॥ ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥

ಮಹಾವಂಸಪಾಳಿ

ಪಥಮಪರಿಚ್ಛೇದ

ಮಹಿಯಙ್ಗಣಾಗಮನಂ

೧.

ನಮಸ್ಸಿತ್ವಾನ ಸಮ್ಬುದ್ಧಂ, ಸುಸುದ್ಧಂ ಸುದ್ಧವಂಸಜಂ।

ಮಹಾವಂಸಂ ಪವಕ್ಖಾಮಿ, ನಾನಾನೂನಾಧಿಕಾರಿಕಂ॥

೨.

ಪೋರಾಣೇಹಿ ಕತೋ’ಪೇಸೋ, ಅತಿವಿತ್ಥಾರಿತೋ ಕ್ವಚಿ।

ಅತೀವ ಕ್ವಚಿ ಸಂಖಿತ್ತೋ, ಅನೇಕಪುನರುತ್ತಕೋ॥

೩.

ವಜ್ಜಿತಂ ತೇಹಿ ದೋಸೇಹಿ, ಸುಖಗ್ಗಹಣಧಾರಣಂ।

ಪಸಾದಸಂವೇಗಕರಂ, ಸುತಿತೋ ಚ ಉಪಾಗತಂ॥

೪.

ಪಸಾದಜನಕೇ ಠಾನೇ, ತಥಾ ಸಂವೇಗಕಾರಕೇ।

ಜನಯನ್ತೋ ಪಸಾದಞ್ಚ, ಸಂವೇಗಞ್ಚ ಸುಣಾಥ ತಂ॥

೫.

ದೀಪಙ್ಕರಞ್ಹಿ ಸಮ್ಬುದ್ಧಂ, ಪಸ್ಸಿತ್ವಾ ನೋ ಜಿನೋ ಪುರಾ।

ಲೋಕಂ ದುಕ್ಖಾ ಪಮೋಚೇತುಂ, ಬೋಧಾಯ ಪಣಿಧಿಂ ಅಕಾ॥

೬.

ತತೋ ತಞ್ಚೇವ ಸಮ್ಬುದ್ಧಂ, ಕೋಣ್ಡಞ್ಞಂ ಮಙ್ಗಲಂ ಮುನಿಂ।

ಸುಮನಂ ರೇವತಂ ಬುದ್ಧಂ, ಸೋಭಿತಞ್ಚ ಮಹಾಮುನಿಂ॥

೭.

ಅನೋಮದಸ್ಸಿಂ ಸಮ್ಬುದ್ಧಂ, ಪದುಮಂ ನಾರದಂ ಜಿನಂ।

ಪದುಮುತ್ತರಸಮ್ಬುದ್ಧಂ, ಸುಮೇಧಞ್ಚ ತಥಾಗತಂ॥

೮.

ಸುಜಾತಂ ಪಿಯದಸ್ಸಿಞ್ಚ, ಅತ್ಥದಸ್ಸಿಞ್ಚ ನಾಯಕಂ।

ಧಮ್ಮದಸ್ಸಿಞ್ಚ ಸಿದ್ಧತ್ಥಂ, ತಿಸ್ಸಂ ಫುಸ್ಸಜಿನಂ ತಥಾ॥

೯.

ವಿಪಸ್ಸಿಂ ಸಿಖೀಸಮ್ಬುದ್ಧಂ, ಸಮ್ಬುದ್ಧಂ ವೇಸ್ಸಭುಂ ವಿಭುಂ।

ಕಕುಸನ್ಧಞ್ಚ ಸಮ್ಬುದ್ಧಂ, ಕೋಣಾಗಮನಮೇವ ಚ॥

೧೦.

ಕಸ್ಸಪಂ ಸುಗತಞ್ಚ’ಮೇ, ಸಮ್ಬುದ್ಧೇ ಚತುವೀಸತಿ।

ಆರಾಧೇತ್ವಾ ಮಹಾವೀರೋ, ತೇಹಿ ಬೋಧಾಯ ಬ್ಯಾಕತೋ॥

೧೧.

