೩. ತತಿಯೋ ಪರಿಚ್ಛೇದೋ

ಭೇದಸಙ್ಗಹವಿಭಾಗೋ

೧೨೩.

ಏವಂ ಭೇದಸಭಾವೇಸು, ತೇಸ್ವೇವ ಪುನ ಸಙ್ಗಹಂ।

ಸಭಾವತ್ಥವಿಸೇಸೇಹಿ, ಪವಕ್ಖಾಮಿ ಇತೋ ಪರಂ॥

೧೨೪.

ಅಸಾಧಾರಣಞಾಣೇಹಿ, ಸತ್ಥಾ ವತ್ಥುವಿವೇಚಕೋ।

ಸಙ್ಗಹೇತ್ವಾ ಸಭಾಗೇಹಿ, ಧಮ್ಮೇ ದಸ್ಸೇಸಿ ಚಕ್ಖುಮಾ॥

೧೨೫.

ದಿಟ್ಠಿಭಿನಿವೇಸಟ್ಠೇನ, ಯಥಾಭೂತಸಭಾವತೋ।

ಪರಮಾಮಸತಿಚ್ಚೇಕಾ, ಪರಾಮಾಸೋತಿ ಭಾಸಿತಾ॥

೧೨೬.

ಕಿಲೇಸಾಸುಚಿಭಾವೇನ, ವಣಸ್ಸಾವರಸೋ ವಿಯ।

ಆಲಿಮ್ಪನ್ತಾವ ಸನ್ತಾನಂ, ಸವನ್ತೀತಿ ಪಕಾಸಿತಾ॥

೧೨೭.

ಕಾಮತಣ್ಹಾ ಭವತಣ್ಹಾ, ದಿಟ್ಠಾವಿಜ್ಜಾತಿ ಆಸವಾ।

ಚತ್ತಾರೋ ಆಸವಟ್ಠೇನ, ತಯೋ ಧಮ್ಮಾ ಸಭಾವತೋ॥

೧೨೮.

ಏತೇವೋ ಘಾತಿ ವುತ್ತಾವ, ದ್ವಾರಾಲಮ್ಬಾಭಿವಾಹಿನೋ।

ಓತ್ಥರಿತ್ವಾ ಪರಾಭೂತೇ, ಹರನ್ತಾ ಪಾಣಿನೋ ಭವೇ॥

೧೨೯.

ಯೋಗಾತಿ ಚಾಹು ತೇ ಏವ, ಪಾಣಿನೋ ಭವಯನ್ತಕೇ।

ದ್ವಾರಾಲಮ್ಬಾಭಿಸಮ್ಬನ್ಧಾ, ಯನ್ತಬನ್ಧಾವ ಯೋಜಿತಾ॥

೧೩೦.

ಸನ್ತಾನಮಧಿಗಣ್ಹನ್ತಾ, ಮಾಲುವಾವ ಮಹಾತರುಂ।

ಗಣ್ಹನ್ತಾ ದಳ್ಹಮಾಲಮ್ಬಂ, ಮಣ್ಡೂಕಮಿವ ಪನ್ನಗೋ॥

೧೩೧.

ಕಾಮತಣ್ಹಾ ಚ ದಿಟ್ಠಿ ಚ, ಉಪಾದಾನಾ ಚತುಬ್ಬಿಧಾ।

ದಿಟ್ಠಿ ದಿಟ್ಠಿಸೀಲಬ್ಬತ-ಮತ್ತವಾದೋತಿ ಭೇದಿತಾ॥

೧೩೨.

ಕಾಯೇನ ಕಾಯಂ ಗನ್ಥೇನ್ತಾ, ದುಪ್ಪಮುಞ್ಚಾನುವೇಠಿನೋ।

ಕಥಿತಾ ಕಾಯಗನ್ಥಾತಿ, ತಣ್ಹಾಬ್ಯಾಪಾದದಿಟ್ಠಿಯೋ॥

೧೩೩.

ಸೀಲಬ್ಬತಪರಾಮಾಸೋ, ಇತಿ ದಿಟ್ಠಿ ವಿಭೇದಿತಾ।

ಇದಂಸಚ್ಚಾಭಿನಿವೇಸೋ, ಇತಿ ಚೇವಂ ಚತುಬ್ಬಿಧಾ॥

೧೩೪.

