ಚತುವೀಸತಿಮ ಪರಿಚ್ಛೇದ

ದ್ವೇಭಾತಿಕಯುದ್ಧಂ

೧.

ಹತ್ಥಸ್ಸ ಥರುಕಮ್ಮಸ್ಸ, ಕುಸಲೋ ಕತುಪಾಸನೋ।

ಸೋ ಗಾಮಣಿರಾಜಸುತೋ, ಮಹಾಗಾಮೇ ವಸೀ ತದಾ॥

೨.

ರಾಜಾ ರಾಜಸುತಂ ತಿಸ್ಸಂ, ದೀಘವಾಪಿಮ್ಹಿ ವಾಸಯಿ।

ಆರಕ್ಖಿತುಂ ಜನಪದಂ, ಸಮ್ಪನ್ನ ಬಲವಾಹನಂ॥

೩.

ಕುಮಾರೋ ಗಾಮಣಿಕಾಲೇ, ಸಮ್ಪಸ್ಸನ್ತೋ ಬಲಂ ಸಕಂ।

‘‘ಯುಜ್ಝಿಸ್ಸಂ ದಮಿಳೇಹೀ’’ತಿ, ಪಿತುರಞ್ಞೋ ಕಥಾಪಯೀ॥

೪.

ರಾಜಾ ತಂ ಅನುರಕ್ಖನ್ತೋ, ‘‘ಓರಗಙ್ಗಂ ಅಲಂ’’ ಇತಿ।

ವಾರೇಸಿ ಯಾವತತಿಯಂ, ಸೋ ತಥೇವ ಕಥಾಪಯೀ॥

೫.

ಪಿತಾ ಮೇ ಪುರಿಸೋ ಹೋನ್ತೋ, ನೇ’ವಂ ವಕ್ಖತಿ ತೇನಿ’ದಂ।

ಪಿಲನ್ಧತೂತಿ ಪೇಸೇಸಿ, ಇತ್ಥಾಲಙ್ಕಾರಮಸ್ಸ ಸೋ॥

೬.

ರಾಜಾ’ಹ ತಸ್ಸ ಕುಜ್ಝಿತ್ವಾ, ‘‘ಕರೋಥ ಹೇಮಸಙ್ಖಲಿಂ।

ತಾಯ ತಂ ಬನ್ಧಯಿಸ್ಸಾಮಿ, ನಾ’ಞ್ಞಥಾ ರಕ್ಖಿಯೋ ಹಿ ಸೋ॥

೭.

ಪಲಾಯಿತ್ವಾನ ಮಲಯಂ, ಕುಜ್ಝಿತ್ವಾ ಪಿತುನೋ ಅಗಾ।

ದುಟ್ಠತ್ತಾಯೇವ ಪಿತರಿ, ಆಹು ತಂ ದುಟ್ಠಗಾಮಣಿ॥

೮.

ರಾಜಾ’ಥ ಆರಭೀ ಕಾತುಂ, ಮಹಾಮಙ್ಗಲಚೇತಿಯಂ।

ನಿಟ್ಠಿತೇ ಚೇತಿಯೇ ಸಙ್ಘಂ, ಸನ್ನಿಪಾತಯಿ ಭೂಪತಿ॥

೯.

ದ್ವಾದಸಾ’ಸುಂ ಸಹಸ್ಸಾನಿ, ಭಿಕ್ಖೂ ಚಿತ್ತಲಪಬ್ಬತಾ।

ತತೋ ತತೋ ದ್ವಾದಸೇವ, ಸಹಸ್ಸಾನಿ ಸಮಾಗಮುಂ॥

೧೦.

ಕತ್ವಾನ ಚೇತಿಯಮಹಂ, ರಾಜಾ ಸಙ್ಘಸ್ಸ ಸಮ್ಮುಖಾ।

ಸಬ್ಬೇ ಯೋಧೇ ಸಮಾನೇತ್ವಾ, ಕಾರೇಸಿ ಸಪಥಂ ತದಾ॥

೧೧.

