คุยฺหมสฺส อาวิกโรตีติ อตฺตโน คุยฺหํ ตสฺส อาวิกโรติฯ คุยฺหมสฺส ปริคุหตีติ ตสฺส คุยฺหํ อญฺเญสํ นาจิกฺขติฯ ขีเณน นาติมญฺญตีติ ตสฺส โภเค ขีเณ เตน ขเยน ตํ นาติมญฺญติ, ตสฺมิํ โอมานํ อตฺตนิ จ อติมานํ น กโรติฯ
๖. ทุติยมิตฺตสุตฺตวณฺณนา
๓๗. ฉฏฺเฐ วตฺตาติ วจนกุสโลฯ วจนกฺขโมติ วจนํ ขมติ, ทินฺนํ โอวาทํ กโรติฯ คมฺภีรนฺติ คุยฺหํ รหสฺสํ ฌานนิสฺสิตํ วิปสฺสนามคฺคผลนิพฺพานนิสฺสิตํฯ
๗. ปฐมปฏิสมฺภิทาสุตฺตวณฺณนา
๓๘. สตฺตเม อิทํ เม เจตโส ลีนตฺตนฺติ อุปฺปนฺเน เจตโส ลีนตฺเต ‘‘อิทํ เม เจตโส ลีนตฺต’’นฺติ ยถาสภาวโต ชานาติฯ อชฺฌตฺตํ สํขิตฺตํ นาม ถินมิทฺธานุคตํฯ พหิทฺธา วิกฺขิตฺตํ นาม ปญฺจสุ กามคุเณสุ เวทนาติอาทีนิ ปปญฺจมูลวเสน คหิตานิฯ เวทนา หิ ตณฺหาย มูลํ สุขวเสน ตณฺหุปฺปตฺติโต, สญฺญา ทิฏฺฐิยา มูลํ อวิภูตารมฺมเณ ทิฏฺฐิอุปฺปตฺติโต, วิตกฺโก มานสฺส มูลํ วิตกฺกวเสน อสฺมีติ มานุปฺปตฺติโตฯ สปฺปายาสปฺปาเยสูติ อุปการานุปกาเรสุฯ นิมิตฺตนฺติ การณํฯ เสสํ สพฺพตฺถ อุตฺตานตฺถเมวาติฯ
เทวตาวคฺโค จตุตฺโถฯ