ಅಟ್ಠಾರಸಮ ಪರಿಚ್ಛೇದ

ಮಹಾಬೋಧಿಗ್ಗಹಣೋ

೧.

ಮಹಾಬೋಧಿಞ್ಚ ಥೇರಿಞ್ಚ, ಆಣಾಪೇತುಂ ಮಹೀಪತಿ।

ಥೇರೇನ ವುತ್ತವಚನಂ, ಸರಮಾನೋ ಸಕೇ ಘರೇ॥

೨.

ಅನ್ತೋವಸ್ಸೇ’ಕ ದಿವಸಂ, ನಿಸಿನ್ನೋ ಥೇರಸನ್ತಿಕೇ।

ಸಹಾ’ಮಚ್ಚೇಹಿ ಮನ್ತೇತ್ವಾ, ಭಾಗಿನೇಯ್ಯಂ ಸಯಂ ಸಕಂ॥

೩.

ಅರಿಟ್ಠನಾಮಕಾ’ಮಚ್ಚಂ , ತಸ್ಮಿಂ ಕಮ್ಮೇ ನಿಯೋಜಿತುಂ।

ಮನ್ತ್ವಾ ಆಮನ್ತಯಿತ್ವಾನ, ಇದಂ ವಚನಮಬ್ರವಿ॥

೪.

ತಾ ಸಕ್ಖಿಸ್ಸಸಿ....., ಧಮ್ಮಾಸೋಕಸ್ಸ ಸನ್ತಿಕಾ।

ಮಹಾಬೋಧಿಂ ಸಙ್ಘಮಿತ್ತಂ, ಥೇರಿಂ ಆನಯಿತುಂ ಇಧ॥

೫.

ಸಕ್ಖಿಸ್ಸಾಮಿ ಅಹಂ ದೇವ, ಆನೇತುಂ ತಂ ದುವೇ ತತೋ।

ಇಧಾ’ಗತೋ ಪಬ್ಬಜಿತುಂ, ಸಚೇ ಲಚ್ಛಾಮಿ ಮಾನದ॥

೬.

ಏವಂ ಹೋತೂತಿ ವತ್ವಾನ, ರಾಜಾ ತಂ ತತ್ಥ ಪೇಸಯಿ।

ಸೋ ಥೇರಸ್ಸ ಚ ರಞ್ಞೋ ಚ, ಸಾಸನಂ ಗಯ್ಹ ವನ್ದಿಯ॥

೭.

ಅಸ್ಸಯುಜಸುಕ್ಕಪಕ್ಖೇ, ನಿಕ್ಖನ್ತೋ ದುತಿಯೇ’ಹನಿ।

ಸಾನುಯುತ್ತೋ ಜಮ್ಬುಕೋಲೇ, ನಾವಮಾರುಯ್ಹ ಪಟ್ಟನೇ॥

೮.

ಮಹೋದಮಿಂ ಕರಿತ್ವಾನ, ಥೇರಾಧಿಟ್ಠಾನಯೋಗತೋ।

ನಿಕ್ಖನ್ತದಿವಸೇಯೇವ, ರಮ್ಮಂ ಪುಪ್ಫಪುರಂ ಅಗಾ॥

೯.

ತದಾ ತು ಅನುಲಾದೇವೀ, ಪಞ್ಚಕಞ್ಞಾಸತೇಹಿ ಚ।

ಅನ್ತೇಪುರಿಕಇತ್ಥೀನಂ, ಸದ್ಧಿಂ ಪಞ್ಚಸತೇಹಿ ಚ॥

೧೦.

ದಸಸೀಲಂ ಸಮಾದಾಯ, ಕಾಸಾಯ ವಸನಾ ಸುಚಿ।

ಪಬ್ಬಜ್ಜಾಪೇಕ್ಖಿ ನಿಸೇಖಾ, ಪೇಕ್ಖನ್ತಿ ಥೇರಿಯಾ’ಗಮಂ॥

೧೧.

ನಗರಸ್ಸೇ’ಕದೇಸಮ್ಹಿ, ರಮ್ಮೇ ಭಿಕ್ಖುನುಪಸ್ಸಯೇ।

ಕಾರಾಪಿತೇ ನರಿನ್ದೇನ, ವಾಸಂ ಕಪ್ಪೇಸಿ ಸುಬ್ಬತಾ॥

೧೨.