‘‘ಪುತ್ತಾನಂ ಕಲಹಟ್ಠಾನಂ, ನ ಗಚ್ಛಿಸ್ಸಾಮ ನೋ’’ಇತಿ।

ಅಕಂಸು ಸಪಥಂ ಸಬ್ಬೇ, ತಂ ಯುದ್ಧಂ ತೇನ ನಾಗಮುಂ॥

೧೨.

ಚತುಸಟ್ಠಿ ವಿಹಾರೇ ಸೋ, ಕಾರಾಪೇತ್ವಾ ಮಹೀಪತಿ।

ತತ್ತಕಾನೇವ ವಸ್ಸಾನಿ, ಠತ್ವಾ ಮರಿತಹಿಂ ತದಾ॥

೧೩.

ರಞ್ಞೋ ಸರೀರಂ ಗಾಹೇತ್ವಾ, ಛನ್ನಯಾನೇನ ರಾಜಿನಿ।

ನೇತ್ವಾ ತಿಸ್ಸ ಮಹಾರಾಮಂ, ತಂ ಸಙ್ಘಸ್ಸ ನಿವೇದಯಿ॥

೧೪.

ಸುತ್ವಾ ತಿಸ್ಸಕುಮಾರೋ ತಂ, ಆಗನ್ತ್ವಾ ದೀಘವಾಪಿತೋ।

ಸರೀರಕಿಚ್ಚಂ ಕಾರೇತ್ವಾ, ಸಕ್ಕಚ್ಚಂ ಪಿತುನೋ ಸಯಂ॥

೧೫.

ಮಾತರಂ ಕಣ್ಡುಲಂ ಹತ್ಥಿಂ, ಆದಿಯಿತ್ವಾ ಮಹಬ್ಬಲೋ।

ಭಾತುಭಯಾ ದೀಘವಾಪಿಂ, ಅಗಮಾಸಿ ಲಹುಂ ತತೋ॥

೧೬.

ತಂ ಪವತ್ತಿಂ ನಿವೇದೇತುಂ, ದುಟ್ಠಗಾಮಣಿ ಸನ್ತಿಕಂ।

ಲೇಖಂ ದತ್ವಾ ವಿಸಜ್ಜೇಸುಂ, ಸಚ್ಚೇಮಚ್ಚಾ ಸಮಾಗತಾ॥

೧೭.

ಸೋ ಗುತ್ತಹಾಲಮಾಗನ್ತ್ವಾ, ತತ್ಥ ಚಾರೇ ವಿಸಜ್ಜಿಯ।

ಮಹಾಗಾಮಮುಪಗನ್ತ್ವಾ, ಸಯಂ ರಜ್ಜೇ’ಭಿಸೇಚಯಿ॥

೧೮.

ಮಾತತ್ಥಂ ಕಣ್ಡೂಲತ್ಥಞ್ಚ, ಭಾತುಲೇಖಂ ವಿಸಜ್ಜಯಿ।

ಅಲದ್ಧಾ ಯಾವತತಿಯಂ, ಯುದ್ಧಾಯ ಸಮುಪಾಗಮಿ॥

೧೯.

ಅಹು ದ್ವಿನ್ನಂ ಮಹಾಯುದ್ಧಂ, ಚೂಳಙ್ಗಣಿಯಪಿಟ್ಠಿಯಂ।

ತತ್ಥ ನೇಕಸಹಸ್ಸಾನಿ, ಪತಿಂಸು ರಾಜಿನೋ ನರಾ॥

೨೦.

ರಾಜಾ ಚ ತಿಸ್ಸಾಮಚ್ಚೋ ಚ, ವಳವಾದೀಘುತುನಿಕಾ।

ತಯೋಯೇವ ಪಲಾಯಿಂಸು, ಕುಮಾರೋ ಅನುಬನ್ಧಿತೇ॥

೨೧.

