ಏಕೂನತಿಂಸತಿಮೋ ಪರಿಚ್ಛೇದೋ

೨೯. ನಾಮಪಞ್ಞತ್ತಿಕಥಾ

೧೧೧೪.

ನಾಮವೋಹಾರಸಙ್ಕೇತಕಾರಣೋಪನಿಬನ್ಧನಾ।

ಯಥಾವುತ್ತತ್ಥಸದ್ದಾನಂ, ಅನ್ತರಾ ಚಿನ್ತನಾ ಗತಾ॥

೧೧೧೫.

ನಾಮಪಞ್ಞತ್ತಿ ನಾಮಾಯಂ, ಅತ್ಥಸದ್ದವಿನಿಸ್ಸಟಾ।

ತಂದ್ವಯಾಬದ್ಧಸಙ್ಕೇತಞೇಯ್ಯಾಕಾರೋಪಲಕ್ಖಿತಾ॥

೧೧೧೬.

ಯಾ ಗಯ್ಹತಿ ನಾಮಘೋಸಗೋಚರುಪ್ಪನ್ನವೀಥಿಯಾ।

ಪವತ್ತಾನನ್ತರುಪ್ಪನ್ನ-ಮನೋದ್ವಾರಿಕವೀಥಿಯಾ॥

೧೧೧೭.

ಮಞ್ಚಪೀಠಾದಿಸದ್ದಂ ಹಿ, ಸೋತವಿಞ್ಞಾಣವೀಥಿಯಾ।

ಸುತ್ವಾ ತಮೇವ ಚಿನ್ತೇತ್ವಾ, ಮನೋದ್ವಾರಿಕವೀಥಿಯಾ॥

೧೧೧೮.

ತತೋ ಸಙ್ಕೇತನಿಪ್ಫನ್ನಂ, ನಾಮಂ ಚಿನ್ತಾಯ ಗಯ್ಹತಿ।

ನಾಮಪಞ್ಞತ್ತಿಅತ್ಥಾ ತು, ತತೋ ಗಯ್ಹನ್ತಿ ಸಮ್ಭವಾ॥

೧೧೧೯.

ಸದ್ದನಾಮತ್ಥಪಞ್ಞತ್ತಿಪರಮತ್ಥವಸೇನ ಹಿ।

ಚತುಧಾ ತಿವಿಧಾ ವಾಥ, ಚಿನ್ತನಾ ತತ್ಥ ಇಚ್ಛಿತಾ॥

೧೧೨೦.

ಇತ್ಥಮಟ್ಠಕಥಾಮಗ್ಗಂ, ವಣ್ಣೇನ್ತೇನ ಹಿ ದಸ್ಸಿತೋ।

ನಯೋ ಆಚರಿಯೇನೇತಿ, ವಿಭಾಗೋಯಂ ಪಕಾಸಿತೋ॥

೧೧೨೧.

ನತ್ಥಞ್ಞಾ ಕಾಚಿ ವಿಞ್ಞತ್ತಿ, ವಿಕಾರಸಹಿತೋ ಪನ।

ಸದ್ದೋವ ನಾಮಪಞ್ಞತ್ತಿ, ಇಚ್ಚೇಕಚ್ಚೇಹಿ ವಣ್ಣಿತಂ॥

೧೧೨೨.

ತದೇತಂ ನಾಮಪಞ್ಞತ್ತಿಭಾವೇನೇಕವಿಧಮ್ಪಿ ಚ।

ನೇರುತ್ತಿಕಯಾದಿಚ್ಛಕವಸಾ ನಾಮಂ ದ್ವಿಧಾ ಭವೇ॥

೧೧೨೩.

ಸಞ್ಞಾಸು ಧಾತುರೂಪಾನಿ, ಪಚ್ಚಯಞ್ಚ ತತೋ ಪರಂ।

ಕತ್ವಾ ವಣ್ಣಾಗಮಾದಿಞ್ಚ, ಸದ್ದಲಕ್ಖಣಸಾಧಿತಂ॥

೧೧೨೪.

ನೇರುತ್ತಿಕಮುದೀರೇನ್ತಿ , ನಾಮಂ ಯಾದಿಚ್ಛಕಂ ಪದಂ।

ಯದಿಚ್ಛಾಯ ಕತಮತ್ತಂ, ಬ್ಯಞ್ಜನತ್ಥವಿವಜ್ಜಿತಂ॥

೧೧೨೫.

