೬. ಛಟ್ಠೋ ಪರಿಚ್ಛೇದೋ
ರೂಪವಿಭಾಗೋ
೪೮೧.
ಇತಿ ಪಞ್ಚಪರಿಚ್ಛೇದ-ಪರಿಚ್ಛಿನ್ನತ್ಥಸಙ್ಗಹಂ।
ನಾಮಧಮ್ಮಮಸೇಸೇನ, ವಿಭಾವೇತ್ವಾ ಸಭಾವತೋ॥
೪೮೨.
ಸಪ್ಪಭೇದಂ ಪವಕ್ಖಾಮಿ, ರೂಪಧಮ್ಮಮಿತೋ ಪರಂ।
ಭೂತೋಪಾದಾಯಭೇದೇನ, ದುವಿಧಮ್ಪಿ ಪಕಾಸಿತಂ॥
೪೮೩.
ಉದ್ದೇಸಲಕ್ಖಣಾದೀಹಿ, ವಿಭಾಗಜನಕಾ ತಥಾ।
ಕಲಾಪುಪ್ಪತ್ತಿತೋ ಚಾಪಿ, ಯಥಾನುಕ್ಕಮತೋ ಕಥಂ?
೪೮೪.
ರುಪ್ಪತೀತಿ
ರೂಪರೂಪಂ ತಥಾ ರೂಪಪರಿಯಾಪನ್ನತೋಪರಂ॥
೪೮೫.
ಭೂತರೂಪಂ ತು ಪಥವೀ, ಆಪೋ ತೇಜೋ ತಥಾಪರೋ।
ವಾಯೋ ಚ ಭವತೂಪಾದಾರೂಪಮೇತ್ಥಾತಿ ಭಾಸಿತಂ॥
೪೮೬.
ಭೂತರೂಪಮುಪಾದಾಯ
ಇಚ್ಚುಪಾದಾಯರೂಪನ್ತಿ, ರೂಪಂ ಸೇಸಮುದೀರಿತಂ॥
೪೮೭.
ಚಕ್ಖು ಸೋತಞ್ಚ ಘಾನಞ್ಚ, ಜಿವ್ಹಾ ಕಾಯೋತಿ ಪಞ್ಚಧಾ।
ಪಸಾದರೂಪಮಕ್ಖಾತಂ, ನೋಪಸಾದಂ ಪನೇತರಂ॥
೪೮೮.
ರೂಪಸದ್ದಗನ್ಧರಸಾ, ಫೋಟ್ಠಬ್ಬಮಿತಿ ಪಞ್ಚಧಾ।
ರೂಪಂ ಪಸಾದವಿಸಯಂ, ಪಸಾದೋ ಗೋಚರಂಪರಂ॥
೪೮೯.
ಇತ್ಥತ್ತಂ ಪುರಿಸತ್ತಞ್ಚ, ಭಾವರೂಪಮುದೀರಿತಂ।
ಜೀವಿತಿನ್ದ್ರಿಯರೂಪನ್ತಿ, ಉಪಾದಿನ್ನಪವತ್ತಿಕಂ॥
೪೯೦.
ವತ್ಥುರೂಪಂ ತು ಹದಯಂ, ಯಂ ಧಾತುದ್ವಯನಿಸ್ಸಯಂ।
ಕಬಳೀಕಾರಮಾಹಾರರೂಪಮಿಚ್ಚಾಹು ಪಣ್ಡಿತಾ॥
೪೯೧.
ರೂಪಧಮ್ಮಸಭಾವತ್ತಾ, ರೂಪನ್ತಿ ಪರಿದೀಪಿತಂ।
ಇಚ್ಚೇವಮಟ್ಠಾರಸಧಾ, ರೂಪರೂಪಮುದೀರಿತಂ॥
೪೯೨.
ಅನಿಪ್ಫನ್ನಸಭಾವತ್ತಾ, ರೂಪಾಕಾರೋಪಲಕ್ಖಿತಂ।
ಅನಿಪ್ಫನ್ನಂ ನಾಮ ರೂಪಂ, ದಸಧಾ ಪರಿದೀಪಿತಂ॥
೪೯೩.
ರೂಪಪ್ಪರಿಚ್ಛೇದಂ ರೂಪಮಿಚ್ಚಾಕಾಸೋ ಪಕಾಸಿತೋ।
ಕಾಯಬ್ಬಚೀವಿಞ್ಞತ್ತಿಕಂ, ದ್ವಯಂ ವಿಞ್ಞತ್ತಿರೂಪಕಂ॥
೪೯೪.
ಲಹುತಾ ಮುದುತಾ ಕಮ್ಮ-ಞ್ಞತಾ ವಿಞ್ಞತ್ತಿಯಾ ಸಹ।
ವಿಕಾರರೂಪಮಿಚ್ಚಾಹು, ಪಞ್ಚಧಾ ಚ ವಿಭಾವಿನೋ॥
೪೯೫.
ಉಪಚಯೋ ಸನ್ತತಿ ಚ, ಜರತಾನಿಚ್ಚತಾತಿ ಚ।
ಚತುಧಾ ಲಕ್ಖಣರೂಪಂ, ರೂಪಕಣ್ಡೇ ವಿಭಾವಿತಂ॥
೪೯೬.
ಇಚ್ಚೇವಮಟ್ಠವೀಸತಿವಿಧಾನಿಪಿ
ರೂಪಾನಿ ಲಕ್ಖಣಾದೀಹಿ, ವಿಭಾವೇಯ್ಯ ಯಥಾಕ್ಕಮಂ॥
೪೯೭.
ಖರತಾ ಪಥವೀಧಾತು, ಸಾಯಂ ಕಕ್ಖಳಲಕ್ಖಣಾ।
ಕಲಾಪಾಧಿಟ್ಠಾನರಸಾ, ಪಟಿಗ್ಗಾಹೋತಿ ಗಯ್ಹತಿ॥
೪೯೮.
