೮. ಮಹಿಂಸಕರಟ್ಠಸ್ಸಾಸನವಂಸಕಥಾಮಗ್ಗೋ

೮. ಇದಾನಿ ಯಥಾವುತ್ತಮಾತಿಕಾವಸೇನ ಮಹಿಂಸಕರಟ್ಠಸಾಸನವಂಸಕಥಾಮಗ್ಗಂ ವತ್ತುಂ ಓಕಾಸೋ ಅನುಪ್ಪತ್ತೋ, ತಸ್ಮಾ ತಂ ವಕ್ಖಾಮಿ।

ತತಿಯಸಙ್ಗೀತಾವಸಾನೇ ಹಿ ಮಹಾಮೋಗ್ಗಲಿಪುತ್ತತಿಸ್ಸತ್ಥೇರೋ ಮಹಾರೇವತ್ಥೇರಂ ಮಹಿಂಸಕಮಣ್ಡಲಂ ಪೇಸೇಸಿ,- ತ್ವಂ ಏತಂ ರಟ್ಠಂ ಗನ್ತ್ವಾ ಏತ್ಥ ಸಾಸನಂ ಪತಿಟ್ಠಾಪೇಹೀತಿ।

ಸೋಚ ಅತ್ತಪಞ್ಚಮೋ ಹುತ್ವಾ ಮಹಿಂಸಕಮಣ್ಡಲಂ ಅಗಮಾಸಿ ಪಚ್ಚನ್ತಿಮೇಸು ಜನಪದೇಸು ಪಞ್ಚವಗ್ಗೋ ಗಣೋ ಅಲಂ ಉಪಸಮ್ಪದಕಮ್ಮಾಯಾತಿ ಮಞ್ಞಮಾನೋ। ಥೇರೋ ಮಹಿಂಸಕಮಣ್ಡಲಂ ಗನ್ತ್ವಾ ದೇವದೂತಸುತ್ತಂ ಕಥೇಸಿ। ಸುತ್ತಪರಿಯೋಸಾನೇ ಚತ್ತಾಲೀಸಪಾಣಸಹಸ್ಸಾನಿ ಧಮ್ಮಚಕ್ಖುಂ ಪ್ಪಟಿಲಭಿಂಸು। ಚತ್ತಾಲೀಸಂಯೇವ ಪಾಣಸಹಸ್ಸಾನಿ ಪಬ್ಬಜಿಂಸು।

ಗನ್ತ್ವಾನ ರಟ್ಠಂ ಮಹಿಂಸಂ, ಮಹಾರೇವೋ ಮಹಿದ್ಧಿಕೋ।

ಚೋದೇತ್ವಾ ದೇವದೂತೇಹಿ, ಮೋಚೇಸಿ ಬನ್ಧನಾ ಬಹೂತಿ॥

ಅಧುನಾ ಪನ ತತ್ಥ ಸಾಸನಸ್ಸ ಅಬ್ಭೇಹಿವಿಯ ಪಟಿಚ್ಛನ್ನಸ್ಸ ಸೂರಿಯಸ್ಸ ಓಕಾಸೋ ದುಬ್ಬಲೋ ಹುತ್ವಾ ಪಞ್ಞಾಯತಿ।

ಇತಿ ಸಾಸನವಂಸೇ ಮಹಿಂಸಕರಟ್ಠಸಾಸನವಂಸಕಥಾಮಗ್ಗೋ

ನಾಮ ಅಟ್ಠಮೋ ಪರಿಚ್ಛೇದೋ।