॥ ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥

ಪಜ್ಜಮಧು

ಆನನ್ದ ರಞ್ಞ ರತನಾದಿ ಮಹಾ ಯತಿನ್ದ,

ನಿಚ್ಚಪ್ಪಬುದ್ಧ ಪದುಮಪ್ಪಿಯ ಸೇವಿನಙ್ಗೀ।

ಬುದ್ಧಪ್ಪಿಯೇನ ಘನ ಬುದ್ಧ ಗುಣಪ್ಪಿಯೇನ,

ಥೇರಾಲಿನಾ ರಚಿತ ಪಜ್ಜಮಧುಂ ಪಿಬನ್ತು॥

೧.

ಉಣ್ಣಾಪಪುಣ್ಣಸಸಿಮಣ್ದಲತೋ ಗಲಿತ್ವಾ,

ಪಾದಮ್ಬುಜಙ್ಗುಲಿ ದಲಟ್ಠ ಸುಧಾ ಲವಾನಂ।

ಪನ್ತೀವ ಸತ್ಥು ನಖಪನ್ತಿ ಪಜಾವಿಸೇಸಂ,

ಪೀಣೇತು ಸುದ್ಧ ಸುಖಿತಮ್ಮಣ ತುಣ್ಡಪೀತಾ॥

೨.

ಖಿತ್ತಾಯ ಮಾರರಿಪುನಾ ಪರಿವತ್ಯ ಸತ್ಥು,

ಪಾದಸ್ಸಯಾ ಜಿತ ದಿಸಾಯ ಸಿತತ್ತಲಾಯ।

ಯಾ ಜೇತಿ ಕಞ್ಚನ ಸರಾವಲಿಯಾ ಸಿರಿಂ ಸಾ,

ದೇತನ್ಗಿನಂ ರಣಜಯಙ್ಗುಲಿಪನ್ತಿಕನ್ತಾ॥

೩.

ಸೋವಣ್ಣ ವಣ್ಣ ಸುಖುಮಚ್ಛವಿ ಸೋಮ್ಮ ಕುಮ್ಮ,

ಪಿಟ್ಠೀವ ಪಿಟ್ಠಿ ಕಮತುನ್ನತಿ ಭಾತಿ ಯೇಸಂ।

ತೇಸುಪ್ಪತಿಟ್ಠಿತಸುಕೋಮಲದೀಘಪಣ್ಹಿ,

ಪಾದಾ ಜಿನಸ್ಸ ಪದದನ್ತು ಪದಂ ಜನಸ್ಸ॥

೪.

ಅಚ್ಛೇರ ಪಙ್ಕಜಸಿರಂ ಸಿರಿಯಾ ಸಕಾಯ,

ಯೇ ಮದ್ದಿನೋ ವಿಯ ಚರನ್ತಿ ಸರೋಜ ಸೀಸೇ।

ಸಞ್ಚುಮ್ಬಿತಾ ವಿಯ ಚ ತಾನಿ ಪರಾಗ ರಾಗಾ,

ತೇ ನೀರಜಾ ಮುನಿಪದಾ ಪದದನ್ತು ಲಕ್ಖಿಂ॥

೫.

ಅಗಾಮಿ ಕಾಲ ಜನ ಮಙ್ಗಲ ಭತ್ತು ಭಾವಂ,

ವ್ಯಾಕತ್ತುಮತ್ರ ಕುಸಲೇನಿವ ನಿಮ್ಮಿತಾನಿ।

ಯಾತ್ರಾಸುಮಟ್ಠಸತಮಙ್ಗಲಕ್ಖಣಾನಿ,

ಸಾಧೇತು ನಂ ಪದಯುಗಂ ಜಯಮಙ್ಗಲಾನಿ॥

೬.

ಸಸ್ಸೇವಿಜನ್ತುವರಸನ್ತಿಪುರಪ್ಪವೇಸೇ,

ನಿಚ್ಚಂ ಸುಸಜ್ಜ ಠಪಿತಾನಿವ ಮಙ್ಗಲಾಯ।

ಯೇ ತೇ ದಧನ್ತಿ ಕಲಮಙ್ಗಲಲಕ್ಖಣಾನಿ,

ವತ್ತನ್ತು ತೇ ಜಿನಪದಾ ಜಯಮಙ್ಗಲಾಯ॥

೭.

ಸಬ್ಬೇಭಿಭೂಯ ಸಪದೇಸು ನಿಪಾತನಸ್ಸ,

ಸಞ್ಞಾಣಕಂ ವಿಯ ಯದಸ್ಸಿತಸಬ್ಬಲೋಕೋ।

ಪಾದಾತ್ಯಧೋಕತತಿಲೋಕಸಿರೋವರಾ ಪಿ,

ಲೋಕಂ ಪುಣನ್ತು ಜಯಮಙ್ಗಲಕಾರಣಾನಿ॥

೮.

ಲೋಕತ್ತಯೇಕಸರಣತ್ತವಿಭಾವನಾಯ,

ಸಜ್ಜೋ ವ ತಿಟ್ಠತಿ ಯಹಿಂ ಸುವಿಭತ್ತಲೋಕೋ।

ತಂ ಸಬ್ಬಲೋಕಪಟಿಬಿಮ್ಬಿತದಪ್ಪಣಾಭಂ,

ಪಾದದ್ವಯಂ ಜನಸುಸಜ್ಜನಹೇತು ಹೋತು॥

೯.

ಲೋಕುತ್ತರಾಯ ಸಿರಿಯಾಧಿಗಮಾಯ ಸುಟ್ಠು,

ರಜನ್ತಿ ಯತ್ಥ ದಿಗುಣಾನಿವ ಪಾತು ಭೂತಾ।

ಚಕ್ಕಾಸನಾಭಿಸಹನೇಮಿಸಹಸ್ಸರಾನಿ,

ತ್ಯಙ್ಘೀ ದಿಸನ್ತು ಸಕಲಿಸ್ಸರಿಯಂ ಜನಸ್ಸ॥

೧೦.

ಯತ್ರುಲ್ಲಸನ್ತಿ ದುವಿಧಾನಿವ ಪಾತೂ ಭೂತಾ,

ಧಮ್ಮಸ್ಸಸಬ್ಬಭುವನಸ್ಸ ಚ ಇಸ್ಸರತ್ತೇ।

ಚಕ್ಕಾನಿ ಚಕ್ಕಸದಿಸಾನಿ ಸುದಸ್ಸನಸ್ಸ,

ತಾನಜ್ಜ ಜನ್ತು ಸರಣಾ ಚರಣಾನಿ ಹೋನ್ತು॥

೧೧.

ಸತ್ತೇಸು ವಚ್ಛತು ಸಿರೀ ಸಿರಿವಚ್ಛಕೇನ,

ಸೋವತ್ಥಿ ಸೋತ್ಥಿಮನುತಿಟ್ಠತು ಪುಗ್ಗಲೇಸು।

ನನ್ದಿಂ ಜನಾನಮನುವತ್ತತು ನನ್ದಿವತ್ತೀ,

ಸೀಸಾನಲಂಕುರುತು ಪಾದವತಂಸಕೋ ಪಿ॥

೧೨.

ಭದ್ದಾಯ ಪೀಠಮುಪಗಚ್ಛತು ಭದ್ದಪೀಠಂ,

ವುದ್ಧಿಂ ಜನಾನಮನುವತ್ತತು ವದ್ಧಮಾನಂ।

ಪುಣ್ಣತ್ತಮಙ್ಗಿಮನುಕುಬ್ಬತು ಪುಣ್ಣಕುಮ್ಭೋ,

ಪಾತಿ ಚ ಪಾತು ಸತತಂ ಜನತಂ ಅಪಾಯಾ॥

೧೩.