ನೇಕ್ಖಮ್ಮಂ ಪಲಿಬೋಧೇನ್ತಾ, ಭಾವನಾಪರಿಪನ್ಥಕಾ।

ಸನ್ತಾನಮಣ್ಡಕೋಸಾವ, ಪರಿಯೋನನ್ಧಕಾತಿ ಚ॥

೧೩೫.

ಕಾಮಚ್ಛನ್ದೋ ಚ ಬ್ಯಾಪಾದೋ, ಥಿನಮಿದ್ಧಞ್ಚ ಸಂಸಯೋ।

ಅವಿಜ್ಜುದ್ಧಚ್ಚಕುಕ್ಕುಚ್ಚಮಿತಿ ನೀವರಣಾ ಮತಾ॥

೧೩೬.

ಆಗಾಳ್ಹಂ ಪರಿಯಾದಾಯ, ಓಗಯ್ಹನುಪ್ಪವತ್ತಿನೋ।

ಯೋಪ್ಪರೋಗಾವ ಸನ್ತಾನ-ಮನುಸೇನ್ತೀತಿ ಭಾಸಿತಾ॥

೧೩೭.

ಕಾಮರಾಗೋ ಭವರಾಗೋ, ಪಟಿಘೋ ಮಾನದಿಟ್ಠಿಯೋ।

ಕಙ್ಖಾವಿಜ್ಜಾತಿ ಸತ್ತೇವ, ಛ ಧಮ್ಮಾನುಸಯಾ ಮತಾ॥

೧೩೮.

ದ್ವಾರಾಲಮ್ಬಣಬನ್ಧೇನ, ಪಾಣೀನಂ ಭವಮಣ್ಡಲೇ।

ಸಂಯೋಜನಾನಿ ವುತ್ತಾನಿ, ಪಾಸಬನ್ಧಾವ ಪಕ್ಖಿನಂ॥

೧೩೯.

ಕಾಮರೂಪಾರೂಪರಾಗಾ, ಪಟಿಘೋ ಮೋಹಸಂಸಯೋ।

ದಿಟ್ಠಿ ಸೀಲಬ್ಬತಂ ಮಾನೋ, ಉದ್ಧಚ್ಚೇನ ದಸಾ ಭವೇ॥

೧೪೦.

ರೂಪಾರೂಪರಾಗುದ್ಧಚ್ಚಂ, ಅಭಿಧಮ್ಮೇ ವಿನಾ ಪುನ।

ಭವರಾಗಿಸ್ಸ ಮಚ್ಛೇರಂ, ಗಹೇತ್ವಾ ದಸಧಾ ಸಿಯುಂ॥

೧೪೧.

ಸಂಕ್ಲೇಪಯನ್ತಿ ಸನ್ತಾನಂ, ಉಪಘಾತೇನ್ತಿ ಪಾಣಿನೋ।

ಸಹಜಾತೇಕ್ಲೇಸೇನ್ತೀತಿ, ಕಿಲೇಸಾತಿ ಪಕಾಸಿತಾ॥

೧೪೨.

ಲೋಭೋ ದೋಸೋ ಚ ಮೋಹೋ ಚ,

ದಿಟ್ಠಿ ಮಾನೋ ಚ ಸಂಸಯೋ।

ಥಿನಾಹಿರಿಕನೋತ್ತಪ್ಪ-

ಮುದ್ಧಚ್ಚೇನ ಸಿಯುಂ ದಸ॥

೧೪೩.

ನವಸಙ್ಗಹಿತಾ ಏತ್ಥ, ದಿಟ್ಠಿಲೋಭಾ ಪಕಾಸಿತಾ।

ಸತ್ತಸಙ್ಗಹಿತಾವಿಜ್ಜಾ, ಪಟಿಘೋ ಪಞ್ಚಸಙ್ಗಹೋ॥

೧೪೪.

ಚತುಸಙ್ಗಹಿತಾ ಕಙ್ಖಾ, ಮಾನುದ್ಧಚ್ಚಾ ತಿಸಙ್ಗಹಾ।

ದುಕಸಙ್ಗಹಿತಂ ಥೀನಂ, ಕುಕ್ಕುಚ್ಚಮೇಕಸಙ್ಗಹಂ॥

೧೪೫.

