೪. ಜಹತಿಕಥಾ

೧. ನಸುತ್ತಾಹರಣಕಥಾ

೨೭೯. ಜಹತಿ ಪುಥುಜ್ಜನೋ ಕಾಮರಾಗಬ್ಯಾಪಾದನ್ತಿ? ಆಮನ್ತಾ। ಅಚ್ಚನ್ತಂ ಜಹತಿ, ಅನವಸೇಸಂ ಜಹತಿ, ಅಪ್ಪಟಿಸನ್ಧಿಯಂ ಜಹತಿ, ಸಮೂಲಂ ಜಹತಿ, ಸತಣ್ಹಂ ಜಹತಿ, ಸಾನುಸಯಂ ಜಹತಿ, ಅರಿಯೇನ ಞಾಣೇನ ಜಹತಿ, ಅರಿಯೇನ ಮಗ್ಗೇನ ಜಹತಿ, ಅಕುಪ್ಪಂ ಪಟಿವಿಜ್ಝನ್ತೋ ಜಹತಿ, ಅನಾಗಾಮಿಫಲಂ ಸಚ್ಛಿಕರೋನ್ತೋ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ॰…।

ವಿಕ್ಖಮ್ಭೇತಿ ಪುಥುಜ್ಜನೋ ಕಾಮರಾಗಬ್ಯಾಪಾದನ್ತಿ? ಆಮನ್ತಾ। ಅಚ್ಚನ್ತಂ ವಿಕ್ಖಮ್ಭೇತಿ, ಅನವಸೇಸಂ ವಿಕ್ಖಮ್ಭೇತಿ, ಅಪ್ಪಟಿಸನ್ಧಿಯಂ ವಿಕ್ಖಮ್ಭೇತಿ, ಸಮೂಲಂ ವಿಕ್ಖಮ್ಭೇತಿ, ಸತಣ್ಹಂ ವಿಕ್ಖಮ್ಭೇತಿ, ಸಾನುಸಯಂ ವಿಕ್ಖಮ್ಭೇತಿ, ಅರಿಯೇನ ಞಾಣೇನ ವಿಕ್ಖಮ್ಭೇತಿ, ಅರಿಯೇನ ಮಗ್ಗೇನ ವಿಕ್ಖಮ್ಭೇತಿ, ಅಕುಪ್ಪಂ ಪಟಿವಿಜ್ಝನ್ತೋ ವಿಕ್ಖಮ್ಭೇತಿ, ಅನಾಗಾಮಿಫಲಂ ಸಚ್ಛಿಕರೋನ್ತೋ ವಿಕ್ಖಮ್ಭೇತೀತಿ? ನ ಹೇವಂ ವತ್ತಬ್ಬೇ…ಪೇ॰…।

ಜಹತಿ ಅನಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಪುಗ್ಗಲೋ ಕಾಮರಾಗಬ್ಯಾಪಾದಂ, ಸೋ ಚ ಅಚ್ಚನ್ತಂ ಜಹತಿ, ಅನವಸೇಸಂ ಜಹತಿ…ಪೇ॰… ಅನಾಗಾಮಿಫಲಂ ಸಚ್ಛಿಕರೋನ್ತೋ ಜಹತೀತಿ? ಆಮನ್ತಾ। ಜಹತಿ ಪುಥುಜ್ಜನೋ ಕಾಮರಾಗಬ್ಯಾಪಾದಂ, ಸೋ ಚ ಅಚ್ಚನ್ತಂ ಜಹತಿ, ಅನವಸೇಸಂ ಜಹತಿ…ಪೇ॰… ಅನಾಗಾಮಿಫಲಂ ಸಚ್ಛಿಕರೋನ್ತೋ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ॰…।

