೧. ಪಠಮೋ ಪರಿಚ್ಛೇದೋ

ನಾಮತ್ತಯವಿಭಾಗೋ

೩.

ತತ್ಥ ಚಿತ್ತಂ ಚೇತಸಿಕಂ, ನಿಬ್ಬಾನನ್ತಿ ಮತಂ ತಿಧಾ।

ನಾಮಂ ರೂಪಂ ತು ದುವಿಧಂ, ಭೂತೋಪಾದಾಯಭೇದತೋ॥

೪.

ಕಾಮಭೂಮಾದಿಭೇದೇನ, ತತ್ಥ ಚಿತ್ತಂ ಚತುಬ್ಬಿಧಂ।

ಚೇತೋಯುತ್ತಾ ದ್ವಿಪಞ್ಞಾಸ, ಧಮ್ಮಾ ಚೇತಸಿಕಾ ಮತಾ॥

೫.

ಚಕ್ಖುಸೋತಘಾನಜಿವ್ಹಾ-ಕಾಯವಿಞ್ಞಾಣಧಾತುಯೋ।

ಸಮ್ಪಟಿಚ್ಛನಚಿತ್ತಞ್ಚ, ತಥಾ ಸನ್ತೀರಣದ್ವಯಂ॥

೬.

ಸೋಮನಸ್ಸಸಹಗತಂ, ಉಪೇಕ್ಖಾಸಹಿತನ್ತಿ ಚ।

ಇಚ್ಚಾಹೇತುಕಚಿತ್ತಾನಿ, ಪುಞ್ಞಪಾಕಾನಿ ಅಟ್ಠಧಾ॥

೭.

ಸೋಮನಸ್ಸಯುತಂ ತತ್ಥ, ಹಿತ್ವಾ ಸನ್ತೀರಣಂ ತಥಾ।

ಸತ್ತಾಕುಸಲಪಾಕಾನಿ, ತಾನೇವಾತಿ ವಿನಿದ್ದಿಸೇ॥

೮.

ಪಞ್ಚದ್ವಾರಮನೋದ್ವಾರಾವಜ್ಜನಂ ಹಸನನ್ತಿ ಚ।

ಕ್ರಿಯಚಿತ್ತಮುದೀರಿತಂ, ತಿವಿಧಮ್ಪಿ ಅಹೇತುಕಂ॥

೯.

ಏವಂ ಅಟ್ಠಾರಸವಿಧಂ, ಮಾನಸಂ ಹೋತಿಹೇತುಕಂ।

ಮೂಲಭೇದೇನಾಕುಸಲಂ, ಚಿತ್ತಂ ತು ತಿವಿಧಂ ಮತಂ॥

೧೦.

ಸೋಮನಸ್ಸಸಹಗತಂ, ಉಪೇಕ್ಖಾಸಹಿತಂ ತಥಾ।

ದಿಟ್ಠಿಗತಸಮ್ಪಯುತ್ತಂ, ವಿಪ್ಪಯುತ್ತನ್ತಿ ಭೇದಿತಂ॥

೧೧.

ಅಸಙ್ಖಾರಂ ಸಸಙ್ಖಾರಮಿತಿ ಭಿನ್ನಂ ಪನಟ್ಠಧಾ।

ಲೋಭಮೂಲಂ ಪಕಾಸೇನ್ತಿ, ತತ್ಥಾಕುಸಲಮಾನಸಂ॥

೧೨.

ದೋಮನಸ್ಸಸಹಗತಂ, ಪಟಿಘೇನ ಸಮಾಯುತಂ।

ದೋಸಮೂಲಮಸಙ್ಖಾರಂ, ಸಸಙ್ಖಾರನ್ತಿಪಿ ದ್ವಿಧಾ॥

೧೩.

ವಿಚಿಕಿಚ್ಛಾಸಹಗತಂ , ಉದ್ಧಚ್ಚಸಹಿತನ್ತಿ ಚ।

ಮೋಹಮೂಲಞ್ಚ ದುವಿಧಂ, ಉಪೇಕ್ಖಾಯ ಸಮಾಯುತಂ॥

೧೪.