ದ್ವಿಧಾಹಿರಿಕನೋತ್ತಪ್ಪ-ಮಿಸ್ಸಾಮಚ್ಛರಿಯಂ ತಥಾ।

ಇಚ್ಚೇವಂ ದಸಧಾ ವುತ್ತಾ, ಪಾಪಕೇಸ್ವೇವ ಸಙ್ಗಹಾ॥

೧೪೬.

ಪರಾಮಾಸಾಸವೋಘಾ ಚ, ಯೋಗುಪಾದಾನಗನ್ಥತೋ।

ನೀವಾರಣಾನುಸಯತೋ, ಸಂಯೋಜನಕಿಲೇಸತೋ॥

೧೪೭.

ಚುದ್ದಸೇವ ತು ಸಙ್ಖೇಪಾ, ಸತ್ತಪಞ್ಞಾಸ ಭೇದತೋ।

ಯಥಾಧಮ್ಮಾನುಸಾರೇನ, ಚಿತ್ತುಪ್ಪಾದೇಸು ಯೋಜಯೇ॥

೧೪೮.

ತತೋಪರೇ ನೋಪರಾಮಾ-ಸಾದಿಭೇದಿತಸಙ್ಗಹಾ।

ಚಿತ್ತಂ ಚೇತಸಿಕಂ ರೂಪಂ, ನಿಬ್ಬಾನಮಿತಿ ದೀಪಯೇ॥

೧೪೯.

ಇಚ್ಚಾಕುಸಲಧಮ್ಮಾನಂ, ಞತ್ವಾ ಸಙ್ಗಹಮುತ್ತರಂ।

ಮಿಸ್ಸಕಾ ನಾಮ ವಿಞ್ಞೇಯ್ಯಾ, ಯಥಾಸಮ್ಭವತೋ ಕಥಂ।

೧೫೦.

ಲೋಭೋ ದೋಸೋ ಚ ಮೋಹೋ ಚ,

ಏಕನ್ತಾಕುಸಲಾ ತಯೋ।

ಅಲೋಭಾದೋಸಾಮೋಹೋ ಚ,

ಕುಸಲಾಬ್ಯಾಕತಾ ತಥಾ॥

೧೫೧.

ಪಾದಪಸ್ಸೇವ ಮೂಲಾನಿ, ಥಿರಭಾವಾಯ ಪಚ್ಚಯಾ।

ಮೂಲಭಾವೇನ ಧಮ್ಮಾನಂ, ಹೇತೂ ಧಮ್ಮಾ ಛ ದೀಪಿತಾ॥

೧೫೨.

ವಿತಕ್ಕೋ ಚ ವಿಚಾರೋ ಚ, ಪೀತಿ ಚೇಕಗ್ಗತಾ ತಥಾ।

ಸೋಮನಸ್ಸಂ ದೋಮನಸ್ಸಂ, ಉಪೇಕ್ಖಾತಿ ಚ ವೇದನಾ॥

೧೫೩.

ಆಹಚ್ಚುಪನಿಜ್ಝಾಯನ್ತಾ, ನಿಜ್ಝಾನಟ್ಠೇನ ಪಚ್ಚಯಾ।

ಝಾನಧಮ್ಮಾತಿ ಸತ್ಥಾಹ, ಪಞ್ಚ ವತ್ಥುಸಭಾವತೋ॥

೧೫೪.

ಸಮ್ಮಾದಿಟ್ಠಿ ಚ ಸಙ್ಕಪ್ಪೋ, ವಾಯಾಮೋ ವಿರತಿತ್ತಯಂ।

ಸಮ್ಮಾಸತಿ ಸಮಾಧೀ ಚ, ಮಿಚ್ಛಾದಿಟ್ಠಿ ಚ ಸಮ್ಭವಾ॥

೧೫೫.

ಸಮ್ಮಾಮಿಚ್ಛಾ ಚ ನೀಯನ್ತಾ, ನಿಯ್ಯಾನಟ್ಠೇನ ಪಚ್ಚಯಾ।

ಮಗ್ಗಙ್ಗಾ ದ್ವಾದಸಕ್ಖಾತಾ, ನವ ಧಮ್ಮಾ ಸಭಾವತೋ॥

೧೫೬.

ಅತ್ತಭಾವಂ ಪವತ್ತೇನ್ತಾ, ಓಜಟ್ಠಮಕವೇದನಂ।

ಪಟಿಸನ್ಧಿನಾಮರೂಪ-ಮಾಹರನ್ತಾ ಯಥಾಕ್ಕಮಂ॥

೧೫೭.