ಆಬನ್ಧನಮಾಪೋಧಾತು, ಸಾ ಪಗ್ಘರಣಲಕ್ಖಣಾ।
ಕಲಾಪಾಬನ್ಧನರಸಾ, ಸಙ್ಗಹತ್ತೇನ ಗಯ್ಹತಿ॥
೪೯೯.
ತೇಜನತ್ತಂ
ಪಾಚನರಸಾ ಮದ್ದವಾ-ನುಪ್ಪಾದನನ್ತಿ ಗಯ್ಹತಿ॥
೫೦೦.
ವಾಯೋಧಾತು ವಾಯನತ್ತಂ, ಸಾ ವಿತ್ಥಮ್ಭನಲಕ್ಖಣಾ।
ಸಮೀರಣರಸಾಭಿನಿ-ಹಾರಭಾವೇನ ಗಯ್ಹತಿ॥
೫೦೧.
ಸಬ್ಬತ್ಥಾವಿನಿಭುತ್ತಾಪಿ, ಅಸಮ್ಮಿಸ್ಸಿತಲಕ್ಖಣಾ।
ತಂತಂಭಾವಸಮುಸ್ಸನ್ನಸಮ್ಭಾರೇಸುಪಲಕ್ಖಿತಾ॥
೫೦೨.
ಅಞ್ಞಮಞ್ಞೇನುಪತ್ಥದ್ಧಾ, ಸೇಸರೂಪಸ್ಸ ನಿಸ್ಸಯಾ।
ಚತುದ್ಧೇವಂ ಕಲಾಪೇಸು, ಮಹಾಭೂತಾ ಪವತ್ತರೇ॥
೫೦೩.
ಚಕ್ಖು ಸಮ್ಭಾರಚಕ್ಖುಮ್ಹಿ, ಸತ್ತಕ್ಖಿಪಟಲೋಚಿತೇ।
ಕಣ್ಹಮಣ್ಡಲಮಜ್ಝಮ್ಹಿ, ಪಸಾದೋತಿ ಪವುಚ್ಚತಿ॥
೫೦೪.
ಯೇನ ಚಕ್ಖುಪಸಾದೇನ, ರೂಪಾನಿ ಅನುಪಸ್ಸತಿ।
ಪರಿತ್ತಂ ಸುಖುಮಂ ಚೇತಂ, ಊಕಾಸಿರಸಮೂಪಮಂ॥
೫೦೫.
ಸೋತಂ ಸೋತಬಿಲಸ್ಸನ್ತೋ,
ತಮ್ಬಲೋಮಾಚಿತೇ ತಥಾ।
ಅಙ್ಗುಲಿವೇಧನಾಕಾರೇ,
ಪಸಾದೋತಿ ಪವುಚ್ಚತಿ॥
೫೦೬.
ಅನ್ತೋ ಅಜಪದಟ್ಠಾನೇ, ಘಾನಂ ಘಾನಬಿಲೇ ಠಿತಂ।
ಜಿವ್ಹಾ ಜಿವ್ಹಾಯ ಮಜ್ಝಮ್ಹಿ, ಉಪ್ಪಲಾಕಾರಸನ್ನಿಭೇ॥
೫೦೭.
ಇಚ್ಚೇವಂ
ಕಾಯಪ್ಪಸಾದೋ ಕಾಯಮ್ಹಿ, ಉಪಾದಿನ್ನೇತಿ ಪಞ್ಚಧಾ॥
೫೦೮.
ಕಪ್ಪಾಸಪಟಲಸ್ನೇಹ-ಸನ್ನಿಭಾ ಭೂತನಿಸ್ಸಿತಾ।
ಪಸಾದಾ ಜೀವಿತಾರಕ್ಖಾ, ರೂಪಾದಿಪರಿವಾರಿತಾ॥
೫೦೯.
ಧೀತಾ ರಾಜಕುಮಾರಾವ, ಕಲಾಪನ್ತರವುತ್ತಿನೋ।
ದ್ವಾರಭೂತಾವ ಪಚ್ಚೇಕಂ, ಪಞ್ಚವಿಞ್ಞಾಣವೀಥಿಯಾ॥
೫೧೦.
ರೂಪಾದಾಭಿಘಾತಾರಹಭೂತಾನಂ ವಾ ಯಥಾಕ್ಕಮಂ।
ದಟ್ಠುಕಾಮನಿದಾನಾದಿಕಮ್ಮಭೂತಾನಮೇವ ವಾ॥
೫೧೧.
ಪಸಾದಲಕ್ಖಣಾ
ಪಞ್ಚವಿಞ್ಞಾಣಯುಗಳಂ, ದ್ವಾರಭಾವೇನ ಗಯ್ಹರೇ॥
೫೧೨.
ರೂಪಂ ನಿಭಾಸೋ ಭೂತಾನಂ, ಸದ್ದೋ ನಿಗ್ಘೋಸನಂ ತಥಾ।
ಗನ್ಧೋವ ಗನ್ಧನಂ ತತ್ಥ, ರಸೋ ಚ ರಸನೀಯತಾ॥
೫೧೩.
ಇಚ್ಚೇವಂ ಪನ ಚತ್ತಾರೋ, ಗೋಚರಾ ಭೂತನಿಸ್ಸಿತಾ।
ಭೂತತ್ತಯಞ್ಚ ಫೋಟ್ಠಬ್ಬಮಾಪೋಧಾತುವಿವಜ್ಜಿತಂ॥
೫೧೪.
ಸದ್ದೋ ಅನಿಯತೋ ತತ್ಥ, ತದಞ್ಞೋ ಸಹವುತ್ತಿನೋ।
ತಂತಂಸಭಾವಭೇದೇನ, ತಂತಂದ್ವಾರೋಪಲಕ್ಖಿತೋ॥
೫೧೫.
