ಜೇತವನವಾಸಿನಿಕಾಯುಪ್ಪತ್ತಿ
ಪುನಪಿ ರಾಜಾ ದಕ್ಖಿಣಾರಾಮವಾಸಿಮ್ಹಿ ಜಿಮ್ಹಮಾನಸೇ ಕುಹಕತಿಸ್ಸತ್ಥೇರೇ ಪಸನ್ನೋ ಹುತ್ವಾ ತಸ್ಸತ್ಥಾಯ ಮಹಾವಿಹಾರಸೀಮಬ್ಭನ್ತರೇ ಜೋತಿವನುಯ್ಯಾನೇ ಜೇತವನವಿಹಾರಂ ಕಾರೇತುಮಾರಭಿ। ಮಹಾವಿಹಾರವಾಸಿನೋ ಭಿಕ್ಖೂ ತಂ ನಿವಾರೇತುಂ ಅಸಕ್ಕೋನ್ತಾ ಪುನಪಿ ತತೋ ಅಪಕ್ಕಮಿಂಸು। ತದಾಪಿ ಮಹಾವಿಹಾರೋ ನವ ಮಾಸಾನಿ ಭಿಕ್ಖೂಹಿ ಸುಞ್ಞೋ ಅಹೋಸಿ। ರಾಜಾ ಪನ ಅತ್ತನೋ ಅಜ್ಝಾಸಯವಸೇನೇವ ತತ್ಥ ಜೇತವನವಿಹಾರಂ ಕಾರೇತ್ವಾ ತಸ್ಸ ಕುಹಕತಿಸ್ಸತ್ಥೇರಸ್ಸ ಅದಾಸಿಯೇವ। ತತ್ಥ ದಕ್ಖಿಣಗಿರಿವಿಹಾರತೋ ಸಾಗಲಿಯಾ ಭಿಕ್ಖೂ ಆಗನ್ತ್ವಾ ವಸಿಂಸು। ಪಚ್ಛಾ ಚ ತೇ ಅಮ್ಬಸಾಮಣೇರಸಿಲಾಕಾಲರಞ್ಞೋ ಕಾಲೇ (೧೦೬೭-೧೦೮೦-ಬು-ವ) ವೇತುಲ್ಲವಾದಿನೋ ಅಹೇಸುಂ
ಏವಂ ಆಚರಿಯಬುದ್ಧಘೋಸತ್ಥೇರಸ್ಸ ಸೀಹಳದೀಪಮಾಗಮನಕಾಲತೋ (೯೬೫-ಬು-ವ) ಪುಬ್ಬೇಯೇವ ವಿಸುದ್ಧತ್ಥೇರವಾದೀಹಿ ಮಹಾವಿಹಾರವಾಸೀಹಿ ವಿರುದ್ಧಸಮಯಾ ಅಭಯಗಿರಿವಾಸಿನೋ (೪೫೫-ಬು-ವ) ಸಾಗಲಿಯಾ (೭೯೭-೮೧೦-ಬು-ವ) ಜೇತವನವಾಸಿನೋ (೮೨೯-೮೪೫-ಬು-ವ) ಚಾತಿ ತಯೋ ನಿಕಾಯಾ ಉಪ್ಪನ್ನಾ ಅಹೇಸುಂ। ತೇಸು ಪನ ಅಭಯಗಿರಿವಾಸಿನೋಯೇವ ವಿಸೇಸತೋ ಪಾಕಟಾ ಚೇವ ಹೋನ್ತಿ ಬಲವನ್ತೋ ಚ। ತಥಾ ಹಿ ತೇ ವಿಸುದ್ಧತ್ಥೇರವಾದಪಿಟಕಞ್ಚ ವಜ್ಜಿಪುತ್ತಕಪರಿಯಾಪನ್ನಧಮ್ಮರುಚಿನಿಕಾಯಪಿಟಕಞ್ಚ ಮಹಿಸಾಸಕಾದಿನಿಕಾಯಪಿಟಕಞ್ಚ ಮಹಾಯಾನಪಿಟಕಞ್ಚ ಸಮ್ಪಟಿಚ್ಛನ್ತಿ। ತೇಸು ಧಮ್ಮರುಚಿನಿಕಾಯಪಿಟಕಸ್ಸ ಸಮ್ಪಟಿಚ್ಛಿತಭಾವೋ ಪಾಕಟೋಯೇವ। ಮಹಿಸಾಸಕಾದಿನಿಕಾಯಪಿಟಕಸ್ಸ ಸಮ್ಪಟಿಚ್ಛಿತಭಾವೋ ಪನ ಫಾಹಿಯನ್ನಾಮಸ್ಸ ಚಿನಭಿಕ್ಖುನೋ ಅದ್ಧಾನಕ್ಕಮಸಲ್ಲಕ್ಖಣಕಥಾಯ ಚೇವ ಅಟ್ಠಕಥಾಸು ಪಟಿಕ್ಖಿತ್ತವಣ್ಣಪಿಟಕಾದಿನಾಮವಸೇನ ಚ ವೇದಿತಬ್ಬೋ, ತಥಾ ಮಹಾಯಾನಪಿಟಕಸ್ಸ ಸಮ್ಪಟಿಚ್ಛಿತಭಾವೋಪಿ।