೧೪. ಚುದ್ದಸಮೋ ಪರಿಚ್ಛೇದೋ

ರೂಪಾವಚರಸಮಾಧಿಭಾವನಾನಿದ್ದೇಸೋ

೭೮೯.

ಭಾವನಾನಯಮಹಂ ಹಿತಾನಯಂ,

ಮಾನಯಞ್ಚ ಸುಗತಂ ಸುಖಾನಯಂ।

ಬ್ಯಾಕರೋಮಿ ಪರಮಂ ಇತೋ ಪರಂ,

ತಂ ಸುಣಾಥ ಮಧುರತ್ಥವಣ್ಣನಂ॥

೭೯೦.

ಉತ್ತರಂ ತು ಮನುಸ್ಸಾನಂ, ಧಮ್ಮತೋ ಞಾಣದಸ್ಸನಂ।

ಪತ್ತುಕಾಮೇನ ಕಾತಬ್ಬಂ, ಆದಿತೋ ಸೀಲಸೋಧನಂ॥

೭೯೧.

ಸಙ್ಕಸ್ಸರಸಮಾಚಾರೇ, ದುಸ್ಸೀಲೇ ಸೀಲವಜ್ಜಿತೇ।

ನತ್ಥಿ ಝಾನಂ ಕುತೋ ಮಗ್ಗೋ, ತಸ್ಮಾ ಸೀಲಂ ವಿಸೋಧಯೇ॥

೭೯೨.

ಸೀಲಂ ಚಾರಿತ್ತವಾರಿತ್ತವಸೇನ ದುವಿಧಂ ಮತಂ।

ತಂ ಪನಾಚ್ಛಿದ್ದಮಕ್ಖಣ್ಡಮಕಮ್ಮಾಸಮನಿನ್ದಿತಂ॥

೭೯೩.

ಕತ್ತಬ್ಬಂ ಅತ್ಥಕಾಮೇನ, ವಿವೇಕಸುಖಮಿಚ್ಛತಾ।

ಸೀಲಞ್ಚ ನಾಮ ಭಿಕ್ಖೂನಂ, ಅಲಙ್ಕಾರೋ ಅನುತ್ತರೋ॥

೭೯೪.

ರತನಂ ಸರಣಂ ಖೇಮಂ, ತಾಣಂ ಲೇಣಂ ಪರಾಯಣಂ।

ಚಿನ್ತಾಮಣಿ ಪಣೀತೋ ಚ, ಸೀಲಂ ಯಾನಮನುತ್ತರಂ॥

೭೯೫.

ಸೀತಲಂ ಸಲಿಲಂ ಸೀಲಂ, ಕಿಲೇಸಮಲಧೋವನಂ।

ಗುಣಾನಂ ಮೂಲಭೂತಞ್ಚ, ದೋಸಾನಂ ಬಲಘಾತಿ ಚ॥

೭೯೬.

ತಿದಿವಾರೋಹಣಞ್ಚೇತಂ, ಸೋಪಾನಂ ಪರಮುತ್ತಮಂ।

ಮಗ್ಗೋ ಖೇಮೋ ಚ ನಿಬ್ಬಾನನಗರಸ್ಸ ಪವೇಸನೇ॥

೭೯೭.

ತಸ್ಮಾ ಸುಪರಿಸುದ್ಧಂ ತಂ, ಸೀಲಂ ದುವಿಧಲಕ್ಖಣಂ।

ಕತ್ತಬ್ಬಂ ಅತ್ಥಕಾಮೇನ, ಪಿಯಸೀಲೇನ ಭಿಕ್ಖುನಾ॥

೭೯೮.

ಕಾತಬ್ಬೋ ಪನ ಸೀಲಸ್ಮಿಂ, ಪರಿಸುದ್ಧೇ ಠಿತೇನಿಧ।

ಪಲಿಬೋಧಸ್ಸುಪಚ್ಛೇದೋ, ಪಲಿಬೋಧಾ ದಸಾಹು ಚ॥

೭೯೯.

‘‘ಆವಾಸೋ ಚ ಕುಲಂ ಲಾಭೋ,

ಗಣೋ ಕಮ್ಮಞ್ಚ ಪಞ್ಚಮಂ।

ಅದ್ಧಾನಂ ಞಾತಿ ಆಬಾಧೋ,

ಗನ್ಥೋ ಇದ್ಧೀತಿ ತೇ ದಸಾ’’ತಿ॥

೮೦೦.

ಪಲಿಬೋಧಸ್ಸುಪಚ್ಛೇದಂ, ಕತ್ವಾ ದಸವಿಧಸ್ಸಪಿ।

ಉಪಸಙ್ಕಮಿತಬ್ಬೋ ಸೋ, ಕಮ್ಮಟ್ಠಾನಸ್ಸ ದಾಯಕೋ॥

೮೦೧.

ಪಿಯೋ ಗರು ಭಾವನೀಯೋ, ವತ್ತಾ ಚ ವಚನಕ್ಖಮೋ।

ಗಮ್ಭೀರಞ್ಚ ಕಥಂ ಕತ್ತಾ, ನೋ ಚಟ್ಠಾನೇ ನಿಯೋಜಕೋ॥

೮೦೨.

ಏವಮಾದಿಗುಣೋಪೇತಮುಪಗನ್ತ್ವಾ ಹಿತೇಸಿನಂ।

ಕಲ್ಯಾಣಮಿತ್ತಂ ಕಾಲೇನ, ಕಮ್ಮಟ್ಠಾನಸ್ಸ ದಾಯಕಂ॥

೮೦೩.

ಕಮ್ಮಟ್ಠಾನಂ ಗಹೇತಬ್ಬಂ, ವತ್ತಂ ಕತ್ವಾ ಪನಸ್ಸ ತು।

ತೇನಾಪಿ ಚರಿತಂ ಞತ್ವಾ, ದಾತಬ್ಬಂ ತಸ್ಸ ಭಿಕ್ಖುನೋ॥

೮೦೪.

ಚರಿತಂ ಪನಿದಂ ರಾಗದೋಸಮೋಹವಸೇನ ಚ।

ಸದ್ಧಾಬುದ್ಧಿವಿತಕ್ಕಾನಂ, ವಸೇನ ಛಬ್ಬಿಧಂ ಮತಂ॥

೮೦೫.

ವೋಮಿಸ್ಸಕನಯಾ ತೇಸಂ, ಚತುಸಟ್ಠಿ ಭವನ್ತಿ ತೇ।

ತೇಹಿ ಅತ್ಥೋ ನ ಚತ್ಥೀತಿ, ನ ಮಯಾ ಇಧ ದಸ್ಸಿತಾ॥

೮೦೬.

ಅಸುಭಾ ಚ ದಸೇವೇತ್ಥ, ತಥಾ ಕಾಯಗತಾಸತಿ।

ಏಕಾದಸ ಇಮೇ ರಾಗ-ಚರಿತಸ್ಸಾನುಕೂಲತಾ॥

೮೦೭.

ಚತಸ್ಸೋ ಅಪ್ಪಮಞ್ಞಾಯೋ, ಸವಣ್ಣಕಸಿಣಾ ಇಮೇ।

ಅಟ್ಠೇವ ಚ ಸದಾ ದೋಸ-ಚರಿತಸ್ಸಾನುಕೂಲತಾ॥

೮೦೮.

ತಂ ಮೋಹಚರಿತಸ್ಸೇತ್ಥ, ವಿತಕ್ಕಚರಿತಸ್ಸ ಚ।

ಅನುಕೂಲನ್ತಿ ನಿದ್ದಿಟ್ಠಂ, ಆನಾಪಾನಂ ಪನೇಕಕಂ॥

೮೦೯.

ಪುರಿಮಾನುಸ್ಸತಿಛಕ್ಕಂ, ಸದ್ಧಾಚರಿತದೇಹಿನೋ।

ಮರಣೂಪಸಮಾಯುತ್ತಾ, ಸತಿಮಾಹಾರನಿಸ್ಸಿತಾ॥

೮೧೦.

ಸಞ್ಞಾ ಧಾತುವವತ್ಥಾನಂ, ಬುದ್ಧಿಪ್ಪಕತಿಜನ್ತುನೋ।

ಇಮೇ ಪನ ಚ ಚತ್ತಾರೋ, ಅನುಕೂಲಾತಿ ದೀಪಿತಾ॥

೮೧೧.

ಚತ್ತಾರೋಪಿ ಚ ಆರುಪ್ಪಾ, ಸೇಸಾನಿ ಕಸಿಣಾನಿ ಚ।

ಅನುಕೂಲಾ ಇಮೇ ಸಬ್ಬ-ಚರಿತಾನನ್ತಿ ವಣ್ಣಿತಾ॥

೮೧೨.

ಇದಂ ಸಬ್ಬಂ ಪನೇಕನ್ತ-ವಿಪಚ್ಚನೀಕಭಾವತೋ।

ಅತಿಸಪ್ಪಾಯತೋ ವುತ್ತ-ಮಿತಿ ಞೇಯ್ಯಂ ವಿಭಾವಿನಾ॥

೮೧೩.

