ಪನ್ನರಸಮೋ ಪರಿಚ್ಛೇದೋ

೧೫. ರಾಸಿಸಙ್ಗಹಕಥಾ

೫೧೩.

ತೇತ್ತಿಂಸ ಚೇವ ದ್ವತ್ತಿಂಸ, ಏಕತಿಂಸ ಚ ತಿಂಸ ಚ।

ಏಕದ್ವತ್ತಿಂಸಹೀನಾ ಚ, ತಿಂಸ ಧಮ್ಮಾನವಜ್ಜಕೇ॥

೫೧೪.

ದಸ ಧಮ್ಮಾ ತು ಸಾವಜ್ಜೇ, ಛಪಞ್ಚಚತುರಾಧಿಕಾ।

ಏಕಾದಸ ದಸ ನವ, ಸತ್ತಧಾಹೇತುಕೇ ಪನ॥

೫೧೫.

ಇತ್ಥಂ ಚುದ್ದಸಧಾ ಭಿನ್ನಾ, ಕೋಟ್ಠಾಸಾ ತು ಸರೂಪತೋ।

ವಿಭತ್ತಾ ತೇಹಿ ಯುತ್ತಾ ಚ, ಚಿತ್ತುಪ್ಪಾದಾ ಯಥಾಕ್ಕಮಂ॥

೫೧೬.

ತಿಕಟ್ಠಕಾ ಪಞ್ಚವೀಸ, ದಸ ಪಞ್ಚಾಧಿಕಾ ನವ।

ಅಟ್ಠಾರಸೇತಿ ಸತ್ತೇತೇ, ಅನವಜ್ಜಾ ತಥೇತರೇ॥

೫೧೭.

ದ್ವೇ ಚತ್ತಾರೋ ಛಳೇಕಂ ದ್ವೇ,

ಪಞ್ಚಾಥ ದಸಧಾಪರೇ।

ಸಾವಜ್ಜಾಹೇತುಕಾ ಚೇತಿ,

ಕೋಟ್ಠಾಸಾ ಹೋನ್ತಿ ಚುದ್ದಸ॥

೫೧೮.

ನವ ಚಾಪಿ ಛ ಚತ್ತಾರೋ, ಚತುಪಞ್ಚಛಸತ್ತಕಾ।

ನವ ದ್ವೇ ದ್ವೇ ತಥೇಕೋ ಚ, ಯೇವಾಪನಕಸಙ್ಗಹಾ॥

೫೧೯.

ತೇಹಿ ಯುತ್ತಾ ಪನಟ್ಠಾಥ, ವೀಸೇಕತಿಂಸ ಮಾನಸಾ।

ದ್ವೇ ದ್ವೇ ದ್ವೇ ತೀಣಿ ಚೇಕಂ ದ್ವೇ, ಅಟ್ಠ ದಸ ಯಥಾಕ್ಕಮಂ॥

೫೨೦.

ಸತ್ತತಿಂಸಕತೋ ಯಾವ, ಏಕತಿಂಸಾನವಜ್ಜಕೇ।

ತಿಕಟ್ಠಕಾದಿಕೇ ಸತ್ತ, ಠಿತಾ ನಿಯತಸಙ್ಗಹಾ॥

೫೨೧.

ಪಾಪೇಸು ವೀಸ ಚೇಕೂನ-ವೀಸಟ್ಠಾರಸ ಸೋಳಸ।

ಚತುಧಾ ದ್ವೀಸು ಚತೂಸು, ಚತೂಸು ದ್ವೀಸು ಚಟ್ಠಿತಾ॥

೫೨೨.

ಏಕದ್ವಿಪಞ್ಚದಸಸು, ಚ ದ್ವಿಧಾಹೇತುಕೇಸು ಚ।

ತಿಕದ್ವೇಕಾಧಿಕಾ ಧಮ್ಮಾ, ದಸಟ್ಠ ಚ ಯಥಾಕ್ಕಮಂ॥

೫೨೩.