ಪಞ್ಚೇವ ಪಞ್ಚವಿಞ್ಞಾಣವೀಥಿಯಾ ವಿಸಯಾ ಮತಾ।
ಚಕ್ಖಾದಿಪಟಿಹನನಲಕ್ಖಣಾವ ಯಥಾಕ್ಕಮಂ॥
೫೧೬.
ಪಞ್ಚವಿಞ್ಞಾಣಯುಗಳಾಲಮ್ಬಭಾವರಸಾ ತಥಾ।
ಪಞ್ಚವಿಞ್ಞಾಣಯುಗಳಂ, ಗೋಚರತ್ತೇನ ಗಯ್ಹರೇ॥
೫೧೭.
ಇತ್ಥಿನ್ದ್ರಿಯಂ ಪನಿತ್ಥತ್ತಮಿತ್ಥಿಭಾವೋತಿ ಭಾಸಿತೋ।
ಪುರಿಸತ್ತಂ ತಥಾ ಭಾವೋ, ಪುರಿಸಿನ್ದ್ರಿಯನಾಮಕೋ॥
೫೧೮.
ತಂ ದ್ವಯಂ ಪನುಪಾದಿನ್ನಕಾಯೇ ಸಬ್ಬತ್ಥ ಲಬ್ಭತಿ।
ಕಲಾಪನ್ತರಭಿನ್ನಞ್ಚ, ಭಿನ್ನಸನ್ತಾನವುತ್ತಿ ಚ॥
೫೧೯.
ವಸೇ
ಇತ್ಥೀತಿ ಚ ಪುರಿಸೋತಿ, ಪಕಾಸನರಸಂ ತಥಾ॥
೫೨೦.
ಇತ್ಥೀನಂ ಪುರಿಸಾನಞ್ಚ, ಲಿಙ್ಗಸ್ಸ ಚ ಯಥಾಕ್ಕಮಂ।
ನಿಮಿತ್ತಕುತ್ತಾಕಪ್ಪಾನಂ, ಕಾರಣತ್ತೇನ ಗಯ್ಹತಿ॥
೫೨೧.
ಸತ್ತಾ ಮರನ್ತಿ ನಾಸೇನ, ಯಸ್ಸ ಪಾಣನ್ತಿ ವುತ್ತಿಯಾ।
ಸಜೀವಮತಕಾಯಾನಂ, ಭೇದೋ ಯೇನೋಪಲಕ್ಖಿತೋ॥
೫೨೨.
ತದೇತಂ ಕಮ್ಮಜಾತಾನ-ಮನುಪಾಲನಲಕ್ಖಣಂ।
ಜೀವಿತಂ ಜೀವನರಸಂ, ಆಯುಬದ್ಧೋತಿ ಗಯ್ಹತಿ॥
೫೨೩.
ಮನೋಧಾತುಯಾ ಚ ತಥಾ, ಮನೋವಿಞ್ಞಾಣಧಾತುಯಾ।
ನಿಸ್ಸಯಲಕ್ಖಣಂ ವತ್ಥು-ರೂಪಂ ಹದಯಸಮ್ಮತಂ॥
೫೨೪.
ಸಮಾಧಾನರಸಂ
ಯಸ್ಮಿಂ ಕುಪ್ಪಿತಕಾಲಮ್ಹಿ, ವಿಕ್ಖಿತ್ತಾ ಹೋನ್ತಿ ಪಾಣಿನೋ॥
೫೨೫.
ಕಾಯೋ ಯಸ್ಸಾನುಸಾರೇನ, ಚಿತ್ತಕ್ಖೇಪೇನ ಖಿಜ್ಜತಿ।
ಯಸ್ಮಿಂ ನಿರುದ್ಧೇ ವಿಞ್ಞಾಣ-ಸೋತೋಪಿ ಚ ನಿರುಜ್ಝತಿ॥
೫೨೬.
ಯಂ ನಿಸ್ಸಾಯ ಪತಿಟ್ಠಾತಿ, ಪಟಿಸನ್ಧಿ ಭವನ್ತರೇ।
ತದೇತಂ ಕಮ್ಮಸಮ್ಭೂತಂ, ಪಞ್ಚವೋಕಾರಭೂಮಿಯಂ॥
೫೨೭.
ಮಜ್ಝೇ ಹದಯಕೋಸಮ್ಹಿ, ಅಡ್ಢಪಸತಲೋಹಿತೇ।
ಭೂತರೂಪಮುಪಾದಾಯ, ಚಕ್ಖಾದಿ ವಿಯ ವತ್ತತಿ॥
೫೨೮.
ಕಬಳೀಕಾರೋ ಆಹಾರೋ, ರೂಪಾಹರಣಲಕ್ಖಣೋ।
ಕಾಯಾನುಯಾಪನರಸೋ, ಉಪತ್ಥಮ್ಭೋತಿ ಗಯ್ಹತಿ॥
೫೨೯.
ಓಜಾಯ ಯಾಯ ಯಾಪೇನ್ತಿ, ಆಹಾರಸ್ನೇಹಸತ್ತಿಯಾ।
ಪಾಣಿನೋ ಕಾಮಲೋಕಮ್ಹಿ, ಸಾಯಮೇವಂ ಪವುಚ್ಚತಿ॥
೫೩೦.
ಆಕಾಸಧಾತು ರೂಪಾನಂ, ಪರಿಯೋಸಾನಲಕ್ಖಣಾ।
ಪರಿಚ್ಛೇದರಸಾ ರೂಪಮರಿಯಾದೋತಿ ಗಯ್ಹತಿ॥
೫೩೧.
ಸಲಕ್ಖಣಪರಿಚ್ಛಿನ್ನರೂಪಧಮ್ಮಪರಿಗ್ಗಹೇ
ಯೋಗೀನಮುಪಕಾರಾಯ, ಯಂ ದೇಸೇಸಿ ದಯಾಪರೋ॥
೫೩೨.
