೧೬. ಸೋಳಸಮೋ ಪರಿಚ್ಛೇದೋ

ಅಭಿಞ್ಞಾನಿದ್ದೇಸೋ

೧೦೪೩.

ಇತೋ ಪರಂ ಕರಿಸ್ಸಾಮಿ, ಪಞ್ಞಾಸುದ್ಧಿಕರಂ ಪರಂ।

ಪಞ್ಚನ್ನಮ್ಪಿ ಅಭಿಞ್ಞಾನಂ, ಮುಖಮತ್ತನಿದಸ್ಸನಂ॥

೧೦೪೪.

ರೂಪಾರೂಪಸಮಾಪತ್ತೀ,

ನಿಬ್ಬತ್ತೇತ್ವಾ ಪನಟ್ಠಪಿ।

ಲೋಕಿಕಾಪಿ ಅಭಿಞ್ಞಾಯೋ,

ಭಾವೇತಬ್ಬಾ ವಿಭಾವಿನಾ॥

೧೦೪೫.

ಚತುತ್ಥಜ್ಝಾನಮತ್ತೇಪಿ, ಸುಚಿಣ್ಣವಸಿನಾ ಸತಾ।

ಅನುಯೋಗಮಭಿಞ್ಞಾಸು, ಕಾತುಂ ವತ್ತತಿ ಯೋಗಿನೋ॥

೧೦೪೬.

ಅಭಿಞ್ಞಾ ನಾಮ ಭಿಕ್ಖೂನಂ, ಸಾಭಿಞ್ಞಾನಂ ಅನುತ್ತರೋ।

ಅಲಙ್ಕಾರೋ ಹಿ ತಾಣನ್ತಿ, ಸತ್ಥನ್ತಿ ಚ ಪವುಚ್ಚತಿ॥

೧೦೪೭.

ನಿಬ್ಬತ್ತಿತಾಸ್ವಭಿಞ್ಞಾಸು, ಯೋಗಾವಚರಭಿಕ್ಖುನಾ।

ಸಮಾಧಿಭಾವನಾ ಹಿಸ್ಸ, ತದಾ ನಿಟ್ಠಙ್ಗತಾ ಸಿಯಾ॥

೧೦೪೮.

ದಿಬ್ಬಾನಿ ಚಕ್ಖುಸೋತಾನಿ, ಇದ್ಧಿಚಿತ್ತವಿಜಾನನಂ।

ಪುಬ್ಬೇನಿವಾಸಞಾಣನ್ತಿ, ಪಞ್ಚಾಭಿಞ್ಞಾ ಇಮಾ ಸಿಯುಂ॥

೧೦೪೯.

ಕಸಿಣಾನುಲೋಮತಾದೀಹಿ, ಚತುದ್ದಸನಯೇಹಿ ಚ।

ದಮೇತಬ್ಬಮಭಿಞ್ಞಾಯೋ, ಪತ್ತುಕಾಮೇನ ಮಾನಸಂ॥

೧೦೫೦.

ದನ್ತೇ ಸಮಾಹಿತೇ ಸುದ್ಧೇ, ಪರಿಯೋದಾತೇ ಅನಙ್ಗಣೇ।

ನುಪಕ್ಲೇಸೇ ಮುದುಭೂತೇ, ಕಮ್ಮನೀಯೇ ಠಿತಾಚಲೇ॥

೧೦೫೧.

ಇತಿ ಅಟ್ಠಙ್ಗಸಮ್ಪನ್ನೇ, ಚಿತ್ತೇ ಇದ್ಧಿವಿಧಾಯ ಚ।

ಅಭಿನೀಹರತಿ ಚೇ ಚಿತ್ತಂ, ಸಿಜ್ಝತಿದ್ಧಿವಿಕುಬ್ಬನಂ॥

೧೦೫೨.

ಅಭಿಞ್ಞಾಪಾದಕಜ್ಝಾನಂ, ಸಮಾಪಜ್ಜ ತತೋ ಪನ।

ವುಟ್ಠಾಯ ಹಿ ಸತಂ ವಾಪಿ, ಸಹಸ್ಸಂ ವಾ ಯದಿಚ್ಛತಿ॥

೧೦೫೩.

