॥ ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥
ಕಮಲಾಞ್ಜಲಿ
೧.
ಕಮಲಾಸನ ಕಮಲಾಪತಿ ಪಮಥಾಧಿಪ ವಜಿರಾ,
ಯುಧದಾನವ ಮನುಜೋರಗ ಭುಜಗಾಸನ ಪತಿನಂ।
ಮಕುಟಾಹಿತ ಮನಿದೀಧಿತಿ ಭಮರಾವಲಿ ಭಜಿತಂ,
ಪಣಮಾ’ಮಹಂ ಅನಘಂ ಮುನಿ ಚರಣಾಮಲ ಕಮಲಂ॥
೨.
ಕಮಲಾಲಯ ಸದಿ’ಸಙ್ಕಿತ ಕಲಮಙ್ಗಲ ರುಚಿರಂ,
ಜುತಿರಞ್ಜಿತಂ ಅಭಿನಿಜ್ಜಿತ ಸುಭಕಞ್ಚನ ನಲಿನಂ।
ಜನಿತಾ ಚಿರ ಸಮಯೇ ನಿಜ ಪಿತು ಭೂಪತಿ ನಮಿತಂ,
ಪಣಮಾ’ಮಹಂ ಅನಘಂ ಮುನಿ ಚರಣಾಮಲ ಕಮಲಂ॥
೩.
ಸರಣಾಗತ ರಜನೀಪತಿ ದಿನಸೇಖರ ನಮಿತಂ,
ಭಜಿತಾಖಿಲ ಜನಪಾವನಂ ಅಭಿಕಙ್ಖಿತ ಸುಖದಂ।
ವಸುಧಾತಲ ಸಯಮುಗ್ಗತ ಸರಸೀರುಹ ಮಹಿತಂ,
ಪಣಮಾ’ಮಹಂ ಅನಘಂ ಮುನಿ ಚರಣಾಮಲ ಕಮಲಂ॥
೪.
ದಿರದಾಸನ ತರುಪನ್ತಿಕ ಘಟಿತಾಸನಂ ಅಭಯಂ,
ವಿಜಯಾಸನ ಸಮಧಿಟ್ಠಿತ ಚತುರಙ್ಗಿಕ ವಿರಿಯಂ।
ಧರಮಾನಕ ಸುರಿಯೇಹನಿ ವಿಜಿತನ್ತಕ ಧಜಿನಿಂ,
ಪಣಮಾ’ಮಹಂ ಅಭಿಪಾತಿತ ನಮುಚಿದ್ಧಜ ವಿಭವಂ॥
೫.
ಸದಯೋದಿತ ಪಿಯಭಾರತಿ ವಿಜಿತನ್ತಕ ಸಮರಂ,
ದಸಪಾರಮಿ ಬಲಕಮ್ಪಿತ ಸಧರಾಧರ ಧರನಿಂ।
ಗಿರಿಮೇಖಲ ವರವಾರನ ಸಿರಸಾನತ ಚರಣಂ,
ಪಣಮಾ’ಮಹಂ ಅಭಿನನ್ದಿತ ಸನರಾಮರ ಭುವನಂ॥
೬.
ನಿಖಿಲಾಸವ ವಿಗಮೇ’ನತಿವಿಮಲೀಕತ ಹದಯಂ,
ತದನನ್ತರ ವಿದಿತಾಖಿಲ ಮತಿಗೋಚರ ವಿಸಯಂ।
ವಿಸಯೀಕತ ಭುವನತ್ತಯಂ ಅತಿಲೋಕಿಯ ಚರಿತಂ,
ಪಣಮಾ’ಮಹಂ ಅಪರಾಜಿತಂ ಅರಹಂ ಮುನಿಂ ಅಸಮಂ॥
೭.