ಸೇತಾತಪತ್ತಮಪನೇತಮಘಾತಪೇ ತಂ,

ಖಗ್ಗೋ ವಿಛಿನ್ದತು ಸದಾ ದುರಿತಾರಿವಗ್ಗೇ।

ಸಂಕ್ಲೇಸದಾಹಮಪನೇತು ಸತಾಲವಣ್ಟ,

ಸಂವೀಜನೀ ಕುಮತಿಮಕ್ಖಿಕಮೋರಹತ್ಥೋ॥

೧೪.

ಆಕಡ್ಢನೋ ಜನವಿಲೋಚನಮತ್ತನಿನ್ನಂ,

ವಾರೇತು ಸಬ್ಬಗತಿವಾರನಮಙ್ಕುಸೋ ಸೋ।

ಪಾದಮ್ಬುಜಸ್ಸಿರಿವಿಲಾಸನಿಕೇತನಂ ವ,

ಪಾಸಾದಲಖಣಮುಪೇತು ಮನೋಪಸಾದಂ॥

೧೫.

ಪಾಣೀನಮತ್ತಭಜತಂ ವರಪುಣ್ಣಪತ್ತಂ,

ಸಮ್ಮಾ ದದಾತು ಪದನಿಸ್ಸಿತಪುಣ್ಣಪತ್ತೋ।

ಪಾದೇಸು ಜನ್ತು ಮನಬನ್ಧನದಾಮಭೂತಂ,

ದಾಮಂ ದಮೇತು ವಿಮಲಂ ಜನತಮ್ಮನಾನಿ॥

೧೬.

ಉಣ್ಹೀಸಕುಪ್ಪಲಮಣೀಪದುಮೇಹಿ ಪಾದಾ,

ಸಸ್ಸೇವಿಜನ್ತುಕರಣಾನಿ ವಿಭೂಸಯನ್ತು।

ಸನ್ನೇತ್ತನಾವುಪಗತಾನಮನಗ್ಘಕಾನಿ,

ಬೋಜ್ಝಙ್ಗಸತ್ತರತನಾನಿ ದದೇ ಸಮುದ್ದೋ॥

೧೭.

ಉತ್ತುಙ್ಗ ನಿಚ್ಚಲಗುಙಾ ಜಿತತಾಯ ನಿಚ್ಚಂ,

ಸೇವೀವ ಪಾದಸಿರಿ ನಿಚ್ಚ ಸಮುಬ್ಬಹಂ ವ।

ಅತ್ರಾಪಿ ಸಕ್ಕಭವನುಬ್ಬಹಣೇ ನಿಯುತ್ತೋ,

ಪಾದಟ್ಠಮೇರು ಭವತಂ ಭವತಂ ವಿಭೂತ್ಯಾ॥

೧೮.

ಸೋ ಚಕ್ಕವಾಳಸಿಖರೀ ಪ್ಯವತಂ ಸಮನ್ತಾ,

ಸಬ್ಬೂಪಸಗ್ಗವಿಸರಾಜನತಂ ಸಮಗ್ಗಂ।

ದೀಪಾ ಪುಥೂಪಿ ಚತುರೋ ದ್ವಿಸಹಸ್ಸ ಖುದ್ದಾ,

ಧಾರೇನ್ತ್ವಪಾಯಪತಮಾನಮದತ್ವ ಜನ್ತುಂ॥

೧೯.

ಸೂರೋ ಪಬೋಧಯತು ಜನ್ತು ಸರೋರುಹಾನಿ,

ಚನ್ದೋ ಪಸಾದ ಕುಮುದಾನಿ ಮನೋದಹೇಸು।

ನಕ್ಖತ್ತಜಾತಮಖಿಲಂ ಸುಭತಾಯ ಹೋತು,

ಚಕ್ಕಂ ಧಜಂ ರಿಪುಜಯಾಯ ಜಯದ್ಧಜಾಯ॥

೨೦.

ಜೇತುಂ ಸಸಂಸದ-ಸುದಸ್ಸನ-ಚಕ್ಕವತ್ತಿ,

ಚಕ್ಕಾನುಗನ್ತಲಲಿತಂ ಯಹಿಮಾವಹೇಯ್ಯ।

ಚಕ್ಕಾಣುವತ್ತಿ ಪರಿಸಾವತ-ಚಕ್ಕವತ್ತಿ,

ನಂವತ್ತತಂ ಪದಯುಗಂ ಜನತಾ ಹಿತಾಯ॥

೨೧.

ಪುಜೇತುಮಾಗತ ವತಾ ವಜಿರಾಸನಟ್ಠ,

ಮಿನ್ದೇನ ಛಡ್ಡಿತ ಮಹಾವಿಜಯುತ್ತರಾಖ್ಯಂ।

ಸಂಖಂ ಪವಿಟ್ಠಮಿವ ಮಾರಭಯಾ ಪದಾಧೋ,

ಪಾದಟ್ಠಸಂಖಮಿಹ ವತ್ತತು ಸನ್ತಿಯಾ ವೋ॥

೨೨.

ಸೋವಣ್ಣಮಚ್ಛಯುಗಲಂ ಸಿವಭತ್ತ ಭೋಗೇ,

ಇಚ್ಛಾ ಬಹೂಪಕರಣಂ ಭವತಂ ಜನಾನಂ।

ಕುಮ್ಭೀಲಧಿಗ್ಗಹಿತತೋ ವ ಪದುತ್ಥಚಿತ್ತಾ,

ಪಾದಮ್ಬುಜಾಕರ ವಿಗಾಹಿ ತು ನೋಪಹೋನ್ತು॥

೨೩.

ಸತ್ತಾಪಗಾ ಜನಮನೋಜ ಮಲೇ ಜಹನ್ತು,

ಸಂಕ್ಲೇಸದಾಹಮಪನೇನ್ತು ದಹಾ ಚ ಸತ್ತ।

ಸೇಲಾ ಚ ಸತ್ತ ವಿದಧನ್ತು ಜನಸ್ಸ ತಾನಂ,

ಲೋಕಪ್ಪಸಿದ್ಧಿಜನನೇ ಭವತಂ ಪತಾಕಾ॥

೨೪.

ಪಾಟಙ್ಕಿ ಸನ್ತಿ ಗಮನೇ ಭವತೂಪಕಾರಾ,

ದಾಹೇತ್ತನೇಸು ಜಹತಂ ಪದಚಾಮರಂ ತಂ।

ಸಲ್ಲೋಕಲೋಚನಮಹುಸ್ಸವ-ಉಸ್ಸಿತಂ ವ,

ವತ್ತೇಯ್ಯ ತೋರಣಮನುತ್ತರಮಙ್ಗಲಾಯ॥

೨೫.

ಯಸ್ಮಿಂ ಮಿಗಿನ್ದ ಗತ ಭೀತಿ ಬಲಾವ ದಡ್ಢ,

ದಾನಾ ನತಾ ಸಿರವಿದಾರಣ ಪೀಳಿತಾವ।

ನಾಲಾಗಿರೀ ಕರಿವರೋ ಗಿರಿಮೇಖಲೋ ಚ,

ತಂ ಸೀಹವಿಕ್ಕಮಪದಂ ಹನತಾ ಘದನ್ತಿಂ॥

೨೬.

ಪಾಪಾಹಿನೋ ಹನತು ಪಾದಸುವಣ್ಣರಾಜಾ,

ವ್ಯಗ್ಘಾಧಿಪೋ ಕಲಿಜನೇ ಅದತಂ ಅಸೇಸಂ।

ವಾಲಾಹ-ಅಸ್ಸಪತಿ ಸಮ್ಪತಿತುಂ ಅದತ್ವಾ,

ಪಾಯೇಸು ಪಾಪಯತು ಸನ್ತಿಪುರಮ್ಪಜಾಯೋ॥

೨೭.