‘‘ಸತಂ ಹೋಮಿ ಸತಂ ಹೋಮೀ’’-ಚ್ಚೇವಂ ಕತ್ವಾನ ಮಾನಸಂ।

ಅಭಿಞ್ಞಾಪಾದಕಜ್ಝಾನಂ, ಸಮಾಪಜ್ಜ ತತೋ ಪನ॥

೧೦೫೪.

ವುಟ್ಠಾಯ ಪುನಧಿಟ್ಠಾತಿ,

ಸಹಾಧಿಟ್ಠಾನಚೇತಸಾ।

ಸತಂ ಹೋತಿ ಹಿ ಸೋ ಯೋಗೀ,

ಸಹಸ್ಸಾದೀಸ್ವಯಂ ನಯೋ॥

೧೦೫೫.

ಪಾದಕಜ್ಝಾನಚಿತ್ತಂ ತು, ನಿಮಿತ್ತಾರಮ್ಮಣಂ ಸಿಯಾ।

ಪರಿಕಮ್ಮಮನಾನೇತ್ಥ, ಸತಾರಮ್ಮಣಿಕಾನಿ ತು॥

೧೦೫೬.

ತದಾಧಿಟ್ಠಾನಚಿತ್ತಮ್ಪಿ , ಸತಾರಮ್ಮಣಮೇವ ತಂ।

ಪುಬ್ಬೇ ವುತ್ತಪ್ಪನಾಚಿತ್ತಂ, ವಿಯ ಗೋತ್ರಭುನನ್ತರಂ॥

೧೦೫೭.

ತಮೇಕಂ ಜಾಯತೇ ತತ್ಥ, ಚತುತ್ಥಜ್ಝಾನಿಕಂ ಮನೋ।

ಪರಿಕಮ್ಮವಿಸೇಸೋವ, ಸೇಸಂ ಪುಬ್ಬಸಮಂ ಇಧ॥

ಇದ್ಧಿವಿಧಞಾಣಂ।

೧೦೫೮.

ದಿಬ್ಬಸೋತಮಿದಂ ತತ್ಥ, ಭಾವೇತಬ್ಬಂ ಕಥಂ ಸಿಯಾ।

ಅಭಿಞ್ಞಾಪಾದಕಜ್ಝಾನಂ, ಸಮಾಪಜ್ಜ ತತೋ ಪುನ॥

೧೦೫೯.

ವುಟ್ಠಾಯ ಪರಿಕಮ್ಮೇನ, ಕಾಮಾವಚರಚೇತಸಾ।

ಸದ್ದೋ ಆವಜ್ಜಿತಬ್ಬೋವ, ಮಹನ್ತೋ ಸುಖುಮೋಪಿ ಚ॥

೧೦೬೦.

ತಸ್ಸೇವಂ ಪನ ಸದ್ದಸ್ಸ, ನಿಮಿತ್ತಂ ಮನಸಿ ಕುಬ್ಬತೋ।

ದಿಬ್ಬಸೋತಮಿದಾನಿಸ್ಸ, ಉಪ್ಪಜ್ಜಿಸ್ಸತಿ ತಂ ಇತಿ॥

೧೦೬೧.

ಸದ್ದೇಸ್ವಞ್ಞತರಂ ಸದ್ದಂ, ಕತ್ವಾ ಆರಮ್ಮಣಂ ತತೋ।

ಉಪ್ಪಜ್ಜಿತ್ವಾ ನಿರುದ್ಧೇ ತು, ಮನೋದ್ವಾರಾವಜ್ಜನೇ ಪುನ॥

೧೦೬೨.

ಜವನಾನಿ ಹಿ ಜಾಯನ್ತೇ, ತಸ್ಸ ಚತ್ತಾರಿ ಪಞ್ಚ ವಾ।

ಪುರಿಮಾನೇತ್ಥ ಚಿತ್ತೇಸು, ತೀಣಿ ಚತ್ತಾರಿ ವಾ ಪನ॥

೧೦೬೩.

