३. कारककण्ड
पठमाविभत्तिरासि
अथ नामविभत्तीनं अत्थभेदा वुच्चन्ते।
कस्मिं अत्थे पठमा?
२८९. पठमत्थमत्ते
नामस्स अभिधेय्यमत्ते पठमाविभत्ति होति।
रुक्खो, माला, धनं।
एत्थ च मत्तसद्देन कत्तु, कम्मादिके विभत्यत्थे निवत्तेति। तस्मा अत्थमत्तन्ति लिङ्गत्थोयेव वुच्चति।
तत्थ अनुच्चारिते सति सुणन्तस्स अविदितो अत्थो लीनत्थो नाम। तं लीनमत्थं गमेति बोधेतीति लिङ्गं, उच्चारितपदं।
तं पन पकतिलिङ्गं, निप्फन्नलिङ्गन्ति दुविधं। तत्थ विभत्तिरहितं पकतिलिङ्गं इधाधिप्पेतं लिङ्ग, विभत्तीनं विसुं विसुं विभागट्ठानत्ता।
लीनं अङ्गन्ति लिङ्गं। तत्थ ‘लीन’न्ति अपाकटं। ‘अङ्ग’न्ति अवयवो। लिङ्गं, नामं, पाटिपदिकन्ति अत्थतो एकं।
लिङ्गस्स अत्थो परमत्थो, पञ्ञत्तिअत्थोति दुविधो। तथा विसेसनत्थो, विसेस्यत्थोति।
तत्थ विसेसनत्थो नाम सकत्थो, तस्स तस्स सद्दस्स पटिनियतो पाटिपुग्गलिकत्थोति वुत्तं होति। सोयेव तस्मिं तस्मिं अत्थे आदिम्हि सद्दुप्पत्तिया चिरकालञ्च सद्दपवत्तिया निबद्धकारणत्ता निमित्तत्थोति च वुच्चति
विसेस्यत्थो नाम सामञ्ञत्थो, बहुनिमित्तानं साधारणत्थोति वुत्तं होति, सोयेव तंतंनिमित्तयोगा नेमित्तकत्थोति च वुच्चति, सो जाति, गुण, दब्ब, क्रिया, नामवसेन पञ्चविधो। गो, सुक्को, दण्डी, पाचको, तिस्सोति।
तत्थ गोसद्दो यदा जातिमत्तं वदति गो जातीति, तदा सुति विसेसनं। यदा दब्बं वदति गो गच्छतीति, तदा सुति च जाति च विसेसनं।
सुक्कसद्दो यदा गुणमत्तं वदति सुक्को गुणोति, तदा सुति विसेसनं। यदा गुणविसेसं वदति गोस्स सुक्कोति, तदा सुति च गुणजाति च विसेसनं। यदा गुणवन्तं दब्बं वदति सुक्को गोति, तदा सुति च गुणजाति च गुणविसेसो च सम्बन्धो च विसेसनं।
दण्डीसद्दो यदा जातिमत्तं वदति दण्डी जातीति, तदा सुति च दब्बञ्च विसेसनं। यदा दब्बवन्तं दब्बं वदति दण्डी पुरिसोति, तदा सुति च दब्बञ्च जाति च सम्बन्धो च विसेसनं।
पाचकसद्दो यदा जातिमत्तं वदति पाचको जातीति, तदा सुति च क्रिया च विसेसनं। यदा क्रियानिप्फादकं दब्बं वदति पाचको पुरिसोति, तदा सुति च क्रिया च जाति च क्रियाकारकसम्बन्धो च विसेसनं।
तिस्ससद्दो यदा नाममत्तं वदति तिस्सो नामन्ति, तदा सुति विसेसनं। यदा नामवन्तं दब्बं वदति, तिस्सो भिक्खूति, तदा सुति च नामजाति च सम्बन्धो च विसेसनं।
सब्बत्थ यं यं वदतीति वुत्तं, तं तं विसेस्यन्ति च दब्बन्ति च वेदितब्बं। एत्थ च सुति नाम सद्दसभावा एव होति, सद्दपक्खिका
तत्थ लिङ्गं नाम ये इत्थि, पुरिसानं लिङ्ग, निमित्त, कुत्ता’कप्पा नाम अभिधम्मे वुत्ता, ये च नपुंसकानं लिङ्ग, निमित्त, कुत्ता’कप्पा नाम अवुत्तसिद्धा, ये च सद्देसु चेव अत्थेसु च विसदा’विसदाकार, मज्झिमाकारा सन्दिस्सन्ति, सब्बमेतं लिङ्गं नाम।
एवं विसेसन, विसेस्यवसेन दुविधो अत्थो पुब्बे वुत्तस्स सद्दलिङ्गस्स अत्थो नाम, सो सलिङ्गो, ससङ्ख्यो, सपरिमाणो चाति तिविधो होति।
तत्थ सलिङ्गो यथा? सञ्ञा, फस्सो, चित्तं। कञ्ञा, पुरिसो, कुलं। माला, रुक्खो, धनन्ति।
ससङ्ख्यो यथा? एको, द्वे, तयो, बहू इच्चादि।
सपरिमाणो यथा? विदत्थि, हत्थो, दोणो, आळ्हकं इच्चादि।
अपि च सुद्धो, संसट्ठोति दुविधो लिङ्गत्थो। तत्थ कम्मादिसंसग्गरहितो सुद्धो नाम। सो सलिङ्गो, ससङ्ख्यो, सपरिमाणो, उपसग्गत्थो, निपातत्थो, पाटि-पदिकत्थोति छब्बिधो। अत्थि, सक्का, लब्भाइच्चादि इध पाटिपदिकं नाम। तुन, त्वान, त्वा, तवे, तुं, खत्तुंपच्चयन्तापि निपातेसु गय्हन्ति।
संसट्ठो
अवुत्तसंसट्ठोपि कत्तुसंसट्ठो, कम्मसंसट्ठोतिआदिना अनेकविधो। सो दुतियादीनं एव विसयोति। एत्थ च विभत्तिया विना केवलो सद्दो पयोगं नारहतीति कत्वा पयोगारहत्थमेव छब्बिधे सुद्धे चतुब्बिधे च वुत्तसंसट्ठे पठमा पयुज्जति, न अत्थजोतनत्थं।
केनचि वाचकेन अवुत्तानि पन कम्मादीनि विभत्तीहि विना विदितानि न होन्तीतिकत्वा अत्थजोतनत्थम्पि कम्मादीसु दुतियादयो पयुज्जन्ति। तस्मा अत्थमत्तेति इध देसन्तरावच्छेदके विसयमत्ते भुम्मं। कम्मे दुतियाइच्चादीसु पन निप्फादेतब्बे पयोजने भुम्मन्ति एवं द्विन्नं भुम्मानं नानत्तं वेदितब्बन्ति।
२९०. आमन्तने
पगेव सिद्धस्स वत्थुनो नामेन वा निपातेन वा अत्तनो अभिमुखीकरणं आमन्तनं नाम। अधिकामन्तने अत्थमत्ते पठमा होति। एत्थ च आमन्तनपदं नाम क्रियापेक्खं न होति, तस्मा कारकसञ्ञं न लभति।
तं पन दुविधं सादरा’नादरवसेन। एहि सम्म, एहि जेति।
तथा
तथा पच्चक्खा’पच्चक्खवसेन, भो पुरिस, कहं एकपुत्तक, कहं एकपुत्तकाति
तथा नियमा’नियमवसेन, भो पुरिस, अच्छरियं वत भो अब्भुतं वत भो
पठमाविभत्तिरासि निट्ठितो।
दुतियाविभत्तिरासि
कस्मिं अत्थे दुतिया?