ಕಬಳೀಕಾರೋ ಆಹಾರೋ,

ಫಸ್ಸೋ ಸಞ್ಚೇತನಾ ತಥಾ।

ವಿಞ್ಞಾಣಮಿತಿ ಚತ್ತಾರೋ,

ಆಹಾರಾತಿ ಪಕಾಸಿತಾ॥

೧೫೮.

ಧಮ್ಮಾನಂ ಸಹಜಾತಾನಂ, ಇನ್ದ್ರಿಯಟ್ಠೇನ ಪಚ್ಚಯಾ।

ಅತ್ತಾನಮಿಸ್ಸರಟ್ಠೇನ, ಅನುವತ್ತಾಪಕಾ ತಥಾ॥

೧೫೯.

ಸದ್ಧಾ ಚ ಸತಿ ಪಞ್ಞಾ ಚ, ವೀರಿಯೇಕಗ್ಗತಾಪಿ ಚ।

ವೇದನಾ ಜೀವಿತಂ ಚಿತ್ತಂ, ಅಟ್ಠ ರೂಪಿನ್ದ್ರಿಯಾನಿ ಚ॥

೧೬೦.

ಕಥಂ ಜೀವಿತಮೇಕಂ ತು, ಸುಖಂ ದುಕ್ಖನ್ತಿ ವೇದನಾ।

ಸೋಮನಸ್ಸಂ ದೋಮನಸ್ಸಂ, ಉಪೇಕ್ಖಾತಿ ಚ ಭೇದಿತಾ॥

೧೬೧.

ಪಞ್ಞಾದಿಮಗ್ಗೇನಞ್ಞಾತ-ಞ್ಞಸ್ಸಾಮೀತಿನ್ದ್ರಿಯಂ ಭವೇ।

ಮಜ್ಝೇ ಅಞ್ಞಿನ್ದ್ರಿಯಮನ್ತೇ, ಅಞ್ಞಾತಾವಿನ್ದ್ರಿಯಂ ತಥಾ॥

೧೬೨.

ಸೋಳಸೇವ ಸಭಾವೇನ, ಇನ್ದ್ರಿಯಟ್ಠವಿಭಾಗತೋ।

ಇನ್ದ್ರಿಯಾನೀತಿ ವುತ್ತಾನಿ, ಬಾವೀಸತಿ ವಿಭಾವಯೇ॥

೧೬೩.

ದಳ್ಹಾಧಿಟ್ಠಿತಸನ್ತಾನಾ , ವಿಪಕ್ಖೇಹಿ ಅಕಮ್ಪಿಯಾ।

ಬಲವನ್ತಸಭಾವೇನ, ಬಲಧಮ್ಮಾ ಪಕಾಸಿತಾ॥

೧೬೪.

ಸದ್ಧಾ ಸತಿ ಹಿರೋತ್ತಪ್ಪಂ, ವೀರಿಯೇಕಗ್ಗತಾ ತಥಾ।

ಪಞ್ಞಾಹಿರಿಕಾನೋತ್ತಪ್ಪ-ಮಿಚ್ಚೇವಂ ನವಧಾ ಮತಾ॥

೧೬೫.

ಜೇಟ್ಠಾ ಪುಬ್ಬಙ್ಗಮಟ್ಠೇನ, ಪುಞ್ಞಾಪುಞ್ಞಪವತ್ತಿಯಂ।

ಪಚ್ಚಯಾಧಿಪ್ಪತೇಯ್ಯೇನ, ಸಹಜಾನಂ ಯಥಾರಹಂ॥

೧೬೬.

ಚತ್ತಾರೋಧಿಪತೀ ವುತ್ತಾ, ಆಧಿಪ್ಪಚ್ಚಸಭಾವತೋ।

ಛನ್ದೋ ಚಿತ್ತಞ್ಚ ವೀರಿಯಂ, ವೀಮಂಸಾತಿ ಚ ತಾದಿನಾ॥

೧೬೭.

ಪಞ್ಚಸಙ್ಗಹಿತಾ ಪಞ್ಞಾ, ವಾಯಾಮೇಕಗ್ಗತಾ ಪನ।

ಚತುಸಙ್ಗಹಿತಾ ಚಿತ್ತಂ, ಸತಿ ಚೇವ ತಿಸಙ್ಗಹಾ॥

೧೬೮.