ಕಮ್ಮಟ್ಠಾನಾನಿ ಸಬ್ಬಾನಿ, ಚತ್ತಾಲೀಸಾತಿ ನಿದ್ದಿಸೇ।

ಕಸಿಣಾನಿ ದಸ ಚೇವ, ಅಸುಭಾನುಸ್ಸತೀ ದಸ॥

೮೧೪.

ಚತಸ್ಸೋ ಅಪ್ಪಮಞ್ಞಾಯೋ, ಚತ್ತಾರೋ ಚ ಅರೂಪಿನೋ।

ಚತುಧಾತುವವತ್ಥಾನಂ, ಸಞ್ಞಾ ಚಾಹಾರತಾ ಇತಿ॥

೮೧೫.

ಕಮ್ಮಟ್ಠಾನೇಸು ಏತೇಸು, ಉಪಚಾರವಹಾ ಕತಿ।

ಆನಾಪಾನಸತಿಂ ಕಾಯ-ಗತಂ ಹಿತ್ವಾ ಪನಟ್ಠಪಿ॥

೮೧೬.

ಸೇಸಾನುಸ್ಸತಿಯೋ ಸಞ್ಞಾ, ವವತ್ಥಾನನ್ತಿ ತೇರಸ।

ಉಪಚಾರವಹಾ ವುತ್ತಾ, ಸೇಸಾ ತೇ ಅಪ್ಪನಾವಹಾ॥

೮೧೭.

ಅಪ್ಪನಾಯಾವಹೇಸ್ವೇತ್ಥ, ಕಸಿಣಾನಿ ದಸಾಪಿ ಚ।

ಆನಾಪಾನಸತೀ ಚೇವ, ಚತುಕ್ಕಜ್ಝಾನಿಕಾ ಇಮೇ॥

೮೧೮.

ಅಸುಭಾನಿ ದಸ ಚೇತ್ಥ, ತಥಾ ಕಾಯಗತಾಸತಿ।

ಏಕಾದಸ ಇಮೇ ಧಮ್ಮಾ, ಪಠಮಜ್ಝಾನಿಕಾ ಸಿಯುಂ॥

೮೧೯.

ಆದಿಬ್ರಹ್ಮವಿಹಾರಾತಿ , ತಿಕಜ್ಝಾನವಹಾ ತಯೋ।

ಚತುತ್ಥಾಪಿ ಚ ಆರುಪ್ಪಾ, ಚತುತ್ಥಜ್ಝಾನಿಕಾ ಮತಾ॥

೮೨೦.

ವಸೇನಾರಮ್ಮಣಙ್ಗಾನಂ, ದುವಿಧೋ ಸಮತಿಕ್ಕಮೋ।

ಗೋಚರಾತಿಕ್ಕಮಾರೂಪೇ, ರೂಪೇ ಝಾನಙ್ಗತಿಕ್ಕಮೋ॥

೮೨೧.

ದಸೇವ ಕಸಿಣಾನೇತ್ಥ, ವಡ್ಢೇತಬ್ಬಾನಿ ಹೋನ್ತಿ ಹಿ।

ನ ಚ ವಡ್ಢನಿಯಾ ಸೇಸಾ, ಭವನ್ತಿ ಅಸುಭಾದಯೋ॥

೮೨೨.

ದಸೇವ ಕಸಿಣಾನೇತ್ಥ, ಅಸುಭಾನಿ ದಸಾಪಿ ಚ।

ಆನಾಪಾನಸತೀ ಚೇವ, ತಥಾ ಕಾಯಗತಾಸತಿ॥

೮೨೩.

ಪಟಿಭಾಗನಿಮಿತ್ತಾನಿ , ಹೋನ್ತಿ ಆರಮ್ಮಣಾನಿ ಹಿ।

ಸೇಸಾನೇವ ಪಟಿಭಾಗ-ನಿಮಿತ್ತಾರಮ್ಮಣಾ ಸಿಯುಂ॥

೮೨೪.

ಅಸುಭಾನಿ ದಸಾಹಾರ-ಸಞ್ಞಾ ಕಾಯಗತಾಸತಿ।

ದೇವೇಸು ನಪ್ಪವತ್ತನ್ತಿ, ದ್ವಾದಸೇತಾನಿ ಸಬ್ಬದಾ॥

೮೨೫.

ತಾನಿ ದ್ವಾದಸ ಚೇತಾನಿ, ಆನಾಪಾನಸತೀಪಿ ಚ।

ತೇರಸೇವ ಪನೇತಾನಿ, ಬ್ರಹ್ಮಲೋಕೇ ನ ವಿಜ್ಜರೇ॥

೮೨೬.

ಠಪೇತ್ವಾ ಚತುರಾರೂಪೇ, ನತ್ಥಿ ಕಿಞ್ಚಿ ಅರೂಪಿಸು।

ಮನುಸ್ಸಲೋಕೇ ಸಬ್ಬಾನಿ, ಪವತ್ತನ್ತಿ ನ ಸಂಸಯೋ॥

೮೨೭.

ಚತುತ್ಥಂ ಕಸಿಣಂ ಹಿತ್ವಾ, ಕಸಿಣಾ ಅಸುಭಾನಿ ಚ।

ದಿಟ್ಠೇನೇವ ಗಹೇತಬ್ಬಾ, ಇಮೇ ಏಕೂನವೀಸತಿ॥

೮೨೮.

ಸತಿಯಮ್ಪಿ ಚ ಕಾಯಮ್ಹಿ, ದಿಟ್ಠೇನ ತಚಪಞ್ಚಕಂ।

ಸೇಸಮೇತ್ಥ ಸುತೇನೇವ, ಗಹೇತಬ್ಬನ್ತಿ ದೀಪಿತಂ॥

೮೨೯.

ಆನಾಪಾನಸತೀ ಏತ್ಥ, ಫುಟ್ಠೇನ ಪರಿದೀಪಿತಾ।

ವಾಯೋಕಸಿಣಮೇವೇತ್ಥ, ದಿಟ್ಠಫುಟ್ಠೇನ ಗಯ್ಹತಿ॥

೮೩೦.

ಸುತೇನೇವ ಗಹೇತಬ್ಬಾ, ಸೇಸಾ ಅಟ್ಠಾರಸಾಪಿ ಚ।

ಉಪೇಕ್ಖಾ ಅಪ್ಪಮಞ್ಞಾ ಚ, ಅರೂಪಾ ಚೇವ ಪಞ್ಚಿಮೇ॥

೮೩೧.

ಆದಿತೋವ ಗಹೇತಬ್ಬಾ, ನ ಹೋನ್ತೀತಿ ಪಕಾಸಿತಾ।

ಪಞ್ಚತಿಂಸಾವಸೇಸಾನಿ, ಗಹೇತಬ್ಬಾನಿ ಆದಿತೋ॥

೮೩೨.

ಕಮ್ಮಟ್ಠಾನೇಸು ಹೇತೇಸು, ಆಕಾಸಕಸಿಣಂ ವಿನಾ।

ಕಸಿಣಾ ನವ ಹೋನ್ತೇ ಚ, ಅರೂಪಾನಂ ತು ಪಚ್ಚಯಾ॥

೮೩೩.

ದಸಾಪಿ ಕಸಿಣಾ ಹೋನ್ತಿ, ಅಭಿಞ್ಞಾನಂ ತು ಪಚ್ಚಯಾ।

ತಯೋ ಬ್ರಹ್ಮವಿಹಾರಾಪಿ, ಚತುಕ್ಕಸ್ಸ ಭವನ್ತಿ ತು॥

೮೩೪.

ಹೇಟ್ಠಿಮಂ ಹೇಟ್ಠಿಮಾರುಪ್ಪಂ, ಉಪರೂಪರಿಮಸ್ಸ ಹಿ।

ತಥಾ ಚತುತ್ಥಮಾರುಪ್ಪಂ, ನಿರೋಧಸ್ಸಾತಿ ದೀಪಿತಂ॥

೮೩೫.

ಸಬ್ಬಾನಿ ಚ ಪನೇತಾನಿ, ಚತ್ತಾಲೀಸವಿಧಾನಿ ತು।

ವಿಪಸ್ಸನಾಭವಸಮ್ಪತ್ತಿ-ಸುಖಾನಂ ಪಚ್ಚಯಾ ಸಿಯುಂ॥

೮೩೬.

ಕಮ್ಮಟ್ಠಾನಂ ಗಹೇತ್ವಾನ, ಆಚರಿಯಸ್ಸ ಸನ್ತಿಕೇ।

ವಸನ್ತಸ್ಸ ಕಥೇತಬ್ಬಂ, ಆಗತಸ್ಸಾಗತಕ್ಖಣೇ॥

೮೩೭.