ಉಪಾಸಿಕಾಹಿ ತಾಹೇ’ಸ, ವುತ್ತೋ ಭಿಕ್ಖುನುಪಸ್ಸಯೋ।

ಉಪಾಸಿಕಾ ವಿಹಾರೋತಿ, ತೇನ ಲಂಕಾಯ ವಿಸ್ಸುತೋ॥

೧೩.

ಭಾಗಿನೇಯ್ಯೋ ಮಹಾ’ರಿಟ್ಠೋ, ಧಮ್ಮಾಸೋಕಸ್ಸ ರಾಜಿನೋ।

ಅಪ್ಪೇತ್ವಾ ರಾಜಸನ್ದೇಸಂ, ಥೇರಸನ್ದೇಸ’ಮಬ್ರವಿ॥

೧೪.

ಭಾತುಜಯಾ ಸಹಾಯಸ್ಸ, ರಞ್ಞೋ ತೇ ರಾಜಕುಞ್ಜರ।

ಆಕಙ್ಖಮಾನಾ ಪಬ್ಬಜ್ಜಂ, ನಿಚ್ಚಂ ವಸತಿ ಸಞ್ಞತಾ॥

೧೫.

ಸಙ್ಘಮಿತ್ತಂ ಭಿಕ್ಖುನಿಂ ತಂ, ಪಬ್ಬಾಜೇತುಂ ವಿಸಜ್ಜಯ।

ತಾಯ ಸದ್ಧಿಂ ಮಹಾಬೋಧಿ-ದಕ್ಖಿಣಸಾಖಮೇವ ಚ॥

೧೬.

ಥೇರಿಯಾ ಚ ತಮೇವತ್ಥಂ, ಅಬ್ರವಿ ಥೇರಭಾಸಿತಂ।

ಗನ್ತ್ವಾ ಪಿತುಸಮೀಪಂ ಸಾ, ಥೇರೀ ಥೇರಮತಂ ಬ್ರವೀ॥

೧೭.

ಆಹ ರಾಜಾ ತುವಂ ಅಮ್ಮ, ಅಪಸ್ಸನ್ತೋ ಕಥಂ ಅಹಂ।

ಸೋಕಂ ವಿನೋದಯಿಸ್ಸಾಮಿ, ಪುತ್ತನತ್ತವಿಯೋಗಜಂ॥

೧೮.

ಆಹ ಸಾ ಮೇ ಮಹಾರಾಜ, ಭಾತುನೋ ವಚನಂ ಗರು।

ಪಬ್ಬಾಜನೀಯಾ ಚ ಬಹೂ, ಗನ್ತಬ್ಬಂ ತತ್ಥ ತೇನ ಮೇ॥

೧೯.

‘‘ಸತ್ಥಘಾತಮನಾರಹಾ, ಮಹಾಬೋಧಿಮಹೀರುಹಾ।

ಕಥನ್ನು ಸಾಖಂ ಗಣಿಸ್ಸಂ’’, ಇತಿ ರಾಜಾ ವಿಚಿನ್ತಯೀ॥

೨೦.

ಅಮಚ್ಚಸ್ಸ ಮಹಾದೇವ-ನಾಮಕಸ್ಸ ಮತೇನ ಸೋ।

ಭಿಕ್ಖುಸಙ್ಘಂ ನಿಮನ್ತೇತ್ವಾ, ಭೋಜೇತ್ವಾ ಪುಚ್ಛಿ ಭೂಪತಿಂ॥

೨೧.

ಭನ್ತೇ ಲಂಕಂ ಮಹಾಬೋಧಿ, ಪೇಸೇತಬ್ಬಾ ನು ಖೋ ಇತಿ।

ಥೇರೋ ಮೋಗ್ಗಲಿಪುತ್ತೋ ಸೋ, ಪೇಸೇತಬ್ಬಾತಿ ಭಾಸಿಯ॥

೨೨.

ಕತಂ ಮಹಾಅಧಿಟ್ಠಾನ-ಪಞ್ಚಕಂ ಪಞ್ಚಚಕ್ಖುನಾ।

ಆಭಾಸಿ ರಞ್ಞೋ ತಂ ಸುತ್ವಾ, ತುಸ್ಸಿತ್ವಾ ಧರಣೀಪತಿ॥

೨೩.

