ದ್ವಾದಸಮೋ ಪರಿಚ್ಛೇದೋ

೧೨. ರಾಸಿವಿನಿಚ್ಛಯಕಥಾ

೪೧೬.

ತತ್ಥ ವಿಞ್ಞಾಣಕಾಯಾ ಛ, ಸತ್ತ ವಿಞ್ಞಾಣಧಾತುಯೋ।

ಫಸ್ಸಾ ಚಕ್ಖಾದಿಸಮ್ಫಸ್ಸಾ, ಛಬ್ಬಿಧಾ ಸತ್ತಧಾಪಿ ಚ॥

೪೧೭.

ಚಕ್ಖುಸಮ್ಫಸ್ಸಜಾದೀಹಿ , ಭೇದೇಹಿ ಪನ ವೇದನಾ।

ಸಞ್ಞಾ ಚ ಚೇತನಾ ಚೇವ, ಭಿನ್ನಾ ಛಧಾ ಚ ಸತ್ತಧಾ॥

೪೧೮.

ಚಿತ್ತುಪ್ಪಾದೇಸು ಧಮ್ಮಾ ಚ, ಖನ್ಧಾಯತನಧಾತುಯೋ।

ಆಹಾರಾ ಚ ಯಥಾಯೋಗಂ, ಫಸ್ಸಪಞ್ಚಕರಾಸಿಯಂ॥

೪೧೯.

ಸಬ್ಬೇ ಸಙ್ಗಹಿತಾ ಹೋನ್ತಿ, ತಸ್ಮಾ ನಾಮಪರಿಗ್ಗಹೋ।

ಮೂಲರಾಸಿ ಚ ಸೋ ಸಬ್ಬ-ಸಙ್ಗಹೋತಿ ಪವುಚ್ಚತಿ॥

೪೨೦.

ಝಾನರಾಸಿಮ್ಹಿ ಪಞ್ಚೇವ, ಧಮ್ಮಾ ಸತ್ತಪ್ಪಭೇದತೋ।

ಇನ್ದ್ರಿಯಾನಿ ಚ ಬಾವೀಸ, ಧಮ್ಮತೋ ಪನ ಸೋಳಸ॥

೪೨೧.

ನವ ಮಗ್ಗಙ್ಗಧಮ್ಮಾ ಚ, ಭಿನ್ನಾ ದ್ವಾದಸಧಾಪಿ ತೇ।

ಛಳೇವ ಹೇತುಯೋ ತತ್ಥ, ದೇಸಿತಾ ಕಙ್ಖಿತುದ್ಧವಾ॥

೪೨೨.

ದಸ ಕಮ್ಮಪಥಾ ಧಮ್ಮಾ, ಛಳೇವ ಪನ ದೇಸಿತಾ।

ಸೇಸಾವ ದಸಧಮ್ಮೇಹಿ, ಸಮಾನಾ ಚತುರಾಸಯೋ॥

೪೨೩.

ಪಞ್ಞಾ ದಸವಿಧಾ ತತ್ಥ, ವೇದನಾ ನವಧಾ ಠಿತಾ।

ಸಮಾಧಿ ಸತ್ತಧಾ ಹೋತಿ, ವೀರಿಯಂ ಪನ ಪಞ್ಚಧಾ॥

೪೨೪.

ಸತಿ ಭಿನ್ನಾ ಚತುಧಾವ, ವಿತಕ್ಕೋ ತಿವಿಧೋ ಮತೋ।

ದ್ವಿಧಾ ಚಿತ್ತಾದಯೋ ಹೋನ್ತಿ, ದಸಪಞ್ಚೇವ ಸಮ್ಭವಾ॥

೪೨೫.

ಸೇಸಾ ದ್ವತ್ತಿಂಸ ಸಬ್ಬೇಪಿ, ಧಮ್ಮಾ ಏಕೇಕಧಾಪಿ ಚ।

ಹಿತ್ವಾ ರೂಪಿನ್ದ್ರಿಯಾನೇತೇ, ವಿಭಾಗಾ ಅಟ್ಠಧಾ ಕಥಂ॥

೪೨೬.

ಫಸ್ಸೋ ಚ ಚೇತನಾ ಸಞ್ಞಾ, ವಿಚಾರೋ ಪೀತಿ ಜೀವಿತಂ।

ನಿರವಜ್ಜಾ ಛ ಯುಗಳಾ, ಸಾವಜ್ಜಮೋಹಕಙ್ಖಿತಾ॥

೪೨೭.

ಯೇವಾಪನಕಧಮ್ಮಾ ಚ, ವಿರತುದ್ಧಚ್ಚವಜ್ಜಿತಾ।

ದ್ವಾದಸಾ ಚೇತಿ ಸಬ್ಬೇಪಿ, ದ್ವತ್ತಿಂಸಕೇಕಧಾ ತಥಾ॥

೪೨೮.

