೭. ಸತ್ತಮೋ ಪರಿಚ್ಛೇದೋ

ಸಬ್ಬಸಙ್ಗಹವಿಭಾಗೋ

೬೧೭.

ಚತುಪಞ್ಞಾಸ ಧಮ್ಮಾ ಹಿ, ನಾಮನಾಮೇನ ಭಾಸಿತಾ।

ಅಟ್ಠಾರಸವಿಧಾ ವುತ್ತಾ, ರೂಪಧಮ್ಮಾತಿ ಸಬ್ಬಥಾ॥

೬೧೮.

ಅಭಿಞ್ಞೇಯ್ಯಾ ಸಭಾವೇನ, ದ್ವಾಸತ್ತತಿ ಸಮೀರಿತಾ।

ಸಚ್ಚಿಕಟ್ಠಪರಮತ್ಥಾ, ವತ್ಥುಧಮ್ಮಾ ಸಲಕ್ಖಣಾ॥

೬೧೯.

ತೇಸಂ ದಾನಿ ಪವಕ್ಖಾಮಿ, ಸಬ್ಬಸಙ್ಗಾಹಿಕಂ ನಯಂ।

ಆಭಿಧಮ್ಮಿಕಭಿಕ್ಖೂನಂ, ಹತ್ಥಸಾರಮನುತ್ತರಂ॥

೬೨೦.

ದುಕಾ ತಿಕಾ ಚ ಖನ್ಧಾಯತನತೋ ಧಾತುಸಚ್ಚತೋ।

ಪಟಿಚ್ಚಸಮುಪ್ಪಾದಾ ಚ, ಪಚ್ಚಯಾ ಚ ಸಮಞ್ಞತೋ॥

೬೨೧.

ಪಚ್ಚಯೋ ಏವ ನಿಬ್ಬಾನಮಪಚ್ಚಯಮಸಙ್ಖತಂ।

ಅಸಙ್ಖಾರಮನುಪ್ಪಾದಂ, ಸಸ್ಸತಂ ನಿಚ್ಚಲಕ್ಖಣಂ॥

೬೨೨.

ಪಚ್ಚಯಾ ಚೇವ ಸಙ್ಖಾರಾ, ಸಙ್ಖತಾ ಚ ತತೋಪರೇ।

ಉಪ್ಪಾದವಯಧಮ್ಮಾ ಚ, ಪಚ್ಚಯಟ್ಠಿತಿಕಾ ತಥಾ॥

೬೨೩.

ನಿಬ್ಬಾನಂ ರೂಪಧಮ್ಮಾ ಚ, ವಿಪ್ಪಯುತ್ತಾವ ಕೇವಲಂ।

ಆರಮ್ಮಣಾ ಏವ ನಾಮ, ನಾಲಮ್ಬನ್ತಿ ಹಿ ಕಿಞ್ಚಿಪಿ॥

೬೨೪.

ಏಕುಪ್ಪಾದನಿರೋಧಾ ಚ, ಏಕಾಲಮ್ಬಣವತ್ಥುಕಾ।

ಸಂಸಟ್ಠಾ ಸಮ್ಪಯುತ್ತಾ ಚ, ಸಹಜಾತಾ ಯಥಾರಹಂ॥

೬೨೫.

ಅಞ್ಞಮಞ್ಞೇನುಪತ್ಥದ್ಧಾ, ಸಬ್ಬತ್ಥ ಸಹವುತ್ತಿನೋ।

ಸಾರಮ್ಮಣಾರಮ್ಮಣಾ ಚ, ಚಿತ್ತಚೇತಸಿಕಾ ಮತಾ॥

೬೨೬.

ವಿಪಸ್ಸನಾಯ ಭೂಮೀತಿ, ತತ್ಥ ತೇಭೂಮಕಾ ಮತಾ।

ಲೋಕಿಯಾ ಪರಿಯಾಪನ್ನಾ, ವಟ್ಟಧಮ್ಮಾ ಸಉತ್ತರಾ॥

೬೨೭.

ಸಕ್ಕಾಯಧಮ್ಮಾ ಸಭಯಾ, ತೀರಮೋರಿಮನಾಮಕಂ।

ಸಂಯೋಜನಿಯಾ ಸಮಲಾ, ತಥಾ ನೀವರಣೀಯಕಾ॥

೬೨೮.

ಸಂಕ್ಲೇಸಿಕಾ ಪರಾಮಟ್ಠಾ, ಉಪಾದಾನೀಯಸಾಸವಾ।

ಓಘನೀಯಾ ಯೋಗನೀಯಾ, ಗನ್ಥನೀಯಾತಿ ಭಾಸಿತಾ॥

೬೨೯.

ಅಞ್ಞೇ ಅಪರಿಯಾಪನ್ನಾ, ವಿವಟ್ಟಾ ಚಾವಿಪಸ್ಸಿಯಾ।

ಲೋಕುತ್ತರಾನುತ್ತರಾ ಚ, ನೋಸಂಯೋಜನಿಯಾದಯೋ॥

೬೩೦.

ಕಮ್ಮಜಾತಾ ಉಪಾದಿನ್ನಾ, ನಾಮ ವುಚ್ಚನ್ತಿ ಸಾಸವಾ।

ಅನುಪಾದಿನ್ನಕಾ ನಾಮ, ತತೋ ಸೇಸಾ ಪವುಚ್ಚರೇ॥

೬೩೧.

ಧಮ್ಮಾ ಸಪ್ಪಟಿಭಾಗಾತಿ, ಕುಸಲಾಕುಸಲಾ ಮತಾ।

ಅಪ್ಪಟಿಭಾಗಧಮ್ಮಾತಿ, ತದಞ್ಞೇ ಪರಿದೀಪಯೇ॥

೬೩೨.

ಸರಣಾ ಚ ಪಹಾತಬ್ಬಾ, ದ್ವಾದಸಾಕುಸಲಾ ಪನ।

ತದಞ್ಞೇ ಅರಣಾ ನಾಮ, ಪಹಾತಬ್ಬಾ ನ ಕೇಹಿಚಿ॥

೬೩೩.

ರೂಪಿನೋ ರೂಪಧಮ್ಮಾ ಚ, ನಾಮಧಮ್ಮಾ ಅರೂಪಿನೋ।

ಏವಮಾದಿಪ್ಪಭೇದೇನ, ದ್ವಿಧಾ ಭೇದಂ ವಿಭಾವಯೇ॥

೬೩೪.

ಬಾಲಾ ಧಮ್ಮಾ ತಪನೀಯಾ, ಕಣ್ಹಾ ಚ ಕಟುಕಪ್ಫಲಾ।

ಅಸೇವಿತಬ್ಬಾ ಸಾವಜ್ಜಾ, ದ್ವಾದಸಾಕುಸಲಾ ಮತಾ॥

೬೩೫.

ಪಣ್ಡಿತಾ ಚಾತಪನೀಯಾ, ಸುಕ್ಕಾ ಚ ಸುಖದಾಯಕಾ।

ಸೇವಿತಬ್ಬಾನವಜ್ಜಾ ಚ, ಕುಸಲಾ ಏಕವೀಸತಿ॥

೬೩೬.

ಕ್ರಿಯಾ ವಿಪಾಕಾ ರೂಪಞ್ಚ, ನಿಬ್ಬಾನನ್ತಿ ಚತುಬ್ಬಿಧಾ।

ವುತ್ತಾ ಅಬ್ಯಾಕತಾ ನಾಮ, ಧಮ್ಮಾ ತಬ್ಬಿಪರೀತತೋ॥

೬೩೭.

ಹೀನಾ ಧಮ್ಮಾ ಪರಿತ್ತಾ ಚ, ಕಾಮಾವಚರಭೂಮಿಕಾ।

ರೂಪಾರೂಪಾ ಪವುಚ್ಚನ್ತಿ, ಮಜ್ಝಿಮಾ ಚ ಮಹಗ್ಗತಾ॥

೬೩೮.

ಅಪ್ಪಮಾಣಾ ಪಣೀತಾ ಚ, ಧಮ್ಮಾ ಲೋಕುತ್ತರಾ ಮತಾ।

ಸಂಕಿಲಿಟ್ಠಸಂಕ್ಲೇಸಿಕಾ, ದ್ವಾದಸಾಕುಸಲಾ ತಥಾ॥

೬೩೯.

ಅಸಂಕಿಲಿಟ್ಠಸಂಕ್ಲೇಸಿಕಾ, ಧಮ್ಮಾ ತೇಭೂಮಕಾಪರೇ।

ಅಸಂಕ್ಲಿಟ್ಠಾಸಂಕ್ಲೇಸಿಕಾ, ನವ ಲೋಕುತ್ತರಾ ಸಿಯುಂ॥

೬೪೦.

ವಿಪಾಕಾ ತೇ ಪವುಚ್ಚನ್ತಿ, ವಿಪಾಕಾ ಚತುಭೂಮಕಾ।

ವಿಪಾಕಧಮ್ಮಾ ನಾಮಾತಿ, ಕುಸಲಾಕುಸಲಾ ಮತಾ॥

೬೪೧.

ಕ್ರಿಯಾ ರೂಪಞ್ಚ ನಿಬ್ಬಾನಂ, ನ ಪಾಕಂ ನ ತು ಪಚ್ಚತಿ।

ಆಚಯಗಾಮಿನೋ ಧಮ್ಮಾ, ಪುಞ್ಞಾಪುಞ್ಞಾವ ಸಾಸವಾ॥

೬೪೨.

ವುತ್ತಾಪಚಯಗಾಮಿನೋ , ಕುಸಲಾನುತ್ತರಾ ಪನ।

ಕ್ರಿಯಾ ರೂಪಞ್ಚ ನಿಬ್ಬಾನಂ, ಪಾಕಾ ಚೋಭಯವಜ್ಜಿತಾ॥

೬೪೩.

ಪಠಮಾನುತ್ತರೋ ಮಗ್ಗೋ, ದಸ್ಸನಂ ಭಾವನಾಪರೇ।

ತದಞ್ಞೇ ದ್ವಯನಿಮ್ಮುತ್ತಾ, ಸಬ್ಬೇಪಿ ಪರಮತ್ಥತೋ॥

೬೪೪.

ಸತ್ತ ಲೋಕುತ್ತರಾ ಹೇಟ್ಠಾ, ವುತ್ತಾ ಸೇಕ್ಖಾತಿ ತಾದಿನಾ।

ಅರಹತ್ತಫಲಮೇವ, ಅಸೇಕ್ಖನ್ತಿ ಪಕಾಸಿತಂ॥

೬೪೫.

ಲೋಕಿಯಾಪಿ ಚ ನಿಬ್ಬಾನಂ, ಭಾಸಿತೋಭಯವಜ್ಜಿತಾ।

ಏವಮಾದಿಪ್ಪಕಾರೇಹಿ, ತಿವಿಧಾತಿ ವಿಭಾವಯೇ॥

೬೪೬.

ಅತೀತಾನಾಗತಂ ರೂಪಂ, ಪಚ್ಚುಪ್ಪನ್ನಮಥಾಪರಂ।

ಅಜ್ಝತ್ತಂ ವಾ ಬಹಿದ್ಧಾ ವಾ, ಸುಖುಮೋಳಾರಿಕಂ ತಥಾ॥

೬೪೭.

ಹೀನಂ ಪಣೀತಂ ಯಂ ದೂರೇ, ಸನ್ತಿಕೇ ವಾ ತದೇಕತೋ।

ಸಬ್ಬಂ ರೂಪಂ ಸಮೋಧಾಯ, ರೂಪಕ್ಖನ್ಧೋತಿ ವುಚ್ಚತಿ॥

೬೪೮.

ತಥೇವ ವೇದನಾಕ್ಖನ್ಧೋ, ನಾಮ ಯಾ ಕಾಚಿ ವೇದನಾ।

ಸಞ್ಞಾಕ್ಖನ್ಧೋತಿ ಸಞ್ಞಾ ಚ, ರಾಸಿಭಾವೇನ ಭಾಸಿತಾ॥

೬೪೯.

