ಪಞ್ಚಮೋ ಪರಿಚ್ಛೇದೋ
೫. ಭೂಮಿಪುಗ್ಗಲಕಥಾ
೧೮೦.
ಇತೋ ಪರಂ ಪವಕ್ಖಾಮಿ, ಭೂಮಿಪುಗ್ಗಲಭೇದತೋ।
ಚಿತ್ತಾನಂ ಪನ ಸಬ್ಬೇಸಂ, ಕಮತೋ ಸಙ್ಗಹಂ ಕಥಂ॥
೧೮೧.
ನಿರಯಞ್ಚ ತಿರಚ್ಛಾನಯೋನಿ ಪೇತಾಸುರಾ ತಥಾ।
ಚತುರಾಪಾಯಭೂಮೀತಿ, ಕಾಮೇ ದುಗ್ಗತಿಯೋ ಮತಾ॥
೧೮೨.
ಚಾತುಮಹಾರಾಜಿಕಾ ಚ, ತಾವತಿಂಸಾ ಚ ಯಾಮಕಾ।
ತುಸಿತಾ ಚೇವ ನಿಮ್ಮಾನರತಿನೋ ವಸವತ್ತಿನೋ॥
೧೮೩.
ಛಳೇತೇ ದೇವಲೋಕಾ ಚ, ಮಾನವಾತಿ ಚ ಸತ್ತಧಾ।
ಕಾಮಸುಗತಿಯೋ ಚೇಕಾದಸಧಾ ಕಾಮಭೂಮಿಯೋ॥
೧೮೪.
ಬ್ರಹ್ಮಾನಂ ಪಾರಿಸಜ್ಜಾ ಚ, ತಥಾ ಬ್ರಹ್ಮಪುರೋಹಿತಾ।
ಮಹಾಬ್ರಹ್ಮಾ ಚ ತಿವಿಧಾ, ಪಠಮಜ್ಝಾನಭೂಮಿಯೋ॥
೧೮೫.
ಪರಿತ್ತಾಭಾಪ್ಪಮಾಣಾಭಾ, ತಥೇವಾಭಸ್ಸರಾತಿ ಚ।
ದುತಿಯಜ್ಝಾನಭೂಮಿ ಚ, ತಿವಿಧಾವ ಪಕಾಸಿತಾ॥
೧೮೬.
ಪರಿತ್ತಸುಭಾಪ್ಪಮಾಣಾಸುಭಾ ಚ ಸುಭಕಿಣ್ಹಕಾ।
ತಿವಿಧಾಪಿ ಪವುಚ್ಚನ್ತಿ, ತತಿಯಜ್ಝಾನಭೂಮಿಯೋ॥
೧೮೭.
ವೇಹಪ್ಫಲಾ
ಇಚ್ಚೇತಾ ಪನ ಸತ್ತಾಪಿ, ಚತುತ್ಥಜ್ಝಾನಭೂಮಿಯೋ॥
೧೮೮.
ಅವಿಹಾ ಚ ಅತಪ್ಪಾ ಚ, ಸುದಸ್ಸಾ ಚ ಸುದಸ್ಸಿನೋ।
ಅಕನಿಟ್ಠಾತಿ ಪಞ್ಚೇತೇ, ಸುದ್ಧಾವಾಸಾ ಪಕಾಸಿತಾ॥
೧೮೯.
ಇತಿ ಸೋಳಸಧಾ ಭಿನ್ನಾ, ಬ್ರಹ್ಮಲೋಕಾ ಪವುಚ್ಚರೇ।
ರೂಪಿಬ್ರಹ್ಮಾನಮಾವಾಸಾ, ರೂಪಾವಚರಭೂಮಿಯೋ॥
೧೯೦.
ಆಕಾಸಾನಞ್ಚಾಯತನನಾಮಾದೀಹಿ ಪಕಾಸಿತಾ।
ಅರೂಪಿಬ್ರಹ್ಮಲೋಕಾ ಚ, ಚತುಧಾರೂಪಭೂಮಿಯೋ॥
೧೯೧.
ಸೋತಾಪನ್ನಾದಿಭೇದೇನ, ಚತುಧಾನುತ್ತರಾ ಮತಾ।
ಪಞ್ಚತಿಂಸ ಪನಿಚ್ಚೇವಂ, ಸಬ್ಬಥಾಪಿ ಚ ಭೂಮಿಯೋ॥
೧೯೨.
ಜಾಯನ್ತಿ ಚತುರಾಪಾಯೇ, ಪಾಪಪಾಕಾಯ ಸನ್ಧಿಯಾ।
ಕಾಮಾವಚರದೇವೇಸು, ಮಹಾಪಾಕೇಹಿ ಜಾಯರೇ॥
೧೯೩.