ಉಗ್ಗಹೇತ್ವಾ ಪನಞ್ಞತ್ರ, ಗನ್ತುಕಾಮಸ್ಸ ಭಿಕ್ಖುನೋ।

ನಾತಿಸಙ್ಖೇಪವಿತ್ಥಾರಂ, ಕಥೇತಬ್ಬಂ ತು ತೇನಪಿ॥

೮೩೮.

ಕಮ್ಮಟ್ಠಾನಂ ಗಹೇತ್ವಾನ, ಸಮ್ಮಟ್ಠಾನಂ ಮನೋಭುನೋ।

ಅಟ್ಠಾರಸಹಿ ದೋಸೇಹಿ, ನಿಚ್ಚಂ ಪನ ವಿವಜ್ಜಿತೇ॥

೮೩೯.

ಅನುರೂಪೇ ವಿಹಾರಸ್ಮಿಂ, ವಿಹಾತಬ್ಬಂ ತು ಗಾಮತೋ।

ನಾತಿದೂರೇ ನಚ್ಚಾಸನ್ನೇ, ಸಿವೇ ಪಞ್ಚಙ್ಗಸಂಯುತೇ॥

೮೪೦.

ಖುದ್ದಕೋ ಪಲಿಬೋಧೋಪಿ, ಛಿನ್ದಿತಬ್ಬೋ ಪನತ್ಥಿ ಚೇ।

ದೀಘಾ ಕೇಸಾ ನಖಾ ಲೋಮಾ, ಛಿನ್ದಿತಬ್ಬಾ ವಿಭಾವಿನಾ॥

೮೪೧.

ಚೀವರಂ ರಜಿತಬ್ಬಂ ತಂ, ಕಿಲಿಟ್ಠಂ ತು ಸಚೇ ಸಿಯಾ।

ಸಚೇ ಪತ್ತೇ ಮಲಂ ಹೋತಿ, ಪಚಿತಬ್ಬೋವ ಸುಟ್ಠು ಸೋ॥

೮೪೨.

ಅಚ್ಛಿನ್ನಪಲಿಬೋಧೇನ , ಪಚ್ಛಾ ತೇನ ಚ ಭಿಕ್ಖುನಾ।

ಪವಿವಿತ್ತೇ ಪನೋಕಾಸೇ, ವಸನ್ತೇನ ಯಥಾಸುಖಂ॥

೮೪೩.

ವಜ್ಜೇತ್ವಾ ಮತ್ತಿಕಂ ನೀಲಂ, ಪೀತಂ ಸೇತಞ್ಚ ಲೋಹಿತಂ।

ಸಣ್ಹಾಯಾರುಣವಣ್ಣಾಯ, ಮತ್ತಿಕಾಯ ಮನೋರಮಂ॥

೮೪೪.

ಕತ್ತಬ್ಬಂ ಕಸಿಣಜ್ಝಾನಂ, ಪತ್ತುಕಾಮೇನ ಧೀಮತಾ।

ಸೇನಾಸನೇ ವಿವಿತ್ತಸ್ಮಿಂ, ಬಹಿದ್ಧಾ ವಾಪಿ ತಾದಿಸೇ॥

೮೪೫.

ಪಟಿಚ್ಛನ್ನೇ ಪನಟ್ಠಾನೇ, ಪಬ್ಭಾರೇ ವಾ ಗುಹನ್ತರೇ।

ಸಂಹಾರಿಮಂ ವಾ ಕಾತಬ್ಬಂ, ತಂ ತತ್ರಟ್ಠಕಮೇವ ವಾ॥

೮೪೬.

ಸಂಹಾರಿಮಂ ಕರೋನ್ತೇನ, ದಣ್ಡಕೇಸು ಚತೂಸ್ವಪಿ।

ಚಮ್ಮಂ ವಾ ಕಟಸಾರಂ ವಾ, ದುಸ್ಸಪತ್ತಮ್ಪಿ ವಾ ತಥಾ॥

೮೪೭.

ಬನ್ಧಿತ್ವಾ ತಥಾ ಕಾತಬ್ಬಂ, ಮತ್ತಿಕಾಯ ಪಮಾಣತೋ।

ಭೂಮಿಯಂ ಪತ್ಥರಿತ್ವಾ ಚ, ಓಲೋಕೇತಬ್ಬಮೇವ ತಂ॥

೮೪೮.

ತತ್ರಟ್ಠಂ ಭೂಮಿಯಂ ವಟ್ಟಂ, ಆಕೋಟಿತ್ವಾನ ಖಾಣುಕೇ।

ವಲ್ಲೀಹಿ ತಂ ವಿನನ್ಧಿತ್ವಾ, ಕಾತಬ್ಬಂ ಕಣ್ಣಿಕಂ ಸಮಂ॥

೮೪೯.

ವಿತ್ಥಾರತೋ ಪಮಾಣೇನ, ವಿದತ್ಥಿಚತುರಙ್ಗುಲಂ।

ವಟ್ಟಂ ವತ್ತತಿ ತಂ ಕಾತುಂ, ವಿವಟ್ಟಂ ಪನ ಮಿಚ್ಛತಾ॥

೮೫೦.

ಭೇರೀತಲಸಮಂ ಸಾಧು, ಕತ್ವಾ ಕಸಿಣಮಣ್ಡಲಂ।

ಸಮ್ಮಜ್ಜಿತ್ವಾನ ತಂ ಠಾನಂ, ನ್ಹತ್ವಾ ಆಗಮ್ಮ ಪಣ್ಡಿತೋ॥

೮೫೧.

ಹತ್ಥಪಾಸಪಮಾಣಸ್ಮಿಂ, ತಮ್ಹಾ ಕಸಿಣಮಣ್ಡಲಾ।

ಪದೇಸೇ ತು ಸುಪಞ್ಞತ್ತೇ, ಆಸನಸ್ಮಿಂ ಸುಅತ್ಥತೇ॥

೮೫೨.

ಉಚ್ಚೇ ತತ್ಥ ನಿಸೀದಿತ್ವಾ, ವಿದತ್ಥಿಚತುರಙ್ಗುಲೇ।

ಉಜುಕಾಯಂ ಪಣಿಧಾಯ, ಕತ್ವಾ ಪರಿಮುಖಂ ಸತಿಂ॥

೮೫೩.

ಕಾಮೇಸ್ವಾದೀನವಂ ದಿಸ್ವಾ, ನೇಕ್ಖಮ್ಮಂ ದಟ್ಠು ಖೇಮತೋ।

ಪರಮಂ ಪೀತಿಪಾಮೋಜ್ಜಂ, ಜನೇತ್ವಾ ರತನತ್ತಯೇ॥

೮೫೪.

‘‘ಭಾಗೀ ಅಸ್ಸಮಹಂ ಅದ್ಧಾ, ಇಮಾಯ ಪಟಿಪತ್ತಿಯಾ।

ಪವಿವೇಕಸುಖಸ್ಸಾ’’ತಿ, ಕತ್ವಾ ಉಸ್ಸಾಹಮುತ್ತಮಂ॥

೮೫೫.

ಆಕಾರೇನ ಸಮೇನೇವ, ಉಮ್ಮೀಲಿತ್ವಾನ ಲೋಚನಂ।

ನಿಮಿತ್ತಂ ಗಣ್ಹತಾ ಸಾಧು, ಭಾವೇತಬ್ಬಂ ಪುನಪ್ಪುನಂ॥

೮೫೬.

ನ ವಣ್ಣೋ ಪೇಕ್ಖಿತಬ್ಬೋ ಸೋ, ದಟ್ಠಬ್ಬಂ ನ ಚ ಲಕ್ಖಣಂ।

ವಣ್ಣಂ ಪನ ಅಮುಞ್ಚಿತ್ವಾ, ಉಸ್ಸದಸ್ಸ ವಸೇನ ಹಿ॥

೮೫೭.

ಚಿತ್ತಂ ಪಣ್ಣತ್ತಿಧಮ್ಮಸ್ಮಿಂ, ಠಪೇತ್ವೇಕಗ್ಗಮಾನಸೋ।

‘‘ಪಥವೀ ಪಥವಿ’’ಚ್ಚೇವಂ, ವತ್ವಾ ಭಾವೇಯ್ಯ ಪಣ್ಡಿತೋ॥

೮೫೮.

ಪಥವೀ ಮೇದನೀ ಭೂಮಿ, ವಸುಧಾ ಚ ವಸುನ್ಧರಾ।

ಏವಂ ಪಥವಿನಾಮೇಸು, ಏಕಂ ವತ್ತುಮ್ಪಿ ವಟ್ಟತಿ॥

೮೫೯.

ಉಮ್ಮೀಲಿತ್ವಾ ನಿಮೀಲಿತ್ವಾ, ಆವಜ್ಜೇಯ್ಯ ಪುನಪ್ಪುನಂ।

ಯಾವುಗ್ಗಹನಿಮಿತ್ತಂ ತು, ನುಪ್ಪಜ್ಜತಿ ಚ ತಾವ ಸೋ॥

೮೬೦.