ಪರಿಕಮ್ಮೋಪಚಾರಾನು-ಲೋಮಗೋತ್ರಭುನಾಮಕಾ।

ಚತುತ್ಥಂ ಪಞ್ಚಮಂ ವಾಪಿ, ಅಪ್ಪನಾಚಿತ್ತಮೀರಿತಂ॥

೧೦೬೪.

ಸಹಜಾತಂ ತು ಯಂ ಞಾಣಂ, ಅಪ್ಪನಾಮಾನಸೇನ ಹಿ।

ತಂ ಞಾಣಂ ದಿಬ್ಬಸೋತನ್ತಿ, ವದನ್ತಿ ಸುತಕೋವಿದಾ॥

೧೦೬೫.

ಥಾಮಜಾತಂ ಕರೋನ್ತೇನ, ತಂ ಞಾಣಂ ತೇನ ಯೋಗಿನಾ।

‘‘ಏತ್ಥನ್ತರಗತಂ ಸದ್ದಂ, ಸುಣಾಮೀ’’ತಿ ಚ ಚೇತಸಾ॥

೧೦೬೬.

ಅಙ್ಗುಲಂ ದ್ವಙ್ಗುಲಂ ಭಿಯ್ಯೋ,

ವಿದತ್ಥಿ ರತನಂ ತಥಾ।

ಗಾಮೋ ದೇಸೋ ತತೋ ಯಾವ,

ಚಕ್ಕವಾಳಾ ತತೋ ಪರಂ॥

೧೦೬೭.

ಇಚ್ಚೇವಂ ತು ಪರಿಚ್ಛಿಜ್ಜ, ವಡ್ಢೇತಬ್ಬಂ ಯಥಾಕ್ಕಮಂ।

ಏಸೋ ಅಧಿಗತಾಭಿಞ್ಞೋ, ಪಾದಕಾರಮ್ಮಣೇನ ತು॥

೧೦೬೮.

ಫುಟ್ಠೋಕಾಸಗತೇ ಸದ್ದೇ, ಸಬ್ಬೇ ಪನ ಸುಣಾತಿ ಸೋ।

ಸುಣನ್ತೋ ಪಾಟಿಯೇಕ್ಕಮ್ಪಿ, ಸಲ್ಲಕ್ಖೇತುಂ ಪಹೋತಿ ಸೋ॥

ದಿಬ್ಬಸೋತಞಾಣಂ।

೧೦೬೯.

ಕಥಂ ಪನುಪ್ಪಾದೇತಬ್ಬಂ, ಚೇತೋಪರಿಯಮಾನಸಂ।

ದಿಬ್ಬಚಕ್ಖುವಸೇನೇವ, ಇದಂ ಞಾಣಂ ಪನಿಜ್ಝತಿ॥

೧೦೭೦.

ಆಲೋಕಂ ಪನ ವಡ್ಢೇತ್ವಾ, ತಸ್ಮಾ ದಿಬ್ಬೇನ ಚಕ್ಖುನಾ।

ಹದಯಂ ಪನ ನಿಸ್ಸಾಯ, ವತ್ತಮಾನಂ ತು ಲೋಹಿತಂ॥

೧೦೭೧.

ದಿಸ್ವಾ ಪರಸ್ಸ ವಿಞ್ಞೇಯ್ಯಂ,

ಹೋತಿ ಚಿತ್ತಂ ತು ಭಿಕ್ಖುನಾ।

ಸೋಮನಸ್ಸಯುತೇ ಚಿತ್ತೇ,

ಲೋಹಿತಂ ಲೋಹಿತಂ ಸಿಯಾ॥

೧೦೭೨.

ದೋಮನಸ್ಸಯುತೇ ಚಿತ್ತೇ, ವತ್ತಮಾನೇ ತು ಕಾಳಕಂ।

ಉಪೇಕ್ಖಾಸಹಿತೇ ಚಿತ್ತೇ, ತಿಲತೇಲೂಪಮಂ ಸಿಯಾ॥

೧೦೭೩.

ತಸ್ಮಾ ಪರಸ್ಸ ಸತ್ತಸ್ಸ, ದಿಸ್ವಾ ಹದಯಲೋಹಿತಂ।

ಚೇತೋಪರಿಯಞಾಣಂ ತಂ, ಕಾತಬ್ಬಂ ಥಾಮತಂ ಗತಂ॥

೧೦೭೪.