ಸಙ್ಕಪ್ಪೋ ವೇದನಾ ಸದ್ಧಾ, ದುಕಸಙ್ಗಹಿತಾ ಮತಾ।

ಏಕೇಕಸಙ್ಗಹಾ ಸೇಸಾ, ಅಟ್ಠವೀಸತಿ ಭಾಸಿತಾ।

ಇಚ್ಚೇವಂ ಸತ್ತಧಾ ಭೇದೋ, ವುತ್ತೋ ಮಿಸ್ಸಕಸಙ್ಗಹೋ॥

೧೬೯.

ಹೇತುಝಾನಙ್ಗಮಗ್ಗಙ್ಗಾ, ಆಹಾರಿನ್ದ್ರಿಯತೋ ತಥಾ।

ಬಲಾಧಿಪ್ಪತಿತೋ ಚೇವ, ಪುಞ್ಞಾಪುಞ್ಞಾದಿಮಿಸ್ಸತಾ।

ಛತ್ತಿಂಸೇವ ಸಭಾವೇನ, ಚತುಸಟ್ಠಿ ಪಭೇದತೋ॥

೧೭೦.

ಇಚ್ಚೇವಂ ಸಙ್ಗಹೇತ್ವಾನ, ವಿಭಾವೇಯ್ಯ ತತೋ ಪರಂ।

ಚಿತ್ತುಪ್ಪಾದಪಭೇದೇಸು, ಯಥಾಸಮ್ಭವತೋ ಕಥಂ॥

೧೭೧.

ಸಿತಾವಜ್ಜನವಿಞ್ಞಾಣಂ, ಸಮ್ಪಟಿಚ್ಛನತೀರಣಾ।

ಅಟ್ಠಾರಸಾಹೇತುಕಾವ, ಮೋಮೂಹಾ ಏಕಹೇತುಕಾ॥

೧೭೨.

ಸೇಸಾ ತು ಕುಸಲಾ ಞಾಣವಿಯುತ್ತಾ ಚ ದ್ವಿಹೇತುಕಾ।

ಚಿತ್ತುಪ್ಪಾದಾಪರೇ ಸತ್ತ-ಚತ್ತಾಲೀಸ ತಿಹೇತುಕಾ॥

೧೭೩.

ಪಞ್ಚವಿಞ್ಞಾಣಮಜ್ಝಾನಂ , ದ್ವಿಝಾನಙ್ಗಿಕಮೀರಿತಂ।

ಚತುತ್ಥಪಞ್ಚಮಜ್ಝಾನಂ, ತಿಝಾನಂ ತತಿಯಂ ಮತಾ॥

೧೭೪.

ಚತುಝಾನಂ ತು ದುತಿಯಂ, ಕಾಮೇ ಚ ಸುಖವಜ್ಜಿತಾ।

ಪಞ್ಚಝಾನಂ ತು ಪಠಮಂ, ಕಾಮೇ ಚ ಸುಖಿತಾ ಮತಾ॥

೧೭೫.

ಪಠಮಾನುತ್ತರಂ ಝಾನಂ, ಅಟ್ಠಮಗ್ಗಙ್ಗಿಕಂ ಮತಂ।

ಸತ್ತಮಗ್ಗಙ್ಗಿಕಂ ನಾಮ, ಸೇಸಝಾನಮನುತ್ತರಂ॥

೧೭೬.

ಲೋಕಿಯಂ ಪಠಮಂ ಝಾನಂ, ತಥಾ ಕಾಮೇ ತಿಹೇತುಕಾ।

ಪಞ್ಚಮಗ್ಗಙ್ಗಿಕಾ ನಾಮ, ಚಿತ್ತುಪ್ಪಾದಾ ಪಕಾಸಿತಾ॥

೧೭೭.

ಸೇಸಂ ಮಹಗ್ಗತಂ ಝಾನಂ, ಸಮ್ಪಯುತ್ತಾ ಚ ದಿಟ್ಠಿಯಾ।

ಞಾಣೇನ ವಿಪ್ಪಯುತ್ತಾ ಚ, ಚತುಮಗ್ಗಙ್ಗಿಕಾ ಮತಾ॥

೧೭೮.