ವಟ್ಟಧಮ್ಮೇಸು ಅಸ್ಸಾದಂ, ತದಸ್ಸಾದೋಪಸೇವನಂ।

ವಿನಿಭುಜ್ಜ ನಿದಸ್ಸೇತುಂ, ಖನ್ಧದ್ವಯಮುದಾಹಟಂ॥

೬೫೦.

ವಿವಾದಮೂಲಸಂಸಾರ-ಕಮಹೇತುನಿದಸ್ಸನಂ।

ಸನ್ಧಾಯ ವೇದನಾ ಸಞ್ಞಾ, ಕತಾ ನಾನಾತಿ ಕೇಚನ॥

೬೫೧.

ಚಿತ್ತಸಂಸಟ್ಠಧಮ್ಮಾನಂ, ಚೇತನಾಮುಖತೋ ಪನ।

ಸಙ್ಖಾರಕ್ಖನ್ಧನಾಮೇನ, ಧಮ್ಮಾ ಚೇತಸಿಕಾ ಮತಾ॥

೬೫೨.

ಸಬ್ಬಭೇದಂ ತಥಾ ಚಿತ್ತಂ, ವಿಞ್ಞಾಣಕ್ಖನ್ಧ ಸಮ್ಮತಂ।

ಭೇದಾಭಾವೇನ ನಿಬ್ಬಾನಂ, ಖನ್ಧಸಙ್ಗಹನಿಸ್ಸಟಂ॥

೬೫೩.

ಆಲಮ್ಬನೀಯಭಾವೇನ, ಉಪಾದಾನೋಪಕಾರತೋ।

ಪಞ್ಚುಪಾದಾನಕ್ಖನ್ಧಾತಿ, ಲೋಕುತ್ತರವಿವಜ್ಜಿತಾ॥

೬೫೪.

ಯಥಾ ಥೂಲಂ ಹಿತತ್ಥಾಯ, ಪರಿಗ್ಗಾಹಕಯೋಗಿನಂ।

ಧಮ್ಮಾ ತೇಭೂಮಕಾ ಏಕ-ಭೂಮಿಭಾವಾಯ ದೇಸಿತಾ॥

೬೫೫.

ಭಾಜನಂ ಭೋಜನಂ ತಸ್ಸ, ಬ್ಯಞ್ಜನಂ ಭೋಜಕೋ ತಥಾ।

ಭುಞ್ಜಿತಾ ಚಾತಿ ಪಞ್ಚೇತೇ, ಉಪಮೇನ್ತಿ ಯಥಾಕ್ಕಮಂ॥

೬೫೬.

ಗಿಲಾನಸಾಲಾ ಗೇಲಞ್ಞಂ, ಅಸಪ್ಪಾಯೋಪಸೇವನಾ।

ಸಮುಟ್ಠಾನಂ ಗಿಲಾನೋತಿ, ಉಪಮೇನ್ತಿ ಚ ಪಣ್ಡಿತಾ॥

೬೫೭.

ಚಾರಕೋ ಕಾರಣಂ ತತ್ಥ, ಅಪರಾಧೋ ಚ ಕಾರಕೋ।

ಅಪರಾಧಕತೋ ಚೋರೋ, ಇತಿ ಚೋಪಮಿತಾ ಪುನ॥

೬೫೮.

ನಿಚ್ಚಾಧಿಪೀಳನಟ್ಠೇನ , ಭಾರಾತಿ ಪರಿದೀಪಿತಾ।

ಕ್ಲೇಸದುಕ್ಖಮುಖೇನೇತೇ, ಖಾದಕಾ ಚ ನಿರನ್ತರಂ॥

೬೫೯.

ಅನತ್ಥಾವಹಿತಾ ನಿಚ್ಚಮುಕ್ಖಿತ್ತಾಸಿಕವೇರಿನೋ।

ಮಚ್ಚುಮಾರಾಭಿಧೇಯ್ಯತ್ತಾ, ವಧಕಾತಿ ಚ ಭಾಸಿತಾ॥

೬೬೦.

ವಿಮದ್ದಾಸಹನಂ ರೂಪಂ, ಫೇಣಪಿಣ್ಡಂವ ದುಬ್ಬಲಂ।

ಮುಹುತ್ತರಮಣೀಯತ್ತಾ, ವೇದನಾ ಬುಬ್ಬುಳೂಪಮಾ॥

೬೬೧.

ಮರೀಚಿಕೂಪಮಾ ಸಞ್ಞಾ, ವಿಪಲ್ಲಾಸಕಭಾವತೋ।

ಸಙ್ಖಾರಾಪಿ ಚ ನಿಸ್ಸಾರಾ, ಕದಲಿಕ್ಖನ್ಧಸಾದಿಸಾ॥

೬೬೨.

ನಾನಪ್ಪಕಾರಂ ಚಿನ್ತೇನ್ತಂ, ನಾನಾಕ್ಲೇಸವಿಮೋಹಿತಂ।

ಪಲಮ್ಭತೀತಿ ವಿಞ್ಞಾಣಂ, ಮಾಯಾಸಮಮುದೀರಿತಂ॥

೬೬೩.

ಇಚ್ಚೇವಂ ಪಞ್ಚುಪಾದಾನಕ್ಖನ್ಧಾ ಖನ್ಧಾ ಚ ಕೇವಲಂ।

ಪಞ್ಚಕ್ಖನ್ಧಾತಿ ನಾಮೇನ, ದೇಸಿತಾತಿ ವಿಭಾವಯೇ॥

೬೬೪.

ಅಜ್ಝತ್ತಞ್ಚ ಬಹಿದ್ಧಾ ಚ, ವಿಞ್ಞಾಣುಪ್ಪತ್ತಿಕಾರಣಂ।

ದ್ವಾರಾಲಮ್ಬಣಭೇದೇನ, ದ್ವೇಧಾಯತನಮೀರಿತಂ॥

೬೬೫.

ಚಕ್ಖಾದಜ್ಝತ್ತಿಕಂ ತತ್ಥ, ಛದ್ವಾರಾಯತನಂ ಭವೇ।

ಬಾಹಿರಾಯತನಂ ನಾಮ, ತಥಾ ರೂಪಾದಿಗೋಚರಂ॥

೬೬೬.

ಇತಿ ವೀಥಿಪ್ಪವತ್ತಾನಂ, ದ್ವಾರಾಲಮ್ಬಣಸಙ್ಗಹೋ।

ಆಗಮೇ ಅಭಿಧಮ್ಮೇ ತು, ಸಬ್ಬಥಾಪಿ ಯಥಾರಹಂ॥

೬೬೭.

ತಥಾಹನನ್ತರಾತೀತೋ, ಜಾಯಮಾನಸ್ಸ ಪಚ್ಛತೋ।

ಮನೋ ಸಬ್ಬೋಪಿ ಸಬ್ಬಸ್ಸ, ಮನಸ್ಸಾಯತನಂ ಭವೇ॥

೬೬೮.

ತಥಾ ಪುಬ್ಬಙ್ಗಮಟ್ಠೇನ, ಸಹಜಾನಮರೂಪಿನಂ।

ದ್ವಾರಭಾವೇನ ವಿಞ್ಞಾಣಂ, ಸಬ್ಬಮಾಯತನಂ ಮತಂ॥

೬೬೯.

ಮನಾಯತನಮಿಚ್ಚೇವಂ, ಪಸಾದಾಯತನಂ ತಥಾ।

ಪಞ್ಚವಿಞ್ಞಾಣಧಮ್ಮಾನಂ, ಇತಿ ಛದ್ಧಾ ವಿಭಾವಯೇ॥

೬೭೦.

ಪಞ್ಚಪ್ಪಸಾದವಿಸಯಾ, ಪಞ್ಚಾಯತನಸಮ್ಮತಾ।

ಸೇಸಂ ರೂಪಞ್ಚ ನಿಬ್ಬಾನಂ, ಸಬ್ಬೇ ಚೇತಸಿಕಾತಿ ಚ॥

೬೭೧.

ಏಕೂನಸಟ್ಠಿಧಮ್ಮಾನಂ , ಧಮ್ಮಾಯತನಸಙ್ಗಹೋ।

ಇತಿ ಛದ್ಧಾ ಪಕಾಸೇನ್ತಿ, ಬಾಹಿರಾಯತನಂ ಬುಧಾ॥

೬೭೨.

ಸುಞ್ಞಗಾಮೋವ ದಟ್ಠಬ್ಬ-ಮಜ್ಝತ್ತಿಕಮಸಾರತೋ।

ಗಾಮಘಾತಕಚೋರಾವ, ತಂ ಹನನ್ತಂವ ಬಾಹಿರಂ॥

೬೭೩.

ನಾಮಪ್ಪವತ್ತಿಮುಳ್ಹಾನಂ, ತದುಪ್ಪತ್ತಿಕಕಾರಣಂ।

ದ್ವಾದಸಾಯತನಾನೀತಿ, ವುತ್ತಮಿತ್ಥಂ ಮಹೇಸಿನಾ॥

೬೭೪.

ಸಮತ್ತಾ ಭಾವಮತ್ತೇನ, ಧಾರೇನ್ತೀತಿ ಸಲಕ್ಖಣಂ।

ದ್ವಾರಾಲಮ್ಬತದುಪ್ಪನ್ನ-ಪರಿಯಾಯೇನ ಭೇದಿತಾ॥

೬೭೫.

ಮನಾಯತನಮೇತ್ಥಾಹ, ಸತ್ತ ವಿಞ್ಞಾಣಧಾತುಯೋ।

ಏಕಾದಸ ಯಥಾವುತ್ತಾ, ಇಚ್ಚಟ್ಠಾರಸ ಧಾತುಯೋ॥

೬೭೬.

ಅನ್ತಾದಿಕಾ ಮನೋಧಾತು, ಮನೋವಿಞ್ಞಾಣಧಾತುಯಾ।

ಪವೇಸಾಪಗಮೇ ದ್ವಾರ-ಪರಿಯಾಯೇನ ತಿಟ್ಠತಿ॥

೬೭೭.

ಭೇರೀತಲದಣ್ಡಘೋಸ-ಸಮಂ ಛಕ್ಕಂ ಯಥಾಕ್ಕಮಂ।

ಕಟ್ಠಾರಣಿಪಾವಕಾದಿ-ಸಮಞ್ಚ ತಿವಿಧಂ ಭವೇ॥

೬೭೮.

ದುಕ್ಖಂ ಸಮುದಯೋ ಚೇವ, ನಿರೋಧೋ ಚ ತಥಾಪರೋ।

ಮಗ್ಗೋ ಚಾತಿ ಚತುದ್ಧಾಹ, ಸಚ್ಚಂ ಸಚ್ಚಪರಕ್ಕಮೋ॥

೬೭೯.

ಭಾರೋ ಚ ಭಾರದಾನಞ್ಚ, ಭಾರನಿಕ್ಖೇಪನಂ ತಥಾ।

ಭಾರನಿಕ್ಖೇಪನೂಪಾಯೋ, ಇಚ್ಚೋಪಮ್ಮಂ ಯಥಾಕ್ಕಮಂ॥

೬೮೦.

ರೋಗೋ ರೋಗನಿದಾನಞ್ಚ, ರೋಗವೂಪಸಮೋ ತಥಾ।

ರೋಗಭೇಸಜ್ಜಮಿಚ್ಚೇವ-ಮುಪಮಾಹಿ ಚ ದೀಪಿತಂ॥

೬೮೧.

ವಿಸರುಕ್ಖೋ ರುಕ್ಖಮೂಲಂ, ರುಕ್ಖಚ್ಛೇದೋ ತಥಾಪರೋ।

ರುಕ್ಖಚ್ಛೇದಕಸತ್ಥನ್ತಿ, ಚತುಧೋಪಮಿತಂ ತಥಾ॥

೬೮೨.

ತೀರಮೋರಿಮಸಙ್ಖಾತಂ, ಮಹೋಘೋ ಪಾರಿಮಂ ತಥಾ।

ತದತಿಕ್ಕಮುಪಾಯೋತಿ, ಉಪಮೇನ್ತಿ ಚ ತಂ ಬುಧಾ॥

೬೮೩.