ಪುರೇತ್ವಾ ಪಾರಮೀ ಸಬ್ಬಾ, ಪತ್ವಾ ಸಮ್ಬೋಧಿಮುತ್ತಮಂ।

ಉತ್ತಮೋ ಗೋತಮೋ ಬುದ್ಧೋ, ಸತ್ತೇ ದುಕ್ಖಾ ಪಮೋಚಯಿ॥

೧೨.

ಮಗಧೇಸು ರುವೇಲಾಯಂ, ಬೋಧಿಮೂಲೇ ಮಹಾಮುನಿ।

ವಿಸಾಖಪುಣ್ಣಮಾಯಂ ಸೋ, ಪತ್ತೋ ಸಮ್ಬೋಧಿಮುತ್ತಮಂ॥

೧೩.

ಸತ್ತಾಹಾನಿ ತಹಿಂ ಸತ್ತ, ಸೋ ವಿಮುತ್ತಿಸುಖಂ ಪರಂ।

ವಿನ್ದನ್ತಂ ಮಧುರತ್ತಞ್ಚ, ದಸ್ಸಯನ್ತೋ ವಸೀ ವಸಿ॥

೧೪.

ತತೋ ಬಾರಾಣಸಿಂ ಗನ್ತ್ವಾ, ಧಮ್ಮಚಕ್ಕಂ ಪಗತ್ತಯಿ।

ತತ್ಥ ವಸ್ಸ ವಸನ್ತೋ’ವ, ಸಟ್ಠಿಂ ಅರಹತಂ ಅಕಾ॥

೧೫.

ತೇ ಧಮ್ಮದೇಸನತ್ಥಾಯ, ವಿಸ್ಸಜ್ಜೇತ್ವಾನ ಭಿಕ್ಖವೋ।

ವಿನೇತ್ವಾ ಚ ತತೋ ತಿಂಸ-ಸಹಾ ಯೇ ಭದ್ದವಗ್ಗಿಯೇ॥

೧೬.

ಸಹಸ್ಸಜಟಿಲೇ ನಾಥೋ, ವಿನೇತುಂ ಕಸ್ಸಪಾದಿಕೇ।

ಹೇಮನ್ತೇ ಉರುವೇಲಾಯಂ, ವಸಿತೇ ಪರಿಪಾಚಯಂ॥

೧೭.

ಉರುವೇಲಕಸ್ಸಪಸ್ಸ, ಮಹಾಯಞ್ಞೇ ಉಪಟ್ಠಿತೇ।

ತಸ್ಸ’ತ್ತನೋ ನಾಗಮನೇ, ಇಚ್ಛಾಚಾರಂ ವಿಜಾನಿಯ॥

೧೮.

ಉತ್ತರಕುರುತೋ ಭಿಕ್ಖಂ, ಆಹರಿತ್ವಾ ರಿಮದ್ದನೋ।

ಅನೋತತ್ತದಹೇ ಭುತ್ವಾ, ಸಾಯನ್ಹಸಮಯೇ ಸಯಂ॥

೧೯.

ಬೋಧಿತೋ ನವಮೇ ಮಾಸೇ, ಫುಸ್ಸಪುಣ್ಣಮಿಯಂ ಜಿನೋ।

ಲಙ್ಕಾದೀಪಂ ವಿಸೋಧೇತುಂ, ಲಙ್ಕಾದೀಪಮುಪಾಗಮಿ॥

೨೦.

ಸಾಸನುಜ್ಜೋತನಂ ಠಾನಂ, ಲಂಕಾ ಞಾತಾ ಜಿನೇನ ಹಿ।

ಯಕ್ಖಪುಣ್ಣಾಯ ಲಙ್ಕಾಯ, ಯಕ್ಖಾ ನಿಬ್ಬಾ ಸಿಯಾತಿ ಚ॥

೨೧.

ಞಾತೋವ ಲಙ್ಕಾಮಜ್ಝಮ್ಹಿ, ಗಙ್ಗಾಭೀರೇ ಮನೋರಮೇ।

ತಿಯೋಜನಾಯ ತೇ ರಮ್ಮೇ, ಏಕಯೋಜನವಿತ್ಥತೇ॥

೨೨.