ಪಟಿಘುದ್ಧಚ್ಚಯುತ್ತಾ ಚ, ವಿಪ್ಪಯುತ್ತಾ ಚ ದಿಟ್ಠಿಯಾ।

ತಿಮಗ್ಗಙ್ಗಂ ದುಮಗ್ಗಙ್ಗಂ, ಕಙ್ಖಿತಂ ಸಮುದೀರಿತಂ॥

೧೭೯.

ನ ಹೋನ್ತಾಹೇತುಕೇ ಮಗ್ಗಾ, ಚಿತ್ತಟ್ಠಿತಿ ಚ ಕಙ್ಖಿತೇ।

ವಿದಿತಾ ನಿಯತತಾ ಚ, ಲೋಕಿಯೇಸು ನ ಉದ್ಧಟಾ॥

೧೮೦.

ಕಾಮೇಸು ಕಬಳೀಕಾರೋ, ಅನಾಹಾರೋ ಅಸಞ್ಞಿನೋ।

ಚಿತ್ತುಪ್ಪಾದೇಸು ಸಬ್ಬತ್ಥ, ಆಹಾರತ್ತಯಮೀರಿತಂ॥

೧೮೧.

ಇನ್ದ್ರಿಯಾನಿ ವಿಭಾವೇಯ್ಯ, ನವಧಾನುತ್ತರೇ ಬುಧೋ।

ಅಟ್ಠಧಾ ಸಮುದೀರೇಯ್ಯ, ಲೋಕಿಯೇಸು ತಿಹೇತುಕೇ॥

೧೮೨.

ಸತ್ತಧಾ ಪನ ಞಾಣೇನ, ವಿಪ್ಪಯುತ್ತೇ ಪಕಾಸಯೇ।

ಸಿತವೋಟ್ಠಬ್ಬನಾಪುಞ್ಞೇ, ಪಞ್ಚಧಾ ಕಙ್ಖಿತೇ ಪನ॥

೧೮೩.

ಚತುಧಾ ತಿವಿಧಾ ಸೇಸೇ, ಚಿತ್ತುಪ್ಪಾದೇ ಸಮೀರಯೇ।

ತಿಹೇತುಕಾ ಸತ್ತಬಲಾ, ಛಬಲಾ ತು ದುಹೇತುಕಾ॥

೧೮೪.

ಚತುಬಲಾ ಅಕುಸಲಾ, ಕಙ್ಖಿತಂ ತಿಬಲಂ ಮತಂ।

ದ್ವಿಬಲಂ ಸಿತವೋಟ್ಠಬ್ಬ-ಮಬಲಂ ಸೇಸಮೀರಿತಂ॥

೧೮೫.

ಜವನೇಧಿಪತೀನಂ ತು, ಯೋ ಕೋಚೇಕೋ ತಿಹೇತುಕೇ।

ದ್ವಿಹೇತುಕೇ ವಾ ಕುಸಲೇ, ವೀಮಂಸಾ ನೋಪಲಬ್ಭತಿ॥

೧೮೬.

ಲೋಕಿಯೇಸು ವಿಪಾಕೇಸು,

ಮೋಹಮೂಲೇ ಅಹೇತುಕೇ।

ಯಥಾಸಮ್ಭವವುತ್ತಿತ್ತಾ,

ನತ್ಥಾಧಿಪತಿ ಕೋಚಿಪಿ॥

೧೮೭.

ಸಮ್ಭೋತಿ ಕಾಯವಿಞ್ಞಾಣೇ, ಪುಞ್ಞಪಾಕೇ ಸುಖಿನ್ದ್ರಿಯಂ।

ದುಕ್ಖಿನ್ದ್ರಿಯಮ್ಪಿ ತತ್ಥೇವ, ಪಾಪಪಾಕಮ್ಹಿ ಭಾಸಿತಂ॥

೧೮೮.

ಸನ್ತೀರಣಞ್ಚ ಹಸನಂ, ಸೋಮನಸ್ಸಾನಿ ಸೋಳಸ।

ಪಠಮಾದಿಚತುಜ್ಝಾನಂ, ಸೋಮನಸ್ಸಯುತಂ ಭವೇ॥

೧೮೯.

ದೋಮನಸ್ಸಯುತ್ತಾ ದ್ವೇವ, ಚಿತ್ತುಪ್ಪಾದಾ ಪಕಾಸಿತಾ।

ತದಞ್ಞೇ ಪನ ಸಬ್ಬೇಪಿ, ಪಞ್ಚಪಞ್ಞಾಸುಪೇಕ್ಖಕಾ॥

೧೯೦.