ಮುದುಭಾರತಿ ಮಧುಪಾಸಿತ ನಲಿನೋಪಮ ವದನಂ,
ರುಚಿರಾಯತ ನಲಿನೀದಲ ನಿಭ ಲೋಚನ ಯುಗಲಂ।
ಉದಯೋದಿತ ರವಿಮಣ್ಡಲ ಜಲಿತಾಮಲ ನಿಟಿಲಂ,
ಪಣಮಾ’ಮಹ ಅಕುತೋಭಯಂ ಅನಘಂ ಮುನಿ ಪಮುಖಂ॥
೮.
ಅಸಿತಮ್ಬುದ ರುಚಿಕುಞ್ಚಿತ ಮುದು ಕುನ್ತಲ ಲಲಿತಂ,
ಭುವನೋದರ ವಿತತಾಮಿತ ಜುತಿಸಞ್ಚಯ ಜಲಿತಂ।
ಮದಮೋದಿತ ದಿರದೋಪಮ ಗತಿವಿಬ್ಭಮ ರುಚಿರಂ,
ಪಣಮಾ’ಮಹಂ ಅಮತನ್ದದ ಮುನಿಪುಙ್ಗವಂ ಅಸಮಂ॥
೯.
ಕರುಣಾರಸ ಪರಿಭಾವಿತ ಸವಣಾಮತ ವಚನಂ,
ವಿರುದಾವಲಿ ಸತಘೋಸಿತ ಯಸಪೂರಿತ ಭುವನಂ।
ಸುಮನೋಹರ ವರಲಕ್ಖಣ ಸಿರಿಸಞ್ಚಯ ಸದನಂ,
ಪಣಮಾ’ಮಹಂ ಉದಿತಾಮಲ ಸಸಿಮಣ್ಡಲ ವದನಂ॥
೧೦.
ವಿನಯಾರಹ ಜನಮಾನಸ ಕುಮುದಾಕರ ಸಸಿನಂ,
ತಸಿನಾಪಗ ಪರಿಸೋಸನ ಸತದೀಧಿತಿ ತುಲಿತಂ।
ತಮನಾಸವ ಮುನಿಸೇವಿತಂ ಅಪಲೋಕಿತ ಸುಖದಂ,
ಪಣಮಾ’ಮಹಂ ಅನಿಕೇತನಂ ಅಖಿಲಾಗತಿ ವಿಗತಂ॥
೧೧.
ಸಹಿತಾಖಿಲ ಭಯಭೇರವಂ ಅಭಯಾಗತ ಸರನಂ,
ಅಜರಾಮರ ಸುಖದಾಯಕಂ ಅನಿರಾಕತ ಕರುಣಂ।
ತಮುಪಾಸಕ ಜನಸೇವಿತ ಸುಪತಿಟ್ಠಿತ ಚರಣಂ,
ಪಣಮಾ’ಮಹಂ ಅಹಿತಾಪಹಂ ಅನಘುತ್ತಮ ಚರಣಂ॥
೧೨.
ಕರುಣಾಮತ ರಸಪುರಿತ ವೀಮಲಾಖಿಲ ಹದಯಂ,
ವಿಹಿತಾಮಿತ ಜನತಾಹಿತಂ ಅನುಕಮ್ಪಿತ ಭುವನಂ।
ಭುವನೇ ಸುತಂ ಅವನೀಪತಿ ಸತ ಸೇವಿತ ಚರಣಂ,
ಪಣಮಾ’ಮಹಂ ಅನಘಂ ಮುನಿಂ ಅಘನಾಸನ ಚತುರಂ॥
೧೩.
ಅರತೀರತಿ ಪರಿಪೀಲಿತ ಯತಿಮಾನಸ ದಮನಂ,
ನಿಜಸಾಸನ ವಿನಿವಾರಿತ ಪುಥುತಿತ್ಥಿಯ ಸಮಣಂ।
ಪರವಾದಿಕ ಜನತಾಕತ ಪರಿಭಾಸಿತ ಖಮನಂ,
ಪಣಮಾ’ಮಹಂ ಅತಿದೇವತ ವರ ಗೋತಮ ಸಮಣಂ॥
೧೪.