ದ್ವಾದಸಾಕುಸಲಾನೇವಂ, ಚಿತ್ತಾನೀತಿ ವಿಭಾವಯೇ।

ಹಿತ್ವಾಹೇತುಕಪಾಪಾನಿ, ಸೋಭನಾನಿ ತತೋ ಪರಂ॥

೧೫.

ಸೋಮನಸ್ಸಸಹಗತಂ, ಉಪೇಕ್ಖಾಸಹಿತಂ ತಥಾ।

ದ್ವಿಧಾ ಞಾಣೇನ ಸಂಯುತ್ತಂ, ವಿಪ್ಪಯುತ್ತನ್ತಿ ಭೇದಿತಂ॥

೧೬.

ಅಸಙ್ಖಾರಂ ಸಸಙ್ಖಾರಮಿತಿ ಭಿನ್ನಂ ಪನಟ್ಠಧಾ।

ಸಹೇತುಕಾಮಾವಚರ-ಪುಞ್ಞಪಾಕಕ್ರಿಯಾ ಭವೇ॥

೧೭.

ಕಾಮೇ ತೇವೀಸ ಪಾಕಾನಿ, ಪುಞ್ಞಾಪುಞ್ಞಾನಿ ವೀಸತಿ।

ಏಕಾದಸ ಕ್ರಿಯಾ ಚೇತಿ, ಚತುಪಞ್ಞಾಸ ಸಬ್ಬಥಾ॥

೧೮.

ತಕ್ಕಚಾರಪೀತಿಸುಖೇಕಗ್ಗತಾಸಹಿತಂ ಪನ।

ಪಠಮಜ್ಝಾನಕುಸಲಂ, ವಿಪಾಕಞ್ಚ ಕ್ರಿಯಾ ತಥಾ॥

೧೯.

ದುತಿಯಂ ತಕ್ಕತೋ ಹೀನಂ, ತತಿಯಂ ತು ವಿಚಾರತೋ।

ಚತುತ್ಥಂ ಪೀತಿತೋ ಹೀನಂ, ಉಪೇಕ್ಖೇಕಗ್ಗತಾಯುತಂ॥

೨೦.

ಪಞ್ಚಮಂ ಪಞ್ಚದಸಧಾ, ರೂಪಾವಚರಮೀರಿತಂ।

ಪಞ್ಚಮಜ್ಝಾನಮೇವೇಕಮರೂಪಾವಚರಂ ಪನ॥

೨೧.

ಆಕಾಸಾನಞ್ಚಾಯತನಂ, ಪುಞ್ಞಪಾಕಕ್ರಿಯಾ ತಥಾ।

ವಿಞ್ಞಾಣಞ್ಚಾಯತನಞ್ಚ, ಆಕಿಞ್ಚಞ್ಞಾಯತನಕಂ।

ನೇವಸಞ್ಞಾನಾಸಞ್ಞಾಯತನಂ ದ್ವಾದಸಧಾ ಭವೇ॥

೨೨.

ಸೋತಾಪತ್ತಿಮಗ್ಗಚಿತ್ತಂ, ಫಲಚಿತ್ತಂ ತಥಾಪರಂ।

ಸಕದಾಗಾಮಾನಾಗಾಮಿ, ಅರಹತ್ತನ್ತಿ ಅಟ್ಠಧಾ॥

೨೩.

ಝಾನಙ್ಗಯೋಗಭೇದೇನ, ಕತ್ವೇಕೇಕಂ ತು ಪಞ್ಚಧಾ।

ವಿತ್ಥಾರಾನುತ್ತರಂ ಚಿತ್ತಂ, ಚತ್ತಾಲೀಸವಿಧಂ ಭವೇ॥

೨೪.

ರೂಪಾವಚರಚಿತ್ತಾನಿ , ಗಯ್ಹನ್ತಾನುತ್ತರಾನಿ ಚ।

ಪಠಮಾದಿಜ್ಝಾನಭೇದೇ, ಆರುಪ್ಪಞ್ಚಾಪಿ ಪಞ್ಚಮೇ॥

೨೫.