२९१. कम्मे दुतिया
कम्मत्थे दुतिया होति। करियतेति कम्मं, तं निब्बत्तिकम्मं, विकतिकम्मं, पत्तिकम्मन्ति तिविधं होति।
तत्थ निब्बत्तिकम्मं यथा? इद्धिमा हत्थिवण्णं मापेति, राजा नगरं मापेति, माता पुत्तं विजायति, बीजं रुक्खं जनेति, कम्मं विपाकं जनेति, आहारो बलं जनेति, जनो पुञ्ञं करोति, पापं करोति, बुद्धो धम्मं देसेसि, विनयं पञ्ञपेसि, भिक्खु झानं उप्पादेति, मग्गं उप्पादेति इच्चादि।
विकतिकम्मं
पत्तिकम्मं यथा? गामं गच्छति, गेहं पविसति, रुक्खं आरोहति, नदिं तरति, आदिच्चं पस्सति, धम्मं सुणाति, बुद्धं वन्दति पयिरुपासति इच्चादि।
पकतिकम्मं, विकतिकम्मन्ति दुविधं। सुवण्णं कटकं करोति, कट्ठं अङ्गारं करोति, पुरिसं ठितं पस्सति, पुरिसं गच्छन्तं पस्सति, भिक्खुं पस्सति सतं, सम्पजानं, अभिक्कमन्तं, पटिक्कमन्तं, आलोकेन्तं, विलोकेन्तं, समिञ्जेन्तं, पसारेन्तं।
एत्थ ‘पुरिसं, भिक्खु’न्ति पकतिकम्मं, ‘ठितं, सतं’इच्चादीनि विकतिकम्मानि।
धातुकम्मं, कारितकम्मन्ति दुविधं। गामं गच्छति, पुरिसं गामं गमेति।
धातुकम्मञ्च द्विकम्मिकधातूनं दुविधं पधानकम्मं, अप्पधानकम्मन्ति। अजपालो अजं गामं नेति, पुरिसो भारं गामं वहति, हरति, गामं साखं कड्ढति, गाविं खीरं दोहति, ब्राह्मणं कम्बलं याचति, ब्राह्मणं भत्तं भिक्खति, गावियो वजं अवरुन्धति, भगवन्तं पञ्हं पुच्छति, रुक्खं फलानि ओचिनाति, सिस्सं धम्मं ब्रवीति, भगवा भिक्खू एतदवोच
एत्थ च ‘अजं, खीरं’ इच्चादि पधानकम्मं नाम कत्तारा परिग्गहेतुं इट्ठतरत्ता। ‘गामं, गाविं’इच्चादि अप्पधानकम्मं नाम तथा अनिट्ठतरत्ता।
तत्थ
कम्मे दुतियाति वत्तते।
२९२. गतिबोधाहारसद्दत्था कम्मक भज्जादीनं पयोज्जे
निच्चविधिसुत्तमिदं। गमनत्थानं बोधनत्थानं आहारत्थानं सद्दत्थानं अकम्मकानं भज्जादीनञ्च धातूनं पयोज्जे कम्मनि दुतिया होति। एत्थ च पयोज्जकम्मं नाम कारितकम्मं वुच्चति।
पुरिसो पुरिसं गामं गमयति, सामिको अजपालं अजं गामं नयापेति, आचरियो सिस्सं धम्मं बोधेति, पुरिसो पुरिसं भत्तं भोजेति, आचरियो सिस्सं धम्मं पाठेति, पुरिसो पुरिसं सयापेति, अच्छापेति, उट्ठापेति, पुरिसो पुरिसं धञ्ञं भज्जापेति, कोट्टापेति, उद्धरापेति।
एतेसमीति किं? पुरिसो पुरिसेन ओदनं पाचेति।
एत्थ च गमनत्थादीनं पयोज्जे ततियापि रूपसिद्धियं
यदा
२९३. हरादीनं वा
हरादीनं पयोज्जे कम्मनि विकप्पेन दुतिया होति।
सामिको पुरिसं भारं हारेति पुरिसेन वा, पुरिसं आहारं अज्झोहारेति पुरिसेन वा, पुरिसं कम्मं कारेति पुरिसेन वा, राजा पुरिसं अत्तानं दस्सेति पुरिसेन वा, पुरिसं बुद्धं वन्दापेति पुरिसेन वा।
१९४. न खादादीनं
खादादीनं पयोज्जे कम्मनि न दुतिया होति।
सामिको पुरिसेन खज्जं खादापेति, अद-भक्खने, भत्तं आदेति, सामिको दासेन पुरिसं अव्हापेति, सद्दायापेति, कन्दयति, नादयति। एत्थ च ‘सद्दायापेती’ति सद्दं कारापेति, नामधातु चेसा। कन्द, नदापि सद्दत्थायेव।
२९५. वहिस्सानियन्तुके
वहिस्साति धातुनिद्देसो इ-कारो, नियामेति पयोजेतीति नियन्ता, नत्थि नियन्ता एतस्साति अनियन्तुको। यस्स अञ्ञेन पयोजकेन किच्चं नत्थि, सयमेव ञत्वा वहति, सो अनियन्तुको नाम, वहधातुस्स तादिसे अनियन्तुके पयोज्जे कम्मनि दुतिया न होति।
सामिको
अनियन्तुकेति किं? बलीबद्दे भारं वाहेति।
२९६. भक्खिस्साहिंसायं
भक्खितुं इच्छन्तस्स भक्खापनं हिंसा नाम न होति, अनिच्छन्तस्स भक्खापनं हिंसा नाम, भक्खधातुस्स पयोज्जे कम्मनि अहिंसाविसये दुतिया न होति।
सामिको पुरिसेन मोदके भक्खापेति।
अहिंसायन्ति किं? बलीबद्दे सस्सं भक्खापेति। एत्थ ‘सस्स’न्ति थूलतरं सस्सन्ति वदन्ति।
पाळियं ‘‘सब्बेसं विञ्ञापेत्वान
२९७. झादीहि युत्ता
धीइच्चादीहि निपातोपसग्गेहि युत्ता लिङ्गम्हा दुतिया होति।
धी ब्राह्मणस्स हन्तारं
तथा