ತಿವಿಧಮ್ಪಿ ತದನ್ವತ್ಥಕಾದಿಮಞ್ಚೋಪಚಾರಿಮಂ।

ನಿಬ್ಬಚನತ್ಥಸಾಪೇಕ್ಖಂ, ತತ್ಥಾನ್ವತ್ಥಮುದೀರಿತಂ॥

೧೧೨೬.

ಯದಿಚ್ಛಾಕತಸಙ್ಕೇತಂ, ಕಾದಿಮಞ್ಚೋಪಚಾರಿಮಂ।

ಅತಮ್ಭೂತಸ್ಸ ತಬ್ಭಾವವೋಹಾರೋತಿ ಪವುಚ್ಚತಿ॥

೧೧೨೭.

ತಥಾ ಸಾಮಞ್ಞನಾಮಞ್ಚ, ಗುಣನಾಮಞ್ಚ ಕಿತ್ತಿಮಂ।

ಓಪಪಾತಿಕಮಿಚ್ಚೇವಂ, ನಾಮಂ ಹೋತಿ ಚತುಬ್ಬಿಧಂ॥

೧೧೨೮.

ಮಹಾಜನಸಮ್ಮತಞ್ಚ, ಅನ್ವತ್ಥಞ್ಚೇವ ತಾದಿಸಂ।

ತೀಣಿ ನಾಮಾನಿ ಚನ್ದಾದಿನಾಮಂ ತತ್ಥೋಪಪಾತಿಕಂ॥

೧೧೨೯.

ಯಾದಿಚ್ಛಕಮಾವತ್ಥಿಕಂ, ನೇಮಿತ್ತಕಮಥಾಪರಂ।

ಲಿಙ್ಗಿಕಂ ರುಳ್ಹಿಕಞ್ಚೇತಿ, ನಾಮಂ ಪಞ್ಚವಿಧಂ ಭವೇ॥

೧೧೩೦.

ಯಾದಿಚ್ಛಕಂ ಯಥಾವುಡ್ಢಂ, ವಚ್ಛದಮ್ಮಾದಿಕಂ ಪನ।

ಆವತ್ಥಿಕಂ ನೇಮಿತ್ತಕಂ, ಸೀಲವಾಪಞ್ಞವಾದಿಕಂ॥

೧೧೩೧.

ಲಿಙ್ಗಿಕಂ ದಿಟ್ಠಲಿಙ್ಗಂ ತು, ದಣ್ಡೀಛತ್ತೀತಿಆದಿಕಂ।

ರುಳ್ಹಿಕಂ ಲೇಸಮತ್ತೇನ, ರುಳ್ಹಂ ಗೋಮಹಿಂಸಾದಿಕಂ॥

೧೧೩೨.

ವಿಜ್ಜಮಾನಾವಿಜ್ಜಮಾನ-ಪಞ್ಞತ್ತೋಭಯಮಿಸ್ಸಿತಾ।

ವಿಭತ್ತಾ ನಾಮಪಞ್ಞತ್ತಿ, ಛಬ್ಬಿಧಾ ಹೋತಿ ತತ್ಥ ಹಿ॥

೧೧೩೩.

ವಿಜ್ಜಮಾನಪಞ್ಞತ್ತೀತಿ , ವಿಜ್ಜಮಾನತ್ಥದೀಪಿತಾ।

ವುಚ್ಚತಿ ಖನ್ಧಾಯತನ-ಧಾತುಪಞ್ಚಿನ್ದ್ರಿಯಾದಿಕಾ॥

೧೧೩೪.

ಅವಿಜ್ಜಮಾನಪಞ್ಞತ್ತಿ-ನಾಮಿಕಾ ಪರಮತ್ಥತೋ।

ಅವಿಜ್ಜಮಾನಮಞ್ಚಾದಿ, ಅತ್ಥಪಞ್ಞತ್ತಿದೀಪಿತಾ॥

೧೧೩೫.

ವಿಜ್ಜಮಾನೇನ ಅವಿಜ್ಜ-ಮಾನಪಞ್ಞತ್ತಿನಾಮಿಕಾ।

ತೇವಿಜ್ಜೋ ಛಳಭಿಞ್ಞೋ ಚ, ಸೀಲವಾ ಪಞ್ಞವಾಪಿ ಚ॥

೧೧೩೬.