ವೇದನಾಸಮ್ಪಯೋಗಞ್ಚ, ವಿನಿಬ್ಭುಜ್ಜೇವಮಟ್ಠಧಾ।

ಹೇತುಯೋಗಾದಿಭೇದೇಹಿ, ಚಿತ್ತುಪ್ಪಾದಾ ಪಕಾಸಿತಾ॥

೧೯೧.

ತಂತಂವಿಯೋಗಭೇದಞ್ಚ, ಪಚ್ಚೇಕಮಥ ಮಿಸ್ಸಿತಂ।

ಯಥಾವುತ್ತಾನುಸಾರೇನ, ಯಥಾಸಮ್ಭವತೋ ನಯೇ॥

೧೯೨.

ಇಚ್ಚೇವಂ ಪನ ಯೋಜೇತ್ವಾ, ಚಿತ್ತುಪ್ಪಾದೇಸು ಮಿಸ್ಸಕಂ।

ತತೋ ಞೇಯ್ಯಾ ವಿಸುದ್ಧಾ ಚ, ಬೋಧಿಪಕ್ಖಿಯಸಙ್ಗಹಾ॥

೧೯೩.

ಕಾಯೇ ಚ ವೇದನಾಚಿತ್ತೇ, ಧಮ್ಮೇಸು ಚ ಯಥಾರಹಂ।

ಅಸುಭಂ ದುಕ್ಖಮನಿಚ್ಚ-ಮನತ್ತಾತಿ ಸುಪಟ್ಠಿತಾ॥

೧೯೪.

ಸಮ್ಮಾಸತಿ ಪನಿಚ್ಚೇಕಾ, ಕಿಚ್ಚಗೋಚರಭೇದತೋ।

ಸತಿಪಟ್ಠಾನನಾಮೇನ, ಚತ್ತಾರೋತಿ ಪಕಾಸಿತಾ॥

೧೯೫.

ಉಪ್ಪನ್ನಾನುಪ್ಪನ್ನಪಾಪ-ಪಹಾನಾನುಪ್ಪಾದನಾಯ ಚ।

ಅನುಪ್ಪನ್ನುಪ್ಪನ್ನೇಹಿ ವಾ, ನಿಬ್ಬತ್ತಿಅಭಿವುದ್ಧಿಯಾ॥

೧೯೬.

ಪದಹನ್ತಸ್ಸ ವಾಯಾಮೋ, ಕಿಚ್ಚಾಭೋಗವಿಭಾಗತೋ।

ಸಮ್ಮಪ್ಪಧಾನನಾಮೇನ, ಚತ್ತಾರೋತಿ ಪಕಾಸಿತಾ॥

೧೯೭.

ಇದ್ಧಿಯಾ ಪಾದಭೂತತ್ತಾ, ಇದ್ಧಿಪಾದಾತಿ ಭಾಸಿತಾ।

ಛನ್ದೋ ಚಿತ್ತಞ್ಚ ವೀರಿಯಂ, ವೀಮಂಸಾತಿ ಚತುಬ್ಬಿಧಾ॥

೧೯೮.

ಪಞ್ಚ ಸದ್ಧಾ ಸತಿ ಪಞ್ಞಾ, ವೀರಿಯೇಕಗ್ಗತಾ ತಥಾ।

ಇನ್ದ್ರಿಯಾನಿನ್ದ್ರಿಯಟ್ಠೇನ, ಬಲಟ್ಠೇನ ಬಲಾನಿ ಚ॥

೧೯೯.

ಸತಿ ಧಮ್ಮವಿಚಯೋ ಚ, ತಥಾ ವೀರಿಯಪೀತಿಯೋ।

ಪಸ್ಸದ್ಧೇಕಗ್ಗತಾಪೇಕ್ಖಾ, ಬುಜ್ಝನ್ತಸ್ಸಙ್ಗಭಾವತೋ॥

೨೦೦.

ಬೋಜ್ಝಙ್ಗಾತಿ ವಿಸೇಸೇನ, ಸತ್ತ ಧಮ್ಮಾ ಪಕಾಸಿತಾ।

ನಿಯ್ಯಾನಟ್ಠೇನ ಮಗ್ಗಙ್ಗಾ, ಸಮ್ಮಾದಿಟ್ಠಾದಿಅಟ್ಠಧಾ॥

೨೦೧.