ಛದ್ದನ್ತ ದನ್ತಿ ಲಲಿತಂ ಗಲಿತಂ ರುಸಮ್ಹಾ,

ಲುದ್ದೇತ್ತ ದುಬ್ಭಿನಿ ದಿಸೇ ಅಚಲಂ ದಧಾನೋ।

ಪಾದಟ್ಠಹತ್ಥಿಪತಿ ಸಮ್ಪತಿ ಜನ್ತುತಾಸೇ,

ತಾಸೇತು ಹಾಸಮಪರನ್ದಿಸತಂ ಸತಾನಂ॥

೨೮.

ಸಬ್ಬಙ್ಗಿನೋ ಚರಣುಪೋಸಥ ಹತ್ಥಿರಾಜಾ,

ಪಾಪೇತು ಸಬ್ಬಚತುದೀಪಿಕರಜ್ಜಲಕ್ಖಿಂ।

ಕಿತ್ತೀವ ಪಾದಪರಿಚಾರಿಕತಾ ನಿಯುತ್ತಾ,

ಕೇಲಸಸೇಲಪಟಿಮಾ ಹಿತಮಾಚರೇಯ್ಯ॥

೨೯.

ಸಾಮಿಸ್ಸ ಹಂಸಸಮಯೇ ದಹಪಾಸಬದ್ಧ,

ಮಾಸೀನ ವೇಸಗಮಕೋ ವಿಯ ಪಾದಹಂಸೋ।

ನಿಗ್ಘೋಸ ಗನ್ತಿಜಿತತೋ ವಿಯ ಮೂಗಪಕ್ಖೋ,

ಯಾರೇತು ಸಬ್ಬ ಜನತಾ ಭವಗನ್ತುಕತ್ತಂ॥

೩೦.

ಓಹಾಯ ದಿಬ್ಬಸರಸಿಂ ಖಿಲಲೋಕ ಸಬ್ಬ,

ರಮ್ಮಙ್ಘಿವಾಪಿಮವಗಾಹಿತವಾವ ಪಾದೇ।

ಏರಾವಣೋ ಕರಿವರೋ ಮನಸಾಭಿರುಳ್ಹೇ,

ಜನ್ತುಂ ಪುರಿನ್ದದಪುರಂ ನಯತಂ ವ ಸೀಘಂ॥

೩೧.

ಹಿತ್ವಾ ಸಕಮ್ಭವನಮಙ್ಘಿನಿಸೇವನತ್ಥ,

ಮಾಗಮ್ಮ ರಮ್ಮ ತರತಾಯಿಹ ನಿಸ್ಸಿತೋ ವ।

ಪಾಲೇತ್ವ ಮೂನಿ ಪದವಾಪಿತರಙ್ಗಭಙ್ಗಿ,

ಮನ್ಗೀ ಕರೋನ್ತತನುವಾಸುಕಿ ನಾಗರಾಜಾ॥

೩೨.

ನಾಥಸ್ಸ ಕಞ್ಚನಸಿಖಾವಲಜಾತಿಲೀಲ,

ಮಾವಿಕರಂ ವ ಪದನಿಸ್ಸಿತಮೋರರಾಜಾ।

ತಂ ಧಮ್ಮದೇಸನರವೇನಿವ ಲುದ್ದಕಸ್ಸ,

ಲೋಕಸ್ಸ ಪಾಪಫಣಿನೋ ಹನತಂ ಅಸೇಸಂ॥

೩೩.

ಸಂಸಾರಸಾಗರಗತೇ ಸಧನೇ ಜನೇ ತೇ,

ನೇತಮ್ಪದೇ ಕಲಚತುಮ್ಮುಖಹೇಮನಾವಾ।

ನಿಬ್ಬಾಣಪಟ್ಟನವರಂ ಭರುಕಚ್ಛಕನ್ತಂ,

ಸುಪ್ಪಾರಪಣ್ಡಿತ ಗತಾ ವಿಯ ಆಸುನಾವಾ॥

೩೪.

ಸಮ್ಬೋಧಿ ಞಾಣ ಪರಿಪಾಚಯತೋ ಮುನಿಸ್ಸ,

ಭತ್ತೋ ಯಥಾ ಹಿಮವತದ್ದಿ ಸಮಾಧಿಹೇತು।

ಏವಮ್ಮನೇನ ಭಜತಂ ಹಿಮವದ್ದಿಪಾದೇ,

ಸಮ್ಬೋಧಿಞಾಣ ಪರಿಪಾಚನಹೇತು ಹೋತು॥

೩೫.

ದಳ್ಹಂ ಪರಾಜಿತತಯಾ ಮುನಿನಾ ಸರೇನ,

ಸುಞ್ಞಸ್ಸರೋಪಗತ ಪಞ್ಜರ ಬನ್ಧನೋವ।

ಸೋ ಪಾದಪಞ್ಜರಗತೋ ಕರವೀಕಪಕ್ಖೀ,

ಸಬ್ಬೇಸಮಪ್ಪೀಯಾವಚಞ್ಜಹತಾ ಭವನ್ತಂ॥

೩೬.

ತೇ ಚಕ್ಕವಾಕ ಮಕರಾ ಅಪಿ ಕೋಞ್ಚ ಜೀವಂ,

ಜೀವಾದಿ ಪಕ್ಖಿವಿಸರಾ ಸರಸೀವ ಭುತ್ತಂ।

ವೇಸ್ಸನ್ತರೇನ ಚರಣಮ್ಬುಜಿ ನಿಬ್ಭಜನ್ತಾ,

ಜನ್ತು ತಹಿಂ ವಿಯ ಪದೇ ಸುರಮೇನ್ತು ನಿಚ್ಚಂ॥

೩೭.

ತಂ ಚನ್ದಕಿನ್ನರಗತಿಂವ ಗತಸ್ಸ ಬೋಧಿ,

ಸತ್ತಸ್ಸ ತಸ್ಸ ಸಪಜಾಪತಿಕಸ್ಸ ಭಾವಂ।

ಸಂಸೂಚಯನ್ತ ಪದ ಕಿನ್ನರ ಕಿನ್ನರೀ ವೇ,

ಸಾಮಗ್ಗಿಮಗ್ಗ ಪಟಿ ಪತ್ತಿಸು ಪಾಪಯನ್ತು॥

೩೮.

ಸಂರಾಜಧಾನಿಮುಸಭೋ ವಹತಗ್ಗ ಭಾರಂ,

ಪೀತಿಪ್ಪಯೋ ಪಜನಯೇಯ್ಯ ಸವಚ್ಛಧೇನು।

ಸಸ್ಸೇವಿನೋ ಅಭಿರಮೇನ್ತು ಛಕಾಮಸಗ್ಗಾ,

ಧಾರೇನ್ತು ಝಾಯಿಮಿಹ ಸೋಳಸ ಧಾತುಧಾಮಾ॥

೩೯.

ಸುತ್ವಾ ಜಿನಸ್ಸ ಕರವೀಕ ಸರಮ್ಮನುಞ್ಞಂ,

ಅಞ್ಞೋಞ್ಞ ಭೀತಿರಹಿತಾ ಅಪಿ ಪಚ್ಚನೀಕಾ।

ಹಿತ್ವಾ ಗತಿಂ ವಿಯ ಠಿತಾ ಪದಸತ್ತರೂಪಾ,

ಸಬ್ಬಂ ಭವಸ್ಸಿತ ಜನಾನಗತಿಂ ಹನನ್ತು॥

೪೦.

ಸೋವಣ್ಣ ಕಾಹಳ ಯುಗೋ ಪಮಮಿನ್ದಿರಾಯ,

ಸನ್ನೀರಪುಪ್ಫ ಮುಕುಲೋಪಮಮುಸ್ಸವಾಯ।

ನಿಚ್ಚಂ ಸುಸಜ್ಜ ಠಪಿತಂ ಮುನಿ ತಿಟ್ಠತನ್ತೇ,

ಜಙ್ಘಾದ್ವಯಂ ಜನವಿಲೋಚನ ಮಙ್ಗಲಾಯ॥

೪೧.

