೬. ಸಹಜಾತಪಚ್ಚಯೋ

ಪಚ್ಚಯಧಮ್ಮವಿಭಾಗೋ ಚ ಪಚ್ಚಯುಪ್ಪನ್ನಧಮ್ಮವಿಭಾಗೋಚ ವುಚ್ಚತಿ। ಏಕತೋ ಉಪ್ಪನ್ನಾ ಸಬ್ಬೇಪಿ ಚಿತ್ತಚೇತಸಿಕಾ ಧಮ್ಮಾ ಅಞ್ಞಮಞ್ಞಂ ಸಹಜಾತ ಪಚ್ಚಯಾ ಚ ಹೋನ್ತಿ ಸಹಜಾತಪಚ್ಚಯುಪ್ಪನ್ನಾ ಚ। ಪಟಿಸನ್ಧಿನಾಮಕ್ಖನ್ಧಾ ಚ ಪಟಿಸನ್ಧಿಸಹಜಾತಂ ಹದಯವತ್ಥು ಚ ಅಞ್ಞಮಞ್ಞಂ ಸಹಜಾತಪಚ್ಚಯಾ ಚ ಹೋನ್ತಿ ಸಹಜಾತಪಚ್ಚಯುಪ್ಪನ್ನಾ ಚ। ಸಬ್ಬಾನಿ ಮಹಾಭೂತಾನಿಪಿ ಅಞ್ಞಮಞ್ಞಂ ಸಹಜಾತಪಚ್ಚಯಾ ಚ ಹೋನ್ತಿ ಪಚ್ಚಯುಪ್ಪನ್ನಧಮ್ಮಾ ಚ। ಪಟಿಸನ್ಧಿಚಿತ್ತಸ್ಸ ಉಪ್ಪಾದಕ್ಖಣೇ ಸಬ್ಬಾನಿ ಕಮ್ಮಜರೂಪಾನಿ ಚ ಪವತ್ತಿಕಾಲೇ ತಸ್ಸ ತಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ತೇನ ತೇನ ಚಿತ್ತೇನ ಜಾತಾನಿ ಸಬ್ಬಾನಿ ಚಿತ್ತಜರೂಪಾನಿ ಚ ಸಹಜಾತಚಿತ್ತಸ್ಸ ಪಚ್ಚಯುಪ್ಪನ್ನಾನಿ ನಾಮ। ಸಬ್ಬಾನಿ ಉಪಾದಾರೂಪಾನಿ ಸಹಜಾತಮಹಾಭೂತಾನಂ ಪಚ್ಚಯುಪ್ಪನ್ನಾನಿ ನಾಮ।

ಕೇನಟ್ಠೇನ ಸಹಜಾತೋ, ಕೇನಟ್ಠೇನ ಪಚ್ಚಯೋ। ಸಹ ಜಾನನಟ್ಠೇನ ಸಹಜಾತೋ, ಉಪಕಾರಕಟ್ಠೇನ ಪಚ್ಚಯೋ। ತತ್ಥ ಸಹಜಾನನಟ್ಠೇನಾತಿ ಯೋ ಧಮ್ಮೋ ಜಾಯಮಾನೋ ಅತ್ತನೋ ಪಚ್ಚಯುಪ್ಪನ್ನೇಹಿ ಧಮ್ಮೇಹಿ ಸಹೇವ ಸಯಞ್ಚ ಜಾಯತಿ ಉಪ್ಪಜ್ಜತಿ, ಅತ್ತನೋ ಪಚ್ಚಯುಪ್ಪನ್ನೇ ಚ ಧಮ್ಮೇ ಅತ್ತನಾ ಸಹೇವ ಜನೇತಿ ಉಪ್ಪಾದೇತಿ, ತಸ್ಸ ಸೋ ಅತ್ಥೋ ಸಹಜಾನನಟ್ಠೋ ನಾಮ।

ಯಥಾ ಸೂರಿಯೋ ನಾಮ ಉದಯನ್ತೋ ಸೂರಿಯಾತಪೇ ಚ ಸೂರಿಯಾ ಲೋಕೇ ಚ ಅತ್ತನಾ ಸಹೇವ ಜನಯನ್ತೋ ಉದೇತಿ। ಯಥಾ ಚ ಪದೀಪೋ ನಾಮ ಜಲನ್ತೋ ಪದೀಪಾತಪೇ ಚ ಪದೀಪಾಲೋಕೇ ಚ ಅತ್ತನಾ ಸಹೇವ ಜನಯನ್ತೋ ಜಲತಿ। ಏವಮೇವಂ ಅಯಂ ಪಚ್ಚಯಧಮ್ಮೋ ಉಪ್ಪಜ್ಜಮಾನೋ ಅತ್ತನೋ ಪಚ್ಚಯುಪ್ಪನ್ನಧಮ್ಮೇ ಅತ್ತನಾ ಸಹೇವ ಉಪ್ಪಾದೇತಿ। ತತ್ಥ ಸೂರಿಯೋ ವಿಯ ಏಕಮೇಕೋ ನಾಮ ಧಮ್ಮೋ, ಸೂರಿಯಾತಪಾ ವಿಯ ತಂಸಮ್ಪಯುತ್ತಧಮ್ಮಾ, ಸೂರಿಯಾಲೋಕಾ ವಿಯ ಸಹಜಾತರೂಪಧಮ್ಮಾ। ತಥಾ ಸೂರಿಯೋ ವಿಯ ಏಕಮೇಕೋ ಮಹಾಭೂತರೂಪಧಮ್ಮೋ, ಸೂರಿಯಾತಪಾ ವಿಯ ಸಹಜಾತಮಹಾಭೂತಧಮ್ಮಾ, ಸೂರಿಯಾಲೋಕಾ ವಿಯ ಸಹಜಾತಉಪಾದಾರೂಪಧಮ್ಮಾ, ಏಸ ನಯೋ ಪದೀಪುಪಮಾಯಪೀತಿ। ಸಹಜಾತಪಚ್ಚಯದೀಪನಾ ನಿಟ್ಠಿತಾ।