೧೨. ದ್ವಾದಸಮೋ ಪರಿಚ್ಛೇದೋ
ದಸಾವತ್ಥಾವಿಭಾಗೋ
೧೬೪೨.
ಇಚ್ಚಟ್ಠಾರಸಧಾ ಭಿನ್ನಾ, ಪಟಿಪಕ್ಖಪ್ಪಹಾನತೋ।
ಲಕ್ಖಣಾಕಾರಭೇದೇನ, ತಿವಿಧಾಪಿ ಚ ಭಾವನಾ॥
೧೬೪೩.
ಕಲಾಪತೋ ಸಮ್ಮಸನಂ, ಉದಯಬ್ಬಯದಸ್ಸನಂ।
ಭಙ್ಗೇ ಞಾಣಂ ಭಯೇ ಞಾಣಂ, ಞಾಣಮಾದೀನವೇಪಿ ಚ॥
೧೬೪೪.
ತಥೇವ ನಿಬ್ಬಿದಾಞಾಣಂ, ಞಾಣಂ ಮುಚ್ಚಿತುಕಮ್ಯತಾ।
ಪಟಿಸಙ್ಖಾ ಚ ಸಙ್ಖಾರು-ಪೇಕ್ಖಾಞಾಣಾನುಲೋಮಕಂ॥
೧೬೪೫.
ಇಚ್ಚಾವತ್ಥಾಪಭೇದೇನ, ದಸಧಾಪಿ ವಿಭಾವಿತಾ।
ಸಭಾಗತ್ಥವಿಸೇಸೇನ, ತಿಧಾ ಸಙ್ಗಹಿತಾ ಪುನ॥
೧೬೪೬.
ಯಥಾಭೂತಂ ನಾಮ ಞಾಣತ್ತಯಂ ಸಮ್ಮಸನಾದಿಕಂ।
ಭಯಾದಿಞಾಣಂ ತಿವಿಧಂ, ನಿಬ್ಬಿದಾತಿ ಪವುಚ್ಚತಿ॥
೧೬೪೭.
ತಥಾ ಮುಚ್ಚಿತುಕಾಮಾದಿ, ವಿರಾಗೋವ ಚತುಬ್ಬಿಧಂ।
ಲಕ್ಖಣತ್ತಯನಿಜ್ಝಾನವಸೇನ ಪುನ ವುಟ್ಠಿತಾ॥
೧೬೪೮.
ಸುಞ್ಞತಞ್ಚಾನಿಮಿತ್ತಞ್ಚ
ಸಾಧೇತಿ ಮಗ್ಗಸಙ್ಖಾತಂ, ವಿಮೋಕ್ಖತ್ತಯಮುತ್ತಮಂ॥
೧೬೪೯.
ಇತಿ ಭಾವೇತುಕಾಮಸ್ಸ, ವಿಭಾವೇತಿ ಯಥಾಕ್ಕಮಂ।
ದಸಾವತ್ಥಾವಿಭಾಗೇನ, ಸಮಾದಾಯ ಯಥಾ ಕಥಂ॥
೧೬೫೦.
ವಿಸುದ್ಧೋ ಸೀಲವಿಸುದ್ಧಿಯಾ।
ಉಪಚಾರಪ್ಪನಾಯಞ್ಚ, ಠತ್ವಾ ಚಿತ್ತವಿಸುದ್ಧಿಯಂ॥
೧೬೫೧.
ಸಪ್ಪಚ್ಚಯಂ ಪರಿಗ್ಗಯ್ಹ, ನಾಮರೂಪಂ ಸಭಾವತೋ।
ದಿಟ್ಠಿಕಙ್ಖಾವಿತರಣಂ, ಪತ್ವಾ ಸುದ್ಧಿಂ ತತೋ ಪರಂ॥
೧೬೫೨.
ಅತೀತಾನಾಗತೇ ಖನ್ಧೇ, ಪಚ್ಚುಪ್ಪನ್ನೇ ಚ ಸಾಸವೇ।
ಕಲಾಪತೋ ಸಮ್ಮಸಿತ್ವಾ, ಸಮ್ಮಸೇಯ್ಯ ತಿಲಕ್ಖಣಂ॥
೧೬೫೩.
ಆದಾನನಿಕ್ಖೇಪನತೋ,
ವಯೋವುದ್ಧತ್ಥಗಾಮಿತೋ।
ಆಹಾರತೋಪಿ ಉತುತೋ,
ಕಮ್ಮತೋ ಚಾಪಿ ಚಿತ್ತತೋ॥
೧೬೫೪.
ಧಮ್ಮತಾರೂಪತೋ ಚಾಪಿ, ರೂಪಸತ್ತಕತೋ ನಯೇ।
ಕಲಾಪತೋ ಯಮಕತೋ, ಖಣಿಕಾ ಪಟಿಪಾಟಿತೋ॥
೧೬೫೫.
ದಿಟ್ಠಿಮುಗ್ಘಾಟಯನ್ತೋ ಚ, ಮಾನಮುಗ್ಘಾಟಯಂ ತಥಾ।
ನಿಕನ್ತಿಪರಿಯಾದಾನೋ, ನಾಮಸತ್ತಕತೋ ನಯೇ॥
೧೬೫೬.
ನಿಚ್ಚಾ ಚೇ ನ ನಿರುಜ್ಝೇಯ್ಯುಂ, ನ ಬಾಧೇಯ್ಯುಂ ಸುಖಾ ಯದಿ।
ವಸೇ ವತ್ತೇಯ್ಯುಮತ್ತಾ ಚೇ, ತದಭಾವಾ ನ ತಾದಿಸಾ॥
೧೬೫೭.
ಸಮ್ಭವನ್ತಿ ಹಿ ಸಙ್ಖಾರಾ, ಸತಿ ಪಚ್ಚಯಸಮ್ಭವೇ।
ತತೋ ಪಚ್ಚಯನಿಪ್ಫನ್ನಾ, ಅವಸ್ಸಂ ಭೇದಗಾಮಿನೋ॥
೧೬೫೮.
ತದನಿಚ್ಚಾ ಖಯಟ್ಠೇನ, ದುಕ್ಖಾ ನಾಮ ಭಯಟ್ಠತೋ।
ಅನತ್ತಾಸಾರಕಟ್ಠೇನ, ಸಙ್ಖಾರಾತಿ ವಿಭಾವಯಂ॥
೧೬೫೯.
ಕಾಲೇನ
ಅಜ್ಝತ್ತಞ್ಚ ಬಹಿದ್ಧಾ ಚ, ಸಮಾಸಬ್ಯಾಸತೋ ತತೋ॥
೧೬೬೦.
ಯಥೋಪಟ್ಠಿತಭೇದೇನ, ಸಮ್ಮಸನ್ತೋ ಸಮೂಹತೋ।
ಕಲಾಪತೋ ಸಮ್ಮಸನಮಿತಿ ಭಾವೇತಿ ಪಣ್ಡಿತೋ॥
೧೬೬೧.