ಸರಣಾಗತ ಭಯನಾಸನ ವಜಿರಾಲಯ ಪಣಿಭಂ,
ಭವಸಾಗರ ಪತಿತಾಮಿತ ಜನತಾರನ ನಿರತಂ।
ಸಿರಸಾವಹಂ ಅಮಲಞ್ಜಲಿ ಪುಟಪಙ್ಕಜ ಮಕುಲಂ,
ಪಣಮಾ’ಮಹಂ ಅಖಿಲಲಾಯ ವಿಗತಂ ಮುನಿಂ ಅತುಲಂ॥
೧೫.
ವಿಮಲೀಕತ ಜನಮಾನಸ ವಿಗತಾಸವ ಭಗವಂ,
ಭವಪಾರಗ ವಿಭವಾಮತ ಸುಖದಾಯಕ ಸತತಂ।
ಪರಮಾದರ ಗರುಗಾರವ ವಿನತಂ ಜಿನ ಪಯತಂ,
ಪದಪಙ್ಕಜ ರಜಸಾ ಮಮ ಸಮಲಙ್ಕುರು ಸಿರಸಂ॥
೧೬.
ಪವನಾಹತ ದುಮಪಲ್ಲವಂ ಇವ ನಾರತ ಚಪಲಂ,
ಭವಲಾಲಸ ಮಲಿನೀಕತಂ ಅಜಿತಿನ್ದ್ರಿಯ ನಿವಹಂ।
ಚಿರ ಸಞ್ಚಿತ ದುರಿತಾಹತಂ ಅನಿವಾರಿತ ತಿಮಿಸಂ,
ವಿಮಲೀಕುರು ಕರುಣಾಭರ ಸುತರಂ ಮಮ ಹದಯಂ॥
೧೭.
ಅದಯೇ ದಯಂ ಅನಯೇ ನಯಂ ಅಪಿ ಯೋ ಗುಣಂ ಅಗುಣೇ,
ಅಹಿತೇ ಹಿತಂ ಅಕರೋ ಕ್ವಚಿದ ಅಪಿ ಕೇನಚಿ ನಕತಂ।
ಸದಯೇ ಜಿನ ಸುನಯೇ ಗುಣಸದನೇ ತಯಿ ನಿತರಂ,
ಸುಹಿತೇ ಹಿತಚರಿತೇ’ನಘ ರಮತೇ ಮಮ ಹದಯಂ॥
೧೮.
ಭವಸಙ್ಕಟ ಪತಿತೇನಪಿ ಭವತಾ ಚಿರ ಚರಿತಂ,
ವಿಸಮೇ ಸಮ ಚರಣಂ ಖಲು ದಸಪಾರಮಿ ಭರಣಂ।
ಸರತೋ’ಹನಿ ಸರತೋ ನಿಸಿ ಸುಪಿನೇನಪಿ ಸತತಂ,
ರಮತೇ ಜಿನ ಸುಮತೇ ತ್ವಯಿ ಸದಯಂ ಮಮ ಹದಯಂ॥
೧೯.
ಅತಿದುದ್ದದಂ ಅದದೀ ಭವಂ ಅತಿದುಕ್ಕರಂ ಅಕರೀ।
ಅತಿದುಕ್ಖಮಂ ಅಖಮೀ ವತ ಕರುಣಾನಿಧಿ’ರಸಮೋ,
ಇತಿ ತೇ ಗುಣಂ ಅನಘಂ ಮುನಿ ಸರತೋ ಮಮ ಹದಯಂ,
ರಮತೇ’ಹನಿ ರಮತೇ ನಿಸಿ ರಮತೇ ತ್ವಯಿ ಸತತಂ॥
೨೦.
ಅತಿದುಚ್ಚರಂ ಅಚರೀ ಭವಂ ಅತಿದುದ್ದಮಂ ಅದಮೀ,
ಅತಿದುದ್ದಯಂ ಅದಯೀ ವತ ಸದಯಾಪರ ಹದಯೋ।
ಇತಿ ತೇ ಗುಣಂ ಅನಘಂ ಮುನಿ ಸರತೋ ಮಮ ಹದಯಂ,
ರಮತೇ’ಹನಿ ರಮತೇ ನಿಸಿ ರಮತೇ ತ್ವಯಿ ಸತತಂ॥
೨೧.