ಸಚ್ಛಿಕತ್ವಾನ ಪಚ್ಚಕ್ಖ-ಮಿಚ್ಚೋಪಮ್ಮಂ ಯಥಾಕ್ಕಮಂ।

ಸಮಾಚಿಕ್ಖಿ ವಿಮೋಕ್ಖಾಯ, ಸಚ್ಚಂ ತಚ್ಛನಿಯಾಮತೋ॥

೬೮೪.

ತಥಾ ಹಿ ದುಕ್ಖಂ ನಾಬಾಧಂ, ನಾಞ್ಞಂ ದುಕ್ಖಾ ಚ ಬಾಧಕಂ।

ಬಾಧಕತ್ತನಿಯಾಮೇನ, ದುಕ್ಖಸಚ್ಚಮಿತೀರಿತಂ॥

೬೮೫.

ತಂ ವಿನಾ ನಾಞ್ಞತೋ ದುಕ್ಖಂ, ನ ಹೋತಿ ನ ಚ ತಂ ತತೋ।

ದುಕ್ಖಹೇತುನಿಯಾಮೇನ, ಸಚ್ಚಮಾಹ ವಿಸತ್ತಿಕಂ॥

೬೮೬.

ನಾಞ್ಞಾ ನಿಬ್ಬಾನತೋ ಸನ್ತಿ, ನ ಚ ಸನ್ತಂ ನ ತಂ ಯತೋ।

ಸನ್ತಭಾವನಿಯಾಮೇನ, ನಿಬ್ಬಾನಂ ಸಚ್ಚಮುತ್ತಮಂ॥

೬೮೭.

ನಾಞ್ಞಂ ಮಗ್ಗಾಚ ನಿಯ್ಯಾನಂ, ಅನಿಯ್ಯಾನೋ ನ ಚಾಪಿ ಸೋ।

ತಸ್ಮಾ ನಿಯ್ಯಾನಭಾವೇನ, ಮಗ್ಗೋ ಸಚ್ಚನ್ತಿ ಸಮ್ಮತೋ॥

೬೮೮.

ಇತಿ ತಚ್ಛಾವಿಪಲ್ಲಾಸ-ಭೂತಭಾವೋ ಚತೂಸುಪಿ।

ಸಚ್ಚಟ್ಠೋತಿ ವಿನಿದ್ದಿಟ್ಠೋ, ದುಕ್ಖಾದೀಸ್ವವಿಸೇಸತೋ॥

೬೮೯.

ಪೀಳನಟ್ಠೋ ಸಙ್ಖತಟ್ಠೋ, ಸನ್ತಾಪಟ್ಠೋ ಚ ಭಾಸಿತೋ।

ವಿಪರೀಣಾಮಟ್ಠೋ ಚಾತಿ, ದುಕ್ಖಸ್ಸೇವಂ ಚತುಬ್ಬಿಧಾ॥

೬೯೦.

ಆಯೂಹನಾ ನಿದಾನಾ ಚ, ಸಂಯೋಗಾ ಪಲಿಬೋಧತೋ।

ದುಕ್ಖಸ್ಸಮುದಯಸ್ಸಾಪಿ, ಚತುಧತ್ಥಾ ಪಕಾಸಿತಾ॥

೬೯೧.

ನಿಸ್ಸಾರಣಾ ವಿವೇಕಾ ಚಾ-ಸಙ್ಖತಾಮತತೋ ತಥಾ।

ಅತ್ಥಾ ದುಕ್ಖನಿರೋಧಸ್ಸ, ಚತುಧಾವ ಸಮೀರಿತಾ॥

೬೯೨.

ನಿಯ್ಯಾನತೋ ಹೇತುತೋ ಚ,

ದಸ್ಸನಾಧಿಪತೇಯ್ಯತೋ।

ಮಗ್ಗಸ್ಸಾಪಿ ಚತುದ್ಧೇವ-

ಮಿತಿ ಸೋಳಸಧಾ ಠಿತಾ॥

೬೯೩.

ಸಚ್ಚಿಕಟ್ಠಪರಮತ್ಥಂ, ತಚ್ಛಾಭಿಸಮಯಟ್ಠತೋ।

ತಥತ್ಥಮಪಿ ಸಚ್ಚಟ್ಠಂ, ಪಟ್ಠಪೇನ್ತೇತ್ಥ ಪಣ್ಡಿತಾ॥

೬೯೪.

ತದೇತಂ ಪಟಿವಿಜ್ಝನ್ತಿ, ಅರಿಯಾವ ಚತುಬ್ಬಿಧಂ।

ವುತ್ತಮರಿಯಸಚ್ಚನ್ತಿ, ತಸ್ಮಾ ನಾಥೇನ ತಂ ಕಥಂ।

೬೯೫.

ಜಾತಿ ಜರಾ ಚ ಮರಣಂ, ಸೋಕೋ ಚ ಪರಿದೇವನಾ।

ದುಕ್ಖಞ್ಚ ದೋಮನಸ್ಸಞ್ಚ, ಉಪಾಯಾಸೋ ತಥಾಪರೋ॥

೬೯೬.

ಅಪ್ಪಿಯೇಹಿ ಚ ಸಂಯೋಗೋ, ವಿಪ್ಪಯೋಗೋ ಪಿಯೇಹಿ ಚ।

ಯಮ್ಪಿ ನ ಲಭತಿಚ್ಛನ್ತೋ, ತಮ್ಪಿ ದುಕ್ಖಮಿದಂ ಮತಂ॥

೬೯೭.

ಅಪಾಯೇಸುಪಪಜ್ಜನ್ತಾ, ಚವನ್ತಾ ದೇವಲೋಕತೋ।

ಮನುಸ್ಸೇಸು ಚ ಜೀರನ್ತಾ, ನಾನಾಬ್ಯಸನಪೀಳಿತಾ॥

೬೯೮.

ಸೋಚನ್ತಾ ಪರಿದೇವನ್ತಾ, ವೇದೇನ್ತಾ ದುಕ್ಖವೇದನಂ।

ದೋಮನಸ್ಸೇಹಿ ಸನ್ತತ್ತಾ, ಉಪಾಯಾಸವಿಘಾತಿನೋ॥

೬೯೯.

ಅನಿಟ್ಠೇಹಿ ಅಕನ್ತೇಹಿ, ಅಪ್ಪಿಯೇಹಿ ಸಮಾಯುತಾ।

ಸಙ್ಖಾರೇಹಿ ಚ ಸತ್ತೇಹಿ, ನಾನಾನತ್ಥವಿಧಾಯಿಭಿ॥

೭೦೦.

ಇಟ್ಠೇಹಿ ಪಿಯಕನ್ತೇಹಿ, ಮನಾಪೇಹಿ ವಿಯೋಜಿತಾ।

ಸಙ್ಖಾರೇಹಿ ಚ ಸತ್ತೇಹಿ, ನಾನಾಸಮ್ಪತ್ತಿದಾಯಿಭಿ॥

೭೦೧.

ದುಕ್ಖಾಪಗಮಮಿಚ್ಛನ್ತಾ , ಪತ್ಥಯನ್ತಾ ಸುಖಾಗಮಂ।

ಅಲಬ್ಭನೇಯ್ಯಧಮ್ಮೇಸು, ಪಿಪಾಸಾತುರಮಾನಸಾ॥

೭೦೨.

ಕಿಚ್ಛಾಧಿಪನ್ನಾ ಕಪಣಾ, ವಿಪ್ಫನ್ದನ್ತಾ ರುದಮ್ಮುಖಾ।

ತಣ್ಹಾದಾಸಾ ಪರಾಭೂತಾ, ಭವಸಂಸಾರಸಂಕಟೇ॥

೭೦೩.

ಯಂ ತೇಭೂಮಕನಿಸ್ಸನ್ದಂ, ಕಟುಕಂ ಗಾಳ್ಹವೇದನಂ।

ವೇದೇನ್ತಿ ಸಂಸಾರಫಲಂ, ತಂಜಾತಾದಿಂ ವಿನಾ ಕುತೋ॥

೭೦೪.

ತಸ್ಮಾ ಜಾತಾದಿಭೇದೇಹಿ, ಬಾಧಮಾನಾ ಭಯಾವಹಾ।

ದುಕ್ಖಾ ಚ ದುಕ್ಖವತ್ಥು ಚ, ಬಹುಧಾಪಿ ಪಪಞ್ಚಿತಾ॥

೭೦೫.

ತೇ ಸಬ್ಬೇ ಪಞ್ಚುಪಾದಾನ-ಕ್ಖನ್ಧಾ ಏವ ಸಮಾಸತೋ।

ದುಕ್ಖಾಧಿಟ್ಠಾನಭಾವೇನ, ದುಕ್ಖತಾಯ ನಿಯಾಮಿತಾ॥

೭೦೬.

ತಸ್ಮಾ ತೇಭೂಮಕಾ ಧಮ್ಮಾ, ಸಬ್ಬೇ ತಣ್ಹಾವಿವಜ್ಜಿತಾ।

ದುಕ್ಖಸಚ್ಚನ್ತಿ ದೇಸೇಸಿ, ದೇಸನಾಕುಸಲೋ ಮುನಿ॥

೭೦೭.

ವಿರಾಗತೇಜಾಲಾಭೇನ , ತಣ್ಹಾಸ್ನೇಹಸಿನೇಹಿತಂ।

ವಿಸರುಕ್ಖೋವ ಜಾತಾದಿನಾನಾನತ್ಥಫಲೋದಯಂ॥

೭೦೮.

ನನ್ದಿರಾಗಾನುಬನ್ಧೇನ, ಸನ್ತಾನಮವಕಡ್ಢಿತಂ।

ಪುನಬ್ಭವಾಭಿನಿಬ್ಬತ್ತಿಭಾವೇನ ಪರಿವತ್ತತಿ॥

೭೦೯.

ಪತಿಟ್ಠಿತಞ್ಚ ತತ್ಥೇತಮತ್ತಸ್ನೇಹಾನುಸೇವನಂ।

ಗೋಚರಾನುನಯಾಬದ್ಧಂ, ರಾಗಮುಚ್ಛಾಸಮೋಹಿತಂ॥

೭೧೦.

ಕ್ಲೇಸರಾಸಿಪರಿಕ್ಲಿಟ್ಠಂ, ಬ್ಯಸನೋಪದ್ದವಾಹತಂ।

ದುಕ್ಖಸಲ್ಲಸಮಾವಿದ್ಧಂ, ವಿಹಞ್ಞತಿ ನಿರನ್ತರಂ॥

೭೧೧.

ಹವೇ ವಿರಾಗತೇಜೇನ, ವಿಚ್ಛಿನ್ನೇ ಸತಿ ಸಬ್ಬಥಾ।

ಕೇನ ಬನ್ಧೇನ ಸನ್ತಾನ-ಮಾನೇಸ್ಸತಿ ಭವನ್ತರಂ॥

೭೧೨.

ಭವನ್ತರಮಸಮ್ಪತ್ತೇ, ಸನ್ತಾನಮ್ಹಿ ವಿವಟ್ಟಿತೇ।

ಕಿಮಧಿಟ್ಠಾಯ ಜಾತಾದಿದುಕ್ಖಧಮ್ಮಾ ಪವತ್ತರೇ॥

೭೧೩.

ತಸ್ಮಾ ಮೋಕ್ಖವಿಪಕ್ಖೇನ, ತಣ್ಹಾದುಕ್ಖವಿಧಾಯಿನೀ।

ದುಕ್ಖಸಮುದಯೋ ನಾಮ, ಸಚ್ಚಮಿಚ್ಚಾಹ ನಾಯಕೋ॥

೭೧೪.

ಸಬ್ಬದುಕ್ಖವಿನಿಮುತ್ತಂ, ಸಬ್ಬಕ್ಲೇಸವಿನಿಸ್ಸಟಂ।

ದುಕ್ಖನಿರೋಧನಾಮೇನ, ಸಚ್ಚಂ ವುಚ್ಚತಿ ಅಚ್ಚುತಂ॥

೭೧೫.

ದುಕ್ಖಞ್ಚ ಪರಿಜಾನನ್ತೋ, ಪಜಹಂ ದುಕ್ಖಸಮ್ಭವಂ।

ನಿಬ್ಬಾನಂ ಪದಮಾರಬ್ಭ, ಭಾವನಾವೀಥಿಮೋಸಟೋ॥

೭೧೬.