ವಿಕ್ಖಮ್ಭೇತಿ ಅನಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಪುಗ್ಗಲೋ ಕಾಮರಾಗಬ್ಯಾಪಾದಂ, ಸೋ ಚ ಅಚ್ಚನ್ತಂ ವಿಕ್ಖಮ್ಭೇತಿ, ಅನವಸೇಸಂ ವಿಕ್ಖಮ್ಭೇತಿ…ಪೇ॰… ಅನಾಗಾಮಿಫಲಂ ಸಚ್ಛಿಕರೋನ್ತೋ ವಿಕ್ಖಮ್ಭೇತೀತಿ? ಆಮನ್ತಾ। ವಿಕ್ಖಮ್ಭೇತಿ ಪುಥುಜ್ಜನೋ ಕಾಮರಾಗಬ್ಯಾಪಾದಂ, ಸೋ ಚ ಅಚ್ಚನ್ತಂ ವಿಕ್ಖಮ್ಭೇತಿ, ಅನವಸೇಸಂ ವಿಕ್ಖಮ್ಭೇತಿ …ಪೇ॰… ಅನಾಗಾಮಿಫಲಂ ಸಚ್ಛಿಕರೋನ್ತೋ ವಿಕ್ಖಮ್ಭೇತೀತಿ? ನ ಹೇವಂ ವತ್ತಬ್ಬೇ…ಪೇ॰…।

ಜಹತಿ ಪುಥುಜ್ಜನೋ ಕಾಮರಾಗಬ್ಯಾಪಾದಂ, ಸೋ ಚ ನ ಅಚ್ಚನ್ತಂ ಜಹತಿ, ನ ಅನವಸೇಸಂ ಜಹತಿ…ಪೇ॰… ನ ಅನಾಗಾಮಿಫಲಂ ಸಚ್ಛಿಕರೋನ್ತೋ ಜಹತೀತಿ? ಆಮನ್ತಾ। ಜಹತಿ ಅನಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಪುಗ್ಗಲೋ ಕಾಮರಾಗಬ್ಯಾಪಾದಂ, ಸೋ ಚ ನ ಅಚ್ಚನ್ತಂ ಜಹತಿ…ಪೇ॰… ನ ಅನಾಗಾಮಿಫಲಂ ಸಚ್ಛಿಕರೋನ್ತೋ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ॰…।

ವಿಕ್ಖಮ್ಭೇತಿ ಪುಥುಜ್ಜನೋ ಕಾಮರಾಗಬ್ಯಾಪಾದಂ, ಸೋ ಚ ನ ಅಚ್ಚನ್ತಂ ವಿಕ್ಖಮ್ಭೇತಿ, ನ ಅನವಸೇಸಂ ವಿಕ್ಖಮ್ಭೇತಿ…ಪೇ॰… ನ ಅನಾಗಾಮಿಫಲಂ ಸಚ್ಛಿಕರೋನ್ತೋ ವಿಕ್ಖಮ್ಭೇತೀತಿ? ಆಮನ್ತಾ। ವಿಕ್ಖಮ್ಭೇತಿ ಅನಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಪುಗ್ಗಲೋ ಕಾಮರಾಗಬ್ಯಾಪಾದಂ, ಸೋ ಚ ನ ಅಚ್ಚನ್ತಂ ವಿಕ್ಖಮ್ಭೇತಿ, ನ ಅನವಸೇಸಂ ವಿಕ್ಖಮ್ಭೇತಿ…ಪೇ॰… ನ ಅನಾಗಾಮಿಫಲಂ ಸಚ್ಛಿಕರೋನ್ತೋ ವಿಕ್ಖಮ್ಭೇತೀತಿ? ನ ಹೇವಂ ವತ್ತಬ್ಬೇ…ಪೇ॰…।