ಅತಿದುಗ್ಗಮಂ ಅಗಮೀ ಭವಂ ಅತಿದುಜ್ಜಯಂ ಅಜಯೀ,
ಅತಿದುಸ್ಸಹಂ ಅಸಹೀ ವತ ಸಮುಪೇಕ್ಖಿತ ಮನಸೋ।
ಇತಿ ತೇ ಗುಣಂ ಅನಘಂ ಮುನಿ ಸರತೋ ಮಮ ಹದಯಂ,
ರಮತೇ’ಹನಿ ರಮತೇ ನಿಸಿ ರಮತೇ ತ್ವಯಿ ಸತತಂ॥
೨೨.
ಅತಿದಾರುನ ಪಲಯಾನಲ ಸದಿಸಾನಲ ಜಲಿತೇ,
ನಿರಯೇ ವಿನಿಪತಿತೋ ಚಿರಂ ಅಘತಾಪಿತ ಮನಸೋ।
ನ ಸರಿಂ ಸಕಿದ ಅಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ನರಸಾರಥಿ ತಮಿದಂ ಮಮ ಖಲಿತಂ॥
೨೩.
ತಿರಿಯಗ್ಗತ-ಗತಿಯಂ ಚಿರಂ ಅನವಟ್ಠಿತ ಚರಿತೋ,
ಅತಿನಿಟ್ಠುರ ವಧತಜ್ಜಿತ ಭಯಕಮ್ಪಿತ ಹದಯೋ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ಪುರಿಸುತ್ತಮ ತಮಿದಂ ಮಮ ಖಲಿತಂ॥
೨೪.
ಪರಿದೇವನ ನಿರತೋ ಚಿರಂ ಅಥ ಪೇತ್ತಿಯ ವಿಸಯೇ,
ಸುಜಿಘಚ್ಛಿತ ಸುಪಿಪಾಸಿತ ಪರಿಸೋಸಿತ ಜಠರೇ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ದಿಪದುತ್ತಮ ತಮಿದಂ ಮಮ ಖಲಿತಂ॥
೨೫.
ವಿವಸೋ ಭುಸಂ ಅಘದೂಸಿತ ಮನಸಾಸುರ ವಿಸಯೇ,
ಜನಿತೋ ಘನತಿಮಿರೇ ಚಿರಂ ಅತಿದುಕ್ಖಿತ ಹದಯೋ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ವಸಿಸತ್ತಮ ತಮಿದಂ ಮಮ ಖಲಿತಂ॥
೨೬.
ಮನಸಾ ಚಿರ ವಿಹಿತಂ ಸರಂ ಅತಿಕಿಬ್ಬಿಸ ಚರಿತಂ,
ಸಮಥೇನಥ ಸುವಿರಾಜಿಯ ತಂ ಅಸಞ್ಞಿತಂ ಉಪಗೋ।
ನ ಸರಿಂ ಸಕಿದ ಅಪಿ ತೇ ಪಿತ ಭಜಿತುಂ ಪದ ನಲಿನಂ,
ಖಮ ಗೋತಮ ವಸಿಪುಙ್ಗವ ತಮಿದಂ ಮಮ ಖಲಿತಂ॥
೨೭.
ವಿಜಿಗುಚ್ಛಿಯ ದುರಿತಂ ನಿಜ ವಪುಸಾ ಕತಂ ಅಮಿತಂ,
ತನು ವಜ್ಜಿತಂ ಉಪಗೋ ಭವಂ ಇಹ ಭಾವಿತ ಸಮಥೋ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ಯತಿಕುಞ್ಜರ ತಮಿದಂ ಮಮ ಖಲಿತಂ॥
೨೮.