ನಿಯ್ಯಾನಟ್ಠಙ್ಗಿಕೋ ಮಗ್ಗೋ, ಸಬ್ಬದುಕ್ಖವಿಮುತ್ತಿಯಾ।

ದುಕ್ಖನಿರೋಧಗಾಮೀತಿ, ಸಚ್ಚಂ ತಸ್ಮಾ ತಮೀರಿತಂ॥

೭೧೭.

ಚತುಸಚ್ಚವಿನಿಮುತ್ತಾ, ಸೇಸಾ ಲೋಕುತ್ತರಾ ಮತಾ।

ಮಗ್ಗಙ್ಗಸಮ್ಪಯುತ್ತಾ ಚ, ಫಲಧಮ್ಮಾ ಚ ಸಬ್ಬಥಾ॥

೭೧೮.

ಇತ್ಥಂ ಸಹೇತುಕಂ ದುಕ್ಖಂ, ಸೋಪಾಯಾಮತನಿಬ್ಬುತಿಂ।

ಪಟಿಪತ್ತಿಹಿತತ್ಥಾಯ, ವಿಭಾವೇತಿ ವಿನಾಯಕೋ॥

೭೧೯.

ಸಪ್ಪಾಟಿಹಾರಿಯಂ ಧಮ್ಮಂ, ದೇಸೇತ್ವಾನ ಅನುತ್ತರೋ।

ಚತುಧಾರಿಯಸಚ್ಚಾನಿ, ವಿಭಜೀತಿ ವಿಭಾವಯೇ॥

೭೨೦.

ತಬ್ಭಾವಭಾವಿಭಾವೇನ , ಪಚ್ಚಯಾಕಾರಲಕ್ಖಿತಂ।

ತಿಯದ್ಧಂ ದ್ವಾದಸಙ್ಗಞ್ಚ, ವೀಸತಾಕಾರಸಙ್ಗಹಂ॥

೭೨೧.

ತಿಸನ್ಧಿ ಚತುಸಙ್ಖೇಪಂ, ತಿವಟ್ಟಞ್ಚ ತಿಲಕ್ಖಣಂ।

ತೇಭೂಮಕಂ ದ್ವಿಮೂಲಞ್ಚ, ಚತುಕ್ಕನಯಮಣ್ಡಿತಂ॥

೭೨೨.

ಪಚ್ಚೇಕಂ ಚತುಗಮ್ಭೀರ-ಮನುಪುಬ್ಬವವತ್ಥಿತಂ।

ಅವಿಜ್ಜಾಕೂಟಸಙ್ಖಾತಂ, ಬನ್ಧಾವಿಚ್ಛೇದಮಣ್ಡಲಂ॥

೭೨೩.

ಸೋಕಾದೀನತ್ಥನಿಸ್ಸನ್ದಂ, ಕೇವಲಂ ದುಕ್ಖಪಿಣ್ಡಿತಂ।

ಪಟಿಚ್ಚಸಮುಪ್ಪಾದೋತಿ, ಭವಚಕ್ಕಂ ಪವುಚ್ಚತಿ॥

೭೨೪.

ಪಟಿವಿದ್ಧಾಯ ವಿಜ್ಜಾಯ, ಭಙ್ಗಾವಿಜ್ಜಾಯ ಸಬ್ಬಥಾ।

ವಿವಟ್ಟತಾನುಪುಬ್ಬೇನ, ಹೇತುಭಙ್ಗಾ ಯಥಾಕಥಂ॥

೭೨೫.

ಅಸ್ಮಿಂ ಸತಿ ಇದಂ ಹೋತಿ, ಅಸ್ಸುಪ್ಪಾದಾ ಇದಂ ಭವೇ।

ಅಸತಾಸ್ಮಿಂ ನ ತಂ ಹೋತಿ, ತಸ್ಸ ಭಙ್ಗಾವ ಭಿಜ್ಜತಿ॥

೭೨೬.

ಏತಮತ್ಥಂ ಪುರಕ್ಖತ್ವಾ, ಪಚ್ಚಯಟ್ಠಿತಿ ದಸ್ಸಿತಾ।

ಪಟಿಚ್ಚಸಮುಪ್ಪಾದಸ್ಸ, ಇದಪ್ಪಚ್ಚಯತಾ ನಯೇ॥

೭೨೭.

ತಥಾ ಹಿ ಜಾತಿಯಾಪಾಹ, ಪಚ್ಚಯತ್ತಂ ಮಹಾಮುನಿ।

ಜರಾಮರಣಧಮ್ಮಾನಂ, ಮತ್ತಾಭೇದೇಪಿ ವತ್ಥುತೋ॥

೭೨೮.

ಆಹಚ್ಚಪಚ್ಚಯಟ್ಠಮ್ಹಿ, ನೇದಿಸೀ ಪಚ್ಚಯಟ್ಠಿತಿ।

ತತ್ಥ ಧಮ್ಮನ್ತರಸ್ಸೇವ, ಪಚ್ಚಯಟ್ಠೋ ವಿಭಾವಿತೋ॥

೭೨೯.

ವುತ್ತಮಾಚರಿಯೇನೇತಂ, ಪಟ್ಠಾನನಯಸಙ್ಗಹೇ।

ಲಬ್ಭಮಾನನಯಂ ತಾವ, ದಸ್ಸನತ್ಥಂ ಪಪಞ್ಚಿತೋ॥

೭೩೦.

ಏತ್ಥ ತಸ್ಮಾನುಪೇಕ್ಖಿತ್ವಾ, ಆಹಚ್ಚ ನಿಯಮಂ ಬುಧೋ।

ತಬ್ಭಾವಭಾವಿಮತ್ತೇನ, ಪಚ್ಚಯತ್ಥಂ ವಿಭಾವಯೇ॥

೭೩೧.

ತತ್ಥಾವಿಜ್ಜಾ ಚ ಸಙ್ಖಾರಾ, ಅದ್ಧಾತೀತೋತಿ ಭಾಸಿತಾ।

ವಿಞ್ಞಾಣಂ ನಾಮರೂಪಞ್ಚ, ಸಳಾಯತನಸಞ್ಞಿತಂ॥

೭೩೨.

ಫಸ್ಸೋ ಚ ವೇದನಾ ತಣ್ಹಾ, ಉಪಾದಾನಂ ಭವೋತಿ ಚ।

ಪಚ್ಚುಪ್ಪನ್ನೋ ಭವೇ ಅದ್ಧಾ, ಭವೇ ಅದ್ಧಾ ಅನಾಗತೋ॥

೭೩೩.

ಜಾತಿ ಜರಾ ಮರಣನ್ತಿ, ದ್ವೇಧಾ ಹೋತಿ ಚ ಸಬ್ಬಥಾ।

ಕಾಲತ್ತಯವವತ್ಥಾನಂ, ತಿಯದ್ಧಮಿತಿ ದೀಪಯೇ॥

೭೩೪.

ತತ್ಥಾವಿಜ್ಜಾತಿ ಅಞ್ಞಾಣಂ, ಚತುಸಚ್ಚೇಸು ಭಾಸಿತಂ।

ಪುಬ್ಬನ್ತೇ ಚಾಪರನ್ತೇ ಚ, ಪಚ್ಚಯಟ್ಠಿತಿಯಂ ತಥಾ॥

೭೩೫.

ಅಪುಞ್ಞಾತಿಸಙ್ಖಾರೋತಿ, ವುತ್ತಾ ದ್ವಾದಸ ಚೇತನಾ।

ತಥಾ ಪುಞ್ಞಾಭಿಸಙ್ಖಾರೋ, ಕಾಮರೂಪೇಸು ಭಾಸಿತೋ॥

೭೩೬.

ಆನೇಞ್ಜಾತಿಸಙ್ಖಾರೋತಿ, ವುತ್ತಾರುಪ್ಪಾ ಚತುಬ್ಬಿಧಾ।

ಕಾಯಬ್ಬಚೀಮನೋದ್ವಾರಂ, ಪತ್ವಾ ತಾಯೇವ ಚೇತನಾ॥

೭೩೭.

ವುತ್ತಾ ಕಾಯವಚೀಚಿತ್ತಸಙ್ಖಾರಾತಿ ಮಹೇಸಿನಾ।

ಸಙ್ಖಾರಾತಿ ವಿಭತ್ತೇವಮೇಕೂನತಿಂಸ ಚೇತನಾ॥

೭೩೮.

ಏಕೂನವೀಸತಿವಿಧಂ, ಪಟಿಸನ್ಧಿಕ್ಖಣೇ ತಥಾ।

ಪವತ್ತೇ ದ್ವತ್ತಿಂಸವಿಧಂ, ವಿಞ್ಞಾಣಂ ಪಾಕಮಾನಸಂ॥

೭೩೯.

ತಿವಿಧಂ ವೇದನಾ ಸಞ್ಞಾ, ಸಙ್ಖಾರಾತಿ ವಿಭೇದಿತಂ।

ನಾಮರೂಪಂ ತು ದುವಿಧಂ, ಭೂತೋಪಾದಾಯಭೇದತೋ॥

೭೪೦.

ಸಳಾಯತನಸಙ್ಖಾತಂ, ಚಕ್ಖಾದಜ್ಝತ್ತಿಕಂ ಮತಂ।

ಚಕ್ಖುಸಮ್ಫಸ್ಸಾದಿಭೇದಾ, ಫಸ್ಸೋ ಛಧಾ ಪಕಾಸಿತೋ॥

೭೪೧.

ಸುಖಾ ದುಕ್ಖಾ ಉಪೇಕ್ಖಾತಿ, ವೇದನಾ ತಿವಿಧಾ ಭವೇ।

ಕಾಮೇ ಭವೇ ಚ ವಿಭವೇ, ತಣ್ಹಾತಿ ತಿವಿಧಾ ಮತಾ॥

೭೪೨.

ಕಾಮುಪಾದಾನಾದಿಭೇದಾ, ಉಪಾದಾನಾ ಚತುಬ್ಬಿಧಾ।

ಕಮ್ಮೋಪಪತ್ತಿಭೇದೇನ, ಭವೋ ನಾಮ ದ್ವಿಧಾ ಮತೋ॥

೭೪೩.

ಅತ್ತಭಾವಾಭಿನಿಬ್ಬತ್ತಿ, ಜಾತಿ ನಾಮ ಜರಾ ಪನ।

ಪುರಾಣಭಾವೋ ಮರಣಂ, ಪರಿಯೋಸಾನಮೀರಿತಂ॥

೭೪೪.

ದ್ವಾದಸಙ್ಗಪ್ಪಭೇದೇನ, ವಿಭತ್ತೇವಂ ಮಹೇಸಿನಾ।

ಪಟಿಚ್ಚಸಮುಪ್ಪಾದೋತಿ, ಪಚ್ಚಯಾ ಏವ ಕೇವಲಾ॥

೭೪೫.

ಪಟಿಚ್ಚ ಫಲಭಾವೇನ, ಸಾಪೇಕ್ಖಂ ಠಿತಮತ್ತನಿ।

ಅಪಚ್ಚಕ್ಖಾಯ ಸಙ್ಗನ್ತ್ವಾ, ಉಪ್ಪಾದೇನ್ತೀತಿ ಪಚ್ಚಯಾ॥

೭೪೬.

ಅವಿಜ್ಜಾಸಙ್ಖಾರಾನಂ ತು, ಗಹಣೇ ಗಹಿತಾವ ತೇ।

ತಣ್ಹುಪಾದಾನಭವಾಪಿ, ಇತಿ ಪಞ್ಚೇತ್ಥ ಹೇತುಯೋ॥

೭೪೭.

ತಣ್ಹುಪಾದಾನಭವಾನಂ, ಗಹಣೇ ಗಹಿತಾ ಪುನ।

ಅವಿಜ್ಜಾ ಸಙ್ಖಾರಾ ಚಾತಿ, ಪಞ್ಚೇವೇತ್ಥಾಪಿ ಹೇತುಯೋ॥

೭೪೮.

