೧೦. ಚಿನರಟ್ಠಸಾಸನವಂಸಕಥಾಮಗ್ಗೋ

೧೦. ತತೋ ಪರಂ ಪವಕ್ಖಾಮಿ ಚೀನರಟ್ಠಸಾಸನವಂಸಕಥಾಮಗ್ಗಂ ಯಥಾಟ್ಠವಿತಮಾತಿಕಾವಸೇನ।

ತತಿಯಸಙ್ಗೀತಾವಸಾನೇ ಹಿ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೋ ಮಜ್ಝಿಮತ್ಥೇರಂ ಚಿನರಟ್ಠಂ ಪೇಸೇಸಿ,-ತ್ವಂ ಏತಂ ರಟ್ಠಂ ಗನ್ತ್ವಾ ಏತ್ಥ ಸಾಸನಂ ಪತಿಟ್ಠಾಪೇಹೀತಿ।

ಮಜ್ಝಿಮತ್ಥೇರೋಚ ಕಸ್ಸಪಗೋತ್ತರೇನ ಅಳಕರೇವತ್ಥೇರೇನ ದುನ್ದಭಿಯತ್ಥೇರೇನ ಮಹಾರೇವತ್ಥೇರೇನಚ ಸದ್ಧಿಂ ಹಿಮವನ್ತಪ್ಪದೇಸೇ ಪಞ್ಚಚೀನರಟ್ಠಂ ಗನ್ತ್ವಾ ಧಮ್ಮಚಕ್ಕಪ್ಪವತ್ತನಸುತ್ತನ್ತಕಥಾಯತಂ ದೇಸಂ ಪಸಾದೇತ್ವಾ ಅಸೀತಿಪಾಣಕೋಟಿಯೋ ಮಗ್ಗಫಲರತನಾನಿ ಪಟಿಲಾಭೇಸಿ। ಪಞ್ಚಪಿಚ ತೇ ಥೇರಾ ಪಞ್ಚರಟ್ಠಾನಿ ಪಸಾದೇಸುಂ। ಏಕಮೇಕಸ್ಸ ಸನ್ತಿಕೇ ಸಹಸ್ಸಮತ್ತಾ ಪಬ್ಬಜಿಂಸು। ಏವಂ ತೇ ತತ್ಥ ಸಾಸನಂ ಪತಿಟ್ಠಾಪೇಸುಂ।

ಗನ್ತ್ವಾ ಮಜ್ಝಿಮತ್ಥೇರೋ, ಹಿಮವನ್ತಂ ಪಸಾದಯಿ।

ಯಕ್ಖಸೇನಂ ಪಕಾಸೇನ್ತೋ, ಧಮ್ಮಚಕ್ಕಪ್ಪವತ್ತನನ್ತಿ॥

ತತ್ಥ ಕಿರ ಮನುಸ್ಸಾ ಯೇಭುಯ್ಯೇನ ಚನ್ದೀಪರಮೀಸ್ವಾರಾನಂ ಯಕ್ಖಾನಂ ಪೂಜಂ ಕರೋನ್ತಿ। ತೇನೇವ ತೇ ಪಞ್ಚ ಥೇರಾ ತೇಸಂ ಯಕ್ಖಸೇನಂ ಪಕಾಸಯಿತ್ವಾ ಧಮ್ಮಂ ದೇಸೇಸುಂ। ಕಸ್ಮೀರಗನ್ಧಾರರಟ್ಠಂ ಪನ ಕದಾಚಿ ಕದಾಚಿ ಚೀನರಟ್ಠಿನ್ದಸ್ಸ ವಿಜಿತಂ ಹೋತಿ, ಕದಾಚಿ ಕದಾಚಿ ಪನ ವಿಸುಂ ಹೋತಿ। ತದಾ ಪನ ವಿಸುಂಯೇವ ಅಹೋಸೀತಿ ದಟ್ಠಬ್ಬಂ।

ಚೀರನಟ್ಠೇ ಪನ ಭಗವತೋ ಸಾಸನಂ ದುಬ್ಬಲಂಯೇವ ಹುತ್ವಾ ಅಟ್ಠಾಸಿ, ನ ಥಿರಂ ಹುತ್ವಾ। ತೇನೇವ ಇದಾನಿ ತತ್ಥ ಕತ್ಥಚಿಯೇವ ಸಾಸನಂ ಛಾಯಾಮತ್ತಂವ ಪಞ್ಞಾಯತಿ, ವಾತವೇಗೇನ ವಿಕಿಣ್ಣಅಬ್ಭಂವಿಯ ತಿಟ್ಠತೀತಿ।

ಇತಿ ಸಾಸನವಂಸೇ ಚೀನರಟ್ಠಸಾಸನವಂಸಕಥಾಮಗ್ಗೋ ನಾಮ

ದಸಮೋ ಪರಿಚ್ಛೇದೋ।

ಏವಂ ಸಬ್ಬೇನ ಸಬ್ಬಂ ಸಾಸನವಂಸಕಥಾಮಗ್ಗೋ ನಿಟ್ಠಿತೋ।

ಏತ್ತಾವತಾಚ –

ಲಙ್ಕಾಗತೇನ ಸನ್ತೇನ, ಚಿತ್ರಞಾಣೇನ ಭಿಕ್ಖುನಾ।

ಸರಣಙ್ಕರನಾಮೇನ, ಸದ್ಧಮ್ಮಟ್ಠಿತಿಕಾಮಿನಾ॥

ದೂರತೋಯೇವ ದೀಪಮ್ಹಾ, ಸುಮಙ್ಗಲೇನ ಜೋತಿನಾ।

ವಿಸುದ್ಧಸೀಲಿನಾಚೇವ, ದೀಪನ್ತರಟ್ಠಭಿಕ್ಖುನಾ॥

ಅಞ್ಞೇಹಿಚಾಭಿಯಾಚಿತೋ, ಪಞ್ಞಾಸಾಮೀತಿ ನಾಮಕೋ।

ಅಕಾಸಿಂ ಸುಟ್ಠುಕಂ ಗನ್ಥಂ, ಸಾಸನವಂಸಪ್ಪದೀಪಿಕಂ॥

ದ್ವಿಸತೇಚ ಸಹಸ್ಸೇಚ, ತೇವೀಸಾಧಿಕೇ ಗತೇ।

ಪುಣ್ಣಾಯಂ ಮಿಗಸೀರಸ್ಸ, ನಿಟ್ಠಂ ಗತಾವ ಸಬ್ಬಸೋ॥

ಕೋಚಿ ಏತ್ಥೇವ ದೋಸೋ ಚೇ, ಪಞ್ಞಾಯತಿ ಸುಚಿತ್ತಕಾ।

ತಂ ಖಮನ್ತು ಚ ಸುದ್ಧಿಯಾ, ಗಣ್ಹನ್ತು ಯುತ್ತಿಕಂ ಹವೇತಿ॥