ರತನತ್ತಯ ರಹಿತೇ ಭುಸ ಬಹುಲೀಕತ ದುರಿತೇ,
ಜನಿತೋ ಪರವಿಸಯೇ ಬುಧಜನ ನಿನ್ದಿಯ ಚರಿತೇ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ಕರುಣಾನಿಧಿ ತಮಿದಂ ಮಮ ಖಲಿತಂ॥
೨೯.
ಜನಿತೋ ಯದಿ ಮನುಜೇಸುಪಿ ವಿಕಲಿನ್ದ್ರಿಯ ನಿವಹೋ,
ತನುನಾ ಕರಚರಣಾದಿಹಿ ವಿಕತೇ’ನಿಹ ದುಖಿತೋ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ಮತಿಸಾಗರ ತಮಿದಂ ಮಮ ಖಲಿತಂ॥
೩೦.
ವಿಧಿನಾಹಿತ ಮತಿಭಾವನ ರಹಿತೋ ತಮಪಿಹಿತೋ,
ವಿಸದೇಸುಪಿ ಕುಸಲಾದಿಸು ತಥದಸ್ಸನ ವಿಮುಖೋ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ನರಕೇಸರಿ ತಮಿದಂ ಮಮ ಖಲಿತಂ॥
೩೧.
ಸುಚಿರೇನಪಿ ಭುವಿ ದುಲ್ಲಭಂ ಅಸಮಂ ಖಣಂ ಅಲಭಂ,
ಸನರಾಮರ ಜನತಾಹಿತ ಸುಖದಂ ಮುನಿ ಜನನಂ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ವದತಂವರ ತಮಿದಂ ಮಮ ಖಲಿತಂ॥
೩೨.
ನಿಸಿತಾಯುಧ ವಧಸಜ್ಜಿತ ಖಳನಿದ್ದಯ ಹದಯೋ,
ಪರಹಿಂಸನ ರುಚಿ ಭಿಂಸನ ಯಮಸೋದರ ಸದಿಸೋ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ಮುನಿಸತ್ತಮ ತಮಿದಂ ಮಮ ಖಲಿತಂ॥
೩೩.
ಪರಸನ್ತಕ ಹರಣೇ ಕತಮತಿ ಬಞ್ಚನ ಬಹುಲೋ,
ಘರಸನ್ಧಿಕ ಪರಿಪನ್ಥಿಕ ಸಹಸಾಕತಿ ನಿರತೋ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ಮುನಿಪುಙ್ಗವ ತಮಿದಂ ಮಮ ಖಲಿತಂ॥
೩೪.
ನವಯೋಬ್ಬನ ಮದಗಬ್ಬಿತ ಪರಿಮುಚ್ಛಿತ ಹದಯೋ,
ಸುಚಿಸಜ್ಜನ ವಿಜಿಗುಚ್ಛಿಯ ಪರದಾರಿಕ ನಿರತೋ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ಕರುಣಾಭರ ತಮಿದಂ ಮಮ ಖಲಿತಂ॥
೩೫.
ಮದಿರಾಸವರತ ನಾಗರಜನ ಸನ್ತತ ಭಜಿತೋ,
ಗರುಗಾರವ ಹಿರಿದೂರಿತ ತಿರಿಯಗ್ಗತ ಚರಿತೋ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ವಿಹತಾಸವ ತಮಿದಂ ಮಮ ಖಲಿತಂ॥
೩೬.
ಸಪಿತಾಮಹ ಪಪಿತಾಮಹ ನಿಚಿತಂ ಧನಂ ಅಮಿತಂ,
ಪಿತುಸಞ್ಚಿತಮಪಿ ನಾಸಿಯ ಕಿತವೋ ಹತವಿಭವೋ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ವಿಜಿತನ್ತಕ ತಮಿದಂ ಮಮ ಖಲಿತಂ॥
೩೭.