ಉಭಿನ್ನಮನ್ತರೇ ಭಿಕ್ಖೂ, ಮನ್ತಯಿಂಸು ಮಹೀಧರಂ।

ತಂ ದಿಸ್ವಾ ‘‘ಭಿಕ್ಖುಸಙ್ಘಸ್ಸ, ಕಮ್ಮಂ’’ ಇತಿ ನಿವತ್ತಿ ಸೋ॥

೨೨.

ಕಪ್ಪಕನ್ದರನಜ್ಜಾಸೋ, ಜವಮಾಲಿತಿತ್ಥಮಾಗತೋ।

ರಾಜಾ’ಹ ತಿಸ್ಸಮಚ್ಚಂ ತಂ, ‘‘ಛಾತಜ್ಝತ್ತಾ ಮಯಂ’’ಇತಿ॥

೨೩.

ಸುವಣ್ಣಸರಕೇ ಖಿತ್ತ-ಭತ್ತಂ ನೀಹರಿತಸ್ಸ ಸೋ।

ಸಙ್ಘೇ ದತ್ವಾ ಭುಞ್ಜನತೋ, ಕಾರೇತ್ವಾ ಚತುಭಾಗಕಂ॥

೨೪.

‘‘ಘೋಸೇಹಿ ಕಾಲ’’ಮಿಚ್ಚಾ’ಹ,

ತಿಸ್ಸೋ ಕಾಲಮಘೋಸಯಿ।

ಸುಣಿತ್ವಾ ದಿಬ್ಬಸೋತೇನ,

ರಞ್ಞೋ ಸಕ್ಖಾಯ ದಾಯಕೋ॥

೨೫.

ಥೇರೋ ಪಿಯಙ್ಗು ದೀಪಟ್ಠೋ, ಥೇರಂ ತತ್ಥ ನಿಯೋಜಯಿ।

ತಿಸ್ಸಂ ಕುಟುಮ್ಬಿಕಸುತಂ, ಸೋ ತತ್ಥ ನಭಸಾ’ಗಮಾ॥

೨೬.

ತಸ್ಸ ತಿಸ್ಸೋ ಕರಾಪತ್ತ-ಆದಾಯಾ’ದಾಸಿ ರಾಜಿನೋ।

ಸಙ್ಘಸ್ಸ ಭಾಗಂ ಸಮ್ಭಾಗಂ, ರಾಜಾ ಪತ್ತೇ ಖಿಪಾಪಯಿ॥

೨೭.

ಸಮ್ಭಾಗಂ ಖಿಪಿ ತಿಸ್ಸೋ ಚ, ಸಮ್ಭಾಗಂ ವಳವಾಪಿ ಚ।

ನ ಇಚ್ಛಿತಸ್ಸಾಭಾಗಞ್ಚ, ತಿಸ್ಸೋ ಪತ್ತಮ್ಹಿ ಪಕ್ಖಿಪಿ॥

೨೮.

ಭತ್ತಸ್ಸ ಪುಣ್ಣಪತ್ತಂ ತಂ, ಅದಾಥೇರಸ್ಸ ಭೂಪತಿ।

ಅದಾ ಗೋತಮಥೇರಸ್ಸ, ಸೋ ಗನ್ತ್ವಾ ನಭಸಾ ಲಹುಂ॥

೨೯.

ಭಿಕ್ಖೂನಂ ಭುಞ್ಜಮಾನಾನಂ, ದತ್ವಾ ಆಲೋಪಭಾಗಸೋ।

ಪಞ್ಚಸತಾನಂ ಸೋ ಥೇರೋ, ಲದ್ಧೇಹಿ ತು ತದನ್ತಿಕಾ॥

೩೦.

ಭಾಗೇಹಿ ಪತ್ತಂ ಪೂರೇತ್ವಾ, ಆಕಾಸೇ ಖಿಪಿ ರಾಜಿನೋ।

ದಿಸ್ವಾ’ ಗತಂ ಗಹೇತ್ವಾ ತಂ, ತಿಸ್ಸೋ ಭೋಜಿಸಿ ಭೂಪತಿಂ॥

೩೧.