ಲಖ್ಯಾ ವಿಲಾಸ ಮುಕುರದ್ವಯ ಸನ್ನಿಕಾಸಂ,

ತಾಡಙ್ಕ ಮಣ್ಡನ ವಿಡಮ್ಬಕಮಂಸು ಸಣ್ಡಂ।

ಜಾನುದ್ವಯಂ ಲಳಿತ ಸಾಗರ ಬುಬ್ಬಲಾಭಂ,

ಹೋತಂ ಜಗತ್ತಯ ನಿಜತ್ತ ವಿಭೂಸಿತುನ್ತೇ॥

೪೨.

ಛದ್ದನ್ತಿ ದಿನ್ನ ವರದನ್ತ ಯುಗೋಪಮಾನಾ,

ತಂ ಹತ್ಥಿ ಸೋಣ್ಡ ಕಮ ಪುಣ್ಣ ಗುಣಾ ತವೋರೂ।

ಲೀಲ ಪಯೋಧಿ ಸಿರಿ ಕೇಳಿ ಸುವಣ್ಣರಮ್ಭಾ,

ಖನ್ಧಾವ ದೇನ್ತು ಪರಿಪುಣ್ಣ ಗುನೇ ಜನಾನಾಂ॥

೪೩.

ಜಙ್ಘಕ್ಖ ಕದ್ವ್ಯ ಸಮಪ್ಪಿತ ಚಿತ್ತಪಾದ,

ಚಕ್ಕದ್ವಯೀ ಮನಮನೋಜಹಯೋ ಮುನೇ ತೇ।

ಸೋನೀ ರಥೋ ಸಿರಿವಹೋ ಮನಸಾ ಭಿರುಳ್ಹಂ,

ಲೋಕತ್ತಯಂ ಸಿವಪುರಂ ಲಹು ಪಾಪಯಾತು॥

೪೪.

ರಮ್ಮೋರ ಪಾಕಟ ತಟಾಕ ತಟಾ ಸವನ್ತ,

ರೋಮಾವಲೀ ಜಲ ಪನಾಲಿಕ ಕೋಟಿಕಟ್ಠಾ।

ನಾಭೀ ಗಭೀರ ಸರಸೀ ಸಿರಿ ಕೇಳಿತಾ ತೇ,

ಸಸ್ಸೇವಿನಂ ವ್ಯಸನ ಘಮ್ಮಮಲಂ ಸಮೇತು॥

೪೫.

ಕನ್ತಿಚ್ಛಟಾ ಲುಳಿತ ರೂಪ ಪಯೋಧಿ ನಾಭಿ,

ಆವಟ್ಟ ವಟ್ಟಿತ ನಿಮುಜ್ಜಿತ ಸಬ್ಬಲೋಕೋ।

ಸೋಭಗ್ಗ ತೋಯ ನಿವಹಂ ವಿಸಸೋ ಪಿವಿತ್ವಾ,

ಲೋಕುತ್ತರಾದಿ ಸುಖ ಮುಚ್ಛಿತತಂ ಪಯಾತು॥

೪೬.

ಗಮ್ಭೀರ ಚಿತ್ತರಹದಂ ಪರಿಪೂರಯಿತ್ವಾ,

ತಂ ಸನ್ದಮಾನ ಕರುಣಮ್ಬು ಪವಾಹ ತುಲ್ಯಾ।

ರೋಮಾಲಿವಲ್ಲಿಹರಿ ನಾಭಿ ಸುಭಾಲವಾಲಾ,

ದೇತಂ ಲಹುಂ ಸಿವಫಲಂ ಭಜತಂ ಮುನೇ ತೇ॥

೪೭.

ಚಾರೂರ ಸಾರಿಫಲಕೋ ಕುಟಿಲಗ್ಗ ಲೋಮ,

ಪನ್ತೀ ವಿಭತ್ತಿ ಸಹಿತೋ ಸಿರಿ ಕೇಳಿ ಸಜ್ಜೋ।

ಸಗ್ಗಾಪವಗ್ಗ ಸುಖ ಜೂತಕ ಕೇಳಿ ಹೇತು,

ಹೋತಂ ತಿಲೋಕ ಸುಖ ಜೂತಕ ಸೋಣ್ಡಕಾನಂ॥

೪೮.

ಗಮ್ಭೀರ ಚಿತ್ತ ರಹದೋ ದರ ಗಾಹಮಾನ,

ಮೇತ್ತಾದಯಾ ಕರಿ ವಧೂ ಕರ ಸನ್ನಿ ಕಾಸಾ।

ಸಬ್ಬಙ್ಗಿನಂ ಸಿವಫಲಂ ತನು ದೇವ ರುಕ್ಖೇ,

ಸಾಖಾ ಸಖಾ ತವ ಭುಜಾ ಭಜತಂ ದದನ್ತು॥

೪೯.

ನಿಹಾರ ಬಿನ್ದು ಸಹಿತಗ್ಗದಲೋಪ ಸೋಭಿ,

ಬ್ಯಾಲಮ್ಬ ರತ್ತ ಪದುಮದ್ವಯ ಭಙ್ಗಿ ಭಾಜಾ।

ಪಾಪಾರಿಸೀಸಲುನತೇನಿವ ರತ್ತ ರತ್ತಾ,

ರತ್ತಾ ಕರಾ ತವ ಭವುಮ್ಭುವಿ ಮಙ್ಗಲಾಯ॥

೫೦.

ರುಪಸ್ಸಿರೀ ಚರಿತ ಚಙ್ಕಮ ವಿಬ್ಭಮಾ ತೇ,

ಪಿಟ್ಠೀ ಯಥಾ ಕಲಲ ಮುದ್ಧನಿ ಸೇತು ಭೂತಾ।

ಏವಂ ಭವಣ್ಣವ ಸಮುತ್ತರಣಾಯ ಸೇತು,

ಹೋತಮ್ಮಹಾಕನಕ ಸಂಕಮ ಸನ್ನಿಕಾಸಾ॥

೫೧.

ಸದ್ಧಮ್ಮ ದೇಸನ ಮನೋಹರ ಭೇರಿನಾದ,

ಸಂಚಾರಣೇ ಸಿವಪುರಂ ವಿಸಿತುಂ ಜನಾನಂ।

ಗೀವಾ ಸುವಣ್ಣಮಯ ಚಾರು ಮುತಿಙ್ಗ ಭೇರಿ,

ಭಾವಮ್ಭಜಾ ಭವತು ಭೂತ ವಿಭೂತಿಯಾ ತೇ॥

೫೨.

ಲಖೀ ನಿವಾಸ ವದನಮ್ಬುಜ ಮತ್ತ ನಿನ್ನ,

ಮಾಕಡ್ಢಯಂ ಜನ ವಿಲೋಚನ ಚಞ್ಚರೀಕೇ।

ಸೋರಬ್ಭ ಧಮ್ಮ ಮಕರನ್ದ ನಿಸನ್ದಮಾನಂ,

ಪಿಣೇತು ತೇನ ಸರಸೇನ ಸಭಾ ಜನೇ ತೇ॥

೫೩.

ಲಖೀ ಸಮಾರುಹಿತ ವತ್ತರಥೇ ರಥಙ್ಗ,

ದ್ವನ್ದಾನು ಕಾರಿ ಮಿಗ ರಾಜ ಕಪೋಲ ಲೀಲಂ।

ತಾದಙ್ಕ ಮಣ್ಡಲಯುಗಂ ವಿಯ ಕಣ್ಣಭಾಜಂ,

ಗಣ್ಡತ್ಥಲದ್ವ್ಯಮಲಂಕುರುತಂ ಜನತ್ತೇ॥

೫೪.