उपसग्गपुब्बानं अकम्मकधातूनं पयोगे आधारे दुतिया, पथविं अधिसेस्सति, गामं अधितिट्ठति, रुक्खं अज्झावसति, मञ्चं वा पीठं वा अभिनिसीदेय्य वा अभिनिपज्जेय्य वा
तप्पान, चारेपि दुतिया, नदिं पिवति, समुद्दं पिवति, गामं चरति, अरञ्ञं चरति, नदियं, गामेति अत्थो।
काल, दिसासुपि आधारे एव दुतिया, तं खणं, तं मुहुत्तं, तं कालं, एकमन्तं
२९८. लक्खणित्थम्भूतविच्छास्वभिना
लक्खणादीसु अत्थेसु पवत्तेन अभिना युत्ता लिङ्गम्हा दुतिया होति।
लक्खीयति लक्खितब्बं अनेनाति लक्खणं। अयं पकारो इत्थं, ईदिसो विसेसोति अत्थो। इत्थं भूतो पत्तोति इत्थम्भूतो। भिन्ने अत्थे ब्यापितुं इच्छा विच्छा।
तत्थ लक्खणे –
रुक्खमभि विज्जोतते विज्जु, रुक्खं अभि ब्यापेत्वा विज्जोततेति अत्थो, विज्जोभासेन ब्यापितो रुक्खो विज्जुप्पादस्स लक्खणं सञ्ञाणं होति।
इत्थम्भूते –
साधु देवदत्तो मातरमभि, मातरं अभि विसिट्ठं कत्वा साधूति अत्थो, देवदत्तो सक्कच्चं मातुपट्ठाने अग्गपुरिसोति वुत्तं होति। तं खो पन भवन्तं गोतमं एवं कल्याणो कित्तिसद्दो अब्भुग्गतो
विच्छायं –
रुक्खं
एत्थ च लक्खणादिअत्था अभिसद्देन जोतनीया पिण्डत्था एव, न वचनीयत्था, ब्यापनादिअत्था एव वचनीयत्थाति।
२९९. पतिपरीहि भागे च
लक्खणि’त्थम्भूत, विच्छासु च भागे च पवत्तेहि पति, परीहि युत्ता लिङ्गम्हा दुतिया होति।
लक्खणे –
रुक्खं पति विज्जोतते विज्जु, रुक्खं परि विज्जोतते विज्जु। तत्थ ‘पती’ति पटिच्च, ‘परी’ति फरित्वा।
इत्थम्भूते –
साधु देवदत्तो मातरं पति, साधु देवदत्तो मातरं परि।
विच्छायं –
रुक्खं रुक्खं पति विज्जोतते चन्दो, रुक्खं रुक्खं परि विज्जोतते चन्दो।
भागे –
तं दीयतु, यदेत्थ मं पति सिया, तं दीयतु, यदेत्थ मं परि सिया। तत्थ ‘पती’ति पटिच्च, ‘परी’ति परिच्च, उद्दिस्साति अत्थो, ‘ठपित’न्ति पाठसेसो। एत्थ मं उद्दिस्स यं
३००. अनुना
लक्खणि’त्थम्भूत, विच्छासु च भागे च पवत्तेन अनुना युत्ता लिङ्गम्हा दुतिया होति।
लक्खणे –
रुक्खं अनु विज्जोतते विज्जु, रुक्खं अनु फरित्वाति अत्थो। चतुरासीतिसहस्सानि, सम्बुद्धमनुपब्बजुं
इत्थम्भूते –
साधु देवदत्तो मातरमनु। तत्थ ‘अनू’ति अन्वाय पटिच्च।
विच्छायं –
रुक्खं रुक्खं अनु विज्जोतते चन्दो। तत्थ ‘अनू’ति अनु फरित्वा।
भागे –
यदेत्थ
३०१. सहत्थे
सहत्थे अनुना युत्ता लिङ्गम्हा दुतिया होति।
पब्बतं अनु तिट्ठति
३०२. हीने
हीने पवत्तेन अनुना युत्ता लिङ्गम्हा दुतिया होति।
अनु सारिपुत्तं पञ्ञवन्तो, अनुगता पच्छतो गताति अत्थो, सब्बे पञ्ञवन्तो सारिपुत्ततो हीनाति वुत्तं होति।
३०३. उपेन
हीने उपेन युत्ता लिङ्गम्हा दुतिया होति।
उप सारिपुत्तं पञ्ञवन्तो, उपेच्च गता समीपे गताति अत्थो, हीनात्वेव वुत्तं होति।
एत्थ च अभिइच्चादयो कम्मप्पवचनीयाति सद्दसत्थेसु वुत्ता। तत्थ पकारेन वुच्चतीति पवचनीयं, पकारो च लक्खणि’त्थम्भूत, विच्छादिको पिण्डत्थो वुच्चति, कम्मन्ति ब्यापनादिक्रिया, कम्मं पवचनीयं येहि ते कम्मप्पवचनीया।
तत्थ
३०४. कालद्धानमच्चन्तसंयोगे
कालस्स वा अद्धुनो वा दब्ब, गुण, क्रियाहि अच्चन्तं निरन्तरं संयोगे काल’द्धानवाचीहि लिङ्गेहि परं दुतिया होति।
काले –
सत्ताहं गवपानं, मासं मंसोदनं, सरदं रमणीया नदी, सब्बकालं रमणीयं नन्दनं, मासं सज्झायति, वस्ससतं जीवति, तयो मासे अभिधम्मं देसेति।
अद्धाने –
योजनं वनराजि, योजनं दीघो पब्बतो, कोसं सज्झायति।
अच्चन्तसंयोगेति किं? मासे मासे भुञ्जति, योजने योजने विहारो।
एत्थ च क्रियाविसेसनम्पि कत्तारा साधेतब्बत्ता कम्मगतिकं होति, तस्मा तम्पि ‘कम्मे दुतिया’ति एत्थ कम्मसद्देन गय्हति।
सुखं सेति, दुक्खं सेति, सीघं गच्छति, खिप्पं गच्छति, दन्धं गच्छति, मुदुं पचति, गरुं एस्सति, लहुं एस्सति, सन्निधिकारकं भुञ्जति, सम्परिवत्तकं ओतापेति, कायप्पचालकं गच्छति
दुतियाविभत्तिरासि निट्ठितो।
ततियाविभत्तिरासि
कस्मिं अत्थे ततिया?