ಏವಂ ಥಾಮಗತೇ ತಸ್ಮಿಂ, ಯಥಾನುಕ್ಕಮತೋ ಪನ।

ಚಿತ್ತಮೇವ ವಿಜಾನಾತಿ, ವಿನಾ ಲೋಹಿತದಸ್ಸನಂ॥

೧೦೭೫.

ಕಾಮಾವಚರಚಿತ್ತಞ್ಚ, ರೂಪಾರೂಪೇಸು ಮಾನಸಂ।

ಸಬ್ಬಮೇವ ವಿಜಾನಾತಿ, ಸರಾಗಾದಿಪ್ಪಭೇದಕಂ॥

ಚೇತೋಪರಿಯಞಾಣಂ।

೧೦೭೬.

ಪುಬ್ಬೇನಿವಾಸಞಾಣೇನ, ಕತ್ತಬ್ಬಾ ತದನುಸ್ಸತಿ।

ತಂ ಸಮ್ಪಾದೇತುಕಾಮೇನ, ಆದಿಕಮ್ಮಿಕಭಿಕ್ಖುನಾ।

ಝಾನಾನಿ ಪನ ಚತ್ತಾರಿ, ಸಮಾಪಜ್ಜಾನುಪುಬ್ಬತೋ॥

೧೦೭೭.

ಅಭಿಞ್ಞಾಪಾದಕಜ್ಝಾನಾ, ವುಟ್ಠಾಯ ಹಿ ತತೋ ಪುನ।

ಭಿಕ್ಖುನಾ ವಜ್ಜಿತಬ್ಬಾವ, ನಿಸಜ್ಜಾ ಸಬ್ಬಪಚ್ಛಿಮಾ॥

೧೦೭೮.

ತತೋ ಪಭುತಿ ಸಬ್ಬಮ್ಪಿ, ಪಟಿಲೋಮಕ್ಕಮಾ ಪನ।

ಸಬ್ಬಮಾವಜ್ಜಿತಬ್ಬಂ ತಂ, ದಿವಸೇ ರತ್ತಿಯಂ ಕತಂ॥

೧೦೭೯.

ಪಟಿಲೋಮಕ್ಕಮೇನೇವ, ದುತಿಯೇ ತತಿಯೇಪಿ ಚ।

ದಿವಸೇ ಪಕ್ಖಮಾಸೇಸು, ತಥಾ ಸಂವಚ್ಛರೇಸುಪಿ॥

೧೦೮೦.

ಯಾವ ಅಸ್ಮಿಂ ಭವೇ ಸನ್ಧಿ, ತಾವ ತೇನ ಚ ಭಿಕ್ಖುನಾ।

ಕತಮಾವಜ್ಜಿತಬ್ಬಂ ತಂ, ಪುರಿಮಸ್ಮಿಂ ಭವೇಪಿ ಚ॥

೧೦೮೧.

ಚುತಿಕ್ಖಣೇಪಿ ನಿಬ್ಬತ್ತಂ, ನಾಮರೂಪಞ್ಚ ಸಾಧುಕಂ।

ಏವಮಾವಜ್ಜಿತೇ ತಸ್ಮಿಂ, ನಾಮರೂಪೇ ಯದಾ ಪನ॥

೧೦೮೨.

ತದೇವಾರಮ್ಮಣಂ ಕತ್ವಾ, ನಾಮರೂಪಂ ಚುತಿಕ್ಖಣೇ।

ಮನೋದ್ವಾರೇ ಮನಕ್ಕಾರೋ, ಉಪ್ಪಜ್ಜತಿ ತದಾ ಪನ॥

೧೦೮೩.

ಆವಜ್ಜನೇ ನಿರುದ್ಧಸ್ಮಿಂ, ತದೇವಾರಮ್ಮಣಂ ಪನ।

ಕತ್ವಾ ಜವನಚಿತ್ತಾನಿ, ಹೋನ್ತಿ ಚತ್ತಾರಿ ಪಞ್ಚ ವಾ।

ಪುಬ್ಬೇ ವುತ್ತನಯೇನೇವ, ಸೇಸಂ ಞೇಯ್ಯಂ ವಿಭಾವಿನಾ॥

೧೦೮೪.