ಜಹತಿ ಪುಥುಜ್ಜನೋ ಕಾಮರಾಗಬ್ಯಾಪಾದನ್ತಿ? ಆಮನ್ತಾ। ಕತಮೇನ ಮಗ್ಗೇನಾತಿ? ರೂಪಾವಚರೇನ ಮಗ್ಗೇನಾತಿ। ರೂಪಾವಚರೋ ಮಗ್ಗೋ ನಿಯ್ಯಾನಿಕೋ ಖಯಗಾಮೀ ಬೋಧಗಾಮೀ ಅಪಚಯಗಾಮೀ ಅನಾಸವೋ ಅಸಂಯೋಜನಿಯೋ ಅಗನ್ಥನಿಯೋ ಅನೋಘನಿಯೋ ಅಯೋಗನಿಯೋ ಅನೀವರಣಿಯೋ ಅಪರಾಮಟ್ಠೋ ಅನುಪಾದಾನಿಯೋ ಅಸಂಕಿಲೇಸಿಯೋತಿ? ನ ಹೇವಂ ವತ್ತಬ್ಬೇ। ನನು ರೂಪಾವಚರೋ ಮಗ್ಗೋ ಅನಿಯ್ಯಾನಿಕೋ ನ ಖಯಗಾಮೀ ನ ಬೋಧಗಾಮೀ ನ ಅಪಚಯಗಾಮೀ ಸಾಸವೋ ಸಂಯೋಜನಿಯೋ…ಪೇ॰… ಸಂಕಿಲೇಸಿಯೋತಿ? ಆಮನ್ತಾ। ಹಞ್ಚಿ ರೂಪಾವಚರೋ ಮಗ್ಗೋ ಅನಿಯ್ಯಾನಿಕೋ ನ ಖಯಗಾಮೀ…ಪೇ॰… ಸಂಕಿಲೇಸಿಯೋ, ನೋ ಚ ವತ ರೇ ವತ್ತಬ್ಬೇ – ‘‘ಜಹತಿ ಪುಥುಜ್ಜನೋ ರೂಪಾವಚರೇನ ಮಗ್ಗೇನ ಕಾಮರಾಗಬ್ಯಾಪಾದ’’ನ್ತಿ।

ಜಹತಿ ಅನಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಪುಗ್ಗಲೋ ಅನಾಗಾಮಿಮಗ್ಗೇನ ಕಾಮರಾಗಬ್ಯಾಪಾದಂ, ಸೋ ಚ ಮಗ್ಗೋ ನಿಯ್ಯಾನಿಕೋ ಖಯಗಾಮೀ ಬೋಧಗಾಮೀ ಅಪಚಯಗಾಮೀ ಅನಾಸವೋ…ಪೇ॰… ಅಸಂಕಿಲೇಸಿಯೋತಿ? ಆಮನ್ತಾ। ಜಹತಿ ಪುಥುಜ್ಜನೋ ರೂಪಾವಚರೇನ ಮಗ್ಗೇನ ಕಾಮರಾಗಬ್ಯಾಪಾದಂ, ಸೋ ಚ ಮಗ್ಗೋ ನಿಯ್ಯಾನಿಕೋ ಖಯಗಾಮೀ ಬೋಧಗಾಮೀ ಅಪಚಯಗಾಮೀ ಅನಾಸವೋ…ಪೇ॰… ಅಸಂಕಿಲೇಸಿಯೋತಿ? ನ ಹೇವಂ ವತ್ತಬ್ಬೇ…ಪೇ॰…।

ಜಹತಿ ಪುಥುಜ್ಜನೋ ರೂಪಾವಚರೇನ ಮಗ್ಗೇನ ಕಾಮರಾಗಬ್ಯಾಪಾದಂ, ಸೋ ಚ ಮಗ್ಗೋ ಅನಿಯ್ಯಾನಿಕೋ ನ ಖಯಗಾಮೀ ನ ಬೋಧಗಾಮೀ ನ ಅಪಚಯಗಾಮೀ ಸಾಸವೋ…ಪೇ॰… ಸಂಕಿಲೇಸಿಯೋತಿ? ಆಮನ್ತಾ। ಜಹತಿ ಅನಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಪುಗ್ಗಲೋ ಅನಾಗಾಮಿಮಗ್ಗೇನ ಕಾಮರಾಗಬ್ಯಾಪಾದಂ, ಸೋ ಚ ಮಗ್ಗೋ ಅನಿಯ್ಯಾನಿಕೋ ನ ಖಯಗಾಮೀ ನ ಬೋಧಗಾಮೀ ನ ಅಪಚಯಗಾಮೀ ಸಾಸವೋ…ಪೇ॰… ಸಂಕಿಲೇಸಿಯೋತಿ? ನ ಹೇವಂ ವತ್ತಬ್ಬೇ…ಪೇ॰…।

೨೮೦. ಪುಥುಜ್ಜನೋ ಕಾಮೇಸು ವೀತರಾಗೋ ಸಹ ಧಮ್ಮಾಭಿಸಮಯಾ ಅನಾಗಾಮಿಫಲೇ ಸಣ್ಠಾತೀತಿ? ಆಮನ್ತಾ। ಅರಹತ್ತೇ ಸಣ್ಠಾತೀತಿ? ನ ಹೇವಂ ವತ್ತಬ್ಬೇ…ಪೇ॰…।