ವಿತಥಾಲಿಕ ವಚನೋ ಪರಪಿಯಸುಞ್ಞತ ಕರಣೋ,
ಫರುಸಂ ಭಣಂ ಅತಿನಿಪ್ಫಲ ಬಹುಭಾಸನ ನಿಪುಣೋ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ಭುವನೇಸುತ ತಮಿದಂ ಮಮ ಖಲಿತಂ॥
೩೮.
ಪರಸಮ್ಪದಂ ಅಭಿಝಾಯನ ನಿರನ್ತರ ದುಖಿತೋ,
ನಭಿರಜ್ಝನ ಪರಮೋ ಕ್ವಚಿ ಫಲದಸ್ಸನ ರಹಿತೋ।
ನ ಸರಿಂ ಸಕಿದಪಿ ತೇ ಪಿತ ಭಜಿತುಂ ಪದನಲಿನಂ,
ಖಮ ಗೋತಮ ಗುಣಸಾಗರ ತಮಿದಂ ಮಮ ಖಲಿತಂ॥
೩೯.
ಭವತೋ ಭವಂ ಅಪರಾಪರಂ ಅಯತಾಚಿರಂ ಇತಿ ಮೇ,
ವಪುಸಾ ಅಥ ವಚಸಾಪಿ ಚ ಮನಸಾ ಕತಂ ಅಮಿತಂ।
ಖಮ ಗೋತಮ ದುರಿತಾಪಹ ದುರಿತಂ ಬಹುವಿಹಿತಂ,
ದದ ಮೇ ಸಿವಪದಂ ಅಚ್ಚುತಂ ಅಮತಂ ಭವವಿಗತಂ॥
೪೦.
ತಿಮಿರಾವುತ ಕುಣಪಾಕುಲ ವಿಜಿಗುಚ್ಛಿಯ ಪವನೇ,
ಜನಿಕಾಸುಚಿ ಜಠರೇ ಬಹು ಕಿಮಿಸನ್ತತಿ ಸದನೇ।
ಅಸಯಿಂ ಭವಗಹಣೇ ಚರಂ ಅಹಂ ಅಪ್ಪಟಿಸರಣೇ,
ಸರನಂ ಭವ ಭಗವಂ ಮಮ ಭವನೀರಧಿ ತರಣೇ॥
೪೧.
ಬಹಿ ನಿಕ್ಖಮಂ ಅಸಕಿಂ ಭಗತಿರಿಯಂ ಪಥ ಪತಿತೋ,
ಅಗದಙ್ಕರ ಕತ ಸಲ್ಲಕ ಸತಖಣ್ಡಿತ ಕರಣೋ।
ಅಮರಿಂ ಭವಗಹಣೇ ಚರಂ ಅಹಂ ಅಪ್ಪಟಿಸರಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರನೇ॥
೪೨.
ಪತಿತೋ ಬಹಿ ರತಿಪಿಲ್ಲಕ ತನುರಾಮಯ ಮಥಿತೋ,
ವದಿತುಂ ಕಿಮು ವಿದಿತುಮ್ಪಿ ಚ ನ ಸಹಂ ಮತಿರಹಿತೋ।
ಅಮರಿಂ ಭವಗಹಣೇ ಚರಂ ಅಹಂ ಅಪ್ಪಟಿಸರಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೪೩.
ಜನಿತೋ ಯದಿ ಸುಖಿತೋ ಜನದಯಿತೋ ಪಿಯಜನಕೋ,
ಪುಥುಕೋ ಬಹುವಿಧ-ಕೀಲನನಿರತೋ ಗದಗಹಿತೋ।
ಅಮರಿಂ ಭವಗಹಣೇ ಚರಂ ಅಹಂ ಅಪ್ಪಟಿಸರಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೪೪.
ತರುನೋಪಿ ಹಿ ಘರಬನ್ಧನ ಗಥಿತೋಮಿತ ವಿಭವೋ,
ಸಹಸಾ ಗದಗಹಿತೋ ಪಿಯಭರಿಯಾಸುತ ವಿಯುತೋ।
ಅಮರಿಂ ಭವಗಹಣೇ ಚರಂ ಅಹಂ ಅಪ್ಪಟಿಸರಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೪೫.
