ಅಟ್ಠಮೋ ಪರಿಚ್ಛೇದೋ

೨. ಚೇತಸಿಕವಿಭಾಗೋ

೮. ಚೇತಸಿಕಸಮ್ಪಯೋಗಕಥಾ

೨೮೬.

ಇತಿ ಚಿತ್ತವಿಧಿಂ ಞತ್ವಾ, ದ್ವೇಪಞ್ಞಾಸ ವಿಭಾವಿನಾ।

ಞೇಯ್ಯಾ ಚೇತಸಿ ಸಮ್ಭೂತಾ, ಧಮ್ಮಾ ಚೇತಸಿಕಾ ಕಥಂ॥

೨೮೭.

ಫಸ್ಸೋ ಚ ವೇದನಾ ಸಞ್ಞಾ, ಚೇತನೇಕಗ್ಗತಾ ತಥಾ।

ಜೀವಿತಂ ಮನಸಿಕಾರೋ, ಸತ್ತ ಸಾಧಾರಣಾ ಇಮೇ॥

೨೮೮.

ವಿತಕ್ಕೋ ಚ ವಿಚಾರೋ ಚ, ಪೀತಿ ಚ ವೀರಿಯಂ ತಥಾ।

ಛನ್ದೋ ಚ ಅಧಿಮೋಕ್ಖೋ ಚ, ಛ ಪಕಿಣ್ಣಕನಾಮಕಾ॥

೨೮೯.

ಪುಞ್ಞಾಪುಞ್ಞೇಸು ಪಾಕೇಸು, ಕ್ರಿಯಾಸು ಚ ಯಥಾರಹಂ।

ಮಾನಸೇಸು ಪವತ್ತನ್ತಿ, ವಿಪ್ಪಕಿಣ್ಣಾ ಪಕಿಣ್ಣಕಾ॥

೨೯೦.

ಸದ್ಧಾ ಸತಿನ್ದ್ರಿಯಞ್ಚೇವ, ಹಿರೋತ್ತಪ್ಪಬಲದ್ವಯಂ।

ಅಲೋಭೋ ಚ ಅದೋಸೋ ಚ, ಪಞ್ಞಾ ಮಜ್ಝತ್ತತಾಪಿ ಚ॥

೨೯೧.

ಅಟ್ಠೇತೇ ಉತ್ತಮಾ ನಾಮ, ಧಮ್ಮಾ ಉತ್ತಮಸಾಧನಾ।

ನಿವಜ್ಜಾತಿ ಪವುಚ್ಚನ್ತಿ, ಯುಗಳಾ ಛ ತತೋಪರೇ॥

೨೯೨.

ಪಸ್ಸದ್ಧಿ ಕಾಯಚಿತ್ತಾನಂ, ಲಹುತಾ ಮುದುತಾ ತಥಾ।

ಕಮ್ಮಞ್ಞತಾ ಚ ಪಾಗುಞ್ಞ-ತಾ ಚ ಉಜುಕತಾತಿ ಚ॥

೨೯೩.

ಅಪ್ಪಮಞ್ಞಾದ್ವಯಂ ನಾಮ, ಕರುಣಾಮುದಿತಾ ಸಿಯುಂ।

ಸಮ್ಮಾವಾಚಾ ಚ ಕಮ್ಮನ್ತಾ-ಜೀವಾ ಚ ವಿರತಿತ್ತಯಂ॥

೨೯೪.

ಪಞ್ಚವೀಸ ಪನಿಚ್ಚೇತೇ, ಅನವಜ್ಜಾ ಯಥಾರಹಂ।

ಪಾಪಾಹೇತುಕಮುತ್ತೇಸು, ಅನವಜ್ಜೇಸು ಜಾಯರೇ॥

೨೯೫.