३०५. कत्तुकरणेसु ततिया
कत्तरि करणे च ततिया होति। कत्ताति च कारकोति च अत्थतो एकं ‘‘करोतीति कत्ता, करोतीति कारको’’ति, तस्मा ‘‘कत्तुकारको’’ति वुत्ते द्विन्नं परियायसद्दानं वसेन अयमेव क्रियं एकन्तं करोति, सामी हुत्वा करोति, अत्तप्पधानो हुत्वा करोतीति विञ्ञायति, ततो क्रिया नाम कत्तुनो एव ब्यापारो, न अञ्ञेसन्ति च, अञ्ञे पन क्रियासाधने कत्तुनो उपकारकत्ता कारका नामाति च, तथा अनुपकारकत्ता अकारका नामाति च विञ्ञायन्तीति।
तत्थ कत्ता तिविधो सयंकत्ता, पयोजककत्ता, कम्मकत्ताति।
तत्थ धात्वत्थं सयं करोन्तो सयंकत्ता नाम, पुरिसो कम्मं करोति।
परं पयोजककत्ता नाम, पुरिसो दासं कम्मं कारेति।
कम्मकत्ता नाम पयोज्जककत्तापि वुच्चति, पुरिसो दासेन कम्मं कारेति दासस्स वा, यो च अञ्ञेन कतं पयोगं पटिच्च कम्मभूतोपि सुकरत्ता वा कम्मभावेन अवत्तुकामताय वा अजाननताय वा वञ्चेतुकामताय वा कत्तुभावेन वोहरीयति, सो कम्मकत्ता नाम, कुसूलो सयमेव भिज्जति, घटो सयमेव भिज्जति। अपिच सुकरो वा होतु दुक्करो वा, यो कम्मरूपक्रियापदे पठमन्तो कत्ता, सो कम्मकत्ताति वुच्चति। सद्दरूपेन कम्मञ्च तं अत्थरूपेन कत्ता चाति कम्मकत्ता, कुसूलो भिज्जति, घटो भिज्जति, पच्चति मुनिनो भत्तं, थोकं थोकं घरे घरे इच्चादि।
एत्थ च सद्दत्थो दुविधो परमत्थो, पञ्ञत्तत्थोति। तत्थ परमत्थो एकन्तेन विज्जमानोयेव। पञ्ञत्तत्थो पन कोचि विज्जमानोति सम्मतो। यथा? राजपुत्तो, गोविसाणं, चम्पकपुप्फन्ति। कोचि अविज्जमानोति सम्मतो। यथा? वञ्झापुत्तो, ससविसाणं, उदुम्बरपुप्फन्ति। सद्दो च नाम वत्तिच्छापटिबद्धवुत्ती होति, वत्तमानो च सद्दो अत्थं न दीपेतीति नत्थि, सङ्केते सति सुणन्तस्स अत्थविसयं बुद्धिं न जनेतीति नत्थीति अधिप्पायो। इति अविज्जमानसम्मतोपि अत्थो सद्दबुद्धीनं विसयभावेन विज्जमानो एव होति। इतरथा ‘वञ्झापुत्तो’ति पदं सुणन्तस्स तदत्थविसयं चित्तं नाम न पवत्तेय्याति, सद्दबुद्धीनञ्च विसयभावेन विज्जमानो नाम अत्थो सद्दनानात्ते बुद्धिनानात्ते च सति नाना होति, विसुं विसुं विज्जमानो नाम होतीति अधिप्पायो। एवं सद्दबुद्धिविसयभावेन विज्जमानञ्च नानाभूतञ्च अत्थं पटिच्च कारकनानात्तं क्रियाकारकनानात्तञ्च होति
कयिरते अनेनाति करणं, क्रियासाधने कत्तुनो सहकारीकारणन्ति वुत्तं होति। तं दुविधं अज्झत्तिककरणं, बाहिरकरणन्ति।
तत्थ कत्तुनो अङ्गभूतं करणं अज्झत्तिकं नाम, पुरिसो चक्खुना रूपं पस्सति, मनसा धम्मं विजानाति, हत्थेन कम्मं करोति, पादेन मग्गं गच्छति, रुक्खो फलभारेन ओणमति।
कत्तुनो बहिभूतं बाहिरं नाम, पुरिसो यानेन गच्छति, फरसुना
३०६. सहत्थेन
सहसद्दस्स अत्थो यस्स सोति सहत्थो, सहत्थेन सद्देन युत्ता लिङ्गम्हा ततिया होति। सहसद्दस्स अत्थो नाम समवायत्थो।
सो तिविधो दब्बसमवायो, गुणसमवायो, क्रियासमवायोति। पुत्तेन सह धनवा पिता, पुत्तेन सह थूलो पिता, पुत्तेन सह आगतो पिता। सह, सद्धिं, समं, नाना, विनाइच्चादिको सहत्थसद्दो नाम।
निसीदि भगवा सद्धिं भिक्खुसङ्घेन
३०७. लक्खणे
लक्खणं
अस्सुपुण्णेहि नेत्तेहि, पितरं सो उदिक्खति
अङ्गविकारोपि इध सङ्गय्हति
३०८. हेतुम्हि
हिनोति पवत्तति फलं एतेनाति हेतु, तस्मिं ततिया होति।
अन्नेन वसति, विज्जाय साधु, कम्मुना वत्तति लोको, कम्मुना वत्तति पजा
एत्थ च करणं तिविधं क्रियासाधककरणं, विसेसनकरणं, नानात्तकरणन्ति।
तत्थ क्रियासाधकं पुब्बे वुत्तमेव।
विसेसनकरणं यथा? आदिच्चो नाम गोत्तेन, साकियो नाम जातिया
नानात्तकरणं यथा? किं मे एकेन तिण्णेन, पुरिसेन थामदस्सिना
तथा कम्मा’वधि, आधार’च्चन्तसंयोग, क्रियापवग्गापि नानात्तकरणे सङ्गय्हन्ति।
कम्मे ताव –
तिलेहि खेत्ते वप्पति, तन्तवायेहि चीवरं वायापेति, सुनखेहि खादापेन्ति इच्चादि।
अवधिम्हि –
सुमुत्ता मयं तेन महासमणेन
आधारे –
तेन खणेन तेन लयेन तेन मुहुत्तेन
अच्चन्तसंयोगे –
मासेन भुञ्जति, योजनेन धावति इच्चादि।
क्रियापवग्गो
ततियाविभत्तिरासि निट्ठितो।
चतुत्थीविभत्तिरासि
कस्मिं अत्थे चतुत्थी?
३०९. सम्पदाने चतुत्थी
सम्पदाने चतुत्थी होति। सम्मा पदीयते अस्साति सम्पदानं, सम्पटिच्छकन्ति वुत्तं होति।
तं वत्थुसम्पटिच्छकं, क्रियासम्पटिच्छकन्ति दुविधं। भिक्खुस्स चीवरं देति, बुद्धस्स सिलाघते।
पुन अनिराकरणं, अनुमति, आराधनन्ति तिविधं होति। तत्थ न निराकरोति न निवारेतीति अनिराकरणं, दिय्यमानं न पटिक्खिपतीति अत्थो। असति हि पटिक्खिपने सम्पटिच्छनं नाम होतीति। कायचित्तेहि सम्पटिच्छनाकारं दस्सेत्वा पटिग्गण्हन्तं सम्पदानं अनुमति नाम। विविधेहि आयाचनवचनेहि परस्स चित्तं आराधेत्वा सम्पटिच्छन्तं आराधनं नाम। बोधिरुक्खस्स जलं देति, भिक्खुस्स अन्नं देति, याचकस्स अन्नं देति।
क्रियासम्पटिच्छकं नानाक्रियावसेन बहुविधं।
तत्थ
तञ्च अम्हाकं रुच्चति चेव खमति च
धारणप्पयोगे –
छत्तग्गाहो रञ्ञो छत्तं धारेति, सम्पतिजातस्स बोधिसत्तस्स देवा छत्तं धारयिंसु।
बुद्धस्स सिलाघते, थोमेतीति अत्थो, तुय्हं हनुते, तुण्हिभावेन वञ्चेतीति अत्थो, भिक्खुनी भिक्खुस्स भुञ्जमानस्स पानीयेन वा विधूपनेन वा उपट्ठाति
देवापि
तस्स कुज्झ महावीर
पति, आपुब्बस्स सु-धातुस्स अनु, पतिपुब्बस्स च गी-धातुस्स योगे सम्पदाने चतुत्थी। तत्र खो भगवा भिक्खू आमन्तेसि ‘‘भिक्खवो’’ति, ‘‘भद्दन्ते’’ति ते भिक्खू भगवतो पच्चस्सोसुं
आरोचनत्थयोगे –
आरोचयामि वो भिक्खवे
३१०. तदत्थे
तस्सा तस्सा क्रियाय अत्थोति तदत्थो, तदत्थे सम्पदाने चतुत्थी होति।
३११. सस्साय चतुत्थिया
अकारन्ततो चतुत्थीभूतस्स सस्स आयो होति वा।
विनयो संवरत्थाय, संवरो अविप्पटिसारत्थाय, अविप्पटिसारो पामुज्जत्थाय, पामुज्जं पीतत्थाय, पीति पस्सद्धत्थाय, पस्सद्धि सुखत्थाय, सुखं समाधत्थाय, समाधि यथाभूतञाणदस्सनत्थाय, यथाभूतञाणदस्सनं निब्बिदत्थाय, निब्बिदा विरागत्थाय, विरागो विमुत्तत्थाय, विमुत्ति विमुत्तिञाणदस्सनत्थाय, विमुत्तिञाणदस्सनं अनुपादापरिनिब्बानत्थाय
तुमत्थोपि
अलमत्थयोगे –
अलं मल्लो मल्लस्स, अरहति मल्लो मल्लस्स, अलं ते इध वासेन
मञ्ञनापयोगे अनादरे अपाणिस्मिमेव चतुत्थी, कट्ठस्स तुवं मञ्ञे, कलिङ्गरस्स
अनादरेति किं? सुवण्णं तं मञ्ञे।
अपाणिस्मिन्ति किं? गद्रभं तुवं मञ्ञे।
गत्यत्थानं नयनत्थानञ्च धातूनं कम्मनि चतुत्थी, अप्पो सग्गाय गच्छति
आसीसनक्रियायोगे –
आयु भवतो होतु, भद्दं ते होतु, भद्दमत्थु ते
सम्मुतियोगे
आविकरणादियोगे –
तुय्हञ्चस्स आवि करोमि, तस्स मे सक्को पातुरहोसि, तस्स पहिणेय्य, भिक्खूनं दूतं पाहेसि, कप्पति भिक्खूनं आयोगो, वट्टति भिक्खूनं आयोगो, पत्थोदनो द्विन्नं तिण्णं नप्पहोति, एकस्स पहोति, एकस्स परियत्तो, उपमं ते करिस्सामि
चतुत्थीविभत्तिरासि निट्ठितो।
पञ्चमीविभत्तिरासि
कस्मिं अत्थे पञ्चमी?