ಲಾವಣ್ಣ ಮಣ್ಣವ ಪವಾಳ ಲತಾ ದ್ವಯಾಭಂ,

ತನ್ದೇಹ ದೇವ ತರು ಪಲ್ಲವ ಕನ್ತೇ ಮನ್ತಂ।

ವತ್ತಾರವಿನ್ದ ಮಕರನ್ದ ಪರಾಜಿಸೋಭಂ,

ರತ್ತಾಧರದ್ವಯಮಧೋ ಕುರುತಂ ಜನಾಘಂ॥

೫೫.

ಉಣ್ಣಾ ಸಕುನ್ತಿಗತ ಮತ್ಥಕ ನತ್ಥು ಕೂಪ,

ಸುಬ್ಭೂ ಲಕಾರ ಸಹಿತೋಟ್ಠ ಪವಾಳ ನಾವಾ।

ಗತ್ತುತ್ತರರಣ್ಣವ ಗತಾ ತವ ಜನ್ತುಕಾನಂ,

ಹೋತಂ ಭವಣ್ಣವ ಸಮುತ್ತರನಯ ನಾಥ॥

೫೬.

ಇಸಂ ವಿಕಾಸ ಪದುಮೋದರ ಕೇಸರಾಲಿ,

ಲೀಲಾ ವಿನದ್ಧ ರುಚಿರಾ ತವ ದನ್ತ ಪನ್ತಿ।

ವಾನೀ ವಧೂ ಧರಿತ ಮಾಲತಿ ಮಾಲ್ಯ ತುಲ್ಯಾ,

ತಸ್ಸಂ ಜಾನಸ್ಸ ಮನರಞ್ಜನ ಮಾಚರೇಯ್ಯ॥

೫೭.

ಸದ್ಧಮ್ಮ ನಿಜ್ಝರ ಸುರತ್ತ ಸಿಲಾತಲಾಭಾ,

ಜಿವ್ಹಾ ವಚೀ ನಟ ವಧೂ ಕಲ ರಙ್ಗ ಭೂತಾ।

ಸದ್ಧಮ್ಮ ಸೇಟ್ಠ ತರಣೀ ನಿಹಿತಪ್ಪಿಯಾ ತೇ,

ಸಂಸಾರ ಸಾಗರ ಸಮುತ್ತರಣಾಯ ಹೋತು॥

೫೮.

ದನ್ತಂಸು ಕಞ್ಚುಕೀತ ರತ್ತಧರೋ ಪಧಾನೇ,

ಜಿವ್ಹಾ ಸುರತ್ತ ಸಯನೇ ಮುಖ ಮನ್ದಿರಟ್ಠೇ।

ಆಮೋಕ್ಖ ಮುತ್ತಿ ವಧುಯಾ ಸಯಿತಾಯ ತುಯ್ಹಂ,

ಕುಬ್ಬನ್ತು ಸಂಗಮ ಮಲಂ ಜನ ಸೋತು ಕಾಮಿ॥

೫೯.

ಉಣ್ಣಾ ತಥಾಭಿನವ ಪತ್ತ ವರಾಭಿ ರಾಮಾ,

ಲೀಲೋಲ್ಲಸನ್ತ ಭಮುಕದ್ವಯ ನೀಲ ಪತ್ತಾ।

ಘಾನೋರು ಚಾರು ಕದಲೀ ವದನಾ ಲವಾಲಾ,

ತುಯ್ಹಂ ಪವತ್ತತು ಚಿರಂ ಜನ ಮಙ್ಗಲಾಯ॥

೬೦.

ಬಾಲತ್ಥಲೀ ಹರಿ ಸಿಲಾತಲ ಪಿಟ್ಠಿಕಟ್ಠ,

ಭೂವಲ್ಲರಿದ್ವಯ ಮಯೂರ ಯುಗಸ್ಸ ತುಯ್ಹಂ।

ಪಞ್ಚಪ್ಪಭಾ ರುಚಿರ ಪಿಚ್ಛ ಯುಗಸ್ಸಿರೀಕಂ,

ನೇತ್ತದ್ವಯಂ ಮನಸಿ ಪುಞ್ಛತು ಪಾಪಧೂಲಿಂ॥

೬೧.

ಇನ್ದೀವರಾನ್ತಗತ ಭಿಙ್ಗಿಕ ಪನ್ತಿ ಭಙ್ಗಿ,

ಪಞಮ್ಬುಜಸ್ಸರತತೇ ವಿಯ ಗಚ್ಛಪನ್ತೀ।

ನೇತ್ತಮ್ಬುಜಸ್ಸಿರಿ ತಿರೋಕರಣೀವ ತುಯ್ಹಂ,

ಪಮ್ಹಾವಲೀ ಸಿರಿಗತೇಹ ತಿರೋ ಕರೋನ್ತು॥

೬೨.

ವತ್ತುಲ್ಲಸಮ್ಬುಜ ವಿಲೋಚನ ಹಂಸ ತುಣ್ಡ,

ಕಞ್ಜಂಸು ಪಿಞ್ಜರ ಮುಲಾಲ ಲತಾ ದ್ವ್ಯಾಭಂ।

ದೋಲಾದ್ವಯಂವ ಸವಣದ್ವ್ಯಮತ್ತ ಲಕ್ಖ್ಯಾ,

ಹೋತಂ ತವಜ್ಜ ಜನತಾ ಮತಿಚಾರಹೇತು॥

೬೩.

ವಮ್ಮೀಕ ಮತ್ಥಕ ಸಯಾನಕ ಭೂರಿದತ್ತ,

ಭೋಗಿನ್ದ ಭೋಗವಲಿ ವಿಬ್ಭಮಮಾ ವಹನ್ತಿ।

ಘಾನೋಪರಿಟ್ಠಿತಮುನೇ ತವ ತುಣ್ಣಮುಣ್ಣಾ,

ತಗ್ಗಾಹಿನೋ ವಿಯ ಜನಸ್ಸ ದದಾತು ವಿತ್ತಂ॥

೬೪.

ರೂಪಿನ್ದಿರಾಯ ವಿಜಯೇ ಖಿಲ ಲೋಕ ರೂಪಂ,

ಘಾಣೋರು ಚಾರು ಪರಿಘೋಪರಿ ಬದ್ಧ ಸಿದ್ಧಾ।

ನೀಲಾಭ ವಾತ ವಿಲುಥನ್ತ ವಯದ್ಧಜಾಭಾ,

ತಿಟ್ಠನ್ತು ಸಜ್ಜ ದುರಿತಾರಿ ಜಯಾಯ ತೇ ಭೂ॥

೬೫.

ಉಣ್ಣಸ್ಸಿತೋಪಲ ನಿವೇಸಿತ ಬುನ್ದ ಸನ್ಧಿ,

ಘಾಣೋರು ಪಿಣ್ಡಕಮಘಾ ತಪ ರುನ್ಧಿತುನ್ತೇ।

ಹೋತಮ್ಮುಖಮ್ಬುಜ ಸಿರೀ ಸಿರಸುಸ್ಸಿತಾಭಂ,

ಭೂ ನೀಲ ಪಟ್ಟಿಕ ಲಲಾತ ಸುವಣ್ಣ ಛತ್ತಂ॥

೬೬.

ರುಪಙ್ಕ ವೇದನ ವಿಲೋಚನ ಬಾನ ದಿಟ್ಠೀ,

ಧಾರಾ ನಿಸಾನ ಮಣಿವಟ್ಟ ಸಿರೀ ಸಿರೋ ತೇ।

ಸಿದ್ಧಾ ಮತೋಸಧ ಕತಞ್ಜನ ಪುಞ್ಜ ಲಕ್ಖೀ,

ಹೋತಂ ಜನಸ್ಸ ನಯನಾಮಯ ನಾಸನಾಯ॥

೬೭.