ತಸ್ಸೇವಂ ಸಮ್ಮಸನ್ತಸ್ಸ, ಕಮ್ಮಞ್ಞಂ ಹೋತಿ ಮಾನಸಂ।
ಸೂಪಟ್ಠನ್ತಿ ಚ ಸಙ್ಖಾರಾ, ವೋದಾಯತಿ ಚ ಭಾವನಾ॥
೧೬೬೨.
ತತೋ
ಪಚ್ಚುಪ್ಪನ್ನಸಭಾವಾನಂ, ಖನ್ಧಾನಮುದಯಬ್ಬಯಂ॥
೧೬೬೩.
ತಣ್ಹಾಸಮ್ಮೋಹಕಮ್ಮೇಹಿ,
ಖನ್ಧಪಞ್ಚಕಸಭಾವೋ।
ರೂಪಮಾಹಾರತೋ ಹೋತಿ,
ಫಸ್ಸತೋ ವೇದನಾದಯೋ॥
೧೬೬೪.
ವಿಞ್ಞಾಣಂ ನಾಮರೂಪಮ್ಹಾ, ಸಮ್ಭೋತೀತಿ ಚ ಪಸ್ಸತೋ।
ತಸ್ಸ ಪಚ್ಚಯತೋ ಹೋತಿ, ಖನ್ಧೇಸುದಯದಸ್ಸನಂ॥
೧೬೬೫.
ತಣ್ಹಾದೀನಂ ನಿರೋಧಾ ಚ,
ನಿರೋಧೋ ಹೋತಿ ಪಸ್ಸತೋ।
ತಥಾ ವೀಸತಿಧಾ ಹೋತಿ,
ತತ್ಥೇವ ವಯದಸ್ಸನಂ॥
೧೬೬೬.
ನಿಬ್ಬತ್ತಿವಿಪರಿಣಾಮಲಕ್ಖಣಂ ಪನ ಪಸ್ಸತೋ।
ಖಣತೋ ದಸಧಾ ನೇಸಮುದಯಬ್ಬಯದಸ್ಸನಂ॥
೧೬೬೭.
ಇತ್ಥಂ ಪಞ್ಞಾಸಧಾ ಭೇದೋ,
ಖನ್ಧಾನಮುದಯಬ್ಬಯೋ।
ಆಯತನಾದಿಭೇದೋಪಿ,
ಯೋಜೇತಬ್ಬೋ ಯಥಾರಹಂ॥
೧೬೬೮.
ತದೇವಮನುಪಸ್ಸನ್ತೋ
ಅನಿಚ್ಚಾ ದುಕ್ಖಾನತ್ತಾತಿ, ಭಾವೇತಿ ಬಹುಧಾ ಬುಧೋ॥
೧೬೬೯.
ಭಾವನಾಪಸುತಸ್ಸೇವಂ, ಪಸ್ಸತೋ ಬೋಧಿಪಕ್ಖಿಯಾ।
ಪಾತುಭೂತಾ ಪವತ್ತನ್ತಿ, ವಿಸೇಸೇನ ವಿಸಾರದಾ॥
೧೬೭೦.
ಸಲಕ್ಖಣಪರಿಚ್ಛಿನ್ನೇ, ತಿಲಕ್ಖಣವವತ್ಥಿತೇ।
ಛನ್ದೋ ಸಾಸವಸಙ್ಖಾರೇ, ಸಾರದಂ ಪರಿಯೇಸತಿ॥
೧೬೭೧.
ತತ್ಥ
ಸಙ್ಕಪ್ಪೋಭಿನಿರೋಪೇತಿ, ಆಹರನ್ತೋ ಪುನಪ್ಪುನಂ॥
೧೬೭೨.
ಯಥಾವತ್ಥುಸಭಾವೇನ, ತತೋ ಸದ್ಧಾಧಿಮುಚ್ಚತಿ।
ಸತಿ ಸೂಪಟ್ಠಿತಾ ಹೋತಿ, ಪರಿಗ್ಗಯ್ಹ ಸಭಾವತೋ॥
೧೬೭೩.
ಪಞ್ಞಾ ಸಮ್ಪಟಿವಿಜ್ಝನ್ತೀ, ಸಮಾಹಚ್ಚ ವಿಪಸ್ಸತಿ।
ಪಗ್ಗಹೇತ್ವಾನ ವಾಯಾಮೋ, ಪಟಿಪಾದೇತಿ ಭಾವನಂ॥
೧೬೭೪.
ತತೋ ಪೀತಿಮನೋ ಹೋತಿ, ನಿಪ್ಫಾದಿತಮನೋರಥೋ।
ಪಾಮೋಜ್ಜಬಹುಲೋ ಹುತ್ವಾ, ಪಸ್ಸದ್ಧದರಥೋ ಪನ॥
೧೬೭೫.
ವಿಕ್ಖೇಪುದ್ಧಚ್ಚನಿತ್ತಿಣ್ಣೋ, ಸಮಾಧಿಯತಿ ನಿಚ್ಚಲೋ।
ಉಪೇಕ್ಖಾ ಭಾವನಾವೀಥಿಂ, ಅಧಿಟ್ಠಾತಿ ತತೋ ಪರಂ॥
೧೬೭೬.
ಆರುಳ್ಹಯೋಗ್ಗಾಚರಿಯೋ, ಆಜಾನೀಯರಥೋ ವಿಯ।
ವಾತಾಭಾವೇ ಪದೀಪೋವ, ಪಸನ್ನೇಕಮುಖಟ್ಠಿತಾ॥
೧೬೭೭.
ಸುಖುಮಾ ನಿಪುಣಾಕಾರಾ, ಖುರಧಾರಾಗತಾ ವಿಯ।
ಗಣ್ಹನ್ತೀ ಭಾವನಾಗಬ್ಭಂ, ಪವಡ್ಢತಿ ವಿಪಸ್ಸನಾ॥
೧೬೭೮.
ಸಮ್ಪತ್ತಪಟಿವೇಧಸ್ಸ,
ತಸ್ಸೇವಂ ತಂ ವಿಪಸ್ಸತೋ।
ಜಾಯತೇಕೋ ಉಪಕ್ಲೇಸೋ,
ದಸೋಪಕ್ಲೇಸವತ್ಥುಕಾ॥
೧೬೭೯.
ಓಭಾಸೋ
ಸುಖಂ ಞಾಣಮುಪಟ್ಠಾನಮುಪೇಕ್ಖಾ ಚ ನಿಕನ್ತಿ ಚ॥
೧೬೮೦.