ಅಹೇತುಕಾ ಪುಞ್ಞಪಾಕಾಹೇತುಕೇನ ತು ಜಾಯರೇ।
ಭುಮ್ಮದೇವಮನುಸ್ಸೇಸು, ಮಹಾಪಾಕೇಹಿ ಚೇತರೇ॥
೧೯೪.
ವಿಪಾಕಂ ಪಠಮಜ್ಝಾನಂ, ಪಠಮಜ್ಝಾನಭೂಮಿಯಂ।
ದುತಿಯಂ ತತಿಯಞ್ಚೇವ, ದುತಿಯಜ್ಝಾನಭೂಮಿಯಂ॥
೧೯೫.
ತತಿಯಮ್ಹಿ ಚತುತ್ಥಂ ತು, ಚತುತ್ಥಮ್ಹಿ ಚ ಪಞ್ಚಮಂ।
ಆರುಪ್ಪಾ ಚ ಕಮೇನೇವ, ಆರುಪ್ಪೇ ಹೋನ್ತಿ ಸನ್ಧಿಯೋ॥
೧೯೬.
ಕಾಯವಾಚಾಮನೋದ್ವಾರೇ, ಕಮ್ಮಂ ಪಾಣವಧಾದಿಕಂ।
ಕತ್ವಾ ಪಾಪಕಚಿತ್ತೇಹಿ, ಜಾಯನ್ತಾಪಾಯಭೂಮಿಯಂ॥
೧೯೭.
ಕಾಯವಾಚಾಮನೋದ್ವಾರೇ, ದಾನಂ ಸೀಲಞ್ಚ ಭಾವನಂ।
ಕಾಮಪುಞ್ಞೇಹಿ ಕತ್ವಾನ, ಕಾಮಸುಗತಿಯಂ ಸಿಯುಂ॥
೧೯೮.
ಪರಿತ್ತಂ ಮಜ್ಝಿಮಂ ಝಾನಂ, ಪಣೀತಞ್ಚ ಯಥಾಕ್ಕಮಂ।
ಭಾವೇತ್ವಾ ತಿವಿಧಾ ಹೋನ್ತಿ, ತೀಸು ಭೂಮೀಸು ಯೋಗಿನೋ॥
೧೯೯.
ವೇಹಪ್ಫಲೇಸು
ಸಞ್ಞಾವಿರಾಗತಞ್ಚೇವ, ಭಾವೇತ್ವಾಸಞ್ಞಿಭೂಮಿಯಂ॥
೨೦೦.
ಸುದ್ಧಾವಾಸೇಸು
ಆರುಪ್ಪಾನಿ ಚ ಭಾವೇತ್ವಾ, ಅರೂಪೇಸು ಯಥಾಕ್ಕಮಂ॥
೨೦೧.
ಲೋಕುತ್ತರಂ ತು ಭಾವೇತ್ವಾ, ಯಥಾಸಕಮನನ್ತರಂ।
ಸಮಾಪತ್ತಿಕ್ಖಣೇ ಚೇವ, ಅಪ್ಪೇತಿ ಫಲಮಾನಸಂ॥
೨೦೨.
ಅಪಾಯಮ್ಹಾ ಚುತಾ ಸತ್ತಾ, ಕಾಮಧಾತುಮ್ಹಿ ಜಾಯರೇ।
ಸಬ್ಬಟ್ಠಾನೇಸು ಜಾಯನ್ತಿ, ಕಾಮಸುಗತಿತೋ ಚುತಾ॥
೨೦೩.
ಚುತಾ ಜಾಯನ್ತಿ ರೂಪಮ್ಹಾ, ಸಬ್ಬತ್ಥಾಪಾಯವಜ್ಜಿತೇ।
ಕಾಮಸುಗತಿಯಂ ಹೋನ್ತಿ, ಅರೂಪಾಸಞ್ಞತೋ ಚುತಾ॥
೨೦೪.
ತಥಾರೂಪಚುತಾ ಹೋನ್ತಿ, ತತ್ಥೇವೋಪರಿಮೇವ ಚ।
ವಟ್ಟಮೂಲಸಮುಚ್ಛೇದಾ, ನಿಬ್ಬಾಯನ್ತಿ ಅನಾಸವಾ॥
೨೦೫.
ಸುದ್ಧಾವಾಸೇಸ್ವನಾಗಾಮಿ-ಪುಗ್ಗಲಾವೋಪಪಜ್ಜರೇ।
ಕಾಮಧಾತುಮ್ಹಿ ಜಾಯನ್ತಿ, ಅನಾಗಾಮಿವಿವಜ್ಜಿತಾ॥
೨೦೬.
