೨೦. ವೀಸತಿಮೋ ಪರಿಚ್ಛೇದೋ
ಮಗ್ಗಾಮಗ್ಗಞಾಣದಸ್ಸನವಿಸುದ್ಧಿನಿದ್ದೇಸವಣ್ಣನಾ
೧೨೬೪. ಪಚ್ಚುಪ್ಪನ್ನಸ್ಸ ಧಮ್ಮಸ್ಸಾತಿ ಪಚ್ಚುಪ್ಪನ್ನಸ್ಸ ನಾಮರೂಪಧಮ್ಮಸ್ಸ।
೧೨೬೬-೮. ಉಪ್ಪಜ್ಜತೋ ಉಪ್ಪಜ್ಜನ್ತಸ್ಸ ನಾಮರೂಪಧಮ್ಮಸ್ಸ ರಾಸಿತೋ ನಿಚಯತೋ ಆಗಮನಞ್ಚ ನತ್ಥಿ। ದಿಸಾಗಮನನ್ತಿ ದಿಸಾಯ ಗಮನಂ ನಿರುದ್ಧಸ್ಸಾಪಿ ನಾಮರೂಪಧಮ್ಮಸ್ಸ ಏಕಸ್ಮಿಂ ಠಾನೇ ನಿಚಯೋತಿ ಚ ನತ್ಥಿ।
೧೨೭೦-೧. ಅವಿಜ್ಜಾಸಮುದಯಾ ರೂಪಸಮುದಯೋ, ಅವಿಜ್ಜಾನಿರೋಧಾ ರೂಪನಿರೋಧೋ। ತಣ್ಹಾಸಮುದಯಾ ರೂಪಸಮುದಯೋ, ತಣ್ಹಾನಿರೋಧಾ ರೂಪನಿರೋಧೋ। ಕಮ್ಮಸಮುದಯಾ ರೂಪಸಮುದಯೋ, ಕಮ್ಮನಿರೋಧಾ ರೂಪನಿರೋಧೋ। ಆಹಾರನಿರೋಧಾ ರೂಪನಿರೋಧೋ। ಧಮ್ಮೇತಿ ಸಙ್ಖಾರಧಮ್ಮೇ।
೧೨೮೦. ಸಮ್ಪತ್ತಪಟಿವೇಧಸ್ಸಾತಿ ಸಮ್ಪತ್ತಲೋಕುತ್ತರಸಙ್ಖಾತಮಗ್ಗಫಲಸ್ಸ ಸೋತಾಪನ್ನಾದಿಪುಗ್ಗಲಸ್ಸ। ವಿಪ್ಪಟಿಪನ್ನಸ್ಸಾತಿ ಪಟಿಪತ್ತಿಯಂ ಅಪ್ಪಟಿಪನ್ನಸ್ಸ, ವಿರುದ್ಧವಸೇನ ಪಟಿಪನ್ನಸ್ಸ ವಾ।
೧೨೮೬. ಕಾಯಚಿತ್ತಾನೀತಿ ಕಾಯಾತಿ ವೇದನಾಸಞ್ಞಾಸಙ್ಖಾರಾ। ಚಿತ್ತನ್ತಿ ವಿಞ್ಞಾಣಂ।
೧೨೯೦. ಯತೋ ಯತೋ ಪಚ್ಚಯಾದಿತೋ। ಯಂ ಅಮತಂ ನಿಬ್ಬಾನಂ ವಿಜಾನತಂ ವಿಜಾನನ್ತಾನಂ ಪೀತಿಪಾಮೋಜ್ಜಂ, ತೇಹಿ ಲಭಿತಬ್ಬಂ ಅಮತಂ, ಅಮತಂ ವಿಯ ಪೀತಿಪಾಮೋಜ್ಜಂ ವಾ।
೧೨೯೩. ಅಪ್ಪತ್ತೇತಿ ಅತ್ತನಿ ಮಗ್ಗಫಲಸ್ಮಿಂ ಅಪ್ಪತ್ತೇ। ಪತ್ತಸಞ್ಞೀತಿ ಮಗ್ಗಫಲೇ ಅಹಂ ಪತ್ತೋ ಅಸ್ಮಿ ಇತಿ ಸಞ್ಞಿತೋ ಹೋತಿ।
೧೨೯೭. ಸಾರವೇದಿನೋತಿ ಸಾರಜಾನನಸೀಲಾ। ತನ್ತಿ ತಂ ಮಗ್ಗಾಮಗ್ಗಞಾಣದಸ್ಸನಂ। ಇದಂ ಞಾಣಂ ಮಗ್ಗಾಮಗ್ಗಞಾಣದಸ್ಸನನ್ತಿ ಮಗ್ಗಾಮಗ್ಗಞಾಣದಸ್ಸನಂ ನಾಮ।
ಇತಿ ಅಭಿಧಮ್ಮಾವತಾರಟೀಕಾಯ
ಮಗ್ಗಾಮಗ್ಗಞಾಣದಸ್ಸನವಿಸುದ್ಧಿನಿದ್ದೇಸವಣ್ಣನಾ ನಿಟ್ಠಿತಾ।
ವೀಸತಿಮೋ ಪರಿಚ್ಛೇದೋ।