ಭುಞ್ಜಿತ್ವಾನ ಸಯಞ್ಜಾಪಿ, ವಳವಞ್ಚ ಅಭೋಜಯಿ।

ಸತ್ತಾಹಂ ಚುಮ್ಬಟಂ ಕತ್ವಾ, ರಾಜಾ ಪತ್ತಂ ವಿಸಜ್ಜಯಿ॥

೩೨.

ಗನ್ತ್ವಾನ ಸೋ ಮಹಾಗಾಮಂ, ಸಮಾದಾಯ ಬಲಂ ಪುನ।

ಸಟ್ಠಿಸಹಸ್ಸಂ ಯುದ್ಧಾಯ, ಗನ್ತ್ವಾ ಯುಜ್ಝಿ ಸಭಾತರಾ॥

೩೩.

ರಾಜಾ ವಳವಮಾರುಯ್ಹ, ತಿಸ್ಸೋ ಕಣ್ಡೂಲ ಹತ್ಥಿನಂ।

ದ್ವೇ ಭಾತರೋ ಸಮಾಗಞ್ಛುಂ, ಯುಜ್ಝಮಾನಾ ರಣೇ ತದಾ॥

೩೪.

ರಾಜಾ ಕರಿಂ ಕರಿತ್ವ’ನ್ತೋ, ವಳವಾಮಣ್ಡಲಂ ಅಕಾ।

ತಥಾಪಿ ಛಿದ್ದಂ ನೋ ದಿಸ್ವಾ, ಲಙ್ಘಾ ಪೇತುಂ ಮತಿಂಅಕಾ॥

೩೫.

ವಳವಂ ಲಙ್ಘಯಿತ್ವಾನ, ಹತ್ಥಿನಂ ಭಾತಿಕೋ’ಪರಿ।

ತೋಮರಂ ಖಿಪಿ ಚಮ್ಮಂವ, ಯಥಾ ಛಿಜ್ಜತಿ ಪಿಟ್ಠಿಯಂ॥

೩೬.

ಅನೇಕಾನಿ ಸಹಸ್ಸಾನಿ, ಕುಮಾರಸ್ಸ ನರಾತಹಿಂ।

ಪತಿಂಸು ಯುದ್ಧೇ ಯುಜ್ಝನ್ತಾ, ಭಿಜ್ಜ ಚೇವ ಮಹಬ್ಬಲಂ॥

೩೭.

‘‘ಆರೋಹಕಸ್ಸ ವೇಕಲ್ಲಾ, ಇತ್ಥೀ ಮಂ ಲಙ್ಘಯೀ’’ಇತಿ।

ಕುದ್ಧೋಕರೀ ತಂ ಚಾಲೇನ್ತೋ, ರುಕ್ಖಮೇಕ ಮುಪಾಗಮಿ॥

೩೮.

ಕುಮಾರೋ ಆರುಹೀ ರುಕ್ಖಂ, ಹತ್ಥೀ ಸಾಮಿಮುಪಾಗಮಿ।

ತಮಾರುಯ್ಹ ಪಲಾಯನ್ತಂ, ಕುಮಾರೋ ಮನುಬನ್ಧಿ ಸೋ॥

೩೯.

ಪವಿಸಿತ್ವಾ ವಿಹಾರಂ ಸೋ, ಮಹಾಥೇರ ಘರಂಗತೋ।

ನಿಪಜ್ಜಹೇಟ್ಠಾ ಮಞ್ಚಸ್ಸ, ಕುಮಾರೋ ಭಾತುನೋಭಯಾ॥

೪೦.

ಪಸಾರಯಿ ಮಹಾಥೇರೋ, ಚೀವರಂ ತತ್ಥ ಮಞ್ಚಕೇ।

ರಾಜಾ ಅನುಪದಂ ಗನ್ತ್ವಾ, ‘‘ಕುಹಿಂ ತಿಸ್ಸೋ’’ತಿ ಪುಚ್ಛಥ॥

೪೧.