ಹೇಟ್ಠುಪಪತ್ತಿಬ್ರಹ್ಮಾನಂ, ಅರಿಯಾನಂ ನ ಕತ್ಥಚಿ।
ಅಸಞ್ಞಸತ್ತಾಪಾಯೇಸು, ನತ್ಥೇವಾರಿಯಪುಗ್ಗಲಾ॥
೨೦೭.
ವೇಹಪ್ಫಲೇ ಅಕನಿಟ್ಠೇ, ಭವಗ್ಗೇ ಚ ಪತಿಟ್ಠಿತಾ।
ನ ಪುನಾಞ್ಞತ್ಥ ಜಾಯನ್ತಿ, ಸಬ್ಬೇ ಅರಿಯಪುಗ್ಗಲಾ॥
೨೦೮.
ಛಸು ದೇವೇಸ್ವನಾಗಾಮೀ, ವೀತರಾಗಾ ನ ತಿಟ್ಠರೇ।
ನ ಚಿರಟ್ಠಾಯಿನೋ ತತ್ಥ, ಲೋಕಿಯಾಪಿ ಚ ಯೋಗಿನೋ॥
೨೦೯.
ಗಿಹಿಲಿಙ್ಗೇ ನ ತಿಟ್ಠನ್ತಿ, ಮನುಸ್ಸೇಸು ಅನಾಸವಾ।
ಪಬ್ಬಜ್ಜಾಯಞ್ಚ ಭುಮ್ಮೇ ಚ, ಬ್ರಹ್ಮತ್ತೇಪಿ ಚ ತಿಟ್ಠರೇ॥
೨೧೦.
ಯಾನಿ ಪಞ್ಞಾಸ ವಸ್ಸಾನಿ,
ಮನುಸ್ಸಾನಂ ಸ ಪಿಣ್ಡಿತೋ।
ಏಕೋ
ಮಾಸೇಕೋ ತಿಂಸ ರತ್ತಿಯೋ॥
೨೧೧.
ದ್ವಾದಸಮಾಸಿಯೋ ವಸ್ಸೋ, ತೇನ ಪಞ್ಚಸತಂ ಭವೇ।
ಚಾತುಮಹಾರಾಜಿಕಾನಂ, ಪಮಾಣಮಿದಮಾಯುನೋ॥
೨೧೨.
ತಂ
ಗಣನಾಯ ಮನುಸ್ಸಾನಂ, ಚತುಭಾಗೂಪರೂಪರಿ॥
೨೧೩.
ಯಂ ಮನುಸ್ಸವಸ್ಸಸತಂ, ತದೇಕೋ ದಿವಸೋ ಕತೋ।
ತೇನ ವಸ್ಸಸಹಸ್ಸಾಯು, ತಾವತಿಂಸೇಸು ದೇಸಿತೋ॥
೨೧೪.
ಕೋಟಿತ್ತಯಂ ಸಟ್ಠಿಸತಸಹಸ್ಸಞ್ಚಾಧಿಕಂ ಭವೇ।
ಗಣನಾಯ ಮನುಸ್ಸಾನಂ, ತಾವತಿಂಸೇಸು ಪಿಣ್ಡಿತಂ॥
೨೧೫.
ಆಯುಪ್ಪಮಾಣಮಿಚ್ಚೇವಂ, ದೇವಾನಮುಪರೂಪರಿ।
ದ್ವಿಕ್ಖತ್ತುಂ ದ್ವಿಗುಣಂ ಕತ್ವಾ, ಚತುಭಾಗಮುದಾಹಟಂ॥
೨೧೬.
ಗಣನಾಯ ಮನುಸ್ಸಾನಂ, ತತ್ಥ ಚುದ್ದಸ ಕೋಟಿಯೋ।
ಚತ್ತಾಲೀಸಸತಸಹಸ್ಸಾಧಿಕಾ ಯಾಮಭೂಮಿಯಂ॥
೨೧೭.
ತುಸಿತಾನಂ ಪಕಾಸೇನ್ತಿ, ಸತ್ತಪಞ್ಞಾಸ ಕೋಟಿಯೋ।
ಸಟ್ಠಿಸತಸಹಸ್ಸಾನಿ, ವಸ್ಸಾನಿ ಅಧಿಕಾನಿ ಚ॥
೨೧೮.
ನಿಮ್ಮಾನರತಿದೇವಾನಂ, ದ್ವಿಸತಂ ತಿಂಸ ಕೋಟಿಯೋ।
ಚತ್ತಾಲೀಸವಸ್ಸಸತಸಹಸ್ಸಾನಿ ಚ ಸಬ್ಬಥಾ॥
೨೧೯.
ನವಕೋಟಿಸತಞ್ಚೇಕವೀಸತಿವಸ್ಸಕೋಟಿಯೋ।
ಸಟ್ಠಿವಸ್ಸಸತಸಹಸ್ಸಾಧಿಕಾ ವಸವತ್ತಿಸು॥
೨೨೦.