३१२. पञ्चम्यावधिस्मिं
अवधियति ववत्थियति पदत्थो एतस्माति अवधि, तस्मिं पञ्चमी होति, अवधीति च अपादानं वुच्चति।
अपनेत्वा इतो अञ्ञं आददाति गण्हातीति अपादानं। तं तिविधं निद्दिट्ठविसयं, उप्पाटविसयं, अनुमेय्यविसयन्ति।
तत्थ निद्दिट्ठविसयं। यथा? गामा अपेन्ति मुनयो, नगरा निग्गतो राजा।
यस्मिं पन सो पाठसेसं कत्वा अज्झाहरितब्बो होति, तं उप्पाटविसयं। यथा? वलाहका विज्जोतते विज्जु, अगारस्मा अनगारियं पब्बजितोति
यस्मिं पन सो निद्दिट्ठो च न होति, अज्झाहरितुञ्च न सक्का, अथ खो अत्थतो अनुमानवसेन सो विञ्ञेय्यो होति, तं अनुमेय्यविसयं। यथा? माथुरा पाटलिपुत्तकेहि अभिरूपतरा, सीलमेव सुता सेय्यो
पुन चला’चलवसेन दुविधं।
चलं यथा? पुरिसो धावता अस्सा पतति, द्वे मेण्डा युज्झित्वा अञ्ञमञ्ञतो अपसक्कन्ति। एत्थ च यदि चलं सिया, कथं अवधि नाम भवेय्य। अच्चुतिलक्खणो हि अवधीति? वुच्चते-द्वे मेण्डा सकसकक्रियाय चलन्ति, इतरीतरक्रियाय अवधी होन्तीति नत्थि एत्थ अवधिलक्खणविरोधोति।
अचलं यथा? गामा अपेन्ति मुनयो, नगरा निग्गतो राजा।
पुन कायसंसग्गपुब्बकं, चित्तसंसग्गपुब्बकन्ति दुविधं होति, गामा अपेन्ति मुनयो, चोरा भयं जायते। एत्थ च ‘‘किंव
यतो किञ्चि सिप्पं वा विज्जं वा धम्मं वा गण्हाति, तस्मिं अक्खातरि पञ्चमी, उपज्झाया अधीते, उपज्झाया सिप्पं गण्हाति, द्वासीति बुद्धतो गण्हिं, द्वे सहस्सानि भिक्खुतो। चतुरासीतिसहस्सानि, येमे धम्मा पवत्तिनो
यतो सुणाति, तस्मिं पञ्चमी, छट्ठी च, इतो सुत्वा, इमस्स सुत्वा वा, यम्हा धम्मं विजानेय्य, सम्मासम्बुद्धदेसितं
यतो लभति, तस्मिं पञ्चमी, सङ्घतो लभति, गणतो लभति।
यतो पराजयति, यतो पभवति, यतो जायति, तस्मिं पञ्चमी, बुद्धस्मा पराजयन्ति अञ्ञतित्थिया, पाळियं पन पराजियोगे अपादानं पाठसेसवसेन लब्भति, तस्मिं खो
अञ्ञत्थानं योगे पञ्चमी, ततो अञ्ञं, ततो परं
उपसग्गानं योगे पन –
३१३. अपपरीहि वज्जने
वज्जने पवत्तेहि अप, परीहि योगे पञ्चमी होति।
अपपब्बता वस्सति देवो, परिपब्बता वस्सति देवो, अपसालाय आयन्ति वाणिजा, परिसालाय आयन्ति वाणिजा, पब्बतं सालं वज्जेत्वाति अत्थो। कच्चायने पन ‘‘उपरिपब्बता देवो वस्सती’’ति पाठो
३१४. पटिनिधिपटिदानेसु पतिना
पटिनिधि
बुद्धस्मा पति सारिपुत्तो धम्मं देसेति, तेलस्मा पति घतं देति।
३१५. रिते दुतिया च
रितेसद्देन योगे पञ्चमी होति दुतिया च।
रिते सद्धम्मा, रिते सद्धम्मं।
३१६. विनाञ्ञत्रेहि ततिया च
वज्जने पवत्तेहि विना, अञ्ञत्रसद्देहि योगे पञ्चमी, दुतिया, ततिया च होन्ति।
विना सद्धम्मा, विना सद्धम्मं, विना सद्धम्मेन, अञ्ञत्र सद्धम्मा, अञ्ञत्र सद्धम्मं, अञ्ञत्र सद्धम्मेन।
३१७. पुथुनानाहि च
वज्जने पवत्तेहि पुथु, नानासद्देहि च योगे पञ्चमी, ततिया च होन्ति।
पुथगेव जनस्मा, पुथगेव जनेन, नाना सद्धम्मा, नाना सद्धम्मेन, पियेहि मनापेहि नानाभावो विनाभावो
मरियादा’भिविधीसु
तत्थ यस्स अवधिनो सम्बन्धिनी क्रिया, तं बहिकत्वा पवत्तति, सो मरियादो। यथा? आपब्बता खेत्तं तिट्ठति आपब्बतं वा, यावपब्बता खेत्तं तिट्ठति यावपब्बतं वा।
यस्स सम्बन्धिनी क्रिया, तं अन्तोकत्वा ब्यापेत्वा पवत्तति, सो अभिविधि। यथा? आभवग्गा भगवतो कित्तिसद्दो अब्भुग्गतो आभवग्गं वा, भवतो आभवग्गं धम्मतो आगोत्रभुं सवन्तीति आसवा, यावभवग्गा यावभवग्गं वा, तावदेव यावब्रह्मलोका सद्दो अब्भुग्गतो।
आरब्भे, सहत्थे च पञ्चमी, यतोहं भगिनि अरियाय जातिया जातो
सहत्थे –
सह सब्बञ्ञुतञ्ञाणप्पटिलाभा, सह परिनिब्बाना
‘‘उप्पादा वा तथागतानं अनुप्पादा वा तथागतान’’न्ति
‘‘सहत्था दानं देति, सहत्था पटिग्गण्हाती’’ति एत्थ करणे।
‘‘अज्जतग्गे पाणुपेतं
‘‘यत्वाधिकरणं