ಅಜರಂ ತನುಂ ಅಭಿಮಞ್ಞಿಯ ನವಯೋಬ್ಬನ ವಸಿಕೋ,
ಜರಸಾ ಪರಿಮಥಿತೋ ಪರಂ ಅನನುಟ್ಠಿತ ಕುಸಲೋ।
ಅಮರಿಂ ಭವಗಹಣೇ ಚರಂ ಅಹಂ ಅಪ್ಪಟಿಸರಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೪೬.
ನಿರುಜೋ ಧುವಂ ಅರುಜಂ ತನುಂ ಅಭಿಮಞ್ಞಿಯ ಸಮದೋ,
ಕುಸಲಾಸಯ ವಿಮುಖೋ ಭುಸಂ ಅವಸೋ ಗದನಿಹತೋ।
ಅಮರಿಂ ಭವಗಹಣೇ ಚರಂ ಅಹಂ ಅಪ್ಪಟಿಸರಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೪೭.
ಪವಿಚಿನ್ತಿಯ ಸಕಜೀವಿತಂ ಅಮರಂ ಧುವಂ ಅನಿಘಂ,
ಇತಿ ಜೀವಿತಮದಗಬ್ಬಿತ ಮತಿರುಜ್ಝಿತ ಕುಸಲೋ।
ಅಮರಿಂ ಭವಗಹಣೇ ಚರಂ ಅಹಂ ಅಪ್ಪಟಿಸರಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೪೮.
ಪರಹಿಂಸನ ಧನಮೋಸನ ಪರದಾರಿಕ ನಿರತೋ,
ಧರನೀಪತಿ ಗಹಿತೋ ಬಹು ವಧಬನ್ಧನ ನಿಹತೋ।
ಅಮರಿಂ ಭವಗಹಣೇ ಚರಂ ಅಹಂ ಅಪ್ಪಟಿಸರಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೪೯.
ನರಕೋದಕ ಪತಿತೋ ಗಿರಿತರುಮತ್ಥಕ ಗಲಿತೋ,
ಮಿಗವಾಳಕ ಗಹಿತೋ ವಿಸಧರ ಜಾತಿಹಿ ಡಸಿತೋ।
ಅಮರಿಂ ಭವಗಹಣೇ ಚರಂ ಅಹಂ ಅಪ್ಪಟಿಸರಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೫೦.
ಅಭಿಚಾರಕ ವಿಧಿಕೋಪಿತ ನಿಸಿಚಾರಕ ಗಹಿತೋ,
ಸವಿಸೋದನ ಸಹಸಾದನ ಪಭುತೀಹಿ ಚ ಖಲಿತೋ।
ಅಮರಿಂ ಭವಗಹಣೇ ಚರಂ ಅಹಂ ಅಪ್ಪಟಿಸರಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೫೧.
ಸಯಮೇವಚ ಸಜನೋಪರಿ ಕುಪಿತೋ ಮತಿವಿಯುತೋ,
ಸವಿಸಾದನ ಗಲಕನ್ತನ ಪಭುತಾಮಿತ ಖಲಿತೋ।
ಅಮರಿಂ ಭವಗಹಣೇ ಚರಂ ಅಹಂ ಅಪ್ಪಟಿಸರಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೫೨.
ಪಿತುಪೂಜನ ನಿರತಾಸಯ ಸುಖಿತೋ ಪಿತುದಯಿತೋ,
ಮರಣೇನಚ ಪಿತುನೋ ಭುಸಂ ಅನುಸೋಚನ ನಿರತೋ।
ಪರುದಿಂ ಚಿರಂ ಅತಿದುಸ್ಸಹ ಕಸಿರೇ ಭವಗಹಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೫೩.
ಸಮುಪಟ್ಠಿಯ ಜನಿಕಂ ನಿಜಂ ಅಭಿವಾದನ ಪರಮೋ,
ಮರಣೇನಚ ಜನಿಕಾಯನುಸರಿತಾ ಗುಣಮಹಿಮಂ।
ಪರುದಿಂ ಚಿರಂ ಅತಿದುಸ್ಸಹ ಕಸಿರೇ ಭವಗಹಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೫೪.