ಪುಥುಜ್ಜನೋ ಕಾಮೇಸು ವೀತರಾಗೋ ಸಹ ಧಮ್ಮಾಭಿಸಮಯಾ ಅನಾಗಾಮಿಫಲೇ ಸಣ್ಠಾತೀತಿ? ಆಮನ್ತಾ। ಅಪುಬ್ಬಂ ಅಚರಿಮಂ ತಯೋ ಮಗ್ಗೇ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ॰…।

ಅಪುಬ್ಬಂ ಅಚರಿಮಂ ತಯೋ ಮಗ್ಗೇ ಭಾವೇತೀತಿ? ಆಮನ್ತಾ। ಅಪುಬ್ಬಂ ಅಚರಿಮಂ ತೀಣಿ ಸಾಮಞ್ಞಫಲಾನಿ ಸಚ್ಛಿಕರೋತೀತಿ? ನ ಹೇವಂ ವತ್ತಬ್ಬೇ…ಪೇ॰…।

ಅಪುಬ್ಬಂ ಅಚರಿಮಂ ತೀಣಿ ಸಾಮಞ್ಞಫಲಾನಿ ಸಚ್ಛಿಕರೋತೀತಿ? ಆಮನ್ತಾ। ತಿಣ್ಣಂ ಫಸ್ಸಾನಂ ತಿಸ್ಸನ್ನಂ ವೇದನಾನಂ ತಿಸ್ಸನ್ನಂ ಸಞ್ಞಾನಂ ತಿಸ್ಸನ್ನಂ ಚೇತನಾನಂ ತಿಣ್ಣಂ ಚಿತ್ತಾನಂ ತಿಸ್ಸನ್ನಂ ಸದ್ಧಾನಂ ತಿಣ್ಣಂ ವೀರಿಯಾನಂ ತಿಸ್ಸನ್ನಂ ಸತೀನಂ ತಿಣ್ಣಂ ಸಮಾಧೀನಂ ತಿಸ್ಸನ್ನಂ ಪಞ್ಞಾನಂ ಸಮೋಧಾನಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ॰…।

ಪುಥುಜ್ಜನೋ ಕಾಮೇಸು ವೀತರಾಗೋ ಸಹ ಧಮ್ಮಾಭಿಸಮಯಾ ಅನಾಗಾಮಿಫಲೇ ಸಣ್ಠಾತೀತಿ? ಆಮನ್ತಾ। ಸೋತಾಪತ್ತಿಮಗ್ಗೇನಾತಿ? ನ ಹೇವಂ ವತ್ತಬ್ಬೇ…ಪೇ॰…।

ಸಕದಾಗಾಮಿಮಗ್ಗೇನಾತಿ? ನ ಹೇವಂ ವತ್ತಬ್ಬೇ। ಕತಮೇನ ಮಗ್ಗೇನಾತಿ? ಅನಾಗಾಮಿಮಗ್ಗೇನಾತಿ। ಅನಾಗಾಮಿಮಗ್ಗೇನ ಸಕ್ಕಾಯದಿಟ್ಠಿಂ ವಿಚಿಕಿಚ್ಛಂ ಸೀಲಬ್ಬತಪರಾಮಾಸಂ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ॰…।

೨. ಸುತ್ತಾಹರಣಕಥಾ

೨೮೧. ಅನಾಗಾಮಿಮಗ್ಗೇನ ಸಕ್ಕಾಯದಿಟ್ಠಿಂ ವಿಚಿಕಿಚ್ಛಂ ಸೀಲಬ್ಬತಪರಾಮಾಸಂ ಜಹತೀತಿ? ಆಮನ್ತಾ। ನನು ತಿಣ್ಣಂ ಸಂಯೋಜನಾನಂ ಪಹಾನಾ ಸೋತಾಪತ್ತಿಫಲಂ ವುತ್ತಂ ಭಗವತಾತಿ? ಆಮನ್ತಾ। ಹಞ್ಚಿ ತಿಣ್ಣಂ ಸಂಯೋಜನಾನಂ ಪಹಾನಾ ಸೋತಾಪತ್ತಿಫಲಂ ವುತ್ತಂ ಭಗವತಾ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗಾಮಿಮಗ್ಗೇನ ಸಕ್ಕಾಯದಿಟ್ಠಿಂ ವಿಚಿಕಿಚ್ಛಂ ಸೀಲಬ್ಬತಪರಾಮಾಸಂ ಜಹತೀ’’ತಿ। ಅನಾಗಾಮಿಮಗ್ಗೇನ ಓಳಾರಿಕಂ ಕಾಮರಾಗಂ ಓಳಾರಿಕಂ ಬ್ಯಾಪಾದಂ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ॰…।

