ಸೋಳಸಮ ಪರಿಚ್ಛೇದ

ಚೇತಿಯಪಬ್ಬತವಿಹಾರ ಪಟಿಗ್ಗಹಕೋ

೧.

ಪುರೇ ಚರಿತ್ವಾ ಪಿಣ್ಡಾಯ, ಕರಿತ್ವಾ ಜನಸಙ್ಗಹಂ।

ರಾಜಗೇಹಮ್ಹಿ ಭುಞ್ಜನ್ತೋ, ಕಾರೇನ್ತೋ ರಾಜಸಙ್ಗಹಂ॥

೨.

ಛಬ್ಬಸದಿವಸೇ ಥೇರೋ, ಮಹಾಮೇಘವನೇ ವಸೀ।

ಆಸಳ್ಹಸುಕ್ಕಪಕ್ಖಸ್ಸ, ತೇರಸೇ ದಿವಸೇ ಪನ॥

೩.

ರಾಜಗೇಹಮ್ಹಿ ಭುಞ್ಜಿತ್ವಾ, ಮಹಾರಞ್ಞೋ ಮಹಾಮತಿ।

ಮಹಾ’ಪ್ಪಮಾದಸುತ್ತನ್ತಂ, ದೇಸಯಿತ್ವಾ ತತೋ ಚ ಸೋ॥

೪.

ವಿಹಾರಕರಣಂ ಇಚ್ಛಂ, ತತ್ಥ ಚೇತಿಯಪಬ್ಬತೇ।

ನಿಕ್ಖಮ್ಮ ಪುರಿಮದ್ವಾರಾ, ಅಗಾ ಚೇತಿಯಪಬ್ಬತಂ॥

೫.

ಥೇರಂ ತತ್ಥ ಗತಂ ಸುತ್ವಾ, ರಥಂ ಆರುಯ್ಹ ಭೂಪತಿ।

ದೇವಿಯೋ ದ್ವೇ ಚ ಆದಾಯ, ಥೇರಸ್ಸಾನುಪದಂ ಅಕಾ॥

೬.

ಥೇರಾ ನಾಗಚತುಕ್ಕಮ್ಹಿ, ನಹಾತ್ವಾ ರಹದೇ ತಹಿಂ।

ಪಬ್ಬತಾರೋಹಣತ್ಥಾಯ, ಅಟ್ಠಂಸು ಪಟಿಪಾಟಿಯಾ॥

೭.

ರಾಜಾ ರಥಾ ತದೋ’ರುಯ್ಹ, ಸಬ್ಬೇ ಥೇರೇ’ಭಿವಾದಯಿ।

ಉಣ್ಹೇ ಕಿಲನ್ತೇ ಕಿಂರಾಜ, ಆಗತೋಸೀ’ತಿ ಅಹುತೇ॥

೮.

ತುಮ್ಹಾಕಂ ಗಮನಾಸಙ್ಕೀ, ಆಗತೋಮ್ಹೀ’ತಿ ಭಾಸಿತೇ।

ಇಧೇವ ವಸ್ಸಂ ವಸಿತುಂ, ಆಗತಮ್ಹಾ’ತಿ ಭಾಸಿಯ॥

೯.

ತಸ್ಸೂಪನಾಯಿಕಂ ಥೇರೋ, ಖನ್ಧಕಂ ಖನ್ಧಕೋವಿದೋ।

ಕಥೇಸಿ ರಞ್ಞೋ ತಂ ಸುತ್ವಾ, ಭಾಗಿನೇಯ್ಯೋ ಚ ರಾಜಿನೋ॥

೧೦.

ಮಹಾರಿಟ್ಠೋ ಮಹಾಮಚ್ಚೋ, ಪಞ್ಚಪಞ್ಞಾಸಭಾತುಹಿ।

ಸದ್ಧಿಂ ಜೇಟ್ಠಕನಿಟ್ಠೇಹಿ, ರಾಜಾನಮಭಿತೋ ಠಿತೋ॥

೧೧.

ಯಾಚಿತ್ವಾ ತದಹು ಚೇವ, ಪಬ್ಬಜುಂ ಥೇರಸನ್ತಿಕೇ।

ಪತ್ತಾರಹತ್ತಂ ಸಬ್ಬೇಪಿ, ತೇ ಖುರಗ್ಗೇ ಮಹಾಮತೀ॥

೧೨.

ಕನ್ತಕಚೇತಿಯಠಾನೇ, ಪರಿತೋ ತದಹೇವ ಸೋ।

ಕಮ್ಮಾನಿ ಆರಭಾಪೇತ್ವಾ, ಲೇಣಾನಿ ಅಟ್ಠಸಟ್ಠಿಯೋ॥

೧೩.

ಅಗಮಾಸಿ ಪುರಂ ರಾಜಾ, ಥೇರಾ ತತ್ಥೇವ ತೇ ವಸುಂ।

ಕಾಲೇ ಪಿಣ್ಡಾಯ ನಗರಂ, ಪವಿಸನ್ತಾ’ನುಕಮ್ಪಕಾ॥

೧೪.

ನಿಟ್ಠಿತೇ ಲೇಣಕಮ್ಮಮ್ಹಿ, ಆಸಳ್ಹಿಪುಣ್ಣಮಾಸಿಯಂ।

ಗನ್ತ್ವಾ ಅದಾಸಿ ಥೇರಾನಂ, ರಾಜಾ ವಿಹಾರದಕ್ಖಿಣಂ॥

೧೫.

ದ್ವತ್ತಿಂಸಮಾಳಕಾನಞ್ಚ, ವಿಹಾರಸ್ಸ ಚ ತಸ್ಸ ಖೋ।

ಸೀಮಂ ಸೀಮಾತಿಗೋ ಥೇರೋ, ಬನ್ಧಿತ್ವಾ ತದಹೇವ ಸೋ॥

೧೬.

ತೇಸಂ ಪಬ್ಬಜ್ಜಾಪೇಕ್ಖಾನಂ, ಅಕಾಸಿ ಉಪಸಮ್ಪದಂ।

ಸಬ್ಬೇಸಂ ಸಬ್ಬಪಠಮಂ, ಬದ್ಧೇ ತುಮ್ಬರುಮಾಳಕೇ॥

೧೭.

ಏತೇ ದ್ವಾಸಟ್ಠಿ ಅರಹನ್ತೋ, ಸಬ್ಬೇ ಚೇತಿಯಪಬ್ಬತೇ।

ತತ್ಥ ವಸ್ಸಂ ಉಪಗನ್ತ್ವಾ, ಅಕಂಸು ರಾಜಸಙ್ಗಹಂ॥

೧೮.

ದೇವಮನುಸ್ಸಗಣಗಣಿತಂ ತಂ,

ತಞ್ಚ ಗಣಂ ಗುಣವಿತ್ಥತಕಿತ್ತಿಂ।

ಯಾನಮುಪಚ್ಚ ಚ ಮಾನಯಮಾನಾ,

ಪುಞ್ಞಚಯಂ ವಿಪುಲಂ ಅಕರಿಂಸೂತಿ॥

ಸುಜನಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ಚೇತಿಯಪಬ್ಬತವಿಹಾರಪಟಿಗ್ಗಹಕೋ ನಾಮ

ಸೋಳಸಮೋ ಪರಿಚ್ಛೇದೋ।