ಜಾತೇಸ್ವೇತೇಸು ಯಂ ಕಿಞ್ಚಿ, ಉಳಾರಂ ಜಾತವಿಮ್ಹಯೋ।
ದಿಸ್ವಾ ವಿಪಸ್ಸನಾಮಗ್ಗಾ, ವೋಕ್ಕಮಿತ್ವಾ ತತೋ ಪರಂ॥
೧೬೮೧.
ತಮಹಂಕಾರವಿಕ್ಖಿತ್ತೋ, ಅಸ್ಸಾದೇನ್ತೋ ಮಮಾಯತಿ।
ಹೋತಾಧಿಮಾನಿಕೋ ವಾಥ, ಮಞ್ಞನ್ತೋ ತಮನುತ್ತರಂ॥
೧೬೮೨.
ಸಿಯಾ
ತತ್ಥೇವಂ ಪಟಿಸಙ್ಖಾಯ, ಪಟಿವಿಜ್ಝತಿ ಪಣ್ಡಿತೋ॥
೧೬೮೩.
ನ ತಣ್ಹಾದಿಟ್ಠಿಮಾನೇಹಿ, ಪರಿಯೋಗಾಹಹೇತುತೋ।
ಲಕ್ಖಣಾಲಮ್ಬಣತ್ತಾ ಚ, ಲೋಕಿಯಾಯಂ ವಿಪಸ್ಸನಾ॥
೧೬೮೪.
ದಿಟ್ಠಿಮಾನನಿಕನ್ತೀ ಚ, ಕುಮ್ಮಗ್ಗಾ ಪರಿಪನ್ಥಕಾ।
ಮಗ್ಗೋ ವಿಸುದ್ಧಿಯಾ ನಾಮ, ವಿಸುದ್ಧಾ ಚ ವಿಪಸ್ಸನಾ॥
೧೬೮೫.
ಸಾರಥೀವ ರಥಂ ಭನ್ತಮಿತಿ ಸಙ್ಖಾಯ ಸಾಧುಕಂ।
ಪವಿಟ್ಠಮಗ್ಗಂ ವಿಕ್ಖಿತ್ತಂ, ಸಮ್ಪಾದೇತಿ ಯಥಾ ಪುರೇ॥
೧೬೮೬.
ಇತ್ಥಂ ಮಗ್ಗೇ ಅಮಗ್ಗೇ ಚ, ಯಾಥಾವಪಟಿವೇಧಕಂ।
ಮಗ್ಗಾಮಗ್ಗವಿಸುದ್ಧೀತಿ, ಞಾಣದಸ್ಸನಮೀರಿತಂ॥
೧೬೮೭.
ಚೇತೋಪವತ್ತನಾಕಾರಮಿತಿ ಸಲ್ಲಕ್ಖಯಂ ಬುಧೋ।
ಸಾಧುಕಂ ಪಟಿವಿಜ್ಝನ್ತೋ, ಸುಖುಮಂ ನಿಪುಣಂ ತತೋ॥
೧೬೮೮.
ಪರಿಪನ್ಥೇ ವಿಮೋಚೇತ್ವಾ, ಬೋಧೇತ್ವಾ ಬೋಧಿಪಕ್ಖಿಯೇ।
ಭಾವನಂ ಪಟಿಪಾದೇನ್ತೋ, ಪುನದೇವೋದಯಬ್ಬಯಂ॥
೧೬೮೯.
ಸಮಧಿಟ್ಠಾಯ ಮೇಧಾವೀ, ವಿಪಸ್ಸತಿ ತಿಲಕ್ಖಣಂ।
ಉದಯಬ್ಬಯಞಾಣನ್ತಿ, ತಮೀರೇನ್ತಿ ತತೋ ಪರಂ॥
೧೬೯೦.
ಸಙ್ಖಾರಾನಂ ವಿಭೂತತ್ತಾ, ಸಾಕಾರಾನಂ ವಿಸೇಸತೋ।
ತಿಲಕ್ಖಣಾನಂ ದಿಟ್ಠತ್ತಾ, ಸಙ್ಖಾರೇಸು ಸಭಾವತೋ॥
೧೬೯೧.
ಪರಿಪನ್ಥಾ
ಯಥಾವೀಥಿಪ್ಪವತ್ತಸ್ಸ, ಪಟಿಪತ್ತಿವಿಸುದ್ಧಿಯಾ॥
೧೬೯೨.
ಇನ್ದ್ರಿಯಾನಂ ಸುತಿಕ್ಖತ್ತಾ, ಪರಿಪಕ್ಕಾ ವಿಪಸ್ಸನಾ।
ಉದಯಮ್ಹಾ ವಿಮುಚ್ಚಿತ್ವಾ, ಭಙ್ಗೇ ಠಾತಿ ಯಥಾ ಕಥಂ॥
೧೬೯೩.
ಉಪ್ಪಾದೋ ಪಚ್ಚಯಾಯತ್ತೋ, ಧಮ್ಮಾನಮಿತಿ ನಿಚ್ಛಿತೇ।
ನಿರೋಧಾನುಗತಾ ಜಾತಿ, ಸಿದ್ಧಾವಸ್ಸಂ ನಿಯಾಮತೋ॥
೧೬೯೪.
ತತೋದಯಾವ ಪಟ್ಠಾಯ, ಅತ್ಥಾಯ ಸೂರಿಯೋ ವಿಯ।
ವಿನಾಸಾಯ ಪವತ್ತನ್ತಾ, ವಯನ್ತೇವಾತಿ ಪೇಕ್ಖತಿ॥
೧೬೯೫.
ಉದಯಾಭೋಗಮೋಹಾಯ
ಭೇದಸ್ಸಭಾವಮಾರಬ್ಭ, ಧಮ್ಮೇಸು ಸತಿ ತಿಟ್ಠತಿ॥
೧೬೯೬.
ಅತೀತಾ ಚ ನಿರುದ್ಧಾವ, ನಿರುಜ್ಝಿಸ್ಸನ್ತಿನಾಗತಾ।
ನಿರುಜ್ಝನ್ತೇವ ವತ್ತನ್ತಾ, ಇಚ್ಚೇವಮನುಪಸ್ಸತೋ॥
೧೬೯೭.
ನಿಜ್ಝರೋವ ಗಿರಗ್ಗಮ್ಹಿ, ವಾರಿವೋಣತಪೋಕ್ಖರೇ।
ಪದೀಪೋ ವಿಯ ಝಾಯನ್ತೋ, ಆರಗ್ಗೇರಿವ ಸಾಸಪೋ॥
೧೬೯೮.
ಆತಪೇ ವಿಯ ಉಸ್ಸಾವೋ, ಪರಿಸ್ಸಾವೇ ಜಲಂ ವಿಯ।
ಮದ್ದಿತಂ ಫೇಣಪಿಣ್ಡಂವ, ಲೋಣಪಿಣ್ಡಮಿವೋದಕೇ॥
೧೬೯೯.