ಮಹಾನಾಗವನುಯ್ಯಾನೇ, ಯಕ್ಖಸಙ್ಗಾಮಭೂಮಿಯಾ।

ಲಙ್ಕಾದೀಪಟ್ಠಯಕ್ಖಾನಂ, ಮಹಾಯಕ್ಖಸಮಾಗಮೋ॥

೨೩.

ಉಪಾಗತೋ ತಂ ಸುಗತೋ, ಮಹಾಯಕ್ಖಸಮಾಗಮಂ।

ಸಮಾಗಮಸ್ಸ ಮಜ್ಝಮ್ಹಿ, ತತ್ಥ ತೇಸಂ ಸಿರೋಪರಿ॥

೨೪.

ಮಹಿಯಙ್ಗಣಥೂಪಸ್ಸ, ಠಾನೇ ವೇಹಾಯಸಂ ಜಿನೋ।

ವುಟ್ಠಿವಾತನ್ಧಕಾರೇಸಿ, ತೇಸಂ ಸಂವೇಜನಂ ಅಕಾ॥

೨೫.

ತೇ ಭಯಟ್ಠಾ’ಭಯಂ ಯಕ್ಖಾ, ಅಯಾಚುಂ ಅಭಯಂ ಜಿನಂ।

ಜಿನೋ ಅಭಯದೋ ಆಹ, ಯಕ್ಖೇ ತೇ’ತಿ ಭಯದ್ದೀತೇ॥

೨೬.

ಯಕ್ಖಾ ಭಯಂ ವೋ ದುಕ್ಖಞ್ಚ, ಹರಿಸ್ಸಾಮಿ ಇದಂ ಅಹಂ।

ತುಮ್ಹೇ ನಿಸಜ್ಜಠಾನಂ ಮೇ, ಸಮಗ್ಗಾ ದೇಥ ನೋ ಇಧ॥

೨೭.

ಆಹು ತೇ ಸುಗತಂ ಯಕ್ಖಾ, ದೇಮ ಮಾರಿಸ ತೇ ಇಧ।

ಸಬ್ಬೇಪಿ ಸಕಲಂ ದೀಪಂ, ದೇಹಿ ನೋ ಅಭಯಂ ತುವಂ॥

೨೮.

ಭಯಂ ಸೀತಂ ತಮಂ ತೇಸಂ, ಹನ್ತ್ವಾ ತಂ ದಿನ್ನಭೂಮಿಯಂ।

ಚಮ್ಮಕ್ಖನ್ಧಂ ಅತ್ಥರಿತ್ವಾ, ತತ್ಥಾ’ ಸೀನೋ ಜಿನೋ ತತೋ॥

೨೯.

ಚಮ್ಮಕ್ಖಣ್ಡಂ ಪಸಾರೇಸಿ, ಆದಿತ್ತಂ ತಂ ಸಮನ್ತತೋ।

ಘಮ್ಮಾಭಿಭೂತಾ ತೇ ಭೀತಾ, ಠಿತಾ ಅನ್ತೇ ಸಮನ್ತತೋ॥

೩೦.

ಗಿರಿದೀಪಂ ತತೋ ನಾಥೋ, ರಮ್ಮಂ ತೇಸಂ ಇಧಾ’ನಯಿ।

ತೇಸು ತತ್ಥ ಪವಿಟ್ಠೇಸು, ಯಥಾಠಾನೇ ಠಪೇಸಿ ಚ॥

೩೧.

ನಾಥೋ ತಂ ಸಂಖಿಪಿ ಧಮ್ಮಂ, ತದಾ ದೇವಾ ಸಮಾಗಮುಂ।

ತಸ್ಮಿಂ ಸಮಾಗಮೇ ತೇಸಂ, ಸತ್ಥಾ ಧಮ್ಮ ಮದೇಸಯಿ॥

೩೨.

