೨೧. ಏಕವೀಸತಿಮೋ ಪರಿಚ್ಛೇದೋ
ಪಟಿಪದಾಞಾಣದಸ್ಸನವಿಸುದ್ಧಿನಿದ್ದೇಸೋ
೧೨೯೮.
ಅಟ್ಠಞಾಣವಸೇನೇವ
ನವಮಂ ಪಟಿಪದಾಞಾಣ-ದಸ್ಸನನ್ತಿ ಪವುಚ್ಚತಿ॥
೧೨೯೯.
ಅಟ್ಠ ಞಾಣಾನಿ ನಾಮೇತ್ಥ, ವೇದಿತಬ್ಬಾನಿ ವಿಞ್ಞುನಾ।
ಉಪಕ್ಲೇಸವಿನಿಮುತ್ತಂ, ಞಾಣಂ ಸುವಿಸದಂ ಪನ॥
೧೩೦೦.
ಉದಯಬ್ಬಯೇ ಚ ಭಙ್ಗೇ ಚ, ಭಯೇ ಆದೀನವೇ ತಥಾ।
ನಿಬ್ಬಿದಾಪಸ್ಸನಾಞಾಣಂ, ಞಾಣಂ ಮುಚ್ಚಿತುಕಮ್ಯತಾ॥
೧೩೦೧.
ಪಟಿಸಙ್ಖಾ ಚ ಸಙ್ಖಾರೇ, ಉಪೇಕ್ಖಾಞಾಣಮಟ್ಠಮಂ।
ಇಮಾನಿ ಅಟ್ಠ ಞಾಣಾನಿ, ನವಮಂ ಸಚ್ಚಾನುಲೋಮಕಂ॥
೧೩೦೨.
ಸಚ್ಚಾನುಲೋಮಞಾಣನ್ತಿ
ತಂ ಸಮ್ಪಾದೇತುಕಾಮೇನ, ಯೋಗಾವಚರಭಿಕ್ಖುನಾ॥
೧೩೦೩.
ಉದಯಬ್ಬಯಞಾಣಂ ತಂ, ಆದಿಂ ಕತ್ವಾ ಪನಟ್ಠಸು।
ಏತೇಸು ಪನ ಞಾಣೇಸು, ಯೋಗೋ ಕರಣಿಯೋ ಪನ॥
೧೩೦೪.
ಯಥಾನುಕ್ಕಮತೋ
ಅನಿಚ್ಚಾದಿವಸೇನೇವ, ಯೋಗಂ ಕತ್ವಾ ಠಿತಸ್ಸ ಹಿ॥
೧೩೦೫.
ಅನಿಚ್ಚಂ ದುಕ್ಖಮನತ್ತಾತಿ, ಸಙ್ಖಾರೇ ಅನುಪಸ್ಸತೋ।
ಅಟ್ಠನ್ನಂ ಪನ ಞಾಣಾನಂ, ವಸೇನ ಪನ ಯೋಗಿನೋ॥
೧೩೦೬.
ವಿಪಸ್ಸನಾ ಸಿಖಾಪತ್ತಾ, ಹೋತಿ ವುಟ್ಠಾನಗಾಮಿನೀ।
ಸಚ್ಚಾನುಲೋಮಞಾಣನ್ತಿ, ಅಯಮೇವ ಪವುಚ್ಚತಿ॥
೧೩೦೭.
ಸಙ್ಖಾರುಪೇಕ್ಖಾಞಾಣಂ ತಂ, ಆಸೇವನ್ತಸ್ಸ ಯೋಗಿನೋ।
ಇದಾನಿ ತಸ್ಸ ಮಗ್ಗೋ ಚ, ಸಮುಪ್ಪಜ್ಜಿಸ್ಸತೀತಿ ಹಿ॥
೧೩೦೮.