ಏವಂ ಭಾವಯತೋ ತಸ್ಸ, ಪುನ ಏಕಗ್ಗಚೇತಸೋ।

ಯದಾ ಪನ ನಿಮೀಲೇತ್ವಾ, ಆವಜ್ಜನ್ತಸ್ಸ ಯೋಗಿನೋ॥

೮೬೧.

ಯಥಾ ಉಮ್ಮೀಲಿತೇಕಾಲೇ, ತಥಾಪಾಥಂ ತು ಯಾತಿ ಚೇ।

ತದುಗ್ಗಹನಿಮಿತ್ತಂ ತ-ಮುಪ್ಪನ್ನನ್ತಿ ಪವುಚ್ಚತಿ॥

೮೬೨.

ನಿಮಿತ್ತೇ ಪನ ಸಞ್ಜಾತೇ, ತತೋ ಪಭುತಿ ಯೋಗಿನಾ।

ನಿಸೀದಿತಬ್ಬಂ ನೋ ಚೇವಂ, ತಸ್ಮಿಂ ಠಾನೇ ವಿಜಾನತಾ॥

೮೬೩.

ಅತ್ತನೋ ವಸನಟ್ಠಾನಂ, ಪವಿಸಿತ್ವಾನ ಧೀಮತಾ।

ತೇನ ತತ್ಥ ನಿಸಿನ್ನೇನ, ಭಾವೇತಬ್ಬಂ ಯಥಾಸುಖಂ॥

೮೬೪.

ಪಪಞ್ಚಪರಿಹಾರತ್ಥಂ, ಪಾದಾನಂ ಪನ ಧೋವನೇ।

ತಸ್ಸೇಕತಲಿಕಾ ದ್ವೇ ಚ, ಇಚ್ಛಿತಬ್ಬಾ ಉಪಾಹನಾ॥

೮೬೫.

ಸಮಾಧಿತರುಣೋ ತಸ್ಸ, ಅಸಪ್ಪಾಯೇನ ಕೇನಚಿ।

ಸಚೇ ನಸ್ಸತಿ ತಂ ಠಾನಂ, ಗನ್ತ್ವಾವಾದಾಯ ತಂ ಪನ॥

೮೬೬.

ಪೀಠೇ ಸುಖನಿಸಿನ್ನೇನ, ಭಾವೇತಬ್ಬಂ ಪುನಪ್ಪುನಂ।

ಸಮನ್ನಾಹರಿತಬ್ಬಞ್ಚ, ಕರೇ ತಕ್ಕಾಹತಮ್ಪಿ ಚ॥

೮೬೭.

ನಿಮಿತ್ತಂ ಪನ ತಂ ಹಿತ್ವಾ, ಚಿತ್ತಂ ಧಾವತಿ ಚೇ ಬಹಿ।

ನಿವಾರೇತ್ವಾ ನಿಮಿತ್ತಸ್ಮಿಂ, ಠಪೇತಬ್ಬಂ ತು ಮಾನಸಂ॥

೮೬೮.

ಯತ್ಥ ಯತ್ಥ ನಿಸೀದಿತ್ವಾ, ತಮಿಚ್ಛತಿ ತಪೋಧನೋ।

ತತ್ಥ ತತ್ಥ ದಿವಾರತ್ತಿಂ, ತಸ್ಸುಪಟ್ಠಾತಿ ಚೇತಸೋ॥

೮೬೯.

ಏವಂ ತಸ್ಸ ಕರೋನ್ತಸ್ಸ, ಅನುಪುಬ್ಬೇನ ಯೋಗಿನೋ।

ವಿಕ್ಖಮ್ಭನ್ತಿ ಚ ಸಬ್ಬಾನಿ, ಪಞ್ಚ ನೀವರಣಾನಿಪಿ॥

೮೭೦.

ಸಮಾಧಿಯತಿ ಚಿತ್ತಮ್ಪಿ, ಉಪಚಾರಸಮಾಧಿನಾ।

ಪಟಿಭಾಗನಿಮಿತ್ತಮ್ಪಿ, ಉಪ್ಪಜ್ಜತಿ ಚ ಯೋಗಿನೋ॥

೮೭೧.

ಕೋ ಪನಾಯಂ ವಿಸೇಸೋ ಹಿ, ಇಮಸ್ಸ ಪುರಿಮಸ್ಸ ವಾ।

ಥವಿಕಾ ನೀಹತಾದಾಸ-ಮಣ್ಡಲಂ ವಿಯ ಮಜ್ಜಿತಂ॥

೮೭೨.

ಮೇಘತೋ ವಿಯ ನಿಕ್ಖನ್ತಂ, ಸಮ್ಪುಣ್ಣಚನ್ದಮಣ್ಡಲಂ।

ಪಟಿಭಾಗನಿಮಿತ್ತಂ ತಂ, ಬಲಾಕಾ ವಿಯ ತೋಯದೇ॥

೮೭೩.

ತದುಗ್ಗಹನಿಮಿತ್ತಂ ತಂ, ಪದಾಲೇತ್ವಾವ ನಿಗ್ಗತಂ।

ತತೋಧಿಕತರಂ ಸುದ್ಧಂ, ಹುತ್ವಾಪಟ್ಠಾತಿ ತಸ್ಸ ತಂ॥

೮೭೪.

ತನುಸಣ್ಠಾನವನ್ತಞ್ಚ, ವಣ್ಣವನ್ತಂ ನ ಚೇವ ತಂ।

ಉಪಟ್ಠಾಕಾರಮತ್ತಂ ತಂ, ಪಞ್ಞಜಂ ಭಾವನಾಮಯಂ॥

೮೭೫.

ಪಟಿಭಾಗೇ ಸಮುಪ್ಪನ್ನೇ, ನಿಮಿತ್ತೇ ಭಾವನಾಮಯೇ।

ಹೋನ್ತಿ ವಿಕ್ಖಮ್ಭಿತಾನೇವ, ಪಞ್ಚ ನೀವರಣಾನಿಪಿ॥

೮೭೬.

ಕಿಲೇಸಾ ಸನ್ನಿಸಿನ್ನಾವ, ಯುತ್ತಯೋಗಸ್ಸ ಭಿಕ್ಖುನೋ।

ಚಿತ್ತಂ ಸಮಾಹಿತಂಯೇವ, ಉಪಚಾರಸಮಾಧಿನಾ॥

೮೭೭.

ಆಕಾರೇಹಿ ಪನ ದ್ವೀಹಿ, ಸಮಾಧಿಯತಿ ಮಾನಸಂ।

ಉಪಚಾರಕ್ಖಣೇ ತಸ್ಸ, ಪಟಿಲಾಭೇ ಸಮಾಧಿನೋ॥

೮೭೮.

ನೀವಾರಣಪ್ಪಹಾನೇನ , ಉಪಚಾರಕ್ಖಣೇ ತಥಾ।

ಅಙ್ಗಾನಂ ಪಾತುಭಾವೇನ, ಪಟಿಲಾಭಕ್ಖಣೇ ಪನ॥

೮೭೯.

ದ್ವಿನ್ನಂ ಪನ ಸಮಾಧೀನಂ, ಕಿಂ ನಾನಾಕರಣಂ ಪನ।

ಅಙ್ಗಾನಿ ಥಾಮಜಾತಾನಿ, ಉಪಚಾರಕ್ಖಣೇನ ಚ॥

೮೮೦.

ಅಪ್ಪನಾಯ ಪನಙ್ಗಾನಿ, ಥಾಮಜಾತಾನಿ ಜಾಯರೇ।

ತಸ್ಮಾ ತಂ ಅಪ್ಪನಾಚಿತ್ತಂ, ದಿವಸಮ್ಪಿ ಪವತ್ತತಿ॥

೮೮೧.

ಪಲ್ಲಙ್ಕೇನ ಚ ತೇನೇವ, ವಡ್ಢೇತ್ವಾ ತಂ ನಿಮಿತ್ತಕಂ।

ಅಪ್ಪನಂ ಅಧಿಗನ್ತುಂ ಸೋ, ಸಕ್ಕೋತಿ ಯದಿ ಸುನ್ದರಂ॥

೮೮೨.

ನೋ ಚೇ ಸಕ್ಕೋತಿ ಸೋ ತೇನ,

ತಂ ನಿಮಿತ್ತಂ ತು ಯೋಗಿನಾ।

ಚಕ್ಕವತ್ತಿಯ ಗಬ್ಭೋವ,

ರತನಂ ವಿಯ ದುಲ್ಲಭಂ॥

೮೮೩.

ಸತತಂ ಅಪ್ಪಮತ್ತೇನ, ರಕ್ಖಿತಬ್ಬಂ ಸತೀಮತಾ।

ನಿಮಿತ್ತಂ ರಕ್ಖತೋ ಲದ್ಧಂ, ಪರಿಹಾನಿ ನ ವಿಜ್ಜತಿ॥

೮೮೪.