ದ್ವಾದಸಾಕುಸಲಾನೇವಂ, ಕುಸಲಾನೇಕವೀಸತಿ।

ಛತ್ತಿಂಸೇವ ವಿಪಾಕಾನಿ, ಕ್ರಿಯಚಿತ್ತಾನಿ ವೀಸತಿ॥

೨೬.

ಏಕವೀಸಸತಂ ವಾಥ, ಏಕೂನನವುತೀವಿಧಂ।

ಚಿತ್ತಂ ತಂಸಮ್ಪಯೋಗೇನ, ಭಿನ್ನಾ ಚೇತಸಿಕಾ ತಥಾ॥

೨೭.

ಫಸ್ಸೋ ಚ ವೇದನಾ ಸಞ್ಞಾ, ಚೇತನೇಕಗ್ಗತಾ ತಥಾ।

ಜೀವಿತಂ ಮನಸೀಕಾರೋ, ಸಬ್ಬಸಾಧಾರಣಾ ಮತಾ॥

೨೮.

ತಕ್ಕಚಾರಾಧಿಮೋಕ್ಖಾ ಚ, ವೀರಿಯಂ ಛನ್ದಪೀತಿಯೋ।

ಪಕಿಣ್ಣಕಾ ಛ ಅಕ್ಖಾತಾ, ತೇರಸಞ್ಞಸಮಾನತಾ॥

೨೯.

ಪಕಿಣ್ಣಕಾ ನ ವಿಞ್ಞಾಣೇ, ವಿತಕ್ಕೋ ದುತಿಯಾದಿಸು।

ವಿಚಾರೋ ತತಿಯಾದಿಮ್ಹಿ, ಅಧಿಮೋಕ್ಖೋ ತು ಕಙ್ಖಿತೇ॥

೩೦.

ಸನ್ತೀರಣಮನೋಧಾತುತ್ತಿಕೇಸು ವೀರಿಯಂ ತಥಾ।

ಚತುತ್ಥಸುಖಿತೇ ಪೀತಿ, ಛನ್ದೋಹೇತುಮ್ಹಿ ಮೋಮುಹೇ॥

೩೧.

ಛಸಟ್ಠಿ ಪಞ್ಚಪಞ್ಞಾಸ, ಏಕಾದಸ ಚ ಸೋಳಸ।

ಸತ್ತತಿ ವೀಸತಿ ಚೇವ, ತಾನಿ ಚಿತ್ತಾನಿ ದೀಪಯೇ॥

೩೨.

ಮೋಹಾಹಿರಿಕಾನೋತ್ತಪ್ಪ-ಮುದ್ಧಚ್ಚಂ ಸಬ್ಬಪಾಪಜಂ।

ಇಸ್ಸಾಮಚ್ಛೇರಕುಕ್ಕುಚ್ಚದೋಸಾ ತು ಪಟಿಘೇ ತಥಾ॥

೩೩.

ಲೋಭೋ ಲೋಭೇ ತು ದಿಟ್ಠಿ ಚ, ದಿಟ್ಠಿಯುತ್ತೇ ವಿಯುತ್ತಕೇ।

ಮಾನೋ ಚ ಥಿನಮಿದ್ಧಂ ತು, ಸಸಙ್ಖಾರೇಸು ಪಞ್ಚಸು॥

೩೪.

ಕಙ್ಖಿತೇ ವಿಚಿಕಿಚ್ಛಾತಿ, ಚುದ್ದಸಾಕುಸಲಾನಿಮೇ।

ದ್ವಾದಸಾಕುಸಲೇಸ್ವೇವ, ನಿಯಮೇನ ವವತ್ಥಿತಾ॥

೩೫.

ಸದ್ಧಾ ಸತಿ ಹಿರೋತ್ತಪ್ಪಂ, ಅಲೋಭಾದೋಸಮಜ್ಝತಾ।

ಕಾಯಚಿತ್ತಾನಂ ಪಸ್ಸದ್ಧಿ, ಲಹುತಾ ಮುದುತಾ ತಥಾ॥

೩೬.