ಸತ್ತಯೋಜನಿಕಂ ಮಗ್ಗಂ, ಸೋ ಮಹಾಬೋಧಿಗಾಮಿನಂ।

ಸೋಧಾಪೇತ್ವಾನ ಸಕ್ಕಚ್ಚಂ, ಭೂಸಾಪೇತಿ ಅನೇಕಧಾ॥

೨೪.

ಸುವಣ್ಣಂ ನೀಹರಾಪೇಸಿ, ಕಟಾಹಕರಣಾಯ ಚ।

ವಿಸ್ಸಕಮ್ಮೋ ಚ ಆಗನ್ತ್ವಾ, ಸತುಲಾಧಾರರೂಪವಾ॥

೨೫.

‘‘ಕಟಾಹಂ ಕಿಂ ಪಮಾಣಂ ನು, ಕರೋಮೀ’ತಿ ಅಪುಚ್ಛಿತಂ।

‘‘ಞತ್ವಾ ಪಮಾಣಂ ತ್ವಂಯೇವ, ಕರೋಹಿ’’ ಇತಿ ಭಾಸಿಯ॥

೨೬.

ಸುವಣ್ಣಾ ಗಹೇತ್ವಾನ, ಹತ್ಥೇನ ಪರಿಮಜ್ಜಿಯ।

ಕಟಾಹಂ ತಙ್ಖಣಂಯೇವ, ನಿಮ್ಮಿನಿತ್ವಾನ ಪಕ್ಕಮಿ॥

೨೭.

ನವಹತ್ಥಪರಿಕ್ಖೇಪಂ, ಪಞ್ಚಹತ್ಥಂ ಗಭೀರತೋ।

ತಿಹತ್ಥವಿಕ್ಖಮ್ಭಯುತಂ, ಅಟ್ಠಙ್ಗುಲಘನಂ ಸುಭಂ॥

೨೮.

ಯುವಸ್ಸ ಹತ್ಥಿನೋ ಸೋಣ್ಡ-ಪಮಾಣಮುಖವಟ್ಟಿಕಂ।

ಗಾಹಾ ಪೇತ್ವಾನ ತಂ ರಾಜಾ, ಬಾಲಸುರಸಮಪ್ಪಕಂ॥

೨೯.

ಸತ್ತಯೋಜನದೀಘಾಯ, ವಿತ್ಥತಾಯತಿ ಯೋಜನಂ।

ಸೇನಾಯ ಚತುರಙ್ಗಿನ್ಯಾ, ಮಹಾಭಿಕ್ಖುಗಣೇನ ಚ॥

೩೦.

ಉಪಗಮ್ಮ ಮಹಾಬೋಧಿಂ, ನಾನಾಲಙ್ಕಾರಭೂಸಿತಂ।

ನಾನಾರತನಚಿತ್ತಂ ತಂ, ವಿವಿಧದ್ಧಜಮಾಲಿನಿಂ॥

೩೧.

ನಾನಾಕುಸುಮಸಂಕಿಣ್ಣಂ , ನಾನಾತುರಿಯಘೋಸಿತಂ।

ಸೇನಾಯ ಪರಿವಾರೇತ್ವಾ, ಪರಿಕ್ಖಿಪಿಯ ಸಾಣಿಯಾ॥

೩೨.

ಮಹಾಥೇರಸಹಸ್ಸೇನ, ಪಮುಖೇನ ಮಹಾಗಣೇ।

ರಞ್ಞಂ ಪತ್ತಾಭಿಸೇಕಾನಂ, ಸಹಸ್ಸೇನಾ’ಧಿಕೇನ ಚ॥

೩೩.

ಅತ್ತಾನಂ ಪರಿವಾರೇತ್ವಾ, ಮಹಾಬೋಧಿಞ್ಚ ಸಾಧುಕಂ।

ಓಲೋಕೇಸಿ ಮಹಾಬೋಧಿಂ, ಪಗ್ಗಹೇತ್ವಾನ ಅಞ್ಜಲಿಂ॥

೩೪.

ತಸ್ಸಾ ದಕ್ಖಿಣಸಾಖಾಯ, ಚತುಹತ್ಥಪಮಾಣಕಂ।

ಠಾನಂ ಖನ್ಧಞ್ಚ ವಜ್ಜೇತ್ವಾ, ಸಾಖಾ ಅನ್ತರಧಾಯಿಸುಂ॥

೩೫.