ಪರಿಕಮ್ಮಾದಿನಾಮಾನಿ, ಪುರಿಮಾನಿ ಭವನ್ತಿ ತು।

ಪಚ್ಛಿಮಂ ಅಪ್ಪನಾಚಿತ್ತಂ, ರೂಪಾವಚರಿಕಂ ಭವೇ॥

೧೦೮೫.

ತೇನ ಚಿತ್ತೇನ ಯಂ ಞಾಣಂ, ಸಂಯುತ್ತಂ ತೇನ ಯಾ ಪನ।

ಸಂಯುತ್ತಾ ಸತಿ ಸಾ ಪುಬ್ಬೇ-ನಿವಾಸಾನುಸ್ಸತೀರಿತಾ॥

ಪುಬ್ಬೇನಿವಾಸಾನುಸ್ಸತಿಞಾಣಂ।

೧೦೮೬.

ರೂಪಂ ಪಸ್ಸಿತುಕಾಮೇನ, ಭಿಕ್ಖುನಾ ದಿಬ್ಬಚಕ್ಖುನಾ।

ಕಸಿಣಾರಮ್ಮಣಂ ಝಾನಂ, ಅಭಿಞ್ಞಾಪಾದಕಂ ಪನ॥

೧೦೮೭.

ಅಭಿನೀಹಾರಕ್ಖಮಂ ಕತ್ವಾ, ತೇಜೋಕಸಿಣಮೇವ ವಾ।

ಓದಾತಕಸಿಣಂ ವಾಪಿ, ಆಲೋಕಕಸಿಣಮ್ಪಿ ವಾ॥

೧೦೮೮.

ಇಮೇಸು ಕತಪುಞ್ಞೇಹಿ, ಕಸಿಣೇಸು ಚ ತೀಸುಪಿ।

ಆಲೋಕಕಸಿಣಂ ಏತ್ಥ, ಸೇಟ್ಠನ್ತಿ ಪರಿದೀಪಿತಂ॥

೧೦೮೯.

ತಸ್ಮಾ ತಮಿತರಂ ವಾಪಿ, ಉಪ್ಪಾದೇತ್ವಾ ಯಥಾಕ್ಕಮಂ।

ಉಪಚಾರಭೂಮಿಯಂಯೇವ, ಠತ್ವಾ ತಂ ಪನ ಪಣ್ಡಿತೋ॥

೧೦೯೦.

ವಡ್ಢೇತ್ವಾನ ಠಪೇತಬ್ಬಂ, ನ ಉಪ್ಪಾದೇಯ್ಯ ಅಪ್ಪನಂ।

ಉಪ್ಪಾದೇತಿ ಸಚೇ ಹೋತಿ, ಪಾದಕಜ್ಝಾನನಿಸ್ಸಿತಂ॥

೧೦೯೧.

ಝಾನಸ್ಸ ವಡ್ಢಿತಸ್ಸನ್ತೋ-ಗತಂ ರೂಪಂ ತು ಯೋಗಿನಾ।

ಪಸ್ಸಿತಬ್ಬಂ ಭವೇ ರೂಪಂ, ಪಸ್ಸತೋ ಪನ ತಸ್ಸ ತಂ॥

೧೦೯೨.

ಪರಿಕಮ್ಮಸ್ಸ ವಾರೋ ಹಿ, ಅತಿಕ್ಕಮತಿ ತಾವದೇ।

ಆಲೋಕೋಪಿ ತತೋ ತಸ್ಸ, ಖಿಪ್ಪಮನ್ತರಧಾಯತಿ॥

೧೦೯೩.

ತಸ್ಮಿಂ ಅನ್ತರಹಿತೇ ರೂಪ-ಗತಮ್ಪಿ ಚ ನ ದಿಸ್ಸತಿ।

ತೇನಾಥ ಪಾದಕಜ್ಝಾನಂ, ಪವಿಸಿತ್ವಾ ತತೋ ಪುನ॥

೧೦೯೪.