ಪರಿಚ್ಛಿನ್ನಸಭಾವಾನಂ, ಕಲಾಪಾನಂ ಯಥಾರಹಂ।
ಪರಿಯನ್ತಾನಮೇವೇಸ, ತದಾಕಾರೋ ಪವುಚ್ಚತಿ॥
೫೩೩.
ಗಮನಾದಿವಚೀಘೋಸಪವತ್ತಮ್ಹಿ ಯಥಾಕ್ಕಮಂ।
ವಾಯೋಪಥವಿಧಾತೂನಂ, ಯೋ ವಿಕಾರೋ ಸಮತ್ಥತಾ॥
೫೩೪.
ಸಹಜೋಪಾದಿನ್ನಕಾನಂ, ಕ್ರಿಯಾವಾಚಾಪವತ್ತಿಯಾ।
ವಿಪ್ಫನ್ದಘಟ್ಟನಾಹೇತು, ಚಿತ್ತಾನುಪರಿವತ್ತಕೋ॥
೫೩೫.
ಸ ವಿಕಾರವಿಸೇಸೋಯಂ, ವಿಞ್ಞತ್ತೀತಿ ಪಕಾಸಿತೋ।
ವಿಞ್ಞಾಪೇತೀತಿ ಕಾಯೇನ, ವಾಚಾಯ ಚ ವಿಚಿನ್ತಿತಂ॥
೫೩೬.
ವಾಯೋಪಥವಾಧಿಕಾನಂ, ಭೂತಾನಮಿತಿ ಕೇಚನ।
ಪವುತ್ತಾ ತಾದಿನಾ ಕಾಯ-ಪರಿಗ್ಗಹಸುಖಾಯ ಯಾ॥
೫೩೭.
ಕಾಯೋ
ಸಹಾಭೋಗೋವ ಖಾಯತಿ।
ಯಂ ನಿರೋಧಾ ಪರಾಭೂತೋ,
ಸೇತಿ ನಿಚ್ಚೇತನೋ ಯಥಾ॥
೫೩೮.
ಲೋಕೇ ಪಪಞ್ಚಾ ವತ್ತನ್ತಿ, ಬಹುಧಾ ಯಾಯ ನಿಮ್ಮಿತಾ।
ಕಪ್ಪೇನ್ತಿ ಕಾಯಮತ್ತಾನಂ, ಬಾಲಾ ಯಾಯ ಚ ವಞ್ಚಿತಾ॥
೫೩೯.
ಸಾಯಂ ಕಾಯವಚೀಕಮ್ಮ-ದ್ವಾರಭಾವೇನ ಲಕ್ಖಿತಾ।
ಬ್ಯಾಪಾರಘಟ್ಟನಾಹೇತು-ವಿಕಾರಾಕಾರಲಕ್ಖಣಾ॥
೫೪೦.
ಕಾಯವಾಚಾಅಧಿಪ್ಪಾಯ-ಪಕಾಸನರಸಾ ತಥಾ।
ಕಾಯವಿಪ್ಫನ್ದಘಟ್ಟನ-ಹೇತುಭಾವೇನ ಗಯ್ಹತಿ॥
೫೪೧.
ಲಹುತಾ ಪನ ರೂಪಾನಂ, ಅದನ್ಧಾಕಾರಲಕ್ಖಣಾ।
ಅವಿತ್ಥಾನರಸಾ ಸಲ್ಲ-ಹುಕವುತ್ತೀತಿ ಗಯ್ಹತಿ॥
೫೪೨.
ಮುದುತಾಪಿ
ಕಿಚ್ಚಾವಿರುಜ್ಝನರಸಾ, ಅನುಕುಲ್ಯನ್ತಿ ಗಯ್ಹತಿ॥
೫೪೩.
ಕಮ್ಮಞ್ಞತಾ ಚ ರೂಪಾನಂ, ಅಲಂಕಿಚ್ಚಸ್ಸ ಲಕ್ಖಣಾ।
ಪವತ್ತಿಸಮ್ಪತ್ತಿರಸಾ, ಯೋಗ್ಗಭಾವೋತಿ ಗಯ್ಹತಿ॥
೫೪೪.
ಸಪ್ಪಾಯಮುತುಮಾಹಾರಂ, ಲದ್ಧಾ ಚಿತ್ತಮನಾಮಯಂ।
ಲಹೂ ಮುದು ಚ ಕಮ್ಮಞ್ಞಂ, ಯದಾ ರೂಪಂ ಪವತ್ತತಿ॥
೫೪೫.
ತಥಾ ಪವತ್ತರೂಪಸ್ಸ, ಪವತ್ತಾಕಾರಭೇದಿತಂ।
ಲಹುತಾದಿತ್ತಯಮ್ಪೇತಂ, ಸಹವುತ್ತಿ ತದಾ ಭವೇ॥
೫೪೬.
ಸಪ್ಪಾಯಪಟಿವೇಧಾಯ, ಪಟಿಪತ್ತುಪಕಾರಿಕಾ।
ಸಾಕಾರಾ ರೂಪಸಮ್ಪತ್ತಿ, ಪಞ್ಞತ್ತೇವಂ ಮಹೇಸಿನಾ॥
೫೪೭.
ರೂಪಸ್ಸೋಪಚಯೋ ನಾಮ, ರೂಪಸ್ಸಾಚಯಲಕ್ಖಣೋ।
ರೂಪುಮ್ಮುಜ್ಜಾಪನರಸೋ, ಪಾರಿಪೂರೀತಿ ಗಯ್ಹತಿ॥
೫೪೮.
ಪವತ್ತಿಲಕ್ಖಣಾ ರೂಪ-ಸನ್ತತೀತಿ ಪಕಾಸಿತಾ।
ಅನುಪ್ಪಬನ್ಧನರಸಾ, ಅವಿಚ್ಛೇದೋತಿ ಗಯ್ಹತಿ॥
೫೪೯.