‘‘ಮಞ್ಚೇ ತತ್ಥ ಮಹಾರಾಜ’’, ಇತಿ ಥೇರೋ ಅವೋಚ ತಂ।

ಹೇಟ್ಠಾ ಮಞ್ಚೇತಿ ಜಾನಿತ್ವಾ, ತತೋ ನಿಕ್ಖಮ್ಮ ಭೂಪತಿ॥

೪೨.

ಸಮನ್ತತೋ ವಿಹಾರಸ್ಸ, ರಕ್ಖಂ ಕಾರಯಿ ತಂ ಪನ।

ಪಞ್ಚಕಮ್ಹಿ ನಿಪಜ್ಜೇತ್ವಾ, ದತ್ವಾ ಉಪರಿ ಚೀವರಂ॥

೪೩.

ಮಞ್ಚಪಾದೇಸು ಗಣ್ಹಿತ್ವಾ, ಚತ್ತಾರೋ ದಹರಾ ಯತೀ।

ಮತಭಿಕ್ಖುನಿಯಾಮೇನ, ಕುಮಾರಂ ಬಹಿ ನೀಹರುಂ॥

೪೪.

ನೀಯಮಾನನ್ತು ತಂ ಞತ್ವಾ, ಇಧ ಮಾಹ ಮಹೀಪತಿ।

‘‘ತಿಸ್ಸ ತ್ವಂ ಕುಲದೇವತಾನಂ, ಸೀಸೇ ಹುತ್ವಾನ ನಿಯ್ಯಾಸಿ॥

೪೫.

ಬಲಕ್ಕಾರೇನ ಗಹಣಂ, ಕುಲದೇವೇಹಿ ನತ್ಥಿ ಮೇ।

ಗುಣಂ ತ್ವಂ ಕುಲದೇವಾನಂ, ಸರೇಯ್ಯಾಸಿ ಕದಾಚಿಪಿ’’॥

೪೬.

ತತೋಯೇವ ಮಹಾಗಾಮಂ, ಅಗಮಾಸಿ ಮಹೀಪತಿ।

ಆಣಾಪೇಸಿ ಚ ತತ್ಥೇವ, ಮಾತರಂ ಮಾತುಗಾರವೋ॥

೪೭.

[ವಸ್ಸಾನಿ ಅಟ್ಠಸಟ್ಠಿಂಸೋ, ಅಟ್ಠಾ ಧಮ್ಮಟ್ಠಮಾನಸೋ।

ಅಟ್ಠಸಟ್ಠಿವಿಹಾರೇ ಚ, ಕಾರಾಪೇಸಿ ಮಹೀಪತಿ॥]

೪೮.

ನಿಕ್ಖಾಮಿತೋ ಸೋ ಭಿಕ್ಖೂಹಿ, ತಿಸ್ಸೋರಾಜ ಸುತೋ ಪನ।

ದೀಘವಾಪಿಂ ತತೋಯೇವ, ಅಗಮ’ಞ್ಞತರೋ ವಿಯ॥

೪೯.

ಕುಮಾರೋ ಗೋಧಗತ್ತಸ್ಸ, ತಿಸ್ಸಥೇರಸ್ಸ ಆಹ ಸೋ।

‘‘ಸಾಪರಾಧೋ ಅಹಂ ಭನ್ತೇ, ಖಮಾಪೇಸ್ಸಾಮಿ ಭಾತರಂ॥

೫೦.

ವೇಯ್ಯಾವಚ್ಚಕರಾ ಕಾರಂ, ತಿಸ್ಸಂ ಪಞ್ಚಸತಾನಿ ಚ।

ಭಿಕ್ಖುನಮಾದಿಯಿತ್ವಾ ಸೋ, ಥೇರೋ ರಾಜ ಮುಪಾಗಮಿ॥

೫೧.

