ಜಾತಕಟ್ಠಕಥಾಕರಣಂ

ಜಾತಕಟ್ಠಕಥಾಪಿ ಚ ಆಚರಿಯಬುದ್ಧಘೋಸತ್ಥೇರೇನೇವ ಕತಾತಿ ವದನ್ತಿ, ಕಾರಣಂ ಪನೇತ್ಥ ನ ದಿಸ್ಸತಿ। ಸಾ ಪನ ಅತ್ಥದಸ್ಸಿತ್ಥೇರೇನ ಚ ಬುದ್ಧಮಿತ್ತತ್ಥೇರೇನ ಚ ಮಹಿಸಾಸಕನಿಕಾಯಿಕೇನ ಚ ಬುದ್ಧದೇವತ್ಥೇರೇನಾತಿ ತೀಹಿ ಥೇರೇಹಿ ಅಭಿಯಾಚಿತೋ ಮಹಾವಿಹಾರವಾಸೀನಂ ವಾಚನಾಮಗ್ಗಂ ನಿಸ್ಸಾಯ ಕತಾ। ಇಮಿಸ್ಸಾಪಿ ನಾಮವಿಸೇಸೋ ನತ್ಥಿ। ವುತ್ತಂ ಹಿಮಿಸ್ಸಾ ಆರಮ್ಭೇ –

‘‘ಬುದ್ಧವಂಸಸ್ಸ ಏತಸ್ಸ, ಇಚ್ಛನ್ತೇನ ಚಿರಟ್ಠಿತಿಂ।

ಯಾಚಿತೋ ಅಭಿಗನ್ತ್ವಾನ, ಥೇರೇನ ಅತ್ಥದಸ್ಸಿನಾ॥

ಅಸಂಸಟ್ಠವಿಹಾರೇನ, ಸದಾ ಸುದ್ಧವಿಹಾರಿನಾ।

ತಥೇವ ಬುದ್ಧಮಿತ್ತೇನ, ಸನ್ತಚಿತ್ತೇನ ವಿಞ್ಞುನಾ॥

ಮಹಿಸಾಸಕವಂಸಮ್ಹಿ, ಸಮ್ಭೂತೇನ ನಯಞ್ಞುನಾ।

ಬುದ್ಧದೇವೇನ ಚ ತಥಾ, ಭಿಕ್ಖುನಾ ಸುದ್ಧಬುದ್ಧಿನಾ॥

ಮಹಾಪುರಿಸಚರಿಯಾನಂ, ಆನುಭಾವಂ ಅಚಿನ್ತಿಯಂ।

ತಸ್ಸ ವಿಜ್ಜೋತಯನ್ತಸ್ಸ, ಜಾತಕಸ್ಸತ್ಥವಣ್ಣನಂ॥

ಮಹಾವಿಹಾರವಾಸೀನಂ, ವಾಚನಾಮಗ್ಗನಿಸ್ಸಿತಂ।

ಭಾಸಿಸ್ಸಂ ಭಾಸತೋ ತಂ ಮೇ, ಸಾಧು ಗಣ್ಹನ್ತು ಸಾಧವೋ’’ತಿ॥

ಏತ್ತಾವತಾ ಚ ಆಚರಿಯಬುದ್ಧಘೋಸತ್ಥೇರಸ್ಸ ಗನ್ಥಭಾವೇನ ಪಾಕಟಾಹಿ ಸಬ್ಬಟ್ಠಕಥಾಹಿ ಸಹ ವಿಸುದ್ಧಿಮಗ್ಗಸ್ಸ ಕರಣಪ್ಪಕಾರೋ ವಿತ್ಥಾರೇನ ವಿಭಾವಿತೋ ಹೋತಿ।