ಸಕ್ಖನ್ಧ ಬಾಹುಯುಗ ತೋರನ ಮಜ್ಝ ಗೀವಾ,

ಧರಪ್ಪಿತಸ್ಸಿರಿಘತೋ ಪರಿ ಮುಸ್ಸವಾಯ।

ನೀಲುಪ್ಪಲಾವ ಠಪಿತಾ ಸವಿಭತ್ತಿ ಕನ್ತೇ,

ಕೇಸಾ ಭವನ್ತು ಭುವನತ್ತಯ ಮಙ್ಗಲಾಯ॥

೬೮.

ಹೇಮಗ್ಘಿಯೇ ಠಪಿತ ನೀಲ ಸಿಲಾ ಕಪಾಲೇ,

ಪಜ್ಜೋತ ಜಾಲ ಲಲಿತಂ ಮುನಿ ಸಾರಯನ್ತೀ।

ರೂಪಸ್ಸಿರೀ ಸಿರಸಿ ಭೂಸಿತ ಹೇಮ ಮಾಲಾ,

ಕಾರಾ ಕರೋತು ಸುಭಗಂ ತವ ಕೇತು ಮಾಲಾ॥

೬೯.

ಭ್ಯಾಮಪ್ಪಭಾಲಿ ತವ ಕಞ್ಚನ ಮೋರ ಕಾಲೇ,

ಸುರೋದಯೇ ವಿತತ ಚನ್ದಕ ಚಕ್ಕಲಕ್ಖೀ।

ಮೇಘಾವನದ್ಧ ಸಿಖರುನ್ನತ ಹೇಮ ಸೇಲಾ,

ಯನ್ತಿನ್ದಚಾಪ ವಿಕತೀವ ದದಾತು ಸೋಭಂ॥

೭೦.

ಪಟ್ಠಾಯ ತೇ ಪಣಿಧಿತೋ ಸುಚಿ ದಾನ ಸೀಲ,

ನೇಕ್ಖಮ್ಮ ಪಞ್ಞ ವಿರಿಯಕ್ಖಮ ಸಚ್ಚಧಿಟ್ಠಾ।

ಮೇತ್ತಾ ಉಪೇಕ್ಖಿತಿ ಇಮೇ ದಸ ಪೂರತೋವ,

ಪೂರೇನ್ತು ಪಾರಮಿ ಗುಣಾ ಜನತಾನಮತ್ತೇ॥

೭೧.

ಪತ್ತುತ್ತರುತ್ತರದಸಾ ಪಣಿಧಾನ ಬೀಜಾ,

ಚೇತೋರಧರಾಯ ಕರುಣಾ ಜಲ ಸೇಖ ವುದ್ಧಾ।

ಸಬ್ಬಞ್ಞು ಞಾಣ ಫಲದಾ ಸತಿ ವಾಟ ಗುತ್ತಾ,

ತಂ ಸಮ್ಫಲನ್ದಿಸತು ಪಾರಮಿತಾ ಲತಾ ತೇ॥

೭೨.

ಆಬೋಧಿ ಪುಣ್ಣಮಿ ಪದಿಟ್ಠ ದಿನಾದಿತೋ ತೇ,

ಸಮ್ಭಾರ ಕಾಲ ಸಿತ ಪಕ್ಖ ಕಮಾಭಿ ವುದ್ಧೋ।

ಸಮ್ಪುಣ್ಣ ಪಾರಮಿ ಗುಣಾಮತರಂಸಿ ತಂವ,

ಸಬ್ಬಙ್ಗಿ ಕುನ್ದ ಕುಮುದಾನಿ ಪಬೋಧಯೇಯ್ಯ॥

೭೩.

ಆಪಚ್ಛಿಮಬ್ಭವ ಸಿವಪ್ಫಲ ಲಾಭ ದಾನಾ,

ದಾನಪ್ಪಬನ್ಧಮಪಿದಾನ ಫಲಪ್ಪಭನ್ದಂ।

ಸಂವಡ್ಢಯಿ ತ್ವಂ ಅಭಿಪತ್ಥನತೋ ಯಥೇವಂ,

ಜನ್ತುತ್ತರುತ್ತರ ಫಲಂ ಖಲು ಸಮ್ಭುನನ್ತು॥

೭೪.

ಆರಮ್ಭತೋಪ್ಪಭುತಿ ಯಾವ ತವಗ್ಗಮಗ್ಗಾ,

ವಿಕ್ಖಾಲಿತ ಘಕಲುಸಂ ಸುಚಿ ಸೀಲ ತೋಯಂ।

ಮೇತ್ತಾ ದಯಾ ಮಧುರ ಸೀತಲತಾಯುಪೇತಂ,

ಸೋಧೇತು ತ್ವಂವ ಭವ ನಿಸ್ಸಿತ ಜನ್ತು ಮೇತಂ॥

೭೫.

ಆಪಚ್ಚಿಮತ್ತಮಭಿನಿಕ್ಖಮನಾಭಿಯೋಗಾ,

ಪಟ್ಠಾಯ ತಮ್ಪಭವತೋ ಪರಿಪುಣ್ಣ ಗೇಹಾ।

ತ್ವಂ ಸಬ್ಬ ಜಾತಿ ಗಹತೋ ಅಪಿ ನಿಕ್ಖಮಿತ್ಥೋ,

ಏವಂ ಜನಾ ಭವ ದುಖಾ ಖಲು ನಿಕ್ಖಮನ್ತು॥

೭೬.

ಏಕಗ್ಗತೋ ಪಲ ತಲೇ ನಿಸಿತಾ ಚಿರನ್ಧಿ,

ಧಾರಾ ಸುಚಿತ್ತು ಸುತಲೇ ಸತಿ ದಣ್ಡ ಬದ್ಧೇ।

ನಿಬ್ಬಿಜ್ಝಿ ಲಕ್ಖಣ ಧನುಟ್ಠಿತಿ ಸನ್ತಿ ಲಕ್ಖಂ,

ಖಿತ್ತಾ ತಯೋನಮನು ವಿಜ್ಝತು ಜನ್ತು ಖಿತ್ತಾ॥

೭೭.

ತ್ವಂ ಪಾರಮೀ ಜಲ ನಿಧಿಂ ಚತುರಿಹ ಬಾಹು,

ಸತ್ತೀಹಿ ಸುತ್ತರಿ ಚಿರಂ ಜನಕೋವ ಸಿನ್ಧುಂ।

ಸಮ್ಪನ್ನ ವಿಕ್ಕಮ ಫಲೋಸಿ ಯಥಾ ಚಸೋವ,

ಏವಂ ಜನಾ ವಿರಿಯತಪ್ಫಲಮೇ ಧಯನ್ತು॥

೭೮.

ಸತ್ತ ಪರಧ ದಹನೇಸು ಚಿರಂ ಸುಧನ್ತಂ,

ಖನ್ತೀ ಸುವಣ್ಣ ಕತ ರೂಪ ಸಮನ್ತಿಮತ್ತಾ।

ಸಬ್ಬಾ ಪರಾಧಮಸಹಿ ತ್ವಂಅಸಯ್ಹಮೇವಂ,

ಸಬ್ಬೇ ಜನಾಪಿ ಖಮನೇನ ಭಜನ್ತು ಸನ್ತಿಂ॥

೭೯.