ರಾಜಪುತ್ತಂ ಠಪೇತ್ವಾನ, ಥೇರೋ ಸೋಪಾನ ಮತ್ಥಕೇ।

ಸಸಙ್ಘೋ ಪಾವಿಸಿ ಸದ್ಧೋ, ನಿಸೀದಾವಿಯ ಭೂಮಿಪೋ॥

೫೨.

ಉಪಾನಯೀ ಯಾಗುಆದಿಂ, ಥೇರೋ ಪತ್ತಂ ವಿಧೇಸಿಸೋ।

‘‘ಕಿನ್ತಿ ವುತ್ತೋ’ಬ್ರವಿ ತಿಸ್ಸಂ, ಆದಾಯ ಅಗತಾ’’ಇತಿ॥

೫೩.

‘‘ಕುಹಿಂ ಚೋರೋ’’ತಿ ವುತ್ತೋ ಚ, ಠಿತಠಾನಂ ನಿವೇದಯಿ।

ವಿಹಾರದೇವೀ ಗನ್ತ್ವಾನ, ಛಾದಿಯಠಾಸಿ ಪುತ್ತಕ॥

೫೪.

ರಾಜಾ’ಹ ಥೇರಂ ‘‘ಞಾತೋ ವೋ,

ದಾಸಭಾವೋ ಇದಾನಿ ನೋ।

ಸಾಮಣೇರಂ ಪೇಸಯೇಥ,

ತುಮ್ಹೇ ಮೇ ಸತ್ತವಸ್ಸಿಕಂ॥

೫೫.

ಜನಕ್ಖಯಂ ವಿನಾಯೇವ, ಕಲಹೋ ನ ಭವೇಯ್ಯ ನೋ।

ರಾಜಾ ಸಙ್ಘಸ್ಸ ದೋಸೇಸೋ, ಭಂಘೇ ದಣ್ಡಂ ಕರಿಸ್ಸತಿ॥

೫೬.

ಹೇಸ್ಸತಾ’ಗತಕಿಚ್ಚಾ ವೋ,

ಯಾಗಾದಿಂ ಗಣ್ಹಾಥಾತಿ ಸೋ।

ದತ್ವಾ ತಂ ಭಿಕ್ಖುಸಙ್ಘಸ್ಸ,

ಪಕ್ಕೋಸಿತ್ವಾನ ಭಾತರಂ॥

೫೭.

ತತ್ಥೇವ ಸಙ್ಘಮಜ್ಝಮ್ಹಿ, ನಿಸಿನ್ನೋ ಭಾತರಾ ಸಹ।

ಭುಞ್ಜಿತ್ವಾ ಏಕತೋಯೇವ, ಭಿಕ್ಖು ಸಙ್ಘಂ ವಿಸಜ್ಜಯಿ॥

೫೮.

ಸಸ್ಸಕಮ್ಮಾನಿ ಕಾರೇತುಂ, ತಿಸ್ಸಂ ತತ್ಥೇವ ಪಾಹಿಣಿ।

ಸಯಮ್ಪಿ ಭೇರಿಂ ಚಾರೇತ್ವಾ, ಸಸ್ಸಕಮ್ಮಾನಿ ಕಾರಯಿ॥

೫೯.

ಇತಿ ವೇರಮನೇಕವಿಕಪ್ಪಚಿತಂ,

ಸಮಯನ್ತಿ ಬಹುಂ ಅಪಿ ಸಪ್ಪುರಿಸಂ।

ಇತಿ ಚಿನ್ತಿಯ ಕೋಹಿ ನರೋ ಮತಿಮಾ,

ನ ಭವೇಯ್ಯ ಪರೇಸು ಸುಸನ್ತ ಮನೋತಿ॥

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ದ್ವೇಭಾತಿಕಯುದ್ಧಂ ನಾಮ

ಚತುವೀಸತಿಮೋ ಪರಿಚ್ಛೇದೋ।