ನೇಕೇಸಂ ಪಾಣಕೋಟೀನಂ, ಧಮ್ಮಾಭಿಸಮಯೋ ಅಹು।

ಸರಣೇಸು ಚ ಸೀಲೇಸು, ಠಿತಾ ಆಸುಂ ಅಸಂಖಿಯಾ॥

೩೩.

ಸೋತಾಪತ್ತಿಫಲಂ ಪತ್ವಾ, ಸೇಲೇ ಸುಮನಕೂಟಕೇ।

ಮಹಾಸುಮನದೇವಿನ್ದೋ, ಪೂಜಿಯಂ ಯಾಚಿ ಪೂಜಿಯಂ॥

೩೪.

ಸಿರಂ ಪರಾಮಸಿತ್ವಾನ, ನೀಲಾಮಲಸಿರೋರುಹೋ।

ಪಾಣಿಮತ್ತೇಅದಾ ಕೇಸೇ, ತಸ್ಸ ಪಾಣ ಹಿತೋ ಜಿನೋ॥

೩೫.

ಸೋ ತಂ ಸುವಣ್ಣಚಙ್ಕೋಟ-ವರೇನಾದಾಯ ಸತ್ಥುನೋ।

ನಿಸಿನ್ನಟ್ಠಾನರಚಿತೇ, ನಾನಾರತನಸಞ್ಚಯೇ॥

೩೬.

ಸಬ್ಬತೋ ಸತ್ತರತನೇ, ತೇ ಠಪೇತ್ವಾ ಸಿರೋರುಹೇ।

ಸೋ ಇನ್ದನೀಲಥೂಪೇನ, ಪಿದಹೇಸಿ ನಮಸ್ಸಿ ಚ॥

೩೭.

ಪರಿನಿಬ್ಬುತಮ್ಹಿ ಸಮ್ಬುದ್ಧೇ, ಚಿತಕತೋ ಚ ಇದ್ಧಿಯಾ।

ಆದಾಯ ಜಿನಗೀವಟ್ಠಿಂ, ಥೇರೋ ಸರಭೂನಾಮಕೋ॥

೩೮.

ಥೇರಸ್ಸ ಸಾರಿಪುತ್ತಸ್ಸ, ಸಿಸ್ಸೋ ಆನೀಯ ಚೇತಿಯೇ।

ತಸ್ಮಿಂಯೇವ ಠಪೇತ್ವಾನ, ಭಿಕ್ಖೂಹಿ ಪರಿವಾರಿತೋ॥

೩೯.

ಛಾದಾಪೇತ್ವಾ ಮೇದವಣ್ಣ-ಪಾಸಾಣೇಹಿ ಮಹಿದ್ಧಿಕೋ।

ಥೂಪಂ ದ್ವಾದಸಹತ್ಥುಚ್ಚಂ, ಕಾರಾಪೇತ್ವಾನ ಪಕ್ಕಮಿ॥

೪೦.

ದೇವಾನಂಪಿಯತಿಸ್ಸಸ್ಸ, ರಞ್ಞೋ ಭಾತುಕುಧಾರಕೋ।

ಉದ್ಧಚೂಳಾಭಯೋ ನಾಮ, ದಿಸ್ವಾ ಚೇತಿಯ ಮಬ್ಭುತಂ॥

೪೧.

ತಂ ಛಾದಯಿತ್ವಾ ಕಾರೇಸಿ, ತಿಂಸಹತ್ಥುಚ್ಚ ಚೇತಿಯಂ।

ಮದ್ದನ್ತೋ ದಮಿಳೇ ರಾಜಾ, ತತ್ರಟ್ಠೋ ದುಕ್ಖಗಾಮಣಿ॥

೪೨.

ಅಸೀತಿಹತ್ಥಂ ಕಾರೇಸಿ, ತಸ್ಸ ಕಞ್ಜುಕಚೇತಿಯಂ।

ಮಹಿಯಙ್ಗಣಥೂಪೋಯ-ಮೇಸೋ ಏವಂ ಪತಿಟ್ಠಿತೋ॥

೪೩.