द्विन्नं कारकानं क्रियानञ्च मज्झे पवत्तकालद्धानवाचीहि पञ्चमी, लुद्दको पक्खस्मा मिगं विज्झति, कोसा कुञ्जरं विज्झति। एत्थ च लुद्दको सकिं मिगं विज्झित्वा पक्खब्भन्तरम्हि न विज्झि, पक्खे परिपुण्णे पुन विज्झति, पक्खसद्दो द्विन्नं विज्झनवारानं मज्झे कालवाची होति, द्वेपि विज्झनक्रिया कारकेहि सहेव सिज्झन्तीति कारकानञ्च मज्झेति वुच्चति। वुत्तियं पन ‘‘अज्ज भुत्वा देवदत्तो द्विहे भुञ्जिस्सति, द्विहा भुञ्जिस्सति, अत्रट्ठो’यमिस्सासो कोसे लक्खं विज्झति, कोसा लक्खं विज्झती’’ति
रक्खनत्थानं योगे –
यञ्च वत्थुं गुत्तं इच्छियते, यतो च गुत्तं इच्छियते, तत्थ पञ्चमी, यवेहि गावो रक्खति वारेति, तण्डुला काके रक्खति वारेति, तं मं पुञ्ञा निवारेसि, पापा चित्तं निवारये
अन्तरधानत्थयोगे –
यस्स अदस्सनं इच्छियति, तस्मिं पञ्चमी, उपज्झाया अन्तरधायति सिस्सो, निलीयतीति अत्थो। पाळियं पन यस्स अदस्सनं इच्छियति, तस्मिं छट्ठी एव- ‘‘अन्तरधायिस्सामि समणस्स
यस्मिं ठाने अन्तरधायति, तस्मिं सत्तमी एव दिस्सति, अतिखिप्पं लोके चक्खु अन्तरधायिस्सति
दूरत्थयोगे –
किंव दूरो इतो गामो, कच्चि आरा पमादम्हा
दूरत्थे –
दूरतोव नमस्सन्ति, अद्दसा खो भगवन्तं दूरतोव आगच्छन्तं
अन्तिकत्थयोगे –
अन्तिकं गामा, आसन्नं गामा, समीपं गामा। दुतिया च ततिया च छट्ठी च, अन्तिकं गामं, अन्तिकं गामेन, अन्तिकं गामस्स।
कालद्धानं परिमाणवचने –
इतो मथुराय चतूसु योजनेसु सङ्कस्सं, राजगहतो पञ्चचत्तालीसयोजने सावत्थि, इतो एकनवुतिकप्पे
पमाणत्थे –
आयामतो च वित्थारतो च योजनं, परिक्खेपतो नवयोजनसतपरिमाणो मज्झिमदेसो परिक्खेपेन वा, दीघसो नवविदत्थियो
त्वालोपेपि पञ्चमी। एत्थ च त्वालोपो नाम परिपुण्णवाक्ये लद्धब्बस्स त्वान्तपदस्स अपरिपुण्णवाक्ये नत्थि भावो, यञ्च पदं त्वान्तपदे सति कम्मं वा होति अधिकरणं वा। तं त्वान्तपदे असति पदन्तरे अवधि होति, तस्मिं पञ्चमी, पासादा वा पासादं सङ्कमेय्य
दिसत्थयोगे दिसत्थे च पञ्चमी, इतो सा पुरिमा दिसा
दिसत्थे –
पुरिमतो गामस्स, दक्खिणतो गामस्स, उपरितो पब्बतस्स, हेट्ठतो पासादस्स, पुरत्थिमतो, दक्खिणतो, यतो खेमं, ततो भयं
पुब्बादियोगेपि पञ्चमी, पुब्बेव मे सम्बोधा
विभत्तत्थे च पञ्चमी छट्ठी च। विभत्ति नाम पगेव विसुंभूतस्स अत्थस्स केनचि अधिकेन वा हीनेन वा भागेन तदञ्ञतो पुथक्करणं, माथुरा पाटलिपुत्तकेहि अभिरूपतरा, यतो पणीततरो वा विसिट्ठतरो वा नत्थि, अत्तदन्तो ततो वरं
विरमणत्थयोगे –
आरती विरती पापा
सुद्धत्थयोगे –
लोभनीयेहि धम्मेहि सुद्धो इच्चादि।
मोचनत्थयोगे पञ्चमी ततिया च, सो परिमुच्चति जातिया जराय मरणेन सोकेहि परिदेवेहि दुक्खेहि दोमनस्सेहि उपायासेहि, परिमुत्तो सो दुक्खस्माति वदामि
हेत्वत्थे –
कस्मा हेतुना, केन हेतुना, कस्मा नु तुम्हं कुले दहरा न मिय्यरे
विवेचनत्थयोगे –
विविच्चेव कामेहि विविच्च अकुसलेहि धम्मेहि
बन्धनत्थयोगे
३१८. पञ्चमीणे वा
इणभूते हेतुम्हि पञ्चमी होति वा।
सतस्मा बन्धो नरो सतेन वा।
३१९. गुणे
अज्झत्तभूतो हेतु गुणो नाम, अगुणोपि इध गुणोत्वेव वुच्चति, तस्मिं पञ्चमी होति वा।
जळत्ता बन्धो नरो जळत्तेन वा, अत्तनो बालत्तायेव बन्धोति अत्थो, पञ्ञाय बन्धना मुत्तो, वाचाय मरति, वाचाय मुच्चति, वाचाय पियो होति, वाचाय देस्सो, इस्सरिया जनं रक्खति राजा इस्सरियेन वा, सीलतो नं पसंसन्ति
पञ्हा, कथनेसुपि पञ्चमी, कुतो भवं, अहं पाटलिपुत्ततो इच्चादि।
थोकत्थेपि असत्ववचने पञ्चमी, सत्वं वुच्चति दब्बं, थोका मुच्चति थोकेन वा, मुच्चनमत्तं होतीति वुत्तं होति ‘‘नदिं तरन्तो मनं वुळ्हो’’ति
असत्ववचनेति
‘‘अनुपुब्बेन मेधावी, थोकं थोकं खणे खणे
अकत्तरिपि पञ्चमी, तस्स कम्मस्स कतत्ता उपचितत्ता उस्सन्नत्ता विपुलत्ता तथागतो सुप्पतिट्ठितपादो होति
भिय्यत्थयोगे –
योध सीतञ्च उण्हञ्च, तिणा भिय्यो न मञ्ञति
पञ्चमीविभत्तिरासि निट्ठितो।
छट्ठीविभत्तिरासि
कस्मिं अत्थे छट्ठी?