ಉದಕೇ ದಣ್ಡರಾಜೀವ, ವಿಜ್ಜುತಾವ ವಲಾಹಕೇ।
ಜಲಂ ತತ್ತಕಪಾಲೇವ, ಸಲಿಲೇ ವಿಯ ಬುಬ್ಬುಳಂ॥
೧೭೦೦.
ವಾತಬ್ಭಾಹತತೂಲಂವ, ತೀರಂ ಪತ್ತಾವ ವೀಚಿಯೋ।
ಫಲಂ ಬನ್ಧನಮುತ್ತಂವ, ತಿಣಾನೀವ ಹುತಾವಹೇ॥
೧೭೦೧.
ಜಾಯನ್ತಾಪಿ ಚ ಜಿಯ್ಯನ್ತಾ, ಮಿಯ್ಯನ್ತಾ ಚ ನಿರನ್ತರಂ।
ನಿರೋಧಾಯಾಭಿಧಾವನ್ತಾ, ಭಙ್ಗಾಭಿಮುಖಪಾತಿನೋ॥
೧೭೦೨.
ವಿಗಚ್ಛನ್ತಾವ ದಿಸ್ಸನ್ತಿ, ಖೀಯನ್ತನ್ತರಧಾಯಿನೋ।
ವಿದ್ಧಂಸಯನ್ತಾ ಸಙ್ಖಾರಾ, ಪತನ್ತಾ ಚ ವಿನಾಸಿನೋ॥
೧೭೦೩.
ಭಙ್ಗಞಾಣಂ
ಅನಿಚ್ಚನ್ತಾನುಧಾವನ್ತಿ, ತಿವಿಧಾಪಿ ವಿಪಸ್ಸನಾ॥
೧೭೦೪.
ಉದಯಬ್ಬಯಭಙ್ಗೇಸು, ಪಾಕಟಾ ಹಿ ಅನಿಚ್ಚತಾ।
ಭಯಾದೀನವನಿಬ್ಬೇದೇ, ದುಕ್ಖತಾನತ್ತತಾ ತತೋ॥
೧೭೦೫.
ಇತ್ಥಂ ಭಙ್ಗಮಧಿಟ್ಠಾಯ, ಪಸ್ಸನ್ತಸ್ಸ ತಿಲಕ್ಖಣಂ।
ಸಙ್ಖಾರಾ ಸಭಯಾ ಹುತ್ವಾ, ಸಮುಪಟ್ಠನ್ತಿ ಯೋಗಿನೋ॥
೧೭೦೬.
ವಾಳಮಿಗಾನುಬದ್ಧಾವ, ನಿಮ್ಮುಜ್ಜನ್ತಾ ವಿಯಣ್ಣವೇ।
ಅಮನುಸ್ಸಗಹಿತಾವ, ಪರಿಕ್ಖಿತ್ತಾವ ವೇರಿಹಿ॥
೧೭೦೭.
ಕಣ್ಹಸಪ್ಪಸಮಾಲೀಳ್ಹಾ
ಪಪಾತಾವಾಟಪಕ್ಖನ್ತಾ, ಪತನ್ತಾವ ಹುತಾವಹೇ॥
೧೭೦೮.
ವಜ್ಝಪ್ಪತ್ತಾ ಮಹಾಚೋರಾ, ಛಿಜ್ಜನ್ತಾ ವಿಯ ಸೀಸತೋ।
ಸೂಲಮಾರೋಪಿಯನ್ತಾವ, ಪಬ್ಬತೇನೋತ್ಥಟಾ ವಿಯ॥
೧೭೦೯.
ಜಾತಿಸಙ್ಕಟಪಕ್ಖನ್ತಾ, ಜರಾಬ್ಯಾಧಿನಿಪೀಳಿತಾ।
ಮರಣಾಸನಿಸಮ್ಮದ್ದಾ, ಮಹಾಬ್ಯಸನಭಾಗಿನೋ॥
೧೭೧೦.
ಮಚ್ಚುನಬ್ಭಾಹತಾ ನಿಚ್ಚಂ, ದುಕ್ಖಭಾರಸಮೋತ್ಥಟಾ।
ಸೋಕೋಪಾಯಾಸನಿಸ್ಸನ್ದಾ, ಪರಿದೇವಪರಾಯಣಾ॥
೧೭೧೧.
ತಣ್ಹಾದಿಟ್ಠಿಮಮತ್ತೇನ, ಸತ್ತಾ ಏತ್ಥಾಧಿಮುಚ್ಛಿತಾ।
ಬದ್ಧಾ ಭಯೇನ ಬದ್ಧಾವ, ಮುತ್ತಾವ ಭಯಮುತ್ತಕಾ॥
೧೭೧೨.
ಇತಿ ಸಙ್ಖಾರಧಮ್ಮೇಸು, ಭಯುಪ್ಪತ್ತಿಮುದಿಕ್ಖತೋ।
ಭಯಞಾಣನ್ತಿ ಭಾಸನ್ತಿ, ಭಯಮುತ್ತಾ ಮಹೇಸಯೋ॥
೧೭೧೩.
ಸಭಯಾ ಪುನ ಸಙ್ಖಾರಾ, ಸನ್ದಿಸ್ಸನ್ತಿ ಸಮನ್ತತೋ।
ಅಹಿತಾವಹಿತಾನಿಚ್ಚಮಾದೀನವಂ ನಿರನ್ತರಂ॥
೧೭೧೪.
ಗೂಥಕೂಪಂವ ಕುಥಿತಂ, ಭಸ್ಮಚ್ಛನ್ನೋವ ಪಾವಕೋ।
ಸರಕ್ಖಸಂವ ಸಲಿಲಂ, ಸವಿಸಂ ವಿಯ ಭೋಜನಂ॥
೧೭೧೫.
ವನಂ
ಭಿಜ್ಜಮಾನಾ ಮಹಾನಾವಾ, ಫಲನ್ತಾ ಅಸನೀ ಯಥಾ॥
೧೭೧೬.
ಆವುಧಾಕುಲಸನ್ನದ್ಧಾ, ಯುದ್ಧಭೂಮಿಪತಿಟ್ಠಿತಾ।
ಸಙ್ಗತಾವ ಮಹಾಸೇನಾ, ಘೋರಾನತ್ಥನಿಯಾಮಿತಾ॥
೧೭೧೭.
ರಥಂ ಚಕ್ಕಸಮಾರುಳ್ಹಂ, ವುಯ್ಹನ್ತಂ ವಳವಾಮುಖಂ।
ಕಪ್ಪುಟ್ಠಾನಮಹಾರಮ್ಭಂ, ಕಪ್ಪೋ ಪತ್ತನ್ತರೋ ಯಥಾ॥
೧೭೧೮.
