ಏಕಾದಸಮ ಪರಿಚ್ಛೇದ
ದೇವಾನಂಪಿಯತಿಸ್ಸಾಭಿಸೇಕೋ
೧.
ತಸ್ಸಚ್ಚಯೇ
ಸುವಣ್ಣಪಾಲಿಯಾ ಪುತ್ತೋ, ಪತ್ತೋ ರಜ್ಜಮನಾಕುಲಂ॥
೨.
ಮಹಾಮೇಘವನುಯ್ಯಾನಂ, ನಾಮನುಗಗುಣೋದಿತಂ।
ಫಲಪುಪ್ಫತರುಪೇತಂ, ಸೋ ರಾಜಾ ಕಾರಯಿ ಸುಭಂ॥
೩.
ಉಯ್ಯಾನಠಾನಗ್ಗಹಣೇ, ಮಹಾಮೇಘೋ ಅಕಾಲಜೋ।
ಪಾವಸ್ಸಿತೇನ ಉಯ್ಯಾನಂ, ಮಹಾಮೇಘವನಂ ಅಹು॥
೪.
ಸಟ್ಠಿವಸ್ಸಾನಿ ಮುಟಸಿವೋ, ರಾಜಾ ರಾಜ್ಜಮಕಾರಯಿ।
ಅನುರಾಧೇ ಪುರವರೇ, ಲಂಕಾ ಭುವದನೇ ಸುಭೇ॥
೫.
ತಸ್ಸ ಪುತ್ತಾ ದಸಾ’ಹೇಸುಂ, ಅಞ್ಞಮಞ್ಞಹಿತೇಸಿನೋ।
ದುವೇ ಧೀತಾ ಚಾ’ನುಕುಲಾ, ಕುಲಾನುಚ್ಛವಿಕಾ ಅಹೂ॥
೬.
ದೇವಾನಂ ಪಿಯತಿಸ್ಸೋತಿ, ವಿಸ್ಸುತೋ ದುತಿಯೋ ಸುತೋ।
ತೇಸು ಭಾತೂಸು ಸಬ್ಬೇಸು, ಪುಞ್ಞಾಪಞ್ಞಾಧಿಕೋ ಅಹು॥
೭.
ದೇವಾನಂ ಪಿಯತಿಸ್ಸೋ ಸೋ, ರಾಜಾ’ಸಿ ಪಿತುಅಚ್ಚಯೇ।
ತಸ್ಸಾ’ಭಿಸೇಕೇನ ಸಮಂ, ಬಹೂನ’ಚ್ಛರಿಯಾನ’ಹುಂ॥
೮.
ಲಂಕಾದೀಪಮ್ಹಿ ಸಕಲೇ, ನಿಧಯೋ ರತನಾನಿ ಚ।
ಅನ್ತೋಠಿತಾನಿ ಉಗ್ಗನ್ತ್ವಾ, ಪಥವೀತಲಮಾರುಹುಂ॥
೯.
ಲಂಕಾದೀಪಸಮೀಪಮ್ಹಿ, ಭಿನ್ನನಾವಾಗತಾನಿ ಚ।
ತತ್ರಜಾತಾನಿ ಚ ಥಲಂ, ರತನಾನಿ ಸಮಾರುಹುಂ॥
೧೦.
ಛಾತಪಬ್ಬತಪಾದಮ್ಹಿ, ತಿಸ್ಸೋ ಚ ವೇಳುಯಟ್ಠಿಯೋ।
ಜಾತಾರಥಪತೋದೇನ, ಸಮಾನಾ ಪರಿಮಾಣತೋ॥
೧೧.
ತಾಸು ಏಕಾಲತಾಯಟ್ಠಿ, ರಜತಾ’ಭಾ ತಹಿಂ ಲತಾ।
ಸುವಣ್ಣಾವಣ್ಣಾರುಚಿರಾ, ದಿಸ್ಸನ್ತೇತಾ ಮನೋರಮಾ॥
೧೨.