ಪಞ್ಚದ್ವೇಕದ್ವಿಭಿಪಞ್ಚ, ಕೋಟ್ಠಾಸಾ ನಿಯತಾ ಠಿತಾ।

ತೇಹಿ ಯುತ್ತಾ ಪನಟ್ಠಾಥ, ವೀಸ ದ್ವೇ ದ್ವೇ ತಿಕೇಕಕಾ॥

೫೨೪.

ಪುಬ್ಬಾಪರದ್ವಯಾಪುಞ್ಞೇ, ಕಾಮಪಾಕೇ ಅಹೇತುಕೇ।

ಪಞ್ಚಮಾನುತ್ತರಾರುಪ್ಪೇ, ನತ್ಥಾನಿಯತಸಮ್ಭವೋ॥

೫೨೫.

ಛತ್ತಿಂಸಮಾನಸೇಸ್ವೇವ, ಲಬ್ಭನ್ತಾನಿಯತಾ ನ ವಾ।

ತೇಪಞ್ಞಾಸಾವಸೇಸಾ ತು, ಸಬ್ಬೇ ನಿಯತಯೋಗಿನೋ॥

೫೨೬.

ನಿಯತಾನಿಯತೇ ಕತ್ವಾ, ಲಬ್ಭನ್ತೋಭಯಥಾ ತಥಾ।

ಸರೂಪಯೇವೋಭಯಕಾ, ತಿವಿಧೇವಂ ತು ಸಙ್ಗಹಾ॥

೫೨೭.

ಞೇಯ್ಯಾ ವುತ್ತಾನುಸಾರೇನ, ತೇಹಿ ಯುತ್ತಾವ ಮಾನಸಾ।

ತತೋ ಪುನ ವಿಭಾವೇಯ್ಯ, ಸಬ್ಬಸಙ್ಗಾಹಿಕಂ ನಯಂ॥

೫೨೮.

ಏಕೂನತಾಲೀಸಕತೋ, ಯಾವೇಕತ್ತಿಂಸಕಾ ಠಿತಾ।

ನವಧಾ ಅನವಜ್ಜೇಸು, ತೇಹಿ ಯುತ್ತಾ ಚ ಮಾನಸಾ॥

೫೨೯.

ದ್ವೇ ಚತ್ತಾರೋ ದಸೇವಾಥ, ತಿಕಪಞ್ಚಾಧಿಕಾ ದಸ।

ತೇವೀಸ ಕಮತೋ ಸತ್ತ, ದ್ವೇ ಚ ಪಞ್ಚದಸಾಪರೇ॥

೫೩೦.

ದ್ವೇ ಚ ದ್ವೇ ತಿಕದ್ವೇ ದ್ವೇಕಾ, ಸಾವಜ್ಜೇಸು ಚ ಸೋಳಸ।

ಏಕೂನವೀಸ ವೀಸಾಥ, ವೀಸೇಕದ್ವಿತಯಾಧಿಕಾ॥

೫೩೧.

ಅಹೇತುಕೇ ಪನಟ್ಠಾಥ, ದಸೇಕದ್ವಿತಯಾಧಿಕಾ।

ದಸಪಞ್ಚ ದ್ವಿಕೇಕಾತಿ, ಭವನ್ತೇಕೂನವೀಸತಿ॥

೫೩೨.

ಲಬ್ಭಮಾನಾನುಸಾರೇನ, ಧಮ್ಮಾನಂ ಪನ ಸಙ್ಗಹೋ।

ಸಕ್ಕಾ ವುತ್ತನಯೇನೇವ, ವಿಞ್ಞಾತುಂ ಪನ ವಿಞ್ಞುನಾತಿ॥

ಇತಿ ಚೇತಸಿಕವಿಭಾಗೇ ರಾಸಿಸಙ್ಗಹಕಥಾ ನಿಟ್ಠಿತಾ।

ಪನ್ನರಸಮೋ ಪರಿಚ್ಛೇದೋ।