೫. ನವವಾಸೀರಟ್ಠಸಾಸನವಂಸಕಥಾಮಗ್ಗೋ
೫. ಇದಾನಿ ವನವಾಸೀರಟ್ಠೇ ಸಿರಿಖೇತ್ತನಗರಸಾಸನವಂಸಂ ವಕ್ಖಾಮಿ। ಜಿನಚಕ್ಕೇ ಹಿ ಏಕಾಧಿಕೇ ವಸ್ಸಸತೇ ಸಮ್ಪತ್ತೇ ಜಟಿಲೋ ಸಕ್ಕೋ ನಾಗೋ ಗರುಳೋ ಕುಮ್ಭಣ್ಡೋ ಚನ್ದೀ ಪರಮೀಸ್ವರೋಚಾತಿ ಇಮೇ ಸತ್ತ ಸಿರಿಖೇತ್ತಂ ನಾಮ ನಗರಂ ಮಾಪೇಸುಂ। ತತ್ಥ ದ್ವತ್ತಪೋಙ್ಕೋ ನಾಮ ರಾಜಾ ರಜ್ಜಂ ಕಾರೇಸಿ। ತಸ್ಸ ಕಿರ ತೀಣಿ ಅಕ್ಖೀನಿ ಸನ್ತೀತಿ। ತದಾ ಭಗವತೋ ಸಾವಕಾ ಅರಹನ್ತಾ ತಿಸಹಸ್ಸಮತ್ತಾ ತತ್ಥ ವಸಿಂಸು। ಸೋ ರಾಜಾ ತೇಸಂ ಅರಹನ್ತಾನಂ ದೇವಸಿಕಂ ಚತೂಹಿ ಪಚ್ಚಯೇಹಿ ಉಪತ್ಥಮ್ಭಿ। ಛ ಸರೀರಧಾತುಯೋ ಚ ಏಕೇಕಂ ಏಕೇಕಸ್ಮಿಂ ನಿದಹಿತ್ವಾ ಛ ಚೇತಿಇಯಾನಿ ಕಾರಾಪೇಸಿ। ದಕ್ಖಿಣಬಾಹುಂ ಪನ ನಿದಹಿತ್ವಾ ಏಕಮ್ಪಿ ಚೇತಿಯಂ ಕಾರಾಪೇಸಿ।
ಉಣ್ಹೀಸಧಾತುಂ ಪನ ಕಙ್ಗರನ್ನಗರತೋ ಆನೇತ್ವಾ ಏಕಮ್ಪಿ ಚೇತಿಯಂ ಕಾರಾಪೇಸಿ। ತಂ ಪನ ತಾವ ನ ನಿಟ್ಠಿತಂ। ಪಚ್ಛಾ ಅನುರುದ್ಧರಾಜಾ ಗಹೇತ್ವಾ ಅರಿಮದ್ದನನಗರಂ ಆನೇತ್ವಾ ಚಞ್ಞಿಙ್ಖು ನಾಮ ಚೇತಿಯೇ ನಿಧಾನಂ
ಇದಂ ವನವಾಸೀರಟ್ಠೇ ಪಠಮಂ ಸಾಸನಸ್ಸ ಪತಿಟ್ಠಾನಂ।
ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೇನ ಪನ ಪೇಸಿತೋ ರಕ್ಖಿತತ್ಥೇರೋ ವನವಾಸೀರಟ್ಠಂ ಗನ್ತ್ವಾ ಆಕಾಸೇ ಠತ್ವಾ ಅನಮತಗ್ಗಪರಿಯಾಯಕಥಾಯ ವನವಾಸಿಕೇ ಪಸಾದೇಸಿ। ಕಥಾಪರಿಯೋಸಾನೇ ಪನಸ್ಸ ಸಟ್ಠಿಸಹಸ್ಸಾನಂ ಧಮ್ಮಾಭಿಸಮಯೋ ಅಹೋಸಿ। ಸತ್ತತಿಸಹಸ್ಸಮತ್ತಾ ಪಬ್ಬಜಿಂಸು। ಪಞ್ಚವಿಹಾರಸತಾನಿ ಪತಿಟ್ಠಾಪೇಸುಂ। ಏವಂ ಸೋ ತತ್ಥ ಸಾಸನಂ ಪತಿಟ್ಠಾಪೇಸಿ। ತೇನೇವ ಅಟ್ಠ ಕಥಾಯಂ –