३२०. छट्ठी सम्बन्धे
द्विन्नं सम्बन्धीनं केनचि पकारेन आयत्तभावो सम्बन्धो नाम, सम्बन्धे जोतेतब्बे विसेसनसम्बन्धिम्हि छट्ठी होति।
तत्थ
तत्थ सम्बन्धो तिविधो सामिसम्बन्धो, नानात्तसम्बन्धो, क्रियाकारकसम्बन्धोति।
तत्थ ‘सामी’ति यस्स कस्सचि विसेसनसम्बन्धिनो नामं, तस्मा विसेस्यपदत्थस्स तंतंविसेसनभावेन सम्बन्धो सामिसम्बन्धो नाम।
सो विसेस्यपदत्थभेदेन अनेकविधो।
तत्थ तस्स माता, तस्स पिताइच्चादि जनकसम्बन्धो नाम।
तस्सा पुत्तो, तस्सा धीता इच्चादि जञ्ञसम्बन्धो नाम।
तस्स भाता, तस्स भगिनी इच्चादि कुलसम्बन्धो नाम।
सक्को देवानमिन्दो सामिसम्बन्धो नाम।
पहूतं मे धनं सक्क संसम्बन्धो नाम।
अम्बवनस्स अविदूरे, निब्बानस्सेव सन्तिके समीपसम्बन्धो नाम।
सुवण्णस्स रासि, भिक्खूनं समूहो इच्चादि समूहसम्बन्धो नाम।
मनुस्सस्सेव ते सीसं अवयवसम्बन्धो नाम।
सुवण्णस्स विकारसम्बन्धो नाम।
यवस्स अङ्कुरो, मेघस्स सद्दो, पुप्फानं गन्धो, फलानं रसो, अग्गिस्स धूमो इच्चादि कारियसम्बन्धो नाम।
खन्धानं जाति, खन्धानं जरा, खन्धानं भेदो अवत्थासम्बन्धो नाम।
सुवण्णस्स वण्णो, वण्णो न खीय्येथ तथागतस्स गुणसम्बन्धो नाम।
पादस्स उक्खिपनं, हत्थस्स समिञ्जनं, धातूनं गमनं ठानं इच्चादि क्रियासम्बन्धो नाम।
चातुमहाराजिकानं ठानं इच्चादि ठानसम्बन्धो नाम। एवमादिना नयेन सामिसम्बन्धो अनेकसहस्सप्पभेदो, सो च क्रियासम्बन्धाभावा कारको नाम न होति। यदि एवं ‘‘पादस्स उक्खिपनं’’ इच्चादि क्रियासम्बन्धो नामाति इदं न युज्जतीति? वुच्चते – क्रियासम्बन्धाभावाति इदं साधकभावेन सम्बन्धाभावं सन्धाय वुत्तं, सिद्धाय पन क्रियाय सम्बन्धं सन्धाय क्रियासम्बन्धो नाम वुत्तोति।
नानात्तसम्बन्धे पन नानाअत्थेसु छट्ठी होति। तत्थ णी, आवीपच्चयानं कम्मे निच्चं छट्ठी, झानस्स लाभी, चीवरस्स लाभी, धनस्स लाभी, आदीनवस्स दस्सावी, अत्थि रूपानं दस्सावी, अत्थि समविसमस्स दस्सावी, अत्थि तारकरूपानं दस्सावी, अत्थि चन्दिमसूरियानं दस्सावी।
तु, अक, अन, णपच्चयानं योगे क्वचि कम्मत्थे छट्ठी।
तुपच्चये ताव –
तस्स
क्वचीति किं? गम्भीरञ्च कथं कत्ता
अकपच्चये –
कम्मस्स कारको नत्थि, विपाकस्स च वेदको
क्वचीति किं? महतिं महिं अनुसासको, जनं अहेठको, कटं कारको, पसवो घातको इच्चादि।
अनपच्चये –
पापस्स अकरणं सुखं
क्वचीति किं? भगवन्तं दस्सनाय
णपच्चये –
अच्छरियो अरजकेन वत्थानं रागो, अगोपालकेन गावीनं दोहो, अप्पपुञ्ञेन लाभानं लाभो, हत्थस्स गाहो, पत्तस्स पटिग्गाहो इच्चादि।
त्वापच्चयेपि
कत्तरि त, तवन्तु, तावी, मान’न्तानं योगे पन कम्मनि दुतिया एव, सुखकामो विहारं कतो, गामं गतो, ओदनं भुत्तवा भुत्तावी, कम्मं कुरुमानो, कम्मं करोन्तो इच्चादि।
क्वचि छट्ठीपि दिस्सति, धम्मस्स गुत्तो मेधावी
सर, इसु, चिन्त, इस, दयधातूनं कम्मनि छट्ठी वा, मातुस्स सरति, मातरं सरति, पितुस्स सरति, पितरं सरति, न रज्जस्स सरिस्ससि
करधातुस्स अभिसङ्खरणत्थवाचिनो कम्मे छट्ठी, उदकस्स पटिकुरुते उदकं वा, कण्डस्स पटिकुरुते कण्डं वा इच्चादि।
तपच्चये पूजनत्थादिधातूनं कत्तरि छट्ठी वा, रञ्ञो सम्मतो रञ्ञा वा, गामस्स पूजितो गामेन वा, रञ्ञो सक्कतो रञ्ञा वा, रञ्ञो अपचितो रञ्ञा वा, रञ्ञो मानितो
तिपच्चयेपि
पूजनत्थानं पूरणत्थानञ्च करणे छट्ठी, पुप्फस्स बुद्धं पूजेति पुप्फेन वा, घतस्स अग्गिं जुहोति घतेन वा, पत्तं उदकस्स पूरेत्वा, पूरं नानाप्पकारस्स असुचिनो
तब्ब, रुजादियोगे पन सम्पदाने चतुत्थी एव, यक्खसेनापतीनं उज्झापेतब्बं विक्कन्दितब्बं विरवितब्बं
भयत्थादीनं अपादाने बहुलं छट्ठी, किं नु खो अहं तस्स सुखस्स भायामि, सब्बे तसन्ति दण्डस्स, सब्बे भायन्ति मच्चुनो
कुसल, कोविद, पसादत्थानं आधारे छट्ठी, कुसला नच्चगीतस्स
३२१. छट्ठी हेत्वत्थेहि
हेत्वत्थेहि योगे हेतुम्हि छट्ठी होति।
तं किस्स हेतु
३२२. तुल्यत्थेन वा ततिया
तुल्यत्थेन योगे छट्ठी होति ततिया वा।
तुल्यो पितु पितरा वा, सदिसो पितु पितरा वा। इति नानात्तसम्बन्धो।
क्रियाकारकसम्बन्धो नाम कारकानं क्रियाय सह साधक, साध्यभावेन अञ्ञमञ्ञापेक्खता अविनाभाविता वुच्चति, न हि क्रियं विना कारकं नाम सिज्झति, न च कारकं विना क्रिया नाम सिज्झतीति, सा पन छट्ठीविसयो न होतीति।
छट्ठीविभत्तिरासि निट्ठितो।
सत्तमीविभत्तिरासि
कस्मिं अत्थे सत्तमी?