ತಂ ಪಾಟಿಹಾರಿಯಂ ದಿಸ್ವಾ, ಪತೀತೋ ಪುಥವೀಪತಿ।

‘‘ಪೂಜೇಮ’ಹಂ ಮಹಾಬೋಧಿಂ, ರಜ್ಜೇನಾ’ಹಿ ಉದೀರಿಯ॥

೩೬.

ಅಭಿಸಿಞ್ಚಿ ಮಹಾಬೋಧೀಂ, ಮಹಾರಜ್ಜೇ ಮಹೀಪತಿ।

ಪುಪ್ಫಾದೀಹಿ ಮಹಾಬೋಧಿಂ, ಪೂಜೇತ್ವಾನ ಪದಕ್ಖಿಣಂ॥

೩೭.

ಕತ್ವಾ ಅಟ್ಠಸು ಠಾನೇಸು, ವನ್ದಿತ್ವಾನ ಕತಞ್ಜಲೀ।

ಸುವಣ್ಣಖಚಿತೇ ಪೀಠೇ, ನಾನಾರತನಮಣ್ಡಿತೇ॥

೩೮.

ಸ್ವಾರೋಹೇ ಯಾವ ಸಾಉಚ್ಚೇ, ತಂ ಸುವಣ್ಣಕಟಾಹಕಂ।

ಠಪಾಪೇತ್ವಾನ ಆರುಯ್ಹ, ಗಹೇತುಂ ಸಾಖಮುತ್ತಮಂ॥

೩೯.

ಆದಿಯಿತ್ವಾನ ಸೋವಣ್ಣ ತುಲಿಕಾಯ ಮನೋಸಿಲಂ।

ಲೇಖಂ ದತ್ವಾನ ಸಾಖಾಯ, ಸಚ್ಚಕ್ರಿಯಮಕಾ ಇತಿ॥

೪೦.

‘‘ಲಂಕಾದೀಪಂ ಯದಿ ಇತೋ, ಗನ್ತಬ್ಬಂ ಉರುಬೋಧಿಯಾ।

ನಿಬ್ಬೇಮತಿಕೋ ಬುದ್ಧಸ್ಸ, ಸಾಸನಮ್ಹಿ ಸಚೇ ಅಹಂ॥

೪೧.

ಸಯಂಯೇವ ಮಹಾಬೋಧಿ-ಸಾಖಾಯಂ ದಕ್ಖಿಣಾ ಸುಭಾ।

ಛಿಜ್ಜಿತ್ವಾನ ಪತಿಟ್ಠಾತು, ಇಧ ಹೇಮಕಟಾಹಕೇ॥

೪೨.

ಲೇಖಠಾನೇ ಮಹಾಬೋಧಿ, ಛಿಜ್ಜಿತ್ವಾ ಸಯಮೇವ ಸಾ।

ಗನ್ಧಕದ್ದಮಪೂರಸ್ಸ, ಕಟಾಹಸ್ಸೋ’ಪರಿಟ್ಠಿತಾ॥

೪೩.

ಮೂಲಲೇಖಾಯ ಉಪರಿ, ತಿಯಙ್ಗುಲತಿಯಙ್ಗುಲೇ।

ದದಂ ಮನೋಸಿಲಾ ಲೇಖಾ, ಪರಿಕ್ಖಿಪಿ ನರಿಸ್ಸರೋ॥

೪೪.

ಆದಿಯಾ ಥೂಲಮೂಲಾನಿ, ಖುದ್ದಕಾನಿ’ತರಾಹಿ ತು।

ನಿಕ್ಖಮಿತ್ವಾ ದಸ ದಸ, ಜಾಲೀಭೂತಾ ನಿಓತರುಂ॥

೪೫.

ತಂ ಪಾಟಿಹಾರಿಯಂ ದಿಸ್ವಾ, ರಾಜಾ’ತೀವ ಪಮೋದಿತೋ।

ತತ್ಥೇವಾ’ಕಾಸಿ ಉಕ್ಕುಟ್ಠಿಂ, ಸಮನ್ತಾ ಪರಿಸಾಪಿ ಚ॥

೪೬.