ರೂಪಮಾಚಯರೂಪೇನ
ಪೇಕ್ಖತೋಪಚಾಯಾಕಾರಾ, ಜಾತಿ ಗಯ್ಹತಿ ಯೋಗಿನಾ॥
೫೫೦.
ಅನುಪ್ಪಬನ್ಧಾಕಾರೇನ, ಜಾಯತೀತಿ ಸಮೇಕ್ಖತೋ।
ತದಾಯಂ ಸನ್ತತಾಕಾರಾ, ಸಮುಪಟ್ಠಾಸಿ ಚೇತಸಿ॥
೫೫೧.
ಏವಮಾಭೋಗಭೇದೇನ, ಜಾತಿರೂಪಂ ದ್ವಿಧಾ ಕತಂ।
ಅತ್ಥೂಪಲದ್ಧಿಭಾವೇನ, ಜಾಯನ್ತಂ ವಾಥ ಕೇವಲಂ॥
೫೫೨.
ರೂಪವಿವಿತ್ತಮೋಕಾಸಂ, ಪುರಕ್ಖತ್ತೇನ ಚೀಯತಿ।
ಅಭಾವಾ ಪನ ಭಾವಾಯ, ಪವತ್ತಮಿತಿ ಸನ್ತತಿ॥
೫೫೩.
ಏವಮಾಕಾರಭೇದಾಪಿ, ಸಬ್ಬಾಕಾರವರಾಕರೋ।
ಜಾತಿರೂಪಂ ದ್ವಿಧಾಕಾಸಿ, ಜಾತಿರೂಪವಿರೋಚನೋ॥
೫೫೪.
ಜರತಾ
ನವತಾಪಾಯನರಸಾ, ಪುರಾಣತ್ತನ್ತಿ ಗಯ್ಹತಿ॥
೫೫೫.
ಅನ್ತಿಮಕ್ಖಣಸಮ್ಪತ್ತಿ, ಪರಿಭಿಜ್ಜನಲಕ್ಖಣಾ।
ಅನಿಚ್ಚತಾ ಹರಣರಸಾ, ಖಯಭಾವೇನ ಗಯ್ಹತಿ॥
೫೫೬.
ಇತಿ ಲಕ್ಖಣರೂಪಂ ತು, ತಿವಿಧಂ ಭಿನ್ನಕಾಲಿಕಂ।
ಸಭಾವರೂಪಧಮ್ಮೇಸು, ತಂತಂಕಾಲೋಪಲಕ್ಖಿತಂ॥
೫೫೭.
ಯೇನ ಲಕ್ಖೀಯತಿ ರೂಪಂ, ಭಿನ್ನಾಕಾರಂ ಖಣೇ ಖಣೇ।
ವಿಪಸ್ಸನಾನಯತ್ಥಾಯ, ತಮಿಚ್ಚಾಹ ತಥಾಗತೋ॥
೫೫೮.
ಇಚ್ಚೇವಂ ಸಪರಿಚ್ಛೇದಾ, ಸವಿಕಾರಾ ಸಲಕ್ಖಣಾ।
ಅಕಿಚ್ಛಾ ಪಟಿವೇಧಾಯ, ದಯಾಪನ್ನೇನ ತಾದಿನಾ॥
೫೫೯.
ರೂಪಧಮ್ಮಾ ಸಭಾವೇನ, ವಿಜ್ಜಮಾನಾತಿ ಭಾಸಿತಾ।
ಅಜ್ಝತ್ತಿಕಾದಿಭೇದೇನ, ಬಹುಧಾ ಭಿಜ್ಜರೇ ಕಥಂ।
೫೬೦.
ದ್ವಾರಭೂತಾ ಪವತ್ತೇನ್ತಿ, ಚಿತ್ತಮತ್ತಾತಿ ಕಪ್ಪಿತಂ।
ರೂಪಮಜ್ಝತ್ತಿಕಂ ತಸ್ಮಾ, ಪಸಾದಾ ಬಾಹಿರಂಪರಂ॥
೫೬೧.
ವಣ್ಣೋ
ಅವಿನಿಬ್ಭೋಗರೂಪಂ ತು, ವಿನಿಬ್ಭೋಗಂ ಪನೇತರಂ॥
೫೬೨.
ಸತ್ತವಿಞ್ಞಾಣಧಾತೂನಂ, ನಿಸ್ಸಯತ್ತಾ ಯಥಾರಹಂ।
ಪಸಾದಾ ಹದಯಞ್ಚೇವ, ವತ್ಥುನಾ ವತ್ಥು ದೇಸಿತಂ॥
೫೬೩.
ಪಞ್ಚವಿಞ್ಞಾಣುಪಾದಿನ್ನ-ಲಿಙ್ಗಾದಿ ಚ ಪವತ್ತಿತೋ।
ಪಸಾದಾ ಜೀವಿತಂ ಭಾವಾ, ಚೇನ್ದ್ರಿಯಂ ನೇನ್ದ್ರಿಯಂಪರಂ॥
೫೬೪.
ಪಞ್ಚವಿಞ್ಞಾಣಕಮ್ಮಾನಂ, ಪವತ್ತಿಮುಖಭಾವತೋ।
ದ್ವಾರಂ ಪಸಾದವಿಞ್ಞತ್ತಿ-ಪರಮದ್ವಾರಮೀರಿತಂ॥
೫೬೫.
ಪಟಿಹಞ್ಞನ್ತಞ್ಞಮಞ್ಞಂ, ಪಸಾದವಿಸಯಾ ಪನ।
ತಸ್ಮಾ ಸಪ್ಪಟಿಘಂ ನಾಮ, ರೂಪಮಪ್ಪಟಿಘಂಪರಂ॥
೫೬೬.
ದ್ವಾರಾಲಮ್ಬಣಭಾವೇನ
ತೇ ಏವೋಳಾರಿಕಂ ತಸ್ಮಾ, ಸೇಸಂ ಸುಖುಮಮೀರಿತಂ॥
೫೬೭.
