೨. ದುಕಪಟ್ಠಾನವಣ್ಣನಾ

ದುಕಪಟ್ಠಾನೇಪಿ ಸಬ್ಬದುಕೇಸು ಪಞ್ಹಾವಿಸ್ಸಜ್ಜನಾನಿ ಚೇವ ಗಣನಾ ಚ ಪಾಳಿಯಂ ಆಗತನಯೇನೇವ ವೇದಿತಬ್ಬಾ। ಅಪಿಚೇತ್ಥ ಸಹೇತುಕಹೇತುಸಮ್ಪಯುತ್ತದುಕಾನಂ ವಿಸ್ಸಜ್ಜನಂ ಹೇತುದುಕವಿಸ್ಸಜ್ಜನಸದಿಸಂ; ತಥಾ ಹೇತೂಚೇವಸಹೇತುಕಹೇತೂಚೇವಹೇತುಸಮ್ಪಯುತ್ತದುಕಾನಂ, ತಥಾ ಸಪ್ಪಚ್ಚಯಸಙ್ಖತದುಕಾನಂ। ಇದಂ ದುಕಂ ಯಥಾ ಸಪ್ಪಚ್ಚಯದುಕಂ, ಏವಂ ಕಾತಬ್ಬನ್ತಿ ಇದಂ ಯಸ್ಮಾ ಸಪ್ಪಚ್ಚಯೋ ವಿಯ ಅಪ್ಪಚ್ಚಯೇನ ಸಙ್ಖತೋಪಿ, ಅಸಙ್ಖತೇನ ಸದ್ಧಿಂ ಯೋಜನಂ ನ ಲಬ್ಭತಿ, ತಸ್ಮಾ ವುತ್ತಂ। ಸಾರಮ್ಮಣಚಿತ್ತಸಮ್ಪಯುತ್ತಸಂಸಟ್ಠದುಕಾಪಿ ಸದಿಸವಿಸ್ಸಜ್ಜನಾಯೇವ; ತಥಾ ಆಸವಓಘಯೋಗಗೋಚ್ಛಕಾ। ಏತೇ ಹಿ ತಯೋ ಅಞ್ಞಮಞ್ಞಂ ಸದಿಸವಿಸ್ಸಜ್ಜನಾಯೇವ। ಅಪಿಚ ಲೋಕಿಯಸಾಸವಸಂಯೋಜನಿಯಗನ್ಥನಿಯನೀವರಣಿಯಪರಾಮಟ್ಠಸಙ್ಕಿಲೇಸಿಕದುಕಾ ಆಸವವಿಪ್ಪಯುತ್ತಸಾಸವಸಂಯೋಜನವಿಪ್ಪಯುತ್ತಸಂಯೋಜನಿಯಗನ್ಥವಿಪ್ಪಯುತ್ತಗನ್ಥನಿಯನೀವರಣವಿಪ್ಪಯುತ್ತನೀವರಣಿಯಪರಾಮಾಸವಿಪ್ಪಯುತ್ತಪರಾಮಟ್ಠಕಿಲೇಸವಿಪ್ಪಯುತ್ತಸಙ್ಕಿಲೇಸಿಕಪರಿಯಾಪನ್ನಸಉತ್ತರದುಕಾತ ಇಮೇಪಿ ದುಕಾ ಸಮಾನಾ।

