೧೫. ಆಹಾರಪಚ್ಚಯೋ
ದುವಿಧೋ ಆಹಾರಪಚ್ಚಯೋ ರೂಪಾಹಾರಪಚ್ಚಯೋ ಅರೂಪಾಹಾರ ಪಚ್ಚಯೋ।
ತತ್ಥ ರೂಪಾಹಾರಪಚ್ಚಯೋ ನಾಮ ಕಬಳೀಕಾರಾಹಾರಸಙ್ಖಾತಂ ಓಜ ರೂಪಂ ವುಚ್ಚತಿ। ಸೋ ಚ ಅಜ್ಝತ್ತಾಹಾರೋ ಬಹಿದ್ಧಾಹಾರೋತಿ ದುವಿಧೋ। ಕಬಳೀಕಾರಾಹಾರಭಕ್ಖಾನಂ ಸತ್ತಾನಂ ಸಬ್ಬೇಪಿ ಚತುಸಮುಟ್ಠಾನಿಕರೂಪಧಮ್ಮಾ ತಸ್ಸ ದುವಿಧಸ್ಸ ರೂಪಾಹಾರಸ್ಸ ಪಚ್ಚಯುಪ್ಪನ್ನಾ।
ಅರೂಪಾಹಾರೋ ಪನ ತಿವಿಧೋ ಫಸ್ಸಾಹಾರೋ ಮನೋಸಞ್ಚೇತನಾ ಹಾರೋ ವಿಞ್ಞಾಣಾಹಾರೋ ಚ। ತಯೋಪೇತೇ ಧಮ್ಮಾ ಸಹಜಾತಾನಂ ನಾಮರೂಪಧಮ್ಮಾನಂ ಆಹಾರಪಚ್ಚಯೋ ಹೋನ್ತಿ। ಸಹಜಾತಾ ಚ ನಾಮರೂಪ ಧಮ್ಮಾ ತೇಸಂ ಪಚ್ಚಯುಪ್ಪನ್ನಾ।
ಕೇನಟ್ಠೇನ ಆಹಾರೋತಿ। ಭುಸಂ ಹರಣಟ್ಠೇನ ಆಹಾರೋ। ಭುಸಂ ಹರಣಟ್ಠೇನಾತಿಚ ದಳ್ಹಂ ಪವತ್ತಾಪನಟ್ಠೇನ, ಚಿರಕಾಲಂ ಠಿತಿಯಾ ವುಡ್ಢಿಯಾ ವಿರುಳ್ಹಿಯಾ ವೇಪುಲ್ಲಾಯ ಉಪತ್ಥಮ್ಭನಟ್ಠೇನಾತಿ ವುತ್ತಂ ಹೋತಿ। ಜನನಕಿಚ್ಚಯುತ್ತೋಪಿ ಆಹಾರೋ ಉಪತ್ಥಮ್ಭನಕಿಚ್ಚಪ್ಪಧಾನೋ ಹೋತೀತಿ।
ತತ್ಥ ದುವಿಧೋ ರೂಪಾಹಾರೋ ಅಜ್ಝತ್ತಸನ್ತಾನೇ ಚತುಸಮುಟ್ಠಾನಿಕಂ ರೂಪಕಾಯಂ ಉಪಬ್ರೂಹಯನ್ತೋ ಭುಸಂ ಹರತಿ, ದಳ್ಹಂ ಪವತ್ತೇತಿ, ಚಿರಂ ಅದ್ಧಾನಂ ಗಮೇತಿ, ತಂ ತಂ ಆಯುಕಪ್ಪಪರಿಯೋಸಾನಂ ಪಾಪೇತೀತಿ ಆಹಾರೋ।
ಫಸ್ಸಾಹಾರೋ
ಇಧ ಸುತ್ತನ್ತನಯೋಪಿ ವತ್ತಬ್ಬೋ। ಯಥಾ ಸಕುಣಾ ನಾಮ ಚಕ್ಖೂಹಿ ದಿಸಾವಿದಿಸಂ ವಿಭಾವೇತ್ವಾ ಪತ್ತೇಹಿ ರುಕ್ಖತೋ ರುಕ್ಖಂ ವನತೋ ವನಂ ಆಕಾಸೇನ ಪಕ್ಖನ್ದಿತ್ವಾ ತುಣ್ಡಕೇಹಿ ಫಲಾಫಲಾನಿ ತುದಿತ್ವಾ ಯಾವಜೀವಂ ಅತ್ತಾನಂ ಯಾಪೇನ್ತಿ। ತಥಾ ಇಮೇ ಸತ್ತಾ ಛಹಿ ವಿಞ್ಞಾಣೇಹಿ ಆರಮ್ಮಣಾನಿ ವಿಭಾವೇತ್ವಾ ಛಹಿ ಮನೋಸಞ್ಚೇತನಾಹಾರೇಹಿ ಆರಮ್ಮಣವತ್ಥುಪ್ಪಟಿಲಾಭತ್ಥಾಯ ಉಸ್ಸುಕ್ಕನಂ ಕತ್ವಾ ಛಹಿ ಫಸ್ಸಾಹಾರೇಹಿ ಆರಮ್ಮಣೇಸು ರಸಂ ಪಾತುಭವನ್ತಂ ಕತ್ವಾ ಸುಖದುಕ್ಖಂ ಅನುಭವನ್ತಿ। ವಿಞ್ಞಾಣೇಹಿ ವಾ ಆರಮ್ಮಣಾನಿ ವಿಭಾವೇತ್ವಾ ನಾಮರೂಪ ಸಮ್ಪತ್ತಿಂ ಸಾಧೇನ್ತಿ। ಫಸ್ಸೇಹಿ ಆರಮ್ಮಣೇಸು ರಸಂ ಪಾತುಭವನ್ತಂ ಕತ್ವಾ ಆರಮ್ಮಣರಸಾನುಭವನಂ ವೇದನಂ ಸಮ್ಪಾದೇತ್ವಾ ತಣ್ಹಾವೇಪುಲ್ಲಂ ಆಪಜ್ಜನ್ತಿ। ಚೇತನಾಹಿ ತಣ್ಹಾಮೂಲಕಾನಿ ನಾನಾಕಮ್ಮಾನಿ ಪಸವೇತ್ವಾ ಭವತೋ ಭವಂ ಸಂಸರನ್ತಿ। ಏವಂ ಆಹಾರಧಮ್ಮಾನಂ ಮಹನ್ತಂ ಆಹಾರಕಿಚ್ಚಂ ವೇದಿತಬ್ಬನ್ತಿ। ಆಹಾರಪಚ್ಚಯದೀಪನಾ ನಿಟ್ಠಿತಾ।