ಓಳಾರಿಕಸಭಾವೇನ, ಪರಿಗ್ಗಹಸುಖಾ ತಹಿಂ।
ತೇ ಏವ ಸನ್ತಿಕೇರೂಪಂ, ದೂರೇರೂಪಂ ಪನೇತರಂ॥
೫೬೮.
ತಣ್ಹಾದಿಟ್ಠೀಹುಪೇತೇನ, ಕಮ್ಮುನಾದಿನ್ನಭಾವತೋ।
ಕಮ್ಮಜಾತಮುಪಾದಿನ್ನಂ, ಅನುಪಾದಿನ್ನಕಂಪರಂ॥
೫೬೯.
ಚಕ್ಖುನಾ ದಿಸ್ಸಮಾನತ್ತಾ, ಸನಿದಸ್ಸನನಾಮಕಂ।
ರೂಪಮೇವ ತತೋ ಸೇಸ-ಮನಿದಸ್ಸನಮಬ್ರವುಂ॥
೫೭೦.
ಸನಿದಸ್ಸನರೂಪಞ್ಚ, ರೂಪಂ ಸಪ್ಪಟಿಘಂ ತಥಾ।
ಅನಿದಸ್ಸನಮಞ್ಞಂ ತು, ಥೂಲಂ ಸಪ್ಪಟಿಘಂ ಮತಂ॥
೫೭೧.
ಅನಿದಸ್ಸನರೂಪಞ್ಚ, ಸೇಸಂ ಅಪ್ಪಟಿಘಂ ತಥಾ।
ರೂಪಂ ತಿವಿಧಮಿಚ್ಚೇವಂ, ವಿಭಜನ್ತಿ ವಿಚಕ್ಖಣಾ॥
೫೭೨.
ಅಪ್ಪತ್ತಗೋಚರಗ್ಗಾಹಿರೂಪಂ ಚಕ್ಖಾದಿಕಂ ದ್ವಯಂ।
ಸಮ್ಪತ್ತಗ್ಗಾಹಿ ಘಾನಾದಿ-ತ್ತಯಮಗ್ಗಾಹಿಕಂ ರೂಪಂ॥
೫೭೩.
ದಿಟ್ಠಂ ರೂಪಂ ಸುತಂ ಸದ್ದೋ, ಮುತಂ ಗನ್ಧಾದಿಕತ್ತಯಂ।
ವಿಞ್ಞಾಣೇನೇವ ಞೇಯ್ಯತ್ತಾ, ವಿಞ್ಞಾತಮಪರಂ ಭವೇ॥
೫೭೪.
ಹದಯಂ
ಪಸಾದಾ ವತ್ಥು ಚ ದ್ವಾರಂ, ಅಞ್ಞಂ ತುಭಯವಜ್ಜಿತಂ॥
೫೭೫.
ಭೇದಿತ್ವಾ ರೂಪಮಿಚ್ಚೇವಂ, ತಸ್ಸೇವ ಪುನ ಪಣ್ಡಿತೋ।
ಸಮುಟ್ಠಾನಜನಕೇಹಿ, ವಿಭಾವೇಯ್ಯ ಯಥಾರಹಂ॥
೫೭೬.
ಕುಸಲಾಕುಸಲಂ ಕಮ್ಮ-ಮತೀತಂ ಕಾಮಿಕಂ ತಥಾ।
ರೂಪಾವಚರಮಿಚ್ಚೇವಂ, ಪಞ್ಚವೀಸತಿಧಾ ಠಿತಂ॥
೫೭೭.
ಪಟಿಸನ್ಧಿಮುಪಾದಾಯ, ಸಞ್ಜನೇತಿ ಖಣೇ ಖಣೇ।
ಕಾಮರೂಪೇಸು ರೂಪಾನಿ, ಕಮ್ಮಜಾನಿ ಯಥಾರಹಂ॥
೫೭೮.
ಜಾಯನ್ತಂ
ಭವಙ್ಗಾದಿಮುಪಾದಾಯ, ಸಮುಪ್ಪಾದೇತಿ ಮಾನಸಂ॥
೫೭೯.
ಸೀತುಣ್ಹೋತುಸಮಞ್ಞಾತಾ,
ತೇಜೋಧಾತು ಠಿತಿಕ್ಖಣೇ।
ತಥೇವಜ್ಝೋಹಟಾಹಾರೋ,
ಕಾಮೇ ಕಾಯಪ್ಪತಿಟ್ಠಿತೋ॥
೫೮೦.
ಅಜ್ಝತ್ತಂ ಪನ ಚತ್ತಾರೋ, ಬಾಹಿರೋ ತುಪಲಬ್ಭತಿ।
ಸಬ್ಬೇ ಕಾಮಭವೇ ರೂಪೇ, ಆಹಾರೋ ನ ಸಮೀರಿತೋ॥
೫೮೧.
ಪವತ್ತೇ ಹೋನ್ತಿ ಚತ್ತಾರೋ, ಕಮ್ಮಮೇವೋಪಪತ್ತಿಯಂ।
ಜೀವಮಾನಸ್ಸ ಸಬ್ಬೇಪಿ, ಮತಸ್ಸೋತು ಸಿಯಾ ನ ವಾ॥
೫೮೨.
ಕಮ್ಮಂ ಚಿತ್ತೋತುಮಾಹಾರ-ಮಿಚ್ಚೇವಂ ಪನ ಪಣ್ಡಿತಾ।
ರೂಪಾನಂ ಜನಕತ್ತೇನ, ಪಚ್ಚಯಾತಿ ಪಕಾಸಯುಂ॥
೫೮೩.
ಹದಯಿನ್ದ್ರಿಯರೂಪಾನಿ, ಕಮ್ಮಜಾನೇವ ಚಿತ್ತಜಂ।
ವಿಞ್ಞತ್ತಿದ್ವಯಮೀರೇನ್ತಿ, ಸದ್ದೋ ಚಿತ್ತೋತುಜೋ ಮತೋ॥
೫೮೪.