ಸಙ್ಖಾರುಪೇಕ್ಖಾ ಸಙ್ಖಾರೇ, ಅನಿಚ್ಚಾ ದುಕ್ಖಾತಿ ವಾ ತಥಾ।
ಸಮ್ಮಸಿತ್ವಾ ಭವಙ್ಗಂ ತು, ಪುನ ವೋತರತೇವ ಸಾ॥
೧೩೦೯.
ಭವಙ್ಗಾನನ್ತರಂ ಸಙ್ಖಾರು-ಪೇಕ್ಖಾಗತನಯೇನ ತು।
ಅನಿಚ್ಚಾದಿವಸೇನೇವ, ಸಙ್ಖಾರೇ ಪನ ಗೋಚರಂ॥
೧೩೧೦.
ಕುರುಮಾನಂ ಮನೋದ್ವಾರೇ, ಜಾಯತಾವಜ್ಜನಂ ತತೋ।
ಭವಙ್ಗಾವಟ್ಟನಂ ಕತ್ವಾ, ಜಾತಸ್ಸಾನನ್ತರಂ ಪನ॥
೧೩೧೧.
ಸಙ್ಖಾರೇ
ಉಪ್ಪಜ್ಜತೀತಿ ತಂ ಚಿತ್ತಂ, ಪರಿಕಮ್ಮನ್ತಿ ವುಚ್ಚತಿ॥
೧೩೧೨.
ತದನನ್ತರಮೇವಞ್ಞಂ, ಸಙ್ಖಾರಾರಮ್ಮಣಂ ಪುನ।
ದುತಿಯಂ ಜವನಂ ಹೋತಿ, ಉಪಚಾರನ್ತಿ ತಂ ಮತಂ॥
೧೩೧೩.
ತದನನ್ತರಂ ತಂ ಹೋತಿ, ತಥಾ ಸಙ್ಖಾರಗೋಚರಂ।
ತತಿಯಂ ಜವನಚಿತ್ತಂ, ಅನುಲೋಮನ್ತಿ ಸಞ್ಞಿತಂ॥
೧೩೧೪.
ಪುರಿಮಾನಂ ಪನಟ್ಠನ್ನಂ, ಞಾಣಾನಂ ಅನುಲೋಮತೋ।
ಬೋಧಿಪಕ್ಖಿಯಧಮ್ಮಾನಂ, ಉದ್ಧಞ್ಚ ಅನುಲೋಮತೋ॥
೧೩೧೫.
ತೇನೇವ
ಇದಂ ಹಿ ಪನ ಸಚ್ಚಾನು-ಲೋಮಞಾಣಂ ಮಹೇಸಿನಾ॥
೧೩೧೬.
‘‘ವುಟ್ಠಾನಗಾಮಿನೀಯಾ
ಞೇಯ್ಯಂ ಸಬ್ಬಪಕಾರೇನ, ಪರಿಯೋಸಾನನ್ತಿ ಗೋತ್ರಭು॥
೧೩೧೭.
ಇತಿನೇಕೇಹಿ ನಾಮೇಹಿ, ಕಿತ್ತಿತಾಯಾ ಮಹೇಸಿನಾ।
ವುಟ್ಠಾನಗಾಮಿನೀ ಸನ್ತಾ, ಪರಿಸುದ್ಧಾ ವಿಪಸ್ಸನಾ॥
೧೩೧೮.
ವುಟ್ಠಾತುಕಾಮೋ ಸಂಸಾರದುಕ್ಖಪಙ್ಕಾ ಮಹಬ್ಭಯಾ।
ಕರೇಯ್ಯ ಸತತಂ ತತ್ಥ, ಯೋಗಂ ಪಣ್ಡಿತಜಾತಿಕೋ॥
ಇತಿ ಅಭಿಧಮ್ಮಾವತಾರೇ ಪಟಿಪದಾಞಾಣದಸ್ಸನವಿಸುದ್ಧಿನಿದ್ದೇಸೋ ನಾಮ
ಏಕವೀಸತಿಮೋ ಪರಿಚ್ಛೇದೋ।