ಕಿಲೇಸದುಕಂ ಸಂಯೋಜನದುಕಸದಿಸಂ। ಸಙ್ಕಿಲಿಟ್ಠಕಿಲೇಸಸಮ್ಪಯುತ್ತನೀವರಣಸಮ್ಪಯುತ್ತದಸ್ಸನೇನಪಹಾತಬ್ಬಸರಣದುಕಾಪಿ ಸಮಾನಾ। ತಥಾಕಿಲೇಸಾ ಚೇವ ಸಙ್ಕಿಲಿಟ್ಠನೀವರಣಾ ಚೇವ ನೀವರಣಸಮ್ಪಯುತ್ತಕಿಲೇಸಾ ಚೇವ ಕಿಲೇಸಸಮ್ಪಯುತ್ತದುಕಾ। ಇಮಿನಾ ನಯೇನ ಸಬ್ಬೇಸಂ ಅತ್ಥತೋ ಸದಿಸಾನಂ ದುಕಾನಂ ವಿಸ್ಸಜ್ಜನಾನಿ ಸದಿಸಾನೇವ ಹೋನ್ತೀತಿ ವೇದಿತಬ್ಬಾನಿ। ಸಬ್ಬಸ್ಮಿಮ್ಪಿ ಪನ ಪಟ್ಠಾನೇ ಕೇನಚಿವಿಞ್ಞೇಯ್ಯದುಕಂ ನ ಲಬ್ಭತಿ। ಆಸವಾ ಚೇವ ಆಸವಸಮ್ಪಯುತ್ತಾ ಚ, ಸಂಯೋಜನಾ ಚೇವ ಸಂಯೋಜನಸಮ್ಪಯುತ್ತಾ ಚ, ಗನ್ಥಾ ಚೇವ ಗನ್ಥಸಮ್ಪಯುತ್ತಾ ಚ, ನೀವರಣಾ ಚೇವ ನೀವರಣಸಮ್ಪಯುತ್ತಾ ಚ, ಕಿಲೇಸಾ ಚೇವ ಸಙ್ಕಿಲಿಟ್ಠಾ ಚಾತಿ ಏವರೂಪೇಸು ದುಕೇಸು ವಿಪಾಕಪಚ್ಚಯೋ ಚೇವ ನಾನಾಕ್ಖಣಿಕಕಮ್ಮಪಚ್ಚಯೋ ಚ ನ ಲಬ್ಭತಿ। ನಹೇತುಸಹೇತುಕನಹೇತುಅಹೇತುಕೇಸು ಹೇತುಪಚ್ಚಯೋ ನತ್ಥಿ। ಹೇತೂ ಚೇವ ಹೇತುಸಮ್ಪಯುತ್ತಾ ಚ, ಆಸವಾ ಚೇವ ಆಸವಸಮ್ಪಯುತ್ತಾ ಚ, ಗನ್ಥಾ ಚೇವ ಗನ್ಥಸಮ್ಪಯುತ್ತಾ ಚಾತಿ ಇಮೇಸು ದುಕೇಸು ನಹೇತುನಝಾನನಮಗ್ಗಾ ನ ಲಬ್ಭನ್ತಿ। ಸಂಯೋಜನಾ ಚೇವ ಸಂಯೋಜನಸಮ್ಪಯುತ್ತಾ ಚ, ನೀವರಣಾ ಚೇವ ನೀವರಣಸಮ್ಪಯುತ್ತಾ ಚ, ಕಿಲೇಸಾ ಚೇವ ಕಿಲೇಸಸಮ್ಪಯುತ್ತಾ ಚ, ಕಿಲೇಸಾ ಚೇವ ಸಙ್ಕಿಲಿಟ್ಠಾ ಚಾತಿ ಇಮೇಸು ಪನ ವಿಚಿಕಿಚ್ಛುದ್ಧಚ್ಚಸಹಗತಸ್ಸ ಮೋಹಸ್ಸ ವಸೇನ ನಹೇತುಪಚ್ಚಯೋ ಲಬ್ಭತಿ; ನಝಾನನಮಗ್ಗಪಚ್ಚಯಾ ನ ಲಬ್ಭನ್ತೀತಿ ಏವಂ ಸಬ್ಬದುಕೇಸು ಲಬ್ಭಮಾನಾಲಬ್ಭಮಾನಂ ಉಪಪರಿಕ್ಖಿತ್ವಾ ಪಾಳಿವಸೇನೇವ ವಾರಗಣನಾ ವೇದಿತಬ್ಬಾತಿ।

ದುಕಪಟ್ಠಾನವಣ್ಣನಾ।