ಲಕ್ಖಾಧಿಕಂ ಚತುರ ಸಂಖಿಯ ಕಪ್ಪ ಕಾಲಂ,

ಸಚ್ಚೇನ ಸುಟ್ಠು ಪರಿಭಾವಿತ ವಾಚಿನೋ ತೇ।

ವಾಚಾಯ ಸಚ್ಚ ಫುಸಿತಾಯ ಸಮೇನ್ತಿ ಜನ್ತು,

ಏವಂ ವಿಸುದ್ಧ ವಚನಾ ಜನತಾ ಭವನ್ತು॥

೮೦.

ಆದಿನ್ನ ಧಮ್ಮ ಮಹಿಯತ್ಥಿರ ಸುಪ್ಪತಿಟ್ಠಾ,

ಧಿಟ್ಠಾನ ಪಾರಮಿ ಮಹಾ ವಜಿರದ್ದಿ ತುಯ್ಹಂ।

ಸತ್ತೇನ ಕೇನ ಪಿ ಯಥಾಹಿ ಅಭೇಜ್ಜ ನೇಜ್ಜೋ,

ಏವಂ ಜನಾಪಿ ಕುಸಲೇಸು ಅಧಿಟ್ಠ ಹನ್ತು॥

೮೧.

ತ್ವಂ ಸಬ್ಬ ಸತ್ತ ಚಿರಭಾವಿತ ಮೇತ್ತ ಚಿತ್ತ,

ತೋಯೇಹಿ ಸಂಸಮಿತ ಕೋಧ ಮಹಾ ಹುತಾಸೋ।

ಲೋಕುತ್ತರಂ ತದಿತರಂ ಹಿತಮಾವಹಿತ್ಥೋ,

ಏವಂ ಜನೇಸು ಜನತಾ ಹಿತಮಾವಹನ್ತೂ॥

೮೨.

ಮಿತ್ತೋಪಕಾರ ಪಟಿಪಕ್ಖ ಜನಾಪಕಾರೇ,

ತ್ವಂ ನಿಬ್ಬಿಕಾರ ಮನಸೋ ಚಿರಭಾವನಾಯ।

ಪತ್ತೋಸಿಲಾಭ ಪಭುತಟ್ಟುಸು ನಿಬ್ಬಿಕಾರಂ,

ಏವಂ ಜನಾನುನಯ ಕೋಪ ನುದಾ ಭವನ್ತು॥

೮೩.

ಸಮ್ಪನ್ನ ಹೇತು ವಿಭವೋ ತುಸಿತೇ ವಿಮಾನಂ,

ಯುತ್ತಂ ಗುಣೇಹಿ ನವಭಿಪ್ಪದವೀ ವಿಮಾನಂ।

ತ್ವಂ ವಾಧಿಪರಮಿಧಿರೋಹಿನಿಯಾ ತಿಲೋಕೋ,

ಆರೋಹತು ಭಯ ಸುಖಂ ಪದವೀ ವಿಮಾನಂ॥

೮೪.

ತ್ವಂವೇರಹಂಸಿ ಸಮಬುಜ್ಝಿ ಯಥಾಚ ಸಮ್ಮಾ,

ಸಮ್ಪನ್ನ ವಿಜ್ಜ ಚರಣೋ ಸುಗತೋಸಿ ಹೋನ್ತು।

ಲೋಕಂ ವಿದೋ ಪುರಿಸದಮ್ಮಸುಸಾರಥೀ ಸಿ,

ಸತ್ಥಾಸಿ ಬುಜ್ಝಿ ಭಗವಾ ಸಿ ತಥೇವ ಜನ್ತು॥

೮೫.

ಸಚ್ಚಿತ್ತ ಭೂ ನಿದಹಿತಂ ಜನತಾಯ ತುಯ್ಹಂ,

ಕಲ್ಯಾಣವಣ್ಣರತನಣ್ಣವಜಾತಿಭಿನ್ನಂ।

ದುಕ್ಖಗ್ಗಿ ಚೋರ ಜಲುಪದ್ದುತಜಾತಿ ಗೇಹೇ,

ತಸ್ಸಾ ಸುಖಂ ಭವತು ಜೀವಿತುಮಾಪದಾಯ॥

೮೬.

ವಾಚಾ ವಿಚಿತ್ತ ವರ ತನ್ತು ಗತಙ್ಗಿ ಕಣ್ಠೇ,

ಸ್ವಾ ಮುತ್ತ ಸಗ್ಗುಣ ಮಹಾ ರತನಾ ವಲೀ ತೇ।

ವೇವಣ್ಣಿ ಯತ್ತನಿ ಭವಂ ಸಕಲಮ್ಪಹಾಯ,

ಹೋತಞ್ಜನಸ್ಸ ಸಿರಿ ಸಙ್ಗಮ ಮಙ್ಗಲಾಯ॥

೮೭.

ತಂ ಸಗ್ಗುಣತ್ಥವ ದಹಟ್ಠ ಸುತಿಪ್ಪನಾಲಿ,

ನಿಸ್ಸನ್ದಮಾನ ಗುಣನೀರ ನಿಪಾನ ತಿನ್ತೇ।

ಖೇತ್ತೇತ್ತ ಸಞ್ಞಿನಿ ಜನಾ ಕತ ಲೋಮ ಹಂಸ,

ಬೀಜಙ್ಕುರೀ ಕುಸಲ ಸಸ್ಸ ಫಲಂ ಲಭನ್ತು॥

೮೮.

ಆಪಾಯಿಕಪ್ಪಭುತಿ ದುಕ್ಖ ನಿದಾಘ ಕಾಲ,

ಸನ್ತಾಪಿತಾ ನಿಖಿಲ ಲೋಕ ಮನೋ ಕದಮ್ಬಾ।

ತಂ ವಙ್ಣ ಮೇಘ ಫುಸನಾ ಹಸನಙ್ಕುರೇಹಿ,

ಇದ್ಧಾ ಭವನ್ತು ಮತಿ ವಲ್ಲರಿ ವೇಲ್ಲೀತಾ ತೇ॥

೮೯.

ಹೇತುದ್ದಸಾ ಫಲದಸಾ ಸಮವಟ್ಠಿತಂ ತಂ,

ಸಬ್ಬತ್ಥ ಸತ್ತ ಹಿತಮಾವಹಣೇನ ಸಿದ್ಧಂ।

ಚಿನ್ತಾಪಥಾತಿಗನುಭಾವ ವಿಭಾವನನ್ತೇ,

ಭೂತಾನಮತ್ಥು ಚರಿತಬ್ಭುತಮತ್ಥ ಸಿಧ್ಯಾ॥

೯೦.

ಅಙ್ಗಾರಕಾಸುಮಭಿಲಙ್ಘಿಯ ದಾನ ಕಾಲೇ,

ಭತ್ತತ್ತನೋ ಪದ ಪಟಿಚ್ಛಕ ಪಙ್ಕಜಾ ಚ।

ಯಾತಕ್ಖಣೇ ತವ ಪದೇ ಧಟಮುಟ್ಠಹಿತ್ವಾ,

ಪಙ್ಕೇರುಹಾಂ ಸಿವ ಮಧುಂ ಸರತಂ ದದನ್ತು॥

೯೧.

ಸಚ್ಚೇನ ಮಚ್ಛ ಪತಿ ವಸ್ಸಿತ ವಸ್ಸಧಾರಾ,

ಸತ್ತೇ ದಯಾಯ ತವ ವಸ್ಸಿತ ವಸ್ಸಧಾರಾ।

ಗಿಮ್ಹೇ ಜನಸ್ಸ ಸಮಯಿಂಸು ಯಥಾ ತಥಾತಾ,

ಧಮಮ್ಬುವುಟ್ಠಿವ ಸಮೇನ್ತು ಕಿಲೇಸ ದಾಹೇ॥

೯೨.