ಆರಕ್ಖಣೇ ಅಸನ್ತಮ್ಹಿ, ಲದ್ಧಂ ಲದ್ಧಂ ವಿನಸ್ಸತಿ।

ರಕ್ಖಿತಬ್ಬಂ ಹಿ ತಸ್ಮಾ ತಂ, ತತ್ರಾಯಂ ರಕ್ಖಣಾವಿಧಿ॥

೮೮೫.

ಆವಾಸೋ ಗೋಚರೋ ಭಸ್ಸಂ, ಪುಗ್ಗಲೋ ಭೋಜನಂ ಉತು।

ಇರಿಯಾಪಥೋತಿ ಸತ್ತೇತೇ, ಅಸಪ್ಪಾಯೇ ವಿವಜ್ಜಯೇ॥

೮೮೬.

ಸಪ್ಪಾಯೇ ಸತ್ತ ಸೇವೇಯ್ಯ, ಏವಞ್ಹಿ ಪಟಿಪಜ್ಜತೋ।

ನ ಚಿರೇನೇವ ಕಾಲೇನ, ಹೋತಿ ಭಿಕ್ಖುಸ್ಸ ಅಪ್ಪನಾ॥

೮೮೭.

ಯಸ್ಸಪ್ಪನಾ ನ ಹೋತೇವ, ಏವಮ್ಪಿ ಪಟಿಪಜ್ಜತೋ।

ಅಪ್ಪನಾಯ ಚ ಕೋಸಲ್ಲಂ, ಸಮ್ಮಾ ಸಮ್ಪಾದಯೇ ಬುಧೋ॥

೮೮೮.

ಅಪ್ಪನಾಯ ಹಿ ಕೋಸಲ್ಲ-ಮಿದಂ ದಸವಿಧಂ ಇಧ।

ಗನ್ಥವಿತ್ಥಾರಭೀತೇನ, ಮಯಾ ವಿಸ್ಸಜ್ಜಿತನ್ತಿ ಚ॥

೮೮೯.

ಏವಞ್ಹಿ ಸಮ್ಪಾದಯತೋ, ಅಪ್ಪನಾಕೋಸಲ್ಲಂ ಪನ।

ಪಟಿಲದ್ಧೇ ನಿಮಿತ್ತಸ್ಮಿಂ, ಅಪ್ಪನಾ ಸಮ್ಪವತ್ತತಿ॥

೮೯೦.

ಏವಮ್ಪಿ ಪಟಿಪನ್ನಸ್ಸ, ಸಚೇ ಸಾ ನಪ್ಪವತ್ತತಿ।

ತಥಾಪಿ ನ ಜಹೇ ಯೋಗಂ, ವಾಯಮೇಥೇವ ಪಣ್ಡಿತೋ॥

೮೯೧.

ಚಿತ್ತಪ್ಪವತ್ತಿಆಕಾರಂ , ತಸ್ಮಾ ಸಲ್ಲಕ್ಖಯಂ ಬುಧೋ।

ಸಮತಂ ವೀರಿಯಸ್ಸೇವ, ಯೋಜಯೇಥ ಪುನಪ್ಪುನಂ॥

೮೯೨.

ಈಸಕಮ್ಪಿ ಲಯಂ ಯನ್ತಂ, ಪಗ್ಗಣ್ಹೇಥೇವ ಮಾನಸಂ।

ಅಚ್ಚಾರದ್ಧಂ ನಿಸೇಧೇತ್ವಾ, ಸಮಮೇವ ಪವತ್ತಯೇ॥

೮೯೩.

ಲೀನತುದ್ಧತಭಾವೇಹಿ, ಮೋಚಯಿತ್ವಾನ ಮಾನಸಂ।

ಪಟಿಭಾಗನಿಮಿತ್ತಾಭಿ-ಮುಖಂ ತಂ ಪಟಿಪಾದಯೇ॥

೮೯೪.

ಏವಂ ನಿಮಿತ್ತಾಭಿಮುಖಂ, ಪಟಿಪಾದಯತೋ ಪನ।

ಇದಾನೇವಪ್ಪನಾ ತಸ್ಸ, ಸಾ ಸಮಿಜ್ಝಿಸ್ಸತೀತಿ ಚ॥

೮೯೫.

ಭವಙ್ಗಂ ಪನ ಪಚ್ಛಿಜ್ಜ, ಪಥವೀಕಸಿಣಂ ತಥಾ।

ತದೇವಾರಮ್ಮಣಂ ಕತ್ವಾ, ಮನೋದ್ವಾರಮ್ಹಿ ಯೋಗಿನೋ॥

೮೯೬.

ಜಾಯತೇವಜ್ಜನಂ ಚಿತ್ತಂ, ತತ್ರೇವಾರಮ್ಮಣೇ ತತೋ।

ಜವನಾನಿ ಚ ಜಾಯನ್ತೇ, ತಸ್ಸ ಚತ್ತಾರಿ ಪಞ್ಚ ವಾ॥

೮೯೭.

ಅವಸಾನೇ ಪನೇಕಂ ತು, ರೂಪಾವಚರಿಕಂ ಭವೇ।

ತಕ್ಕಾದಯೋ ಪನಞ್ಞೇಹಿ, ಭವನ್ತಿ ಬಲವತ್ತರಾ॥

೮೯೮.

ಅಪ್ಪನಾಚೇತಸೋ ತಾನಿ, ಪರಿಕಮ್ಮೋಪಚಾರತೋ।

ವುಚ್ಚನ್ತಿ ಪರಿಕಮ್ಮಾನಿ, ಉಪಚಾರಾನಿ ಚಾತಿಪಿ॥

೮೯೯.

ಅಪ್ಪನಾಯಾನುಲೋಮತ್ತಾ , ಅನುಲೋಮಾನಿ ಏವ ಚ।

ಯಂ ತಂ ಸಬ್ಬನ್ತಿಮಂ ಏತ್ಥ, ಗೋತ್ರಭೂತಿ ಪವುಚ್ಚತಿ॥

೯೦೦.

ಗಹಿತಾಗಹಣೇನೇತ್ಥ, ಪರಿಕಮ್ಮಪ್ಪನಾದಿಕಂ।

ದುತಿಯಂ ಉಪಚಾರಂ ತಂ, ತತಿಯಂ ಅನುಲೋಮಕಂ॥

೯೦೧.

ಚತುತ್ಥಂ ಗೋತ್ರಭು ದಿಟ್ಠಂ, ಪಞ್ಚಮಂ ಅಪ್ಪನಾಮನೋ।

ಪಠಮಂ ಉಪಚಾರಂ ವಾ, ದುತಿಯಂ ಅನುಲೋಮಕಂ॥

೯೦೨.

ತತಿಯಂ ಗೋತ್ರಭು ದಿಟ್ಠಂ, ಚತುತ್ಥಂ ಅಪ್ಪನಾಮನೋ।

ಚತುತ್ಥಂ ಪಞ್ಚಮಂ ವಾತಿ, ಅಪ್ಪೇತಿ ನ ತತೋ ಪರಂ॥

೯೦೩.

ಛಟ್ಠೇ ವಾ ಸತ್ತಮೇ ವಾಪಿ, ಅಪ್ಪನಾ ನೇವ ಜಾಯತಿ।

ಆಸನ್ನತ್ತಾ ಭವಙ್ಗಸ್ಸ, ಜವನಂ ಪತಿ ತಾವದೇ॥

೯೦೪.

ಪುರಿಮೇಹಾಸೇವನಂ ಲದ್ಧಾ, ಛಟ್ಠಂ ವಾ ಸತ್ತಮಮ್ಪಿ ವಾ।

ಅಪ್ಪೇತೀತಿ ಪನೇತ್ಥಾಹ, ಗೋದತ್ತೋ ಆಭಿಧಮ್ಮಿಕೋ॥

೯೦೫.

ಧಾವನ್ತೋ ಹಿ ಯಥಾ ಕೋಚಿ,

ನರೋ ಛಿನ್ನತಟಾಮುಖೋ।

ಠಾತುಕಾಮೋ ಪರಿಯನ್ತೇ,

ಠಾತುಂ ಸಕ್ಕೋತಿ ನೇವ ಸೋ॥

೯೦೬.

ಏವಮೇವ ಪನಚ್ಛಟ್ಠೇ, ಸತ್ತಮೇ ವಾಪಿ ಮಾನಸೋ।

ನ ಸಕ್ಕೋತೀತಿ ಅಪ್ಪೇತುಂ, ವೇದಿತಬ್ಬಂ ವಿಭಾವಿನಾ॥

೯೦೭.

ಏಕಚಿತ್ತಕ್ಖಣಾಯೇವ, ಹೋತಾಯಂ ಅಪ್ಪನಾ ಪನ।

ತತೋ ಭವಙ್ಗಪಾತೋವ, ಹೋತೀತಿ ಪರಿದೀಪಿತಂ॥

೯೦೮.