ತಥಾ
ಮಹೋಪದ್ದವಸಙ್ಕುಲಾ।
ಡಯ್ಹನ್ತೇಕಾದಸಗ್ಗೀಹಿ,
ಪರಿಪ್ಫನ್ದಪರಾಯಣಾ॥
೧೭೧೯.
ಮಹಾರಞ್ಞಮಿವಾದಿತ್ತಂ, ಭವಯೋನಿಗತಿಟ್ಠಿತಿ-
ಸತ್ತಾವಾಸಾ ಸಮೀಭೂತಾ, ಜಲಿತಙ್ಗಾರಕಾಸುಕಾ॥
೧೭೨೦.
ಆಸೀವಿಸಾ ಮಹಾಭೂತಾ, ವಧಕಾ ಖನ್ಧಪಞ್ಚಕಾ।
ಚಕ್ಖಾದಯೋ ಸುಞ್ಞಾ ಗಾಮಾ, ಗೋಚರಾ ಗಾಮಘಾತಕಾ॥
೧೭೨೧.
ಇಚ್ಚಾನಯಸಮಾಕಿಣ್ಣಂ, ಭವಸಾಗರಮಣ್ಡಲಂ।
ಲೇಣಂ ತಾಣಂ ಪತಿಟ್ಠಾ ವಾ, ಸರಣಂ ವಾ ನ ವಿಜ್ಜತಿ॥
೧೭೨೨.
ಏತ್ಥಾಭಿರೋಧಿನೋ ಬಾಲಾ, ವಙ್ಕಘಸ್ತಾವ ಮೀನಕಾ।
ಮಹಾಸಕಟುಪಬ್ಬುಳ್ಹಾ, ಮಹಬ್ಭಯಪತಿಟ್ಠಿತಾ॥
೧೭೨೩.
ಜಾಯಮಾನಾವ ಜಿಯ್ಯನ್ತಾ, ನಾನಾಬ್ಯಸನಪೀಳಿತಾ।
ವಿಪತ್ತಾವಟ್ಟಪತಿತಾ, ಮರಣಾಬದ್ಧನಿಚ್ಛಯಾ॥
೧೭೨೪.
ಮೋಹನ್ಧಕಾರಪಿಹಿತಾ, ಚತುರೋಘಸಮೋತ್ಥಟಾ।
ವಿತುನ್ನಾ ದುಕ್ಖಸಲ್ಲೇನ, ವಿಹಞ್ಞನ್ತಿ ವಿಘಾತಿನೋ॥
೧೭೨೫.
ಇತ್ಥಞ್ಚ ವಿಸಪುಪ್ಫಂವ, ನಾನಾನತ್ಥಫಲಾವಹಂ।
ದುಕ್ಖಾನುಬನ್ಧಸಮ್ಬಾಧಂ, ಆಬಾಧಂವ ಸಮುಟ್ಠಿತಂ॥
೧೭೨೬.
ಆಸೀವಿಸಂವ
ಅಸಿಸೂನಂವ ಸಾರಮ್ಭಂ, ದುಕ್ಖಾಯೂಹನಕಂ ಪದಂ॥
೧೭೨೭.
ಸವಿದಾಹಪರಿಪ್ಫನ್ದಪಕ್ಕಬನ್ಧಮಿವೋದಕಂ।
ಉಪ್ಪಾದಞ್ಚ ಪವತ್ತಞ್ಚ, ನಿಮಿತ್ತಾಯೂಹನಂ ತಥಾ॥
೧೭೨೮.
ಪಟಿಸನ್ಧಿಞ್ಚ ಪಸ್ಸನ್ತಂ, ಞಾಣಮಾದೀನವಂ ಮತಂ।
ತೇಭೂಮಕೇಸು ತೇನಾಯಮವುದ್ಧಿಂ ಪಟಿವಿಜ್ಝತಿ॥
೧೭೨೯.
ಭಯಭೇರವಪಕ್ಖನ್ತೇ, ಬಹ್ವಾದೀನವಪಚ್ಚಯೇ।
ಸಙ್ಖಾರೇ ಸಮವೇಕ್ಖನ್ತೋ, ನಿಬ್ಬಿನ್ದತಿ ನಿರಾಲಯೋ॥
೧೭೩೦.
ವಿಸಂ
ಸುಪಣ್ಣಂ ನಾಗರಾಜಾವ, ಚೋರಂ ವಿಯ ಮಹದ್ಧನೋ॥
೧೭೩೧.
ದುಕ್ಖಾನುಸಯಸಮ್ಬಾಧೇ, ಬಾಧಮಾನೇ ವಿಭಾವಯಂ।
ಸಂವೇಜೇತಿ ನಿರಾನನ್ದೇ, ಪರಿಪನ್ಥಭಯಾಕುಲೇ॥
೧೭೩೨.
ಸುದ್ಧೋ ಮುತ್ತಕರೀಸಂವ, ಸುಹಿತೋ ವಮಿತಂ ವಿಯ।
ಸುವಿಲಿತ್ತೋವ ದುಗ್ಗನ್ಧಂ, ಸುನ್ಹಾತೋ ಅಙ್ಗಣಂ ವಿಯ॥
೧೭೩೩.
ರಾಗದೋಸಪರಿಕ್ಲಿಟ್ಠೇ, ಚತುರಾಸವಪೂತಿಕೇ।
ಹೀನಲೋಕಾಮಿಸಾಸಾರೇ, ಸಂಕ್ಲೇಸವಿಸದೂಸಿತೇ॥
೧೭೩೪.
ಸಙ್ಖಾರೇಪಿ ಜಿಗುಚ್ಛನ್ತೋ, ನಾಭಿನನ್ದತಿ ಪಣ್ಡಿತೋ।
ತಸ್ಸೇತಂ ನನ್ದಿನಿಸ್ಸಟ್ಠಂ, ನಿಬ್ಬಿದಾಞಾಣಮಬ್ರವುಂ॥
೧೭೩೫.
ಸಭಯಾದೀನವೇ ದಿಸ್ವಾ, ಸಙ್ಖಾರೇ ಪುನ ಪಣ್ಡಿತೋ।
ನಿಬ್ಬಿನ್ದನ್ತೋ ತತೋ ತೇಹಿ, ಪರಿಮುಚ್ಚಿತುಮಿಚ್ಛತಿ॥
೧೭೩೬.
ಮೀನಾವ ಕುಮೀನೇ ಬದ್ಧಾ, ಪಞ್ಜರೇ ವಿಯ ಪಕ್ಖಿನೋ।
ಚೋರೋ ಚಾರಕಬದ್ಧೋವ, ಪೇಳಾಯನ್ತೋವ ಪನ್ನಗೋ॥
೧೭೩೭.
