६. किलेससंयुत्तं

१. चक्खुसुत्तं

३२२. सावत्थिनिदानं । ‘‘यो, भिक्खवे, चक्खुस्मिं छन्दरागो, चित्तस्सेसो उपक्‍किलेसो। यो सोतस्मिं छन्दरागो, चित्तस्सेसो उपक्‍किलेसो। यो घानस्मिं छन्दरागो, चित्तस्सेसो उपक्‍किलेसो। यो जिव्हाय छन्दरागो, चित्तस्सेसो उपक्‍किलेसो। यो कायस्मिं छन्दरागो, चित्तस्सेसो उपक्‍किलेसो। यो मनस्मिं छन्दरागो, चित्तस्सेसो उपक्‍किलेसो। यतो खो, भिक्खवे, भिक्खुनो इमेसु छसु ठानेसु चेतसो उपक्‍किलेसो पहीनो होति, नेक्खम्मनिन्‍नञ्‍चस्स चित्तं होति। नेक्खम्मपरिभावितं चित्तं कम्मनियं खायति, अभिञ्‍ञा सच्छिकरणीयेसु धम्मेसू’’ति। पठमं।

२. रूपसुत्तं

३२३. सावत्थिनिदानं। ‘‘यो, भिक्खवे, रूपेसु छन्दरागो, चित्तस्सेसो उपक्‍किलेसो। यो सद्देसु… यो गन्धेसु… यो रसेसु… यो फोट्ठब्बेसु… यो धम्मेसु छन्दरागो, चित्तस्सेसो उपक्‍किलेसो। यतो खो, भिक्खवे, भिक्खुनो इमेसु छसु ठानेसु चेतसो उपक्‍किलेसो पहीनो होति, नेक्खम्मनिन्‍नञ्‍चस्स चित्तं होति। नेक्खम्मपरिभावितं चित्तं कम्मनियं खायति, अभिञ्‍ञा सच्छिकरणीयेसु धम्मेसू’’ति। दुतियं।

३. विञ्‍ञाणसुत्तं

३२४. सावत्थिनिदानं। ‘‘यो, भिक्खवे, चक्खुविञ्‍ञाणस्मिं छन्दरागो, चित्तस्सेसो उपक्‍किलेसो। यो सोतविञ्‍ञाणस्मिं… यो घानविञ्‍ञाणस्मिं… यो जिव्हाविञ्‍ञाणस्मिं… यो कायविञ्‍ञाणस्मिं… यो मनोविञ्‍ञाणस्मिं छन्दरागो, चित्तस्सेसो उपक्‍किलेसो। यतो खो , भिक्खवे, भिक्खुनो इमेसु छसु ठानेसु चेतसो उपक्‍किलेसो पहीनो होति, नेक्खम्मनिन्‍नञ्‍चस्स चित्तं होति। नेक्खम्मपरिभावितं चित्तं कम्मनियं खायति, अभिञ्‍ञा सच्छिकरणीयेसु धम्मेसू’’ति। ततियं।

४. सम्फस्ससुत्तं

३२५. सावत्थिनिदानं । ‘‘यो, भिक्खवे, चक्खुसम्फस्सस्मिं छन्दरागो, चित्तस्सेसो उपक्‍किलेसो। यो सोतसम्फस्सस्मिं… यो घानसम्फस्सस्मिं… यो जिव्हासम्फस्सस्मिं… यो कायसम्फस्सस्मिं… यो मनोसम्फस्सस्मिं छन्दरागो, चित्तस्सेसो उपक्‍किलेसो। यतो खो, भिक्खवे, भिक्खुनो…पे॰… अभिञ्‍ञा सच्छिकरणीयेसु धम्मेसू’’ति। चतुत्थं।

५. सम्फस्सजसुत्तं

३२६. सावत्थिनिदानं। ‘‘यो, भिक्खवे, चक्खुसम्फस्सजाय वेदनाय छन्दरागो, चित्तस्सेसो उपक्‍किलेसो। यो सोतसम्फस्सजाय वेदनाय… यो घानसम्फस्सजाय वेदनाय… यो जिव्हासम्फस्सजाय वेदनाय… यो कायसम्फस्सजाय वेदनाय… यो मनोसम्फस्सजाय वेदनाय छन्दरागो, चित्तस्सेसो उपक्‍किलेसो। यतो खो, भिक्खवे, भिक्खुनो…पे॰… अभिञ्‍ञा सच्छिकरणीयेसु धम्मेसू’’ति। पञ्‍चमं।