ಏವಂ ದೀಪಮಿಮಂಕತ್ವಾ, ಮನುಸ್ಸಾರಹಮಿಸ್ಸರೋ।

ಉರುವೇಲಮಗಾ ಧೀರೋ, ಉರುವೀರ ಪರಕ್ಕಮೋತಿ॥

ಮಹಿಯಙ್ಗಣಾಗಮನಂ ನಿಟ್ಠಿತಂ।

ನಾಗದೀಪಾಗಮನ

೪೪.

ಮಹಾಕಾರುಣಿಕೋ ಸತ್ಥಾ, ಸಬ್ಬಲೋಕಹಿತೇ ರತೋ।

ಬೋಧಿತೋ ಪಞ್ಚಮೇ ವಸ್ಸೇ, ವಸಂ ಜೇತವನೇ ಜಿನೋ॥

೪೫.

ಮಹೋದರಸ್ಸ ನಾಗಸ್ಸ, ತಥಾ ಚೂಳೋದರಸ್ಸ ಚ।

ಮಾತುಲಭಾಗಿನೇಯ್ಯಾನಂ, ಮಣಿಪಲ್ಲಙ್ಕಹೇತುಕಂ॥

೪೬.

ದಿಸ್ವಾ ಸಪಾರಿಸಜ್ಜಾನಂ, ಸಙ್ಗಾಮಂ ಪಚ್ಚುಪಟ್ಠಿತಂ।

ಸಮ್ಬುದ್ಧೋ ಚಿತ್ತಮಾಸಸ್ಸ, ಕಾಳಪಕ್ಖೇ ಉಪೋಸಥೇ॥

೪೭.

ಪಾತೋಯೇವ ಸಮಾದಾಯ, ಪವರಂ ಪತ್ತಚೀವರಂ।

ಅನುಕಮ್ಪಾಯ ನಾಗಾನಂ, ನಾಗದೀಪಮುಪಾಗಮಿ॥

೪೮.

ಮಹಾದರೋ’ಪಿಸೋ ನಾಗೋ, ತದಾ ರಾಜಾ ಅಹಿದ್ಧಿಕೋ।

ಸಮುದ್ದೇ ನಾಗಭವನೇ, ದಸದ್ಧಸತಯೋಜನೇ॥

೪೯.

ಕಣಿಟ್ಠಿಕಾ ತಸ್ಸ ಕಣ್ಹಾ, ವಡ್ಢಮಾನಮ್ಹಿ ಪಬ್ಬತೇ।

ನಾಗರಾಜಸ್ಸ ದಿನ್ನಾ’ಸಿ, ತಸ್ಸ ಚೂಳೋದರೋ ಸುತೋ॥

೫೦.

ತಸ್ಸ ಮಾತಾ ಮಹಾಮಾತು, ಮಣಿಪಲ್ಲಙ್ಕಮುತ್ತಮಂ।

ದತ್ವಾ ಕಾಲಕತಾ ನಾಗೀ, ಮಾತುಲೇನ ತಥಾ ಹಿ ಸೋ॥

೫೧.

ಅಹೋಸಿ ಭಾಗಿನೇಯ್ಯಸ್ಸ, ಸಙ್ಗಾಮೋ ಪಚ್ಚುಪಟ್ಠಿತೋ।

ಪಬ್ಬತೇಯ್ಯಾ’ಪಿ ನಾಗಾ ತೇ, ಅಹೇಸುಞ್ಹಿ ಮಹಿದ್ಧಿಕಾ॥

೫೨.

ಸಮಿದ್ಧಿಸುಮನೋ ನಾಮ, ದೇವೋ ಜೇತವನೇ ಠಿತಂ।

ರಾಜಾಯತನಮಾದಾಯ, ಅತ್ತನೋ ಭವನಂ ಸುಭಂ॥

೫೩.

ಬುದ್ಧಾನುಮತಿಯಾಯೇವ, ಛತ್ತಾಕಾರಂ ಜಿನೋಪರಿ।

ಧಾರಯನ್ತೋ ಉಪಾಗಞ್ಛಿ, ಠಾನಂ ತಂ ಪುಬ್ಬವುಟ್ಠಕಂ॥

೫೪.

