೮. ನಿಸ್ಸಯಪಚ್ಚಯೋ

ತಿವಿಧೋ ನಿಸ್ಸಯಪಚ್ಚಯೋ, ಸಹಜಾತನಿಸ್ಸಯೋ ವತ್ಥು ಪುರೇಜಾತನಿಸ್ಸಯೋ ವತ್ಥಾರಮ್ಮಣಪುರೇಜಾತನಿಸ್ಸಯೋ।

ತತ್ಥ ಕತಮೋ ಸಹಜಾತನಿಸ್ಸಯೋ। ಸಬ್ಬೋ ಸಹಜಾತ ಪಚ್ಚಯೋ ಸಹಜಾತನಿಸ್ಸಯೋ। ತಸ್ಮಾ ತತ್ಥ ಪಚ್ಚಯವಿಭಾಗೋ ಚ ಪಚ್ಚಯುಪ್ಪನ್ನವಿಭಾಗೋ ಚ ಸಹಜಾತಪಚ್ಚಯೇ ವುತ್ತನಯೇನ ವೇದಿತಬ್ಬೋ।

ಕತಮೋ ಪನ ವತ್ಥುಪುರೇಜಾತನಿಸ್ಸಯೋ। ಛ ವತ್ಥೂನಿ ಚಕ್ಖು ವತ್ಥು ಸೋತವತ್ಥು ಘಾನವತ್ಥು ಜಿವ್ಹಾವತ್ಥು ಕಾಯವತ್ಥು ಹದಯವತ್ಥು। ಇಮಾನಿ ಛವತ್ಥೂನಿ ಪವತ್ತಿಕಾಲೇ ಸತ್ತಾನಂ ವಿಞ್ಞಾಣಧಾತೂನಂ ವತ್ಥುಪುರೇ ಜಾತನಿಸ್ಸಯೋ।

ವತ್ಥುರೂಪಮೇವ ಪುರೇಜಾತಂ ಹುತ್ವಾ ನಿಸ್ಸಯೋ ವತ್ಥುಪುರೇಜಾತ ನಿಸ್ಸಯೋ। ತತ್ಥ ಚಿತ್ತಚೇತಸಿಕಾನಂ ನಿಸ್ಸಯಟ್ಠಾನಟ್ಠೇನ ವತ್ಥು ನಾಮ। ಪುರೇಜಾತನ್ತಿ ಅತ್ತನೋ ಅತ್ತನೋ ಪಚ್ಚಯುಪ್ಪನ್ನಸ್ಸ ಧಮ್ಮಸ್ಸ ಉಪ್ಪತ್ತಿಕ್ಖಣತೋ ಪುರಿಮೇ ಖಣೇ ಜಾತಂ।

ತತ್ಥ ಪಟಿಸನ್ಧಿಚಿತ್ತಂ ತದಾ ಪುರೇಜಾತಸ್ಸ ವತ್ಥುರೂಪಸ್ಸ ಅಭಾವತೋ ಅತ್ತನಾ ಸಹುಪ್ಪನ್ನಮೇವ ಹದಯವತ್ಥುರೂಪಂ ನಿಸ್ಸಾಯ ಉಪ್ಪಜ್ಜತಿ। ಪಠಮ ಭವಙ್ಗಚಿತ್ತಂ ಪನ ಪಟಿಸನ್ಧಿಚಿತ್ತೇನ ಸಹುಪ್ಪನ್ನಹದಯ ವತ್ಥುರೂಪಂ ನಿಸ್ಸಾಯ ಉಪ್ಪಜ್ಜತಿ। ದುತಿಯಭವಙ್ಗಚಿತ್ತಂ ಪಠಮಭವಙ್ಗಚಿತ್ತೇನ ಸಹುಪ್ಪನ್ನಂ ನಿಸ್ಸಾಯ ಉಪ್ಪಜ್ಜತಿ। ಏವಂ ತತಿಯಭವಙ್ಗಚಿತ್ತಂ ದುತಿಯ ಭವಙ್ಗಚಿತ್ತೇನ ಸಹುಪ್ಪನ್ನನ್ತಿಆದಿನಾ ಯಾವಮರಣಾಸನ್ನಕಾಲಾ ದ್ವಿನ್ನಂ ಮನೋಧಾತುಮನೋವಿಞ್ಞಾಣಧಾತೂನಂ ವತ್ಥುಪುರೇಜಾತನಿಸ್ಸಯೋ ವೇದಿತಬ್ಬೋ।