ಕಮ್ಮಞ್ಞತಾ ಚ ಪಾಗುಞ್ಞಉಜುತಾತಿ ಯುಗಾ ಛ ಚ।

ಏಕೂನವೀಸತಿ ಧಮ್ಮಾ, ಅಞ್ಞಮಞ್ಞಾವಿಯೋಗಿನೋ।

ಏಕೂನಸಟ್ಠಿಚಿತ್ತೇಸು, ಸೋಭನೇಸು ಪವತ್ತಿತಾ॥

೩೭.

ಸಮ್ಮಾವಾಚಾ ಚ ಕಮ್ಮನ್ತಾಜೀವಾತಿ ವಿರತೀ ಇಮಾ।

ಲೋಕುತ್ತರೇ ಸದಾ ಸಬ್ಬಾ, ಸಹ ಕಾಮಸುಭೇ ವಿಸುಂ॥

೩೮.

ಕರುಣಾಮುದಿತಾ ನಾನಾ, ರೂಪೇ ಪಞ್ಚಮವಜ್ಜಿತೇ।

ಕದಾಚಿ ಕಾಮೇ ಕುಸಲೇ, ಕ್ರಿಯಚಿತ್ತೇ ಸಹೇತುಕೇ॥

೩೯.

ತಿಹೇತುಕೇಸು ಚಿತ್ತೇಸು, ಪಞ್ಞಾ ಸಬ್ಬತ್ಥ ಲಬ್ಭತಿ।

ಏತೇ ಸದ್ಧಾದಯೋ ಧಮ್ಮಾ, ಪಞ್ಚವೀಸತಿ ಸೋಭನಾ॥

೪೦.

ಇಸ್ಸಾಮಚ್ಛೇರಕುಕ್ಕುಚ್ಚವಿರತೀಕರುಣಾದಯೋ।

ನಾನಾ ಕದಾಚಿ ಮಾನೋ ಚ, ಥಿನಮಿದ್ಧಂ ತಥಾ ಸಹ॥

೪೧.

ಸತ್ತ ಸಬ್ಬತ್ಥ ಜಾಯನ್ತಿ, ಛ ತು ಧಮ್ಮಾ ಯಥಾರಹಂ।

ಚುದ್ದಸಾಕುಸಲೇಸ್ವೇವ, ಸೋಭನೇಸ್ವೇವ ಸೋಭನಾ॥

೪೨.

ದ್ವೇಪಞ್ಞಾಸ ಪನಿಚ್ಚೇವಂ, ಧಮ್ಮೇ ಸಙ್ಗಯ್ಹ ಮಾನಸೇ।

ಲಬ್ಭಮಾನೇ ವಿಭಾವೇಯ್ಯ, ಪಚ್ಚೇಕಮ್ಪಿ ವಿಚಕ್ಖಣೋ॥

೪೩.

ಸೋಭನಞ್ಞಸಮಾನಾ ಚ, ಪಠಮೇ ವಿರತೀ ವಿನಾ।

ದುತಿಯಾದೀಸು ತಕ್ಕಞ್ಚ, ವಿಚಾರಂ ತತಿಯಾದಿಸು॥

೪೪.

ಚತುತ್ಥಾದೀಸು ಪೀತಿಞ್ಚ, ಕರುಣಾದಿಞ್ಚ ಪಞ್ಚಮೇ।

ಹಿತ್ವಾ ನೇವ ವಿಯೋಜೇಯ್ಯ, ಸಙ್ಖಿಪಿತ್ವಾನ ಪಞ್ಚಧಾ॥

೪೫.

ಪಞ್ಚತಿಂಸ ಚತುತ್ತಿಂಸ, ತೇತ್ತಿಂಸ ಚ ಯಥಾಕ್ಕಮಂ।

ದ್ವತ್ತಿಂಸ ತಿಂಸ ಏವಾಥ, ಜಾಯನ್ತೀತಿ ಮಹಗ್ಗತೇ॥

೪೬.