ತತೋ ಭವಙ್ಗಂ ಛಿನ್ದಿತ್ವಾ, ಪಚ್ಚವೇಕ್ಖಣಹೇತುಕಂ।

ಆವಜ್ಜನಂ ತತೋ ಝಾನ-ಪಚ್ಚವೇಕ್ಖಣಮಾನಸಂ॥

೯೦೯.

ಕಾಮಚ್ಛನ್ದೋ ಚ ಬ್ಯಾಪಾದೋ, ಥಿನಮಿದ್ಧಞ್ಚ ಉದ್ಧತೋ।

ಕುಕ್ಕುಚ್ಚಂ ವಿಚಿಕಿಚ್ಛಾ ಚ, ಪಹೀನಾ ಪಞ್ಚಿಮೇ ಪನ॥

೯೧೦.

ವಿತಕ್ಕೇನ ವಿಚಾರೇನ, ಪೀತಿಯಾ ಚ ಸುಖೇನ ಚ।

ಏಕಗ್ಗತಾಯ ಸಂಯುತ್ತಂ, ಝಾನಂ ಪಞ್ಚಙ್ಗಿಕಂ ಇದಂ॥

೯೧೧.

ನಾನಾವಿಸಯಲುದ್ಧಸ್ಸ , ಕಾಮಚ್ಛನ್ದವಸಾ ಪನ।

ಇತೋ ಚಿತೋ ಭಮನ್ತಸ್ಸ, ವನೇ ಮಕ್ಕಟಕೋ ವಿಯ॥

೯೧೨.

ಏಕಸ್ಮಿಂ ವಿಸಯೇಯೇವ, ಸಮಾಧಾನೇವ ಚೇತಸೋ।

‘‘ಸಮಾಧಿ ಕಾಮಚ್ಛನ್ದಸ್ಸ, ಪಟಿಪಕ್ಖೋ’’ತಿ ವುಚ್ಚತಿ॥

೯೧೩.

ಪಾಮೋಜ್ಜಭಾವತೋ ಚೇವ, ಸೀತಲತ್ತಾ ಸಭಾವತೋ।

‘‘ಬ್ಯಾಪಾದಸ್ಸ ತತೋ ಪೀತಿ, ಪಟಿಪಕ್ಖಾ’’ತಿ ಭಾಸಿತಾ॥

೯೧೪.

ಸವಿಪ್ಫಾರಿಕಭಾವೇನ, ನೇಕ್ಖಮ್ಮಾದಿಪವತ್ತಿತೋ।

‘‘ವಿತಕ್ಕೋ ಥಿನಮಿದ್ಧಸ್ಸ, ಪಟಿಪಕ್ಖೋ’’ತಿ ವಣ್ಣಿತೋ॥

೯೧೫.

ಅವೂಪಸನ್ತಭಾವಸ್ಸ, ಸಯಞ್ಚೇವಾತಿಸನ್ತತೋ।

‘‘ಸುಖಂ ಉದ್ಧಚ್ಚಕುಕ್ಕುಚ್ಚ-ದ್ವಯಸ್ಸ ಪಟಿಪಕ್ಖಕಂ’’॥

೯೧೬.

ಮತಿಯಾ ಅನುರೂಪತ್ತಾ, ‘‘ಅನುಮಜ್ಜನಲಕ್ಖಣೋ।

ವಿಚಾರೋ ವಿಚಿಕಿಚ್ಛಾಯ, ಪಟಿಪಕ್ಖೋ’’ತಿ ದೀಪಿತೋ॥

೯೧೭.

ಪಞ್ಚಙ್ಗವಿಪ್ಪಯುತ್ತಂ ತಂ, ಝಾನಂ ಪಞ್ಚಙ್ಗಸಂಯುತಂ।

ಸಿವಂ ತಿವಿಧಕಲ್ಯಾಣಂ, ದಸಲಕ್ಖಣಸಂಯುತಂ॥

೯೧೮.

ಏವಞ್ಚಾಧಿಗತಂ ಹೋತಿ, ಪಠಮಂ ತೇನ ಯೋಗಿನಾ।

ಸುಚಿರಟ್ಠಿತಿಕಾಮೇನ, ತಸ್ಸ ಝಾನಸ್ಸ ಸಬ್ಬಸೋ॥

೯೧೯.

ತಂ ಸಮಾಪಜ್ಜಿತಬ್ಬಂ ತು, ವಿಸೋಧೇತ್ವಾನ ಪಾಪಕೇ।

ತಂ ಸಮಾಪಜ್ಜತೋ ತಸ್ಸ, ಸುಚಿರಟ್ಠಿತಿಕಂ ಭವೇ॥

೯೨೦.

ಚಿತ್ತಭಾವನವೇಪುಲ್ಲಂ, ಪತ್ಥಯನ್ತೇನ ಭಿಕ್ಖುನಾ।

ಪಟಿಭಾಗನಿಮಿತ್ತಂ ತಂ, ವಡ್ಢೇತಬ್ಬಂ ಯಥಾಕ್ಕಮಂ॥

೯೨೧.

ವಡ್ಢನಾಭೂಮಿಯೋ ದ್ವೇ ಚ, ಉಪಚಾರಞ್ಚ ಅಪ್ಪನಾ।

ಉಪಚಾರಮ್ಪಿ ವಾ ಪತ್ವಾ, ವಡ್ಢೇತುಂ ತಞ್ಚ ವತ್ತತಿ॥

೯೨೨.

ಅಪ್ಪನಂ ಪನ ಪತ್ವಾ ವಾ, ತತ್ರಾಯಂ ವಡ್ಢನಕ್ಕಮೋ।

ಕಸಿತಬ್ಬಂ ಯಥಾಠಾನಂ, ಪರಿಚ್ಛಿನ್ದತಿ ಕಸ್ಸಕೋ॥

೯೨೩.

ಯೋಗಿನಾ ಏವಮೇವಮ್ಪಿ, ಅಙ್ಗುಲದ್ವಙ್ಗುಲಾದಿನಾ।

ಪರಿಚ್ಛಿಜ್ಜ ಪರಿಚ್ಛಿಜ್ಜ, ವಡ್ಢೇತಬ್ಬಂ ಯಥಿಚ್ಛಕಂ॥

೯೨೪.

ಪತ್ತೇಪಿ ಪಠಮೇ ಝಾನೇ, ಆಕಾರೇಹಿಪಿ ಪಞ್ಚಹಿ।

ಸುಚಿಣ್ಣವಸಿನಾ ತೇನ, ಭವಿತಬ್ಬಂ ತಪಸ್ಸಿನಾ॥

೯೨೫.

ಆವಜ್ಜನಂ ಸಮಾಪತ್ತಿ, ಅಧಿಟ್ಠಾನೇಸು ತೀಸು ಚ।

ವುಟ್ಠಾನಪಚ್ಚವೇಕ್ಖಾಸು, ವಸಿತಾ ಪಞ್ಚ ಭಾಸಿತಾ॥

೯೨೬.

ಆವಜ್ಜಿತ್ವಾ ಅಧಿಟ್ಠಿತ್ವಾ, ಸಮಾಪಜ್ಜ ಪುನಪ್ಪುನಂ।

ವುಟ್ಠಿತ್ವಾ ಪಚ್ಚವೇಕ್ಖಿತ್ವಾ, ವಸಿತಾ ಪಞ್ಚ ಸಾಧಯೇ॥

೯೨೭.

ಪಠಮೇ ಅವಸಿಪತ್ತೇ, ದುತಿಯಂ ಯೋ ಪನಿಚ್ಛತಿ।

ಉಭತೋ ಭಟ್ಠೋಭವೇ ಯೋಗೀ, ಪಠಮಾ ದುತಿಯಾಪಿ ಚ॥

೯೨೮.

ಕಾಮಸ್ಸಹಗತಾ ಸಞ್ಞಾ, ಮನಕ್ಕಾರಾ ಚರನ್ತಿ ಚೇ।

ಪಮಾದಯೋಗಿನೋ ಝಾನಂ, ಹೋತಿ ತಂ ಹಾನಭಾಗಿಯಂ॥

೯೨೯.

ಸತಿ ಸನ್ತಿಟ್ಠತೇ ತಸ್ಮಿಂ, ಸನ್ತಾ ತದನುಧಮ್ಮತಾ।

ಮನ್ದಸ್ಸ ಯೋಗಿನೋ ಝಾನಂ, ಹೋತಿ ತಂ ಠಿತಿಭಾಗಿಯಂ॥

೯೩೦.

ಅತಕ್ಕಸಹಿತಾ ಸಞ್ಞಾ, ಮನಕ್ಕಾರಾ ಚರನ್ತಿ ಚೇ।

ಅಪ್ಪಮತ್ತಸ್ಸ ತಂ ಝಾನಂ, ವಿಸೇಸಭಾಗಿಯಂ ಸಿಯಾ॥

೯೩೧.