ಅನಾಗಾಮಿಮಗ್ಗೇನ ಓಳಾರಿಕಂ ಕಾಮರಾಗಂ ಓಳಾರಿಕಂ ಬ್ಯಾಪಾದಂ ಜಹತೀತಿ? ಆಮನ್ತಾ। ನನು ಕಾಮರಾಗಬ್ಯಾಪಾದಾನಂ ತನುಭಾವಾ ಸಕದಾಗಾಮಿಫಲಂ ವುತ್ತಂ ಭಗವತಾತಿ? ಆಮನ್ತಾ। ಹಞ್ಚಿ ಕಾಮರಾಗಬ್ಯಾಪಾದಾನಂ ತನುಭಾವಾ ಸಕದಾಗಾಮಿಫಲಂ ವುತ್ತಂ ಭಗವತಾ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗಾಮಿಮಗ್ಗೇನ ಓಳಾರಿಕಂ ಕಾಮರಾಗಂ ಓಳಾರಿಕಂ ಬ್ಯಾಪಾದಂ ಜಹತೀ’’ತಿ।

ಪುಥುಜ್ಜನೋ ಕಾಮೇಸು ವೀತರಾಗೋ ಸಹ ಧಮ್ಮಾಭಿಸಮಯಾ ಅನಾಗಾಮಿಫಲೇ ಸಣ್ಠಾತೀತಿ? ಆಮನ್ತಾ। ಯೇ ಕೇಚಿ ಧಮ್ಮಂ ಅಭಿಸಮೇನ್ತಿ, ಸಬ್ಬೇ ತೇ ಸಹ ಧಮ್ಮಾಭಿಸಮಯಾ ಅನಾಗಾಮಿಫಲೇ ಸಣ್ಠಹನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰…।