ಏಕಾ ಕುಸುಮಾ ಯಟ್ಠೀತು, ಕುಸುಮಾನಿ ತಹಿಂ ಪನ।
ನಾನಾನಿ ನಾನಾವಣ್ಣಾನಿ, ದಿಸ್ಸನ್ತೇ’ತಿ ಫುಟಾನಿ ಚ॥
೧೩.
ಏಕಾಸಕುಣಯಟ್ಠಿತು
ನಾನಾ ಚ ನಾನಾವಣ್ಣಾ ಚ, ಸಜೀವಾ ವಿಯ ದಿಸ್ಸರೇ॥
೧೪.
ಭಯಗಜರಥಾಮಲಕಾ, ವಲಯಙ್ಗುಲಿವೇಠಕಾ।
ಕಕುಧಫಲಾಪಾಕತಿಕಾ, ಇಚ್ಚೇತಾ ಅಟ್ಠಜಾತಿಯೋ॥
೧೫.
ಮುತ್ತಾಸಮುದಾ ಉಗ್ಗನ್ತ್ವಾ, ತೀರೇ ವಟ್ಟಿ ವಿಯ ಠಿತಾ।
ದೇವಾನಂ ಪಿಯತಿಸ್ಸಸ್ಸ, ಸಬ್ಬಂ ಪುಞ್ಞವಿಜಮ್ಭಿತಂ॥
೧೬.
ಇನ್ದನೀಲಂ ವೇಳುರಿಯಂ, ಲೋಹಿತಙ್ಕಮಣಿಧಿ’ಮೇ।
ರಜತಾನಿ ಪನೇ’ತಾನಿ, ಮುತ್ತಾ ತಾ ತಾವಯಟ್ಠಿಯೋ॥
೧೭.
ಸತ್ತಹಬ್ಭನ್ತರೇಯೇವ, ರಞ್ಞೋ ಸನ್ತಿಕಮಾಹರುಂ।
ತಾನಿ ದಿಸ್ವಾ ಪತೀತೋ ಸೋ, ರಾಜಾ ಇತಿ ವಿಚಿನ್ತಯಿ॥
೧೮.
ರತನಾನಿ ಅನಗ್ಘಾನಿ, ಧಮ್ಮಾಸೋಕೋ ಇಮಾನಿಮೇ।
ಸಹಾಯೋ’ರಹತೇನಾ’ಞ್ಞೋ, ತಸ್ಸ ದಸ್ಸಂ ಇಮಾನ’ತೋ॥
೧೯.
ದೇವಾನಂ ಪಿಯತಿಸ್ಸೋ ಚ, ಧಮ್ಮಾಸೋಕೋ ಚ ತೇ ಇಮೇ।
ದ್ವೇ ಅದಿಟ್ಠಸಹಾಯಾಹಿ, ಚಿರಪ್ಪಭುತಿ ಭೂಪತಿ॥
೨೦.
ಭಾಗಿನೇಯ್ಯಂ ಮಹಾರಿಟ್ಠಂ, ಅಮಚ್ಚಂ ಪಮುಖಂ ತತೋ।
ದಿಜಂ ಅಮಚ್ಚಂ ಗಣತಂ, ರಾಜಾ ತೇ ಚತುರೋ ಜನೇ॥
೨೧.
ದೂತೋ ಕತ್ವಾನ ಪಾಹೇಸಿ, ಬಲೋಘಪರಿವಾರಿತೇ।
ಗಾಹಾ ಪೇತ್ವಾ ಅನಗ್ಘಾನಿ, ರತನಾನಿ ಇಮಾನಿ ಸೋ॥
೨೨.
ಮಣಿಜಾತೀ ಚ ತಿಸ್ಸೋ ತಾ, ತಿಸ್ಸೋ ಚ ರಥಯಟ್ಠಿಯೋ।
ಸಙ್ಖಞ್ಚ ದಕ್ಖಿಣಾವತ್ತಂ, ಮುತ್ತಾ ಜಾತೀ ಚ ಅಟ್ಠ ತಾ॥
೨೩.
