ಕಙ್ಖಾವಿತರಣೀಅಟ್ಠಕಥಾಕರಣಂ

ಕಙ್ಖಾವಿತರಣಿಂ ನಾಮ ಪಾತಿಮೋಕ್ಖಟ್ಠಕಥಂ ಆಚರಿಯಬುದ್ಧಘೋಸತ್ಥೇರೋ ಸೋಣತ್ಥೇರೇನ ಯಾಚಿತೋ ಮಹಾವಿಹಾರವಾಸೀನಂ ವಾಚನಾಮಗ್ಗನಿಸ್ಸಿತಂ ಸೀಹಳಪಾತಿಮೋಕ್ಖಟ್ಠಕಥಾನಯಂ ನಿಸ್ಸಾಯ ಏಕಮ್ಪಿ ಪದಂ ಪಾಳಿಯಾ ವಾ ಮಹಾವಿಹಾರವಾಸೀನಂ ಪೋರಾಣಟ್ಠಕಥಾಹಿ ವಾ ಅವಿರೋಧೇತ್ವಾ ಅಕಾಸಿ। ತೇನ ವುತ್ತಂ ತಿಸ್ಸಂ ಅಟ್ಠಕಥಾಯಂ –

‘‘ಸೂರತೇನ ನಿವಾತೇನ, ಸುಚಿಸಲ್ಲೇಖವುತ್ತಿನಾ।

ವಿನಯಾಚಾರಯುತ್ತೇನ, ಸೋಣತ್ಥೇರೇನ ಯಾಚಿತೋ॥

ತತ್ಥ ಸಞ್ಜಾತಕಙ್ಖಾನಂ, ಭಿಕ್ಖೂನಂ ತಸ್ಸ ವಣ್ಣನಂ।

ಕಙ್ಖಾವಿತರಣತ್ಥಾಯ, ಪರಿಪುಣ್ಣವಿನಿಚ್ಛಯಂ॥

ಮಹಾವಿಹಾರವಾಸೀನಂ, ವಾಚನಾಮಗ್ಗನಿಸ್ಸಿತಂ।

ವತ್ತಯಿಸ್ಸಾಮಿ ನಾಮೇನ, ಕಙ್ಖಾವಿತರಣಿಂ ಸುಭ’’ನ್ತಿ ಕಙ್ಖಾ ಅಟ್ಠ॰ ಗನ್ಥಾರಮ್ಭಕಥಾ ಚ॥

‘‘ಆರಭಿಂ ಯಮಹಂ ಸಬ್ಬಂ, ಸೀಹಳಟ್ಠಕಥಾನಯಂ।

ಮಹಾವಿಹಾರವಾಸೀನಂ, ವಾಚನಾಮಗ್ಗನಿಸ್ಸಿತಂ॥

ನಿಸ್ಸಾಯ ಸಾ ಅಯಂ ನಿಟ್ಠಂ, ಗತಾ ಆದಾಯ ಸಬ್ಬಸೋ।

ಸಬ್ಬಂ ಅಟ್ಠಕಥಾಸಾರಂ, ಪಾಳಿಯತ್ಥಞ್ಚ ಕೇವಲಂ॥

ನ ಹೇತ್ಥ ತಂ ಪದಂ ಅತ್ಥಿ, ಯಂ ವಿರುಜ್ಝೇಯ್ಯ ಪಾಳಿಯಾ।

ಮಹಾವಿಹಾರವಾಸೀನಂ, ಪೋರಾಣಟ್ಠಕಥಾಹಿ ವಾ’’ತಿ ಕಙ್ಖಾ॰ ಅಟ್ಠ॰ ನಿಗಮನಕಥಾ ಚ॥