ಯಥಾ ವೀಣಾಸದ್ದಾ ನಾಮ ವೀಣಾತನ್ತೀಸು ವೀಣಾದಣ್ಡಕೇಹಿ ಪಹರಣವೇಗೇನ ಏವ ಜಾಯನ್ತಿ, ನೋ ಅಞ್ಞಥಾ। ತಥಾ ಪಞ್ಚವಿಞ್ಞಾಣಾನಿ ನಾಮ ಪಞ್ಚವತ್ಥುಸಙ್ಖಾತೇಸು ಪಞ್ಚದ್ವಾರೇಸು ಪಞ್ಚನ್ನಂ ಆರಮ್ಮಣಾನಂ ಆಪಾತಾ ಗಮನವೇಗೇನ ಏವ ಜಾಯನ್ತಿ, ನೋ ಅಞ್ಞಥಾ।

ಆಪಾತಾಗಮನಞ್ಚ ತೇಸಂ ದ್ವಾರಾರಮ್ಮಣಾನಂ ಠಿತಿಪತ್ತಕಾಲೇ ಏವ ಹೋತಿ। ಆಪಾತಾಗಮನಪಚ್ಚಯಾ ಚ ದ್ವಿಕ್ಖತ್ತುಂ ಭವಙ್ಗಂ ಚಲತಿ। ಭವಙ್ಗಚಲನ ಪಚ್ಚಯಾ ಚ ಆವಜ್ಜನಂ ಉಪ್ಪಜ್ಜತಿ। ಆವಜ್ಜನಪಚ್ಚಯಾ ಚ ತಾನಿ ಪಞ್ಚವಿಞ್ಞಾಣಾನಿ ಉಪ್ಪಜ್ಜನ್ತಿ। ತಸ್ಮಾ ಚಕ್ಖಾದೀನಿ ಪಞ್ಚವತ್ಥೂನಿ ಪುರೇ ಅತೀತಭವಙ್ಗಚಿತ್ತಸ್ಸ ಉಪ್ಪಾದಕ್ಖಣೇ ಉಪ್ಪನ್ನಾನಿ ಏವ ಪಞ್ಚವಿಞ್ಞಾಣಧಾತೂನಂ ವತ್ಥುಪುರೇಜಾತಪಚ್ಚಯಾ ಹೋನ್ತಿ।

ಮರಣಾಸನ್ನಕಾಲೇ ಪನ ಸಬ್ಬಾನಿ ಛ ವತ್ಥೂನಿ ಚುತಿಚಿತ್ತತೋ ಪುರೇ ಸತ್ತರಸಮಸ್ಸ ಭವಙ್ಗಚಿತ್ತಸ್ಸ ಉಪ್ಪಾದಕ್ಖಣೇ ಏವ ಉಪ್ಪಜ್ಜನ್ತಿ, ತತೋ ಪರಂ ನ ಉಪ್ಪಜ್ಜನ್ತಿ। ತಸ್ಮಾ ಮರಣಾಸನ್ನಕಾಲೇ ಭವಙ್ಗಚಿತ್ತಾನಿ ಚ ಸಬ್ಬಾನಿ ಛದ್ವಾರಿಕವೀಥಿಚಿತ್ತಾನಿ ಚ ಚುತಿಚಿತ್ತಞ್ಚ ಪುರೇತರಂ ಉಪ್ಪನ್ನಾನಿ ತಾನಿಯೇವ ಅತ್ತನೋ ಅತ್ತನೋ ವತ್ಥೂನಿ ನಿಸ್ಸಾಯ ಉಪ್ಪಜ್ಜನ್ತಿ। ಅಯಂ ವತ್ಥುಪುರೇಜಾತ ನಿಸ್ಸಯೋ।