ನ ವತ್ತಬ್ಬಂ – ‘‘ಜಹತಿ ಪುಥುಜ್ಜನೋ ಕಾಮರಾಗಬ್ಯಾಪಾದ’’ನ್ತಿ? ಆಮನ್ತಾ। ನನು ವುತ್ತಂ ಭಗವತಾ –

‘‘ಅಹೇಸುಂ ತೇ ಅಹಿಂಸಕಾ (ಅ॰ ನಿ॰ ೬.೫೪) ಅತೀತಂಸೇ, ಛ ಸತ್ಥಾರೋ ಯಸಸ್ಸಿನೋ।

ನಿರಾಮಗನ್ಧಾ ಕರುಣೇಧಿಮುತ್ತಾ ಕರುಣಾಧಿಮುತ್ತಾ (ಸೀ॰ ಕ॰), ಕಾಮಸಂಯೋಜನಾತಿಗಾ॥

‘‘ಕಾಮರಾಗಂ ವಿರಾಜೇತ್ವಾ, ಬ್ರಹ್ಮಲೋಕೂಪಗಾ ಅಹು।

ಅಹೇಸುಂ ಸಾವಕಾ ತೇಸಂ, ಅನೇಕಾನಿ ಸತಾನಿಪಿ॥

‘‘ನಿರಾಮಗನ್ಧಾ ಕರುಣೇಧಿಮುತ್ತಾ, ಕಾಮಸಂಯೋಜನಾತಿಗಾ।

ಕಾಮರಾಗಂ ವಿರಾಜೇತ್ವಾ, ಬ್ರಹ್ಮಲೋಕೂಪಗಾ ಅಹೂ’’ತಿ ಅ॰ ನಿ॰ ೬.೫೪॥

ಅತ್ಥೇವ ಸುತ್ತನ್ತೋತಿ? ಆಮನ್ತಾ। ತೇನ ಹಿ ಜಹತಿ ಪುಥುಜ್ಜನೋ ಕಾಮರಾಗಬ್ಯಾಪಾದನ್ತಿ।

ಜಹತಿ ಪುಥುಜ್ಜನೋ ಕಾಮರಾಗಬ್ಯಾಪಾದನ್ತಿ? ಆಮನ್ತಾ। ನನು ವುತ್ತಂ ಭಗವತಾ – ‘‘ಸೋ ಹಿ ನಾಮ, ಭಿಕ್ಖವೇ, ಸುನೇತ್ತೋ ಸತ್ಥಾ ಏವಂ ದೀಘಾಯುಕೋ ಸಮಾನೋ ಏವಂ ಚಿರಟ್ಠಿತಿಕೋ ಅಪರಿಮುತ್ತೋ ಅಹೋಸಿ ಜಾತಿಯಾ ಜರಾಯ ಮರಣೇನ ಸೋಕೇಹಿ ಪರಿದೇವೇಹಿ ದುಕ್ಖೇಹಿ ದೋಮನಸ್ಸೇಹಿ ಉಪಾಯಾಸೇಹಿ ಅಪರಿಮುತ್ತೋ ದುಕ್ಖಸ್ಮಾತಿ ವದಾಮಿ। ತಂ ಕಿಸ್ಸ ಹೇತು? ಚತುನ್ನಂ ಧಮ್ಮಾನಂ ಅನನುಬೋಧಾ ಅಪ್ಪಟಿವೇಧಾ। ಕತಮೇಸಂ ಚತುನ್ನಂ? ಅರಿಯಸ್ಸ ಸೀಲಸ್ಸ ಅನನುಬೋಧಾ ಅಪ್ಪಟಿವೇಧಾ, ಅರಿಯಸ್ಸ ಸಮಾಧಿಸ್ಸ, ಅರಿಯಾಯ ಪಞ್ಞಾಯ, ಅರಿಯಾಯ ವಿಮುತ್ತಿಯಾ ಅನನುಬೋಧಾ ಅಪ್ಪಟಿವೇಧಾ। ತಯಿದಂ, ಭಿಕ್ಖವೇ, ಅರಿಯಂ ಸೀಲಂ ಅನುಬುದ್ಧಂ ಪಟಿವಿದ್ಧಂ, ಅರಿಯೋ ಸಮಾಧಿ ಅನುಬುದ್ಧೋ ಪಟಿವಿದ್ಧೋ, ಅರಿಯಾ ಪಞ್ಞಾ ಅನುಬುದ್ಧಾ ಪಟಿವಿದ್ಧಾ, ಅರಿಯಾ ವಿಮುತ್ತಿ ಅನುಬುದ್ಧಾ ಪಟಿವಿದ್ಧಾ, ಉಚ್ಛಿನ್ನಾ ಭವತಣ್ಹಾ, ಖೀಣಾ ಭವನೇತ್ತಿ, ನತ್ಥಿ ದಾನಿ ಪುನಬ್ಭವೋತಿ।

‘‘ಸೀಲಂ ಸಮಾಧಿ ಪಞ್ಞಾ ಚ, ವಿಮುತ್ತಿ ಚ ಅನುತ್ತರಾ।

ಅನುಬುದ್ಧಾ ಇಮೇ ಧಮ್ಮಾ, ಗೋತಮೇನ ಯಸಸ್ಸಿನಾ॥

‘‘ಇತಿ ಬುದ್ಧೋ ಅಭಿಞ್ಞಾಯ, ಧಮ್ಮಮಕ್ಖಾಸಿ ಭಿಕ್ಖುನಂ।

ದುಕ್ಖಸ್ಸನ್ತಕರೋ ಸತ್ಥಾ, ಚಕ್ಖುಮಾ ಪರಿನಿಬ್ಬುತೋ’’ತಿ ಅ॰ ನಿ॰ ೭.೬೬॥

ಅತ್ಥೇವ ಸುತ್ತನ್ತೋತಿ? ಆಮನ್ತಾ। ತೇನ ಹಿ ನ ವತ್ತಬ್ಬಂ – ‘‘ಜಹತಿ ಪುಥುಜ್ಜನೋ ಕಾಮರಾಗಬ್ಯಾಪಾದ’’ನ್ತಿ।

ಜಹತಿಕಥಾ ನಿಟ್ಠಿತಾ।