(२०) ५. अपरपुग्गलवग्गो

नसेवितब्बादिसुत्तानि

१९९. ‘‘दसहि , भिक्खवे, धम्मेहि समन्‍नागतो पुग्गलो न सेवितब्बो। कतमेहि दसहि? पाणातिपाती होति, अदिन्‍नादायी होति, कामेसुमिच्छाचारी होति, मुसावादी होति, पिसुणवाचो होति, फरुसवाचो होति, सम्फप्पलापी होति, अभिज्झालु होति, ब्यापन्‍नचित्तो होति, मिच्छादिट्ठिको होति – इमेहि खो, भिक्खवे, दसहि धम्मेहि समन्‍नागतो पुग्गलो न सेवितब्बो।

‘‘दसहि, भिक्खवे, धम्मेहि समन्‍नागतो पुग्गलो सेवितब्बो। कतमेहि दसहि? पाणातिपाता पटिविरतो होति, अदिन्‍नादाना पटिविरतो होति, कामेसुमिच्छाचारा पटिविरतो होति, मुसावादा पटिविरतो होति, पिसुणाय वाचाय पटिविरतो होति, फरुसाय वाचाय पटिविरतो होति, सम्फप्पलापा पटिविरतो होति, अनभिज्झालु होति, अब्यापन्‍नचित्तो होति, सम्मादिट्ठिको होति – इमेहि खो, भिक्खवे, दसहि धम्मेहि समन्‍नागतो पुग्गलो सेवितब्बो’’।

२००-२०९. ‘‘दसहि, भिक्खवे, धम्मेहि समन्‍नागतो पुग्गलो न भजितब्बो…पे॰… भजितब्बो… न पयिरुपासितब्बो… पयिरुपासितब्बो… न पुज्‍जो होति… पुज्‍जो होति… न पासंसो होति… पासंसो होति… अगारवो होति… गारवो होति… अप्पतिस्सो होति… सप्पतिस्सो होति… न आराधको होति… आराधको होति… न विसुज्झति… विसुज्झति… मानं नाधिभोति नाभिभोति (सी॰) अ॰ नि॰ १०.१५६-१६६ … मानं अधिभोति… पञ्‍ञाय न वड्ढति… पञ्‍ञाय वड्ढति…पे॰…।

२१०. ‘‘दसहि , भिक्खवे, धम्मेहि समन्‍नागतो पुग्गलो बहुं अपुञ्‍ञं पसवति… बहुं पुञ्‍ञं पसवति। कतमेहि दसहि? पाणातिपाता पटिविरतो होति, अदिन्‍नादाना पटिविरतो होति , कामेसुमिच्छाचारा पटिविरतो होति, मुसावादा पटिविरतो होति, पिसुणाय वाचाय पटिविरतो होति, फरुसाय वाचाय पटिविरतो होति, सम्फप्पलापा पटिविरतो होति, अनभिज्झालु होति , अब्यापन्‍नचित्तो होति, सम्मादिट्ठिको होति – इमेहि खो, भिक्खवे, दसहि धम्मेहि समन्‍नागतो पुग्गलो बहुं पुञ्‍ञं पसवती’’ति।

अपरपुग्गलवग्गो पञ्‍चमो।

चतुत्थपण्णासकं समत्तं।