ವಿಞ್ಞಾಣಾದಿಸರೂಪೇನ, ದಸ್ಸಿತಂ ಫಲಪಞ್ಚಕಂ।

ಜಾತಿಜ್ಜರಾಮರಣೇನ, ತದೇವ ಗಹಿತಂ ಪುನ॥

೭೪೯.

ಅತೀತೇ ಹೇತವೋ ಪಞ್ಚ, ಇದಾನಿ ಫಲಪಞ್ಚಕಂ।

ಇದಾನಿ ಹೇತವೋ ಪಞ್ಚ, ಆಯತಿಂ ಫಲಪಞ್ಚಕಂ॥

೭೫೦.

ಇತ್ಥಂ ಭೇದೇನ ಸಙ್ಗಯ್ಹ, ದ್ವಾದಸಙ್ಗಂ ವಿಚಕ್ಖಣಾ।

ಅತ್ಥಾಪತ್ತಿವಿಸೇಸೇನ, ವೀಸತಾಕಾರಮೀರಯುಂ॥

೭೫೧.

ಹೇತುಫಲಂ ಫಲಹೇತು, ಪುನ ಹೇತುಫಲನ್ತಿ ಚ।

ತಿಸನ್ಧಿ ಚತುಸಙ್ಖೇಪಂ, ತಮೇವಾಹು ವಿಭಾವಿನೋ॥

೭೫೨.

ಅವಿಜ್ಜಾತಣ್ಹುಪಾದಾನಾ, ಕ್ಲೇಸವಟ್ಟನ್ತಿ ಭಾಸಿತಾ।

ಭವೇಕದೇಸೋ ಸಙ್ಖಾರಾ, ಕಮ್ಮವಟ್ಟಂ ತತೋಪರಂ॥

೭೫೩.

ವಿಪಾಕವಟ್ಟಮಿಚ್ಚೇವಂ, ವಿವಟ್ಟೇನಾವಿವಟ್ಟಿತಂ।

ತಿವಟ್ಟವಟ್ಟಿತಂ ಹುತ್ವಾ, ವಟ್ಟಮೇತಂ ಪವತ್ತತಿ॥

೭೫೪.

ಅನಿಚ್ಚಞ್ಚ ಖಯಟ್ಠೇನ, ದುಕ್ಖಮೇತಂ ಭಯಟ್ಠತೋ।

ಅನತ್ತಾಸಾರಕಟ್ಠೇನ, ವಟ್ಟಮೇವಂ ತಿಲಕ್ಖಣಂ॥

೭೫೫.

ಸಂಸಾರಸ್ಸೇವ ವುತ್ತಾಯಂ, ಪಚ್ಚಯಾನಂ ಪರಮ್ಪರಾ।

ಪಟಿಚ್ಚಸಮುಪ್ಪಾದೋತಿ, ತತೋ ತೇಭೂಮಕೋ ಮತೋ॥

೭೫೬.

ಬನ್ಧಾವಿಜ್ಜಾಣ್ಡಕೋಸೇನ, ವಿಜ್ಜಾದಿಭೇದವಜ್ಜಿತಾ।

ವಿಮುತ್ತಿರಸಮಪ್ಪತ್ತಾ, ಭವತಣ್ಹಾಪಿಪಾಸಿತಾ॥

೭೫೭.

ಅಭಿಸಙ್ಖಾರಭಾವೇನ, ಪಟಿಬನ್ಧತಿ ಸನ್ತತಿ।

ತಥಾಭಿಸಙ್ಖತಾ ಪಾಕ-ಭಾವಾಯ ಪರಿವತ್ತತಿ॥

೭೫೮.

ವಿಪಾಕಾ ಪುನ ಕಮ್ಮಾನಿ, ಪಾಕಾನಿ ಪುನ ಕಮ್ಮತೋ।

ಇಚ್ಚೇವಂ ಪರಿಯಾಯೇನ, ಸಂಸಾರೋಯಂ ಪವತ್ತತಿ॥

೭೫೯.

ಇಚ್ಚಾವಿಜ್ಜಾಭವತಣ್ಹಾ, ವಟ್ಟೋಪತ್ಥಮ್ಭಕಾ ಮತಾ।

ಸಮ್ಪಯುತ್ತಾನುಸಯಿತಾ, ತಸ್ಮಾ ವಟ್ಟಂ ದ್ವಿಮೂಲಕಂ॥

೭೬೦.

ಪಚ್ಚಯಪಚ್ಚಯುಪ್ಪನ್ನ-ಸನ್ತಾನಭೇದತೋ ಪನ।

ನಾನಾಭೂತಾನಮೇಕನ್ತಂ, ಬೀಜರುಕ್ಖಾದಯೋ ವಿಯ॥

೭೬೧.

ತಥಾಪಿ ತೇಸಂ ಧಮ್ಮಾನಂ, ವತ್ಥುಲಕ್ಖಣಭೇದತೋ।

ದೀಪವಟ್ಟಿಸಿಖಾನಂವ, ನತ್ಥಿ ಏಕನ್ತಮೇಕತಾ॥

೭೬೨.

ಹೇತುಹೇತುಸಮುಪ್ಪನ್ನಾ, ಈಹಾಭೋಗವಿವಜ್ಜಿತಾ।

ಪಚ್ಚಯಾಯ ಚ ಪಚ್ಚೇತು-ಮಬ್ಯಾಪಾರಾ ತತೋ ಮತಾ॥

೭೬೩.

ಅವಿಜ್ಜಾದೀನಮೇವಾಥ, ಸಮ್ಭವೇ ಸಮ್ಭವನ್ತಿ ಚ।

ಸಙ್ಖಾರಾದಿಸಭಾವಾತಿ, ಠಿತೇವಂಧಮ್ಮತಾಯ ತೇ॥

೭೬೪.

ಇತ್ಥಮೇಕತ್ತನಾನತ್ತಾ, ಅಬ್ಯಾಪಾರೋ ತಥಾಪರೋ।

ಏತ್ಥೇವಂಧಮ್ಮತಾ ಚೇತಿ, ನಯಾ ವುತ್ತಾ ಚತುಬ್ಬಿಧಾ॥

೭೬೫.

ಫಲಾನಂ ಪಚ್ಚಯುಪ್ಪತ್ತಿ, ಪಚ್ಚಯತ್ಥೋ ಚ ಹೇತುಸು।

ಸಭಾವಪಟಿವೇಧೋ ಚ, ದೇಸನಾ ಚಿತ್ತತಾತಿ ಚ॥

೭೬೬.

ಅತ್ಥಧಮ್ಮಪಟಿವೇಧ-ದೇಸನಾನಂ ಯಥಾಕ್ಕಮಂ।

ಅತಿಗಮ್ಭೀರಭಾವೇನ, ಚತುಗಮ್ಭೀರಮೀರಿತಂ॥

೭೬೭.

ಪಧಾನಕಾರಣತ್ತಾ ಹಿ, ಅವಿಜ್ಜಾದಿಪರಮ್ಪರಾ।

ಕಮೇನ ಸಙ್ಖಾರಾದೀನಂ, ಪಚ್ಚಯಾತಿ ವವತ್ಥಿತಾ॥

೭೬೮.

ತಥಾ ಹಿ ಜಾತಿಯಾ ಏವ, ಜರಾಮರಣಸಮ್ಭವೋ।

ಅಜಾತಾನಂ ಜರಾ ವಾಥ, ಮರಣಂ ವಾ ಕುತೋ ಭವೇ॥

೭೬೯.

ಸಾವೋಪಪತ್ತಿಸಙ್ಖಾತಾ, ಜಾತಿ ಕಮ್ಮಭವೋದಿತಾ।

ಅಙ್ಕುರೋ ವಿಯ ಬೀಜಮ್ಹಾ, ತತ್ಥ ತತ್ಥೋಪಲಬ್ಭತಿ॥

೭೭೦.

ಸಮ್ಪಯೋಗಾನುಸಯತೋ, ಉಪಾದಾನಪ್ಪತಿಟ್ಠಿತಾ।

ಆಯೂಹನ್ತಿ ಚ ಕಮ್ಮಾನಿ, ಆಕಡ್ಢನ್ತೋಪಪತ್ತಿಕಂ॥

೭೭೧.

ಉಪಾದಾನಿಯಧಮ್ಮೇಸು , ತಣ್ಹಾಸ್ನೇಹಪಿಪಾಸಿತಾ।

ದಳ್ಹೀ ಕುಬ್ಬನ್ತುಪಾದಾನಂ, ಪಿಯರೂಪಾಭಿನನ್ದಿನೋ॥

೭೭೨.

ವೇದನೀಯೇಸು ಧಮ್ಮೇಸು, ಅಸ್ಸಾದಮನುಪಸ್ಸತೋ।

ವೇದನಾಪಚ್ಚಯಾ ತಣ್ಹಾ, ಸಮುಟ್ಠಾಯ ಪವಡ್ಢತಿ॥

೭೭೩.

ಇಟ್ಠಾನಿಟ್ಠಞ್ಚ ಮಜ್ಝತ್ತಂ, ಫುಸನ್ತಾ ಪನ ಗೋಚರಂ।

ವೇದೇನ್ತಿ ವೇದನಂ ನಾಮ, ನಾಫುಸನ್ತಾ ಕುದಾಚನಂ॥

೭೭೪.

ಫುಸತಾಲಮ್ಬಣಞ್ಚೇಸೋ, ಸಳಾಯತನಸಮ್ಭವೇ।

ದ್ವಾರಾಭಾವೇ ಕುತೋ ತಸ್ಸ, ಸಮುಪ್ಪತ್ತಿ ಭವಿಸ್ಸತಿ॥

೭೭೫.

ಸಳಾಯತನಮೇತಞ್ಚ, ನಾಮರೂಪೂಪನಿಸ್ಸಿತಂ।

ಛಫಸ್ಸದ್ವಾರಭಾವೇನ, ಪವತ್ತತಿ ಯಥಾರಹಂ॥

೭೭೬.

ಪುಬ್ಬಙ್ಗಮಾಧಿಟ್ಠಾನೇನ, ವಿಞ್ಞಾಣೇನ ಪತಿಟ್ಠಹೇ।

ನಾಮರೂಪಂ ಉಪತ್ಥದ್ಧಂ, ಪಟಿಸನ್ಧಿಪವತ್ತಿಯಂ॥

೭೭೭.

ಸಙ್ಖಾರಜನಿತಂ ಹುತ್ವಾ, ಪತಿಟ್ಠಾತಿ ಭವನ್ತರೇ।

ವಿಞ್ಞಾಣಂ ಜನಕಾಭಾವೇ, ತಸ್ಸುಪ್ಪತ್ತಿ ಕಥಂ ಭವೇ॥

೭೭೮.

ಅವಿಜ್ಜಾಯಾನುಸಯಿತೇ, ಪಟಿವೇಧವಿರೋಧಿತೇ।

ವಟ್ಟಾನುಗತಸನ್ತಾನೇ, ಪಟಿಸನ್ಧಿಫಲಾವಹೇ॥

೭೭೯.

ಪಾಕಧಮ್ಮಾ ಸಭಾವೇನ, ಪವತ್ತನ್ತಿ ಹಿ ಚೇತನಾ।

ಅವಿಜ್ಜಾಪಚ್ಚಯಾ ಹೋನ್ತಿ, ಸಙ್ಖಾರಾತಿ ತತೋ ಮತಾ॥

೭೮೦.

ಪಟಿವಿದ್ಧೇಸು ಸಚ್ಚೇಸು, ಪಚ್ಚಯಾನಂ ಪರಮ್ಪರಾ।

ವಿಘಾತೀಯತಿ ಸಬ್ಬಾಪಿ, ತತೋ ವಟ್ಟಂ ವಿವಟ್ಟತಿ॥

೭೮೧.

ಇಚ್ಚಾವಿಜ್ಜಾವಿರೋಧೇನ, ತಸ್ಸಾ ವಟ್ಟಪ್ಪವತ್ತಿಯಾ।

ಸಙ್ಘಾತನಿಕಭಾವೇನ, ಅವಿಜ್ಜಾ ಕೂಟಸಮ್ಮತಾ॥

೭೮೨.