ಕಪ್ಪಸ್ಸ ತತಿಯೋ ಭಾಗೋ, ಉಪಡ್ಢಞ್ಚ ಯಥಾಕ್ಕಮಂ।
ಕಪ್ಪೇಕೋ ದ್ವೇ ಚ ಚತ್ತಾರೋ, ಅಟ್ಠ ಕಪ್ಪಾ ಚ ಸೋಳಸ॥
೨೨೧.
ದ್ವತ್ತಿಂಸ ಚತುಸಟ್ಠೀ ಚ, ನವಸು ಬ್ರಹ್ಮಭೂಮಿಸು।
ವೇಹಪ್ಫಲಾ ಅಸಞ್ಞೀ ಚ, ಪಞ್ಚಕಪ್ಪಸತಾಯುಕಾ॥
೨೨೨.
ಕಪ್ಪಸಹಸ್ಸಂ
ಸಹಸ್ಸಾನಿ ಚ ಕಪ್ಪಾನಂ, ಸುದ್ಧಾವಾಸಾನಮುದ್ದಿಸೇ॥
೨೨೩.
ವೀಸಕಪ್ಪಸಹಸ್ಸಾನಿ, ಚತ್ತಾಲೀಸಞ್ಚ ಸಟ್ಠಿ ಚ।
ಚತುರಾಸೀತಿಸಹಸ್ಸಾ, ಕಪ್ಪಾ ಚಾರುಪ್ಪಕೇ ಕಮಾ॥
೨೨೪.
ಆಯುಪ್ಪಮಾಣನಿಯಮೋ, ನತ್ಥಿ ಭುಮ್ಮೇ ಚ ಮಾನವೇ।
ವಸ್ಸಾನಂ ಗಣನಾ ನತ್ಥಿ, ಚತುರಾಪಾಯಭೂಮಿಯಂ॥
೨೨೫.
ಪುಥುಜ್ಜನಾರಿಯಾ
ತಿಹೇತುಕಾದಿಭೇದೇನ, ತಿವಿಧಾ ಚ ಪುಥುಜ್ಜನಾ॥
೨೨೬.
ಮಗ್ಗಟ್ಠಾ ಚ ಫಲಟ್ಠಾ ಚ,
ಅಟ್ಠೇವಾರಿಯಪುಗ್ಗಲಾ।
ಆದಿತೋ ಸತ್ತ ಸೇಕ್ಖಾ ಚ,
ಅಸೇಕ್ಖೋ ಚಾರಹಾಪರೋ॥
೨೨೭.
ಅಹೇತುಕಾವ ಲಬ್ಭನ್ತಿ, ಸತ್ತಾ ದುಗ್ಗತಿಯಂ ಪನ।
ತಿಹೇತುಕಾವ ಲಬ್ಭನ್ತಿ, ರೂಪಾರೂಪೇ ಸಚಿತ್ತಕಾ॥
೨೨೮.
ಕಾಮಾವಚರದೇವೇಸು, ಅಹೇತುಕವಿವಜ್ಜಿತಾ।
ವಿನಿಪಾತಾಸುರೇ ಚೇವ, ಮಾನವೇ ಚ ತಯೋಪಿ ಚ॥
೨೨೯.
ಅರಿಯಾ ನಾಮ ಲಬ್ಭನ್ತಿ, ಅಸಞ್ಞಾಪಾಯವಜ್ಜಿತೇ।
ಪುಥುಜ್ಜನಾ ತು ಲಬ್ಭನ್ತಿ, ಸುದ್ಧಾವಾಸವಿವಜ್ಜಿತೇ॥
೨೩೦.
ಸುದ್ಧಾವಾಸಮಪಾಯಞ್ಚ, ಹಿತ್ವಾಸಞ್ಞಿಭವಂ ತಿಧಾ।
ಸೋತಾಪನ್ನಾದಯೋ ದ್ವೇಪಿ, ಸೇಸಟ್ಠಾನೇಸು ಲಬ್ಭರೇ॥
೨೩೧.
ಇತಿ ಸಬ್ಬಪ್ಪಭೇದೇನ, ಭೂಮಿಪುಗ್ಗಲಸಙ್ಗಹಂ।
ಞತ್ವಾ ವಿಞ್ಞೂ ವಿಭಾವೇಯ್ಯ, ತತ್ಥ ಚಿತ್ತಾನಿ ಸಮ್ಭವಾತಿ॥
ಇತಿ ಚಿತ್ತವಿಭಾಗೇ ಭೂಮಿಪುಗ್ಗಲಕಥಾ ನಿಟ್ಠಿತಾ।
ಪಞ್ಚಮೋ ಪರಿಚ್ಛೇದೋ।