ನಿಬ್ಬಿದಾಸಂಯುತಾ ಸಞ್ಞಾ, ಮನಕ್ಕಾರಾ ಚರನ್ತಿ ಚೇ।

ನಿಬ್ಬೇಧಭಾಗಿಯಂ ಝಾನಂ, ಹೋತೀತಿ ಪರಿದೀಪಿತಂ॥

೯೩೨.

ತಸ್ಮಾ ಪಞ್ಚಸು ಏತೇಸು, ಸುಚಿಣ್ಣವಸಿನಾ ಪನ।

ಪಠಮಾ ಪಗುಣತೋ ಝಾನಾ, ವುಟ್ಠಾಯ ವಿಧಿನಾ ತತೋ॥

೯೩೩.

ಯಸ್ಮಾ ಅಯಂ ಸಮಾಪತ್ತಿ, ಆಸನ್ನಾಕುಸಲಾರಿಕಾ।

ಥೂಲತ್ತಾ ತಕ್ಕಚಾರಾನಂ, ತತೋಯಂ ಅಙ್ಗದುಬ್ಬಲಾ॥

೯೩೪.

ಇತಿ ಆದೀನವಂ ದಿಸ್ವಾ, ಪಠಮೇ ಪನ ಯೋಗಿನಾ।

ದುತಿಯಂ ಸನ್ತತೋ ಝಾನಂ, ಚಿನ್ತಯಿತ್ವಾನ ಧೀಮತಾ॥

೯೩೫.

ನಿಕನ್ತಿಂ ಪರಿಯಾದಾಯ, ಝಾನಸ್ಮಿಂ ಪಠಮೇ ಪುನ।

ದುತಿಯಾಧಿಗಮತ್ಥಾಯ, ಕಾತಬ್ಬೋ ಭಾವನಕ್ಕಮೋ॥

೯೩೬.

ಅಥಸ್ಸ ಪಠಮಜ್ಝಾನಾ, ವುಟ್ಠಾಯ ವಿಧಿನಾ ಯದಾ।

ಸತಸ್ಸ ಸಮ್ಪಜಾನಸ್ಸ, ಝಾನಙ್ಗಂ ಪಚ್ಚವೇಕ್ಖತೋ॥

೯೩೭.

ಥೂಲತೋ ತಕ್ಕಚಾರಾ ಹಿ, ಉಪತಿಟ್ಠನ್ತಿ ಯೋಗಿನೋ।

ಸೇಸಮಙ್ಗತ್ತಯಂ ತಸ್ಸ, ಸನ್ತಮೇವೋಪತಿಟ್ಠತಿ॥

೯೩೮.

ಥೂಲಙ್ಗಾನಂ ಪಹಾನಾಯ, ತದಾ ತಸ್ಸ ಚ ಯೋಗಿನೋ।

ಸನ್ತಙ್ಗಪಟಿಲಾಭಾಯ, ನಿಮಿತ್ತಂ ತು ತದೇವ ಚ॥

೯೩೯.

‘‘ಪಥವೀ ಪಥವಿ’’ಚ್ಚೇವಂ, ಕರೋತೋ ಮನಸಾ ಪುನ।

ಇದಾನಿ ದುತಿಯಜ್ಝಾನ-ಮುಪ್ಪಜ್ಜಿಸ್ಸತಿ ತಂ ಇತಿ॥

೯೪೦.

ಭವಙ್ಗಂ ಪನ ಪಚ್ಛಿಜ್ಜ, ಪಥವೀಕಸಿಣಂ ಪನ।

ತದೇವಾರಮ್ಮಣಂ ಕತ್ವಾ, ಮನೋದ್ವಾರಮ್ಹಿ ಯೋಗಿನೋ॥

೯೪೧.

ಜಾಯತಾವಜ್ಜನಂ ಚಿತ್ತಂ, ತಸ್ಮಿಂ ಆರಮ್ಮಣೇ ತತೋ।

ಜವನಾನಿ ಹಿ ಜಾಯನ್ತೇ, ತಸ್ಸ ಚತ್ತಾರಿ ಪಞ್ಚ ವಾ॥

೯೪೨.

ಅವಸಾನೇ ಪನೇಕಮ್ಪಿ, ತೇಸಂ ಜವನಚೇತಸಂ।

ರೂಪಾವಚರಿಕಂ ಹೋತಿ, ದುತಿಯಜ್ಝಾನಮಾನಸಂ॥

೯೪೩.

ಸಮ್ಪಸಾದನಮಜ್ಝತ್ತಂ, ಪೀತಿಯಾ ಚ ಸುಖೇನ ಚ।

ಏಕಗ್ಗತಾಯ ಸಂಯುತ್ತಂ, ಝಾನಂ ಹೋತಿ ತಿವಙ್ಗಿಕಂ॥

೯೪೪.

ಹೇಟ್ಠಾ ವುತ್ತನಯೇನೇವ, ಸೇಸಂ ಸಮುಪಲಕ್ಖಯೇ।

ಏವಂ ದುವಙ್ಗಹೀನಂ ತು, ತೀಹಿ ಅಙ್ಗೇಹಿ ಸಂಯುತಂ॥

೯೪೫.

ಝಾನಂ ತಿವಿಧಕಲ್ಯಾಣಂ, ದಸಲಕ್ಖಣಸಂಯುತಂ।

ದುತಿಯಾಧಿಗತಂ ಹೋತಿ, ಭಿಕ್ಖುನಾ ಭಾವನಾಮಯಂ॥

೯೪೬.

ದುತಿಯಾಧಿಗತೇ ಝಾನೇ, ಆಕಾರೇಹಿ ಚ ಪಞ್ಚಹಿ।

ಸುಚಿಣ್ಣವಸಿನಾ ಹುತ್ವಾ, ದುತಿಯೇಪಿ ಸತೀಮತಾ॥

೯೪೭.

ತಸ್ಮಾ ಪಗುಣತೋ ಝಾನಾ, ವುಟ್ಠಾಯ ದುತಿಯಾ ಪುನ।

ಆಸನ್ನತಕ್ಕಚಾರಾರಿ, ಸಮಾಪತ್ತಿ ಅಯಂ ಇತಿ॥

೯೪೮.

ಪೀತಿಯಾ ಪಿಯತೋ ತಸ್ಸ, ಚೇತಸೋ ಉಪ್ಪಿಲಾಪನಂ।

ಪೀತಿಯಾ ಪನ ಥೂಲತ್ತಾ, ತತೋಯಂ ಅಙ್ಗದುಬ್ಬಲಾ॥

೯೪೯.

ತತ್ಥ ಆದೀನವಂ ದಿಸ್ವಾ, ತತಿಯೇ ಸನ್ತತೋ ಪನ।

ನಿಕನ್ತಿಂ ಪರಿಯಾದಾಯ, ಝಾನಸ್ಮಿಂ ದುತಿಯೇ ಪುನ॥

೯೫೦.

ತತಿಯಾಧಿಗಮತ್ಥಾಯ, ಕಾತಬ್ಬೋ ಭಾವನಕ್ಕಮೋ।

ಅಥಸ್ಸ ದುತಿಯಜ್ಝಾನಾ, ವುಟ್ಠಾಯ ಚ ಯದಾ ಪನ॥

೯೫೧.

ಸತಸ್ಸ ಸಮ್ಪಜಾನಸ್ಸ, ಝಾನಙ್ಗಂ ಪಚ್ಚವೇಕ್ಖತೋ।

ಥೂಲತೋ ಪೀತುಪಟ್ಠಾತಿ, ಸುಖಾದಿ ಸನ್ತತೋ ಪನ॥

೯೫೨.

ಥೂಲಙ್ಗಾನಂ ಪಹಾನಾಯ, ತದಾ ತಸ್ಸ ಚ ಯೋಗಿನೋ।

ಸನ್ತಙ್ಗಪಟಿಲಾಭಾಯ, ನಿಮಿತ್ತಂ ತು ತದೇವ ಚ॥

೯೫೩.

‘‘ಪಥವೀ ಪಥವಿ’’ಚ್ಚೇವಂ, ಕರೋತೋ ಮನಸಾ ಪುನ।

ಇದಾನಿ ತತಿಯಂ ಝಾನ-ಮುಪ್ಪಜ್ಜಿಸ್ಸತಿ ತಂ ಇತಿ॥

೯೫೪.

ಭವಙ್ಗಂ ಮನುಪಚ್ಛಿಜ್ಜ, ಪಥವೀಕಸಿಣಂ ಪನ।

ತದೇವಾರಮ್ಮಣಂ ಕತ್ವಾ, ಮನೋದ್ವಾರಮ್ಹಿ ಯೋಗಿನೋ॥

೯೫೫.

ಜಾಯತಾವಜ್ಜನಂ ಚಿತ್ತಂ, ತಸ್ಮಿಂ ಆರಮ್ಮಣೇ ತತೋ।

ಜವನಾನಿ ಚ ಜಾಯನ್ತೇ, ತಸ್ಸ ಚತ್ತಾರಿ ಪಞ್ಚ ವಾ॥

೯೫೬.