ಜರಾಮರಣಸಙ್ಘಾಟ-ಪಟಿಪೀಳಿತಚೇತಸಂ।

ಕ್ಲೇಸಮುಚ್ಛಾಪರೇತಾನಂ, ಸಾ ಚಾವಿಜ್ಜಾ ಪವಡ್ಢತಿ॥

೭೮೩.

ಇಚ್ಚಾಬದ್ಧಮವಿಚ್ಛೇದಂ, ಇದಪ್ಪಚ್ಚಯಮಣ್ಡಲಂ।

ಚಕ್ಕನೇಮಿಸಮಾವಟ್ಟಂ, ಕಮೇನ ಪರಿವತ್ತತಿ॥

೭೮೪.

ವಟ್ಟಸ್ಸ ದ್ವಾದಸಙ್ಗಸ್ಸ, ತಸ್ಸ ತೇಭೂಮಕಸ್ಸ ತು।

ದುಕ್ಖಕ್ಖನ್ಧಸ್ಸ ದಸ್ಸೇಸಿ, ನಿಸ್ಸನ್ದೇನ ನಿದಸ್ಸನಂ॥

೭೮೫.

ಸೋಕಞ್ಚ ಪರಿದೇವಞ್ಚ, ತಥಾ ದುಕ್ಖಞ್ಚ ಕಾಯಿಕಂ।

ದೋಮನಸ್ಸಮುಪಾಯಾಸಂ, ನಾನಾಬ್ಯಸನಸಮ್ಭವಂ॥

೭೮೬.

ಇಚ್ಚಾತುರಮನಿಚ್ಚನ್ತಂ, ಮಹೋಪದ್ದವಸಙ್ಕುಲಂ।

ಬಹುಪಕ್ಲೇಸುಪಸ್ಸಟ್ಠಂ, ದುಕ್ಖಮೇತನ್ತಿ ಪಿಣ್ಡಿತಂ॥

೭೮೭.

ಇಚ್ಚೇವಂ ಪಞ್ಚುಪಾದಾನ-ಕ್ಖನ್ಧಭೇದಿತಸಙ್ಗಹೋ।

ಅತ್ತಭಾವಭವರಥೋ, ಹತ್ಥಮುತ್ತಂವ ಯನ್ತಕಂ॥

೭೮೮.

ಗತಿಟ್ಠಿತಿನಿವಾಸೇಸು, ಸಂಸರನ್ತೋ ನಿರನ್ತರಂ।

ಚಕ್ಕೇನೇತೇನ ಯಾತೀತಿ, ಭವಚಕ್ಕಮಿದಂ ಮತಂ॥

೭೮೯.

ಅವಿಜ್ಜಾಣ್ಡಂ ಪದಾಲೇತ್ವಾ, ಪಟಿವೇಧಪ್ಪವತ್ತಿಯಾ।

ಪಚ್ಚಯಪ್ಪಚ್ಚಯುಪ್ಪನ್ನಾ, ಸುಪಟ್ಠನ್ತಿ ಸಭಾವತೋ॥

೭೯೦.

ಅನಿಚ್ಚಾ ದುಕ್ಖನತ್ತಾ ಚ, ಭಙ್ಗವನ್ತೋ ಭಯಾವಹಾ।

ಸಾದೀನವಾತಿ ಸಙ್ಖಾಯ, ವಿವಟ್ಟಮಭಿತಿಟ್ಠತಿ॥

೭೯೧.

ತತೋ ಸಾನುಸಯಾ ತಣ್ಹಾ, ನಿರುಜ್ಝತಿ ಪುನಬ್ಭವೇ।

ಸನ್ತಾನರತಿಯಾಭಾವಾ, ನ ಪಕ್ಖನ್ದತಿ ಸನ್ಧಿಯಂ॥

೭೯೨.

ಅವಿರುಳ್ಹಿಕಭಾವೇನ, ತತ್ಥ ವಟ್ಟವಿರೋಧಿತೇ।

ಅಭಿಸಙ್ಖಾರಭಾವೇನ, ನ ಪವತ್ತನ್ತಿ ಚೇತನಾ॥

೭೯೩.

ಪಟಿಸನ್ಧಿಪವತ್ತೀಪಿ, ನ ಜನೇನ್ತಿ ಭವನ್ತರೇ।

ಇಚ್ಚಾವಿಜ್ಜಾನಿರೋಧೇನ, ನಿರುದ್ಧಾ ಕಮ್ಮಚೇತನಾ॥

೭೯೪.

ಪಚ್ಚಯತ್ಥನಿರೋಧೇನ, ಸಙ್ಖಾರಾನಂ ನಿರೋಧತೋ।

ವಿಞ್ಞಾಣಂ ಜನಕಾಭಾವಾ, ನಿರುದ್ಧಮಿತಿ ವುಚ್ಚತಿ॥

೭೯೫.

ವಿಞ್ಞಾಣಾದಿನಿರೋಧಾ ಚ, ನಾಮರೂಪಾದಿಕಂ ತಥಾ।

ದುಕ್ಖಕ್ಖನ್ಧಸ್ಸಿಮಸ್ಸೇವಂ, ನಿರೋಧೋತಿ ಪವುಚ್ಚತಿ॥

೭೯೬.

ಇತಿ ವಟ್ಟವಿವಟ್ಟಾನಂ, ವಸಾ ದ್ವೇಧಾ ವಿಭಾವಿತೋ।

ಪಟಿಚ್ಚಸಮುಪ್ಪಾದೋತಿ, ದೇಸಿತೋಯಂ ಮಹೇಸಿನಾ॥

೭೯೭.

ಸಬ್ಬಸಙ್ಖತಧಮ್ಮಾನಂ , ಸಬ್ಬೇ ಧಮ್ಮಾಪಿ ಪಚ್ಚಯಾ।

ಜನಕಾ ಚೇವುಪತ್ಥಮ್ಭಾ, ಸಂವಿಭತ್ತಾ ಯಥಾರಹಂ॥

೭೯೮.

ಆಹಚ್ಚ ಪಚ್ಚಯಟ್ಠೇನ, ಚತುವೀಸತಿಧಾ ಠಿತಾ।

ಹೇತಾಲಮ್ಬಣಾಧಿಪತಾನನ್ತರಸಮನನ್ತರಾ॥

೭೯೯.

ಸಹಜಾತಅಞ್ಞಮಞ್ಞ-ನಿಸ್ಸಯಾ ಚೋಪನಿಸ್ಸಯೋ।

ಪುರೇಜಾತಾ ಪಚ್ಛಾಜಾತಾ-ಸೇವನಾ ಕಮ್ಮಮೇವ ಚ॥

೮೦೦.

ಪಾಕಾಹಾರಿನ್ದ್ರಿಯಜ್ಝಾನ-ಮಗ್ಗಙ್ಗಸಮ್ಪಯುತ್ತಕಾ।

ವಿಪ್ಪಯುತ್ತತ್ಥಿ ನತ್ಥಿ ಚ, ವಿಗತಾವಿಗತನ್ತಿ ಚ॥

೮೦೧.

ಪಞ್ಚಾತೀತಾವ ಕಮ್ಮಂ ತು, ವತ್ತಮಾನಞ್ಚ ಈರಿತಂ।

ಸಬ್ಬಥಾಪಿ ತಯೋ ವುತ್ತಾ, ವತ್ತಮಾನಾ ತತೋಪರೇ॥

೮೦೨.

ಛಧಾ ನಾಮಂ ತು ನಾಮಸ್ಸ, ಪಞ್ಚಧಾ ನಾಮರೂಪಿನಂ।

ಏಕಧಾ ಪುನ ರೂಪಸ್ಸ, ರೂಪಂ ನಾಮಸ್ಸ ಚೇಕಧಾ॥

೮೦೩.

ಪಞ್ಞತ್ತಿನಾಮರೂಪಾನಿ, ನಾಮಸ್ಸ ದುವಿಧಾ ದ್ವಯಂ।

ದ್ವಯಸ್ಸ ನವಧಾ ಚೇತಿ, ಛಬ್ಬಿಧಾ ಪಚ್ಚಯಾ ಕಥಂ॥

೮೦೪.

ನಿರುದ್ಧಾನನ್ತರಾ ಏವ, ಜಾಯನ್ತಾನಮನನ್ತರಂ।

ನಾಮಧಮ್ಮಾವ ನಾಮಾನಂ, ಜನಕತ್ತೋಪಕಾರಕಾ॥

೮೦೫.

ನಿರನ್ತರಪ್ಪವತ್ತಿಯಾ, ಅನುರೂಪಮನನ್ತರಾ।

ಅನನ್ತರಪಚ್ಚಯೇನ, ಪಚ್ಚಯೋತಿ ಪಕಾಸಿತಾ॥

೮೦೬.

ಸಮನನ್ತರಭಾವೇನ, ತೇಸಂ ತೇ ಏವ ಪಚ್ಚಯಾ।

ಸಮನನ್ತರನಾಮೇನ, ಪಚ್ಚಯೋತಿ ಪಕಾಸಿತಾ॥

೮೦೭.

ಅತ್ಥಿಭಾವಾಯ ಧಮ್ಮಾನಂ, ನತ್ಥಿತಾಯೋಪಕಾರಕಾ।

ನತ್ಥಿಪಚ್ಚಯನಾಮೇನ, ವುತ್ತಾ ತೇ ಏವ ತಾದಿನಾ॥

೮೦೮.

ಓಕಾಸದಾನಭಾವೇನ, ವಿಗತಾವೋಪಕಾರಕಾ।

ಧಮ್ಮಾ ತೇ ಏವ ವುಚ್ಚನ್ತಿ, ವಿಗತಪ್ಪಚ್ಚಯೋತಿ ಚ॥

೮೦೯.

ಜವಾ ಪಗುಣಭಾವಾಯ, ಜವಾನಮುಪಕಾರಕಾ।

ಆಸೇವನಪಚ್ಚಯೋತಿ, ನಿರುದ್ಧಾನನ್ತರಾ ಮತಾ॥

೮೧೦.

ಸಂಸಟ್ಠಸಹಜಾತಾನಂ, ಸಮ್ಪಯೋಗೇನ ಪಚ್ಚಯಾ।

ಸಮ್ಪಯುತ್ತಪಚ್ಚಯೋತಿ, ನಾಮಾ ನಾಮಾನಮೀರಿತಾ॥

೮೧೧.

ಇಚ್ಚೇಕೋ ವತ್ತಮಾನೋ ಚ, ಪಞ್ಚಾತೀತಾ ಯಥಾರಹಂ।

ಅರೂಪಾನಮರೂಪಾ ಚ, ಪಚ್ಚಯಾ ಛಬ್ಬಿಧಾ ಮತಾ॥

೮೧೨.

ಪವತ್ತೇ ಚಿತ್ತಜಾತಾನಂ, ಕಮ್ಮಜಾನಞ್ಚ ಸನ್ಧಿಯಂ।

ರೂಪಾನಂ ಸಹಜಾತಾನ-ಮರೂಪಾನಞ್ಚ ತಾದಿನಾ॥

೮೧೩.

ಹೇತುಭೂತಾ ಛ ಧಮ್ಮಾಪಿ, ಮೂಲಟ್ಠೇನೋಪಕಾರಕಾ।

ಹೇತುಪಚ್ಚಯಭಾವೇನ, ಪಚ್ಚಯೋತಿ ಪಕಾಸಿತಾ॥

೮೧೪.

ತಥಾ ನಿಜ್ಝಾಯನಟ್ಠೇನ, ತೇಸಮೇವೋಪಕಾರಕಾ।

ಝಾನಪಚ್ಚಯನಾಮೇನ, ಝಾನಧಮ್ಮಾ ವಿಭಾವಿತಾ॥

೮೧೫.

ತಥೇವ ನಿಯ್ಯಾನಟ್ಠೇನ, ಪಚ್ಚಯಾತಿ ಪಕಾಸಿತಾ।

ಮಗ್ಗಪಚ್ಚಯನಾಮೇನ, ಮಗ್ಗಙ್ಗಾ ಚ ಮಹೇಸಿನಾ॥

೮೧೬.