३२३. सत्तम्याधारे
आधारो, ओकासो, अधिकरणन्ति अत्थतो एकं, आधारत्थे सत्तमी होति। कत्तुकम्मट्ठं क्रियं भुसो धारेतीति आधारो।
कटे
सो चतुब्बिधो ब्यापिकाधारो, ओपसिलेसिकाधारो, सामीपिकाधारो, वेसयिकाधारोति।
तत्थ यस्मिं आधेय्यवत्थु सकले वा एकदेसे वा ब्यापेत्वा तिट्ठति, सो ब्यापिको। यथा? तिलेसु तेलं तिट्ठति, उच्छूसु रसो तिट्ठति, जलेसु खीरं तिट्ठति, दधिम्हि सप्पि तिट्ठतीति।
यस्मिं आधेय्यवत्थु अल्लीयित्वा वा तिट्ठति, अधिट्ठितमत्तं हुत्वा वा तिट्ठति, सो ओपसिलेसिको। यथा? उक्खलियं आचामो तिट्ठति, घटेसु उदकं तिट्ठति, आसने निसीदति भिक्खु, परियङ्के राजा सेति।
यो पन अत्थो आधेय्यस्स अवत्थुभूतोपि तदायत्तवुत्तिदीपनत्थं आधारभावेन वोहरियति, सो सामीपिको नाम। यथा? गङ्गायं घोसो तिट्ठति, सावत्थियं विहरति भगवाति
यो च अत्थो अत्तना विना आधेय्यस्स अञ्ञत्थत्तं क्रियं सम्पादेतुं असक्कुणेय्यत्ता आधारभावेन वोहरियति, यो च आधेय्यस्स अनञ्ञाभिमुखभावदीपनत्थं आधारभावेन वोहरियति, सो वेसयिको नाम। यथा? आकासे सकुणा पक्खन्ति, भूमीसु मनुस्सा चरन्ति
३२४. निमित्ते
निमिनन्ति सञ्जानन्ति एतेनाति निमित्तं, नेमित्तकसहभाविनो सञ्ञाणकारणस्सेतं नामं, तस्मिं निमित्ते सत्तमी होति।
दीपि चम्मेसु हञ्ञते, कुञ्जरो दन्तेसु हञ्ञते, मुसावादे पाचित्तियं
३२५. यम्भावो भावलक्खणं
यादिसो भावो यम्भावो, लक्खियति एतेनाति लक्खणं, भावन्तरस्स लक्खणं भावलक्खणं, यम्भावो भावन्तरस्स लक्खणं होति, तस्मिं भावे गम्यमाने सत्तमी होति, छट्ठीपि दिस्सति।
अचिरपक्कन्तस्स सारिपुत्तस्स ब्राह्मणो कालमकासि
इमस्मिं सति इदं होति, इमस्मिं असति इदं न होति
क्वचि
पुब्बण्हसमये गतो, सायन्हसमये आगतो इच्चादि वेसयिकाधारो एव।
तथा अकाले वस्सती तस्स, काले तस्स न वस्सति
३२६. छट्ठी चानादरे
‘अनादरो’ति द्विन्नं लक्खण, लक्खितब्बक्रियानं एकप्पहारेन पवत्तिया अधिवचनं, अनादरभूते भावलक्खणे गम्यमाने सत्तमी छट्ठी च होति।
मच्चु गच्छति आदाय, पेक्खमाने महाजने। आकोटयन्तो सो नेति, सिविराजस्स पेक्खतो
३२७. यतो निद्धारणं
जाति, गुण, क्रिया, नामेहि समुदायतो एकदेसस्स पुथक्करणं निद्धारणं, यतो तं निद्धारणं जायति, तस्मिं समुदाये छट्ठी, सत्तमियो होन्ति।
जातियं
मनुस्सानं खत्तियो सूरतमो, मनुस्सेसु खत्तियो सूरतमो।
गुणे –
कण्हा गावीनं सम्पन्नखीरतमा, कण्हागावीसु सम्पन्नखीरतमा।
क्रियायं –
अद्धिकानं धावन्तो सीघतमो, अद्धिकेसु धावन्तो सीघतमो।
नामे –
आयस्मा आनन्दो अरहतं अञ्ञतरो, अरहन्तेसु अञ्ञतरो इच्चादि।
इध नानात्तसत्तमी वुच्चते।
कम्मत्थे सत्तमी, भिक्खूसु अभिवादेन्ति
अथ वा ‘मुद्धनि, बाहासू’ति आधारे एव भुम्मं। यथा? रुक्खं मूले छिन्दति, रुक्खं खन्धे छिन्दति, पुरिसं सीसे पहरति, भगवन्तं पादेसु वन्दति।
करणे च सत्तमी, हत्थेसु पिण्डाय चरन्ति
सम्पदाने च सत्तमी, सङ्घे दिन्ने महप्फलं, सङ्घे गोतमी ददेय्यासि, सङ्घे दिन्ने अहञ्चेव पूजितो भविस्सामि
अपादाने च सत्तमी, गदलीसु गजे रक्खन्तिइच्चादि।
सामिस्सरादियोगे पन छट्ठी सत्तमी च होति, गुन्नं सामि, गोसु सामि, गुन्नं इस्सरो, गोसु इस्सरो, गुन्नं अधिपति, गोसु अधिपति, गुन्नं दायादो, गोसु दायादो, गुन्नं सक्खि, गोसु सक्खि, गुन्नं पतिभू, गोसु पतिभू, गुन्नं पसुतो, गोसु पसुतो, आयुत्तो कटकरणस्स, आयुत्तो कटकरणेति, एतेसु पन सम्बन्धे छट्ठी, विसयाधारे सत्तमी। ञाणस्मिं पसन्नो, ञाणस्मिं उस्सुक्कोति विसयाधारे सत्तमी। ञाणेन पसन्नो, ञाणेन उस्सुक्कोति करणे ततिया।
३२८. सत्तम्याधिक्ये
अधिकभावत्थे उपेन युत्ता लिङ्गम्हा सत्तमी होति।
उप खारियं दोणो, उप निक्खे कहापणं, अतिरेकदोणा खारी, अतिरेककहापणं निक्खन्ति वुत्तं होति।
३२९. सामित्तेधिना
सामिभावत्थे अधिना युत्ता लिङ्गम्हा सत्तमी होति।
अधि ब्रह्मदत्ते पञ्चाला, अधि पञ्चालेसु ब्रह्मदत्तो, अधि देवेसु बुद्धो। तत्थ ‘अधि ब्रह्मदत्ते पञ्चाला’ति ब्रह्मदत्तिस्सरा पञ्चालरट्ठवासिनोति वदन्ति, ‘पञ्चाला’ति वा जनपदनामत्ता बहुवचनं, कदाचि पञ्चालराजा ब्रह्मदत्ते कासिरञ्ञे इस्सरो, कदाचि ब्रह्मदत्तो पञ्चालरञ्ञे इस्सरोति अत्थो।
३३०. सब्बादितो सब्बा
हेत्वत्थेहि योगे सब्बादीहि सब्बनामेहि हेत्वत्थे सब्बा विभत्तियो होन्ति।
किं कारणं, केन कारणेन
सत्तमीविभत्तिरासि निट्ठितो।
इति निरुत्तिदीपनिया नाम मोग्गल्लानदीपनिया
कारककण्डो निट्ठितो।