ಪಙ್ಕೇ ಸನ್ನೋ ಮಹಾನಾಗೋ, ಚನ್ದೋ ರಾಹುಮುಖಂ ಗತೋ।
ಮಿಗೋ ಯಥಾ ಪಾಸಗತೋ, ತಥಾ ಸಂಸಾರಚಾರಕೇ॥
೧೭೩೮.
ಅವಿಜ್ಜಾಪರಿಯೋನದ್ಧೇ
ದಿಟ್ಠಿಜಾಲಪಟಿಚ್ಛನ್ನೇ, ವಿಪಲ್ಲಾಸಪರಿಕ್ಖಿತೇ॥
೧೭೩೯.
ಪಞ್ಚನೀವರಣಾಬದ್ಧೇ, ಮಾನತ್ಥಮ್ಭಸಮುಸ್ಸಯೇ।
ಇಚ್ಛಾಪಪಾತಗಮ್ಭೀರೇ, ವಿಪತ್ತಿವಿನಿಪಾತನೇ॥
೧೭೪೦.
ಜರಾಬ್ಯಾಧಿಸಮುಪ್ಪಾದೇ, ಧೂಮಕೇತುಪಪತ್ತಿಕೇ।
ಕೋಧೂಪನಾಹದಹನೇ, ಸೋಕೋಪಾಯಾಸಧೂಪಿತೇ॥
೧೭೪೧.
ಮದಪ್ಪಮಾದಾವರೋಧೇ, ಭವತಣ್ಹಾವಕಡ್ಢನೇ।
ವಿಪ್ಪಯೋಗಸಮುತ್ತಾಸೇ, ನಿಚ್ಚಾಪಾಯಭಯಾಕುಲೇ॥
೧೭೪೨.
ಛಾಲಮ್ಬಾಭಿಹತೇ
ಸಞ್ಚೇತನಾಕಾರಣಿಕೇ, ವೇದನಾಕಮ್ಮಕಾರಣೇ॥
೧೭೪೩.
ಅನತ್ಥಾಲಾಪನಿಗ್ಘೋಸೇ, ಕ್ಲೇಸರಕ್ಖಸಲಾಲಿತೇ।
ಮರಣಾರಮ್ಭನಿಟ್ಠಾನೇ, ಬದ್ಧೋ ಮುತ್ತಿಂ ಗವೇಸತಿ॥
೧೭೪೪.
ಅಗ್ಗಿಂ ವಿಯ ಚ ಸಮ್ಫುಟ್ಠ-ಮಸುಚಿಂ ಗಹಿತಂ ವಿಯ।
ಪೇತಂ ಖಾದಿತುಕಾಮಂವ, ವಿಕ್ಕನ್ತೇನ್ತಮಿವಾವುಧಂ॥
೧೭೪೫.
ಮಹಾಬ್ಯಸನುಪಸ್ಸಟ್ಠೇ, ಸಙ್ಖಾರೇ ಮೋತ್ತುಮಿಚ್ಛತೋ।
ಮುಚ್ಚಿತುಕಮ್ಯತಾಞಾಣಮುಪ್ಪನ್ನನ್ತಿ ಪವುಚ್ಚತಿ॥
೧೭೪೬.
ದುಜ್ಜಹೇ ಪಲಿಬಜ್ಝನ್ತೇ, ಗನ್ಥಾನುಸಯಸಙ್ಗಮೇ।
ತಣ್ಹುಪಾದಾನಗಹಣೇ, ನನ್ದಿರಾಗಾನುಬನ್ಧನೇ॥
೧೭೪೭.
ದಿಟ್ಠಿಮಾನಮದತ್ಥದ್ಧೇ, ಲೋಭಪಾಸನಿರನ್ತರೇ।
ಸಂಯೋಜನಮಹಾದುಗ್ಗೇ, ಚಿರಕಾಲಪ್ಪಪಞ್ಚಿತೇ॥
೧೭೪೮.
ಸಙ್ಖಾರೇ ಮುಞ್ಚತಚ್ಚನ್ತಂ, ಆವಿಜ್ಝಿತ್ವಾವ ಪನ್ನಗಂ।
ಲಕ್ಖಣಾನುಪನಿಜ್ಝಾಯ, ಸುಖುಮಂ ಪನ ಯೋನಿಸೋ॥
೧೭೪೯.
ಮಜ್ಝತ್ತಗಹಣೋ ತಸ್ಮಾ, ನಿರಪೇಕ್ಖವಿಮುತ್ತಿಯಾ।
ವಗ್ಗುಲೀವಾಫಲಂ ರುಕ್ಖಂ, ವೀಮಂಸತಿ ವಿಸೇಸತೋ॥
೧೭೫೦.
ವಿಹತಂ
ಗನ್ಧಂ ವಿಯ ಚ ಪಿಸೇನ್ತೋ, ಪಿಸಿತಂಯೇವ ಸಾಧುಕಂ॥
೧೭೫೧.
ಅನಿಚ್ಚಾ ದುಕ್ಖಾನತ್ತಾತಿ, ಸತಿಮಾ ಸುಸಮಾಹಿತೋ।
ಆಹಚ್ಚ ಪಟಿವಿಜ್ಝನ್ತೋ, ಲಕ್ಖಣಾನಿ ವಿಪಸ್ಸತಿ॥
೧೭೫೨.
ವಿಪಸ್ಸನ್ತಸ್ಸ ತಸ್ಸೇವಂ, ಪಟಿಸಙ್ಖಾನುಪಸ್ಸನಾ-
ಞಾಣಮಿಚ್ಚಾಹು ನಿಪುಣಂ, ವಿಚಿನನ್ತಂ ವಿಸಾರದಾ॥
೧೭೫೩.
ಇತಿ ಸಮ್ಮಾ ವಿಪಸ್ಸನ್ತೋ, ಸಚ್ಛಿಕತ್ವಾ ತಿಲಕ್ಖಣಂ।
ಯಥಾಭೂತಸಭಾವೇನ, ತತ್ಥೇವಮನುಪಸ್ಸತಿ॥
೧೭೫೪.
ಅನಿಚ್ಚಾ
ದುಕ್ಖಾವ ಸುಖತೋ ದಿಟ್ಠಾ, ಅನತ್ತಾವ ಪನತ್ತತೋ॥
೧೭೫೫.
ಅನಿಚ್ಚಾ ದುಕ್ಖಾನತ್ತಾ ಚ, ಸಙ್ಖತಾ ಪುನ ಸಬ್ಬಥಾ।
ಅಲಬ್ಭನೇಯ್ಯಧಮ್ಮಾ ಚ, ತಥೇವಾಕಾಮಕಾರಿಯಾ॥
೧೭೫೬.
ಧಾತುಮತ್ತಾ ಪರಾಧೀನಾ, ಅತ್ತಾಧೇಯ್ಯವಿವಜ್ಜಿತಾ।
ಮಚ್ಚುಧೇಯ್ಯವಸಾನೀತಾ, ಉಪಧಿಹತಗೋಚರಾ॥
೧೭೫೭.
