೨೩. ತೇವೀಸತಿಮೋ ಪರಿಚ್ಛೇದೋ

ಕಿಲೇಸಪಹಾನನಿದ್ದೇಸವಣ್ಣನಾ

೧೩೭೫. ಇಧ ಪನ ಇಮಸ್ಮಿಂ ಪನಾಧಿಕಾರೇ ಕಾರಣೂಪಚಾರೇನ ಲಾಭಾದಿಕಾರಣಸ್ಸ ವೋಹಾರೇನ, ಲಾಭೋ ಆದಿ ವತ್ಥು ಯಸ್ಸ ಅನುನಯಸ್ಸಾತಿ ಲಾಭಾದಿವತ್ಥುಕೋ, ತಸ್ಸ।

ಸುಖುಮಾತಿ ಕಾಮರಾಗಪಟಿಘಾ ಸುಖುಮಾ।

೧೩೭೬. ಯೇನ ಯೇನ ಪಠಮಮಗ್ಗಾದಿಞಾಣೇನ ಯೋ ಯೋ ಸಂಯೋಜನಾದಿಕೋ ಪಹಾತಬ್ಬೋ ಧಮ್ಮೋ ಘಾತಂ ವಿನಾಸಂ ಯಾತಿ, ಸೋ ಸೋ ಧಮ್ಮೋ ತೇನ ತೇನ ಅಸೇಸೇನ ಞಾಣೇನ ಏವಂ ಸಾಧು ಮಯಾ ಸನ್ದಸ್ಸಿತೋ।

೧೩೮೩. ಪರಿಞ್ಞಾಭಿಸಮಯೇನಾತಿ ಪರಿಚ್ಛಿನ್ದಿತ್ವಾ ಜಾನನೇನ। ದುಕ್ಖಂ ಅಭಿಸಮೇತೀತಿ ದುಕ್ಖಂ ಪಟಿವಿಜ್ಝತಿ।

೧೩೯೪. ಯೋ ಯೋಗೀ ಇಮಂ ವಿದಿತ್ವಾ ಹಿತಭಾವನಂ ವನಂ ವನೇತಬ್ಬಂ ವಿದಿತ್ವಾ ಜಾನಿತ್ವಾ ವೇ ಏಕನ್ತೇನ ಸುಖಸಂಹಿತಂ ಹಿತಂ ಉಪೇತಿ, ಚಿತ್ತಸ್ಸ ತಮಂ ಅನುತ್ತಮಂ ಹೀನಂ ವಿಧೂಯ ವಿನಾಸೇತ್ವಾ ಅವಿಗ್ಗಹಕಮ್ಪದಂ ಪದಂ ಅವಿಗ್ಗಹಕಂ ಸರೀರರಹಿತಂ ಪದಂ ಪಟಿಪಜ್ಜಿತಬ್ಬಂ ಞಾತಬ್ಬಂ ಪದಂ ನಿಬ್ಬಾನಂ ಉಪೇತಿ ಪಾಪುಣಾತಿ ಚ।

ಇತಿ ಅಭಿಧಮ್ಮಾವತಾರಟೀಕಾಯ

ಕಿಲೇಸಪಹಾನನಿದ್ದೇಸವಣ್ಣನಾ ನಿಟ್ಠಿತಾ।

ತೇವೀಸತಿಮೋ ಪರಿಚ್ಛೇದೋ।