ಚಿತ್ತಂ ಮನಿನ್ದ್ರಿಯಂ ಚಿತ್ತಂ, ಸದ್ಧಾ ಸದ್ಧಿನ್ದ್ರಿಯಂ ಬಲಂ।

ಬಲೇಸು ಲೋಕಿಯಾ ವುತ್ತಾ, ಲೋಕಿಯೇ ಚ ದುಕದ್ವಯೇ॥

೪೨೯.

ಲೋಭಾಲೋಭಾದಿಕಾ ದ್ವೇ ದ್ವೇ,

ಚತ್ತಾರೋ ಹೇತುರಾಸಿಯಂ।

ಮಿಚ್ಛಾದಿಟ್ಠಿ ಚ ಮಗ್ಗಙ್ಗೇ,

ಪಞ್ಚಕಮ್ಮಪಥೇಪಿ ತೇ॥

೪೩೦.

ಯೇವಾಪನಕರಾಸಿಮ್ಹಿ, ದೇಸಿತಾ ವಿರತುದ್ಧವಾ।

ಮಗ್ಗಹೇತೂಸು ಚೇವೇತಿ, ದ್ವಿಧಾ ಪಞ್ಚದಸ ಠಿತಾ॥

೪೩೧.

ವಿತಕ್ಕೋ ಝಾನಮಗ್ಗೇಸು, ತಿವಿಧಾ ನವಧಾ ಪನ।

ವೇದನಾ ಮೂಲರಾಸಿಮ್ಹಿ, ತಥಾ ಝಾನಿನ್ದ್ರಿಯೇಸು ಚ॥

೪೩೨.

ಇನ್ದ್ರಿಯಮಗ್ಗರಾಸಿಮ್ಹಿ, ಬಲಪಿಟ್ಠಿದುಕತ್ತಿಕೇ।

ಚತುಧಾ ಸತಿ ತತ್ಥೇವ, ವೀರಿಯಮ್ಪಿ ಚ ಪಞ್ಚಧಾ॥

೪೩೩.

ಸಮಾಧಿ ಸತ್ತಧಾ ವುತ್ತೋ, ಝಾನಙ್ಗೇಸು ಚ ತತ್ಥ ಚ।

ತತ್ಥೇವ ದಸಧಾ ಪಞ್ಞಾ, ಹೇತುಕಮ್ಮಪಥೇಸು ಚ॥

೪೩೪.

ದಸನವಸತ್ತಪಞ್ಚಚತುತಿದ್ವೇಕಧಾ ಠಿತಾ।

ಛಳೇಕಕಾ ಪಞ್ಚದಸ, ದ್ವತ್ತಿಂಸ ಚ ಯಥಾಕ್ಕಮಂ॥

೪೩೫.

ಅಟ್ಠ ವಿಭಾಗಸಙ್ಖೇಪಾ, ಪದಾನಿ ದಸಧಾ ಸಿಯುಂ।

ತೇಪಞ್ಞಾಸೇವ ಧಮ್ಮಾ ಚ, ಅಟ್ಠಾರಸ ಚ ರಾಸಯೋ॥

೪೩೬.

ಇತಿ ಧಮ್ಮವವತ್ಥಾನೇ, ಧಮ್ಮಸಙ್ಗಣಿಯಂ ಪನ।

ಚಿತ್ತುಪ್ಪಾದಪರಿಚ್ಛೇದೇ, ಉದ್ದೇಸನಯಸಙ್ಗಹೋ॥

೪೩೭.

ಪದಾನಿ ಚತುರಾಸೀತಿ, ದೇಸಿತಾನಿ ಸರೂಪತೋ।

ಯೇವಾಪನಕನಾಮೇನ, ಸೋಳಸೇವ ಯಥಾರಹಂ॥

೪೩೮.

ತತ್ಥಾನಿಯತನಾಮಾನಿ, ಪದಾನೇಕಾದಸೇವ ತು।

ವುತ್ತಾನೇಕೂನನವುತಿ, ನಿಯತಾನೇವ ಸಮ್ಭವಾ॥

೪೩೯.

ಅಸಮ್ಭಿನ್ನಪದಾನೇತ್ಥ, ತೇಪಞ್ಞಾಸೇವ ಸಬ್ಬಥಾ।

ಚಿತ್ತಚೇತಸಿಕಾನಂ ತು, ವಸೇನ ಪರಿದೀಪಯೇ॥

೪೪೦.

ವಿಭಾಗಪದಧಮ್ಮಾನಂ , ವಸೇನೇವಂ ಪಕಾಸಿತೋ।

ಚಿತ್ತಚೇತಸಿಕಾನಂ ತು, ಕಮತೋ ರಾಸಿನಿಚ್ಛಯೋತಿ॥

ಇತಿ ಚೇತಸಿಕವಿಭಾಗೇ ರಾಸಿವಿನಿಚ್ಛಯಕಥಾ ನಿಟ್ಠಿತಾ।

ದ್ವಾದಸಮೋ ಪರಿಚ್ಛೇದೋ।