ಅಹಂ ಮಮನ್ತಿ ವೋಹಾರೋ, ಪರೋ ವಾಥ ಪರಸ್ಸ ವಾ।
ಅತ್ತಾ ವಾ ಅತ್ತನೀಯಂ ವಾ, ವತ್ಥುತೋ ನತ್ಥಿ ಕತ್ಥಚಿ॥
೧೭೫೮.
ಯಥಾಪಿ ಅಙ್ಗಸಮ್ಭಾರಾ, ಹೋತಿ ಸದ್ದೋ ರಥೋ ಇತಿ।
ಏವಂ ಖನ್ಧೇಸು ಸನ್ತೇಸು, ಹೋತಿ ಸತ್ತೋತಿ ಸಮ್ಮುತಿ॥
೧೭೫೯.
ತತ್ಥ ಕಪ್ಪೇನ್ತಿ ಅತ್ತಾನಂ, ಬಾಲಾ ದುಮ್ಮೇಧಿನೋ ಜನಾ।
ಅಜ್ಝತ್ತಂ ವಾ ಬಹಿದ್ಧಾ ವಾ, ಪಸ್ಸತೋ ನತ್ಥಿ ಕಿಞ್ಚನಂ॥
೧೭೬೦.
ಸುಖಿತೋ ದುಕ್ಖಿತೋ ವಾಥ, ಪುಗ್ಗಲೋ ನಾಮ ಕತ್ಥಚಿ।
ವತ್ಥುತೋ ನತ್ಥಿ ಸಬ್ಬತ್ಥ, ಸಙ್ಖಾರಾ ತಂಸಭಾವಿನೋ॥
೧೭೬೧.
ಜಾಯಮಾನಾ ಚ ಜಿಯ್ಯನ್ತಾ, ಮಿಯ್ಯಮಾನಾ ಚ ಸಙ್ಖತಾ।
ಅತ್ತಾವ ದುಕ್ಖಿತಾ ಹೇತೇ, ನ ತು ದುಕ್ಖಾಯ ಕಸ್ಸಚಿ॥
೧೭೬೨.
ದುಕ್ಖಮೇವ
ನಾಞ್ಞತ್ರ ದುಕ್ಖಾ ಸಮ್ಭೋತಿ, ನಾಞ್ಞಂ ದುಕ್ಖಾ ನಿರುಜ್ಝತಿ॥
೧೭೬೩.
ಏತ್ಥ ಗಯ್ಹೂಪಗಂ ನತ್ಥಿ, ಪಲಾಸೇತಂ ಪಪಞ್ಚಿತಂ।
ನಿರುದ್ಧಸ್ಸ ಸಮಾಯೂಹಾ, ನಿರತ್ಥಕಸಮುಬ್ಭವಾ॥
೧೭೬೪.
ಅನಿಚ್ಚಾ ಹೋನ್ತು ಸಙ್ಖಾರಾ, ದುಕ್ಖಿತಾ ವಾ ಮಮೇತ್ಥ ಕಿಂ।
ಅನತ್ತಾ ವಾತಿ? ಸಙ್ಖಾರುಪೇಕ್ಖಾಞಾಣಂ ಪವತ್ತತಿ॥
೧೭೬೫.
ಇತಿ ದಿಸ್ವಾ ಯಥಾಭೂತಂ, ಯಾವ ಭಙ್ಗಾ ತತೋ ಪರಂ।
ಗಣ್ಹನ್ತೀ ಭಾವನಾಗಬ್ಭಂ, ಪರಿಪಕ್ಕಾ ವಿಪಸ್ಸನಾ॥
೧೭೬೬.
ಅವಸ್ಸಂ ಭಙ್ಗನಿಟ್ಠಾನೇ, ಭಯಾದೀನವನಿಚ್ಛಿತೇ।
ನಿಬ್ಬಿನ್ದಿತ್ವಾ ವಿರಜ್ಜನ್ತೋ, ಪಟಿಸಙ್ಖಾಯುಪೇಕ್ಖತಿ॥
೧೭೬೭.
ತತ್ಥ
ವಿಸ್ಸಟ್ಠಪರಪುತ್ತಂವ, ವಿಸ್ಸಟ್ಠಭರಿಯಂ ವಿಯ॥
೧೭೬೮.
ಪವತ್ತಞ್ಚ ನಿಮಿತ್ತಞ್ಚ, ಪಟಿಸಙ್ಖಾಯುಪೇಕ್ಖತೋ।
ಸಬ್ಬಸಙ್ಖಾರಧಮ್ಮೇಸು, ಗತಿಯೋನಿಭವೇಸು ವಾ॥
೧೭೬೯.
ವಾರಿ ಪೋಕ್ಖರಪತ್ತೇವ, ಸೂಚಿಕಗ್ಗೇವ ಸಾಸಪೋ।
ಖಿತ್ತಂ ಕುಕ್ಕುಟಪತ್ತಂವ, ದದ್ದುಲಂವ ಹುತಾವಹೇ॥
೧೭೭೦.
ನ ಪಸಾರೀಯತೀ ಚಿತ್ತಂ, ನ ತು ಸಜ್ಜತಿ ಬಜ್ಝತಿ।
ಆಲಯಾ ಪತಿಲೀಯನ್ತಿ, ಪರಿವತ್ತತಿ ವಟ್ಟತೋ॥
೧೭೭೧.
ಸೀತಂ ಘಮ್ಮಾಭಿತತ್ತೋವ,
ಛಾತಜ್ಝತ್ತೋವ ಭೋಜನಂ।
ಪಿಪಾಸಿತೋವ ಪಾನೀಯಂ,
ಬ್ಯಾಧಿತೋವ ಮಹೋಸಧಂ॥
೧೭೭೨.
ಭೀತೋ ಖೇಮನ್ತಭೂಮಿಂವ, ದುಗ್ಗತೋವ ಮಹಾನಿಧಿಂ।
ಅಞ್ಜಸಂ ಮಗ್ಗಮುಳ್ಹೋವ, ದೀಪಂ ವಿಯ ಚ ಅಣ್ಣವೇ॥
೧೭೭೩.
ಅಜರಾಮರಮಚ್ಚನ್ತಂ
ಸಬ್ಬದುಕ್ಖಕ್ಖಯಂ ಠಾನಂ, ನಿಬ್ಬಾನಮಭಿಕಙ್ಖತಿ॥
೧೭೭೪.
ವುಟ್ಠಾನಗಾಮಿನೀ ಚಾಯಂ, ಸಿಖಪ್ಪತ್ತಾ ವಿಪಸ್ಸನಾ।
ಸಕುಣೀ ತೀರದಸ್ಸೀವ, ಸಾನುಲೋಮಾ ಪವತ್ತತಿ॥
೧೭೭೫.