ಗಹೇತ್ವಾ ವಿರತೀ ಸಬ್ಬಾ, ಹಿತ್ವಾನ ಕರುಣಾದಯೋ।

ಪಠಮೇ ದುತಿಯಾದಿಮ್ಹಿ, ವಿತಕ್ಕಾದಿಂ ವಿನಾ ತಥಾ॥

೪೭.

ಪಞ್ಚಧಾವ ಗಣೇಯ್ಯೇವಂ, ಛತ್ತಿಂಸಾ ಚ ಯಥಾಕ್ಕಮಂ।

ಪಞ್ಚತಿಂಸ ಚತುತ್ತಿಂಸ, ತೇತ್ತಿಂಸದ್ವಯಮುತ್ತರೇ॥

೪೮.

ಸೋಭನಞ್ಞಸಮಾನಾ ಚ, ಕಾಮೇಸು ಕುಸಲೇ ಕ್ರಿಯೇ।

ಹಿತ್ವಾ ವಿರತಿಯೋ ಪಾಕೇ, ವಿರತೀಕರುಣಾದಯೋ॥

೪೯.

ಞಾಣಯುತ್ತೇ ಸೋಮನಸ್ಸೇ, ವಿಯುತ್ತೇ ಞಾಣವಜ್ಜಿತಾ।

ಉಪೇಕ್ಖಕೇ ಪೀತಿಹೀನಾ, ವಿಪ್ಪಯುತ್ತೇ ದ್ವಯಂ ವಿನಾ॥

೫೦.

ಚತುಧಾ ತಿವಿಧೇಸ್ವೇವಂ, ವಿಗಣೇಯ್ಯ ದ್ವಯಂ ದ್ವಯಂ।

ನ ಸನ್ತುಪೇಕ್ಖಾಸಹಿತೇ, ಕರುಣಾದೀತಿ ಕೇಚನ॥

೫೧.

ಅಟ್ಠತಿಂಸ ಸತ್ತತಿಂಸದ್ವಯಂ ಛತ್ತಿಂಸಕಂ ಸುಭೇ।

ಪಞ್ಚತಿಂಸ ಚತುತ್ತಿಂಸದ್ವಯಂ ತೇತ್ತಿಂಸಕಂ ಕ್ರಿಯೇ॥

೫೨.

ತೇತ್ತಿಂಸ ಪಾಕೇ ದ್ವತ್ತಿಂಸದ್ವಯೇಕತಿಂಸಕಂ ಭವೇ।

ಸಹೇತುಕಾಮಾವಚರಪುಞ್ಞಪಾಕಕ್ರಿಯಾಮನೇ॥

೫೩.

ಮೋಹಾದಯೋ ಸಮಾನಾ ಚ, ಪಠಮೇ ಲೋಭದಿಟ್ಠಿಯಾ।

ತತಿಯೇ ಲೋಭಮಾನೇನ, ಜಾಯನ್ತೇಕೂನವೀಸತಿ॥

೫೪.

ಅಟ್ಠಾರಸ ಪೀತಿಹೀನಾ, ಪಞ್ಚಮೇ ಸತ್ತಮೇ ತಥಾ।

ನವಮೇ ದೋಸಕುಕ್ಕುಚ್ಚಮಚ್ಛರಿಸ್ಸಾಹಿ ವೀಸತಿ॥

೫೫.

ಪಠಮಾದೀಸು ವುತ್ತಾವ, ದುತಿಯಾದೀಸು ಜಾಯರೇ।

ಥಿನಮಿದ್ಧೇನೇಕವೀಸ, ವೀಸ ದ್ವೇವೀಸತಿಕ್ಕಮಾ॥

೫೬.

ಛನ್ದಪೀತಿಂ ವಿನುದ್ಧಚ್ಚೇ, ಕಙ್ಖಿತೇ ನಿಚ್ಛಯಂ ವಿನಾ।

ಪಞ್ಚದಸೇವ ಕಙ್ಖಾಯ, ಅಸುಭೇಸು ವಿಭಾವಯೇ॥

೫೭.