ಛಸಙ್ಗಹೇತ್ಥ ವಾಯಾಮೋ, ಸತಿಪಞ್ಞಾ ಸಮೀರಿತಾ।

ಪಞ್ಚಸಙ್ಗಹಿತಾ ನಾಮ, ಸಮಾಧಿ ಚತುಸಙ್ಗಹೋ॥

೨೦೨.

ಸದ್ಧಾ ದುಸಙ್ಗಹಾ ವುತ್ತಾ, ಸೇಸಾ ಏಕೇಕಸಙ್ಗಹಾ।

ಇಚ್ಚೇವಂ ಸತ್ತಧಾ ಭೇದೋ, ಬೋಧಿಪಕ್ಖಿಯಸಙ್ಗಹೋ॥

೨೦೩.

ಸತಿಪಟ್ಠಾನಸಮ್ಮಪ್ಪಧಾನತೋ ಇದ್ಧಿಪಾದತೋ।

ಇನ್ದ್ರಿಯಬಲಬೋಜ್ಝಙ್ಗಾ, ಮಗ್ಗಭೇದಾ ಚ ಭಾಸಿತಾ॥

೨೦೪.

ಛನ್ದೋ ಚಿತ್ತಮುಪೇಕ್ಖಾ ಚ, ಸದ್ಧಾಪಸ್ಸದ್ಧಿಪೀತಿಯೋ।

ಸಮ್ಮಾದಿಟ್ಠಿ ಚ ಸಙ್ಕಪ್ಪೋ, ವಾಯಾಮೋ ವಿರತಿತ್ತಯಂ॥

೨೦೫.

ಸಮ್ಮಾಸತಿ ಸಮಾಧೀತಿ, ದೀಪಿತಾ ಬೋಧಿಪಕ್ಖಿಯಾ।

ಚುದ್ದಸಾ ಧಮ್ಮತೋ ಹೋನ್ತಿ, ಸತ್ತತಿಂಸ ಪಭೇದತೋ॥

೨೦೬.

ಯೇಹಿ ಧಮ್ಮೇಹಿ ಬುಜ್ಝನ್ತೋ, ಸಚ್ಚಾನಿ ಪಟಿವಿಜ್ಝತಿ।

ಸಮತ್ತಾನುತ್ತರೇ ಹೋನ್ತಿ, ನ ವಾ ಸಙ್ಕಪ್ಪಪೀತಿಯೋ॥

೨೦೭.

ಪುಬ್ಬಭಾಗೇಪಿ ಲಬ್ಭನ್ತಿ, ಲೋಕಿಯಮ್ಹಿ ಯಥಾರಹಂ।

ನಿಬ್ಬೇಧಭಾವನಾಕಾಲೇ, ಛಬ್ಬಿಸುದ್ಧಿಪವತ್ತಿಯಂ॥

೨೦೮.

ಇಚ್ಚೇವಂ ತಿವಿಧಾ ಭೇದಂ, ವಿಭಾವೇಯ್ಯ ಯಥಾರಹಂ।

ಸಭಾವಭೇದಭಿನ್ನಾನಂ, ಸಭಾಗತ್ಥೇಹಿ ಸಙ್ಗಹಂ॥

೨೦೯.

ಭೇದಸಙ್ಗಹವಿದೂಹಿ ವಣ್ಣಿತಂ, ಭೇದಸಙ್ಗಹವಿಮುತ್ತಿಸಾಸನೇ।

ಭೇದಸಙ್ಗಹನಯತ್ಥಮುತ್ತಮಂ, ಭೇದಸಙ್ಗಹಮುಖಂ ಪಕಾಸಿತಂ॥

೨೧೦.

ಧಮ್ಮಸಭಾವವಿಭಾಗಬುಧೇವಂ, ಧಮ್ಮದಿಸಮ್ಪತಿಸಾಸನಧಮ್ಮೇ।

ಧಮ್ಮವಿಭೂತಿವಿಭೂಸಿತಚಿತ್ತಾ, ಧಮ್ಮರಸಾಮತಭಾಗಿ ಭವನ್ತಿ॥

ಇತಿ ನಾಮರೂಪಪರಿಚ್ಛೇದೇ ಭೇದಸಙ್ಗಹವಿಭಾಗೋ ನಾಮ

ತತಿಯೋ ಪರಿಚ್ಛೇದೋ।