ಆರುಯ್ಹ ಜಮ್ಬುಕೋಲಮ್ಹಿ, ನಾವಂ ಸತ್ತದಿನೇನ ತೇ।
ಸುಖೇನ ತಿತ್ಥಂ ಲದ್ಧಾನ, ಸತ್ತಾಹೇನ ತತೋ ಪುನ॥
೨೪.
ಪಾಟಲಿಪುತ್ತಂ ಗನ್ತ್ವಾನ, ಧಮ್ಮಾಸೋಕಸ್ಸ ರಾಜಿನೋ।
ಅದಂಸು ಪಣ್ಣಾಕಾರೇತೇ, ದಿಸ್ವಾ ತಾನಿ ಪಸೀದಿ ಸೋ॥
೨೫.
ರತನಾನಿ’ದಿಸಾನೇತ್ಥ, ನತ್ಥಿ ಮೇ ಇತಿ ಚಿನ್ತಿಯ।
ಅದಾ ಸೇನಾಪತಿಟ್ಠಾನಂ, ತುಟ್ಠೋ’ರಿಟ್ಠಸ್ಸ ಭೂಪತಿ॥
೨೬.
ಪೋರೋಹಿಚ್ಚಬ್ರಾಹ್ಮಣಸ್ಸ, ದಣ್ಡನಾಯತಂ ಪನ।
ಅದಾಸಿ ತಸ್ಸಾ’ಮಚ್ಚಸ್ಸ, ಸೇಟ್ಠಿತ್ತಂ ಗಣಕಸ್ಸ ತು॥
೨೭.
ತೇಸಂ ಅನಪ್ಪಕೇ ಭೋಗೇ, ದತ್ವಾ ವಾಸಘರಾನಿ ಚ।
ಮಹಾಮಚ್ಚೇಹಿ ಮನ್ತೇನ್ತೋ, ಪಸ್ಸಿತ್ವಾ ಪಟಿಪಾಭತಂ॥
೨೮.
ವಾಲಬೀಜನೀ
ಮೋಳಿಂ ವತಂ ಸಪಾಮಙ್ಗಂ, ಭಿಙ್ಕಾರಂ ಹರಿಚನ್ದನಂ॥
೨೯.
ಅಧೋವಿಮಂ ವತ್ಥಕೋಟಿಂ, ಮಹಗ್ಘಂ ಹತ್ಥಪುಞ್ಛನಿಂ।
ನಾಗಾ’ಹಟಂ ಅಞ್ಜನಞ್ಚ, ಅರುಣಾಭಞ್ಚ ಮತ್ತಿಕಂ॥
೩೦.
ಅನೋತತ್ತೋದಕಞ್ಚೇವ, ಗಙ್ಗಾಸಲಿಲಮೇವ ಚ।
ಸಙ್ಖಞ್ಚ ನನ್ದಿಯಾವಟ್ಟಂ, ವಡ್ಢಮಾನಂ ಕುಮಾರಿಕಂ॥
೩೧.
ಹೇಮಭೋಜನಕಣ್ಡಞ್ಚ, ಸಿವಿಕಞ್ಚ ಮಹಾರಹಂ।
ಹರೀಟಕಂ ಆಮಲಕಂ, ಮಹಗ್ಘಂ ಅಮತೋಸಧಂ॥
೩೨.
ಸುಕಾಹಟಾನಂ ಸಾಲೀನಂ, ಸಟ್ಠಿವಾಹಸತಾನಿ ಚ।
ಅಭಿಸೇಕೋ ಪಕರಣಂ, ಪರಿವಾರವಿಸೇಸಿತಂ॥
೩೩.