ತೇಸಮೇವ ಚ ಧಮ್ಮಾನಂ, ಸಹಜಾತಾತಿ ಚೇತನಾ।

ಕಮ್ಮಬ್ಯಾಪಾರಾಭಾವೇನ, ವತ್ತಮಾನಾ ಚ ಪಚ್ಚಯಾ॥

೮೧೭.

ಕಟತ್ತಾರೂಪಪಾಕಾನಂ, ನಾನಕ್ಖಣಿಕಚೇತನಾ।

ಅಭಿಸಙ್ಖಾರಭಾವೇನ, ಜನಕಪ್ಪಚ್ಚಯಾ ಮತಾ॥

೮೧೮.

ಇಚ್ಚೇವಂ ದುವಿಧಾ ಭೇದಾ, ವಿಪ್ಫಾರಟ್ಠೇನ ಚೇತನಾ।

ಕಮ್ಮಪಚ್ಚಯನಾಮೇನ, ಪಚ್ಚಯೋತಿ ಪಕಾಸಿತಾ॥

೮೧೯.

ರೂಪಾನಂ ಸಹಜಾತಾನಂ, ಅಞ್ಞಮಞ್ಞಮರೂಪಿನಂ।

ಪಚ್ಚಯಾ ಸನ್ತಭಾವೇನ, ವಿಪಾಕಾ ಸಮುದೀರಿತಾ॥

೮೨೦.

ಏಕೋತೀತೋಪಿ ಚತ್ತಾರೋ, ವತ್ತಮಾನಾತಿ ಪಞ್ಚಧಾ।

ಪಚ್ಚಯಾ ನಾಮಧಮ್ಮಾವ, ನಾಮರೂಪಾನಮೀರಿತಾ॥

೮೨೧.

ಇಮಸ್ಸ ರೂಪಕಾಯಸ್ಸ, ಪಚ್ಛಾಜಾತೋಪಕಾರಕೋ।

ಪಚ್ಛಾಜಾತಪಚ್ಚಯೋತಿ, ನಾಮಂ ರೂಪಾನಮೇಕಧಾ॥

೮೨೨.

ಸತ್ತವಿಞ್ಞಾಣಧಾತೂನಂ , ಛ ವತ್ಥೂನಿ ಪವತ್ತಿಯಂ।

ಪಞ್ಚವಿಞ್ಞಾಣವೀಥಿಯಾ, ಪಞ್ಚಾಲಮ್ಬಾ ಯಥಾಕ್ಕಮಂ॥

೮೨೩.

ಪುರೇಜಾತವಿಸೇಸೇನ, ನಾಮಾನಮುಪಕಾರಕಾ।

ಪುರೇಜಾತಪಚ್ಚಯೋತಿ, ರೂಪಂ ನಾಮಸ್ಸ ಚೇಕಧಾ॥

೮೨೪.

ಚಿತ್ತಚೇತಸಿಕಾ ಧಮ್ಮಾ, ಯಂ ಯಮಾರಬ್ಭ ಜಾಯರೇ।

ಆಲಮ್ಬಣಪಚ್ಚಯೋತಿ, ಸಬ್ಬಮೇತಂ ಪವುಚ್ಚತಿ॥

೮೨೫.

ಯಮಾಲಮ್ಬಂ ಗರುಂ ಕತ್ವಾ, ನಾಮಧಮ್ಮಾ ಪವತ್ತರೇ।

ಸ್ವಾಯಮೇವಾಲಮ್ಬಣೂಪ-ನಿಸ್ಸಯೋತಿ ಪಕಾಸಿತೋ॥

೮೨೬.

ಅನನ್ತರಪಚ್ಚಯೇನ, ಯೇ ಧಮ್ಮಾ ಪಚ್ಚಯಾ ಮತಾ।

ತೇ ಏವ ವಾನನ್ತರೂಪ-ನಿಸ್ಸಯೋತಿ ಪಕಾಸಿತೋ॥

೮೨೭.

ರಾಗಸದ್ಧಾದಯೋ ಧಮ್ಮಾ, ಅಜ್ಝತ್ತಮನುವಾಸಿತಾ।

ಸತ್ತಸಙ್ಖಾರಧಮ್ಮಾ ಚ, ಬಹಿದ್ಧೋಪನಿಸೇವಿತಾ॥

೮೨೮.

ರಾಗಸದ್ಧಾದಿಧಮ್ಮಾನಂ, ಕಮ್ಮಂ ಪಾಕಾನಮಿಚ್ಚಯಂ।

ಪಕತೂಪನಿಸ್ಸಯೋತಿ, ಪಟ್ಠಪೇಸಿ ತಥಾಗತೋ॥

೮೨೯.

ಇಚ್ಚೇವಂ ಬಲವಟ್ಠೇನ, ನಿಸ್ಸಯೇನೋಪಕಾರಕಾ।

ಉಪನಿಸ್ಸಯನಾಮೇನ, ಪಚ್ಚಯೋಯಂ ತಿಧಾ ಮತೋ॥

೮೩೦.

ರೂಪಾರೂಪಂ ಪನಿಚ್ಚೇವಂ, ತೇಕಾಲಿಕಮಕಾಲಿಕಾ।

ಪಞ್ಞತ್ತಿ ಚೇವ ನಾಮಾನಂ, ಪಚ್ಚಯೋ ದುವಿಧೋ ಮತೋ॥

೮೩೧.

ಆಲಮ್ಬಾಧಿಪ್ಪತಿಭೂತಂ, ನಾಮಾನಂ ಗರುಗೋಚರಂ।

ಸಹಜಾಧಿಪ್ಪತೀಧಮ್ಮಾ, ಸಹಜಾನಂ ಯಥಾರಹಂ॥

೮೩೨.

ನಾಮರೂಪಾನಮಿಚ್ಚೇವ-ಮಾಧಿಪ್ಪಚ್ಚೇನ ಪಚ್ಚಯೋ।

ಅಧಿಪ್ಪತಿಪಚ್ಚಯೋತಿ, ದುವಿಧಾ ಪರಿದೀಪಿತೋ॥

೮೩೩.

ಸಹಜಾ ನಾಮರೂಪಾನಂ, ಮಹಾಭೂತಾ ಚ ರೂಪಿನಂ।

ಪಟಿಸನ್ಧಿಕ್ಖಣೇ ವತ್ಥು, ನಾಮಾನಮಿತಿ ಸಬ್ಬಥಾ॥

೮೩೪.

ಸಹಜಾತವಿಸೇಸೇನ, ಧಮ್ಮಾನಮುಪಕಾರಕಾ।

ಸಹಜಾತಪಚ್ಚಯೋತಿ, ತಿವಿಧೇವಂ ವಿಭಾವಿತಾ॥

೮೩೫.

ಅರೂಪಿನೋ ಚತುಕ್ಖನ್ಧಾ, ಮಹಾಭೂತಾ ಚತುಬ್ಬಿಧಾ।

ಸನ್ಧಿಯಂ ವತ್ಥುನಾಮಾನಿ, ಸಹಜಾನೀತಿ ಸಬ್ಬಥಾ॥

೮೩೬.

ಉಪಕಾರಪವತ್ತಾ ಚ, ಅಞ್ಞಮಞ್ಞಸ್ಸ ತಾದಿನಾ।

ಅಞ್ಞಮಞ್ಞಪಚ್ಚಯೋತಿ, ವಿಭತ್ತಾ ತಿವಿಧಾ ಮತಾ॥

೮೩೭.

ಸತ್ತವಿಞ್ಞಾಣಧಾತೂನಂ, ಭೂತೋಪಾದಾಯರೂಪಿನಂ।

ಸಹಜಾತನಾಮರೂಪ-ಧಮ್ಮಾನಞ್ಚ ಯಥಾಕ್ಕಮಂ॥

೮೩೮.

ವತ್ಥು ಭೂತಾ ಚತುಕ್ಖನ್ಧಾ, ನಿಸ್ಸಯೇನೋಪಕಾರಕಾ।

ನಿಸ್ಸಯಪ್ಪಚ್ಚಯೋ ನಾಮ, ಪಚ್ಚಯೋತಿ ಮತೋ ತಿಧಾ॥

೮೩೯.

ಕಬಳೀಕಾರೋ ಆಹಾರೋ, ರೂಪಕಾಯಸ್ಸ ಪಚ್ಚಯೋ।

ಅರೂಪಿನೋ ಪನಾಹಾರಾ, ಸಹಜಾನಂ ಯಥಾರಹಂ॥

೮೪೦.

ನಾಮರೂಪಾನಮಿಚ್ಚೇವಂ, ಯಾಪನಟ್ಠೇನ ಪಚ್ಚಯಾ।

ಆಹಾರಪಚ್ಚಯೋತೇವ, ದುವಿಧೇವಂ ಪಕಾಸಿತೋ॥

೮೪೧.

ಪಸಾದಜೀವಿತಾರೂಪಿ-ನ್ದ್ರಿಯಧಮ್ಮಾ ಯಥಾಕ್ಕಮಂ।

ಪಞ್ಚವಿಞ್ಞಾಣುಪಾದಿನ್ನ-ರೂಪಾನಂ ನಾಮರೂಪಿನಂ॥

೮೪೨.

ಸಹಜಾತಾನಮಿಚ್ಚೇವ-ಮಿಸ್ಸರಟ್ಠೇನ ಪಚ್ಚಯಾ।

ಇನ್ದ್ರಿಯಪ್ಪಚ್ಚಯೋತೇವ, ತಿವಿಧಾ ಸಮುದಾಹಟೋ॥

೮೪೩.

ಸತ್ತವಿಞ್ಞಾಣಧಾತೂನಂ, ಛ ವತ್ಥೂನಿ ಯಥಾರಹಂ।

ಪಚ್ಛಾಜಾತಾ ಚ ಕಾಯಸ್ಸ, ಚಿತ್ತಚೇತಸಿಕಾ ತಥಾ॥

೮೪೪.

ಅರೂಪಾ ಸಹಜಾತಾನಂ, ರೂಪಾನನ್ತಿ ಮತಾ ತಿಧಾ।

ವಿಪ್ಪಯುತ್ತಪಚ್ಚಯೋತಿ, ವಿಪ್ಪಯೋಗೋಪಕಾರಕಾ॥

೮೪೫.

ಸಹಜಾತಂ ಪುರೇಜಾತಂ, ಪಚ್ಛಾಜಾತಞ್ಚ ಸಬ್ಬಥಾ।

ಕಬಳೀಕಾರೋ ಆಹಾರೋ, ರೂಪಜೀವಿತಮಿಚ್ಚಯಂ॥

೮೪೬.

ಅತ್ಥಿಪಚ್ಚಯಸಙ್ಖಾತೋ, ಪಚ್ಚಯೋ ಪಞ್ಚಧಾ ಮತೋ।

ವಿಜ್ಜಮಾನಸಭಾವೇನ, ಪಚ್ಚಯಟ್ಠಾ ಯಥಾರಹಂ॥

೮೪೭.

ತೇ ಏವಾವಿಗತಾ ಹುತ್ವಾ, ವತ್ತಮಾನೋಪಕಾರಕಾ।

ಅವಿಗತಪಚ್ಚಯೋತಿ, ಸುಗತೇನ ವವತ್ಥಿತಾ॥

೮೪೮.

ಅಟ್ಠೇವಂ ವತ್ತಮಾನಾನಿ, ನಾಮರೂಪಾನಿ ಪಚ್ಚಯಾ।

ಸಬ್ಬತ್ಥಾಧಿಪ್ಪತೀ ಚಾತಿ, ನವಧಾ ನಾಮರೂಪಿನಂ॥

೮೪೯.

ಇತ್ಥಮುದ್ದಿಟ್ಠನಿದ್ದಿಟ್ಠಾ, ಪಟ್ಠಾನನಯಸಙ್ಗಹಾ।

ಕುಸಲಾಕುಸಲಾದೀಹಿ, ಸುವಿಭತ್ತಾ ಮಹೇಸಿನಾ॥

೮೫೦.

ಪಞ್ಞತ್ತಿನಾಮರೂಪಾನಂ, ವಸೇನ ತಿವಿಧಾ ಠಿತಾ।

ಪಚ್ಚಯಾತಿ ಪಕಾಸೇನ್ತಿ, ಚತುವೀಸತಿ ಪಣ್ಡಿತಾ॥

೮೫೧.

