ತೇರಸಮ ಪರಿಚ್ಛೇದ

ಮಹಿನ್ದಾಗಮನೋ

೧.

ಮಹಾಮಹಿನ್ದತ್ಥೇರೋ ಸೋ, ತದಾ ದ್ವಾದಸವಸ್ಸಿಕೋ।

ಉಪಜ್ಝಾಯೇನ ಆಣತ್ತೋ, ಸಙ್ಘೇನ ಚ ಮಹಾಮತೀ॥

೨.

ಲಂಕಾದೀಪಂ ಪಸಾದೇತುಂ,

ಕಾಲಂ ಪೇಕ್ಖಂ ವಿಚಿನ್ತಯೀ।

‘‘ವುಡ್ಢೋ ಮುಟಸಿವೋ ರಾಜಾ,

ರಾಜಾ ಹೋತು ಸುತೋ’’ ಇತಿ॥

೩.

ತದನ್ತರೇ ಞಾತಿಗಣಂ, ದಟ್ಠುಂ ಕತ್ವಾನ ಮಾನಸಂ।

ಉಪಜ್ಝಾಯಞ್ಚ ಸಙ್ಘಞ್ಚ, ವನ್ದಿತ್ವಾ ಪುಚ್ಛ ಭೂಪತಿಂ॥

೪.

ಆದಾಯ ಚತುರೋ ಥೇರೇ, ಸಙ್ಘಮಿತ್ತಾಯ ಅತ್ರಜಂ।

ಸುಮನಂ ಸಾಮಣೇರಞ್ಚ, ಛಳಾಭಿಞ್ಞಂ ಮಹಿದ್ಧಿಕಂ॥

೫.

ಞಾತೀನಂ ಸಙ್ಗಹಂ ಕಾತುಂ, ಅಗಮಾ ದಕ್ಖಿಣಾಗಿರಿಂ।

ತತೋ ತತ್ಥ ಚರನ್ತಸ್ಸ, ಛಮ್ಮಾಸಾ ಸಮತಿಕ್ಕಮುಂ॥

೬.

ಕಮೇನ ವೇದಿಸಗಿರಿಂ, ನಗರಂ ಮಾತುದೇವಿಯಾ।

ಸಮ್ಪತ್ವಾ ಮತರಂ ಪಸ್ಸಿ, ದೇವೀ ದಿಸ್ವಾ ಪಿಯಂ ಸುತಂ॥

೭.

ಭೋಜಯಿತ್ವಾ ಸಪರಿಸಂ, ಅತ್ತನಾಯೇವ ಕಾರಿತಂ।

ವಿಹಾರಂ ಚೇತಿಯಗಿರಿಂ, ಥೇರಂ ಆರೋಪಯೀ ಸುಭಂ॥

೮.

ಅವನ್ತಿರಟ್ಠಂ ಭುಞ್ಜನ್ತೋ, ಪಿತರಾ ದಿನ್ನಮತ್ತನೋ।

ಸೋ ಅಸೋಕ ಕುಮಾರೋ ಹಿ, ಉಜ್ಜೇನೀಗಮನಾ ಪುರಾ॥

೯.

ವೇದಿಸೇ ನಗರೇ ವಾಸಂ, ಉಪಗನ್ತ್ವಾ ತಹಿಂ ಸುಭಂ।

ದೇವಿನ್ನಾಮ ಲಭಿತ್ವಾನ, ಕುಮಾರಿಂ ಸೇಟ್ಠಿಧೀತರಂ॥

೧೦.

ಸಂವಾಸಂ ತಾಯ ಕಪ್ಪೇಸಿ, ಗಬ್ಭಂ ಗಣ್ಹಿಯ ತೇನ ಸಾ।

ಉಜ್ಜೇನಿಯಂ ಕುಮಾರಂ ತಂ, ಮಹಿನ್ದಂ ಜನಯೀ ಸುಭಂ॥

೧೧.

ವಸ್ಸದ್ವಯಮತಿಕ್ಕಮ್ಮ, ಸಙ್ಘಮಿತ್ತಞ್ಚ ಧೀತರಂ।

ತಸ್ಮಿಂ ಕಾಲೇ ವಸತಿ ಸಾ, ವೇದಿಸೇ ನಗರೇ ತಹಿಂ॥

೧೨.