ದೇವೋ ಹಿ ಸೋ ನಾಗದೀಪೇ, ಮನುಸ್ಸೋ’ನನ್ತರೇ ಭವೇ।

ಅಹೋಸಿ ರಾಜಾಯತನ-ಠಿತಠಾನೇ ಸ ಅದ್ದಸ॥

೫೫.

ಪಚ್ಚೇಕಬುದ್ಧ ಭುಞ್ಜನ್ತೇ, ದಿಸ್ವಾ ಚಿತ್ತಂ ಪಸಾದಿಯ।

ಪತ್ತಸೋಧನಸಾಖಾಯೋ, ತೇಸಂ ಪಾದಾಸಿ ತೇನ ಸೋ॥

೫೬.

ನಿಬ್ಬತ್ತಿತಸ್ಮಿಂ ರುಕ್ಖಸ್ಮಿಂ, ಜೇತುಯ್ಯಾನೇ ಮನೋರಮೇ।

ದ್ವಾರಕೋಟ್ಠಕಪಸ್ಸಮ್ಹಿ, ಪಚ್ಛಾ ಬಹಿ ಅಹೋಸಿ ಸೋ॥

೫೭.

ದೇವಾತಿದೇವೋ ದೇವಸ್ಸ, ತಸ್ಸ ವುದ್ಧಿಞ್ಚ ಪಸ್ಸಿಯ।

ಇದಂ ಠಾನ ಹಿತತ್ಥಞ್ಚ, ತಂ ಸರುಕ್ಖಂ ಇಧಾನಯಿ॥

೫೮.

ಸಙ್ಗಾಮಮಜ್ಝೇ ಆಕಾಸೇ, ನಿಸಿನ್ನೋ ತತ್ಥ ನಾಯಕೋ।

ತಮಂ ತಮೋನುದೋ ತೇಸಂ, ನಾಗಾನಂ ಹಿಂಸನಂ ಅಕಾ॥

೫೯.

ಅಸ್ಸಾಸೇನ್ತೋ ಭಯಟ್ಟೇ ತೇ, ಆಲೋಕಂ ಪವಿದ್ಧಂಸಯಿ।

ತೇ ದಿಸ್ವಾ ಸುಗತಂ ತುಟ್ಠಾ, ಪಾದೇ ವನ್ದಿಂಸು ಸತ್ಥುನೋ॥

೬೦.

ತೇಸಂ ಧಮ್ಮಮದೇಸೇಸಿ, ಸಾಮಗ್ಗಿಕರಣಂ ಜಿನೋ।

ಉಭೋ’ಪಿ ತೇ ಪತೀತಾ ತಂ, ಪಲ್ಲಙ್ಕಂ ಮುನಿನೋ ಅದುಂ॥

೬೧.

ಸತ್ಥಾ ಭೂಮಿಗತೋ ತತ್ಥ, ಪಸೀದಿಸ್ವಾನ ಆಸನೇ।

ತೇಹಿ ದಿಬ್ಬನ್ನಪಾನೇಹಿ, ನಾಗರಾಜೇಹಿ ತಪ್ಪಿತೋ॥

೬೨.

ತೇ ಜಲಟ್ಠೇ ತಲಟ್ಠೇ ಚ, ಭುಜಗೇ’ಸೀತಿಕೋಟಿಯೋ।

ಸರಣೇಸು ಚ ಸೀಲೇಸು, ಪತಿಟ್ಠಾಪೇಸಿ ನಾಯಕೋ॥

೬೩.

ಮಹೋದರಸ್ಸ ನಾಗಸ್ಸ, ಮಾತುಲೋ ಮಣಿಅಕ್ಖಿಕೋ।

ಕಲ್ಯಾಣಿಯಂ ನಾಗರಾಜಾ, ಯುದ್ಧಂ ಕಾತುಂ ತಹಿಂ ಗತೋ॥

೬೪.

ಬುದ್ಧಗಾಮಮ್ಹಿ ಪಠಮೇ, ಸುತ್ವಾ ಸದ್ಧಮ್ಮದೇಸನಂ।

ಠಿತೋ ಸರಣಸೀಲೇಸು, ತತ್ಥಾ’ಯಾಚಿ ತಥಾಗತಂ॥

೬೫.