ಪಞ್ಞತ್ತಿ ಪಞ್ಞಪೀಯತ್ತಾ, ಪಞ್ಞಾಪೇತೀತಿ ಚ ದ್ವಿಧಾ।

ನಾಮರೂಪವಿನಿಮುತ್ತಾ, ಪಞ್ಞತ್ತಾ ತಾದಿನಾ ಕಥಂ॥

೮೫೨.

ಭೂತಪರಿಣಾಮಾಕಾರಮುಪಾದಾಯ ತಥಾ ತಥಾ।

ಭೂಮಿಪಬ್ಬತಪಾಸಾಣತಿಣರುಕ್ಖಲತಾದಯೋ॥

೮೫೩.

ಸಮ್ಭಾರಾಕಾರಮಾರಬ್ಭ, ಸನ್ನಿವೇಸವಿಸೇಸಿತಾ।

ಯಾನಗಾಮವನುಯ್ಯಾನಕಟಸಾರಪಟಾದಯೋ॥

೮೫೪.

ಕಾರಕವೇದಕಾಕಾರಂ, ವಿಞ್ಞತ್ತಿನ್ದ್ರಿಯಲಕ್ಖಿತಂ।

ಖನ್ಧಪಞ್ಚಕಮಾಹಚ್ಚ, ಮಚ್ಚಾಸುರಸುರಾದಯೋ॥

೮೫೫.

ಚನ್ದಾದಾವಟ್ಟನಾದೀಹಿ, ದಿಸಾಕಾಲಾದಿಸಮ್ಮುತಿ।

ಪಾರಮ್ಪರಿಯಕಾದೀಹಿ, ಜಾತಿಗೋತ್ತಕುಲಾದಯೋ॥

೮೫೬.

ತಂತಂಕ್ರಿಯಾದಿಭೇದೇಹಿ, ಪಞ್ಞತ್ತಾ ಕಥಿನಾದಯೋ।

ತಂತಂಕಲಾಪಾಸಮ್ಫುಟ್ಠಾ, ಕೂಪಾಕಾಸಗುಹಾದಯೋ॥

೮೫೭.

ತಂ ತಂ ನಿಮಿತ್ತಮಾರಬ್ಭ, ಚಿನ್ತಯನ್ತಸ್ಸುಪಟ್ಠಿತಾ।

ಕಸಿಣಾದಿಕವೋಹಾರಾ, ಭಾವನಾಮಯಗೋಚರಾ॥

೮೫೮.

ಪುಬ್ಬೋಪಲಬ್ಭಾಭಾವೇನ, ಕಸಿಣುಗ್ಘಾಟಿಮಾದಯೋ।

ನಿರೋಧಾ ಚ ಸಮಾಪತ್ತಿ, ವಿಸೇಸಾಭಾವಲಕ್ಖಿತಾ॥

೮೫೯.

ಇತಿ ತಂ ತಮುಪಾದಾಯ, ಸಮಞ್ಞಾತಾ ತಥಾ ತಥಾ।

ಸಙ್ಖಾ ಸಮಞ್ಞಾ ಪಞ್ಞತ್ತಿ, ವೋಹಾರೋತಿ ಪಕಾಸಿತಾ॥

೮೬೦.

ಆಲಮ್ಬಣಟ್ಠಾಕಾರೇನ, ಸನ್ತಾಭಾವೇಪಿ ವತ್ಥುತೋ।

ಚಿನ್ತಾವೋಹಾರನಿಪ್ಫನ್ನಾ, ಅತ್ಥಚ್ಛಾಯಾವ ಭಾಸಿನೀ॥

೮೬೧.

ಪಞ್ಞಾಪೀಯತ್ತಾ ಪಞ್ಞತ್ತಿ, ನಾಮಾಯಮಿತಿ ಭಾಸಿತಾ।

ಉಪಾದಾಯ ಚ ಪಞ್ಞತ್ತಿ, ಸಾ ಏವೋಪನಿಧಾಯ ಚ॥

೮೬೨.

ಪಞ್ಞತ್ತಿ ಪಞ್ಞಾಪನತೋ, ಪಣ್ಡಿತೇಹಿ ಪಕಾಸಿತಾ।

ಅವಿಜ್ಜಮಾನಾ ಪಞ್ಞತ್ತಿ, ವಿಜ್ಜಮಾನಾತಿಪಿ ದ್ವಿಧಾ॥

೮೬೩.

ಲೋಕವೋಹಾರಿಕಟ್ಠೇನ, ಪಞ್ಞತ್ತಂ ಪರಮತ್ಥತೋ।

ಅವಿಜ್ಜಮಾನಮೇತಾಯ, ಪಞ್ಞಾಪೇನ್ತಿ ಯದಾ ತದಾ॥

೮೬೪.

ಅವಿಜ್ಜಮಾನಪಞ್ಞತ್ತಿ, ವಿಜ್ಜಮಾನಂ ಯದಾ ಪುನ।

ಪಞ್ಞಾಪೇನ್ತಿ ತದಾ ಏಸಾ, ವಿಜ್ಜಮಾನನ್ತಿ ವುಚ್ಚತಿ॥

೮೬೫.

ಇತ್ಥಂ ಪಞ್ಞತ್ತಿಧಮ್ಮಞ್ಚ, ಸಮ್ಮತತ್ಥವಿಸೇಸತೋ।

ಭಾವಧಮ್ಮಞ್ಚ ರೂಪಾದಿ-ಸಲಕ್ಖಣವಿಸೇಸತೋ॥

೮೬೬.

ಪಞ್ಞಾಪೇತೀತಿ ಪಞ್ಞತ್ತಿ, ನಾಮಾಯಮಿತಿ ಭಾಸಿತಾ।

ಯಾ ನಾಮಂ ನಾಮಕಮ್ಮಾದಿನಾಮೇನ ಸಮುದೀರಿತಾ॥

೮೬೭.

ಸಾ ಏವಾವಿಜ್ಜಮಾನೇನ-ವಿಜ್ಜಮಾನಾದಿಭೇದಿತಾ।

ಇತ್ಥಿಸದ್ದೋ ಛಳಾಭಿಞ್ಞೋ, ರಾಜಪುತ್ತೋ ತು ಭಾಸಿತಾ॥

೮೬೮.

ಕ್ರಿಯಾನಿಮಿತ್ತತ್ಥಯೋಗ-ರುಳ್ಹಿಜಾತೋಪಚಾರಿಕಾ।

ಸಮ್ಬನ್ಧೋಪಚಯಾವತ್ಥಾ, ಸಣ್ಠಾನಾಪೇಕ್ಖಿತಾ ತಥಾ॥

೮೬೯.

ದೇವದತ್ತೋಥ ಮೇಧಾವೀ, ವೇದನಾ ಚನ್ದಿಮಾ ತಥಾ।

ಖತ್ತಿಯೋ ನರಸೀಹೋ ಚ, ಭಾತಾ ಲೋಹಿತಕಂ ಯುವಾ॥

೮೭೦.

ಕುಣ್ಡಲಂ ದುಸ್ಸಮಿಚ್ಚೇವಮಾದಿಭೇದಿತಸಙ್ಗಹಾ।

ಸಮ್ಮತತ್ಥಸಭಾವೇಸು, ವೋಹಾರಾಕಾರಲಕ್ಖಿತಾ॥

೮೭೧.

ಸಾಯಂ ಯಾದಿಚ್ಛಕಾನ್ವತ್ಥಸಙ್ಕೇತಕ್ಖಣಸಮ್ಭವಾ।

ವೋಹಾರತ್ಥವಿಸೇಸೇನ, ಞೇಯ್ಯಾಕಾರಾನುಸಾರಿನೀ॥

೮೭೨.

ವಚೀಘೋಸಾನುಸಾರೇನ, ಸೋತವಿಞ್ಞಾಣವೀಥಿಯಾ।

ಪವತ್ತಾನನ್ತರುಪ್ಪನ್ನ-ಮನೋದ್ವಾರಸ್ಸ ಗೋಚರಾ॥

೮೭೩.

ಅತ್ಥಾ ಯಸ್ಸಾನುಸಾರೇನ, ವಿಞ್ಞಾಯನ್ತಿ ತತೋ ಪರಂ।

ಸಮ್ಮತಾ ಚ ಸಭಾವಾ ಚ, ಪುಬ್ಬಸಙ್ಕೇತಭಾಗಿನೋ॥

೮೭೪.

ಯಾಯಂ ವಾಲಮ್ಬಣಾಕಾರವಿಸೇಸೇ ಪಟಿದಿಸ್ಸತಿ।

ವೇದನಾದಿವಚೀಘೋಸಂ, ಸಭಾವಾನುಗಚೇತಸೋ॥

೮೭೫.

ಸಾಯಂ ಪಞ್ಞತ್ತಿ ವಿಞ್ಞೇಯ್ಯಾ, ಲೋಕಸಙ್ಕೇತನಿಮ್ಮಿತಾ।

ವಚೀವಿಞ್ಞತ್ತಿಸಹಿತೋ, ಸದ್ದೋ ಏವಾತಿ ಕೇಚನ॥

೮೭೬.

ಇತ್ಥಂ ಪಞ್ಞತ್ತಿಧಮ್ಮಾತಿ, ವುತ್ತಂ ಪಞ್ಞತ್ತಿಕದ್ವಯಂ।

ತಥಾಧಿವಚನಾ ಧಮ್ಮಾ, ನಿರುತ್ತೀತಿ ಚ ತಾದಿನಾ॥

೮೭೭.

ಅವಿಸಂವಾದಕಟ್ಠೇನ, ಲೋಕವೋಹಾರಸಾಧಕಂ।

ಸಮಞ್ಞಾಸಚ್ಚಮಿಚ್ಚೇವಂ, ಆಚಿಕ್ಖನ್ತಿ ವಿಚಕ್ಖಣಾ॥

೮೭೮.

ಸತ್ಥಾ ಯಂ ಪರಮತ್ಥಮುತ್ತಮಗುಣೋ ನಾಮಞ್ಚ ರೂಪನ್ತಿ ಚ,

ದ್ವೇಧಾಕಾಸಿ ಸಭಾವಧಮ್ಮಕುಸಲೋ ನಿಬ್ಬಿಜ್ಝ ಧಮ್ಮನ್ತರಂ।

ವೋಹಾರತ್ಥವಿಸೇಸಞೇಯ್ಯಮಪರಂ ಬ್ಯಾಕಾಸಿ ಪಞ್ಞತ್ತಿತೋ,

ಆರದ್ಧಂ ಕಮತೋ ಮಯೇವಮಖಿಲಂ ತಂ ಸುಟ್ಠು ನಿಟ್ಠಾಪಿತಂ॥

೮೭೯.

ಯಂ ಧಮ್ಮಂ ಧಮ್ಮರಾಜಾ ನಿರತಿಕಮಭಿಸಮ್ಬೋಧಿ ಮಗ್ಗೇನ ಬುದ್ಧಾ,

ಕತ್ವಾ ಕಣ್ಡಮ್ಬಮೂಲೇ ಪರಮಮನುಪಮಂ ಪಾಟಿಹೀರಂ ಖಣೇನ।

ಪಾತ್ವಾಕಾ ತತ್ಥ ಪತ್ವಾ ಪುರವರಗಣಮುಲ್ಲಾಪಲಾವಣ್ಣರಂಸಿ,

ತತ್ಥಾದಾಯತ್ಥಸಾರಂ ಕಥಿತಮತಿಚಿರಂ ಠಾತು ಪಾಠಾನುಕೂಲಂ॥

ಇತಿ ನಾಮರೂಪಪರಿಚ್ಛೇದೇ ಸಬ್ಬಸಙ್ಗಹವಿಭಾಗೋ ನಾಮ

ಸತ್ತಮೋ ಪರಿಚ್ಛೇದೋ।

ನಿಟ್ಠಿತೋ ಚ ನಾಮರೂಪಪರಿಚ್ಛೇದೇ ಸಬ್ಬಥಾಪಿ

ಅಭಿಧಮ್ಮಪರಮತ್ಥವಿಭಾಗೋ।