ದತ್ವಾ ಕಾಲೇ ಭಹಾಯಸ್ಸ, ಪಣ್ಣಾಕಾರೇ ನರಿಸ್ಸರೋ।
ದೂತೇ ಪಾಹೇಸಿಸದ್ಧಮ್ಮ-ಪಣ್ಣಾಕಾರಮಿಮಮ್ಪಿಚ॥
೩೪.
ಅಹಂ ಬುದ್ಧಞ್ಚ ಧಮ್ಮಞ್ಚ, ಸಙ್ಘಞ್ಚ ಸರಣಂ ಗತೋ।
ಉಪಾಸಕತ್ತಂ ದೇಸೇಸಿಂ, ಸಕ್ಯಪುತ್ತಸ್ಸ ಸಾಸನೇ॥
೩೫.
ತ್ವಮ್ಪಿಮಾನಿ ರತನಾನಿ, ಉತ್ತಮಾನಿ ನರುತ್ತಮ।
ಚಿತ್ತಂ ಪಸಾದಯಿತ್ವಾನ, ಸದ್ಧಾಯ ಸರಣಂ ವಜ॥
೩೬.
‘‘ಕರೋಥ ಮೇ ಸಹಾಯಸ್ಸ, ಅಭಿಸೇಕಂ ಪುನೋ’’ ಇತಿ।
ವತ್ವಾ ಸಹಯಾ’ಮಚ್ಚೇತೇ, ಸಕ್ಕರಿತ್ವಾ ಚ ಪೇಸಯಿ॥
೩೭.
ಪಞ್ಚಮಾಸೇ ವಸಿತ್ವಾನ, ತೇ ಮಚ್ಚಾ’ತಿವಸಕ್ಕತಾ।
ವೇಸಾಖಸುಕ್ಖಪಕ್ಖಾದಿ-ದಿನೇ ದೂತಾ ವಿನಿಗ್ಗತಾ॥
೩೮.
ತಾಮಲಿತ್ತಿಯಮಾರುಯ್ಹ, ನಾವಂ ತೇಜಮ್ಬುಕೋಲಕೇ।
ಓರುಯ್ಹ ಕೂಪಂ ಪಸ್ಸಿಂಸು, ಪತ್ವಾ ದ್ವಾದಸಿಯಂ ಇಧ॥
೩೯.
ಅದಂಸು ಪಣ್ಣಾಕಾರೇ ತೇ, ದೂತಾ ಲಂಕಾದೀಪಸ್ಸತೇ।
ತೇಸಂ ಮಹನ್ತಂ ಸಕ್ಕಾರಂ, ಲಂಕಾಪತಿ ಅಕಾರಯಿ॥
೪೦.
ತೇ ಮಗ್ಗಸಿರಮಾಸಸ್ಸ, ಆದಿಚನ್ದೋದಯೇಜಿನೇ।
ಅಭಿಸಿತ್ತಞ್ಚ ಲಂಕಿನ್ದಂ, ಅಮಚ್ಚಾ ಸಾಮಿಭತ್ತಿನೋ॥
೪೧.
ಧಮ್ಮಾಸೋಕಸ್ಸ ವಚನಂ, ವತ್ವಾ ಸಾಮಿ ಹಿತೇರತಾ।
ಪುನೋಪಿ ಅಭಿಸಿಞ್ಚಿಂಸು, ಲಂಕಾಹಿತಸುಖೇರತಂ॥
೪೨.
ವೇಸಾಖೇ
ದೇವಾನಂ ಪಿಯವಚನೋ ಪಗೂಳನಾಮೋ।
ಲಂಕಾಯಂ ಪವೀತತಪೀತಿ ಉಸ್ಸವಾಯಂ।
ಅತ್ತಾನಂ ಜನಸುಖದೋ’ಭಿಸೇಚಯೀ ಸೋತಿ॥
ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ
ದೇವಾನಂಪಿಯತಿಸ್ಸಾಭಿಸೇಕೋನಾಮ
ಏಕಾದಸಮೋ ಪರಿಚ್ಛೇದೋ।