ಗುರುದೇವತ ಪತಿಮಾನನ ಪರಮೋ ಪಿಯಸುವಚೋ,
ಸಮುಪಾಸಿತಚರಣೋ ಗುರುಮರಣೇನತಿದುಖಿತೋ।
ಪರುದಿಂ ಚಿರಂ ಅತಿದುಸ್ಸಹ ಕಸಿರೇ ಭವಗಹಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೫೫.
ಘರಮೇಧಿತಂ ಉಪಗೋಮಿತವಿಭವೋ ರತಿಬಹುಲೋ,
ಮರಣೇ ಪಿಯಭರಿಯಾಸುತದುಹಿತೂ’ನತಿಕರುಣಂ।
ಪರುದಿಂ ಚಿರಂ ಅತಿದುಸ್ಸಹ ಕಸಿರೇ ಭವಗಹಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೫೬.
ಪಿಯಪುಬ್ಬಜ ಸಹಜಾನುಜ ಭಗಿಣಿದ್ವಯ ಮರಣೇ,
ನಿಜ ಬನ್ಧವ-ಸಖ-ಸಿಸ್ಸಕ ಮರಣೇ ಪ್ಯತಿಕರುಣಂ।
ಪರುದಿಂ ಚಿರಂ ಅತಿದುಸ್ಸಹ ಕಸಿರೇ ಭವಗಹಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೫೭.
ಜಗತೀಪತಿ ಗಹಣಾ ರಿಪುಜನತಕ್ಕರ ಹರಣಾ,
ಸರಿತೋದಕ ವಹಣಾ ಪುಥುಜಲಿತಾನಲ ದಹಣಾ।
ಪರುದಿಂ ಹತವಿಭವೋ ಚಿರಮಿಹ ದುಗ್ಗತಿಗಹಣೇ,
ಸರಣಂ ಭವ ಭಗವಂ ಮಮ ಭವನೀರಧಿ ತರಣೇ॥
೫೮.
ಅತಿದುಗ್ಗಮ ವಿಸಮಾಕುಲ ಭವಸಙ್ಕಟ ಪತಿತೇ,
ಬ್ಯಸನಂ ಚಿರಮಿತಿ ದುಸ್ಸಹಂ ಅನುಭೂಯಪಿ ವಿಮಿತಂ।
ನ ಜಹೇ ಸುಖಲವವಞ್ಚಿತಹದಯೋ ಭವತಸಿನಂ,
ತಮಪಾಕುರು ಕರುಣಾನಿಧಿ ತಸಿನಂ ಮಮ ಕಸಿಣಂ॥
೫೯.
ಜನನಾವಧಿ ಮರಣಂ ವಿಯ ಮರಣಾವಧಿ ಜನನಂ,
ಉಭಯೇನಪಿ ಭಯಮೇವಹಿ ಭವತೋ ಮಮ ನಿಯತಂ।
ಸಿವಮೇವಚ ಜನನಾವಧಿ ಮರಣಾವಧಿ ರಹಿತಂ,
ದದ ಮೇ ಸಿವಂ ಅಮತನ್ದದ ತಂ ಅನಾಸವ ಭಗವಂ॥
೬೦.
ಚಿರದಿಕ್ಖಿತಮಪಿ ಮೇ ಮನಂ ಅನಿವಾರಿತ ತಸಿನಂ,
ಭವತೋ ಭವ ರತಿಪೀಲಿತಂ ಅಹಹೋ ಕಲಿಘಟಿತಂ!
ತಮತೋ ಪಿತ ಭಯತೋ ಮಮಮವ ಮೇ ಭವ ಸರಣಂ,
ಭಗವಂ ಪಟಿಸರಣಂ ಮಮ ಭವನೀರಧಿ ತರಣಂ॥