ಭಿಕ್ಖುಸಙ್ಘೋ ಸಾಧುಕಾರಂ, ತುಟ್ಠಚಿತ್ತೋ ಪಮೋದಯಿ।

ಚೇಲುಕ್ಖೇಪಸಹಸ್ಸಾನಿ, ಪವತ್ತಿಂಸು ಸಮನ್ತತೋ॥

೪೭.

ಏವಂ ಸತೇನ ಮೂಲಾನಂ, ತತ್ಥ ಸಾ ಗನ್ಧಕದ್ದಮೇ।

ಪತಿಟ್ಠಾಸಿ ಮಹಾಬೋಧಿ, ಪಸಾದೇನ್ತೀ ಮಹಾಜನಂ॥

೪೮.

ತಸ್ಸಾ ಖನ್ಧೋ ದಸಹತ್ಥೋ, ಪಞ್ಚಸಾಖಾ ಮನೋರಮಾ।

ಚತುಹತ್ಥಾ ಚತುಹತ್ಥಾ, ದಸಡ್ಢಫಲಮಣ್ಡಿತಾ॥

೪೯.

ಸಹಸ್ಸನ್ತು ಪಸಾಖಾನಂ, ಸಾಖಾನಂ ತಾಸಮಾಸಿ ಚ।

ಏವಂ ಆಸಿ ಮಹಾಬೋಧಿ, ಮನೋಹರಸಿರಿಧರಾ॥

೫೦.

ಕಟಾಹಮ್ಹಿ ಮಹಾಬೋಧಿ-ಪತಿಟ್ಠಿತಕ್ಖಣೇ ಮಹೀ।

ಅಕಮ್ಪಿ ಪಾಟಿಹೀರಾನಿ, ಅಹೇಸುಂ ವಿವಿಧಾನಿ ಚ॥

೫೧.

ಸಯಂ ನಾದೇಹಿ ತೂರಿಯಾನಂ, ದೇವೇಸು ಮಾನುಸೇಸು ಚ।

ಸಾಧುಕಾರನಿನಾದೇತಿ, ದೇವಬ್ರಹ್ಮಗಣಸ್ಸ ಚ॥

೫೨.

ಮೇಘಾನಂ ಮಿಗಪಕ್ಖಿನಂ, ಯಕ್ಖಾದೀನಂ ರವೇಹಿ ಚ।

ರವೇಹಿಚಮಹೀಕಮ್ಪೇ, ಏಕಕೋಲಾಹಲಂ ಅಹು॥

೫೩.

ಬೋಧಿಯಾ ಫಲಪತ್ತೇಹಿ, ಛಬ್ಬಣ್ಣರಸ್ಮಿಯೋ ಸುಭಾ।

ನಿಕ್ಖಮಿತ್ವಾ ಚಕ್ಕವಾಳಂ, ಸಕಲಾ ಸೋಭಯಿಂಸು ಚ॥

೫೪.

ಸಕಟಾಹಾ ಮಹಾಬೋಧಿ, ಉಗ್ಗನ್ತ್ವಾನ ತತೋ ನಭಂ।

ಅಟ್ಠಾಸಿ ಹಿಮಗಬ್ಭಮ್ಹಿ, ಸತ್ತಾಹಾನಿ ಅದಸ್ಸನಾ॥

೫೫.

ರಾಜಾ ಓರುಯ್ಹ ಪೀಠಮ್ಹಾ, ತಂ ಸತ್ತಾಹಂ ತಹಿಂ ವಸಂ।

ನಿಚ್ಚಂ ಮಹಾಬೋಧಿಪೂಜಂ, ಅಕಾಸಿ ಚ ಅನೇಕಧಾ॥

೫೬.

ಅತೀತೇ ತಮ್ಹಿ ಸತ್ತಾಹೇ, ಸಬ್ಬೇ ಹಿಮವಲಾವಕಾ।

ಪವಿಸಿಂಸು ಮಹಾಬೋಧಿಂ, ಸಬ್ಬಾಕಾ ರಂಸಿಯೋಪಿ ಚ॥

೫೭.

ಸುದ್ಧೇನಕದಿಸಿಸ್ಸಿತ್ಥ, ಸಾಕಟಾಹೇ ಪತ್ತಿಟ್ಠಿತಾ।

ಮಹಾಜನಸ್ಸ ಸಬ್ಬಸ್ಸ, ಮಹಾಬೋಧಿ ಮನೋರಮಾ॥

೫೮.