ಅವಸಾನೇ ಪನೇಕಂ ತು, ತೇಸಂ ಜವನಚೇತಸಂ।

ರೂಪಾವಚರಿಕಂ ಹೋತಿ, ತತಿಯಜ್ಝಾನಮಾನಸಂ॥

೯೫೭.

ಸತಿಯಾ ಸಮ್ಪಜಞ್ಞೇನ, ಸಮ್ಪನ್ನಂ ತು ಸುಖೇನ ಚ।

ಏಕಗ್ಗತಾಯ ಸಂಯುತ್ತಂ, ದುವಙ್ಗಂ ತತಿಯಂ ಮತಂ॥

೯೫೮.

ಹೇಟ್ಠಾ ವುತ್ತನಯೇನೇವ, ಸೇಸಂ ಸಮುಪಲಕ್ಖಯೇ।

ಏವಮೇಕಙ್ಗಹೀನಂ ತು, ದ್ವೀಹಿ ಅಙ್ಗೇಹಿ ಸಂಯುತಂ॥

೯೫೯.

ಝಾನಂ ತಿವಿಧಕಲ್ಯಾಣಂ, ದಸಲಕ್ಖಣಸಂಯುತಂ।

ತತಿಯಾಧಿಗತಂ ಹೋತಿ, ಭಿಕ್ಖುನಾ ಭಾವನಾಮಯಂ॥

೯೬೦.

ತತಿಯಾಧಿಗತೇ ಝಾನೇ, ಆಕಾರೇಹಿ ಚ ಪಞ್ಚಹಿ।

ಸುಚಿಣ್ಣವಸಿನಾ ಹುತ್ವಾ, ತಸ್ಮಿಂ ಪನ ಸತೀಮತಾ॥

೯೬೧.

ತಸ್ಮಾ ಪಗುಣತೋ ಝಾನಾ, ವುಟ್ಠಾಯ ತತಿಯಾ ಪುನ।

ಆಸನ್ನಪೀತಿದೋಸಾ ಹಿ, ಸಮಾಪತ್ತಿ ಅಯನ್ತಿ ಚ॥

೯೬೨.

ಯದೇವಚೇತ್ಥ ಆಭೋಗೋ, ಸುಖಮಿಚ್ಚೇವ ಚೇತಸೋ।

ಏವಂ ಸುಖಸ್ಸ ಥೂಲತ್ತಾ, ಹೋತಾಯಂ ಅಙ್ಗದುಬ್ಬಲಾ॥

೯೬೩.

ಇತಿ ಆದೀನವಂ ದಿಸ್ವಾ, ಝಾನಸ್ಮಿಂ ತತಿಯೇ ಪುನ।

ಚತುತ್ಥಂ ಸನ್ತತೋ ದಿಸ್ವಾ, ಚೇತಸಾ ಪನ ಯೋಗಿನಾ॥

೯೬೪.

ನಿಕನ್ತಿಂ ಪರಿಯಾದಾಯ, ಝಾನಸ್ಮಿಂ ತತಿಯೇ ಪುನ।

ಚತುತ್ಥಾಧಿಗಮತ್ಥಾಯ, ಕಾತಬ್ಬೋ ಭಾವನಕ್ಕಮೋ॥

೯೬೫.

ಅಥಸ್ಸ ತತಿಯಜ್ಝಾನಾ, ವುಟ್ಠಾಯ ಹಿ ಯದಾ ಪನ।

ಸತಸ್ಸ ಸಮ್ಪಜಾನಸ್ಸ, ಝಾನಙ್ಗಂ ಪಚ್ಚವೇಕ್ಖತೋ॥

೯೬೬.

ಥೂಲತೋ ತಸ್ಸುಪಟ್ಠಾತಿ, ಸುಖಂ ತಂ ಮಾನಸಂ ತತೋ।

ಉಪೇಕ್ಖಾ ಸನ್ತತೋ ತಸ್ಸ, ಚಿತ್ತಸ್ಸೇಕಗ್ಗತಾಪಿ ಚ॥

೯೬೭.

ಥೂಲಙ್ಗಸ್ಸ ಪಹಾನಾಯ, ಸನ್ತಙ್ಗಸ್ಸೂಪಲದ್ಧಿಯಾ।

ತದೇವ ಚ ನಿಮಿತ್ತಞ್ಹಿ, ‘‘ಪಥವೀ ಪಥವೀ’’ತಿ ಚ॥

೯೬೮.

ಕರೋತೋ ಮನಸಾ ಏವ, ಪುನಪ್ಪುನಞ್ಚ ಯೋಗಿನೋ।

ಚತುತ್ಥಂ ಪನಿದಂ ಝಾನಂ, ಉಪ್ಪಜ್ಜಿಸ್ಸತಿ ತಂ ಇತಿ॥

೯೬೯.

ಭವಙ್ಗಂ ಪನುಪಚ್ಛಿಜ್ಜ, ಪಥವೀಕಸಿಣಂ ತಥಾ।

ತದೇವಾರಮ್ಮಣಂ ಕತ್ವಾ, ಮನೋದ್ವಾರಮ್ಹಿ ಯೋಗಿನೋ॥

೯೭೦.

ಜಾಯತಾವಜ್ಜನಂ ಚಿತ್ತಂ, ತಸ್ಮಿಂ ಆರಮ್ಮಣೇ ತತೋ।

ಜವನಾನಿ ಚ ಜಾಯನ್ತೇ, ತಸ್ಸ ಚತ್ತಾರಿ ಪಞ್ಚ ವಾ॥

೯೭೧.

ಅವಸಾನೇ ಪನೇಕಂ ತು, ತೇಸಂ ಜವನಚೇತಸಂ।

ರೂಪಾವಚರಿಕಂ ಹೋತಿ, ಚತುತ್ಥಜ್ಝಾನಮಾನಸಂ॥

೯೭೨.

ಏಕಙ್ಗವಿಪ್ಪಹೀನಂ ತು, ದ್ವೀಹಿ ಅಙ್ಗೇಹಿ ಯೋಗತೋ।

ಚತುತ್ಥಂ ಪನಿದಂ ಝಾನಂ, ದುವಙ್ಗನ್ತಿ ಪವುಚ್ಚತಿ॥

೯೭೩.

ಏವಂ ತಿವಿಧಕಲ್ಯಾಣಂ, ದಸಲಕ್ಖಣಸಂಯುತಂ।

ಚತುತ್ಥಾಧಿಗತಂ ಹೋತಿ, ಭಿಕ್ಖುನಾ ಭಾವನಾಮಯಂ॥

೯೭೪.

ಯಸ್ಮಾ ಸುಖಮುಪೇಕ್ಖಾಯ, ನ ಹೋತಾಸೇವನಂ ಪನ।

ಉಪೇಕ್ಖಾಸಹಗತಾನೇವ, ಜವನಾನಿ ಜವನ್ತಿ ಚ॥

೯೭೫.

ಉಪೇಕ್ಖಾಸಹಗತಂ ತಸ್ಮಾ, ಚತುತ್ಥಂ ಸಮುದೀರಿತಂ।

ಅಯಮೇತ್ಥ ವಿಸೇಸೋ ಹಿ, ಸೇಸಂ ವುತ್ತನಯಂ ಪನ॥

೯೭೬.

ಯಂ ಚತುಕ್ಕನಯೇ ಝಾನಂ, ದುತಿಯಂ ತಂ ದ್ವಿಧಾ ಪನ।

ಕತ್ವಾನ ಪಞ್ಚಕನಯೇ, ದುತಿಯಂ ತತಿಯಂ ಕತಂ॥

೯೭೭.

ತತಿಯಂ ತಂ ಚತುತ್ಥಞ್ಚ, ಚತುತ್ಥಂ ಪಞ್ಚಮಂ ಇಧ।

ಪಠಮಂ ಪಠಮಂಯೇವ, ಅಯಮೇತ್ಥ ವಿಸೇಸತಾ॥

೯೭೮.

ಏವಮೇತ್ತಾವತಾ ವುತ್ತಾ, ನಾತಿಸಙ್ಖೇಪತೋ ಮಯಾ।

ನಾತಿವಿತ್ಥಾರತೋ ಚಾಯಂ, ರೂಪಾವಚರಭಾವನಾ॥

೯೭೯.

ಸುಮಧುರವರತರವಚನೋ, ಕಂ ನು ಜನಂ ನೇವ ರಞ್ಜಯತಿ।

ಅತಿನಿಸಿತವಿಸದಬುದ್ಧಿ-ಪಸಾದಜನ ವೇದನೀಯೋಯಂ॥

ಇತಿ ಅಭಿಧಮ್ಮಾವತಾರೇ ರೂಪಾವಚರಸಮಾಧಿಭಾವನಾನಿದ್ದೇಸೋ

ನಾಮ ಚುದ್ದಸಮೋ ಪರಿಚ್ಛೇದೋ।