ಲೋಭೋ ದೋಸೋ ಚ ಮೋಹೋ ಚ,

ಮಾನೋ ದಿಟ್ಠಿ ಚ ಸಂಸಯೋ।

ಥಿನಮಿದ್ಧಞ್ಚ ಉದ್ಧಚ್ಚಂ,

ಕುಕ್ಕುಚ್ಚಞ್ಚ ತಥಾ ದಸ॥

೨೯೬.

ಅಹಿರೀಕಮನೋತ್ತಪ್ಪಂ, ಇಸ್ಸಾ ಮಚ್ಛರಿಯನ್ತಿ ಚ।

ಹೋನ್ತಿ ಚುದ್ದಸ ಸಾವಜ್ಜಾ, ಸಾವಜ್ಜೇಸ್ವೇವ ಸಮ್ಭವಾ॥

೨೯೭.

ದ್ವೇಪಞ್ಞಾಸ ಚತುದ್ಧೇವಂ, ಧಮ್ಮಾ ಚೇತಸಿಕಾ ಠಿತಾ।

ತೇಸಂ ದಾನಿ ಪವಕ್ಖಾಮಿ, ಸಮ್ಪಯೋಗಞ್ಚ ಸಙ್ಗಹಂ॥

೨೯೮.

ಸತ್ತ ಸಾಧಾರಣಾ ಸಬ್ಬ-ಚಿತ್ತಸಾಧಾರಣಾ ತತೋ।

ಚಿತ್ತೇನ ಸದ್ಧಿ ಅಟ್ಠನ್ನಂ, ವಿಪ್ಪಯೋಗೋ ನ ಕತ್ಥಚಿ॥

೨೯೯.

ವಿತಕ್ಕೋ ಪಞ್ಚವಿಞ್ಞಾಣಂ, ದುತಿಯಾದಿವಿವಜ್ಜಿತೇ।

ವಿಚಾರೋಪಿ ಚ ತತ್ಥೇವ, ತತಿಯಾದಿವಿವಜ್ಜಿತೇ॥

೩೦೦.

ಸೋಮನಸ್ಸಯುತೇ ಪೀತಿ-ಚತುತ್ಥಜ್ಝಾನವಜ್ಜಿತೇ।

ವೀರಿಯಂ ಪಠಮಾವಜ್ಜ-ವಿಪಾಕಾಹೇತುವಜ್ಜಿತೇ॥

೩೦೧.

ಛನ್ದೋ ಸಮ್ಭೋತಿ ಸಬ್ಬತ್ಥ, ಮೋಮೂಹಾಹೇತುವಜ್ಜಿತೇ।

ಅಧಿಮೋಕ್ಖೋ ವಿಚಿಕಿಚ್ಛಾ-ಪಞ್ಚವಿಞ್ಞಾಣವಜ್ಜಿತೇ॥

೩೦೨.

ಛಸಟ್ಠಿ ಪಞ್ಚಪಞ್ಞಾಸ, ಸತ್ತತಿ ಚೇವ ಸೋಳಸ।

ವೀಸತೇಕಾದಸೇವಾಥ, ಪಕಿಣ್ಣಕವಿವಜ್ಜಿತಾ॥

೩೦೩.

ಮಾನಸಾ ಪಞ್ಚಪಞ್ಞಾಸ, ಸವಿತಕ್ಕಾ ಛಸಟ್ಠಿ ಚ।

ಸವಿಚಾರೇಕಪಞ್ಞಾಸ, ಸಪ್ಪೀತಿಕಮನಾ ತಥಾ॥

೩೦೪.

ತೇಸತ್ತತಿ ಸವೀರಿಯಾ, ಸಛನ್ದೇಕೂನಸತ್ತತಿ।

ಸಾಧಿಮೋಕ್ಖಾ ಪವುಚ್ಚನ್ತಿ, ಅಟ್ಠಸತ್ತತಿ ಮಾನಸಾ॥

೩೦೫.

ಪಞ್ಞಾಪ್ಪಮಞ್ಞಾವಿರತೀ, ಹಿತ್ವಾ ಏಕೂನಸಟ್ಠಿಸು।

ಪಾಪಾಹೇತುಕಮುತ್ತೇಸು, ಸದ್ಧಾದೇಕೂನವೀಸತಿ॥

೩೦೬.

