(१८) ३. साधुवग्गो

१. साधुसुत्तं

१७८. अ॰ नि॰ १०.१३४ ‘‘साधुञ्‍च वो, भिक्खवे, देसेस्सामि असाधुञ्‍च। तं सुणाथ, साधुकं मनसि करोथ; भासिस्सामी’’ति। ‘‘एवं, भन्ते’’ति खो ते भिक्खू भगवतो पच्‍चस्सोसुं। भगवा एतदवोच –

‘‘कतमञ्‍च, भिक्खवे, असाधु? पाणातिपातो, अदिन्‍नादानं, कामेसुमिच्छाचारो, मुसावादो, पिसुणा वाचा, फरुसा वाचा, सम्फप्पलापो, अभिज्झा, ब्यापादो, मिच्छादिट्ठि – इदं वुच्‍चति, भिक्खवे, असाधु।

‘‘कतमञ्‍च, भिक्खवे, साधु? पाणातिपाता वेरमणी, अदिन्‍नादाना वेरमणी, कामेसुमिच्छाचारा वेरमणी, मुसावादा वेरमणी, पिसुणाय वाचाय वेरमणी, फरुसाय वाचाय वेरमणी, सम्फप्पलापा वेरमणी, अनभिज्झा, अब्यापादो, सम्मादिट्ठि – इदं वुच्‍चति, भिक्खवे, साधू’’ति। पठमं।

२. अरियधम्मसुत्तं

१७९. ‘‘अरियधम्मञ्‍च वो, भिक्खवे, देसेस्सामि अनरियधम्मञ्‍च। तं सुणाथ…पे॰… कतमो च, भिक्खवे, अनरियो धम्मो? पाणातिपातो…पे॰… मिच्छादिट्ठि – अयं वुच्‍चति, भिक्खवे, अनरियो धम्मो।

‘‘कतमो च, भिक्खवे, अरियो धम्मो? पाणातिपाता वेरमणी…पे॰… सम्मादिट्ठि – अयं वुच्‍चति, भिक्खवे, अरियो धम्मो’’ति। दुतियं।

३. कुसलसुत्तं

१८०. ‘‘कुसलञ्‍च वो, भिक्खवे, देसेस्सामि अकुसलञ्‍च। तं सुणाथ…पे॰… कतमञ्‍च, भिक्खवे, अकुसलं? पाणातिपातो…पे॰… मिच्छादिट्ठि – इदं वुच्‍चति, भिक्खवे, अकुसलं।

‘‘कतमञ्‍च , भिक्खवे, कुसलं? पाणातिपाता वेरमणी…पे॰… सम्मादिट्ठि – इदं वुच्‍चति, भिक्खवे, कुसल’’न्ति। ततियं।

४. अत्थसुत्तं

१८१. ‘‘अत्थञ्‍च वो, भिक्खवे, देसेस्सामि अनत्थञ्‍च। तं सुणाथ…पे॰… कतमो च, भिक्खवे, अनत्थो? पाणातिपातो…पे॰… मिच्छादिट्ठि – अयं वुच्‍चति, भिक्खवे, अनत्थो।

‘‘कतमो च, भिक्खवे, अत्थो? पाणातिपाता वेरमणी…पे॰… सम्मादिट्ठि – अयं वुच्‍चति, भिक्खवे, अत्थो’’ति। चतुत्थं।

५. धम्मसुत्तं

१८२. ‘‘धम्मञ्‍च वो, भिक्खवे, देसेस्सामि अधम्मञ्‍च। तं सुणाथ…पे॰… कतमो च, भिक्खवे, अधम्मो? पाणातिपातो…पे॰… मिच्छादिट्ठि – अयं वुच्‍चति, भिक्खवे, अधम्मो।

‘‘कतमो च, भिक्खवे, धम्मो? पाणातिपाता वेरमणी…पे॰… सम्मादिट्ठि – अयं वुच्‍चति, भिक्खवे, धम्मो’’ति। पञ्‍चमं।