ಮಹತೀ ಅನುಕಮ್ಪಾನೋ, ಕತಾ ನಾಥ ತಯಾ ಅಯಂ।

ತವಾನಾಗಮನೇ ಸಬ್ಬೇ, ಮಯಂ ಭಸ್ಮೀ ಭವಾಮಹೇ॥

೬೬.

ಅನುಕಮ್ಪಾ ಮಹೀ ಪಿತೇ, ವಿಸುಂ ಹೋತು ಮಹೋದಯ।

ಪುನರಾಗಮನೇನೇತ್ಥ, ವಾಸಭೂಮಿಂ ಮಮಾ ಮಮ॥

೬೭.

ಅಧಿವಾಸಯಿತ್ವಾ ಭಗವಾ, ತುಣ್ಹಿಭಾವೇ ನಿಧಾಗಮಂ।

ಪತಿಟ್ಠಾಪೇಸಿ ತತ್ಥೇವ, ರಾಜಾಯತನಚೇತಿಯಂ॥

೬೮.

ತಞ್ಚಪಿ ರಾಜಾಯತನಂ, ಪಲ್ಲಞ್ಚಙ್ಕ ಮಹಾರಹಂ।

ಅಪ್ಪೇಸಿ ನಾಗರಾಜೂನಂ, ಲೋಕನಾಥೋ ನಮಸ್ಸಿತುಂ॥

೬೯.

ಪರಿಭೋಗಚೇತಿಯಂ ಮಯ್ಹಂ, ನಾಗರಾಜಾ ನಮಸ್ಸಥ।

ತಂ ಭವಿಸ್ಸತಿ ವೋತಾತಾ, ಹಿತಾಯ ಚ ಸುಖಾಯ ಚ॥

೭೦.

ಇಚ್ಚೇವಮಾದಿಂ ಸುಗತೋ, ನಾಗಾನಂ ಅನುಸಾಸನಂ।

ಕತ್ವಾ ಜೇತವನಂ ಏವ, ಗತೋ ಲೋಕಾನುಕಮ್ಪಕೋತಿ॥

ನಾಗದೀಪಾಗಮನಂ

ಕಲ್ಯಾಣಾಗಮನಂ

೭೧.

ತತೋ ಸೋ ತತಿಯೇ ವಸ್ಸೇ,

ನಾಗಿನ್ದೋ ಮಣಿಅಕ್ಖಿಕೋ।

ಉಪಸಙ್ಕಮ್ಮ ಸಮ್ಬುದ್ಧಂ,

ಸತಸಙ್ಘಂ ನಿಮನ್ತಯಿ॥

೭೨.

ಬೋಧಿತೋ ಅಟ್ಠಮೇ ವಸ್ಸೇ, ವಸಂ ಜೇತವನೇ ಜಿನೋ।

ನಾಥೋ ಪಞ್ಚಹಿ ಭಿಕ್ಖೂನಂ, ಸತೇಹಿ ಪರಿವಾರಿತೋ॥

೭೩.

ದುತಿಯೇ ದಿವಸೇ ಭತ್ತ-ಕಾಲೇ ಆರೋಚಿತೇ ಜಿನೋ।

ರಮ್ಮೇ ವೇಸಾಖಮಾಸಮ್ಹಿ, ಪುಣ್ಣಮಾಯಂ ಮುನಿಸ್ಸರೋ॥

೭೪.

ತತ್ಥೇವ ಪಾರುಪಿತ್ವಾನ, ಸಙ್ಘಾಟಿಂ ಪತ್ತಮಾದಿಯ।

ಆಗಾ ಕಲ್ಯಾಣಿದೇಸಂ ತಂ, ಮಣಿಅಕ್ಖಿನಿವೇಸನಂ॥

೭೫.

ಕಲ್ಯಾಣಿ ಚೇತಿಯಠಾನೇ, ಕತೇ ರತನಮಣ್ಡಪೇ।

ಮಹಾರಹಮ್ಹಿ ಪಲ್ಲಙ್ಕೇ, ಸಹಸಙ್ಘೇನು’ಪಾವಿಸಿ॥

೭೬.