ಕತಮೋ ಪನ ವತ್ಥಾರಮ್ಮಣಪುರೇಜಾತನಿಸ್ಸಯೋ। ಯದಾ ಅತ್ತನೋ ಅಜ್ಝತ್ತಂ ವತ್ಥುರೂಪಂ ಆರಬ್ಭ ಯಂ ರೂಪಂ ನಿಸ್ಸಾಯ ಮಮ ಮನೋವಿಞ್ಞಾಣಂ ವತ್ತತಿ, ಏತಂ ಮಮ ಏಸೋ ಹಮಸ್ಮಿ ಏಸೋ ಮೇ ಅತ್ತಾತಿ ಏವಂ ತಣ್ಹಾಮಾನ ದಿಟ್ಠೀಹಿ ಗಹಣವಸೇನ ವಾ ಏತಂ ಅನಿಚ್ಚಂ ಏತಂ ದುಕ್ಖಂ ಏತಂ ಅನತ್ತಾತಿ ಏವಂ ಸಮ್ಮಸನವಸೇನ ವಾ ಆವಜ್ಜನಾದೀನಿ ಮನೋದ್ವಾರಿಕವೀಥಿ ಚಿತ್ತಾನಿ ಪವತ್ತನ್ತಿ। ತದಾ ತಂ ತಂ ವತ್ಥುರೂಪಂ ಪಚ್ಚೇಕಂ ತೇಸಂ ನಿಸ್ಸಯವತ್ಥು ಚ ಹೋತಿ ತೇಸಂ ಆರಮ್ಮಣಞ್ಚ। ತಸ್ಮಾ ತಂ ತಂ ಹದಯರೂಪಂ ತಸ್ಸ ತಸ್ಸ ಚಿತ್ತುಪ್ಪಾದಸ್ಸ ವತ್ಥಾರಮ್ಮಣಪುರೇಜಾತಪಚ್ಚಯೋ ಹೋತಿ। ಅಯಂ ವತ್ಥಾರಮ್ಮಣ ಪುರೇಜಾತನಿಸ್ಸಯೋ। ಏವಂ ನಿಸ್ಸಯಪಚ್ಚಯೋ ತಿವಿಧೋ ಹೋತಿ।

ಇಧ ಸುತ್ತನ್ತನಿಸ್ಸಯೋಪಿ ವತ್ತಬ್ಬೋ। ಇಮೇ ಮನುಸ್ಸಾ ವಾ ತಿರಚ್ಛಾನಗತಾ ವಾ ರುಕ್ಖಾದಯೋ ವಾ ಮಹಾಪಥವಿಯಂ ಪತಿಟ್ಠಿತಾ, ಮಹಾ ಪಥವೀ ಚ ಹೇಟ್ಠಾ ಮಹಾಉದಕಕ್ಖನ್ಧೇ, ಮಹಾಉದಕಕ್ಖನ್ಧೋ ಚ ಹೇಟ್ಠಾ ಮಹಾವಾತಕ್ಖನ್ಧೇ, ಮಹಾವಾತಕ್ಖನ್ಧೋ ಚ ಹೇಟ್ಠಾ ಅಜಟಾಕಾಸೇ, ಮನುಸ್ಸಾ ಗೇಹೇಸು, ಭಿಕ್ಖೂ ವಿಹಾರೇಸು, ದೇವಾ ದಿಬ್ಬವಿಮಾನೇಸೂತಿಆದಿನಾ ಸಬ್ಬಂ ಲೋಕಪ್ಪವತ್ತಿಂ ಞತ್ವಾ ನಿಸ್ಸಯಪಚ್ಚಯೋ ವೇದಿತಬ್ಬೋ। ನಿಸ್ಸಯಪಚ್ಚಯದೀಪನಾ ನಿಟ್ಠಿತಾ।