६. आसवसुत्तं

१८३. ‘‘सासवञ्‍च वो, भिक्खवे, धम्मं देसेस्सामि अनासवञ्‍च। तं सुणाथ…पे॰… कतमो च, भिक्खवे, सासवो धम्मो? पाणातिपातो…पे॰… मिच्छादिट्ठि – अयं वुच्‍चति, भिक्खवे, सासवो धम्मो।

‘‘कतमो च, भिक्खवे, अनासवो धम्मो? पाणातिपाता वेरमणी…पे॰… सम्मादिट्ठि – अयं वुच्‍चति, भिक्खवे, अनासवो धम्मो’’ति। छट्ठं।

७. वज्‍जसुत्तं

१८४. ‘‘सावज्‍जञ्‍च वो, भिक्खवे, धम्मं देसेस्सामि अनवज्‍जञ्‍च। तं सुणाथ…पे॰… कतमो च, भिक्खवे, सावज्‍जो धम्मो? पाणातिपातो…पे॰… मिच्छादिट्ठि – अयं वुच्‍चति, भिक्खवे, सावज्‍जो धम्मो।

‘‘कतमो च, भिक्खवे, अनवज्‍जो धम्मो? पाणातिपाता वेरमणी…पे॰… सम्मादिट्ठि – अयं वुच्‍चति, भिक्खवे, अनवज्‍जो धम्मो’’ति। सत्तमं।

८. तपनीयसुत्तं

१८५. ‘‘तपनीयञ्‍च वो, भिक्खवे, धम्मं देसेस्सामि अतपनीयञ्‍च। तं सुणाथ…पे॰… कतमो च, भिक्खवे, तपनीयो धम्मो? पाणातिपातो…पे॰… मिच्छादिट्ठि – अयं वुच्‍चति, भिक्खवे, तपनीयो धम्मो।

‘‘कतमो च, भिक्खवे, अतपनीयो धम्मो? पाणातिपाता वेरमणी…पे॰… सम्मादिट्ठि – अयं वुच्‍चति, भिक्खवे, अतपनीयो धम्मो’’ति। अट्ठमं।

९. आचयगामिसुत्तं

१८६. ‘‘आचयगामिञ्‍च वो, भिक्खवे, धम्मं देसेस्सामि अपचयगामिञ्‍च। तं सुणाथ…पे॰… कतमो च, भिक्खवे, आचयगामी धम्मो? पाणातिपातो…पे॰… मिच्छादिट्ठि – अयं वुच्‍चति, भिक्खवे, आचयगामी धम्मो।

‘‘कतमो च, भिक्खवे, अपचयगामी धम्मो? पाणातिपाता वेरमणी…पे॰… सम्मादिट्ठि – अयं वुच्‍चति, भिक्खवे, अपचयगामी धम्मो’’ति। नवमं।

१०. दुक्खुद्रयसुत्तं

१८७. ‘‘दुक्खुद्रयञ्‍च वो, भिक्खवे, धम्मं देसेस्सामि सुखुद्रयञ्‍च। तं सुणाथ…पे॰… कतमो च, भिक्खवे, दुक्खुद्रयो धम्मो? पाणातिपातो…पे॰… मिच्छादिट्ठि – अयं वुच्‍चति, भिक्खवे, दुक्खुद्रयो धम्मो।

‘‘कतमो च, भिक्खवे, सुखुद्रयो धम्मो? पाणातिपाता वेरमणी…पे॰… सम्मादिट्ठि – अयं वुच्‍चति, भिक्खवे, सुखुद्रयो धम्मो’’ति। दसमं।

११. विपाकसुत्तं

१८८. ‘‘दुक्खविपाकञ्‍च वो, भिक्खवे, धम्मं देसेस्सामि सुखविपाकञ्‍च। तं सुणाथ…पे॰… कतमो च, भिक्खवे, दुक्खविपाको धम्मो? पाणातिपातो…पे॰… मिच्छादिट्ठि – अयं वुच्‍चति, भिक्खवे, दुक्खविपाको धम्मो।

‘‘कतमो च, भिक्खवे, सुखविपाको धम्मो? पाणातिपाता वेरमणी…पे॰… सम्मादिट्ठि – अयं वुच्‍चति, भिक्खवे, सुखविपाको धम्मो’’ति। एकादसमं।

साधुवग्गो ततियो।