ಅಪ್ಪವತ್ತಮನಿಮಿತ್ತಂ, ಪಸ್ಸನ್ತೋ ಪನ ಸನ್ತತೋ।
ಪಕ್ಖೀವ ನಿಪ್ಫಲಂ ರುಕ್ಖಂ, ಹಿತ್ವಾ ವುಟ್ಠಾತಿ ಸಙ್ಖತಾ॥
೧೭೭೬.
ಉಪಚಾರಸಮಾಧೀತಿ, ಕಾಮಾವಚರಭಾವನಾ।
ಮುತ್ತೋಯಂ ಲೋಕಿಯೋ ಮಗ್ಗೋ, ಪುಬ್ಬಭಾಗವಿಪಸ್ಸನಾ॥
೧೭೭೭.
ಪರಿಪಕ್ಕಾ ಕಮೇನೇವಂ, ಪರಿಭಾವಿತಭಾವನಾ।
ಪರಿಚ್ಚಜನ್ತೀ ಸಙ್ಖಾರೇ, ಪಕ್ಖನ್ದನ್ತೀ ಅಸಙ್ಖತೇ॥
೧೭೭೮.
ಜನೇತಾನುತ್ತರಂ
ಕಟ್ಠಸಙ್ಘಟ್ಟನಾ ಜಾತಾ, ಅಚ್ಚಿಧೂಮಾವ ಭಾಸುರಂ॥
೧೭೭೯.
ಉಗ್ಗಚ್ಛತಿ ಯಥಾದಿಚ್ಚೋ, ಪುರಕ್ಖತ್ವಾರುಣಂ ತಥಾ।
ವಿಪಸ್ಸನಂ ಪುರಕ್ಖತ್ವಾ, ಮಗ್ಗಧಮ್ಮೋ ಪವತ್ತತಿ॥
೧೭೮೦.
ತಥಾ ಪವತ್ತಮಾನೋ ಚ, ನಿಬ್ಬಾನಪದಗೋಚರೋ।
ವಿಮೋಕ್ಖತ್ತಯನಾಮೇನ, ಯಥಾರಹಮಸೇಸತೋ॥
೧೭೮೧.
ಕ್ಲೇಸದೂಸಿತಸನ್ತಾನೇ, ಅಭಿಹನ್ತ್ವಾ ವಿಗಚ್ಛತಿ।
ಏಕಚಿತ್ತಕ್ಖಣುಪ್ಪಾದೋ, ಅಸನೀ ವಿಯ ಪಬ್ಬತಂ॥
೧೭೮೨.
ಪುಬ್ಬೇ ವುತ್ತನಯೇನೇವ, ಅಪ್ಪನಾನಯಮೀರಯೇ।
ಪಾದಕಜ್ಝಾನಭೇದೇನ, ಝಾನಙ್ಗನಿಯಮೋ ಭವೇ॥
೧೭೮೩.
ಪರಿಕಮ್ಮೋಪಚಾರಾನು-ಲೋಮಸಙ್ಖಾತಗೋಚರಾ।
ಯಂ ಕಿಞ್ಚಿ ಲಕ್ಖಣಾಕಾರಂ, ವಿಪಸ್ಸನ್ತಾ ಪವತ್ತರೇ॥
೧೭೮೪.
ತತೋ ಗೋತ್ರಭು ನಿಬ್ಬಾನ-ಮಾಲಮ್ಬಿತ್ವಾನ ಜಾಯತಿ।
ಬಹಿದ್ಧಾ ಖನ್ಧತೋ ತಸ್ಮಾ, ವುಟ್ಠಾನನ್ತಿ ಪವುಚ್ಚತಿ॥
೧೭೮೫.
ತತೋ ಮಗ್ಗೋ ಕಿಲೇಸಮ್ಹಾ, ವಿಮುಚ್ಚನ್ತೋ ಪವತ್ತತಿ।
ವುಟ್ಠಾನಂ ಉಭತೋ ತಸ್ಮಾ, ಖನ್ಧತೋ ಚ ಕಿಲೇಸತೋ॥
೧೭೮೬.
ದ್ವೇ ತಥಾ ತೀಣಿ ವಾ ಹೋನ್ತಿ, ಫಲಾನಿ ಚ ತತೋ ಪರಂ।
ಭವಙ್ಗಪಾತೋ ತಂ ಛೇತ್ವಾ, ಜಾಯತೇ ಪಚ್ಚವೇಕ್ಖಣಾ॥
೧೭೮೭.
ಮಗ್ಗಂ ಫಲಞ್ಚ ನಿಬ್ಬಾನಂ, ಪಚ್ಚವೇಕ್ಖತಿ ಪಣ್ಡಿತೋ।
ಹೀನೇ ಕಿಲೇಸೇ ಸೇಸೇ ಚ, ಪಚ್ಚವೇಕ್ಖತಿ ವಾ ನ ವಾ॥
೧೭೮೮.
ಭಾವೇತ್ವಾ ಪಠಮಂ ಮಗ್ಗ-ಮಿತ್ಥಮಾದಿಫಲೇ ಠಿತೋ।
ತತೋ ಪರಂ ಪರಿಗ್ಗಯ್ಹ, ನಾಮರೂಪಂ ಯಥಾ ಪುರೇ॥
೧೭೮೯.
ಕಮೇನ ಚ ವಿಪಸ್ಸನ್ತೋ, ಪುನದೇವ ಯಥಾರಹಂ।
ಯಥಾನುಕ್ಕಮಮಪ್ಪೇತಿ, ಸಕದಾಗಾಮಿಆದಯೋ॥
೧೭೯೦.
ಇತ್ಥಂ
ಬುದ್ಧಾನುಬುದ್ಧಪರಿಭಾವಿತಭಾವನಾಯಂ।
ಪಚ್ಚುದ್ಧರೇತಿ ಭವಸಾಗರಪಾರಗಾಮೀ,
ಮಗ್ಗೋ ಮಹೇಸಿ ಗುಣಸಾಗರಪಾರಗಾಮೀ॥
೧೭೯೧.
ಇಚ್ಚೇತಂ ದಸವಿಧ ಭಾವನಾವಿಭಾಗಂ,
ಭಾವೇತ್ವಾ ಪರಮಹಿತಾವಹಂ ಕಮೇನ।
ಪಪ್ಪೋನ್ತಿ ಪದಮಜರಾಮರಂ ಚಿರಾಯ,
ಸಂಕ್ಲೇಸಂ ಸಕಲಮವಸ್ಸಜನ್ತಿ ಧೀರಾ॥
ಇತಿ ನಾಮರೂಪಪರಿಚ್ಛೇದೇ ದಸಾವತ್ಥಾವಿಭಾಗೋ ನಾಮ
ದ್ವಾದಸಮೋ ಪರಿಚ್ಛೇದೋ।