ವುಟ್ಠಾಯ ಪನ ಆಲೋಕೋ, ಫರಿತಬ್ಬೋವ ಭಿಕ್ಖುನಾ।

ಏವಂ ಅನುಕ್ಕಮೇನೇವ, ಆಲೋಕೋ ಥಾಮವಾ ಸಿಯಾ॥

೧೦೯೫.

‘‘ಆಲೋಕೋ ಏತ್ಥ ಹೋತೂ’’ತಿ,

ಯತ್ತಕಂ ಠಾನಮೇವ ಸೋ।

ಪರಿಚ್ಛಿನ್ದತಿ ತತ್ಥೇವ,

ಆಲೋಕೋ ಪನ ತಿಟ್ಠತಿ॥

೧೦೯೬.

ದಿವಸಮ್ಪಿ ನಿಸೀದಿತ್ವಾ, ಪಸ್ಸತೋ ಹೋತಿ ದಸ್ಸನಂ।

ತಿಣುಕ್ಕಾಯ ಗತೋ ಮಗ್ಗಂ, ಪುರಿಸೇತ್ಥ ನಿದಸ್ಸನಂ॥

೧೦೯೭.

ಉಪ್ಪಾದನಕ್ಕಮೋಪಿಸ್ಸ, ತತ್ರಾಯಂ ದಿಬ್ಬಚಕ್ಖುನೋ।

ವುತ್ತಪ್ಪಕಾರರೂಪಂ ತಂ, ಕತ್ವಾ ಆರಮ್ಮಣಂ ಪನ॥

೧೦೯೮.

ಮನೋದ್ವಾರೇ ಮನಕ್ಕಾರೇ, ಜಾತೇ ಯಾನಿ ತದೇವ ಚ।

ರೂಪಂ ಆರಮ್ಮಣಂ ಕತ್ವಾ, ಜಾಯನ್ತಿ ಜವನಾನಿ ಹಿ॥

೧೦೯೯.

ಕಾಮಾವಚರಚಿತ್ತಾನಿ , ತಾನಿ ಚತ್ತಾರಿ ಪಞ್ಚ ವಾ।

ಹೇಟ್ಠಾ ವುತ್ತನಯೇನೇವ, ಸೇಸಂ ಞೇಯ್ಯಂ ವಿಭಾವಿನಾ॥

೧೧೦೦.

ಅತ್ಥಸಾಧಕಚಿತ್ತಂ ತಂ, ಚತುತ್ಥಜ್ಝಾನಿಕಂ ಮತಂ।

ತಂಚಿತ್ತಸಂಯುತಂ ಞಾಣಂ, ದಿಬ್ಬಚಕ್ಖುನ್ತಿ ವುಚ್ಚತಿ॥

೧೧೦೧.

ಅನಾಗತಂಸಞಾಣಸ್ಸ , ಯಥಾಕಮ್ಮುಪಗಸ್ಸ ಚ।

ಪರಿಕಮ್ಮಂ ವಿಸುಂ ನತ್ಥಿ, ಇಜ್ಝನ್ತಿ ದಿಬ್ಬಚಕ್ಖುನಾ॥

೧೧೦೨.

ಚುತೂಪಪಾತಞಾಣಮ್ಪಿ, ದಿಬ್ಬಚಕ್ಖುನ್ತಿ ವಾ ಪನ।

ಅತ್ಥತೋ ಏಕಮೇವೇದಂ, ಬ್ಯಞ್ಜನೇ ಪನ ನಾನತಾ॥

ದಿಬ್ಬಚಕ್ಖುಞಾಣಂ।

೧೧೦೩.

ಯೋಧ ಸುಣಾತಿ ಕರೋತಿ ಚ ಚಿತ್ತೇ,

ಗನ್ಥಮಿಮಂ ಪರಮಂ ಪನ ಭಿಕ್ಖು।

ಸೋ ಅಭಿಧಮ್ಮಮಹಣ್ಣವಪಾರಂ,

ಯಾತಿ ಅನೇನ ತರೇನ ತರಿತ್ವಾ॥

ಇತಿ ಅಭಿಧಮ್ಮಾವತಾರೇ ಅಭಿಞ್ಞಾನಿದ್ದೇಸೋ ನಾಮ

ಸೋಳಸಮೋ ಪರಿಚ್ಛೇದೋ।