ದ್ವಿಹೇತುಕಾಹೇತುಪಾಪವಜ್ಜಿತೇಸು ಸಮಾಸತೋ।

ಪಞ್ಞಾ ತು ಜಾಯತೇ ಸತ್ತಚತ್ತಾಲೀಸೇಸು ಸಬ್ಬಥಾ॥

೩೦೭.

ಮಹಾಕ್ರಿಯಾಕಾಮಪುಞ್ಞ-ರೂಪಜ್ಝಾನೇಸು ಜಾಯರೇ।

ಅಪ್ಪಮಞ್ಞಾಟ್ಠವೀಸೇಸು, ಹಿತ್ವಾ ಝಾನಂ ತು ಪಞ್ಚಮಂ॥

೩೦೮.

ಲೋಕುತ್ತರೇಸು ಸಬ್ಬತ್ಥ, ಸಹೇವ ವಿರತಿತ್ತಯಂ।

ಕಾಮಪುಞ್ಞೇಸು ಸಮ್ಭೋತಿ, ಯಥಾಸಮ್ಭವತೋ ವಿಸುಂ॥

೩೦೯.

ವಿರತೀಅಪ್ಪಮಞ್ಞಾಸು, ಪಞ್ಚಸ್ವಪಿ ಯಥಾರಹಂ।

ಕದಾಚಿದೇವ ಸಮ್ಭೋತಿ, ಏಕೇಕೋವ ನ ಚೇಕತೋ॥

೩೧೦.

ಅಹಿರೀಕಮನೋತ್ತಪ್ಪಂ, ಮೋಹಉದ್ಧಚ್ಚಮೇವ ಚ।

ಪಾಪಸಾಧಾರಣಾ ನಾಮ, ಚತ್ತಾರೋ ಪಾಪಸಮ್ಭವಾ॥

೩೧೧.

ಲೋಭೋ ಚ ಲೋಭಮೂಲೇಸು, ದಿಟ್ಠಿಯುತ್ತೇಸು ದಿಟ್ಠಿ ಚ।

ಮಾನೋ ದಿಟ್ಠಿವಿಯುತ್ತೇಸು, ದಿಟ್ಠಿಮಾನಾ ನ ಚೇಕತೋ॥

೩೧೨.

ದೋಸಮೂಲೇಸು ದೋಸೋ ಚ, ಇಸ್ಸಾ ಮಚ್ಛರಿಯಂ ತಥಾ।

ಕುಕ್ಕುಚ್ಚಮಿತಿ ಚತ್ತಾರೋ, ವಿಚಿಕಿಚ್ಛಾ ತು ಕಙ್ಖಿತೇ॥

೩೧೩.

ಸಹೇವ ಥಿನಮಿದ್ಧಂ ತು, ಸಸಙ್ಖಾರೇಸು ಪಞ್ಚಸು।

ಇತಿ ಚುದ್ದಸ ಸಾವಜ್ಜಾ, ಸಾವಜ್ಜೇಸ್ವೇವ ನಿಚ್ಛಿತಾ॥

೩೧೪.

ಮಾನೋ ಚ ಥಿನಮಿದ್ಧಞ್ಚ, ಸಹ ವಾಥ ವಿಸುಂ ನ ವಾ।

ಇಸ್ಸಾಮಚ್ಛೇರಕುಕ್ಕುಚ್ಚಾ, ಅಞ್ಞಮಞ್ಞಂ ವಿಸುಂ ನ ವಾತಿ॥

ಇತಿ ಚೇತಸಿಕವಿಭಾಗೇ ಚೇತಸಿಕಸಮ್ಪಯೋಗಕಥಾ ನಿಟ್ಠಿತಾ।

ಅಟ್ಠಮೋ ಪರಿಚ್ಛೇದೋ।