ಚಿತ್ತೋತುಕಬಳೀಕಾರ-ಸಮ್ಭೂತಾ ಲಹುತಾದಯೋ।
ಕಮ್ಮಚಿತ್ತೋತುಕಾಹಾರ-ಜಾನಿ ಸೇಸಾನಿ ದೀಪಯೇ॥
೫೮೫.
ಜಾಯಮಾನಾದಿರೂಪಾನಂ, ಸಭಾವತ್ತಾ ಹಿ ಕೇವಲಂ।
ಲಕ್ಖಣಾನಿ ನ ಜಾಯನ್ತಿ, ಕೇಹಿಚೀತಿ ಪಕಾಸಿತಂ॥
೫೮೬.
ಯದಿಜಾತಾದಯೋ
ತೇಸಞ್ಚ ಲಕ್ಖಣಾನನ್ತಿ, ಅನವತ್ಥಾ ಭವಿಸ್ಸತಿ॥
೫೮೭.
ಅಟ್ಠಾರಸ ಪನ್ನರಸ, ತೇರಸ ದ್ವಾದಸಾತಿ ಚ।
ಕಮ್ಮಚಿತ್ತೋತುಕಾಹಾರ-ಜಾನಿ ಹೋನ್ತಿ ಯಥಾಕ್ಕಮಂ॥
೫೮೮.
ಕಲಾಪಾನಿ ಯಥಾಯೋಗಂ, ತಾನಿ ಸಙ್ಗಯ್ಹ ಪಣ್ಡಿತಾ।
ನವ ಛ ಚತುರೋ ದ್ವೇತಿ, ಏಕವೀಸತಿ ಭಾವಯುಂ॥
೫೮೯.
ಜೀವಿತಞ್ಚಾವಿನಿಬ್ಭೋಗ-ರೂಪಞ್ಚ
ಸಙ್ಗಯ್ಹ ಚಕ್ಖುದಸಕಂ, ಚಕ್ಖುಮಾದಾಯ ಭಾಸಿತಂ॥
೫೯೦.
ತಥಾ ಸೋತಞ್ಚ ಘಾನಞ್ಚ, ಜಿವ್ಹಂ ಕಾಯಂ ಯಥಾಕ್ಕಮಂ।
ಇತ್ಥಿಭಾವಞ್ಚ ಪುಮ್ಭಾವಂ, ವತ್ಥುಮಾದಾಯ ದೀಪಯೇ॥
೫೯೧.
ಅವಿನಿಬ್ಭೋಗರೂಪೇನ, ಜೀವಿತನವಕಂ ಭವೇ।
ಇಚ್ಚೇವಂ ಕಮ್ಮಜಾ ನಾಮ, ಕಲಾಪಾ ನವಧಾ ಠಿತಾ॥
೫೯೨.
ಅವಿನಿಬ್ಭೋಗರೂಪಞ್ಚ, ಸುದ್ಧಟ್ಠಕಮುದೀರಿತಂ।
ಕಾಯವಿಞ್ಞತ್ತಿಯಾ ಸದ್ಧಿಂ, ನವಕನ್ತಿ ಪವುಚ್ಚತಿ॥
೫೯೩.
ವಚೀವಿಞ್ಞತ್ತಿಸದ್ದೇಹಿ, ದಸಕಂ ಭಾಸಿತಂ ತಥಾ।
ಲಹುತಾದೇಕಾದಸಕಂ, ಲಹುತಾದೀಹಿ ತೀಹಿಪಿ॥
೫೯೪.
ಕಾಯವಿಞ್ಞತ್ತಿಲಹುತಾ-ದೀಹಿ ದ್ವಾದಸಕಂ ಮತಂ।
ವಚೀವಿಞ್ಞತ್ತಿಲಹುತಾ-ದೀಹಿ ತೇರಸಕಂ ತಥಾ॥
೫೯೫.
ಗಹೇತ್ವಾಕಾರಭೇದಞ್ಚ, ತಂತಂಕಾಲೋಪಲಕ್ಖಿತಂ।
ಇತಿ ಚಿತ್ತಸಮುಟ್ಠಾನಾ, ಛ ಕಲಾಪಾತಿ ಭಾಸಿತಾ॥
೫೯೬.
ಸುದ್ಧಟ್ಠಕಂ ತು ಪಠಮಂ, ಸದ್ದೇನ ನವಕಂ ಮತಂ।
ಲಹುತಾದೇಕಾದಸಕಂ, ಲಹುತಾದಿಸಮಾಯುತಂ॥
೫೯೭.
ಸದ್ದೇನ ಲಹುತಾದೀಹಿ, ತಥಾ ದ್ವಾದಸಕಂ ಭವೇ।
ಕಲಾಪಾ ಉತುಸಮ್ಭೂತಾ, ಚತುದ್ಧೇವಂ ಪಕಾಸಿತಾ॥
೫೯೮.
ಸುದ್ಧಟ್ಠಕಞ್ಚ ಲಹುತಾ-ದೇಕಾದಸಕಮಿಚ್ಚಪಿ।
ಕಲಾಪಾಹಾರಸಮ್ಭೂತಾ, ದುವಿಧಾವ ವಿಭಾವಿತಾ॥
೫೯೯.
ಕಲಾಪಾನಂ
ನ ಕಲಾಪಙ್ಗಮಿಚ್ಚಾಹು, ಆಕಾಸಂ ಲಕ್ಖಣಾನಿ ಚ॥
೬೦೦.
ಇಚ್ಚೇವಂ ಚತುಸಮ್ಭೂತಾ, ಕಲಾಪಾ ಏಕವೀಸತಿ।
ಸಬ್ಬೇ ಲಬ್ಭನ್ತಿ ಅಜ್ಝತ್ತಂ, ಬಾಹಿರೋತುಸಮುಟ್ಠಿತಾ॥
೬೦೧.
