(९) ४. थेरवग्गो
१-३. वाहनसुत्तादिवण्णना
८१-८३. चतुत्थस्स विमरियादीकतेनाति किलेसमरियादं भिन्दित्वा विमरियादं कतेन। दुतियं उत्तानत्थमेव। ततिये नो च पयिरुपासिताति न उपट्ठाति।
४. ब्याकरणसुत्तवण्णना
८४. चतुत्थे झायी समापत्तिकुसलोति झानेहि च सम्पन्नो समापत्तियञ्च छेको। इरीणन्ति तुच्छभावं। विचिनन्ति गुणविचिनतं निग्गुणभावं। अथ वा इरीणसङ्खातं अरञ्ञं विचिनसङ्खातं महागहनञ्च आपन्नो विय होति। अनयन्ति अवड्ढिं। ब्यसनन्ति विनासं। अनयब्यसनन्ति अवड्ढिविनासं। किं नु खोति केन कारणेन।
५-६. कत्थीसुत्तादिवण्णना
८५-८६. पञ्चमे कत्थी होति विकत्थीति कत्थनसीलो होति विकत्थनसीलो, विवटं कत्वा कथेति। न सन्ततकारीति न सततकारी। छट्ठे अधिमानिकोति अनधिगते अधिगतमानेन समन्नागतो। अधिमानसच्चोति अधिगतमानमेव सच्चतो वदति।
७. नप्पियसुत्तवण्णना
८७. सत्तमे अधिकरणिको होतीति अधिकरणकारको होति। न पियतायाति न पियभावाय। न गरुतायाति न गरुभावाय। न सामञ्ञायाति न समणधम्मभावाय। न एकीभावायाति न निरन्तरभावाय। धम्मानं न निसामकजातिकोति नवन्नं लोकुत्तरधम्मानं न निसामनसभावो न उपधारणसभावो। न पटिसल्लानोति न पटिसल्लीनो। साठेय्यानीति सठभावो। कूटेय्यानीति कूटभावो। जिम्हेय्यानीति न उजुभावा। वङ्केय्यानीति वङ्कभावा।
८. अक्कोसकसुत्तवण्णना
८८. अट्ठमे अक्कोसकपरिभासको अरियूपवादी सब्रह्मचारिनन्ति एत्थ सब्रह्मचारिपदं अक्कोसकपरिभासकपदेहि योजेतब्बं ‘‘अक्कोसको सब्रह्मचारीनं, परिभासको सब्रह्मचारीन’’न्ति। अरियानं पन गुणे छिन्दिस्सामीति अन्तिमवत्थुना उपवदन्तो अरियूपवादी नाम होति। सद्धम्मस्स न वोदायन्तीति सिक्खात्तयसङ्खाता सासनसद्धम्मा अस्स वोदानं न गच्छन्ति। रोगातङ्कन्ति एत्थ रोगोव किच्छाजीवितभावकरणेन आतङ्कोति वेदितब्बो।
९. कोकालिकसुत्तवण्णना
८९. नवमे कोकालिको भिक्खु येन भगवा तेनुपसङ्कमीति कोयं कोकालिको, कस्मा च उपसङ्कमि? अयं किर कोकालिकरट्ठे कोकालिकनगरे कोकालिकसेट्ठिस्स पुत्तो पब्बजित्वा पितरा कारिते विहारे वसति चूळकोकालिकोति नामेन, न पन देवदत्तस्स सिस्सो। सो हि ब्राह्मणपुत्तो
कोकालिको
भगवा तं तुरिततुरितं आगच्छन्तं दिस्वाव आवज्जेन्तो अञ्ञासि ‘‘अयं अग्गसावके अक्कोसितुकामो आगतो, सक्का नु खो पटिसेधेतु’’न्ति। ततो ‘‘न सक्का पटिसेधेतुं, थेरेसु अपरज्झित्वा आगतो, एकंसेन पन पदुमनिरये निब्बत्तिस्सती’’ति दिस्वा ‘‘सारिपुत्तमोग्गल्लानेपि नाम गरहन्तं सुत्वा न निसेधेती’’ति वादमोचनत्थं अरियूपवादस्स च महासावज्जभावदस्सनत्थं मा हेवन्ति तिक्खत्तुं पटिसेधेसि। तत्थ मा हेवन्ति मा एवं अभणि। सद्धायिकोति सद्धाय आगमकरो पसादावहो, सद्धातब्बवचनो वा। पच्चयिकोति पत्तियायितब्बवचनो।