ಛದ್ದನ್ತ ನಾಗ ಪತಿನಾ ಖಮತಾ ಪರಾಧಂ,

ಛೇತ್ವಾ ಕರೇ ಠಪಿತ ದನ್ತವರಾವ ಲುದ್ದಂ।

ಲೋಕೇ ಹಿತಾಯ ಠಪಿತಾ ತವ ದನ್ತ ಧಾತು,

ಸೇಟ್ಠಾ ಜನಂ ಸಿವ ಪುರಂ ಲಹು ಪಾಪಯನ್ತು॥

೯೩.

ತಂ ತೇಮಿಯಾಖ್ಯ ಯತಿನೋಸ್ಸಮ ಮಾಲಕಮ್ಹಿ,

ಓಕಿಣ್ಣ ಮುತ್ತ ಕನಕಾ ವುಜ ವಿಪ್ಪಕಿಣ್ಣಾ।

ಕಾರುಞ್ಞ ವಾರಿದ ಚುತೋ ದಕ ಬಿನ್ದು ಬನ್ಧೂ,

ಧಾತು ಸಮೇನ್ತು ತವ ಜನ್ತುಸು ದುಕ್ಖದಾಹೇ॥

೯೪.

ರಟ್ಠಸ್ಸ ಅತ್ಥ ಚರಣಾಯ ಅಸಮ್ಮುಖಸ್ಸ,

ರಾಮೇನ ದಿನ್ನ ತಿಣ ಸಂಖತ ಪಾದುಕಾವ।

ಭುತ್ತಾ ತಯಾ ಚಿರಮಸಮ್ಮುಖ ನಾಗತಸ್ಸ,

ಲೋಕಸ್ಸ ಅತ್ಥಮನು ತಿಟ್ಠತು ಪತ್ತ ಧಾತು॥

೯೫.

ವುತ್ತೋ ಜನಾನಮುಪದಿಸ್ಸ ವರಾಹ ರಞ್ಞಾ,

ಸತ್ಥಿಂ ಸಹಸ್ಸ ಸರದಂ ವಿಯ ಞಾಯ ಧಮ್ಮೋ।

ಆದೇಯ್ಯ ಹೇಯ್ಯಮುಪದಿಸ್ಸ ತಯಾ ಪವುತ್ತೋ,

ಧಮ್ಮೋ ಪವತ್ತತು ಚಿರಂ ಜನತಾ ಹಿತಾಯ॥

೯೬.

ಮಾರಾರಿ ಮದ್ದನ ಹಿತಾಧಿಗಮಂ ಕರೋತಾ,

ಭತ್ತೋ ತಯಾ ವರ ಮಹಾ ಜಯ ಬೋಧಿ ರಾಜಾ।

ಸಗ್ಗಾ ಪವವಗ್ಗ ಹಿತಹೇತು ಜನಸ್ಸ ಹನ್ತ್ವಾ,

ಸಬ್ಬನ್ತರಾಯಮಿಹ ತಿಟ್ಠತು ಸುಟ್ಠು ಸಜ್ಜೋ॥

೯೭.

ಸಾಮೋದ ವಣ್ಣ ಭಜನೀ ಗುಣ ಮಞ್ಜರೀಯಂ,

ಚರಿಯಾ ಲತಾ ವಿಕಸಿತಾ ತವ ಸಪ್ಫಲಙ್ಗಂ।

ಓಕಿಣ್ಣ ಚಿತ್ತ ಮಧುಪೇ ರಸ ಪೀಣಯನ್ತಿ,

ಸಮ್ಭಾವಿತಾ ಭುವಿ ಪವತ್ತತು ಮತ್ಥಕೇಹಿ॥

೯೮.

ಸಮ್ಬುದ್ಧ ಸೇಲವಲಯನ್ತರ ಜಾನನವ್ಹಾ,

ನೋತ್ತತ್ತತೋ ತಿಪಥಗಾ ಯತಿ ಸಾಗರಟ್ಠಾ।

ಧಮ್ಮಾ ಪಗಾ ಸುತಿ ವಸೇ ತರಿತೇ ಪುಣನ್ತಿ,

ಸಮ್ಭಾರ ಸಸ್ಸಮಿಹ ವತ್ತತು ಪಚಯನ್ತಿ॥

೯೯.

ಪಞ್ಞಾಣ ಕೂಪ ಸಿತ ಪಗ್ಗಹ ವಾಯು ಗಾಹೀ,

ಸದ್ಧಾ ಲಕಾರ ಸಹಿತಾ ಸತಿ ಪೋತ ವಾಹಾ।

ಸಮ್ಪಾಪಯಾತು ಭವ ಸಾಗರ ಪಾರ ತೀರ,

ಸಪ್ಪತ್ತನಂ ವರಧನೇ ಪತಿ ಪತ್ತಿ ನಾವಾ॥

೧೦೦.

ಬೋಜ್ಝಙ್ಗ ಸತ್ತ ರತನಾಕರ ಧಮ್ಮ ಖನ್ಧ,

ಗಮ್ಭೀರ ನೀರ ಚಯ ಸಾಸನ ಸಾಗರೋ ಸಂ।

ಸೋ ಸೀಲ್ಯನನ್ತ ತನು ವೇಟಿಥ ಞಾಣ ಮನ್ಥ,

ಸೇಲೇನ ಮನ್ಥಿತವತಂ ದಿಸತಾ ಮತಂ ವೇ॥

೧೦೧.

ವುತ್ತೇನ ತೇನ ವಿಧಿನಾ ವಿಧಿನಾ ತತೋ ತಂ,

ಲದ್ಧಾ ನುಭೂತಮಮತಂ ಖಿಲ ದೋಸ ನಾಸಂ।

ಅಚ್ಚನ್ತ ರೋಗ ಜರತಾ ಮರಣಾ ಭಿ ಭೂತಂ,

ಭೂತಂ ಕರೋತು ಅಮರಂ ಅಜರಂ ಅರೋಗಂ॥

೧೦೨.

ಸದ್ಧಮ್ಮ ರಾಜ ರವಿನಿಗ್ಗತ ಧಮ್ಮರಂಸಿ,

ಫುಲ್ಲೋ ಧುತಙ್ಗದಲ ಸಂವರ ಕೇಸರಾಲಿ।

ಸಙ್ಘಾರವಿನ್ದ ನಿಕರೋ ಸಮಧುಂ ಸಮಾಧಿ,

ಸಕ್ಕಿಣ್ಣಿಕೋ ದಿಸತು ಸಾಸನ ವಾಪಿ ಜತೋ॥

೧೦೩.

ಆನನ್ದ ರಞ್ಞ ರತನಾದಿ ಮಹಾ ಯತಿನ್ದ,

ನಿಚ್ಚಪ್ಪಬುದ್ಧ ಪದುಮಪ್ಪಿಯ ಸೇವಿನಙ್ಗೀ।

ಬುದ್ಧಪ್ಪಿಯೇನ ಘನ ಬುದ್ಧ ಗುಣಪ್ಪಿಯೇನ,

ಥೇರಾಲಿನಾ ರಚಿತ ಪಜ್ಜಮಧುಂ ಪಿಬನ್ತು॥

೧೦೪.

ಇತ್ಥಂ ರೂಪ ಗುಣಾನುಕಿತ್ತನವಸಾ ತಂ ತಂ ಹಿತಾ ಸಿಂ ಸತೋ,

ವತ್ಥಾನುಸ್ಸತಿ ವತ್ತಿತ ಇಹ ಯಥಾ ಸತ್ತೇಸು ಮೇತ್ತಾ ಚ ಮೇ।

ಏವಂ ತಾಭಿ ಭವನ್ತ ರುತ್ತರ ತರಾ ವತ್ತನ್ತು ತಾ ಬೋಧಿ ಮೇ,

ಸಂಯೋಗೋಚ ಧನೇಹಿ ಸನ್ತಿಹಿ ಭವೇ ಕಲ್ಯಾನ ಮಿತ್ತೇಹಿ ಚ॥