ಅಟ್ಠಕಂ
ಮತಕಾಯೇಪಿ ತೇ ಏವ, ಸಿಯುಮಿಚ್ಚಾಹು ಪಣ್ಡಿತಾ॥
೬೦೨.
ಕಾಮೇ ಸಬ್ಬೇಪಿ ಲಬ್ಭನ್ತಿ, ಸಭಾವಾನಂ ಯಥಾರಹಂ।
ಸಮ್ಪುಣ್ಣಾಯತನಾನಂ ತು, ಪವತ್ತೇ ಚತುಸಮ್ಭವಾ॥
೬೦೩.
ದಸಕಾನೇವ ಸಬ್ಬಾನಿ, ಕಮ್ಮಜಾನೇವ ಜಾತಿಯಂ।
ಚಕ್ಖುಸೋತಘಾನಭಾವ-ದಸಕಾನಿ ನ ವಾ ಸಿಯುಂ॥
೬೦೪.
ವತ್ಥುಕಾಯದಸಕಾನಿ, ಸಭಾವದಸಕಾನಿ ವಾ।
ಗಬ್ಭಸೇಯ್ಯಕಸತ್ತಾನಂ, ತತೋ ಸೇಸಾನಿ ಸಮ್ಭವಾ॥
೬೦೫.
ಕಮ್ಮಂ ರೂಪಂ ಜನೇತೇವಂ,
ಮಾನಸಂ ಸನ್ಧಿತೋ ಪರಂ।
ತೇಜೋಧಾತು ಠಿತಿಪ್ಪತ್ತಾ,
ಆಹಾರಜ್ಝೋಹಟೋ ತಥಾ॥
೬೦೬.
ಇಚ್ಚೇವಂ ಚತುಸಮ್ಭೂತಾ, ರೂಪಸನ್ತತಿ ಕಾಮಿನಂ।
ದೀಪಜಾಲಾವ ಸಮ್ಬನ್ಧಾ, ಯಾವಜೀವಂ ಪವತ್ತತಿ॥
೬೦೭.
ಆಯುನೋ ವಾಥ ಕಮ್ಮಸ್ಸ, ಖಯೇನೋಭಿನ್ನಮೇವ ವಾ।
ಅಞ್ಞೇನ ವಾ ಮರನ್ತಾನ-ಮುಪಚ್ಛೇದಕಕಮ್ಮುನಾ॥
೬೦೮.
ಸತ್ತರಸಚಿತ್ತಕ್ಖಣಮಾಯು ರೂಪಾನಮೀರಿತಂ।
ಸತ್ತರಸಮಚಿತ್ತಸ್ಸ, ಚುತಿಚಿತ್ತೋಪರೀ ತತೋ॥
೬೦೯.
ಠಿತಿಕಾಲಮುಪಾದಾಯ, ಕಮ್ಮಜಂ ನ ಪರಂ ಭವೇ।
ತತೋ ಭಿಜ್ಜತುಪಾದಿನ್ನಂ, ಚಿತ್ತಜಾಹಾರಜಂ ತತೋ॥
೬೧೦.
ಇಚ್ಚೇವಂ ಮತಸತ್ತಾನಂ, ಪುನದೇವ ಭವನ್ತರೇ।
ಪಟಿಸನ್ಧಿಮುಪಾದಾಯ, ತಥಾ ರೂಪಂ ಪವತ್ತತಿ॥
೬೧೧.
ಘಾನಜಿವ್ಹಾಕಾಯಭಾವದಸಕಾಹಾರಜಂ
ರೂಪಂ ರೂಪಭವೇ ನತ್ಥಿ, ಪಟಿಸನ್ಧಿಪವತ್ತಿಯಂ॥
೬೧೨.
ತತ್ಥ
ಕಲಾಪಾ ಚ ಗಣೇತಬ್ಬಾ, ತತ್ಥೇತಂ ರೂಪವಜ್ಜಿತಾ॥
೬೧೩.
ಠಿತಿಕ್ಖಣಞ್ಚ ಚಿತ್ತಸ್ಸ, ತೇ ಏವ ಪಟಿಸೇಧಯುಂ।
ಚಿತ್ತಭಙ್ಗಕ್ಖಣೇ ರೂಪ-ಸಮುಪ್ಪತ್ತಿಞ್ಚ ವಾರಯುಂ॥
೬೧೪.
ಚಕ್ಖುಸೋತವತ್ಥುಸದ್ದಚಿತ್ತಜಮ್ಪಿ ಅಸಞ್ಞಿಸು।
ಅರೂಪೇ ಪನ ರೂಪಾನಿ, ಸಬ್ಬಥಾಪಿ ನ ಲಬ್ಭರೇ॥
೬೧೫.
ಇತ್ಥಂ ಪನೇತ್ಥ ವಿಮಲೇನ ವಿಭಾವನತ್ಥಂ,
ಧಮ್ಮಂ ಸುಧಮ್ಮಮುಪಗಮ್ಮ ಸುರಾಧಿವಾಸಂ।
ರೂಪಂ ಅರೂಪಸವಿಭಾಗಸಲಕ್ಖಣಂ ತಂ,
ವುತ್ತಂ ಪವುತ್ತಮಭಿಧಮ್ಮನಯೇ ಮಯಾಪಿ॥
೬೧೬.
ರೂಪವಿಭಾಗಮಿಮಂ ಸುವಿಭತ್ತಂ, ರೂಪಯತೋ ಪನ ಚೇತಸಿ ನಿಚ್ಚಂ।
ರೂಪಸಮಿದ್ಧಜಿನೇರಿತಧಮ್ಮೇ, ರೂಪವತೀ ಅಭಿವಡ್ಢತಿ ಪಞ್ಞಾ॥
ಇತಿ ನಾಮರೂಪಪರಿಚ್ಛೇದೇ ರೂಪವಿಭಾಗೋ ನಾಮ
ಛಟ್ಠೋ ಪರಿಚ್ಛೇದೋ।