ಸಿತೇ ಸಮಾನಾ ನಿಚ್ಛನ್ದಾ, ದ್ವಾದಸೇಕಾದಸೇವ ತು।

ಪೀತಿಂ ಹಿತ್ವಾನ ವೋಟ್ಠಬ್ಬೇ, ವೀರಿಯಂ ಸುಖತೀರಣೇ॥

೫೮.

ದ್ವಯಂ ಹಿತ್ವಾ ಮನೋಧಾತು, ಉಪೇಕ್ಖಾತೀರಣೇ ದಸ।

ಸತ್ತ ಸಾಧಾರಣಾ ಏವ, ಪಞ್ಚವಿಞ್ಞಾಣಸಮ್ಭವಾ॥

೫೯.

ಇತಿ ಚೇತಸಿ ಸಮ್ಭೂತಾ,

ದ್ವೇಪಞ್ಞಾಸ ಯಥಾರಹಂ।

ಞೇಯ್ಯಾ ಚೇತಸಿಕಾ ಧಮ್ಮಾ,

ಚೇತೋಭೇದಪ್ಪಭೇದಿನೋ॥

೬೦.

ಸುಞ್ಞತಞ್ಚಾನಿಮಿತ್ತಞ್ಚ, ತಥಾಪಣಿಹಿತನ್ತಿ ಚ।

ತಿವಿಧಾಕಾರಮೀರೇನ್ತಿ, ನಿಬ್ಬಾನಮಮತಂ ಬುಧಾ॥

೬೧.

ಯಂ ಆರಬ್ಭ ಪವತ್ತನ್ತಂ, ತತ್ಥಾನುತ್ತರಮಾನಸಂ।

ಸುಞ್ಞತಾದಿವಿಮೋಕ್ಖೋತಿ, ನಾಮಮಾಲಮ್ಬತೋ ಲಭೇ॥

೬೨.

ಸೋಪಾದಿಸೇಸನಿಬ್ಬಾನಧಾತು ಚೇವ ತಥಾಪರಾ।

ಅನುಪಾದಿಸೇಸಾ ಚಾತಿ, ದುವಿಧಾ ಪರಿಯಾಯತೋ॥

೬೩.

ತದೇತಂ ವಾನನಿಕ್ಖನ್ತಮಚ್ಚನ್ತಂ ಸನ್ತಿಲಕ್ಖಣಂ।

ಅಸ್ಸಾಸಕರಣರಸಂ, ಖೇಮಭಾವೇನ ಗಯ್ಹತಿ॥

೬೪.

ತಂ ನಾಮೇತೀತಿ ನಿಬ್ಬಾನಂ, ನಮನ್ತೀತಿ ತತೋಪರೇ।

ತೇಪಞ್ಞಾಸಾತಿ ನಾಮಾನಿ, ಚತುಪಞ್ಞಾಸ ಸಬ್ಬಥಾ॥

೬೫.

ಚಿತ್ತಚೇತಸಿಕಯೋಜನಾನಯಂ,

ಚಿತ್ತಮುತ್ತಮಮಿದಂ ಪಕಾಸಿತಂ।

ಸಾಧು ಚೇತಸಿ ನಿಧಾಯ ಪಣ್ಡಿತಾ,

ಸಾಧು ಸಾಸನಧರಾ ಭವನ್ತಿ ತೇ॥

೬೬.

ಬುದ್ಧಪ್ಪವತ್ತಮವಗಾಹಿತಬೋಧಿಞಾಣ-

ಮಿಚ್ಚಾಭಿಧಮ್ಮಮವಗಾಹಿತಸಬ್ಬಧಮ್ಮಂ ।

ಓಗಯ್ಹ ನಾಮಗತರಾಸಿಮಸೇಸಯಿತ್ವಾ,

ಸಙ್ಗಯ್ಹ ಸಬ್ಬಮಿಧ ಯೋಜಿತಮಾದರೇನ॥

ಇತಿ ನಾಮರೂಪಪರಿಚ್ಛೇದೇ ನಾಮತ್ತಯವಿಭಾಗೋ ನಾಮ

ಪಠಮೋ ಪರಿಚ್ಛೇದೋ।