६. सञ्‍ञासुत्तं

३२७. सावत्थिनिदानं। ‘‘यो, भिक्खवे, रूपसञ्‍ञाय छन्दरागो, चित्तस्सेसो उपक्‍किलेसो। यो सद्दसञ्‍ञाय… यो गन्धसञ्‍ञाय… यो रससञ्‍ञाय… यो फोट्ठब्बसञ्‍ञाय… यो धम्मसञ्‍ञाय छन्दरागो, चित्तस्सेसो उपक्‍किलेसो । यतो खो, भिक्खवे, भिक्खुनो…पे॰… अभिञ्‍ञा सच्छिकरणीयेसु धम्मेसू’’ति। छट्ठं।

७. सञ्‍चेतनासुत्तं

३२८. सावत्थिनिदानं। ‘‘यो, भिक्खवे, रूपसञ्‍चेतनाय छन्दरागो, चित्तस्सेसो उपक्‍किलेसो। यो सद्दसञ्‍चेतनाय… यो गन्धसञ्‍चेतनाय… यो रससञ्‍चेतनाय… यो फोट्ठब्बसञ्‍चेतनाय… यो धम्मसञ्‍चेतनाय छन्दरागो, चित्तस्सेसो उपक्‍किलेसो। यतो खो, भिक्खवे, भिक्खुनो…पे॰… अभिञ्‍ञा सच्छिकरणीयेसु धम्मेसू’’ति। सत्तमं।

८. तण्हासुत्तं

३२९. सावत्थिनिदानं । ‘‘यो, भिक्खवे, रूपतण्हाय छन्दरागो, चित्तस्सेसो उपक्‍किलेसो। यो सद्दतण्हाय… यो गन्धतण्हाय… यो रसतण्हाय… यो फोट्ठब्बतण्हाय… यो धम्मतण्हाय छन्दरागो , चित्तस्सेसो उपक्‍किलेसो। यतो खो, भिक्खवे, भिक्खुनो…पे॰… अभिञ्‍ञा सच्छिकरणीयेसु धम्मेसू’’ति। अट्ठमं।

९. धातुसुत्तं

३३०. सावत्थिनिदानं। ‘‘यो, भिक्खवे, पथवीधातुया छन्दरागो, चित्तस्सेसो उपक्‍किलेसो। यो आपोधातुया… यो तेजोधातुया… यो वायोधातुया… यो आकासधातुया… यो विञ्‍ञाणधातुया छन्दरागो, चित्तस्सेसो उपक्‍किलेसो। यतो खो, भिक्खवे, भिक्खुनो इमेसु छसु ठानेसु चेतसो उपक्‍किलेसो पहीनो होति, नेक्खम्मनिन्‍नञ्‍चस्स चित्तं होति। नेक्खम्मपरिभावितं चित्तं कम्मनियं खायति, अभिञ्‍ञा सच्छिकरणीयेसु धम्मेसू’’ति। नवमं।

१०. खन्धसुत्तं

३३१. सावत्थिनिदानं। ‘‘यो, भिक्खवे, रूपस्मिं छन्दरागो, चित्तस्सेसो उपक्‍किलेसो…पे॰… यो विञ्‍ञाणस्मिं छन्दरागो, चित्तस्सेसो उपक्‍किलेसो। यतो खो, भिक्खवे, भिक्खुनो इमेसु पञ्‍चसु ठानेसु चेतसो उपक्‍किलेसो पहीनो होति, नेक्खम्मनिन्‍नञ्‍चस्स चित्तं होति। नेक्खम्मपरिभावितं चित्तं कम्मनियं खायति, अभिञ्‍ञा सच्छिकरणीयेसु धम्मेसू’’ति। दसमं।

किलेससंयुत्तं समत्तं।

तस्सुद्दानं –

चक्खु रूपञ्‍च विञ्‍ञाणं, फस्सो च वेदनाय च।

सञ्‍ञा च चेतना तण्हा, धातु खन्धेन ते दसाति॥