ದಿಬ್ಬೇಹಿ ಖಜ್ಜಭೋಜ್ಜೇಹಿ, ಸಗಣೋ ಸಗಣಂ ಜಿನಂ।

ನಾಗರಾಜಾ ಧಮ್ಮರಾಜಂ, ಸನ್ತಪ್ಪೇಸಿ ಸುಮಾನಸೋ॥

೭೭.

ತತ್ಥ ಧಮ್ಮಂ ದೇಸಯಿತ್ವಾ, ಸತ್ಥಾ ಲೋನುಕಮ್ಪಕೋ।

ಉಗ್ಗನ್ತ್ವಾ ಸುಮನೇ ಕೂಟೇ, ಪದಂ ದಸ್ಸೇಸಿ ನಾಯಕೋ॥

೭೮.

ತಸ್ಮಿಂ ಪಬ್ಬತಪಾದಮ್ಹಿ, ಸಹಸಙ್ಘೋ ಯಥಾಸುಖಂ।

ದಿವಾ ವಿಹಾರಂ ಕತ್ವಾನ, ದೀಘವಾಪಿ ಮುಪಾಗಮಿ॥

೭೯.

ತತ್ಥ ಚೇತಿಯಠಾನಮ್ಹಿ, ಸಸಙ್ಘೋವ ನಿಸೀದಿಯ।

ಸಮಾಧಿಂ ಅಪ್ಪಯೀ ನಾಥೋ, ಠಾನಾಗಾರವಪತ್ತಿಯಾ॥

೮೦.

ತತೋ ವುಟ್ಠಾಯ ಠಾನಮ್ಹಾ, ಠಾನಾಠಾನೇಸು ಕೋವಿದೋ।

ಮಹಾಮೇಘವನಾರಾಮ-ಠಾನಮಾಗ ಮಹಾಮುನಿ॥

೮೧.

ಮಹಾಬೋಧಿಠಿತಠಾನೇ, ನಿಸೀದಿತ್ವಾ ಸಸಾವಕೋ।

ಸಮಾಧಿಂ ಅಪ್ಪಯೀ ನಾಥೋ, ಮಹಾಥೂಪಠಿತೇ ತಥಾ॥

೮೨.

ಥೂಪಾರಾಮಮ್ಹಿ ಥೂಪಸ್ಸ, ಠಿತಠಾನೇ ತಥೇವ ಚ।

ಸಮಾಧಿತೋ’ಥ ವುಟ್ಠಾಯ, ಸಿಲಾಚೇತಿಯಠಾನಗೋ॥

೮೩.

ಸಹಾಗತೇ ದೇವಗಣೋ, ಗಣೀ ಸಮನುಸಾಸಿಯ।

ತತೋ ಜೇತವನಂ ಬುದ್ಧೋ, ಬುದ್ಧಸಬ್ಬತ್ಥಕೋ ಅಗಾ॥

೮೪.

ಏವಂ ಲಙ್ಕಾಯ ನಾಥೋ, ಹಿತಮಮಿತಮತೀ ಆಯತಿಂ ಪೇಕ್ಖಮಾನೋ।

ತಸ್ಮಿಂ ಕಾಲಮ್ಹಿ ಲಂಕಾಸುರಭುಜಗಗಣಾದೀನಮತ್ಥಞ್ಚ ಪಸ್ಸಂ।

ಆಗಾ ತಿಕ್ಖತ್ತುಮೇತಂ ಅತಿವಿಪುಲದಯೋ ಲೋಕದೀಪೋ ಸುದೀಪಂ।

ದೀಪೋ ತೇನಾಯಮಾಸಿ ಸುಜನಬಹುಮನೋ ಧಮ್ಮದೀಪಾವ ಭಾಸೀತಿ॥

ಕಲ್ಯಾಣಾಗಮನಂ

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ತಥಾಗತಾಭಿಗಮನಂ ನಾಮ

ಪಠಮೋ ಪರಿಚ್ಛೇದೋ।