ಅವಿಜ್ಜಮಾನೇನ ವಿಜ್ಜ-ಮಾನಪಞ್ಞತ್ತಿನಾಮಿಕಾ।

ಇತ್ಥಿರೂಪಂ ಇತ್ಥಿಸದ್ದೋ, ಇತ್ಥಿಚಿತ್ತನ್ತಿಆದಿಕಾ॥

೧೧೩೭.

ವಿಜ್ಜಮಾನೇನ ತು ವಿಜ್ಜ-ಮಾನಪಞ್ಞತ್ತಿನಾಮಿಕಾ।

ಚಕ್ಖುವಿಞ್ಞಾಣಂ ಚ ಚಕ್ಖು-ಸಮ್ಫಸ್ಸೋ ಚೇವಮಾದಿಕಾ॥

೧೧೩೮.

ಅವಿಜ್ಜಮಾನೇನಾವಿಜ್ಜ-ಮಾನಪಞ್ಞತ್ತಿನಾಮಿಕಾ।

ಖತ್ತಿಯಪುತ್ತೋ ಬ್ರಾಹ್ಮಣ-ಪುತ್ತೋ ಇಚ್ಚೇವಮಾದಿಕಾ॥

೧೧೩೯.

ಇತಿ ವುತ್ತಾನುಸಾರೇನ, ನಾಮಪಞ್ಞತ್ತಿಯಾ ಬುಧೋ।

ಸರೂಪಂ ವಿಸಯಞ್ಚೇವ, ವಿಭಾಗಞ್ಚ ವಿಭಾವಯೇ॥

೧೧೪೦.

ಇಚ್ಚೇವಂ ಪರಮತ್ಥಾ ಚ, ಯಥಾವುತ್ತಾ ಚತುಬ್ಬಿಧಾ।

ಪಞ್ಞತ್ತಿ ದುವಿಧಾ ಚೇತಿ, ಞೇಯ್ಯತ್ಥಾ ಛಬ್ಬಿಧಾ ಮತಾತಿ॥

ಇತಿ ಪಞ್ಞತ್ತಿವಿಭಾಗೇ ನಾಮಪಞ್ಞತ್ತಿಕಥಾ ನಿಟ್ಠಿತಾ।

ಏಕೂನತಿಂಸತಿಮೋ ಪರಿಚ್ಛೇದೋ।

ನಿಟ್ಠಿತೋ ಚ ಸಬ್ಬಥಾಪಿ ಪಞ್ಞತ್ತಿವಿಭಾಗೋ।

ನಿಗಮನಕಥಾ

೧೧೪೧.

ಸೇಟ್ಠೇ ಕಞ್ಚಿವರೇ ರಟ್ಠೇ, ಕಾವೇರಿನಗರೇ ವರೇ।

ಕುಲೇ ಸಞ್ಜಾತಭೂತೇನ, ಬಹುಸ್ಸುತೇನ ಞಾಣಿನಾ॥

೧೧೪೨.

ಅನುರುದ್ಧೇನ ಥೇರೇನ, ಅನಿರುದ್ಧಯಸಸ್ಸಿನಾ।

ತಮ್ಬರಟ್ಠೇ ವಸನ್ತೇನ, ನಗರೇ ತಞ್ಜನಾಮಕೇ॥

೧೧೪೩.

ತತ್ಥ ಸಙ್ಘವಿಸಿಟ್ಠೇನ, ಯಾಚಿತೇನ ಅನಾಕುಲಂ।

ಮಹಾವಿಹಾರವಾಸೀನಂ, ವಾಚನಾಮಗ್ಗನಿಸ್ಸಿತಂ॥

೧೧೪೪.

ಪರಮತ್ಥಂ ಪಕಾಸೇನ್ತಂ, ಪರಮತ್ಥವಿನಿಚ್ಛಯಂ।

ಪಕರಣಂ ಕತಂ ತೇನ, ಪರಮತ್ಥತ್ಥವೇದಿನಾತಿ॥

ಇತಿ ಅನುರುದ್ಧಾಚರಿಯೇನ ರಚಿತೋ

ಪರಮತ್ಥವಿನಿಚ್ಛಯೋ ನಿಟ್ಠಿತೋ।

॥ ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