पक्कामीति अचिरपक्कन्तस्साति पक्कन्तस्स सतो नचिरेनेव। सब्बो कायो फुटो अहोसीति केसग्गमत्तम्पि ओकासं अवज्जेत्वा सकलसरीरं अट्ठीनि भिन्दित्वा उग्गताहि पीळकाहि अज्झोत्थटं कलायमत्तियोति चणकमत्तियो। बेलुवसलाटुकमत्तियोति तरुणबेलुवमत्तियो। पभिज्जिंसूति भिज्जिंसु। तासु भिन्नासु सकलसरीरं पनसपक्कं विय अहोसि। सो पक्केन गत्तेन जेतवनद्वारकोट्ठके विसगिलितो मच्छो विय कदलिपत्तेसु निपज्जि। अथ धम्मस्सवनत्थं आगतागता
तुरूति कोकालिकस्स उपज्झायो तुरुत्थेरो नाम अनागामिफलं वत्वा ब्रह्मलोके निब्बत्तो। सो भुम्मट्ठदेवता आदिं कत्वा ‘‘अयुत्तं कोकालिकेन कतं अग्गसावके अन्तिमवत्थुना अब्भाचिक्खन्तेना’’ति परम्पराय ब्रह्मलोकसम्पत्तं पेसलाति पियसीला। कोसि त्वं, आवुसोति निसिन्नकोव कबरक्खीनि उम्मीलेत्वा एवमाह। पस्स यावञ्च ते इदं अपरद्धति यत्तकं तया अपरद्धं, अत्तनो नलाटे महागण्डं अपस्सन्तो सासपमत्ताय पीळकाय मं चोदेतब्बं मञ्ञसीति आह।
अथ नं ‘‘अदिट्ठिप्पत्तो अयं कोकालिको, गिलितविसो विय न कस्सचि वचनं न करिस्सती’’ति ञत्वा पुरिसस्स हीतिआदिमाह। तत्थ कुठारीति कुठारिसदिसा फरुसवाचा। छिन्दतीति कुसलमूलसङ्खाते मूलेयेव निकन्तति। निन्दियन्ति निन्दितब्बं दुस्सीलपुग्गलं। पसंसतीति उत्तमत्थे सम्भावेत्वा खीणासवोति वदति। तं वा निन्दति यो पसंसियोति यो वा पसंसितब्बो खीणासवो, तं अन्तिमवत्थुना चोदेन्तो ‘‘दुस्सीलो अय’’न्ति वदति। विचिनाति मुखेन सो कलिन्ति सो तं अपराधं कलिना तेनाति तेन अपराधेन सुखं न विन्दति। निन्दियपसंसाय हि पसंसियनिन्दाय च समकोव विपाको।
सब्बस्सापि सहापि अत्तनाति सब्बेन सकेन धनेनपि अत्तनापि सद्धिं यो अक्खेसु धनपराजयो नाम, अयं अप्पमत्तको अपराधो। यो सुगतेसूति यो पन सम्मग्गतेसु पुग्गलेसु चित्तं दूसेय्य, अयं चित्तपदोसोव ततो कलितो महन्ततरो कलि।
इदानि तस्स महन्ततरभावं दस्सेन्तो सतं सहस्सानन्तिआदिमाह। तत्थ सतं सहस्सानन्ति छत्तिंसतीति अपरानि छत्तिंसति निरब्बुदानि। पञ्च चाति अब्बुदगणनाय पञ्च अब्बुदानि। यमरियगरहीति यं अरिये गरहन्तो निरयं उपपज्जति, तत्थ एत्तकं आयुप्पमाणन्ति अत्थो।
कालमकासीति उपज्झाये पक्कन्ते कालं अकासि। पदुमनिरयन्ति पाटियेक्को पदुमनिरयो नाम नत्थि, अवीचिमहानिरयस्मिंयेव पन पदुमगणनाय पच्चितब्बे एकस्मिं ठाने निब्बत्ति।
वीसतिखारिकोति मागधकेन पत्थेन चत्तारो पत्था, कोसलरट्ठे एको पत्थो होति। तेन पत्थेन चत्तारो पत्था आळ्हकं तिलवाहोति मागधकानं सुखुमतिलानं तिलसकटं। अब्बुदो निरयोति अब्बुदो नाम पाटियेक्को निरयो नत्थि, अवीचिम्हियेव पन अब्बुदगणनाय पच्चितब्बट्ठानस्सेतं नामं। निरब्बुदादीसुपि एसेव नयो।
वस्सगणनापि पनेत्थ एवं वेदितब्बा – यथेव हि सतं सतसहस्सानि कोटि होति, एवं सतं सतसहस्सकोटियो पकोटि नाम होति, सतं सतसहस्सपकोटियो कोटिपकोटि नाम, सतं सतसहस्सकोटिपकोटियो नहुतं, सतं सतसहस्सनहुतानि निन्नहुतं, सतं सतसहस्सनिन्नहुतानि एकं अब्बुदं, ततो वीसतिगुणं निरब्बुदं, एस नयो सब्बत्थाति। दसमं हेट्ठा वुत्तनयेनेव वेदितब्बं। सेसं सब्बत्थ उत्तानत्थमेवाति।
थेरवग्गो चतुत्थो।