ಥೇರೋ ತತ್ಥ ನಿಸೀದಿತ್ವಾ, ಕಾಲಞ್ಞೂ ಇತಿ ಚಿನ್ತಯಿ।

ಪಿತರಾ ಮೇ ಸಮಾಣತ್ತಂ, ಅಭಿಸೇಕ ಮಹುಸ್ಸವಂ॥

೧೩.

ದೇವಾನಂಪಿಯತಿಸ್ಸೋ ಸೋ, ಮಹಾರಾಜಾ’ನುಭೋತು ಚ।

ವತ್ಥುತ್ತಯಗುಣೇ ಚಾಪಿ, ಸುತ್ವಾ ಜಾನಾತು ದೂಹತೋ॥

೧೪.

ಆರೋಹತು ಮಿಸ್ಸನಗಂ, ಜೇಟ್ಠಮಾಸಸ್ಸು’ಪೋಸಥೇ।

ತದಹೇವ ಗಮಿಸ್ಸಾಮ, ಲಂಕಾದೀಪವರಂ ಮಯಂ॥

೧೫.

ಮಹಿನ್ದೋ ಉಪಸಙ್ಕಮ್ಮ, ಮಹಿನ್ದತ್ಥೇರ ಮುತ್ತಮಂ।

ಯಾಹಿ ಲಂಕಂ ಪಸಾದೇತುಂ, ಸಮ್ಬುದ್ಧೇನಾ’ಸಿ ಬ್ಯಾಕತೋ॥

೧೬.

ಮಯಮ್ಪಿ ತತ್ಥುಪತ್ಥಮ್ಭಾ, ಭವಿಸ್ಸಾಮಾ’ತಿ ಅಬ್ರವಿ।

ದೇವಿಯಾ ಭಗಿನೀ ಧೀತು-ಪುತ್ತೋ ಭಣ್ಡುಕ ನಾಮಕೋ॥

೧೭.

ಥೇರೇನ ದೇವಿಯಾ ಧಮ್ಮಂ, ಸುತ್ವಾ ದೇಸಿತಮೇವ ತು।

ಅನಾಗಾಮಿಫಲಂ ಪತ್ವಾ, ವಸಿ ಥೇರಸ್ಸ ಸನ್ತಿಕೇ॥

೧೮.

ತತ್ಥ ಮಾಸಂ ವಸಿತ್ವಾನ, ಜೇಟ್ಠಮಾಸಸ್ಸು’ ಪೋಸಥೇ।

ಥೇರೋ ಚತೂಹಿ ಥೇರೇಹಿ, ಸುಮನೇನಾ’ಥ ಭಣ್ಡುನಾ॥

೧೯.

ಸದ್ಧಿಂ ತೇನ ಗಹಟ್ಠೇನ, ನ ರತೋ ಞಾತಿಹೇತುನಾ।

ತಸ್ಮಾ ವಿಹಾರಾ ಆಕಾಸಂ, ಉಗ್ಗನ್ತ್ವಾ ಸೋ ಮಹಿದ್ಧಿಕೋ॥

೨೦.

ಖಣೇನೇವ ಇಧಾಗಮ್ಮ, ರಮ್ಮೇ ಮಿಸ್ಸಕ ಪಬ್ಬತೇ।

ಅಟ್ಠಾಸಿ ವಿಲುಕೂಟಮ್ಹಿ, ರುಚಿರಮ್ಬತ್ಥಲೇ ವರೇ॥

೨೧.

ಲಂಕಾಪಸಾದ ಗುಣೇನ ವಿಯಾಕತೋ ಸೋ।

ಲಂಕಾಹಿತಾಯ ಮುನಿನಾ ಸಯಿತೇನ ಅನ್ತೇ।

ಲಂಕಾಯ ಸತ್ಥುಸದಿಸೋ ಹಿತಹೇತು ತಸ್ಸಾ।

ಲಂಕಾಮರೂಹಿ ಮಹಿತೋ’ಭಿನಿಸೀದಿ ತತ್ತಾತಿ॥

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ಮಹಿನ್ದಾಗಮನೋ ನಾಮ

ತೇರಸಮೋ ಪರಿಚ್ಛೇದೋ।