ಪವತ್ತಮ್ಹಿ ಮಹಾಬೋಧಿ, ವಿವಿಧೇ ಪಾಟಿಹಾರಿಯೇ।

ವಿಮ್ಹಾಪಯನ್ತಿ ಜನತಂ, ಪಥವೀತಲಮೋರುಹಿ॥

೫೯.

ಪಾಟಿಹಿರೇಹಿ’ನೇಕೇಹಿ , ತೇಹಿ ಸೋ ಪೀಣಿತೋ ಪುನ।

ಮಹಾರಾಜಾ ಮಹಾಬೋಧಿಂ, ಮಹಾರಜ್ಜೇನ ಪೂಜಯಿ॥

೬೦.

ಮಹಾಬೋಧಿಂ ಮಹಾರಜ್ಜೇ-ನಾಭಿಸಿಞ್ಚಿಯ ಪೂಜಯಂ।

ನಾನಾಪೂಜಾಹಿ ಸತ್ತಾಹಂ, ಪುನ ತತ್ಥೇವ ಸೋ ವಸಿ॥

೬೧.

ಅಸ್ಸಯುಜಸುಕ್ಕಪಕ್ಖೇ, ಪನ್ನರಸಉಪೋಸಥೇ।

ಅಗ್ಗಹೇಸಿ ಮಹಾಬೋಧಿಂ, ದ್ವಿಸತ್ತಾಹಮಚ್ಚಯೇ ತತೋ॥

೬೨.

ಅಸ್ಸಯುಜಕಾಳಪಕ್ಖೇ, ಚತುದ್ದಸಉಪೋಸಥೇ।

ರಥೇ ಸುಭೇ ಠಪೇತ್ವಾನ, ಮಹಾಬೋಧಿಂ ರಥೇಸಭೋ॥

೬೩.

ಪೂಜೇನ್ತೋ ತಂ ದಿನಂಯೇವ, ಉಪನೇತ್ವಾ ಸಕಂ ಪುರಂ।

ಅಲಙ್ಕರಿತ್ವಾ ಬಹುಧಾ, ಕಾರೇತ್ವಾ ಮಣ್ಡಪಂ ಸುಭಂ॥

೬೪.

ಕತ್ತಿಕಸುಕ್ಕಪಕ್ಖಸ್ಸ, ದಿನೇ ಪಾಟಿಪದೇ ತಹಿಂ।

ಮಹಾಬೋಧಿಂ ಮಹಾಸಾಲ-ಮೂಲೇ ಪಾಚಿನತೇ ಸುಭೇ॥

೬೫.

ಠಪಾಪೇತ್ವಾನ ಕಾರೇಸಿ, ಪೂಜಾ’ನೇಕಾ ದಿನೇ ದಿನೇ।

ಗಾಹತೋ ಸತ್ತರಸಮೇ, ವಿವಸೇ ತು ನವಙ್ಕಿರಾ॥

೬೬.

ಸಕಿಂ ಯೇವಅಜಾಯಿಂಸು, ತಸ್ಸಾ’ನೇಕನರಾಧಿಪೋ।

ತುಟ್ಠಚಿತ್ತೋ ಮಹಾಬೋಧಿಂ, ಪುನ ರಜ್ಜೇನ ಪೂಜಯಿ॥

೬೭.

ಮಹಾರಜ್ಜೇ’ಭಿ ಸಿಞ್ಚಿತ್ವಾ, ಮಹಾಬೋಧಿಂ ಮಹಿಸ್ಸರೋ।

ಕಾರೇಸಿ ಚ ಮಹಾಬೋಧಿ-ಪೂಜಾ ನಾನಪ್ಪಕಾರಕಂ॥

೬೮.

ಇತಿ ಕುಸುಮಪುರೇ ಸರೇಸರಂಸಾ,

ಬಹುವಿಧಚಾರುಧಜಾಕುಲಾವಿಸಾಲಾ।

ಸುರುಚಿರಪವರೋರು ಬೋಧಿಪೂಜಾ,

ಮರುನರಚಿತ್ತವಿಕಾಸಿನೀ ಅಹೋಸೀತಿ॥

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ಮಹಾಬೋಧಿಗ್ಗಹಣೋ ನಾಮ

ಅಟ್ಠಾರಸಮೋ ಪರಿಚ್ಛೇದೋ।