ಗನ್ತ್ವಾನ ರಕ್ಖಿತತ್ಥೇರೋ,
ವನವಾಸಿಂ ಮಹಿದ್ಧಿಕೋ।
ಅನ್ತಲಿಕ್ಖೇ ಠಿತೋ ತತ್ಥ,
ದೇಸೇಸಿ ಅನಮತಗ್ಗಿಯನ್ತಿ ವುತ್ತಂ॥
ಏವಂ ವನವಾಸೀರಟ್ಠೇ ಪುಬ್ಬೇಯೇವ ಸಾಸನಂ ಓಗಾಹೇತ್ವಾ ಪತಿಟ್ಠಹಿ। ನ ಪನ ತಾವ ಸಕಲಂ ಬ್ಯಾಪೇತ್ವಾ ಪತಿಟ್ಠಹಿ।
ಇದಂ ತಾವ ವನವಾಸೀರಟ್ಠೇ ಸಿರಿಖೇತ್ತನಗರೇ ದುತಿಯಂ
ಸಾಸನಸ್ಸ ಪತಿಟ್ಠಾನಂ।
ಜಿನಚಕ್ಕೇ ಪನ ತೇತ್ತಿಂಸಾಧಿಕೇ ಚತುವಸ್ಸಸತೇ ಕುಕ್ಕುಟ ಸೀಸೋ ನಾಮ ಏಕೋ ರಾಜಾ ರಜ್ಜಂ ಕಾರೇಸಿ। ತಸ್ಸ ರಞ್ಞೋ ಕಾಲೇ ಭಗವತೋ ಸಾವಕಾ ಅರಹನ್ತಾ ಪಞ್ಚಸತಮತ್ತಾ ಅಹೇಸುಂ। ತೇಸಮ್ಪಿ ಸೋ ರಾಜಾ ದೇವಸಿಕಂ ಚತೂಹಿ ಪಚ್ಚಯೇಹಿ ಉಪತ್ಥಮ್ಭೇಸಿ। ಸೋತಾಪನ್ನಸಕದಾಗಾಮಿಅನಾಗಾಮಿನೋ ಪನ ಗಣನಪಥಂ
ಇದಂ ವನವಾಸೀರಟ್ಠೇ ಸಿರಿಖೇತ್ತನಗರೇ ಪರಮ್ಪರಾಭತವಸೇನ
ತತಿಯಂ ಸಾಸನಸ್ಸ ಪತಿಟ್ಠಾನಂ।
ಇಚ್ಚೇವಂ ವನವಾಸೀರಟ್ಠೇ ಅನೇಕಸತೇಹಿ ಅರಹನ್ತತ್ಥೇರೇಹಿ ಸಾಸನಂ ಪುಣ್ಣಿನ್ದುಸಙ್ಕಾಸಂ ಹುತ್ವಾ ಅತಿವಿಯ ವಿಜ್ಜೋತೇಸಿ। ಸಾಸನಿಕ ಗನ್ಥಕಾರಾ ಪನ ಮಹಾಥೇರಾ ತತ್ಥ ನ ಸನ್ದಿಸ್ಸನ್ತಿ। ಅರಹನ್ತತ್ಥೇರಾ ಪನ ರಾಜೂನಂ ಆಯಾಚನಂ ಆರಬ್ಭ ಧಮ್ಮಸತ್ಥಂ ಏಕಂ ವಿರಚಯಿಂಸೂತಿ ಪೋರಾಣಾ ವದನ್ತೀತಿ। ಇಚ್ಚೇವಂ–
ತೇಚ ಥೇರಾ ಮಹಾಪಞ್ಞಾ,
ಪಗ್ಗಹೇತ್ವಾನ ಸಾಸನಂ।
ಸೂರಿಯೋ ವಿಯ ಅತ್ಥಙ್ಗೋ,
ಉಪಗಾ ಮಚ್ಚುಸನ್ತಿಕಂ॥
ತಸ್ಮಾ ಹಿ ಪಣ್ಡಿತೋ ಪೋಸೋ,
ಯಾವ ಮಚ್ಚು ನಚಾಗತೋ।
ತಾವ ಪುಞ್ಞಂ ಕರೇ ನಿಚ್ಚಂ,
ಮಾ ಪಮಜ್ಜೇಯ್ಯ ಸಬ್ಬದಾತಿ॥
ಇತಿ ಸಾಸನವಂಸೇ ವನವಾಸೀರಟ್ಠಸಾಸನವಂಸಕಥಾಮಗ್ಗೋ
ನಾಮ ಪಞ್ಚಮೋ ಪರಿಚ್ಛೇದೋ।