अट्ठम परिच्छेद
पण्डुवासुदेवाभिसेको
१.
विजयो
इति चिन्तयि ‘‘वुद्धो’हं, न च विज्जति मे सुतो॥
२.
किच्छेन वासितं रट्ठं, नस्सेय्य मम अच्चये।
आणापेय्यं रज्जहेतु-सुमित्तं भातरं मम॥
३.
अथा’मच्चेहि मन्तेत्वा, लेखं तत्थ विसज्जयि।
लेखं दत्वान विजयो, न चिरेन दिवङ्गतो॥
४.
तस्मिं मते अमच्चा ते, पेक्खन्ता खत्तियागमं।
उपतिस्सगामे ठत्वान, रट्ठं समुनुसासिसुं॥
५.
मते विजयराजम्हि, खत्तियागमना पुरा।
एकं वस्सं अयं लंका-दीपो आसि अराजको॥
६.
तस्मिं सीहपुरे तस्स, सीहबाहुस्स राजिनो।
अच्चयेन सुमित्तो सो, राजा तस्स सुतो अहु॥
७.
तस्स पुत्ता तयो आसुं, मद्दराजस्स धीतुया।
दूता सीहपुरं गन्त्वा, रञ्ञो लेखं अदंसु ते॥
८.
लेखं सुत्वान सो राजा, पुत्ते आमन्तयी तयो।
अहं महल्लको ताता, एको तुम्हेसु गच्छतु॥
९.
लंकं नेकगुणं कन्तं, मम भातुस्स सन्तकं।
तस्स’च्च येन तत्थेव, रज्जं कारेतु सोभनं॥
१०.
कणिट्ठको पण्डुवासु-देवो राजकुमारको।
‘‘गमिस्सामीति चिन्तेत्वा, ञत्वा सोत्थि गतम्पि च॥
११.
पितरा समनुञ्ञातो, द्वत्तिंसामच्च दारके।
आदाय आरुही नावं, परिब्बाजकलिङ्गवा॥
१२.
महाकन्दरनज्जा ते, मुखद्वारम्हि ओतरं।
ते परिब्बाजके दिस्वा, जनो सक्करि साधुकं॥
१३.
पुच्छित्वा
उपतिस्स गामं सम्पत्ता, देवता परिपालिता॥
१४.
अमच्चा’नुमतो’मच्चो, पुच्छि नेमित्तका तहिं।
खत्तिया’गमनं तस्स, सो ब्याकासि परंपि च॥
१५.
सत्तमे दीवसेयेव, आगमिस्सति खत्तियो।
बुद्धसासन मेतस्स, वंसजो’व ठपेस्सति॥
१६.
सत्तमे दिवसेयेव, ते परिब्बाजके तहिं।
पत्ते दिस्वान पुच्छित्वा, अमच्चा ते विजानिय॥
१७.
तं पण्णुवासुदेवं ते, लंकारज्जेन अप्पयुं।
महेसिया अभावासो, न ताव अभिसेचयि॥
१८.
अमितोदनसक्कस्स, पण्डुसक्को सुतो अहु।
ञत्वा विनासं सक्यानं, सो आदाय सकं जनं॥
१९.
गन्त्वा अञ्ञापदेसेन, गङ्गापारं तहिं पुरं।
मापेत्वा तत्थ कारेसि, रज्जं तस्स सुते लभि॥
२०.
धीता कणिट्ठिता आसि, भद्दकच्चान नामिका।
सब्बलक्खणसम्पन्ना, सुरूपा अभिपत्थिता॥
२१.
तदत्थं सत्तराजानो, पण्णाकारे महारहे।
पेसेसुं राजिनो तस्स, भीतो राजूहि सो पन॥
२२.
ञत्वान सोत्थिगमनं, अभिसेकफलम्पि च।
सहद्वत्तिंस इत्थीहि, नावं आरोपिया’सुतं॥
२३.
गङ्गाय खिपि गण्हातु, पहु मे धीतरं इति।
गहेतुं ते न सक्खिंसु, नावासापन सीघगा॥
२४.
दुतिये दिवसेयेव, गोणागामक पट्टनं।
पत्तापब्बजिता कारा, सब्बा ता तत्थ ओतरुं॥
२५.
पुच्छित्वा नगरं एत्थ, ता कमेनोपयन्तियो।
उपतिस्सगामं सम्पत्ता, देवता परिपालिता॥
२६.
नेमित्तकस्स वचनं, सुत्वा तत्था’गता तु ता।
दिस्वा अमच्चो पुच्छित्वा, ञत्वा रञ्ञो समप्पयि॥
२७.
तं पण्डुवासुदेवं ते, अमच्चा सुद्धबुद्धिनो।
रज्जे समभिसिञ्चिंसु, पुण्णसब्बमनोरथं॥
२८.
सुभद्दकच्चान
महेसीभावे अभिसिञ्चिय’त्तनो।
सहगता ताय पदासि अत्तना।
सहागतानं वसि भूमिपो सुखन्ती॥
सुजनप्पसाद संवेगत्थाय कते महावंसे
पण्डुवासुदेवाभिसेको नाम
अट्ठमो परिच्छेदो।